قەیس وەیس:

چاڤەڕێ‌ دهێتە كرن ئەڤرۆ ل دەمژمێر 3:30 ئێڤاری چار یاری ژ هەڤڕكیێن گەڕا 18 یا خولا پلا نایابا كوردستانێ‌ یا تەپا پێی بهێنە ئەنجامدان، هەردو نوونەرێن پارێزگەهێ‌ زاخۆ و ئاكرێ‌ بەر ب باژێرێ‌ سلێمانیێ‌ بڕێكەفتینە و ب ژڤانن بۆ یارییا خوە یا ئەڤرۆ و شەڕی بۆ دەستڤە ئینانا سێ‌ خالان.
ل یاریگەها ئاشتی تیما یانەیا زاخۆ دێ‌ بنە مێڤانێن تیما یانەیا سیرۆانی نوو د یارییەكا پری زەحمەت و ئاستەنگ دا بۆ كوڕێن خابووری، زاخۆ ب25 خالان رێزا حەفتێ‌ دهێت ژ پێنج سەركەفتن و 10 وەكهەڤی و دو خوسارەتییان، بەرانبەر دا خودانێن ئەردی 28 خال كۆمكرینە و رێزا سێیێ‌ دهێت و هیڤیێن مەزن هەنە د ناڤ ئەرد و جەماوەرێ‌ خوە دا سەركەفتنێ‌ بینت پێخەمەت سەرێ‌ لیستێ‌، لێ‌ تیما زاخۆ ژی پاریەكێ‌ ب سانەهی نابیت دێ‌ شەڕی كەت و بەردەوامیێ‌ دەتە هەڤڕكیێ‌ بۆ رێزێن ئێكێ‌.
ژلایەكێ‌ دووڤە تیما یانەیا ئاكرێ‌ ژی ل باژێرێ‌ سلێمانیێ‌ یە و دێ‌ بیتە مێڤانا یانەیا رانیە یاریەكا ب سانەهی نابیت بۆ كوڕێن پایتەختێ‌ نەورۆزێ‌ ئەوێن ئەڤە دو حەفتییە سەرێ‌ لیستێ‌ ژ دەستدایین و د نوكە ب 29 خالان رێزا دویێ‌ دهێن ژ هەشت سەركەفتن، پێنج وەكهەڤی و چار خوسارەتییان و دێ‌ شەڕی بۆ ڤەگەڕاندنا سەرێ‌ لیستێ‌ كەن ئەوا تیما شێروانە ب 31 خالان رێزا ئێكێ‌ یە، تیما ئاكرێ‌ ئەوێن بۆ وەرزێ‌ ئەڤ سالە ئارمانجا خوە كرییە ئەو هیڤی و دەستڤە ئینانا ناسناڤی، هەرچەندە یانەیا رانیە دناڤ ئەرد و جەماوەرێ‌ خوە شیانێن باش هەنە ئەوا 21 خال كۆمكرین و رێزا نەهێ‌ دهێت.
بڕیارە ئەڤرۆ دو یاریێن دی ژی بڤی رەنگی بهێنە كرن ئەو ژی، دەربەندیخان- هەولێر و چوارقۆرنە بیتە مێڤانا شەقلاوە.

تیما تەپا پێی یا یانەیا زاخۆ دەربازبوو قۆناغا 16ێ‌ ژ قارەمانییا كۆپا ئیراقێ‌ پشتی شیایی ب دو گۆلێن پاقژ ب سەركەڤیت ل سەر یانەیا عەفك ژلایێ‌ خوەڤە دهۆكێ‌ پلێتا هەمان قۆناغ ژ دەستدا پشتی ب لێدانێن پەنەلتییان تووشی خوسارەتیێ‌ بوویی، د یاریێن واندا ئەوا دوهی ژ چارچووڤەیێ‌ قۆناغا 32ێ‌ هاتینە كرن.
ل یاریگەها دهۆكێ‌ و د گەش و سەقایەكێ‌ سار و بارانی دا تیما دهۆكێ‌ تووشی خوسارەتیێ‌ بوو ب لێدانێن پەنەلتییان، هەرچەندە د هەردو نیڤان دا ئەلهۆیێن چیا ئاستەكێ‌ باش نیشان دا لێ‌ تیما مێڤان شیا گۆلا ئێكێ‌ بینت ئەوا ژلایێ‌ هێرشبەرێ‌ وێ‌ نێجیری فیدیلێس كۆكۆیی د خولەكا 31ێ‌ دا تۆماركری، د نیڤا دویێ‌ دا یاریزانێن دهۆكێ‌ گڤاشتنێن مەزن ل سەر گۆلا نەفت میسان كرن و هێرشێن بەردەوام ل هەردو لایێن یاریگەهێ‌ بۆ گۆلا مێڤانان ئاراستە دكرن هەتا خولەكا 99ێ‌ و دەرئەنجامێن ئەوان هێرشان هێرشبەرێ‌ دهۆكێ‌ سیابەند عەگید خودانێ‌ هژمارەیا درێسێ‌ 99 شیا گۆلا وەكهەڤیێ‌ بۆ تیما خوە بینت، یاری بەر ب پەنەلتیان چوو و ئەنجامێ‌ وێ‌ 8-7 بۆ تیما نەفت میسان ب دووماهی هات و شیان ل سەر كیستێ‌ تیما دهۆكێ‌ دەربازبیتە قۆناغا 16ێ‌ یا كۆپا ئیراقێ‌.
ژلایێ‌ خوەڤە تیما یانەیا زاخۆ سەركەفتنەكا گرنگ و ژ هەژی ل سەر خودانێن ئەردی تیما یانەیا عەفك ل باژێرێ‌ دیوانییە ئینا ب دو گۆلێن پاقژ، هەردو گۆلێن كوڕێن خابووری ژلایێ‌ یاریزانێ‌ وێ‌ یێ‌ هەلبژارتیێ‌ ئیراقێ‌ ئەمجەد عتۆان د خولەكێن 60 و 73ێ‌ دا تۆماركرن، د ماوەیێ‌ هەردو نیڤان دا زاخۆ شیا ئاستەكێ‌ باش و بەردەوام پێشكێش بكەت و بەر ب قۆناغا 16ێ‌ یا كۆپا ئیراقێ‌ بچیت.
ژ ئەنجامێن یاریێن دی، یانەیا نەورۆز ژی دەبازبوو قۆناغا 16ێ‌ ب سەركەفتنا خوە یا باش ل سەر یانەیا ئەلقاسم ب 2-1 گۆلان، پێشمەرگە ب گۆلەكێ‌ دگەل نەفتێ‌ خوسارەت بوو، هەروەسان، مینا 3-1 نەفت ئەلوەسەت، كۆفە چنە-2 كەرخ، حدود 3-1 ئەلفەهەد، بریارە سێ‌ یاریێن دی ئەڤرۆ بهێنە ئەنجامدان، نەفت ئەلبەسرا- ئەلنەجەف، ئەمانەت بەغدا- ئەلكرمە، كەربەلا- مەسافی ئەلجنوب.
بۆ زانین ل دووڤ سیستەمێ‌ قارەمانیێ‌ سەركەفتیێن ڤێ‌ قۆناغێ‌ دێ‌ بەرانبەری شەش یانەیێن دی بن ئەوێن پێشوەخت د قۆناغا 16ێ‌ دا پشتی پشككێشان دهێتە كرن ئەو ژی هەولێر، زەورا، شورتە، تەلەبە، جەوییە و كارەبا، ئەڤە ئەو یانە نە ل وەرزێ‌ بۆری رێزێن ئێكێ‌ هەتا شەشێ‌ هاتبوو و ئێكسەر هاتینە قۆناغا 16ێ‌ یا كۆپا ئیراقێ‌.

هەردو نوونەرێن پارێزگەهێ‌ تیما یانەیا ئافرەتێن دهۆك و ئافرەتێن یانەیا زاخۆ بوونە قارەمانێن كۆمێن خوە پشتی ب دووماهی هاتنا قۆناغا كۆمان ئەوا ب ئەنجامدانا شەش یاریێن هاتنێ‌ و چوونێ‌ و دەربازبوونە قۆناغا چارگۆشەیا زێرین ژ هەڤڕكیێن خولا فوتسالا كوردستانێ‌ ل سەر ئاستێ‌ كچان و بڕیارە ل دەمێ‌ بهێت دا ژڤانێ‌ یاریێن چارگۆشەیا زێرین بهێنە دەستنیشانكرن.
تیما ئافرەتێن دهۆكێ‌ شیا ببیتە قارەمانا كۆما خوە ب شەش سەركەفتنێن ل دووڤ ئێك وەكو ئێكەم تیم چو خوسارەتی و وەكهەڤی نەداینە، ب كۆمكرنا 18 خالان سەرێ‌ لیستا كۆما ئێكێ‌ هات و شیا 50 گۆلان تۆماربكەت بتنێ‌ دو گۆل ل سەر هاتینە تۆماركرن و بەردەوامیێ‌ بدەتە نمرەیێن نوو و یێن دیرۆكی ئەوێن وەرزێن بۆری ژی ب دەستڤە ئیناین و خوە نێزیكی ناسناڤێ‌ وەرزێ‌ ئەڤ سالە بكەت، ئەنجامێن هەر شەش یارییان بڤی رەنگی بوون، سەركەفتن ل سەر سۆران، 3-1 و 4-1، سەركەفتن ل سەر خەلاتی پێنجوین 12-چنە و 11-چنە، سەركەفتن ل سەر هەلەبچە 9-چنە و 11-چنە.
ژلایەكێ‌ دووڤە تیما ئافرەتێن یانەیا زاخۆ ژی وەكو قارەمانا كۆما دویێ‌ دەربازبوو قۆناغا چارگۆشەیا زێرین پشتی شیایی ب كۆمكرنا 12 خالان سەرێ‌ لیستێ‌ بهێت ژ سێ‌ سەركەفتن و سێ‌ وەكهەڤییان و شیایە 30 گۆلان تۆماربكەت لێ‌ 12 گۆل ژی ل سەر هاتینە تۆماركرن و بزاڤێ‌ بكەت شەڕی بۆ دەستڤە ئینانا ناسناڤێ‌ ئەڤ سالە، ئەنجامێن كچێن زاخۆ بڤی شێوەی بوون، سەركەفت ل سەر رەواندۆز ب2-چنە و یارییا دویێ‌ 2-2 وەكهەڤبوو، سەركەفت ل سەر چەمچەمال 8- 1 و10-1 گۆلان، دگەل سیروانی هەلەبچە هەردو یارییان وەكهەڤبوو 2-2 و 5-5 گۆلان.
بڤان ئەنجامان كچێن یانەیا دهۆك دێ‌ ل قۆناغا چارگۆشەیا زێرین بەرانبەر كچێن یانەیا سیروانی هەلەبچە یاریێ‌ كەن خودانا رێزا دویێ‌ یا كۆما دویێ‌، تیما كچێن زاخۆ دێ‌ هەمبەری یانەیا ئافرەتێن سۆران یاریێ‌ كەن، بۆ زانین د قۆناغا چارگۆشەیا زێرین دا شێوازێ‌ هاتن و چوون یاری هێنە كرن و چاڤەڕێ‌ بڕیارا فیدراسیۆنا تەپا پێی یا كوردستانێ‌ نە ژبۆ دیاركرنا ژڤان و جهێن یارییان.

ب فەرمی فیدراسیۆنا فوتبۆلا ئاسیا راگەهاند كو ئەو بڕیارێن دادڤانێ‌ یارییا ئیراقێ‌ و ئوردن ب ڕێڤەبری دروست بوون و چو سزا بوو ناهێنە دەركرن، ئەوا ژ چارچووڤەیێ‌ هەڤڕكیێن قۆناغا هەشتێ‌ یا كۆپا ئاسیا وهەتا نوكە یاریێن وێ‌ د بەردەوامن، ئەڤچەندە هات پشتی فیدراسیۆنا فوتبۆلا ئیراقێ‌ سكالایەك دژی دادڤانێ‌ یاریێ‌ یێ‌ ئیرانی عەلی ریزا فغانی كری دەرئەنجامێ‌ كارتا سۆر و دوورئێخستنا هێرشبەرێ‌ وان ئەیمەن حسین پشتی وەرگرتنا دو كارتێن زەر د یاریێ‌ دا.
ل دووڤ نڤێسارا فەرمی هاتییە كو، وەرگرتنا ئەیمەن حسێن ب كارتا ئێكێ‌ یا زەر د دەمێ‌ زێدەكری یێ‌ نیڤا ئێكێ‌ دا ژبەر نەرازیبوونا وی و ئاخڤتنێن نە جوان دژی دادڤانی بوو، كارتا دویێ‌ یا زەر د خولەكا 77ێ‌ دا بوو پشتی گۆلا دویێ‌ تۆماركری ئاهنگا خوە گێرا و دەمەكێ‌ زێدە بۆراندن ل دووڤ یاسایێ دادڤانی مافێ‌ هەیی كارتا زەر بدەتێ‌ لەوما یا دویێ‌ وەرگرت و دئەنجامدا كارتا سۆر هاتە دوورئێخستن، ئەڤچا بهیچ رەنگەكی دادڤانێ‌ یاریێ‌ نا هێتە سزادان و بتنێ‌ كارێ‌ خوە یێ‌ یاسایی ئەنجامدایە.
بۆ زانین هەلبژارتیێ‌ ئیراقێ‌ شیابوو هەتا خولەكا 90+4 یا سەركەفتی بوو ب دو گۆلان بەرانبەر گۆلەكێ‌، لێ‌ هەلبژارتیێ‌ ئۆرد شیا دو گۆلان د ماوەیێ‌ دو خولەكان دا بینت و یاریێ‌ ب سێ‌ گۆلان بەرانبەر دو گۆلان سەركەفتنێ‌ بینت و دەربازبیتە قۆناغا 16ێ‌ و دڤێ‌ قۆناغێ‌ ژی دا سەركەفتنێ‌ ب گۆلەكێ‌ بێ‌ بەرانبەر ل سەر تاچاكسانێ‌ بینت و دەربازبیتە پێش دووماهیێ‌ ئەوا بڕیارە سێ شەمبییا بهێت بەرانبەر هەلبژارتیێ‌ كوریا باشۆر بكەت.

د راگەهاندنەكا فەرمی دا فیدراسیونا تەپا پێی یا كوردستانێ‌ دیار كر هەر لایەنەك یان كەسەك و ب هەر شێوەكێ‌ هێرشی دادڤانێن خولێن پلا نایاب یان ئێك بكەت دێ‌ ب توندی هێتە سزادان و هەكە بەلگەیەك ل سەر خەلەتیەكا دادڤان هەبن دشێن ب سكالا بۆ مە بینن.
زێدەتر دیاركر، هەرچەندە دادڤانێن مە ب شێوەكێ‌ رژدی و جوانی یاریێن خولێن پلا نایاب و ئێك بڕێڤە دبەن و ب وێرەكی و دلسۆزی كارێ‌ خوە دكەن سەرباری وەرنەگرتنا هەمی شایستەیێن خوە یێن دارایی، لێ‌ مخابن د یاریێن ڤێ‌ دووماهیێ‌ دا چەند دادڤانێن مە تووشی هێرشێن جودا بووینە ژبەر خەلەتیەكا بچووك یان تیما وان خوسارەت بوویە و دادڤان كرییە بوهانە، لەوما وەكو فیدراسیۆنا تەپا پێی مە بڕیار دایە هەر یانەیەك یان كەسەك كاربەدەست بیت دناڤ یانەیێ‌ دا یان ژی ئەندامەكێ‌ كارگێریێ‌ هێرشێ‌ ب هەر شێوەكێ‌ دژی دادڤانێن خولێ‌ بكەت چ جەستەیی یان ئاخڤتنێن نە جوان یان هەتا ل سەر ئەكاوەنت و پەیچی یانەیێ‌ بیت یان یێ‌ تایبەت بیت دوور ژ گیانێ‌ وەرزشی دێ‌ ب توندی هێتە سزادان.
هەروەسان ئاماژە ب وێ‌ چەندێ‌ دا: هەكە یانەكە هەست ب غەدرێ‌ بكەت و بەلگەیەكا ب ڤیدیۆ، دەنگ و نڤێسین هەبیت دشێن بگەهینە بارەگایێ‌ فیدراسیۆنا تەپا پێًی یا كوردستانێ‌ و ئەم دێ‌ ب شێوەیێ‌ یاسایی سەرەدەریێ‌ دگەل دادڤانی كەین كو ژلایێ‌ لژنەیەكا دادڤانێن پسپۆرڤە، ئەڤچا دڤێت رێز ل دادڤانی بهێتە گرتن و نابیت هیچ ئاخڤتنەكا كرێت و دوور ژ گیانێ‌ وەرزشی بۆ بهێتە دان و بەرانبەردا ژی ژبیر نەكەین یانەیێن وەرزشی هەردەم هەڤكار و هاریكارێن مە بووینە.

ستێرێ‌ فرەنسی و یانەیا بایرن میونخ یا ئەلمانی كێنگسلی كۆمان تووشی هنگاڤتنەكا ب هێز بوو كو دێ‌ بیتە ئەگەر بوو ماوەیێ‌ زێدەتری سێ‌ حەفتیان ژ یاریگەهێن تەپا پێی دووربكەڤیت.
ل دووڤ راپۆرتێن رۆژنامەڤانی كۆمان د یارییا حەفتیا بۆری دا دگەل یانەیا ئۆگسپۆرگ تووشی هنگاڤتنێ‌ دلایێ‌ رانی دا بوویە ئەوا تیما وان ب 3-2 گۆلان سەركەفتن ئینایی و بوو ئەگەر ئەركێ‌ تیما ئەلمانی د یاریێن بهێت دا ب زەحمەتر لێكرییە پشتی هنگاڤتنا هەر ئێك ژدایۆ ئۆبامیانكۆ، یۆزوا كیمتچ، كۆنراد لایمەر و سێرجی گناپری، هەروەسان نە پشكدارییا هەر ئێك ژ نەسیر مزراوی و بۆنا ژبەر پشكدارییا كۆپا ئەفریكیا و یێ‌ كوری مین جای كیم پشكدارییا وی د كۆپا ئاسیا دا بوویە ئەگەر دیارییا بهێت دا ئاستەنگ بكەڤنە درێكا بایرن میۆنخ دا.