بەرپرسێ مەكتەبا رێكخستنا پارتی دیموكراتی كوردستان ل پارێزگەها دهۆكێ‌ پێشوازی ل هیوا ئەحمەد مستەفا، ئەندامێ مەكتەبا سیاسی و بەرپرسێ پشكا جەماوەری و پیشەیی و سكرتێر و سكرتاریەتا لاوان كر.
دكتۆر پشتیوان سادق، ئەندامێ مەكتەبا سیاسی و بەرپرسێ مەكتەبا رێكخستنا پارتی ل پارێزگەها دهۆكێ، پێشوازی ل هیوا ئەحمەد مستەفا، ئەندامێ مەكتەبا سیاسی و بەرپرسێ پشكا جەماوەری و پیشەیی و سكرتێر و سكرتاریەتا لاوان كر و پشتی بخێرهاتنێ ل سەر پرس و پلان و بەرنامەیێن جەماوەری و پیشەیی راوەستیان و داكوكی ل هندێ كر، كو دڤێت گەلەك سیستەماتیكانە كار ل سەر ڤان سەكتەران بهێنە كرن.

هەولێر، قائید میرۆ:

ئەندامەكا لیژنا دارایی ل پەرلەمانێ ئیراقێ ئاشكرا كر، بڕیارە مەها ئادارا ئەڤ سالە هەژمارەكا دی یا دەلیڤەیێن دامەزراندنێ ژ لایێ حوكمەتا ئیراقێ بهێنە راگەهاندن و دبێژیت: سێ ئێكەمێن زانكۆیان ل گەل خودانێن باوەرنامەیێن ماستەر و دكتۆرایێ دێ هێنە دامەزراندن.
دكتۆر نەهلا ئەفەندی، ئەنداما لیژنا خواندنا بلند ل پەرلەمانێ ئیراقێ بۆ رۆژناما ئەڤرۆ دیار كر، سالا بۆری هەژمارەكا بەرچاڤ یا دەرچوویێن زانكۆیان و باوەرنامەیێن بلند ل سەر بودجەیا ئاسایشا خوارنێ هاتنە دامەزراندن و گۆت: «مە گەلەك بزاڤكرن هەتا قوتابیێن دەڤەرێن كوردستانی یێن دەرچوویێن زانكۆیێن كوردستانێ ژی ژێ‌ مفادار ببن و رازیبوون هاتیە كرن بۆ دامەزراندنا وان، مەها ئادارێ خەلكەكێ زۆر دێ هێتە دامەزراندن و ب رێیا مالپەڕێ ئەلكترۆنی دێ دەرگەهێ دامەزراندنێ هێتە ڤەكرن».
دكتۆر نەهلا ئەفەندی گۆتژی: «ئەم یێ دانوستاندنان دكەین بۆ ڤێ چەندێ دامەزراندنا ئیراقێ دەرچوویێن هەرێما كوردستانێ ڤەگریت، چونكی وان ژی ماف هەیە بهێنە دامەزراندن، بەلێ هێشتا رازیبوون ل سەر نەهاتیەدان و ئەم ل سەر بزاڤێن خوە دێ بەردەوام بین، هەتا رازیبوون بۆ دەرچوویێن هەرێما كوردستانێ ژی بهێتە وەرگرتن و ئەو ژی بشێن فۆرمێن دامەزراندنێ تژی بكەن».

ئامێدیێ، مەحمود نهێلی:

ژ بۆ پتر گەهاندنا پڕۆژەیێن خزمەتگوزاری بۆ دەڤەرێ و گرنگیدان ب كەرتێ گەشتگوزاری، رازیبوون ل سەر بجهئینانا هەژمارەكا پڕۆژەیان ل ناوچەداریا سەرسەنكێ هاتیە كرن، د ناڤ وان دا پڕۆژەیێن گەشتوگوزاری ژی هەنە و پارێ پێدڤی بۆ هاتیە تەرخانكرن و بڕیارە د دەمەكێ نێزیك دا دەست بجهئینانا وان بهێتە كرن.
ئەلند ئەمیر، رێڤەبەرێ ناوچەداریا سەرسنكێ بۆ رۆژناما ئەڤرۆ دیار كر، د بەردەوامیا گرنگیدانا حوكمەتا هەرێما كوردستانێ ب كەرتێ گەشتوگوزاری و گەهاندنا پڕۆژەیێن خزمەتگوزاری، رازیبوون ل سەر چێكرنا پڕۆژەیەكێ مەزنێ گەشتوگوزاری ل سەنتەرێ ناوچەداریێ هاتیە كرن و گۆت: «ئەڤ پڕۆژە ژ چێكرنا پاركەكا مەزن یا بێهنڤەدانێ ل سەنتەرێ ناوچەداریێ پێك دهێت، كو دێ كەڤیتە جهێ فەرمانگەها ئاڤێ و ئاڤاهیێ فەرمانگەها ئاڤێ دێ هێتە خرابكرن».
ناڤهاتی دیار ژی كر، زێدەباری چێكرنا ڤێ پاركێ جاددەیا سەرەكی یا د ناڤ سەنتەرێ ناوچەداریێ دا دبۆریت، هەر ل بەرامبەری ئاڤاهیێ ناوچەداریێ‌ هەتا دگەهیتە پانزینخانێ و پاشی د پشتڕا دچیتە ئۆتێلا بەری دێ هێتە قێركرن و بەرفرەهكرن و گۆت: «هەر دو لایێن جاددەیێ دێ شوستە هێنە چێكرن بۆ جهێ پیاسان و داروبار دێ لێ هێنە چاندن و جهێن روونشتنێ دێ لێ هێنە چێكرن و دانان».
گۆتژی: «بۆ ئەنجامدانا ڤان پڕۆژەیان گوژمێ دو ملیار و ٥٠٠ ملیۆن دیناران ژ لایێ حوكمەتا هەرێما كوردستانێ ڤە هاتینە تەرخاكرن و بۆ بەلێندەرەكی دەركەفتیە و هەموو رێكارێن یاسایی و كارگێری تمام بووینە و ل ڤان نێزیكان دەست ب چێكرنا وان دێ هێتە كرن و كەڤنە د خزمەتا خەلكێ دەڤەرێ دا».

ل سەر بودجەیا حوكمەتا هەرێما كوردستانێ‌ بلندترین ئالایێ‌ كوردستانێ‌ د نیڤا سكرێ‌ دهوكێ‌ دا ب رووبەرێ‌ 150 مەترێن چار گوشەی دهێتە دانان، كار د پڕۆژەی دا یێ‌ بەردەوامە و رێژا ئەنجامدانا كاری گەهشتیە 85%.
ستینكا ئالایی ب درێژاهیا 60 مەترانە ل سەر ئەردی و ئالا دێ‌ ب درێژاهیا 15 مەتران و ب فرەهیا 10 مەتران بیت، ل گەل كەرستێن رۆناهیكرنێ‌ و رۆناهیا تایبەت ب ئاگەهداریكرنا بلنداهیێ‌ بۆ فڕۆكان، دیسا ماتۆرەكێ‌ تایبەت ژ بۆ بلند و نزمكرنا ئالای‌ ل دەمێ‌ گوهۆڕینا وی دێ‌ هێت دانان.

رێڤەبەریا ئاسایشا پارێزگەها دهۆكێ دائێخستنا دو سەنتەرێن جوانكاریێ و گرتنا ئەو كەسێن ل وان سەنتەران خوە ب نۆشدار دایە نیاسین راگەهاند.
ل دهۆكێ گومان ل سەر دو سەنتەرێن جوانكاریێ یێن ژنان هەبوو، كو ئەو كەسێن لێ كار دكر و خوە ب نۆشدار داینە نیاسین، باوەرنامە نینن، لەورا سەندیكا نۆشدارێن كوردستانێ لقێ‌ دهۆكێ و تیمێن تایبەتمەند دووڤچوونا بابەتی كر و ب هەماهەنگی ل گەل ئاسایشێ هەردو سەنتەر هاتنە داخستن و ئەو هەردو كەسێن ل وان سەنتەران كار دكر و خوە ب نۆشدار ددا نیاسین، هاتنە گرتن.
ئاسایشا دهۆكێ دیار ژی كر، وان دو كەسان دان ب تاوانا خوە كر و ل گۆرەی بەندێ‌ 240 ژ یاسایا سزایان ڤەكۆلین ل گەل دهێنە كرن.
ل وان هەردو سەنتەران، وان هەردو كەسان ب فێل خوە ب نۆشدار دابوو نیاسین و فیلەر و بۆتۆكس بۆ ژنان چێدكرن، لەورا ئاسایشێ داخواز ژ وەلاتیان كریە: هشیاری وان جۆرە فێلبازان بن.