ڕێورەسمێن ساخكرنا ئێكەم سالڤەگەڕا شەهیدكرنا مەلا ئەحمەد جەلالەدین رێكانی و چار وەلاتیێن دی یێن دەڤەرا ئامێدیێ، كو پار د كریارەكا تیرۆرستی دا ل توركیا هاتبوونە شەهیدكرن، ل زانكۆیا دهۆك و ب بەرهەڤبوونا هەژمارەكا زۆرا بەرپرسێن حزبی و حكومی خەلكێ دەڤەرێ و كەسوكارێن قوربانیان هاتە گێڕان.
د. پشتیوان سادق، وەزیرێ ئەوقاف و كاروبارێن ئایینی ل حوكمەتا هەرێما كوردستانێ و بەرپرسێ مەكتەبا ڕێكخستنا پارتی ل پارێزگەها دهوكێ د پەیڤەكێ دا گوت: “ڕوودانا شەهیدكرنا هەر پێنج وەلاتیێن مە ڕوودانەكا دلتەزین بوو، هەمی خەلكێ كوردستانێ پێ خەمگین بوو، ئەم وەكو حوكمەتا هەرێما كوردستانێ داخوازێ ژ حوكمەتا توركیا و دادگەهێ دكەین بادەكا كۆشتنا هەر پێنج وەلاتیان ئێكلا بكەن و بلا یاسا سەروەر بیت و تۆمەتبار ب سزایێ خوە بگەهن”.
زێدەتر گوت: “مامۆستایێن ئایینی یێن هەرێما كوردستانێ ب درێژاهیا مێژوویێ كێم خەم نەبووینە و نەكریە بۆ وێ چەندێ هشیاریا نیشتمانی و هشیاریا بەرهنگاریا هزر و بیرێن توندڕەو ل ناڤا جڤاكی دا بەلاڤ بكەن و شانازیێ پێ دكەین”.
حەربی جەلالەدین پەیڤا مالباتا مەلا (ئەحمەد جەلالەدین) پێشكێشكر و سوپاسیا ڕێزدار (مەسرور بارزانی) سەرۆكێ حوكمەتا هەرێما كوردستانێ و لایەنێن پەیوەندیدارێن هەرێمێ كر، كو ل ئینانەڤەیا جەنازەیێن قوربانیان ژ باكوورێ كوردستانێ بۆ دهۆكێ‌ هاریكار بوون و بەردەوام سەبارەت بادەكێ‌ ل سەر خەت بوون و دەنگێ وان دگەهاند.
دهێتە زانین پار ل 19/1/2023 پێنج وەلاتیێن دو خێزانێن خەلكێ دەڤەرا ئامێدیێ و ئاكنجیێن دهۆكێ، كو بۆ وەرگرتنا چارەسەریا نۆشداری چووبوونە توركیا، ل رێكا سەرەكی یا نسێبینێ‌ بۆ مێردینێ‌ ل باكوورێ كوردستانێ، دو چەكداران ترۆمبێلا وان راگرت و ب دەمانچێ هەر پێنج شەهیدكرن.

جەماوەرێ‌ ئیدارەیا سەربخوە یا زاخۆ دوهی 21/1/2024 دژی هێرشێن پاسدارێن ئیرانێ بۆ سەر هەولێرێ‌ و شەهیدكرنا هەژمارەكا وەلاتیێن سڤیل خوەنیشادانەك هاتە كرن و تێدا ئەو هێرشە هاتە شەرمزاركرن و جەماوەری یاداشتەكا نەرازیبوونێ‌ گەهاندە سەرپەرشتێ ئیدارا زاخۆ.
گوهدار شێخۆ، سەرپەرشتێ ئیدارا سەربخوە یا زاخۆ ب ناڤێ ئیدارا سەربخوە یا زاخۆ سوپاسی یا هەموو تەخ و چینێن جڤاكی، گەنج و پیر و ژن و ئۆل و نەتەوەیێن سنوورێ ئیدارا سەربخوە یا زاخۆ كر، ژ بۆ پشكداریا وان د مەزنترین خوەنیشادانا سەرانسەری دا، ئەوا ل پرا دەلال هاتیە ئەنجامدان ژ بۆ ئیدانەكرنا هێرشێن سوپایێ پاسدارێن ئیرانێ ل سەر هەرێما كوردستانێ و هەولێرا پایتەخت، كو تێدا هەژمارەكا وەلاتیێن سڤیل بوونە قوربان.
سەرپەرشتێ ئیدارا سەربخوە یا زاخۆ د پەیڤەكێ‌ دا گۆت: “پشكداریا وە هەموویان د ڤێ خوەنیشادانێ دا، سەرفەرازی و سەربلندیە، ل هەمبەری خوینا شەهیدان و ئاخا پیرۆز یا كوردستانێ، د خوەنیشادانێ دا دەنگێ نەرازیبوونێ هاتە بلندكرن یاداشتا جەماوەرێ خوەنیشاندەر هاتە وەرگرتن و دێ هێتە پێشكێشكرن ژ بۆ جڤاكا نێڤدەولەتی و نەتەوێن ئێكگرتی و قۆنسلخانەیێن وەلاتێن بیانی، كو ئێدی خەلك و وەلاتیێن سڤێلێن هەرێما كوردستانێ نەبنە قوربانیێن هێرشێن خاڤ و لاوازێن دۆژمنان”.

ل دۆر بجهئینانا بڕیارا حوكمەتا هەرێما كوردستانێ بۆ زێدەكرنا دەلیڤەیێن كاری كۆمبوونا دویێ‌ یا لژنا بلند ل دهۆكێ هاتە ئەنجامدان.
ب سەرپەرشتیا د. عەلی تەتەر، پارێزگارێ دهۆكێ و ب بەرهەڤبوونا لژنا بلندا بجهئینانا بڕیارا هەژمارە 172 یا تایبەت ب كرێكاران و دەڤەردار و رێڤەبەرێن گشتی و رێڤەبەریێن پەیوەندیدار ل پارێزگەها دهۆكێ كۆمبوونەك ل دۆر بجهئینانا بڕیارا حوكمەتا هەرێما كوردستانێ بۆ زێدەكرنا دەلیڤەیێن كاری هاتە كرن.
د كۆمبوونێ دا دانوستاندن ل چەندین تەوەرێن جودا سەبارەت بجهئینانا بڕیارێ بۆ پەیداكرنا دەلیڤەیێن كاری، تایبەت ب كرێكاران ڤە و بڕیارا حوكمەتا هەرێما كوردستانێ بۆ دابینكرنا رێژەیا 75% ژ دەستێ كاری بۆ كرێكارێن خۆمالی هاتە كرن.
هەر د كۆمبوونێ دا دانوستاندن ل دۆر چەوانیا بجهئینانا بڕیارێ ژ لایێ رێڤەبەریان و دەمێ تۆماركرنا كۆمپانیان و بجهئینانا داخوازیێن یاسایی و رێنمایێن وەزارەتا كار، تایبەت ب كرێكارێن بیانی و خۆمالی و رێژەیا كرێكاران هاتە كرن.
لژنا بلند رۆلێ رێڤەبەریێن پارێزگەها دهۆكێ بۆ بجهئینانا بڕیارێ بلند هەلسەنگاند و دەستخوشی ل هەماهەنگیا د ناڤبەرا رێڤەبەریان دا هاتە كرن، پارێزگارێ دهۆكێ هەمی رێڤەبەریێن پەیوەندیدار راسپاردن ناڤەرۆكا بڕیارێ بجه بینن و پشتەڤانیا كارگێریا پارێزگەهێ بۆ ڤی بابەتی دیاركر.

ئامێدیێ، مەحمود نهێلی:

ژ ئەگەرێ شەڕێ بەردەوامێ د ناڤبەرا گەریلایێن پەكەكێ و لەشكرێ توركیا دا و تۆپباران و بوردۆمانا بەردەوام ل سەر دەڤەرێ، چار گوندێن دەڤەرا بەرێ گارێ ل سنوورێ ناوچەداریا دێرەلۆكێ‌ هاتنە چۆلكرن و خانیێن هەژمارەكا خەلكێ وان گوندان ژی هاتنە بوردۆمانكرن و خرابكرن.
ئیبراهیم عەلی، خەلكێ گوندێ سپیندارێ بۆ رۆژناما ئەڤرۆ دیار كر، بەری چەند رۆژان ئالۆزی ل دەڤەرا وان زێدەتر لێهاتن و چەندین جاران شەڕ ل سوورێ سگێرێ روودان و گۆت: “برایێ من ل گوندی بوو، هاتە ئاگەهداركرن، كو گوندێ وان یێ ل بەر مەترسیێ و پێدڤیە گوندی چۆل بكەن، پشتی رۆژەكی ژ چۆلكرنێ، گوندێ وان هاتە بوردۆمانكرن و زیانێن زۆر گەهاندینە خانیێن وان”.
ئیبراهیم دیار ژی كر، ل سالا چوویی برایێ‌ وی خانیێ خوە ئاڤاكر بوو، نێزیكی ٣٠ هزار دۆلار ژی لێ مەزاختبوون، هەروەسا بهایێ ٢٠ هزار دۆلاران كەلوپەلێن ناڤمالێ تێدا بوون، بارا پترێ كەلوپەلێن وی ژ ناڤچووینە و زیانێن زۆر گەهشتینە خانیێن وان و گۆت: “ئێدی ئەم نەشێین بچینە سەر گوندێن خوە”.
ناڤهاتی دیار ژی كر، هەر چار گوندێن بەرێ گارێ، مژێ، كەڤنە مژێ، سپیندارا خەلفۆ و گرگاش نوكە كەس لێ نەمایە و هاتینە چۆلكرن و گەلەك خانیێن وەلاتیان ژی هاتینە بوردۆمانكرن خرابكرن و گۆت: “ئەڤە جارا سێیێ‌ یە پشتی سەرهەلدانێ گوندێ مە دهێتە چۆلكرن ژ بەر شەڕێن بەردەوامێن دەڤەرێ، ئەم هیڤیدارین؛ ئەڤ شەڕە ل دەڤەرێ ب داوی بهێن و ئێدی ئەم ژی ب ئارامی ل سەر جهێن خوە و وارێن خوە بژین”.