د دیدارەكێ‌ دا سەرۆكێ‌ یانەیا ئامێدیێ‌ یا وەرزشی دیار كر ئەو پێدڤی ب هەبوونا وەبەرهێنانێ‌ هەنە و ئەوان ئەردێ‌ هەیی لێ‌ هەتا نوكە چو وەبەرهێنەر نە هاتینە و یانەیا مە خودان كۆمەكا یاریزانێن كوڕ و كچی ێن خەلكێ‌ دەڤەرێ‌ نە و پێدڤی ب پشتەڤانیێ‌ نە.
زێدەتر ناڤهاتی بۆ رۆژنامەیا ئەڤرۆ گۆت: پشتی راوەستیانا بووچەیا وەكو سلڤە یا هەیڤانە ژلایێ‌ پارێزگەها دهۆكێ‌ بۆ یانەیێ‌ ئەڤە بۆ ماوەیێ‌ پێنج هەیە چو هاریكاری و پشتەڤانی بۆ تیما مە نە هاتییە، بتنێ‌ پشت بەستنا مە ل سەر ئەوێ‌ سلفا ژلایێ‌ پارێزگەها دهۆكێ‌ ئەوا بتنێ‌ دو ملیۆن دینار بوو و ئەو ژی هاتنە بڕین كو ل دووڤ ئەوێ‌ داهاتی مە پلانەك دانابوو كو بشێن خزمەتا تیمێن خوە بكەین، د نوكە دا كاودانێن مە یێن دارایی د باش نینن سەرباری مە تیمێن باش ژ كوڕ و كچێن دەڤەرێ‌ هەنە تایبەت یاریێن باسكێت بۆل، ڤۆلی بۆل و فوتسالێ‌ هەروەسان چەندین یاریێن دی یێن تاك هەنە ژ وانا یارییا كیك بۆكسینگێ‌ و یاریزانێ‌ مە جیهاد سالح شیا ل سەر ئاستێ‌ ئیراقێ‌ ببیتە قارەمان.
ژلایەكێ‌ دووڤە سالار عەبد دیار كر یانەیا ئامێدیێ‌ خودان ئەردە لێ‌ هۆل و یاریگەهێن وەرزشی نینن كو ئەو بشێن پشكداریێ‌ د هەر قارەمانیەكێ‌ دا بكەن بەلكو بۆ راهێنانێن تیمان ژی راوەستیاینە ئەم نەچارین گەلەك قارەمانییا پشكدار نەبین و راهێنان بهێنە هەلاویستن، لێ‌ بۆ یاریێن تاك هەر دەمێ‌ پشكدارییەك هەبیت هەمی بزاڤا دكەین بەردەوام خزمەتا تێمێن خوە بكەین ل هەر جهەكێ‌ بیت راهێنانێن خوە بكەن.
ل دووماهیێ‌ ناڤهاتی گۆت: داخوازێ‌ ژ بەرێز د. عەلی تەتەر و وارشین سەلمان دەڤەردارێ‌ ئامێدیێ‌ دكەین كو پشتەڤانییا یانەیا مە بكەن ب دانانا وەبەرهێنانێ‌ بۆ یانەیێ‌ كو ئەڤ چەندە دێ‌ وەرزشڤان و جەماوەرێ‌ وەرزشی یێ‌ دەڤەرا ئامێدیێ‌ مفایی ژێ‌ وەرگریت تایبەت یاریگەهـ و هۆلێن وەرزشی.

عەلی حاجی:

د داخویانیەکێ دا راهێنەرا تیما فوتسالا زاخۆ یا کچان بۆ رۆژناما ئەڤرۆ دیار کر هەر ژ دەستپێکا خولا نایابا فوتسالێ کوردستانێ تیما وان نەشیایە پێکڤە ڕاهێنانان بکەن و چار یاریزانێن تیما وان ژی قەستا بەغدا دکەن و ڕاهێنانان دگەل هەلبژاتیێ ئیراقێ ئەنجامدەن.
زێدەتر زیزویێ گۆت : ل دەستپێکا خولا نایابا فوتسالێ کوردستانێ ل سەر ئاستێ کچان د پلانا مە دا بوو ژ تیمێن ب هێز و هەڤرک بین و چەند یارییەکێن دەستپێکێ ژی دا ئاست و ئەنجامێن تیما مە باش بوون لێ ئه‌ڤه‌ دو یارییە ل سەر ئێک وەکهەڤ د بین ئەو ژئ بۆ وێ چەندێ ڤەدگەریت چار یاریزانێن تیما مە یێن سەرەکی پەیوەندی ب کەمپێ هەلبژارتیێ فوتسالا ئیراقێ کرینە و قەستا باژێرێ بەغدا دکەن و رۆژەکێ ژبەریێ یاریێ پەیوەندیێ ب تیمێ دکەن و نەشێن یەکەیێن ڕاهێنانێ ژی دگەل تیما مە دا بکەن و هەلبژارتیێ ئیراقێ ژی نامە بۆ یاریزانان رێکرینە کو هەر یاریزانەکا پەیوەندیێ ب کەمپێ وان نەکەت ناهێتە دەست نیشان کرن بۆ ناڤ رێزێن هەلبژاتیی دا و ئەڤ چەندە ژی دبیتە گڤاشتن ل سەر یاریزانان کو پەیوەندیێ پێ بکەن، د نوکە ئەم یێ هەمی بزاڤان مەزێخین کو ئەم دەربازی قوناغا دویێ بین ژ خولێ و ژ تیمێن هەڤرک بین ل سەر رێزێن پێشیێ.
ناڤبریێ گۆت ژی: ئەو گروپێ تیما مە تێدا ژ گروپێ دیتر ب هێزترە و ماندیبوونا یاریزانان ژی دبیتە ئەگەر کو مە نەشیایە د دو یاریێن بوریدا سەرکەڤتنێ تومار بکەین و هەتا ڕادەیەکێ مەزن ژی دژایەتی ژی دگەل تیما مە دا دهێتە کرن دا کو سەرکەڤتنان تومار نەکەت.

یانەیا ریال مەدرید یا ئسپانی رژدە ل سەر دەستڤە ئینانا ئێك ژ ستێرێن جیهانی یێ‌ فرەنسی و یانەیا پاریس سانجێرمان كیلیان مباپی و یێ‌ نەرویجی و یانەیا مانچستەر ستی یا ئنگلتەرایێ‌ ئیرلینگ هالاند هاتە دووماهی هاتنا وەرزێ‌ ئەڤ سالە د ڤەكۆهاستنێن هاڤینا بهێت دا.
ل دووڤ راپۆرتا رۆژنامەیا كادینا سیر یا ئسپانی یانەیا ریال مەدرید دو بەژاردەیێن باش هەنە ژبۆ ب هێزكرنا هێلا هێرشبەریێ‌ ئەوژی یێ‌ فرەنسی كیلیان مباپی و یێ‌ نەرویجی ئیرلینگ هالاند، لێ‌ د نوكە دا بزاڤێن وێ‌ رازیكرنا مباپی یە بەری ب دووماهی هاتنا ڤەگۆهاستنێن زڤستانێ‌ یان ژی وەرگرتنا سۆزنامەكا گرێبەستێ‌، لێ‌ هەكە چو ژ ئەڤان هەردو پێنگاڤا بجهـ نە هات، یانەیا ئسپانی ئیرلینگ هالاند وەكو پێكگهۆرێ‌ سەرەكی دانایە و گەشبینن ژبەركو هالاندی خالەكا گرێبەستێ‌ هەیە دشێت د وەرزێ‌ ئەڤ سالە دا گرێبەستا خوە ب دووماهی بینت و دووڤدا ب گرێبەستەكا كێم دشێت بۆ هەر یانەكێ‌ ئیمزابكەت، ئەڤ خالە د بەرژوەندییا ریال مەدریدێ‌ دایە لەوما كرییە یاریزانێ‌ پێكگهۆر.

د داخویانیەكێ دا سەرۆكێ یانەیا بجیل یا وەرزشی ئاشكرا كر دەمەكێ درێژە تیما مە یا تەپا پێی دەست ب بەرهەڤیا كرییە ژبۆ پشكداری كرن د خولا پلە دوا كوردستانێ دا، هەتا نوكە هەمی بەرهەڤی هاتینە كرن، دو راهێنەر هاتینە دیار كرن هەتا دگەل ئێك ژ وانا ب گەهینە رێكەفتنێ‌ ژبۆ سەرپەرشتیكرنا تیما مە یا تەپا پێی.
زێدەتر رەهێل شەعبان بۆ رۆژنامەیا ئەڤرۆ گۆت: ئەڤ سالە ئارمانجا یانەیا بجیل ئەوە كو بگەهیتە پلە ئێكا كوردستانێ لەورا دێ هەمی بزاڤ كەین بۆ هەر یاریەكێ‌ سەركەفتنێ‌ بینن، سەرەرای نەبوونا یاریگەهەكێ ل بجیل كو مەزنترین ئاریشەیا مەیە لێ‌ ئەم بێ هیڤیی نابین پێخەمەت گەهشتن ب ئارمانجێن یانەیێ.
ناڤبری گۆتژی: ب بهێزكرنا ئاستێ تیمێ یانەیێ پێنج یاریزانێن پیشەكار ئیناینە د ناڤ رێزێن تیمێ‌ دا و گرنگیەكا باش ژی ب یاریزانێن نافخۆ هاتیە دان، مە دڤێت باشترین یاریزانێن نافخۆ دروستبكەین بۆ یانەیێ،هەرچەندە رەوشا ئابووریا یانەیێ گەلەك یا خرابە ئەم ب هیڤینە كو چارە ببیت و بریارە كەسەك ببیتە سپۆنسەرێ یانەیێ، هەتا نوكە چەند كەسایەتێن دەڤەرێ و ئازاد محەمەد سەعید كارگێرێ سكرتاریەتا ئێكەتیا لاوێن دیموكراتا كوردستانێ پشتەڤانیا یانەیێ كریە ئەم سۆپاسییا بەرێزان دكەین.

شرۆڤەكارێ‌ وەرزشی كەریم سەدام دیار كرهەلبژارتیێ‌ تەپا پێی یا ئیراقێ‌ شیانێن هەین بەر ب یارییا دووماهییا كۆپا ئاسیا بچیت و ناسناڤێ‌ وێ‌ ژ ب دەستڤە بینت، ئەڤچەندە هات پشتی ئیراقێ‌ شیایی ب دو گۆلان بەرانبەر گۆلەكێ‌ سەركەفتنێ‌ ل سەر هەلبژارتیێ‌ چاپانێ‌ بینت ژ چارچووڤەیێ‌ كۆما چارێ‌ و یاریێن گەڕا دویێ‌ و شیایی پلێتا دەربازبوون بۆ قۆناغا 16ێ‌ مسۆگەر بكەت.
ناڤهاتی گۆت: ژبلی سەركەفتنا دیرۆكی یا هەلبژارتیێ‌ ئیراقێ‌ بەرانبەر چاپانێ‌ ب ئاستەكێ‌ نایاب و نە یا پێشبینیكری نیشاندا و گەشبینی پەیدابوویە كو ئیراق د شێت بچیتە یارییا دووماهیێ‌ و ناسناڤی ژی ب دەستڤە بینت ب مەرجەكی ئەڤ ئاستە و زاخا بلند یا یاریزانان بەردەوام بیت، هەردەم یاریزانێن مە د یاریێن گرنگ دا شیاینە ئەنجامی ب دەستڤە بینن و یا گرنگ ئەڤجارە ژی كادرێ‌ راهێنانێ‌ ب سەرپەرشتییا یێ‌ ئسپانی خیسیۆس كاساس ئەوێ‌ زانی دێ‌ چەوا سەرەدەریێ‌ دگەل یاریێ‌ كەت و دوور نینە ئەو دەستكەفتێ‌ 2007 یێ‌ ڤیێرا ئینایی ئەو ژی ب دەستڤە بینت.
هەروەسان ناڤهاتی دیار كر ئەو پلانا راهێنەری د هەر یاریەكێ‌ ددانیت تێگەهشتن پەیدا بیت كەنگی ئیراق دشێت سەركەفتنێ‌ بینت، من باوەری ب كارێ‌ راهێنانێ‌ یا هەیی و هەمی یاریزانان تایبەت ئەوێن ڕەڤەندا ئیراقی ل ئۆرۆپا و ئەوان هێز و تەكتیكەكا سەردەما نە دایە تیمێ‌.

یاریزانێ‌ گەنج و خەلكێ‌ باژێرێ‌ دهۆكێ‌ و ستێرێ‌ تیما لاوێن یانەیا زاخۆ سیداد حەجی باجلۆری دگەل هەلبژارتیێ‌ لاوێن ئیراقێ‌ بەر ب كەمپێ‌ راهێنانێ‌ ل باژێرێ‌ ئەنتالیا یا توركیا چووینە ژبۆ خوە بەرهەڤكرن بۆ قارەمانییا ئاسیا.
د داخویانیەكا رۆژنامەڤانی دا عیماد محەمەد راهێنەرێ‌ هەلبژارتیێ‌ لاوێن ئیراقێ‌ دیار كر دوهی هەلبژارتیێ‌ وان ئێكەم یەكا خوە یا راهێنانێ‌ ل باژێرێ‌ ئەنتالیا یا توركیا دانا و دێ‌ هەتا سێ‌ شۆباتا بهێت بەردەوام بیت، د ماوەیێ‌ كەمپی دا دناڤبەرا 24 هەتا 27ێ‌ ڤی مەهێ‌ و ئێكێ‌ شۆباتا بهێت دێ‌ سێ‌ یاریێن هەڤالینی دگەل هەر ئێك ژ هەلبژارتیێ‌ لاوێن قیرغزستان، یانەیا شاختار دۆنێتسك یا ئۆكراینی و هەلبژارتیێ‌ لاوێن ئوردن هێنە كرن.
بابێ‌ سیدادی كو ئێك ژ وەرزشڤانێن دێرینێن پارێزگەها دهۆكێ‌ یە بۆ رۆژنامەیا ئەڤرۆ خویاكر بوو د نوكە دا سیداد یێ‌ پشكدارە د كەمپێ‌ راهێنانێ‌ یێ‌ هەلبژارتیێ‌ لاوێن ئیراقێ‌ دا پشتی ژلایێ‌ راهێنەرێ‌ وی عیماد محەمەد هاتییە داخوازكرن، ئەڤچەندە ژی دەرئەنجامێ‌ ئاستێ‌ و شیانێن وی دگەل یانەیا زاخۆ د خولا پلا نایاب دا بوو، پشكدارییا وی دگەل هەلبژارتیێ‌ لاوێن ئیراقێ‌ ئێك ژ هیڤی و ئارمانجێن سیدادی بوو.
بۆ زانین سیداد حەجی نوری ژ دایكبوویێ‌ 2005ێ‌ ل باژێرێ‌ دهۆكێ‌ یاریزانێ‌ لاوێن یانەیا زاخۆ یە یاریێ‌ د هێلا ناڤین دا دكەت، بەری نوكە یاری بۆ ئەكادیمییا دالكۆرد، یانەیا دهۆك، گارە و نوكە زاخۆ، ل سالا بۆری دگەل هەلبژارتیێ‌ لاوێن ئیراقێ‌ چار یاری كرینە دو دگەل ئیمارات گۆلەك كرییە و دو یاری دگەل هەلبژارتیێ‌ سوریێ‌ بووینە.