ئامێدیێ‌، مەحمود نهێلی

لیوا خەلیل ئەمین جەلیل هێتوتی یێ‌ بەرنیاس ب خەلیل هێتوتی ، ئێك بوویە ژ پێشمەرگە و سەركردێن شۆرەشا ئیلۆن و گولانێ‌ ب سەدان داستان و شەران دا پشكداری كریە و پتر ژ پێنج جاران ب گرانی بریندار بوویە، بۆ رۆژناما ئەڤرۆ دبێژیت، كو مەبەستا وان ل شۆرەشێ‌ كوشتن نەبوویە بتنێ‌ وان داخوازا مافێ‌ خوە كریە، پێشمەرگەیێ‌ قارەمان، خەلیل هێتوتی ل سالا 1955 ل گوندێ‌ هێتوتێ‌ گریدایێ‌ دەڤەرا ئامێدیێ‌ هاتیە سەر دنیایێ‌ و ل سالا 1968 پەیوەندی ب شۆرەشا ئیلۆنێ‌ كریە و بوویە شوفێرێ‌ تایبەتێ‌ مالا نەمر مەلا موستەفا بارزانی و لقمان موستەفا بارزانی، و پێشمەرگەبوویە سەر ب بارەگەهێ‌ بارزانی ڤە ل قەسرێ‌ و چومان .
خەلیل هێتوتی بۆ رۆژناما ئەڤرۆ دیاركر، كو ئەو پێشمەرگەبوویە ل دەڤەرا چومان بارەگایێ‌ بارزانی تا سالا 1975 و گۆت: پشتی نسكویا شۆرەشێ‌ وەكو هەموو كوردەكی ئاوارەی ئیرانێ‌ بووینە، و ل گەل مالا مەلا موستەفا ل نەغەدە بووین تا سالا 1976 ێ‌ .
و دیاركر، ل سالا 1976 بو كارەكی تایبەتێ‌ مالا بارزانی و ژلایێ‌ خودێ‌ ژێ‌ رازی شەهید ئیدریس بارزانی ڤە هاتە راسپاردن بچیتە بەغدا، و هاتە فرێكرن بو بەغدا و گۆت: ئەز مامە بەغدا تا سالا 1977 ێ‌ و پشتی ئەز ل بەغدا ڤەگەریایمە ڤە، راست چویمە ڤە ناڤ شۆرەشێ‌ و ل دەمێ‌ سەركرایەتیا بەروەخت و تا نوكە ژی پێشمەرگەمە.
دەربارەی پشكداری كرنا وی د شەران دا ناڤهاتی دیاركر: ئەو شەرێن وی پشكداری كری ناهێنە هەژمارتن هند گەلەكن و گۆت: من پشكداری د هەژمارەكا زۆرا داستانێن شۆرەشێ‌ دا كریە وەك داستانا فەوجا سوتكی كو من رۆلەكی سەرەكی هەبوویە، و راكرنا فەوجا زرێزە و راكرنا فەوجا بامەرنێ‌، و رۆلێن سەرەكی من هەبوویە د هەموو ئوپەراسیونان دا وەك هاریكارێ‌ رێكخروەكی كو ل جهێ‌ سوپایەكی نوكە بوو، و راكرنا فەوجا بێبادێ‌ و داستانا كانی ماسێ‌ و ل دێرەلۆكێ‌ ژی و لایەكێ‌ دێرەلۆكێ‌ كربوو خەما مە و گۆت: ئێك سال وان شەرا بەحس بكەم یێن من پشكداری تێدا كری خلاس نابن و دووماهیك چالاكی ژی بەری ئەنفالان مە پشكداری كری ل سالا 1988 ێ‌ راكرن و ستاندنا پێنج رەبییان بوو ل 10/7/1988 ل گەلیێ‌ بالندا و گۆت : ئەز ل وێرێ‌ ب گرانی بریندار بووم و ئەو بوو ئەنفالێ‌ دەسپێكر و ئەم چووین بو توركیا و ئەز یێ‌ بریندار بووم ل وی دەمی و ئەز ب دەوارا یێ‌ بریم تا سەر سنۆری و هەر ژ بەر وێ‌ برینداریێ‌ ژی من رهێن خوە چێكرن داكو نوشدار بشێن من دەرمان بكەن.
و دیاركر، ئەم ل توركیا چووینە كەمپا مۆشێ‌ و گۆت: هەكە وە نەدیت بیت ، بابێن هەوە یێن دیتی ، مەزنترین شۆرەش و مەزنترین عەزاب ئەو بوو یا مە ل كەمپا مۆشێ‌ دەرباز كری و گۆت : ئەڤە ل سالا 1968 ئەز پێشمەرگە تا نوكە و ئەز بێژم ئەو نەخوەشیا من ل مۆشێ‌ بری هەموو شۆرەشێ‌ من هند نەخوەشی نەبریە. ژ بەر كو مۆشێ‌ گەلەكا نەخوەش بوو و تورك ژی هەر دوژمنە و ئەم دناڤ سیمەیەكێ‌ دا زینداكربووین و نەدهێلا ئەم دەركەڤین و سەرمایەكا مەزن بوو و بو من گەلەگا نەخوەش بوو چونكە ئەم د بێ‌ دەسهەلات بووین و مە دیت خەلكێ‌ مە یێ‌ پێشچاڤێن مە ب رەزیلی و ب نەخوەشێ‌ و ژ سەرمادا یێ‌ دمریت و مە چ پێچێنابیت بو بكەین.
فەرماندە خەلیل هێتیتی گۆت: ئەم ل چیای شەهید دبووین و هەڤالێن و پێشمەرگە ل چیایی را شەهید دبوون ، بەلێ‌ ئەو یا جودا بوو ل گەل مرنا ل مۆشێ‌، چونكە ئەم ل شۆرەشێ‌ بووین بو مرنێ‌ چوبووین و دەمێ‌ مرۆڤ شۆرەشێ‌ دكەت دزانیت دێ‌ مریت دەمێ‌ مە هێرشەك دكر مە دزانی دێ‌ شەهید بین و بو مە ئەو مرن وەكو دەواتەكی بوو، لێ‌ ل مۆشێ‌ زارۆك پیر و گەنج ل بەر چاڤێن مە دمرن ل سەرمادا و ژ بەر نەخوەشیێن ژیانێ‌ و ئەم نەدشیاین چ بو بكەین.
ناڤهاتی دیاركر، ئەو پێنج جاران ب گرانی بریندر بوویە ژبلی چەندین جارێن دیتر ب برینێن سڤك برینداربوویە و گۆت: بەلێ‌ شەرێن كانی ماسێ‌ و گەلیێ‌ بالندا و كورەژاری و ئوپەراسیونا ئاكرێ‌ و شێخان و شەرێ‌ فەوجا سوتكی ب گرانی بریندار بوویمە.
خەلیلی هەروەسا گۆت: گەلەك دەمێن نەخوەش سەر مەدا هاتینە و ژ وان ژی هەر پێشمەرگەیەكێ‌ شەهید بوو برینەك ل دو مێلاكێن دروست دبوو بەلێ‌ نەخوەشترین دەم ل دەڤ من ئەو بوو دەمێ‌ خودێ‌ ژێ‌ رازی محەمەد سالح بوتی شەهید بووی ل كانی ماسێ‌ و یا دوویێ‌ ژی دەمێ‌ شەهید وەحید محەمەد نادر ل هندرینێ‌ شەهید بووی و یا سێی ژی دەمێ‌ خودێ‌ ژی رازی جەلال و هەڤالێن مە و گوندیێن مە ل كورەژاری شەهید بووی و دەمێ‌ ئەم هاتینە مال، پا خودێ‌ ئەم نەبرین و ئەم پاراستین، و دەمێ‌ كەس و كارێن وان شەهیدان هاتنە براهییا مە و هەر ئێكێ‌ دكرە هەوار و دگۆتن، پا كا كورێ‌ من ئێكێ‌ دگۆت كا زەلامێ‌ من ئێكێ‌ دگۆت كا برایێ‌ من راستی هەستەكێ‌ گەلەك نەخوەش بوو، لێ‌ ژیان یا هوسایە و ئەم سەر بلندین ب وان شەهیدان، هەكە مە ئەو شەهید نەدابانە ئەو ئازادیا ئەڤرۆ ئەم تێدا نەدبوو و هەكە بەرهەمێ‌ وان شەهیدان نەبوایە ئەڤرۆ پەرلەمان و حكۆمەتا هەرێمێ‌ نەدبوو و ئەم هیڤیدارین گەنج و لاوێن مە بزانن ئەڤ دەسكەفتە چاوا هاتینە و مە چەند قوربانی ل سەر داینە ، هیڤیدارن خوە لێ‌ بكەنە خودان و ب پارێزن و ئەم بەرف پیریێ‌ دچین و پاراستنا ولاتێ‌ مە ئەركێ‌ گەنج و لاوێن مە یە بو یەكێ‌ خوینا ڤان شەهیدان ب هەروە نەچیت.
ناڤهاتی دیاركر، كو وان چ ئوپەراسیونا هندی یا دێرەلۆكێ‌ شەهید نەداینە و هەموو ژی كەسانێن بەركەفتی بووین و خودان پلە و كادرێن پێشكەتی بووینە و گۆت: د بەرنامێ‌ مە دا بوو ئەم بچینە شێلادزێ‌ و گۆت : خوەشترین دەم بو من دژیانا من دا ئەو بوو دەمێ‌ سەرۆك بارزانی مەدالی ب من ڤەكری ل سەر شاشا تەلەڤزیونێ‌ و جیهانێ‌ هەموویێ‌ دیت و من هەست ب هندێ‌ كر ئەو خزمەتا من كری ب هەرەوە نەبوویە بەلێ‌ ئەڤێ‌ مەدالیێ‌ ووژدانا من هێزتر لێكر و ئومێدا من مەزنتر لێ‌ كر و نوكە ژی ئەز خانەنشینم و ل سەر لیستا پەككەفتیان، بەلێ‌ ئەز دەوامێ‌ دكەم ب شەڤ و رۆژ و من ئومێد یێ‌ ب وێ‌ چەندێ‌ هەیی هندی ژیانا من مابیت ئەز خزمەتا گەلێ‌ خوە بكەم، چونكە مەلا موستەفا بارزانی دگۆت ، مەزنترین شەرەف ئەوە مرۆڤ خزمەتكارێ‌ مللەتێ‌ خوە بیت و ئەز دبێژم یا رەبی تو ژیێ‌ من درێژبكەین دا تێر خزمەتا گەل و وەلاتێ‌ خوە بكەم.
لیوا خەلیل دیاكر: پتر ژ 100 جاران ل گەل مەلا موستەفا روونشتیمە و ئەز د ناڤ مالا واندا بووم و سالا 1975 دەمێ‌ چووینە نەغەدە ئەم د ئێك ئاڤاهی دا بین و دیاركر، ب دیتنا من ئەو سیفەتێن ل دەڤ بارزانی هەی كەسێ‌ نەبووینە و كەسەكێ‌ سەهم و دادپەروەر و ب دلۆڤان و مرۆڤ نەدشیا بەرمبەری وی باخڤیت و هندی بێژم هەر یا كێمە دێ‌ بێژی مرۆڤەكێ‌ ئیلاهی بوویە.
گۆت: ئومێدا من و یا هەموو كوردەكی بلندكرنا ئالایێ‌ دەولەتا كوردی یە ، خوزی من دیتبایە بلا ئێك دەمژمێر بایە، ئەز ترسم ئەز ژی وەكو هەموو هەڤالێن خوە بچم و ئەز ژی دەولەتا كوردی نەبینم.