سەرۆك مەسعود بارزانی، دوهی پێشوازی ل جەنەرال جۆول ڤاول فەرماندەیێ‌ گشتی یێ‌ هێزێن هەڤپەیمانان ل ئیراقێ‌ و سووریا و شاندێ‌ د گەل دا كر.
د دیدارەكێ‌ دا، دووماهی پێشهات و گوهۆڕین و گەفێن تیرۆرێ‌ ل ئیراقێ‌ و سووریا و دەڤەرێ‌ ب گشتی گەنگەشە كرن. هەروەسا دانوستاندن ل دۆر مەترسیێن سەرهلدانا داعشێ‌ كر و رێچارەیێن پێدڤی بۆ بەرهنگاربوونا تیرۆرێ‌ ب گرنگ زانین.
د پشكەكا دی یا دیدارێ‌ دا، ئاماژە ب بەردەوامیا هەماهەنگیا هێزێن هەڤپەیمانان و هێزێن پێشمەرگەی و سوپایێ‌ ئیراقێ‌ دا و دوپاتی ل بەردەوامیا كارێ‌ هێزێن هەڤپەیمانان ل ئیراقێ‌ و سووریا كر، ب مەرەما رێگریكرنێ‌ ل مەترسیێن سەرهلدانەڤە یا تیرۆرێ‌ و پاراستنا ئاسایش و سەقامگیریا دەڤەرێ‌.
هەروەسا شاندێ‌ ناڤبری، ژ ئالیێ‌ نێچیرڤان بارزانی، سەرۆكێ‌ هەرێما كوردستانێ‌ و مەسرور بارزانی، سەرۆكێ‌ حكومەتا هەرێما كوردستانێ‌ ڤە، هاتە پێشوازیكرن و د كۆمبوونێن جودا دا، دانوستاندن ل سەر پاراستنا ئاسایش و سەقامگیریا ئیراقێ و هەرێما كوردستانێ، كر.

سەرۆكێ هەرێما كوردستانێ، نێچیرڤان بارزانی دوهی سێشەمبی 9/1/2024 پێشوازی ل جەنەرال جۆل ڤاول، فەرماندەیێ گشتیێ هێزێن هەڤپەیمانان ل ئیراقێ و سووریێ و شاندەكێ د گەلدا كر.
د كۆمبوونەكێ دا هاریكاریا هێزێن هەڤپەیمانان ل گەل ئیراقێ و هەرێما كوردستانێ بۆ بەرهنگاربوونا گەفێن تیرۆرێ و ژناڤبرنا ئێكجاری یا داعشێ، هاریكاریا لەشكرێ ئیراقێ و پێشمەرگەی ب مەشق و راهێنان و راوێژا لەشكری، گەفێن تیرۆرێ ل ئیراقێ و سووریێ و ل دەڤەرێ ب گشتی، هاتنە باسكرن.
هەردو ئالیان دوپاتی ل پاراستنا هێزێن هەڤپەیمانان و نوونەرایەتیێن دبلۆماسی ل ئیراقێ كر و د هەڤڕا بوون كو سەقامگیریا ئیراقێ بۆ هەموو دەڤەرێ یا پێدڤیە و دڤێت هیچ دەلیڤەیەك نەهێتە دان تیرۆر سەرهلبدەت، هەروەسا هەردو ئالیان باس ل هێرشێن درۆنی ل سەر هەرێما كوردستانێ كر.
رەوشا ناڤخوەیی یا هەرێما كوردستانێ، ئێكخستنا پێشمەرگەی، ئالۆزیێن رۆژهەلاتا ناڤین و شەڕێ غەززە و كاریگەریێن وی ل سەر دەڤەرێ و چەند پرسێن دی یێن جهێ گرنگیا هەڤپشك، تەوەرەكێ دی یێ كۆمبوونێ بوو كو هەژمارەكا دبلۆماتكار و بەرپرسێن لەشكری، بەرهەڤ بوون.
هەر دوهی سێشەمبی 9/1/2024، مەسرور بارزانی، سەرۆكێ حوكمەتا هەرێما كوردستانێ، پێشوازی ل جەنەرال جۆل ڤاول، فەرماندەیێ گشتیێ هێزێن هەڤپەیمانان ل ئیراقێ و سووریێ و شاندەكێ دگەلدا كر .
پاراستنا ئاسایش و سەقامگیریا ئیراقێ و هەرێما كوردستانێ، بابەتێ سەرەكیێ كۆمبوونێ بوو، هەردو ئالیان دوپاتی ل گرنگیا بەردەوامبوونا هێزێن هەڤپەیمانان د ئەركێن خوە دا كر ژ پێخەمەت هاریكاریا لەشكرێ ئیراقێ و هێزا پێشمەرگەی د روو ب رووبوونا گەفێن تیرۆرێ و دابینكرنا ئاسایش و سەقامگیریێ.
پشتەڤانیكرن ل چاكسازیێن وەزارەتا پێشمەرگە ل حوكمەتا هەرێما كوردستانێ و بلەزكرنا ئێكخستنا هێزێن پێشمەرگەی، تەوەرەكێ دی یێ كۆمبوونێ بوو.

كۆمسیۆنا بلند یا سەربخوە یا هەلبژارتنان ل ئیراقێ و سەرۆكایەتیا هەرێما كوردستانێ ژڤانەكێ نوو بۆ ئەنجامدانا هەلبژارتنێن پەرلەمانێ كوردستانێ دێ دیاركەن.
عیماد جەمیل، سەرۆكێ تیما رۆژنامەڤانی یا كۆمسیۆنا بلند یا سەربخوە یا هەلبژارتنان ل ئیراقێ ڕاگەهاند» ل چەند رۆژێن بهێت شاندەكێ بلند یێ كۆمسیۆنێ دێ ل گەل سەرۆكایەتیا هەرێما كوردستانێ كۆمبیت ب مەبەستا دیاركرنا ژڤانەكێ نوو بۆ ئەنجامدانا هەلبژارتنێن خولا شەشێ یا پەرلەمانێ كوردستانێ».
پێشتر نێچیرڤان بارزانی، سەرۆكێ هەرێما كوردستانێ د مەرسوومەكێ هەرێمی دا رۆژا 25/2/2024 دیاركربوو بۆ ئەنجامدانا هەلبژارتنێن پەرلەمانێ كوردستانێ، بەلێ سكالایەكا دژی قانوونا هەلبژارتنێن پەرلەمانێ كوردستانێ، بەرهەڤیێن كۆمسیۆنا بلند یا سەربخوە یا هەلبژارتنان ل ئیراقێ بۆ ئەنجامدانا هەلبژارتنان راگرت.
ئەو سكالایە دژی پێنج مادەیێن قانوونا هەلبژارتنێن پەرلەمانێ كوردستانێ هاتیە تۆماركرن كو تایبەتن ب هەژمارا كورسیێن پەرلەمانی، ئێك بازنەیی و فرەبازنیا هەلبژارتنان و هەژمارا كورسیێن كۆتا ل پەرلەمانێ كوردستانێ كو ژ ئالیێ زیاد جەبار، سەرۆكێ فراكسیۆنا ئێكەتی نیشتمانی كوردستانێ ل خۆلا پێنجێ یا پەرلەمانێ كوردستانێ و ئامانج نەجیب شەمعون، ئەندامێ كریستیانان ل جڤاتا پارێزگەها سلێمانیێ هاتیە تۆماركرن. ل رۆژا 27/12/2023، دادگەها فیدرالی ل ئیراقێ بۆ جارا حەفتێ بڕیاردان ل دۆر ئەوێ سكالایێ بۆ رۆژا 21/1/2024 پاشئێخست.
سەرۆكێ تیما رۆژنامەڤانی ل كۆمسیۆنا بلند یا سەربخوە یا هەلبژارتنان ل ئیراقێ دوپاتكر» ژ ئەگەرێ ئەوێ چەندێ دادگەها بلند یا فیدرالی ل ئیراقێ زێدەتر ژ حەفت جاران بڕیاردان ل دۆر ئەوێ سكالایێ پاشئێخستیە، نەشیاینە بەرهەڤیان بۆ هەلبژارتنێن پەرلەمانێ كوردستانێ تمام بكەن، لەوما داخوازكریە ژڤانەكێ نوو بۆ ئەنجامدانا هەلبژارتنێن پەرلەمانێ كوردستانێ بهێتە دیاركرن.

جێگرێ بەرێ یێ سەرۆكێ جڤاتا نوونەرێن ئیراقێ باس ل شەڕێ درۆنان ل ئیراقێ دكەت و دبێژیت نابیت ئاخا ئیراقێ بهێتە بكارئینان بۆ ئێكلاكرنا ئەوی شەڕێ ل دەڤەرێ هەی، بەروڤاژی هەكە بەردەوامبوو ئیراق دێ روو ب روویێ شەڕەكێ ناڤخوەیی بیت.
د. بەشیر حەداد، جێگرێ بەرێ یێ سەرۆكێ جڤاتا نوونەرێن ئیراقێ گوت» ئەوا نوكە ل ئیراقێ روو ددەت شەڕێ وەلاتایە ل سەر ئاخا ئیراقێ، نابیت ئیراق ببیتە وەكیلێ ئەڤی شەڕی، ئەو وەلات ژمێژە شەڕی دكەن و یێن هاتین ئاخا ئیراقێ بكاردئینن
لەوما پشتی شەڕێ غەزە جۆرەكێ نە ئارامیێ ل دەڤەرێ پەیدابوویە ب تایبەت ل ئیراقێ و نوكە ژی شەڕێ درۆنان ل ئیراقێ پەیوەندی ب ئیراقێ ڤە نینە و نابیت مەیدانا ئیراقێ بۆ ئێكلاكرنا ئەڤی شەڕی بهێتە بكارئینان».
د. بەشیر حەداد گوت ژی» ئەوا مەترسیدار ئەوە گرۆپێن جۆرا و جۆر دخوازن ئارمانجا ئەڤی شەڕی بگوهۆڕن بۆ هەرێما كوردستانێ و ئەو گرۆپ یێن كەفتینە دناڤ شەڕی دا ب وەكالەت و ئیراق بەر ب نەهامەتیا مەزن دبەن، شەڕ ژی ل گەل ئەمریكایە كو ئەمریكا ب خوە سیستەمێ ئیراقێ دانایە و ئەڤ گرۆپە دخوازن ب ئەڤان هێرشان ئەمریكا خوە ژ ئیراقێ ڤەكێشیت بەلێ دیارە ڤەكێشانا ئەمریكا ئەستەمە، لەوما دەرئەنجام هەكە ئەڤ رەوتە بەردەوامبیت دێ ئیراق تووشی شەڕەكی خویناوی بیت.
سەبارەت كۆمكرنا 54 ئیمزایان ل جڤاتا نوونەرێن ئیراقێ بۆ ئەوێ چەندێ هێزێن ئەمریكی ژ ئیراقێ دەركەڤن، د. بەشیر حەدا گوت» بابەتێ ڤەكێشانا ئەمریكا ژ ئیراقێ پەیوەندی ب جڤاتا نوونەران ژی ڤە نینە ئەگەر نە ل سالا 2019 جڤاتا نوونەرێن ئیراقێ بڕیارا ڤەكێشانا هێزێن بیانی ژ ئیراقێ دەركر بەلێ ئەو چەندە نەهاتە كرن، لەوما نوكە ژی ئەڤ كۆمكرنا ئیمزایان بۆ دەركرنا ئەمریكا ژ ئیراقێ یا بێ مفایە، ئەڤی بابەتی پەیوەندی ب حوكمەتێ ڤە هەیە چونكە هەبوونا هێزێن بیانی ل سەر ئاخا ئیراقێ پەیوەندی ب رێككەفتنا سیاسی یا ئەوان هێزان ڤە هەیە كو پێشتر ل گەل ئەمریكا هاتیە كرن هەكە هات و حوكمەتا ئیراقێ بڕیارا دەركەفتنا هێزێن بیانی ژ ئیراقێ دەركر ئەوی دەمی دێ دەركەڤن، هەكە ژ ئیراقێ ژی دەربكەڤن ب دیتنا من دێ رەوشا ئیراقێ ژ كونترۆلێ دەركەڤیت.

دوهی سێشەمبی 9//2024، شاندەكێ مەلبەندێ كەركووكێ یێ ئێكەتی نیشتمانی كوردستان، سەرەدانا بارەگەهێ لقێ كەركووكێ یێ پارتی دیموكراتی كوردستان كر.
پشتی كۆمبوونێ د كۆنگرەیەكێ رۆژنامەڤانی دا، رەوەند مەلا مەحموود، بەرپرسێ مەلبەندێ كەركووكێ یێ ئێكەتی نیشتمانی كوردستان گوت» مە پەیوەندیەكا جدی و باش ل گەل برادەرێن پارتی هەیە و ئەڤرۆ ئەم بۆ پیرۆزباهیا لقێ سێیێ پارتی یێن هاتین و ئەوان ژی ب گەرمی پێشوازیا مە كر».
گوت ژی» سەرەدانا مە یا برایینی و دۆستایەتی بوو و دێ پەیوەندیێن مە د بەردەوام بن».
هەڤدەم محەمەد كەمال، بەرپرسێ لقێ سێ یێ پارتی دیموكراتی كوردستان ل كەركووكێ گوت» ب خێر هاتنا برایێن مە ل مەلبەندێ كەركووكێ یێ ئێكەتی نیشتمانی كوردستان دكەین كو هاتن بۆ پیرۆزباهیێ و مە بڕیار دایە پێكڤە كار بكەین».
بەرپرسێ لقێ سێ یێ پارتی ل كەركووكێ گوت ژی» مە پشتەڤانیا خوە بۆ داخوازیێن ئاكنجیێن تاخێ نەورۆز دیاركر كو ئەو خانی مولكێ وەزارەتا بەرگریا ئیراقێ نینن و ل باژێرێن دی مە هەمان كێشە هەنە و یێن هاتینە چارەسەركرن، لەوما پێدڤیە ل كەركووكێ ژی بهێت چارەسەركرن».

بالیۆزا ئەلمانیا ل ئیراقێ راگەهاند: هێزێن هەڤپەیمانان بۆ پشتەڤانیكرنا حوكمەتا ئیراقێ ل وی وەلاتی نە و ژ پێخەمەت پەیداكرنا سیستەمەكێ ئاسایشێ، كو رێكێ ب حوكمەتێ ددەت ب خوە سەرپەرشتیێ لێ بكەت.
كریستیانا هومان، بالیۆزا ئەلمانیا ل ئیراقێ گوت» هەردەم ژڤانەك بۆ ب دووماهی ئینانا هەبوونا هێزێن نێڤدەولەتی ل وەلاتان هەیە، نوكە ژی ل ئیراقێ گەنگەشە ل سەر پرسێ هەیە».
بالیۆزا ئەلمانیا ل ئیراقێ ئاماژە ب ئەوێ چەندێ كر» هێزێن هەڤپەیمانان ل سەر داخوازیا حوكمەتا ئیراقێ ل ئەوێ وەلاتی نە و پێدڤیە پاراستنا ئەوان هێزان بهێتە گرەنتیكرن».
هەروەسا گوت» بەرسڤا هێرشێن ل سەر بنگەهێن هەڤپەیمانان یا هاتیە دان».
دیاركر ژی» ج ئەوێ باوەرێ دامە بەرپرسیارەتیا حوكمەتا مێهڤاندارە گرەنتیا سلامەتیا هێزێن نێڤدەولەتی و ئەو كەسێن ل ڤێرێ دژین و كاردكەن بكەت، ئەڤە ژی ئەركێ سەرەكیێ حوكمەتا ئیراقێ یە».
بالیۆزا ئەلمانیا ل ئیراقێ سەرنج بۆ ئەوێ چەندێ ژی راكێشا، هێزێن هەڤپەیمانان بۆ پشتەڤانیكرنا حوكمەتا ئیراقێ ل ئەوێ وەلاتی نە بۆ پەیداكرنا سیستەمەكێ ئاسایشێ، كو رێكێ ددەت ب خوە سەرپەرشتیێ بكەت.
ئەڤە د دەمەكی دایە ژ دەستپێكا شەڕێ د ناڤبەرا ئیسرائیلێ و حەماس دا، هێرشێن گرۆپێن چەكدار ل ئیراقێ و سووریێ ل سەر بنگەهێن هەڤپەیمانان و ئەمریكا زێدەبووینە، هەتا نوكە گرۆپێن چەكدارێن شیعی كو خوە ب (موقاوەما ئیسلامی ل ئیراقێ) د دەنە نیاسین، بەرپرسیارەتیا خوە ژ زێدەتر ژ 150 هێرشان ل سەر هێزێن ئەمریكی و هەڤپەیمانان ل ئیراقێ و سووریێ راگەهاندیە.

وەزارەتا بەرگریا ئەمریكا راگەهاند: مە هیچ پلانەك نینە هێزێن خوە ژ ئیراقێ ڤەكیشین و دێ سەرنجا وان یا مەزن ژی ل سەر بەرنامەیێ شكاندنا داعشێ مینیت.
پاتریک رایدەر، پەیڤدارێ وەزارەتا بەرگریا ئەمریكا (پێنتاگۆن) د كۆنفرانسەكێ رۆژنامەڤانی دا دوپاتكر» هێزێن ئەمریكا ل سەر داخوازیا حوكمەتا ئیراقێ ل وی وەلاتی نە».
داخوازیا ڤەكێشانا هێزێن ئەمریكی دناڤ گرۆپێن چەكداری ل ئیراقێ بەر ب زێدەبوونێ یە، ب تایبەتی پشتی ل رۆژا پێنجشەمبیا بۆری 4/1/2024 دو فەرماندەیێن بلند یێن بزاڤا نوجەبا یا سەر ب حەشدا شەعبی ڤە ب ناڤێن (تالب ئەلسەعیدی)، بەرپرسێ لەشكری یێ ئۆپەراسیۆنێن حەشدا شەعبی ل دەوروبەرێن بەغدا و هاریكارێ وی (عەلی نایف) هاتینە كوشتن كو پشتی كێمتر ژ 48 ساتان ژ ئەوێ روودانێ، ئەمریكا ئەنجامدانا هێرشێ ب ستوویێ خوەڤە گرت.
ل رۆژا ئەینیا بۆری 5/1/2024، محەمەد شیاع سۆدانی، سەرۆك وەزیرێن ئیراقێ د پەیڤەكێ دا د رێوڕەسمێ سالڤەگەرا چارێ یا كوشتنا قاسم سلێمانی، فەرماندەیێ بەرێ یێ فەیلەقا قودس یا لەشكرێ پاسدارێن ئیرانێ و ئەبو مەهدی موهەندس، جێگرێ بەرێ یێ سەرۆكێ دەستەیا حەشدا شەعبی، گوتبوو» مژوولی دیاركرنا ژڤانێ دەستپێكرنا دانوستاندناینە بۆ دەركەفتنا هێزێن بیانی ژ ئیراقێ».
پەیڤدارێ وەزارەتا بەرگریا ئەمریكا بێ ئاگەهیا خوە ژ هەر ئاگەهداركرنەكێ ژ ئالیێ حوكمەتا ئیراقێ بۆ ڤەكێشانا هێزێن ئەمریكی ژ ئیراقێ نیشاندا.
ئەمریكا دو هزار و 500 سەرباز ل ئیراقێ و 900 سەرباز ل سووریێ هەنە، ئەو هێزە ل 17 ئۆكتۆبەرا و پشتی گەرمبوونا شەڕێ ئیسرائیلێ و حەماس زێدەتر ژ 120 جاران ب مووشەك و هاونان و فرۆكەیێن بێ فرۆكەڤان ژ ئالیێ ( موقاوەما ئیسلامی) یا شیعی هێرش ل سەر هاتینە كرن.