رێڤەبەرێ ئاڤا دەوروبەرێن پارێزگەها دهۆكێ دیار كر، ب گوژمێ چار ملیار و880 ملیۆن دیناران 68 پڕۆژەیێن ئاڤا ڤەخوارنێ ل پارێزگەها دهۆكێ هاتینە بجهئینان.
خەلات ئەبابەكر، رێڤەبەرێ ئاڤا دەوروبەرێن پارێزگەها دهۆكێ راگەهاند، سالا 2023ێ ل دهۆكێ 68 پڕۆژە د وارێ ئاڤێ دا ب گوژمێ چار ملیار و 880 ملیۆن دیناران هاتینە بجهئینان، ژ وان ژی 26 بیرێن ئیرتوازی بۆ ئاڤا ڤەخوارنێ هاتینە چێكرن و ب درێژاهیا 96 هزار مەتران تۆڕێن ئاڤێ‌ هاتینە دروستكرن، ئەڤ پرۆژە ل دەڤەرداریێن ئامێدیێ‌ و سێمیلێ‌ و شێخان و بەردەڕەشێ‌ هاتینە بجهئینان.
خەلات گۆت: «12 پڕۆژە ل دەڤەرداریا بەردەڕەش و نەه پڕۆژە ل دەڤەرداریا شێخان و 16 پڕۆژە ل دەڤەرداریا سێمێلێ و پتر ژ 20 پڕۆژەیان ل ئامێدیێ‌ و پینج پڕۆژە ژی ل دهۆكێ هاتینە ئەنجامدان».

هەولێر، قائید میرۆ:

رێڤەبەرێ گشتیێ بانكێن بازرگانی ل حوكمەتا هەرێما كوردستانێ‌ ئاشكرا كر، نوكە ل پارێزگەها هەولێرێ هەموو فەرمانبەران (هەژمارا من) چێكریە و مەها شوباتا داهاتی ژی دێ ل پارێزگەها دهۆكێ پرۆسا چێكرنا (هەژمارا من) دەستپێكەت و سیستەمێ بەرێ یێ بەلاڤكرنا مووچەی نامینیت و دێ بیتە ئەلكترۆنی.
مەولود سابر، رێڤەبەرێ گشیێ بانكێن بازرگانی بۆ رۆژناما ئەڤرۆ دیار كر، پرۆسا (هەژمارا من) یا بەردەوامە و هەتا نوكە هەموو فەرمانبەرێن پارێزگەها هەولێرێ بووینە خودانێ (هەژمارا من) و چار هزار فەرمانبەر ژی دێ ڤێ مەهێ‌ ل گورەی سیستەمێ ئەلكترۆنی مووچەی وەرگرن و گۆت: «بڕیارە مەها شوباتا داهاتی ژی ل پارێزگەها دهۆكێ فەرمانبەرێن حكومەتێ و خانەنشینان دەست ب چێكرنا هەژمارا من بكەن، ئامیرێن راكێشانا پارەی ژی هاتینە جێهگیركرن ب مەرەما راكێشانا مووچەی ل جهێن گشتی».
مەولود سابر گۆتژی: «پرۆسا هەژمارا من زۆر ب شێوەیەكێ سەركەفتی بڕێڤە دچیت و هەتا مەها شەش یا ئەڤ سالە دێ فەرمانبەرێن هەرێما كوردستانێ هەموو بنە خودانێ هەژمارا من و چو ئاستەنگ نەهاتینە پێش، ل گورەی پلانا حوكمەتا هەرێما كوردستانێ سیستەمێ بەرێ یێ بەلاڤكرنا مووچەی نامینیت و ئیدی دێ ب سیستەمێ بانكی فەرمانبەر مەهانە مووچەیێ خوە وەرگرن».

دهۆك، لەزگین جوقی:

رێڤەبەرێ كۆچ و كۆچبەران و بەرسڤدانا قەیرانان ل پارێزگەها دهۆكێ دیار كر، چو كەمپێن ئاوارەیان ب نەچاری ناهێنە دائێخستن و دبێژیت: هەتا نوكە چو نڤیسارێن فەرمی ژ حوكمەتا ئیراقێ نەگەهشتینە مە بۆ دائێخستنا كەمپێن ئاوارەیان د ئەڤ سالە دا.
پیر دەیان جەعفەر، رێڤەبەرێ كۆچ و كۆچبەران و بەرسڤدانا قەیرانان ل پارێزگەها دهۆكێ راگەهاند، كەمپێن ئاوارەیان ب زۆری ناهێنە دائێخستن و ئاوارە ب زۆری ناهێنە ڤەگەڕاندن بۆ سەر جهێن وان و گۆت: «ئاوارە د ئازادن و هەر كەسەكێ بڤێت ڤەگەڕیت، ئەم دێ هەموو هاریكاری و ئاسانكاریان بۆ كەین و هەر كەسەكێ بڤێت د ناڤ كەمپان ژی دا بمینیت، ئەم بەردەوام دێ‌ هارێكاریا هەمی ئاوارەیان كەین».
ناڤهاتی گۆتژی: «ئەڤە چەندین جاران حوكمەتا ئیراقێ بڕیار دان ئاوارە ڤەگەڕنە جهێن خوە، لێ بڕیارێن خوە بجه نائینیت، ئەم داخوازێ ژ حوكمەتا ئیراقێ دكەین، خەلكێ شنگالێ یێ ئاوارە بهێتە قەرەبووكرن و رەوشا دەڤەرێن وان بهێتە ئارامكرن و خزمەتگوزاریێن تەمام بگەهنە دەڤەرێن وان، داكو ئاوارە بشێن ڤەگەڕن».

ئاكرێ‌، رەمەزان زەكەریا:

سەرۆكاتیا باژێرڤانیا ئاكرێ د كۆنگرەكێ رۆژنامەڤانی دا ئامارێن سالا 2023 راگەهاندن و دیاركر كو داهاتێ سالا 2023 یێ باژێرڤانیا ئاكرێ ملیارەك و 967 ملیۆن و 364 هزار دیناربوون.
بلند رەزا، سەرۆكێ باژێرڤانیا ئاكرێ د كۆنگرەكێ رۆژنامەڤانی دا ئامارێن سالا 2023 راگەهاندن و گۆت: «چار پڕۆژەیێن سالا 2022‌ بنیڤەرۆ مابوون ل سالا 2023 ب گوژمێ سێ‌ ملیار 395 ملیۆن دیناران هاتینە تەمامكرن، هەروەسا د سالا بۆری دا دەست بجهئینانا شەش پڕۆژەیان هاتیە كرن ب گوژمێ 9 ملیار و 191 ملیۆن دینار بۆ هاتینە تەرخانكرن ژ بودجەیا پڕۆژەیێن گەشەپێدانا پارێزگەها دهۆكێ‌«.
ناڤبری ئاشكرا ژی كر، داهاتێ سالا 2023 یێ باژێرڤانیا ئاكرێ ملیارەك و 967 ملیۆن 364 هزار دیناربوون كو ل چەندین پشكێن جودا ئەڤ داهاتە سالانە دهێتە كۆمكرن و گۆت: «د سالا بۆری دا 22 هزار و 953 تەنێن گلێشی ل سنوورێ باژێرڤانیا ئاكرێ بۆ كارگەها ڤاڤارتنا گلێشێ‌ هاتینە ڤەگوهاستن».
سەرۆكێ باژێرڤانیا ئاكرێ خویا ژی كر، د سالا بۆری دا دو پڕۆژەیێن وەبەرهێنانێ هاتینە ئەنجامدان، دیسا شەش دەستووری داینە ئاڤاكرنا ئاڤاهیێن بارزانی و 214 دەستووریێن ئاكنجیبوونێ هاتینەدان و 388 زێدەگاڤی ژی هاتینە راكرن و 15 كەس ژی هاتینە سزادان.

بەردەڕەش، رەمەزان زەكەریا:

د ناڤ سەنتەرێ دەڤەرداریا بەردەڕەش دا ترۆمبێلەكا ژ جۆرێ تایبەت خوە ل تراكتۆرەكا باژێرڤانیێ دا و شەش كرێكارێن پاقژكرنێ‌ بوونە قوربانی.
نێچیرڤان فەخرەدین، پەیڤدارێ ساخلەمیا ئاكرێ بۆ ئەڤرۆ گۆت: «دوهی 9/1/2024 د روودانەكا هاتنوچوونێ دا د ناڤا سەنتەرێ دەڤەرداریا‌ بەردەڕەش دا دو كرێكارێن پاقژكرنێ‌ گیانێ خوە ژ دەست دا و چار كەس ژی بریندار بوون».
گۆتژی: «بەری وان كرێكاران بگەهیننە نەخۆشخانێ دو ژ وان گیانێ خوە ژ دەست دابوو و چار ژی برینداربوون، ژ بەر گرانیا برینا وان ئێك هاتە رەوانەكرن بۆ دهۆك و سێ ژی ل نەخۆشخانا ئاكرێ چارەسەری بۆ هاتە كرن».

ئاكرێ‌، رەمەزان زەكەریا:

زانكۆیا ئاكرێ بۆ زانستێن كرداری د راگەهاندنەكێ دا ئاشكرا كر كو سەنتەرێ زمانان هاتە ڤەكرن، بۆ وان كەسێن حەزا خواندنا ماستەر و دكتۆرایێ هەبیت دێ مفای ژێ بینن، دیسا د. هنێر سەدیق ئیسماعیل وەكو رێڤەبەرێ سەنتەرێ زمانان هاتە دانان.
د راگەهاندنا زانكۆیا ئاكرێ بۆ زانستێن كرداری دا هاتیە، مزگینیا سەرۆكێ‌ زانكۆیا ئاكرێ‌ بۆ كەسێن حەزا خواندنێ‌ هەی، سەنتەرێ زمانان ل زانكۆیا ئاكرێ‌ هاتە ڤەكرن و تێدا هاتیە: «پشتی بزاڤێن بەردەوام یێن د. مەنهەل ئیلهام عەبدال، سەرۆكێ‌ زانكۆیا ئاكرێ‌ بۆ زانستێن كرداری ل گەل وەزارەتا خواندنا بلند و ڤەكۆلینێن زانستی رازیبوون ل سەر ڤەكرنا سەنتەرێ زمانان ل زانكۆیا ئاكرێ‌ هاتە كرن».
ئاشكرا ژی كریە، ڤەكرنا سەنتەرێ زمانان ل زانكۆیا ئاكرێ‌ كارئاسانی و رێخۆشكەرە بۆ ئەو كەسێن حەزا تەمامكرنا خواندنا ماستەر و دكتۆرایێ‌ هەی ل زانكۆیا ئاكرێ خۆلێن زمانان دێ بۆ هێنە ڤەكرن.