دوهی چارشەمبی 4-12-2024، سەرۆك مەسعود بارزانی ل سەلاحەدین پێشوازی ل عەبدوللا مەتەر ئەلمەزروعی، بالیۆزێ نوو یێ ئیماراتێ ل ئیراقێ كر.
د دیدارەكێدا بالیۆزێ نوو یێ ئیماراتێ ل ئیراقێ خوەشحالییا خوە ب سەرەدانا هەرێما كوردستانێ و دیدارێ ل گەل سەرۆك بارزانی دەربڕی و سلاڤێن تایبەت یێن شێخ محەمەد بن زاید ئال نەهیان، سەرۆكێ ئیماراتێ گەهاندنە سەرۆك بارزانی، هەروەسا هەلویستێ گەلێ كوردستانێ و حوكمەتا هەرێمێ و دەزگەهێن هەرێمێ بلند هەلسەنگاند بۆ پەیداكرنا سەقامگیریێ و بزاڤێن ڤەژاندنێ و ئاڤەدانیێ.
ژ ئالیێ خوەڤە سەرۆك بارزانی ب گەرمی ب خێر هاتنا بالیۆزێ ئیماراتێ ل ئیراقێ كر و هیڤییا سەركەفتنێ بۆ خواست، سەرۆك بارزانی عەقلانییەت و رژدییا سەركردایەتییا ئیماراتێ بۆ ئاڤەدانیێ و گەشەپێدانا وەلاتێ ب نموونەیی هەژمارت، هەروەسا دوپاتی ل دۆستایەتی و نێزیكییا د ناڤبەرا گەلێ كوردستانێ و گەل وسەركردایەتییا دەولەتا ئیماراتێ كر و داخوازكر پەیوەندی و دۆستایەتییا دناڤبەرا هەردو ئالییاندا ب هێزتر و بەرفرەهتر ببن.

دوهی چارشەمبی 4/12/2024، نێچیرڤان بارزانی، سەرۆكێ هەرێما كوردستانێ، د دیدارەكێدا ل گەل عەبدوللا مەتەر ئەلمەزروعی، بالیۆزێ نوو یێ ئیماراتێ ل ئیراقێ، پیرۆزباهییا دەستبكاربوونێ لێكر و هیڤییا سەركەفتنێ بۆ خواست، هەروەسا پشتەڤانییا خوە و ئالیێن پەیوەندیدارێن هەرێما كوردستانێ بۆ سەرئێخستنا ئەركێ وی، دوپاتكر.
ژ ئالیێ خوەڤە، بالیۆزێ ئیماراتێ سلاو و رێزێن سەرۆكێ ئیماراتێ، شێخ محەمەد بن زاید ئال نەهیان گەهاندنە نێچیرڤان بارزانی، هەروەسا پەیوەندیێن ب هێز یێن وەلاتێ خوە ل گەل ئیراقێ و هەرێما كوردستانێ بلند هەلسەنگاند و دوپاتی ل پێگیرییا ئیماراتێ بۆ زێدەتر ب هێزكرنا پەیوەندیێن خوە ب تایبەتی ل گەل هەرێما كوردستانێ كر.
هەر د وێ دیدارێدا سەرۆكێ هەرێما كوردستانێ سلاڤ و رێز بۆ سەرۆكێ ئیماراتێ هنارتن و سوپاسییا خوە بۆ پشتەڤانییا بەردەوام یا ئێماراتێ ل ئیراقێ و هەرێما كوردستانێ دوپاتكر. هەروەسا هەردو ئالییان دەربارەی بەرفرەهكرنا هاریكارییا هەڤپشك د وارێن جودا دا، بیر و بۆچوون لێكگوهارتن.
دوماهی پێشهاتێن دەڤەرێ، ب تایبەتی رەوشا سووریێ و هندەك پرسێن دی یێن جهێ گرنگیدانا هەڤپشك، تەوەرەكێ دی یێ دیدارێ بوو.

دوهی چارشەمبی 4/12/2024، مەسرور بارزانی، سەرۆكێ حوكمەتا هەرێما كوردستانێ، پێشوازی ل عەبدوللا مەتەر ئەلمەزروعی، بالیۆزێ نوو یێ ئیماراتێ ل ئیراقێ كر.
ب گۆڕەی بەیاننامەیەكا حوكمەتا هەرێما كوردستانێ، سەرۆكێ حوكمەتا هەرێمێ پیرۆزباهی ل ئەلمەزروعی كر ب هەلكەفتا دەستبكاربوونێ و هەموو هاریكاری و پشتەڤانییەكا حوكمەتا هەرێما كوردستانێ بۆ بالیۆزێ دەربڕی ژ پێخەمەت سەرئێخستنا ئەركێ وی و زێدەتر پێشئێخستنا پەیوەندیێن دو ئالییانە د وارێن جۆرا و جۆر دا».
بالیۆزێ ئیماراتێ، سلاڤ و رێزێن سەرۆكێ ئیماراتێ شێخ محەمەد بن زاید ئال نەهیان گەهاندنە سەرۆكێ حوكمەتا هەرێمێ و دوپاتی ل پێشڤەبرنا پەیوەندیێن دۆستانە یێن وەلاتێ وی ل گەل هەرێما كوردستانێ كر.
گرنگییا پاراستنا ئاسایش و سەقامگیرییا ئیراقێ و دەڤەرێ، پشكەكا دی یا دانوستاندنان بوو.

پشتی ڤالاهییا ئەمنییا حوكمەتا ئێراقێ ل دەڤەرا رۆژئاڤایێ دیجلە دروستكری وبوویە ئەگەرێ تێكچوون و داگیرگرنا وان دەڤەران و پشتی شكاندنا گرۆپێ تیرۆستییێ داعشێ و ئازادكرنا وان دەڤەران ب سەرپەرشتییا راستەوخوەیا سەرۆك بارزانی و هێزا پێشمەرگێ كوردستانێ ل سنوورێ قەزا شنگالێ، رەوشا شنگالێ ژبەر هەبوونا چەندین هێز و گرۆپێن جودا و پشتگوه هاڤێتنا وان دەڤەران ژئالیێ ئێراقێ ڤە ژ روویێ ئەمنی و ئاڤەدانیڤە بەر ب پێشڤە نەچوویە.
نازم هەركی، بەرپرسێ لقێ 17 یێ پارتی دیموكراتی كوردستان ل رۆژئاڤایێ دیجلە و شنگالێ ل دۆر رەوشا قەزا شنگالێ و سنوورێ وێ ژ روویێ ئەمنی و ئاڤەدانییێ ڤە د نوكە دا بۆ روژنامەیا (ئەڤرۆ) ئاشكرا كر كو هەتا نوكە رەوشا شنگالێ ئارام نەبوویە و بەرژەنگ ژی نەڤەگەریانا زێدەتری 20 هزار ئاوارەیان ژ كەمپان كو 37 هزار خێزانن كو د نوكە دا ل دەرڤەی كەمپان دژین وئاوارەنە و گۆت» ئەگەر ژبەر رەوشا ئەمنی یا خراب و نەبوونا ئاڤەدانیێ و خزمەتگوزاریانە كو هێشتا خانی و مال و سامانێ وان یێ كو ل سەردەمێ داگیركرنا وان دەڤەران ژئالیێ رێكخراوا تیرۆرستییا داعشێ ڤە هاتینە ژناڤرن نەهاتینە ئاڤاكرن و قەرەبووكرن و هەبوونا هێزێن نەقانوونی ژی بوویە ئەگەر د دو دلییێ دابن كو جارەكا دی ژبەر وان هێزێن نەقانوونی و خوسەپێن ل شنگالێ تووشی هەمان روودانێن سەردەمێ داعشێ ببن».
سەبارەت پڕۆسەیا ئاڤەدانییێ ل سنوورێ قەزا شنگالێ، نازم هەركی گۆت» ئاڤەدانی وەكو پێدڤی ل ئاست نینە و خەلكێ دەڤەرێ داخازا ب جهئینانا رێككەفتنا شنگالێ دكەن ژبەر كو ب رێكا ب جهئینانا رێككەفتنا شنگالێ كو بەری چار سالان د ناڤبەرا حوكمەتا هەرێما كوردستانێ و حوكمەتا فیدرالی دا و ب بەرهەڤبوونا ئالیێ سێیێ ئەوژی رێكخراوا نەتەوەیێن ئێكگرتی، هاتییە ئیمزاكرن دێ ڤەژاندن و ئاڤەدانی و ئارامی و دامەزراندن ل شنگالێ و سنوورێ وێ پەیدا بیتن ژ بەر كو د رێككەفتنا شنگالێ دا ئەڤ بابەتە ب روهنی یێن هاتینە باسكرن».
سەبارەت وان دەنگوباسێن ئاماژێ ب رێگریكرنا پارتی ل ئاوارەیان بۆ ڤەگەریانێ بۆ دەڤەرێن خوە دكەن، گۆت» ئەم وان هەموو توهمەتان رەت دكەین یێن باسێ رێگریكرنا پارتی بۆ ڤەگەریانا ئاوارەیان بۆ سەر مال و دەڤەرێن خوە یێن رەسەن دكەن».
دیاركر ژی» حوكمەتا ئێراقێ بڕیار دابوو كو دەرگەهێن كەمپان بگریت لێ نەشێت وێ چەندێ ب جهبینیت، ژ بەر كو د نوكە دا زێدەتری 120 هزار قوتابیێن ئاوارە وانەیان دخوینن و ب گرتنا دەرگەهێن كەمپان ئەڤ هەژمارا مەزن یا قوتابیان دێ ژ خاندنێ بێ بەهربن و ل دووڤ رێنمایێن مافێن مرۆڤی رێك ب چو كەس و ئالییەكی ناهێتە دان كو دەرگەهێن كەمپان بگرن و حوكمەتا هەرێما كوردستانێ و پارتی دیموكراتا كوردستانێ و دەزگەهێ خێرخوازییێ بارزانی خەمساری نەكریە د پرسا خزمەتكرنا ئاوارەیان دا و ب هەمان شێوەی هەڤولاتیێن پارێزگەها دهوكێ ژی خەمساری نەكریە و ئاوارە ب هەڤولاتیین پلە ئێك هاتینە هەژمارتن و گەلەك خزمەتا وان یا هاتیە كرن».
سەبارەت پشتەڤانیكرن و ب دەستئێخستن و گەهاندنا داخوازیێن خەلكێ شنگالێ و ئاوارەیان ب رێكا ئەندامێن پارتی ل جڤاتا پارێزگەها نەینەوا و جڤاتا نوونەرێن ئیراقێ، گۆت» ئەندامێن هەردو فراكسیۆنێن پارتی ل پارێزگەها نەینەوا و جڤاتا نوونەران بەردەوام یێن ل سەر هێلێ ل گەل حوكمەت و لایەنێن پەیوەندیدار بۆ گەهاندنا داخازی و مافێن خەلكێ شنگالێ و ئاوارەیان».
نازم هەركی رۆهنكر ژی» ب مخابنیڤە هندەك ئالیێن سیاسی یێن ئێراقی هەست و سوزێن ئاوارەیان ب بەرژەوەندین خوە ین سیاسیڤە د چەسپینن و ب چاڤێ مرۆڤایەتی لێ نانێرن، حوكمەت و وەزارەتا كۆچ و كۆچبەرێن ئێراقێ سەرەرای هەبوونا بودجەیەكا مەزن د دەستاندا بەلێ وەكو پێدڤی خزمەتا خەلكێ شنگالێ و ئاوارەیان ناكەن و ڤێ پرسێ ب سیاسی دبینن نەكو مرۆڤایەتی».
لدور گرنگیا ئەنجامدانا سەرژمێریێ ل قەزا شنگالێ و رۆلێ خەلكێ وێ و ئاوارەیان گۆت» پێشوازیا خەلكی بۆ سەرژمێریێ ل شنگالێ گەلەك یا ب هێز بوو میناك ژی ئاوارە ل دەڤەرا زومار100% بۆ دەڤەرێن خوە ین رەسەن ڤەگەریابوون و ل سەنتەرێ قەزا شنگالێ ژی رێژەیا بشكدارییا خەلكی 98% بوو ئەڤەژی ئاماژەیە كو شنگال و سنوورێ وێ هەلگرا ناسناڤێ كوردستانییە و ئەڤ چەندەژی جهێ سوپاسی و دەستخوەشیا مەیە بۆ خەلكێ شنگالێ، ئەنجامدانا سەرژمێریێ ژی گرنگییا خوە هەبوو ب تایبەت ژی كو سەرژمێریا سالا 1957 بوویە پیڤەر و بنیات بۆ دەڤەرێن كوردستانی ین دەرەڤەی ئیدارەیا هەرێما كوردستانێ و داخاز ژ هەڤوەلاتیێن شنگالێ و یێن د كەڤنە سنوورێ مادەیا 140 دا كر كو ب هەمان شێوە ل قۆناغا سیێ ژسەرژمێرییێ پشكدار ببن ژ بەر كو ئەڤ سەرژمێرییە پڕۆسەیەكا گرنگە ژ روویێ سیاسی و جڤاكی و ئابووری و دیاركرنا پشكێن دەڤەران ژ بودجەیا فیدرال بۆ مەبەستا ئاڤەدانی و گەهاندنا خزمەتگوزارییان».
ل دۆر پێشوازیكرنا خەلكێ شنگالێ ل پارتی دیموكراتی كوردستانی ئاماژەكر» خەلكێ شنگالێ و ئاوارەیێن شنگالێ باوەرییەكا تەمام ب رێبازا پیرۆزا بارزانی و سەرۆك مسعود بارزانی و پارتی هەی و ب رێكا دەنگدانێ ب بەربژارێن پارتی بۆ جڤاتا پارێزگەها نەینەوا و جڤاتا نوونەرێن ئێراقێ پشتەڤانییا خوە بۆ پارتی دووپاتكریە كو پارتی د هەلبژارتنێن بۆری دا پارتیا پترییا خەلكێ شنگالێ بوو ب رەنگەكی كو هێزا ئێكێ و خودانا پترییا كورسیان بوو».

عەزیز هەورامی:

چاڤدێرێن سیاسی دبێژن، دڤێت حوكمەتەكا ب هێز د چارچۆڤەیێ لهەڤهاتنا نیشتمانی بهێتە پێكئینان، ل سەر بنەمایێ دەنگێن خەلكێ كوردستانێ ل هەلبژارتنێن پەرلەمانێ كوردستانێ ل 20/10/2024، هەروەسا دیاركر دڤێت حزبێن سەركەفتی پشكدارییەكا راستەقینە د حوكمەتێ دا بكەن بۆ بەرژەوەندییا خەلكی و وەلاتێ مە نەكو بۆ ب دەستڤەئینانا پۆستان بۆ بەرپرسێن خوە.
كاوە حاجی رەسول، چاڤدێرێ سیاسی بۆ رۆژنامەیا (ئەڤرۆ) گۆت» هەرێما كوردستانێ د ڤالاتییەكا قانوونی دا بوو و ئەنجامدانا هەلبژارتنان سەركەفتنەكا مەزن بوو بۆ هەرێمێ، پارتی دیموكراتی كوردستان یا ل گەل لهەڤهاتنا نیشتمانی، بۆ هەڤپشكی پێكرنا ئالیێن سیاسی، ئالیێ وەسا هەبوو ل بۆری هەژی وێ چەندێ نەبوو هەتا پۆستێ رێڤەبەرێ گشتی پێ بهێتە دان، بەلێ د پشكداری پێكرنێ دا پۆستێ بلند پێ هاتیە دان».
گۆت ژی» هندەك پۆستێن بلند یێن هەین كو مافێ كورسی و دەنگێن پارتی ب خوەیە، دڤێت ل دەف پارتی بمینن، د دەمێن بۆری دا هندەك ژ حزبان د حوكمەتێ دا پشكدار دبوون بۆ بەرژەوەندیێن خوە، ل دەمێ نێزیكبوونا هەلبژارتنان وەكو سەردابرنا خەلكی، دا ژ حوكمەتێ هێنە دەر، ئەوژی شاشی بوو وان دكر».
وی چاڤدێرێ سیاسی دیاركر ژی» پشكداری پێكرنا راستەقینە بۆ وان ئالیێن سیاسی یێن دهێنە دناڤ حوكمەتێ دا كو د بەرژەوەندییا بەر ب پێشڤەبرنا دۆزا كوردی دایە، بەلێ هەڤپشكییا دۆستانە كو بەرژەوەندییا خەلكی و حوكمەتێ ل بەرچاڤ بگرن، نەكو پشكدارییەك تنێ بۆ ب دەستڤەئینانا پۆستان بۆ كاربەدەستێن خوە بیت».
ناڤبری ئاماژە ب وێ چەندێ ژی گر» دڤێت قەبارەیێ پشكدارییا حزبان ل سەر بنەمایێ رێزگرتنێ ل دەنگێن هەڤوەلاتیێن كوردستانێ بیت، نابیت رێژەیا دەنگ و كورسییان ل بەرچاڤ نەهێتە وەرگرتن، بەرژەوەندییا خەلكێ كوردستانێ د وێ چەندێ دایە د چارچۆڤەیێ هەلبژارتنێن 20 ئۆكتۆبەرێ حوكمەتەكا ب هێز بهێتە پێكئینان».