ديدار، سالار محةمةد دؤسكى:
حسێنێ زیندانیێ سیاسی ئەو ژی گۆت: هەر ل زیندانا كەركووكێ دەمێ مە خوارن دخوار رۆژێ دو جاران سپێدێ و ئێڤاری مە ماف هەبوو بچینە دەست ئاڤێ، و هەر كەسەكێ چووبا دەست ئاڤێ و ئەگەر ژ خولەك و نیڤا بوری با ل جهێ دەست ئاڤێ، و ل دەمێ دەركەفتنێ دا ب سوندا گەلەك ئێشینن هەتا گەهشتبا جهێ خوە، و هەر چ دەست ئاڤ با مرۆڤ نەیێ ئارام بوو ب دلێ خوە و دڤیابا وی دەمێ دیاركری دا قورتال ببا، و رۆژەكێ ئەم دەركەفتین بووینە رێز ل بەرامبەر ژوورا سێدارەدانێ یا دیار بوو، ئەو ژوور و هەر كەسەكێ سزادیێ سێدارێ ل سەربا دا بەنە وێ ژووێ هەتا دهاتە ڤەگوهاستن بۆ زیندانا ئەبو غورێب و دهاتە سێدارەدان، بیرا من دهێت سنێلەكێ بچوویك خەلكێ هەولێرێ بوو 13 سالی بوو ل بەردەرگەهێ ژوورا سێدارەدانێ بوو، و دنیا جەمەد بوو و پیچەكێ تاڤ دەركەت بوو و مژوویل دكرن، و دەرگەهێ ژوورا كەسێن سێدارەدانێ یا ڤەكری بوو، ئانكو دگۆتن ئەڤە هەر دێ هێنە سێدارەدان ئەڤجا دەلیڤە دایێ دەرگەهێ وانێ ڤەكری بیت، چومە بەرامبەر وێ ژوورێ جندیەكێ ئیراقێ هندەك پرسیار ژێ دكرن، و من بۆ هەر دوكان وەردگێرا، و گۆتێ تە چەند خویشك و برا هەنە گۆتێ من سێ برا و دو خویشك هەنە، و گۆتێ دایك و بابێن من هەر دو دساخن، وی جندی گۆتێ تە چ هیڤی هەیە بەری تە سێدارەبدەن ؟ وی كوری گۆتێ من ئێك داخوازی هەیە داخواز ژ خودێ و هەوە دكەم بوو من بكەن و من جوتەكێ كوتران هەیە و حەزدكەم هەر دو لدەف من بن، و ئەز تومكی بدانمە سەر دەستێ خوە و ئەو بخون، و دووڤدا بفرن و پاشان من سێدارەبدەن، ئەڤێ ئاخفتنێ گەلەك یا نەخوش بومن بوو، و گەلەك ئێشام و من گۆتە وی كوری هەرە ژوور ڤە ئەڤا دڤێت یاریا ب هەستێ تە بكەن، و چوو ژوور ڤە و ئەڤ گەلەك یا نەخوش بوو.
هەمان زیندانیێ سیاسی ئەو ژی گۆت: ئەم 30 زیندانی ل ژوورەكا سێ ب چار ڤە بووین ئەڤجا رۆژانە دا كەسەكی بەن و گەلەك ئەشكەنجەدەن و ئێڤاری دا كەنە دناڤا بەتەنیەكێ دا و هاڤێنە بەر دەست و پێن مە و ئەم دا كەڤینە بەر دەست و پێن وی پەرخینین و پێن زەلامان گەلەك خوین ژێ دهات، چونكە فەلەقەددان، رۆژەكێ كەسەك هاڤێتە دناڤا بەتەنیێ دا و ئینا ناڤ مە دا و مە ژی دەست هاڤێتێ دا پێن وی پەرخینین و چووینە هنداڤ سەری گەلەك كرە گری، و مە گۆتێ خێرە گۆت من دانپیدان كر و مالا خوە خراب كر، و گۆت: من نارنجوك ل گەل چەند بەركێن برنویێ هاڤێت بوونە دمالا كەسەكی ڤە و حوكمەت ئاگەهدار كربوو، كو نارنجوكەك و چەند گولێن برنویێ دمالەكێ ڤە نە و پشتی حوكمەتێ خودانێ مالێ گەلەك ئەشكەنجە دایی، و ل سەر نەچوو زڤرین ئەڤە دەستەسەركر و گۆتنێ تە چەوا زانی ئەڤە دمالا وی دانە، و دووماهیێ دانپیدان كر كو وی هاڤێتنە مالا وی دا ل دەسپێكێ دلێ مە گەلەك پێڤە بوو، و هەر دقوتا و پشتی مەزانی وی دانپیدانكر و ئەوی ئەڤ كارە كریە و بوویە ئەگەرێ دەستەسەركرنا كەسەكێ دی ژی ئێدی دلێ مە پێ نەسوت، چوونكو یێ نەحق بوو و پاشی سزایێ سێدارەدانێ بۆ دەرچوو.
هەمان زیندانیێ سیاسی ئەو ژی گۆت: دەمێ ئەم كورد ل زیندانێن حوكمەتا بەعس جوداهی دناڤبەرا پارتێن سیاسی دا مە نەبوو و هەمی ئێك بووین(پارتی، شوعی، ئێكەتی، پارتی گەل)، چونكە حوكمەتێ ب چاڤێ حزباتیێ تەماشەی مە نەدكر، بەلكو ب چاڤێ كوردینیێ تەماشەی مە دكر ، چونكە سوندێ ئەم پێ دهاتینە سزادان ئێك سوندە بوو و كەسێ پرسیار ژ مە دكرن هەر ئێك كەس بوو، و كنڤا پێ دهاتنە سێدارەدان هەر ئێك كنف بوو، و هەر كەسەكی كنفا خوە نەبوو و جوداهی نەبوو و لەوما خوشی ل زیندانێ هەبوو، و كەسانێن خودان بیر و هزر تێدا هەبوو و گەلەك كەساتیێن بەرنیاس كو نوكە كادرێن پارتێن سیاسی نە ل گەل مەبوون، وەك (حازم یوسف، فرەیدون عەبدوالقادر، جبار فەرمان، ئەرسلان پائیز، ئاسو) ، ئێزدی گەلەك ل گەل مەبوون (خودێدا، شێخ عەتا، سلۆ خدر) ئەڤە ب گونەها كوشتنا قائیمقامی گرتبوون، و دەسپێكێ (سلو خدر) نە گرتبوو و دیسا دانپیدان نەكربوو، و ئەم ماینە ل گەل ئێك هەتا هاتینە ئازادكرن .
هەمان زیندانیێ سیاسی گۆت: وی دەمی كەیفا مە هات دەمێ ژ سزایێ سێدارێ قورتال بووین و هاتینە ڤەگوهاستن بۆ زیندانا ئەبو غورێب و ئێدی مە تەلەڤزیون دیتن و ژ قوتانێ قورتال بووین و سەرەدانێن خێزان و دایك و باب و مرۆڤێن من هەبووینە و سەر شیشتن هەبوویە و دەنگ و باسێن كوردستانێ مە زانی و مەزانی پێشمەرگە هەیە و كەیفا مە گەلەك هات و هەمان دەم دەنگ و باسێن نەخوش ژی مە گولێت بوون.
ل دووماهیێ، حسێن دێرەشی، زیندانیێ سیاسی گۆت: نەیێ پەشێمان ژ دەستەسەركرنا خوە و ێ ئەشكەنجەدانا بەرامبەر من هاتیەكرن و دیركەفتن ژ مرۆڤێن خوە و كەس و كارێن خوە چونكە كوردین و مەدڤیا مە خزمەت كربا و خوە سەربلند دبین كو ئەڤرۆ ب ئازاد بژین و هەر چەندە مە رەخنە هەنە لێ هەر چەوا بیت پێ خوشین و خودێ بكەت و ئەوێ دەست هەلاتێ نەبینین یا مە ب چاڤێن خوە دیتی و پێ خوشین ب ئەڤرۆ چونكە مە گەلەك نەخوشی دیتی نە و مە هیڤی هەنە دێ رۆژێن باشتر درێا مللەتێ مەدابن و دێ شاشی ژی هێنە راستڤەكرن.
نيشاندان