د. عەلی تەتەر، پارێزگارێ دهۆكێ ب هەڤالینیا عومەر عەلی تاها، رێڤەبەرێ گشتی یێ پەروەردێ ل پارێزگەها دهۆكێ و رێڤەبەرا پەروەردا رۆژهەلات ل دەڤەرداریا دهۆكێ دوهی 19/12/023 سەرا پڕۆژەیێ ئاڤاكرنا كۆمەلگەها پەروەردەیی یا خێرخوازی یا شەهید عەزیز رێكانی ل تاخێ نزاركا نوو دا، كو ژ لایێ وەبەرهێنەرێ خێرخواز (بژار عەزیز رێكانی) كورێ شەهیدی ب گوژمێ‌ نێزیكی پێنج ملیۆن دۆلاران دهێتە ئاڤاكرن، پارێزگاری ژ نێزیك سەحكرە قووناغێن بجهئینانا پڕۆژەی و دەستخوشی ل خودانێن پڕۆژەی كر و رۆلێ وان بلند هەلسەنگاند بۆ ئاڤاكرنا ڤی پڕۆژەیێ خێرخوازی و هیڤی خواستن زەنگین و خودان شیان چاڤ ل خودانێن ڤی پڕۆژەی بكەن و ڤان جۆرە پڕۆژەیێن خێرخوازی د بیاڤێن جودا دا ئاڤا بكەن.
هەژی گوتنێ یە پڕۆژە ل سەر رووبەرێ حەفت هزار و 200 مێترێن دوجار دهێتە ئاڤاكرن و ژ باخچێ ساڤایان و قوتابخانەكا مەزن هەر ژ قووناغا بنەرەتی هەتا ئامادەیی پێك دهێت، هەتا نوكە 50% پڕۆژە هاتیە بجهئینان.
دیسا هەر دوهی و ب ئامادەبوونا ساسان عەونی، وەزیرێ باژێرڤانی و گەشتوگوزارێ و د. عەلی تەتەر، پارێزگارێ دهۆكێ ئاڤاهیێ نوو یێ رێڤەبەریا ئاڤا دەوروبەران ل پارێزگەهێ هاتە ڤەكرن.
وەزیرێ باژێرڤانیان و گەشتوگوزارێ و پارێزگارێ دهۆكێ سوپاسیا رێكخراوا (GIZ) یا ئەلمانی كرن بۆ پشتەڤانیكرنا ئاڤاكرنا ئاڤاهی و هیڤی خواستن كاروبارێن وەلاتیان و خزمەتگوزاریێن ئاڤێ بۆ وەلاتیان باشتر بهێنە دابینكرن.
ئاڤاهی ل سەر رووبەرێ هزار مێترێن چارگوشە هاتیە ئاڤاكرن و ژ سێ نهۆمان و چەندین پشكێن كارگێری و خزمەتگوزاری پێك دهێت، پڕۆژە ب پشتەڤانیا رێكخراوا (GIZ) یا ئەلمانی و ب هەڤكاری ل گەل حوكمەتا هەرێما كوردستانێ ب گوژمێ ملیارەك و 400 ملیۆن دیناران هاتیە ئاڤاكرن.

ل سەر ڕاسپاردێن مەسرور بارزانی، سەرۆكێ حوكمەتا هەرێما كوردستانێ، بۆ هشكەڕوویێن ئیدارا سەربخوە یا زاخۆ دێ هێنە چارەسەركرن.
ئەڤرۆ رێكەڤتی ١٩ی كانینا ٢٠٢٣، گوهدار شێخۆ، سەرپەرشتێ ئیدارا سەربخوە یا زاخۆ دوهی 19/12/2023 پێشوازی ل ساسان عوسمان عەونی، وەزیرێ باژێرڤانی و گەشتوگوزارێ و شاندێ د گەل دا كر.
د ڕوونشتن و هەڤدیتنێ دا، بەحس ل بابەتێن گرنگێن گرێدایی بەرژەوەندیا گشتی و دیتنا رێیێن چارەسەریێ‌ بۆ هشكەروویێن د ناڤ باژێڕی دا هاتە كرن.

دهۆك، لەزگین جوقی:

بەرپرسێ راگەهاندنێ ل رێڤەبەریا گشتی یا وەبەرهێنانێ ل پارێزگەها دهۆكێ دیار كر، بۆ جارا ئێكێ یە ل سەر ئاستێ هەرێما كوردستانێ ب گشتی، ب تایبەتی ل پارێزگەها دهۆكێ پڕۆژەیەك مۆلەتەكا جودا و گرنگ وەردگریت، ئەو ژی پڕۆژەیێ پەیمانگەها دەلیڤە یە بۆ بەرهەڤكرنا هۆستا و كرێكاران.
فەلاح حاجی، بەرپرسێ راگەهاندنێ ل رێڤەبەریا گشتی یا وەبەرهێنانێ ل پارێزگەها دهۆكێ بۆ ئەڤرۆ گۆت: “ئەڤ پڕۆژە دێ دەلیڤێ دەتە ئەوان كرێكارێن دڤێن پیشەیا خوە پێشبێخن وەك (هۆستایێن كاشی، سیرامیك، سیستەمێ دانانا تۆڕا غازێ، سیستەمێ دنانا تۆڕێن ئاڤا گران و سڤك، سیستەمێ ئاڤا گەرم و سار و چەندین پیشەیێن دی) پێك دهێت و ئەڤ پڕۆژە ل دووڤ ستانداردێن جیهانی ب گوژمێ‌ ملیونەك و 337 هزار و 526 دۆلاران و ل سەر رووبەرێ سێ‌ هزار و 160 مێترێن دوجار دێ‌ هێتە بجهئینان”.
گۆتژی: “پڕۆژە ژ چار ئاڤاهیان پێك دهێت و ب تمامبوونا وی دێ‌ خزمەتەكا باش پێشكێشی وان هۆستا و كرێكاران كەت یێن دڤێن پیشەیا خوە پێش بێخن و ب رەنگەكێ‌ ئەكادیمی و زانستی فێری كاران ببن”.

زنار تۆڤی:

مللەت زكری، سەرپەرشتێ بەلاڤكرنا گازا سپی ل دەڤەرداریا دهۆكێ دیار كر، پلێتێن گازا سپی یێن بنگەهێ 231 ژی هاتینە بەلاڤكرن و ئەو خێزانێن پلێت وەرگرتین دشێن بەهرا خوە یا گازێ‌ ل گۆرەپانەكا نێزیك مزگەفتا حەجی ئەحمەدی وەربگرن.
ناڤهاتی زێدەتر بۆ رۆژناما ئەڤرۆ گۆت: “گەرا دووماهیێ یا پلێتێن گازا سپی ل سەنتەرێ باژێرێ دهۆكێ ل سەر بریكارێن بنگەهێ 231 یێن ئاهێن خوارنێ هاتینە بەلاڤكرن و نوكە هەموو خێزانێن ل سەنتەرێ باژێرێ دهۆكێ دژین پلێتێن گازا سپی وەرگرتینە”.
مللەتی زێدەتر گۆت: “هەتا نوكە 83 هزار و 606 پلێتێن گازا سپی ل سەنتەرێ باژێرێ دهۆكێ هاتینە بەلاڤكرن، پرۆسێسا بەلاڤكرنا پلێتان ل سەنتەرێ باژێرێ دهۆكێ ب دووماهی هاتیە، دیسا هەتا نوكە نێزیكی 48 هزار خێزانان گازا سپی ل سەنتەرێ باژێرێ دهۆكێ وەرگرتیە و ئەو خێزانێن ماین ژی هەتا بەری سەرێ سالا نوو دێ گازا خوە وەرگرن”.