ديدار، سالار محةمةد دؤسكى:

2-3

پشتی چەند رۆژان ئیناینە سەرسنگێ‌ و برینە ئەمنا دهۆكێ‌، پشكا جینایاتا و ئەم (12) رۆژا ماینە ل ئەمنێ‌ و گەلەك ئەشکەنجەداین، و من دانپیدانەكر و ئەف هەڤالێن مەیێن ئامێدیێ‌ (وەصفی ردێنی، ئەحمەدێ‌ بەگو، ئیبراهیم تەیب، عەبدالرحمان) هەمی رەڤی بوون، و ئەڤە هەمی رێكخستی بوون، (ئەحمەدێ‌ بەگو) گرت بوو و هەتا نیڤا باژێری بربوو و دەستێن وی گرێدایی بوون، ئەوی خوە ژ دەستا ئینابوو دەر و رەڤی بوو و خوە بەرزەكر و چوو ناڤ پێشمەرگەی، و ئەڤێن دی بێ‌ گرتن رەڤی بوون، ل ئەمنا دهۆكێ‌ رۆژا هەشتێ‌ بوو جێگرێ‌ رێڤەبەرێ‌ ئەمنی گۆت وەرە دانپێدانێ‌ بكە، و ئەڤە كاغەزا ئیمزا تەیە و گەلەك ئیمزا ب من دانەكرن و من ئیمزایەكا دی دكر، و گەلەك قوتام و من گۆت ئەڤە نەیامنە، و دووماهیێ‌ جێگرێ‌ رێڤەبەرێ‌ ئەمنی گۆت دانپیدانێ‌ بكە و هەڤالێن تە هەمی تشت ئاشكرا كرینە، و من دیت دو هەڤالێن من ئیانە دەف من و جێگرێ‌ رێڤەبەرێ‌ ئەمنی دەركەفت و ئەم هێلاینە بتنێ‌ و هەڤالێن من گۆتن مە هەمی تشت ئاشكراكرینە، و مە ئابوونە كومكرینە و ئەمن هات من گۆتێ‌ راستە و گۆت هەڤالێن خوە ئاشكرا بكە، و من گوت كەسەك نینە و گەلەك قوتام بێ‌ مفا بوو دووماهیێ‌ ڤەگوهاستینە بنگەهێ‌ پولیسێن دهۆكێ‌ جهێ‌ پاركا نەوروز یا نوكە، و ئەو كەسێ‌ ئامێدێ‌ یێ‌ ئەم ئاشكرا كرین، ئینابوو بنگەهێ‌ پولیسان ب وێ‌ بهانایێ‌ كو ئەو ژی هاتیە دەستەسەركرن، بەلكو هاتبوو كومكرنا پێزانینا ل سەر مە و پشتی بورینا شەش هەیڤان ئەم ڤەگوهاستینە مویسل، و پشتی چەند شەڤان ئیناینە دهۆك و دووڤدا مویسل ڤە و دووڤدا برینە كەركووكێ‌، و (41) شەڤان ماینە وێرێ‌ و هەر ل كەركووكێ‌ هاتینە دادگەهكرن و ل دادگەها تایبەت ئەم هاتینە سزادان و سزایێ‌ (حەیدەری) (15) سال هاتەدەرخستن و ئەز و ( محەمەد صەدیق) (10) سالان هاتینە سزادان و ئەم وەجبا ئێكێ‌ بووین، (30) كەس ل دهۆك و (36) كەس ل سلێمانیێ‌ هاتبووینە دەستەسەركرن، و ل گەل (30) كەسێن دی ل دهۆك ئێكەتی بوون ل گەل (عەبدوالرحمان شنگالی) ئەڤە دەسپێك بوو، و چ قانوون نەبوون و تشتەكێ‌ ژ نشكەكێ‌ ڤە بوو دەستەسەركرنا مە، مە باوەر نەدكر دهێینە سزادان، و مە دگۆت دێ‌ هێینە سێدارەدان و پشتی دەستەسەركرنا مە هندی بەرپرسێن رێكخراو ئەندامێن لژنەیان هەر كەسەكێ‌ هاتبا دەستەسەركرن ئێكسەر سێدارەدان بوو .
ناڤبری هێشتا گۆت: پشتی سزادانێ‌ ئەم هاتینە رەوانەكرن بۆ زیندانا ئەبو غرێب سەقیلە، و شەش هەیڤان ماین و ئەو هەڤالێن مەیێن سزایێ‌ وا كێمتر ئەو جوداكرن، و ئەم ئەڤێن دی برینە سزایێن تایبەت و شوعی و حزب دعوە و ئێكەتی بوون، و هێدی هێدی زێدەبوون و سێ‌ سالان ماین، 22/8/ 1979 سەدام حسێن بۆ سەرۆك كومار و لێبورین دەركر و ئەم هاتینە ئازدكرن، و دیسا 22/8/ جارەكا دی زڤریمە ئامێدیێ‌ وێ‌ شەڤا هاتیمە ئامێدیێ‌ مالا خەزیرێ‌ من وێرێ‌ بوو، مرۆڤێن مە هاتن بخێرهاتن ل مەكر وێ‌ رۆژێ‌ ئەوێن هاتین سەرەدانا من كرین پست پست دكرن، و ئاخفتن و من گۆتێ‌ هەوە خێرە چ چێبوویە، گۆتن (مەحمود ئێزدی) شەهید بوویە ئەڤرۆ ئانكو وێ‌ رۆژا ئەز ل ئامێدیێ‌(مەحمود ئێزدی) ژی شەهید ب بوو، و دووڤدا چوومە گوندی و نەهاتمە ناڤ باژێری و مامە دناڤا شۆرەشێ‌ و بوومە پێشمەرگە، و پشتی ئەنفالا ئانكو ل سالا 1988ێ‌ ئەم (40) رۆژا ماینە توركیا، پاشی چووینە ئیرانێ‌ و سێ‌ سالان مام و سالا 1991 زڤریمە كوردستانێ‌، و پشتی كاودان خوش بووین جارەكا دی چوومە ئیرانێ‌ من خێزانا خوە ژی ئینا كوردستانێ‌.
حسێن محەمەد عەلی بەحسێ‌ چەند بیرهاتنێن نەخوەش ل زیندانێ‌ كرن و گۆت: زیندان ب گشتی یا نەخوش بوو و مە خوە ب بەرهنگاربوویەك و ئازادی خوازەك بەرامبەر دوژمنی دزانی، و سەرا كێشەكا نەتەوەیی ئەم هاتینە دەستەسەركرن، وی دەمێ‌ هاتینە ئازادكرن كەیفا گەلەكا هات كو ئەم ئازاد بووین، بەلێ‌ ئەز ئێك ژ وان بووم یێ‌ دل نەخوش بووم بۆچی دوژمنی بخێرا خوە ئەم ئازادكرین، و مە حەز دكر ئەم ب سەر بلندی ئازاد ب باین، و مە كوردستانەكا رزگاربووی دیتبا، و نەكو دوژمنی لێبورین ل مە كربا و گەلەك ئەشكەنجەدانێن نەخوەش من دیتن، و دیسا ئەشكەنجەدانا دەروونی گەلەك یا نەخوش بوو، ل زیندانا كەركووكێ‌ یا شەرقی بوو و دەردورێن وێ‌ ژوور بوون، و هەر ژوورەكێ‌ چەند كەسەك تێدا بوون، و دیسا دناڤا وێدا حەوشەك هەبوو، و هەر كەسەكێ‌ دهاتە ئەشكەنجەدان چونكو ژوورێن مە ل تەنشت ئێك بوون دەنگێ‌ گری و نالینێن وی خەلكی دهاتن، بوومە گەلەك نەخوش بوو و تایبەت ئەگەر ژنەكەك با و قێژیێن وێ‌ دهاتن، نەبتنێ‌ گریا مە دهات بەلكو روندك ژ هەمی لەشێ‌ مە دبارین و گەلەكا نەخوش بوو، و هندەك گەنجێن بچووك ژ 18 سالیێ‌ و كێمتر ب سزایێ‌ سێدارێ‌ دهاتنە سزادان، ئەو ژی بوومە گەلەك یا نەخوش بوو دوی ماوێ‌ ئەم ل زیندانێ‌ دا.