مەسرۆر بارزانی، سەرۆكێ حوكمەتا هەرێما كوردستانێ، ب مەبەستا پشكداریكرنێ د بەهیا میرێ كوێتێ دا بەر ب ئەوی وەلاتێ چوو.
دوهی دوشەمبی 18/12/2023، مەسرۆر بارزانی، سەرۆكێ حوكمەتا هەرێما كوردستانێ ب سەرۆكایەتیا شاندەكێ حكومی، بەر ب وەلاتێ كوێتێ بڕێكەفت بۆ پشكداریێ د بەهیا شێخ نەواف ئەحمەد ئەلجابر ئەلسەباح، میرێ كوێتێ.
سەرۆكێ دەستەیا دەڤەرێن كوردستانی یێن دەرڤەی ئیدارەیا هەرێما كوردستانێ دبێژیت، ئارمانج ژ دەنگدانێ، زڤراندنا كەركووكێ یە بۆ سەر ب كوردستانێ ڤە، ئاماژە ب ئەوێ چەندێ ژی دكەت كو پێدڤیە بڕێڤەبرنا كەركووكێ بكەڤیتە دەستێ خەلكێ ڕاستەقینە یێ كەركووكێ.
فەهمی بورهان، سەرۆكێ دەستەیا دەڤەرێن كوردستانی یێن دەرڤەی ئیدارەیا هەرێما كوردستانێ گوت» وەلاتیێن كورد ب هەستا نیشتمانی و نەتەوەیی چوونە سەر سندۆقێن دەنگدانێ و ئارمانج ژ پشكداریكرنێ د هەلبژارتناندا تنێ دیاركرنا پارێزگاری ژ ئالیێ كوردان ڤە نینە، بەلكو ئارمانج زڤراندنا كەركووكێ یە بۆ سەر ب كوردستانێ ڤە».
پشتی هێرشێن 16 ئۆكتۆبەرا 2017 گوهۆڕینێن مەزن ب سەر ڕەوشا كەركووكێ و دەڤەرێن كوردستانی یێن دی یێن دەرڤەی ئیدارەیا هەرێما كوردستانێ هاتینە، كورد ل كەركووكێ دبێژن: كورد ل ئەوان دەڤەران ب تمامی هاتینە پشتگوهـ هاڤێتن و ستەم لێ دهێتە كرن، سەرۆكێ دەستەیا دەڤەرێن كوردستانی یێن دەرڤەی ئیدارەیا هەرێما كوردستانێ دبێژیت ئەوا كو هەی «ئەو ب ئەرەبكرنا نوویە كو ل كەركووكێ و دەڤەرێن كێشە ل سەر دهێتە دیتن».
فەهمی بورهان دیاركر ژی» ب پشكداریكرنێ د هەلبژارتنێن جڤاتا پارێزگەها كەركووكێ، كورد دێ بنە پشكەك ژ بڕیاردەرێن سیاسی و كارگێری ل ئەوی باژێری كو پشتی 16 ئۆكتۆبەرا 2017 هیچ بڕیارەك د دەستێ كوردان دا نەمابوو، بەلكو هندەك كەس تێدا كاربدەست بوون كو خەلكێ ڕەسەنێ كەركووكێ نەبوون و بێگومان پشكداریكرن د هەلبژارتناندا گەلەك ژ ئەوان كێشەیان دێ چارەسەركەت».
ئەندامەکێ سەرکردایەتیا ئاکپارتیێ راگەهاند، د ناڤ ئاکپارتیێ دا سەبارەت ب سیاسەتا قەیومان و هەروەسا پرسا کوردی نێرینێن جودا هەنە، چونکی نابیت کەسێن ب دەنگێ خەلکی هاتینە هەلبژارتن ژ کاری بهێنە دوورخستن، ئەو یەک زیانەکا خوە یا مەزن بۆ ئاکپارتیێ ژی هەیە.
ئۆرهان میر ئۆغلۆ ئەندامێ سەرکردایەتیا ئاکپارتیێ و هەروەسا پەرلەمانتارێ بەرێ یێ وێ پارتیێ د داخۆیانیەکێ دا راگەهاند، دەمەکە د ناڤ ئاکپارتیێ دا سەبارەت ب سیاسەتا قەیومان و هەروەسا چاوانیا چارەسەرکرنا پرسا کوردی دانوستاندنێن باش دهێنە کرن، یا راست د ناڤ جڤاتا سەرکردایەتیێ دا سەبارەت ب سیاسەتا قەیومان و هەروەسا چاوانیا چارەسەرکرنا پرسا کوردی دا نێرینێن جودا هەنە و گۆت: (کەسێن دبنە سەرۆکێن باژێرڤانیان ب تایبەتی ژی ل باژێرێن کوردی ل تورکیا ئەو ب دەنگێن خەلکی دهێنە هەلبژارتن، نابیت ژ کاری بهێنە دوورخستن، ئەو یەک ل دژی دیموکراسیێ یە، ئەو یەک زیانەکا خوە یا مەزن بۆ تورکیا و ب تایبەتی ژی بۆ ئاکپارتیێ یا هەی، ژ بەر ڤێ یەکێ ژی هندەک ژ سەرکردێن ئاکپارتیێ وەسا دبینن دڤێت دووماهی ب سیاسەتا قەیومان بهێت).
ناڤهاتی ئەو یەک ژی دیار کر، ئاکپارتیێ د ناڤ باژێرێن کوردی ل تورکیا دا جەماوەریەکێ خوە یێ مەزن هەیە، رێژەکا مەزن ژ دەنگدەرێن کورد د هەلبژارتنێن هەری دووماهیێ دا ژی دەنگێ خوە دانە ئاکپارتیێ، بێگومان وان ژی داخوازیێن خوە هەنە، لێ هەتا نها وەکو پێدڤی داخوازیێن وان نەهاتینە بجهئینان، ئەو یەک ژی بۆ سیاسەتا نها یا ئاکپارتیێ ڤەدگەریت، چونکی دڤێت ئاکپارتی سیاسەتەکا جوداتر ژ جاران ل هەمبەر پرسا کوردی هەبیت، د ناڤ سەرکردێن ئاکپارتیێ دا هندەک کەس وەسا دبینن دڤێت ئاکپارتی سیاسەتا خوە ل هەمبەر پرسا کوردی بگوهۆڕیت و سیاسەتەکا نەرمتر هەبیت، لێ گەلەک کەس ژی پشتەڤانیێ ل سیاسەتا نها یا ئاکپارتیێ دکەن و گۆت: (یا راست سیاسەتا چەند سالێن بۆری یا ئاکپارتیێ ل هەمبەر پرسا کوردی ب تایبەتی ژی سیاسەتا قەیومان زیانا خوە بۆ تورکیا و ب تایبەتی ژی بۆ ئاکپارتیێ هەبوویە، چونکی ئەو یەک دشێت د پاشەرۆژێ دا ژی ئاریشێن گەلەک مەزن بۆ تورکیا دروست بکەت، زیانا خوە بۆ دیموکراسیێ هەیە، ژ بەر ڤێ یەکێ ژی گەلەک ژ سەرکردێن ئاکپارتیێ دخوازن ئێدی دووماهی ب سیاسەتا قەیومان بهێت و سەرۆکێن باژێرڤانیان ژ کاری نەهێنە دوورخستن).
ئەندامێ سەرکردایەتیا ئاکپارتیێ ئەو یەک ژی دیار کر، پێدڤیا تورکیا ب گوهۆڕینێن مەزن هەیە، ئاکپارتی دشێت تورکیا بەر ب قۆناغەکا نوو ڤە ببەت، لێ ژ بۆ هندێ ژی دڤێت د ناڤخوەیێ تورکیا دا ب تایبەتی ژی پارتێن ئۆپۆزسیۆنێ بۆ بەرژەوەندیێن گشتی یێن وەلاتی پشتەڤانیێ ل پرۆژێن نوو یێن ئاکپارتیێ بکەن.
دۆنالد ترامپ سەرۆکێ بەرێ یێ ئەمریکا د داخۆیانیەکێ دا راگەهاند، ئەمریکا د ئاستێ نێڤدەولەتی دا سەنگا خوە یا جاران نەمایە، ئەمریکا ل رۆژهەلاتا ناڤین و گەلەک دەڤەرێن دی یێن جیهانێ پێگەهێ خوە ژ دەست ددەت، نها خەلک سڤکاتیێ ب بایدنی و ئەمریکا دکەن، بایدن ئێدی نزانیت کا چ دکەت، بۆ هەموو وەلاتیێن ئەمریکا ژی ئاشکرا بوویە جۆ بایدن ئێدی کێر سەرۆکاتیێ ناهێت، ژ بەر ڤێ یەکێ ژی دڤێت ئێدی بایدن دەست ژ سەرۆکاتیا ئەمریکا بەردەت، چونکی ئەو نەشێت وەلاتی برێڤە ببەت.
دۆنالد ترامپ کو نها خوە بۆ خۆلا بهێت یا سەرۆکاتیا ئەمریکا بەربژار کریە ئەو یەک ژی دیار کر، ژ بەر سیاسەتا شاش یا بایدنی هەژاری ل ئەمریکا گەلەک زێدە بوویە، هندەک کەسێن دەولەمەند و نێزیکی بایدنی گەلەک دەولەمەندتر بووینە و خەلکێ دی ژی هەژار بووینە، ئەو یەک ب چو رەنگەکێ ناهێتە قەبوول کرن، سەردەمێ بایدنی ب دووماهی هاتیە و پێدڤیا ئەمریکا ب سەرۆکەک نوو و بهێز هەیە دا بشێت جارەکا دی ئەمریکا بکەتە وەلاتێ هەری بهێز ل جیهانێ.
سەرۆک کۆمارێ ئازەربایجانێ د داخۆیانیەکێ دا راگەهاند وان ل گەل وەلاتێ ئیماراتێ ب گۆژمێ ئێک ملیار دۆلاران دەست ب چەندین پرۆژێن مەزن د بیاڤێن جودا جودا یێن خزمەتگوزاریێ دا کرینە و هەروەسا وەکو ئازەربایجان وان دڤێت د بیاڤێن سیاسی و ئابووری دا پەیوەندیێن خوە ل گەل وەلاتێ ئیماراتێ بهێزتر لێ بکەن.
ئیلهام عەلیێڤ ئەو یەک ژی دیار کر، ئیمارات ژ بۆ ئازەربایجانێ وەلاتەک گەلەک گرنگە، بەری نها ژی وان پەیوەندیێن گەلەک باش ل گەل وەلاتێ ئیماراتێ هەبووینە لێ نها وەکو ئازەربایجان وان دڤێت ل گەل ئیماراتێ دەست ب قۆناغەکا نوو بکەن، بێگومان ئەو یەک د بەرژەوەندیا هەر دو وەلاتان دایە، ئازەربایجانێ دڤێت ب رێیا بهێزکرنا پەیوەندیێن خوە یێن سیاسی و ئابووری ل گەل وەلاتێ ئیماراتێ پێگەهێ خوە ل ئاستێ دەڤەرێ دا بهێزتر لێ بکەت و نها کار بۆ ڤێ یەکێ دهێتە کرن.
د. عەلی تەتەر، پارێزگارێ دهۆكێ دوهی 18/12/2023 سەرەدانا مەكتەبا رێكخستنا پارێزگەها دهۆكێ كر و د هەڤدیتنەكێ دا ژ لایێ د. پشتیوان سادق، ئەندامێ مەكتەبا سیاسی و بەرپرسێ مەكتەبا رێكخستنا پارێزگەها دهۆكێ و هەردو جێگرێن بەرپرسێ مەكتەبێ ڤە هاتە پێشوازیكرن.
دیسا هەر دوهی د. عەلی تەتەر، پارێزگارێ دهۆكێ سەرەدانا لقێ ١٧ یێ پارتی دیموكراتی كوردستان كر و ژ لایێ بەرپرس و كارگێرێن لقێ ڤە پێشوازی لێ هاتە كرن و د روونشتنەكێ دا ل گەل بەرپرس و كارگێرێن لقێ بەحسێ رەوشا دەڤەرێ و هەلبژارتنێن جڤاتێن پارێزگەهێن ئیراقێ هاتە كرن.
دیسا هەر دوهی د. عەلی تەتەر، پارێزگارێ دهۆكێ ب هەڤالینیا حەمید عەلی، جێگرێ بەرپرسێ مەكتەبا رێكخستنا پارێزگەها دهۆكێ یا پارتی دیموكراتی كوردستان سەرەدانا لقێ ١٤یێ پارتی دیموكراتی كوردستان كرن و د هەڤدیتنەكێ دا بەحسێ رەوشا دەڤەرێ و هەلبژارتنێن جڤاتێن پارێزگەهێن ئیراقێ هاتە كرن.
دیسا هەر دوهی د. عەلی تەتەر، پارێزگارێ دهۆكێ و د گەل دا دەڤەردارێ شێخان سەرەدانا میر حازم تەحسین بەگ، میرێ ئێزدیێن كوردستانێ و جیهانێ ل سەنتەرێ باژێرێ شێخان كر و د هەڤدیتنەكێ دا پارێزگارێ دهۆكێ پیرۆزباهی جەژنا رۆژیێن ئێزی ل میر و هەمی جڤاكێ ئێزدیان كر.
د بەردەوامیا كەسككرنا ژینگەه و دارستانێن پارێزگەها دهۆكێ دا، دار ل 100 دۆنەمێن ئەردی ل پاركا دەرگەهێ ئالۆكا دهێنە چاندن.
چاندنا سەد دۆنەمێن ئەردی ب داران ل پاركا دەرگەهێ ئالۆكا یا بەردەوامە، بڕیارە د قووناغا ئێكێ دا 12 هزار دار ل وێ پاركێ بهێنە چاندن.
ئەڤ دارە ژ لایێ پارێزگەها دهۆكێ ب هەڤكاریا حوكمەتا ئەلمانیا فیدرال رێكخراوا (WFP) و فەرمانگەهێن پەیوەندیدار دێ هێنە چاندن، مەرەم ژ چاندنا وان داران، پێشئێخستنا داراستانێن پارێزگەها دهۆكێ نە.
دەڤەرداریا دهۆكێ ب هەڤكاری ل گەل رێڤەبەریا نەفت و كانزایان ل پارێزگەها دهۆكێ بەردەوامە ل سەر بەلاڤكرنا گازێ ل سەنتەرێ باژێرێ دهۆكێ و بڕیارە ئەڤ سالە هەموو سەرۆك خێزان 200 لێترێن گازێ وەربگرن.
مللەت زكری، سەرپەرشتێ بەلاڤكرنا گازێ راگەهاند، سەرەرای بێهنڤەدانێ ژی لێ دوهی 18/12/2023 و ل دەمژمێر 8ی سپێدێ بریكارێن بنگەهێ 231 یێ ئاهێن خوارنێ سەرەدانا دەڤەرداریا دهۆكێ كرن ژ بۆ وەرگرتنا پلێتێن گازا سپی.
مللەت زكری گۆتی: “ب بەلاڤكرنا ڤان پلێتان، ل هەمی سەنتەرێ باژێرێ دهۆكێ ئەڤ سالە گازا سپی ل سەر دێ هێتە بەلاڤكرن”.
رێڤەبەرێ شوونوار و كەلەپووری ل زاخۆ دیار كر، دەست ب هەلكۆلینێ ل سەر شوونوارێن قشلا زاخۆ هاتیە كرن و هەتا نوكە هندەك پارچەیێن شوونواری یێن گەلەك گرنگ و كەڤنار یێن هاتینە دیتن.
محەمەد ئەحمەد، رێڤەبەرێ شوونوار و كەلەپووری ل زاخۆ راگەهاند، شوونوارێن بەری پێنج هزار و 500 سالان ل ئیدارا سەربخوەیا زاخۆ هاتنە دیتن، نوكە ڤەكۆلین ل سەر شوونوارێن زاخۆ یا بەردەوامە، پشتی كار تمام دبیت دێ هێتە راگەهاندن و گۆت: “چەندین پارچەیێن شوونواری یێن گرنگ د چارچوڤێ كارێ هەلكۆلینێ دا هاتینە دیتن ل سەر شوونوارێن قشلا زاخۆ، هیشتا میژوویا دروست دیارنینە، نوكە هەلكۆلین دهێنە كرن بۆ زانینا میژوویا دروست یا قشلا زاخۆ”.
گۆتژی: “بەری پینج هزار و 500 سالان خەلكەك ل زاخۆ ژیایە، ئەڤ قشلا ل زاخۆ گەلەك یا كەڤنە و هێشتا كارێ هەلكۆلینێ ل سەر یێ بەردەوامە”.
ئامێدیێ، مەحمود نهێلی:
دەست ب جێكرنا پاركەكێ ل سەنتەرێ كۆمەلگەها قەدشێ هاتە كرن و پارێ پێدڤی بۆ هاتیە تەرخانكرن.
ئەندازیار رێڤینگ عادل، سەرۆكێ باژێرڤانیا قەدشێ بۆ رۆژناما ئەڤرۆ دیار كر، پشتی سەرەدانا پارێزگارێ دهۆكێ بۆ دەڤەرا ئامێدیێ ل سەر داخوازیا خەلكێ دەڤەرێ رازیبوون ل سەر چێكرنا پاركەكێ ل سەنتەرێ كۆمەلگەها قەدشێ یا سەر ب ناوچەداریا سەرسنكێ ڤە هاتە كرن و گۆت: “نوكە دەست ب كارێ چێكرنا پاركێ هاتیە كرن و د قووناغێن دەستپێكی دایە”.
ناڤهاتی دیار ژی كر، بۆ ئەنجامدانا ڤی پڕۆژەی گوژمێ 84 ملیۆن 900 هزار دیناران ل سەر بودجەیا تایبەتا پارێزگەهێ بۆ هاتینە تەرخانكرن و گۆت: “ئەڤ پاركە ل سەر رووبەرێ سێ هزار میترێن دوجار ب رەنگەكێ راستەوخۆ دهێتە چێكرن، دیسا پڕۆژەیێ چێركرنا پاركێ دێ د دەمێ خوەیێ دیاركری دا ب داوی هێت و دێ كەڤیتە د خزمەتا خەلكێ دەڤەرێ دا”.
نيشاندان