وەزارەتا بەرگریێ یا ئەمریکا راگەهاند ل هەر دو باژێرێن حەسەکێ و دێرازۆرێ ب درۆنان ئێرشی بنگەهێن سەربازی یێن وان هاتیە کرن، لێ هێزێن ئەمریکا شیاینە وان درۆنان ژناڤ ببەن و چو زیانێن جانێ نەگەهشتینە هێزێن ئەمریکا و نها هێزێن ئەمریکا ل سووریێ و ئیراقێ د ئامادەباشیەکا تەمام دانە.

بەرپرسەکێ وەزارەتا بەرگریێ یا ئەمریکا راگەهاند، بەری دو رۆژان جارەکا دی ل حەسەکێ و دێرازۆرێ ب درۆنان ئێرشی بنگەهێن سەربازی یێن ئەمریکا هاتیە کرن، لێ هێزێن ئەمریکا د ئامادەباشیێ دا بوون و ژ بەر هندێ ژی شیان هەر زوو وان درۆنان ژناڤ ببەن و چو زیانێن وەسا نەگەهشتینە هێزێن ئەمریکا، ژ بەر ڤێ یەکێ ژی نها هەموو هێزێن ئەمریکا ل سووریێ و ئیراقێ د ئامادەباشیێ دانە و دێ بەرسڤا هەر ئێرشەکێ ژی دەن.
ئەو یەک د دەمەکێ دایە حەفتیا بۆری ژی فەرماندارەکێ ئەمریکی ل سووریێ دیار کربوو، هێزێن سەر ب ئیرانێ ب درۆنان ئێرشی بنگەهێن وان دکەن، هەکە ئیران وان ئێرشان نەدەتە راگرتن، وەکو ئەمریکا ئەو دێ ب توندی بەرسڤا هەر ئێرشەکێ دەن، چونکی ئیرانێ دڤێت ب رێیا گرۆپێن چەکدار ل ئیراقێ و سووریێ مەترسیان بۆ هێزێن ئەمریکا دروست بکەت، ئەمریکا ژی د ئامادەباشیەکا تەمام دایە و دێ ب توندی بەرسڤا هەر ئێرشەکێ ژی دەت.
چاڤدێرێن سیاسی ژی دیار دکەن، شەرێ د ناڤبەرا ئسرائیلێ و حەماسێ دا دێ رێ بۆ گوهۆڕینێن مەزن ل دەڤەرێ ڤەکەت، ئیران ئێکە ژ وان وەلاتان کو دڤێت پێگەهێ خوە بپارێزیت، ئیرانێ ئەو شیان نینە ب رەنگەکێ راستەوخوە شەرێ ئەمریکا و ئسرائیلێ بکەت، ژ بەر ڤێ یەکێ ژی گرۆپێن چەکدار ل ئیراقێ، سووریێ، یەمەنێ و هندەک وەلاتێن دی ل دژی ئەمریکا و نەیارێن خوە بکار دئینیت، ئەو یەک ژی نیشا ددەت دێ رەوشا رۆژهەلاتا ناڤین یا ئالۆز بیت، چونکی هەر ئێرشەک ل سەر هێزێن ئەمریکا بهێتە کرن ئەمریکا دێ ب توندی بەرسڤێ دەت، نها ژی ئەمریکا هێزەکا زێدە و چەکێن گران ل گەلەک دەڤەرێن سراتیژی ل رۆژهەلاتا ناڤین و سووریێ بجه کریە.
بەری نها رۆژناما واشنتۆن پۆست ژی د راپۆرتەکێ دا دیار کربوو، ئەمریکا هۆشداری دایە ئیرانێ کو ب چو رەنگەکێ هزر د ئێرشان دا ل سەر هێزێن وێ نەکەت، چونکی هەر ئێرشەک بهێتە کرن دێ ئەمریکا ب توندی بەرسڤێ دەت و ل سەر سنۆرێ سووریێ و ئیراقێ ژی فرۆکێن ئەمریکا ئێرشی چەندین بارەگایێن هێزێن چەکدارێن سەر ب ئیرانێ کرن کو د ئەنجام دا گەلەک چەکدار هاتنە کوشتن.

رێکخستنا مافێن مرۆڤی یا سەر ب نەتەوەیێن ئێکگرتی د داخۆیانیەکێ دا راگەهاند، دڤێت دەولەتا ئیرانێ سازیا ب ناڤێ (پۆلیسێن رەوشت)، هەلوەشینت، چونکی ئەڤ سازیە ب هەموو رەنگەکێ وەکو کارتەکا فشارێ ل دژی وەلاتیان ب تایبەتی ژی ژنان دهێتە بکارئینان، هەتا نها گەلەک ژن ب دەستێ وێ سازیێ تووشی ئەشکەنجەدانێ بووینە و هاتینە کوشتن، ژ بەر هندێ ژی دڤێت بەری هەر تشتەکێ بەرپرسێن ئیرانێ وێ سازیێ هەلوەشینن.
د بەردەوامیا داخۆیانیێ دا ئەو یەک ژی هاتیە دیار کرن، کو رۆژانە ل ژێر ناڤێ پاراستنا نامووسێ زۆرداری ل ژنان دهێتە کرن، ژن نەشێن وان جلکان ل بەرخوە بکەن یێن وان دڤێت، زۆرداریەکا گەلەک مەزن ل سەر ژنان هەیە و دڤێت دووماهی ب وێ زۆارداریێ بهێت، چونکی ژنێن ئیرانێ ژی وەکو هەموو ژنێن جیهانێ د ئازادن کا دێ کیژ جلکان بکەنە بەرخوە.

ب، سه‌رجان مەحمود:

پشتی جۆ بایدن سه‌رۆکێ ئه‌مریکا، هژمارەک ژ‌ سیناتۆرێن ئه‌مریکی ژی ب داخۆیانیه‌کا هه‌ڤپشک داخواز ژ بەرپرسێن ئیسرائیلێ کرن کو ئاگربه‌ستەکا بەروەخت راگەهینن، سیناتۆرێن ئه‌مریکی د داخۆیانیا خوه‌ دا راگه‌هاندن کو ئسرائیل د به‌رسڤدانا ئێرشێن حه‌ماسێ دا یا مافداره‌، لێ د هه‌مان ده‌می دا بۆ پاراستنا ژیانا وه‌لاتیێن سڤیل پێدڤی ب ئاگربه‌سته‌کێ یا هەی و دڤێت بەرپرسێن ئسرائیلێ ژی کار بۆ راگەهاندنا ئاگربەستەکا بەروەخت بکەن.
سیناتۆرێن ئەمریکی ئەو یەک ژی دیار کرینە، بەردەوامیا شەرێ نها ل غەزە دێ مەترسیێ ل سەر پرۆسیسا ئاشتیێ د ناڤبەرا ئسرائیل و فەلەستینێ دا دروست کەت، بەری نها سەرۆکێ ئەمریکا ژی ئەڤ داخوازیە ژ بەرپرسێن ئسرائیلێ کرینە، لێ مخابن هەتا نها ئسرائیلێ بەرسڤا داخوازیا ئەمریکا نەدایە و بەردەوامیا شەرێ نها دێ مەترسیەکا مەزن ل سەر هەموو رۆژهەلاتا ناڤین دروست کەت.
ئەو یەک د دەمەکێ دایە بەری چەند رۆژان سەرۆک وەزیرێن ئسرائیلێ ژی راگەهاند، د رەوشا نها دا ئەو هزرا راگەهاندنا ئاگربەستێ ناکەن و خوە بۆ شەرەکی دەمدرێژ بەرهەڤ دکەن، وەکو ئسرائیل وان دڤێت دربێن کوژەک ل حەماسێ بدەن و شیانێن وێ یێن سەربازی ژناڤ ببەن، هەتا وی دەمی ژی دێ شەر ب دوژاری بەردەوام بیت.