ب پشتەڤانی و بەرهەڤبوونا د. عەلی تەتەر، پارێزگارێ دهۆكێ دوهی 29/10/2023 ل هولا محەمەد عارفێ‌ جزیری، رێڤەبەریا گشتی یا رەوشەنبیری و هونەری رێورەسمێن دەستپێكرنا فەستیڤالا «هۆستایان» گێڕان و تێدا چەند پەیڤ هاتنە خواندن ل گەل نیشادانا بەلگە فلمەكی ل دۆر ژین و ژیارا هۆستایێن پارێزگەها دهۆكێ ل گەل چەندین بڕگەیێن مۆزیكێ و بڕیارە بۆ دەمێ‌ دو رۆژان فەستیڤال یا بەردەوام بیت.
د. عەلی تەتەر، پارێزگارێ دهۆكێ د پەیڤەكێ دا گوت: «ئەم خوشحالین ئەڤرۆ ل فەستیڤالا تەخا خوشك و برایێن خوە یێن هۆستا بەرهەڤبووین و چەندەكێ بەحسێ رۆلێ وان د چەند قووناغێن جودا دا بكەین».
پارێزگاری پەسنا وان كر، كو هەتا نوكە هونەرێ خوە، مۆزیكا خوە، كەلتۆرێ خوە د پارێزن و گۆت: «حوكمەتا هەرێما كوردستانێ گرنگی ب ئەڤێ تەخێ دایە و خواست سازیێن خزمەتگوزاری رێ و بانێن كۆمەلگەها ئادار یا ئەڤان خوش و برایان سەخبێر بكەن، چونكی ئەو ئێك ژ پێكهاتەیێن رەسەن یێن كوردستانێ نە»
بەرنامەیێ فەستیڤالێ ئەڤرۆ رۆژا دوشەمبی ژی 30/10/2023 دێ ل كۆمەلگەها ئادار بەردەوام بیت، كو هەموو ئاكنجیێن وێ هۆستانە و تێدا پێشانگەهەكا كار و كارسازێن وان دێ هێتە ڤەكرن، ل گەل پێشكێشكرنا چەند بڕگەیێن هونەری وەك ستران و مۆزیك و دەوات و نیشادانێن جودا ل گەل بەلاڤكرنا چەندین خەلاتان و دێ فەستیڤال ب دووماهی هێت.

زاخۆ، دلۆڤان هالۆ:

شڤان عەبدی، بەرپڕسێ ڕاگەهاندنا ئیدارەیا سەربخوە یا زاخۆ بۆ ڕۆژناما ئەڤرۆ دیار كر كو دوهی 29/10/2023 گۆهدار شێخۆ، سەرپەرشتێ ئیدارەیا سەربخوە یا زاخۆ، پێشوازی ل مەكسیم ڕۆبین، قونسلێ گشتی یێ وەلاتێ ڕووسیا ل هەرێما كوردستانێ كر.
شڤان عەبدی، بەرپڕسێ ڕاگەهاندنا ئیدارەیا سەربخوە یا زاخۆ، ئاماژە ب وێ چەندێ ژی كر كو د ڕوونشتن و هەڤدیتنا خوە دا ل گەل قونسلێ گشتی یێ وەلاتێ ڕووسیا ل هەرێما كوردستانێ گۆهدار شێخۆ، سەرپەرشتێ ئیدارەیا سەربخوە یا زاخۆ گوت: «زاخۆ باژێرەكێ بازرگانی و ستراتیژی و سنووری یێ گرنگە د ناڤبەرا وەلاتێن توركیا و سووریا و ئیراقێ دا، لەورا ئەڤ باژێرە بۆ وەبەرهێنانێ گەلەكێ‌ گونجایە، ب تایبەت د بیاڤێن بەرهەمێن چاندنێ و گەشتوگوزاری دا، دەرگەهێ ئیدارەیا سەربخوە یا زاخۆ دێ ل بەرامبەر وەبەرهێنەرێن بیانی ڤەكری بیت، نەخاسمە د ساناهیكرنا كاروبارێن كارگێری و یاسایی دا».
ناڤهاتی گوتژی: «پشتی زاخۆ بوویە ئیدارەیا سەربخوە، مەسرور بارزانی، سەرۆكێ حوكمەتا هەرێما كوردستانێ بەرهەڤی و پشتەڤانیا خوە ژ بۆ هەر كارەكی د بەرژەوەندیا كوردستانێ و ب تایبەت زاخۆ دا ژ بۆ پێشكێشكرنا خزمەتگوزاریان، كو بهێنە ئەنجامدان دیاركریە».
شڤانی زێدەتر گوت: «مەكسیم ڕۆبینی خوەشحالیا خوە دەربڕی ژ بۆ ڤێ سەرەدانێ و داخوازا سەركەفتن و پێشخستنێ بۆ ئیدارا سەربخوە یا زاخۆ خواست، دیسا ئەم دێ بزاڤان كەین، كو وەبەرهێنەران بینینە باژێڕێ زاخۆ».

هەولێر، قائید میرۆ:

ئەندامەكێ لژنا نەفت و غازێ ل پەرلەمانێ ئیراقێ ئاشكرا كر، بڕیارە ڤێ حەفتیێ گازا سپی یا بەغدا بەگەهیتە هەرێما كوردستانێ و وەزیرێ نەفتا ئیراقێ ژی رازیبوون نیشادایە بۆ هنارتنا گازا سپی بۆ هەرێمێ‌.
دكتۆر سەباح سوبحی، ئەندامێ لژنا نەفت و غازێ ل پەرلەمانێ ئیراقێ بۆ رۆژناما ئەڤرۆ دیار كر، ب شێوەیەكێ فەرمی وان داخواز ژ حوكمەتا فیدڕال كریە، گازا سپی بدەتە وەلاتیێن هەرێما كوردستانێ و گۆت: «وەزیرێ نەفتا ئیراقێ ب نڤیسارا فەرمی رازیبوونا خوە دیاركریە، داكو مینا پارێزگەهێن ئیراقێ گازا سپی بۆ پارێزگەهێن هەرێما كوردستانێ ژی بهێتە دابینكرن، ب تنێ مایە گازا سپی ل گورەی هەژمارا ئاكنجیێن هەرێمێ بهێتە دیاركرن و د دووڤ دا بۆ هەرێما كوردستانێ بهێتە هنارتن».
دكتۆر سەباح سوبحی گۆتژی: «دابینكرنا گازا سپی ژ لایێ ئیراقێ ڤە هاتیە دەستپێكرن و هەموو بزاڤەكێ دێ كەین ڤێ حەفتیێ بەهرا هەرێما كوردستانێ بگەهیت، داكو بۆ وەرزێ زڤستانا ئەڤ سالە هەر خێزانەكا هەرێما كوردستانێ مفاداربیت ژ وەرگرتنا بەرمیلەكا گازا سپی ب بهایەكێ گونجای».

ئامێدیێ، مەحمود نهێلی:

بڕیارە پشتی ئەنجامدانا هەر دو فەستیڤالێن بەرهەمێن خۆمالی ل كانی ماسێ و فەستیڤالا دانیكان ل بامەرنێ، فەستیڤالەكا دی یا تایبەت ب نیشادانا تەحینا دەڤەرێ، ل ئامێدیێ بهێتە ئەنجامدان.
بەرەڤان حەمدی، بەرپرسێ لقێ‌ 18 یێ پارتی دیموكراتی كوردستان دیار كر، ل ژێر چاڤدێریا د. عەلی تەتەر، پارێزگارێ دهۆكێ فەستیڤالا تەحینێ ژی ل ئامێدیێ دێ هێتە ئەنجامدان و گۆت: «ئەنجامدانا ڤان هەردو فەستیڤالێن بەرهەمێن ناڤخوەیی گرنگیەكا زۆر هەبوویە بۆ خەلكێ دەڤەرێ، ژ بەركو، ئەڤ دەڤەرە یا زەنگینە ب بەرهەمێن ناڤخوەیی، لەو ئەڤ فەستیڤالە ژی دێ وەكەت، كو پتر گرنگی ب چاندنێ و جۆتیاران و گوندان و گەشتوگوزارێ بهێتەدان».
ناڤهاتی دیار ژی كر، ئەڤە ئێكە ژ سیاسەتا وانا، كو بەرێ خەلكەكی بكەڤیتە بەرهەمێن ناڤخوەیی و گوندان و گۆت: «ئەڤان فەستیڤالان وەكر، كو خەلكەكێ زۆر قەستا ڤێ دەڤەرێ بكەت و ڤەژاندنەك بكەڤیتە دەڤەرێ و تێكەلیەكا كەلتۆری ل گەل تێكەلیەكا هونەری و ل گەل ساخكرنا بەرهەمێن خۆمالی دروست ببیت».
گۆتژی: «بڕیارە ل مەها بهێت فەستیڤالا تەحینێ ل ژێر چاڤدێریا پارێزگارێ دهۆكێ و دەڤەردارێ ئامێدیێ، ل ئامێدیێ‌ بهێتە ئەنجامدان».

د بەردەوامیا گوهۆڕینان دا ل دامو دەزگەهێن حوكمەتا هەرێما كوردستانێ‌، رێڤەبەرێ‌ حەج و عومرێ‌ ل پارێزگەها دهۆكێ‌ و رێڤەبەرێ‌ ئەوقافا دهۆكێ‌ هاتنە گوهارتن.
د وان گوهۆڕینان دا مەلا رێبەر نێروەیی، وەكو رێڤەبەرێ نوو یێ‌ حەج و عومرێ ل پارێزگەها دهۆكێ ل جهێ‌ مەلا سەرمەد ئالیخان، رێڤەبەرێ‌ بەرێ‌ هاتە دانان.
دیسا مەلا سەرمەد ئالیخان، وەكو رێڤەبەرێ نوو یێ‌ ئەوقافا دهۆكێ ل جهێ‌ مەلا رێبەر نێروەی، رێڤەبەرێ بەرێ‌ یێ‌ ئەوقافا دهۆكێ هاتە دانان.