ئانالیزەكا سیاسی

هەپەگێ د 19 جۆتمەهێ دا ژ نشكانڤە داخۆیانیەك دا و راگەهاند كو ئەو هێزێن خوە ژ مەخموورێ ڤەدكێشن. ئەڤ داخۆیانی وەكە بۆیەرەكا گرنگ كو هەم د وارێ لەشكری و هەم ژی د وارێ سیاسی دا دێ ئەنجامێن خوە هەبن. ژ بەر كو چاڤێ هەموو دنیایێ ل سەر شەڕێ ئیسرائیل و حەماسێ بوو، چ كەسێ ئەنجامێن رادەستكرنا ڤان چەپەرێن پەكەكێ یێن ل مەخموورێ ژ ئالیێن لەشكری و سیاسی ڤە نەنرخاندن.
لێ د راستیێ دا بۆیەرا رادەستكرنا چەپەرێن هەپەگێ یێن ل مەخموورێ وەكە بەردەوامییا 16 جۆتمەها 2017 ژ ئالیێ هەڤپەیمانیا یەنەكێ-پەكەكێ ڤەیە و رادەستكرنا كەركووكێ بۆ حەشدا شەعبی، وەكە بەردەوامییا 18 ئادارا 2018 و رادەستكرنا عەفرینێ یە بۆ دەولەتا ترك. ئەنجامێن وێ یێن لەشكری و سیاسی یێن مەزن دێ هەبن. د ڤی دەمی دا كو رۆژهلاتا ناڤین بەر ب شەڕێ جیهانیێ سێیەمین ڤە دچیت، رادەستكرنا قەرەچۆخ د پاراستنا كوردستانێ دا شكەستنەكا مەزنە. كا ئەم هندەك ووردەكاریێن ڤێ بۆیەرێ هەلكۆلین.
یا كو هاتیە رادەستكرن نە وارگەها مەخموورێ یە، چیایێ قەرەچۆخە
د داخۆیانیا هەپەگێ دا هات گۆتن «ئەم هێزێن خوە ژ كامپا مەخموورێ ڤەدكێشین» ئەڤ پێناسە ب زانەبوون هاتییە هلبژارتن. د ئەساسێ خوە دا یا كو ل پەی خوە هشتیە نەكامپا مەخموورێ یە، چیایێ قەرەچۆخێ یە. پەكەكە ب هەموو كادرۆیێن خوە ڤە ل كامپا مەخموورێ مایە. لێ چەپەرێن چیایێ قەرەچۆخ رادەستی حەشدا شەعبی هاتن كرن.
چیایێ قەرەچۆخێ ب دیرۆك و جهێ خوە ڤە د ئەردنیگاریا كوردستانێ دا خوەدی گرنگیەك تایبەتە. ل هەموو ئیراقێ ژ ئالیێ بلنداهیێ ڤە چ دەڤەرەكا عەرەبان ژ جهێن كوردان بلندتر نینە. ژ بەر ڤێ سەدەمێ چیایێ حەمرین و چیایێ قەرەچۆخێ د دیرۆكێ دا رێگری ل داگیركەرییا عەرەبان كرییە. لەوما ژی قەرەچۆخ وەك مەرتالەكی پاراستنا دەشتا هەولێرێ و ئەردنیگارییا كوردستانێ دكەت.
یێن كو دخواستن ل مووسل – هەولێر – كەركووكێ سەردەست ببن، بەرێ خوە ددەن چیایێ قەرەچۆخێ. ل سەردەما بەرێ ژی ئینگیلیزان هەول ددا كو ل ڤێرێ بنگەهێن خوە بدەنە ئیراقێ.
چیایێ قەرەچۆخ لنگەكێ پرۆژەیا هیلالا شیعی یا ئیرانێ یە
چیایێ قەرەچۆخێ ئیرۆ گرنگیا خوە یا ستراتیژی دپارێزیت. ژ بەر كو شەرتێ بنگەهین یێ سەروەرییا خەتا ژ كەركووكێ هەتا مووسلێ هەتا بۆ شەنگالێ جهبوونا قەرەچۆخێ یە. د دەما سەددام دا وی دخواست ب بجهكرنا عەرەبان ل وێرێ دەمۆگرافییا هەرێمێ بگوهۆریت. ئیرۆ ئەڤ دەڤەرە د چارچۆڤەیا پرۆژەیا هیلالا شیعی یا ئیرانێ دا دهێتە بكارئینان. ئیرانێ ژ سالا 2012ێ پلانەك ژ بۆ دەڤەرێ هەیە كو پشتگریێ بدەتە بێئیستقراریێ ل هەرێمێ و نەهێلیت هێزێن پێشمەرگەی ل وێ دەڤەرێ سەروەر ببن. هنارتنا گەریلایێن پەكەكێ بۆ چیایێ قەرەچۆخێ ژی ژ ئەنجاما ڤێ پرۆژەیا ئیرانێ بوو.
چیایێ قەرەچۆخ چەپەرێ پێشیێ یێ پاراستنا هەولێرێ یە
چیایێ قەرەچۆخێ تەنێ 45 كم دووری هەولێرا پایتەختە. گوند و ناڤچەیێن كوردان یێن ل دەڤەرێ وەك مەخموور، پردێ، دوبز و گوڤەر د بن سەروەرییا ڤی چیایی دا نە. واتە چیایێ قەرەچۆخ نە تەنێ ژ بۆ سەروەرییا رێكا كەركووك – مووسلێ یە، ژ بۆ پاراستنا هەولێرێ ژی پر ستراتیژی یە.
هات زانین كو د سالێن 2020-2021ێ دا گەلەك مووشەكێن كو دهاتنە هاڤێتن بۆ هەولێرێ ژ قونتارا قەرەچۆخێ دهاتنە هاڤێتن. نها دەولەتا ئیراقێ ب بەهانەیا رەوشا ئابۆری یا خەلكێ، هەول ددەت ژ بۆ حەشدا شەعبی جەحشان كۆم بكەت.
وەك هوون ژی دبینن چیایێ قەرەچۆخ نە تەنێ بۆ پاراستنا هەولێرێ گرنگە د هەمان دەمی دا چەپەرەكێ ستراتیژی یێ پاراستنا باشوورێ كوردستانێ یە ژی. ئەڤ دەڤەرە نە جهەكی ئاسایی یە وەكە كو قەرایلان دبێژیت: «ئەم پاراستنا دەڤەرێ ژ جوانان را دهێلن». پەكەكە ب زانەبوون ل سەر مالپەرێن خوە دبێژیت، «دەولەتا ترك ئێریشی وارگەها مەخموورێ دكر، پەكەكێ گاڤەكا تەكتیكی هاڤێت، ئارتێشا ئیراقێ هات و دێ گەلێ مەخموورێ رحەت بیت».
لێ راستی وەهایە: پەكەكێ چەندین لووتكەیێن گرنگ و خەتێن رێیێن ستراتیژی یێن قەرەچۆخێ، كو سینۆرێ دیرۆكی و خەتا بەرگرییا ستراتیژی یا كوردستانێ یە، رادەستی حەشدا شەعبی كرن.
كێ ئەڤ پێنگاڤ ژ پەكەكێ خواست؟
دەولەتا ئیراقێ ژ هەر دەمەكی زێدەتر د دیرۆكا خوە دا ل دژی كوردان ب رێخستنكری تەڤدگەریت. ئەڤە راستیەكا پر دژوارە دۆرپێچا ئابۆری، ئاڤاكرنا سیستەما جەحشاتیێ، دیپلۆماسییا ژ ناڤ برنا هەرێما كوردستانێ ب سەركێشییا دەولەتا ئیرانێ دهێتە كرن.
ئەم شۆپا ڤێ پرۆژەیا تەهرانێ د هەموو هەولدانێن پەكەكێ یێن ژ سالا 2012ێ و هەتا نها ڤە دبینین. د مژارا رادەستكرنا وارگەها مەخموورێ دا قارایلان دوبارە دگۆت «كەسی ژ مە نەخواست كو ئەم دەركەڤین، ئەم ب خوە دەركەتین» قارایلان ب ڤی عەقلێ خوە یێ ئاپۆلەتیك دخوازیت جەحشاتییا كو ئەو بۆ ئیراقێ و ئیرانێ دكەن، ڤەشێریت.
پشتی ئێریشێن چەتەیێن داعشێ یێن سالا 2014ێ، قاسم سولەیمانی ب خوە د خواست پەكەكە جارەكا دی ل كامپا مەخموورێ ب جهـ ببیت. واتە د چارچۆڤەیا پرۆژەیا قاسم سولەیمانی دا هێزێن لەشكری یێن پەكەكێ ل وێرێ هاتن ئەركدار كرن. دەركەتنا پەكەكێ ئیرۆ ژی ب بریارا ئیرانێ پێكهات.
ئەڤ رادەستكرنا ژ نشكانڤە یا چیایێ قەرەچۆخێ ب شەرێ هەرێمی یێ ل دۆرا شەرێ ئیسرائیل-حەماسێ ڤە گرێدایی یە. دهێتە واتەیا هەلوەستا ئیرانێ یا ل هەمبەری ئەمەریكا. د هەمان دەم دا دهێتە واتەیا كو ئیران خوە ل هەمبەر هەولێرێ ب جهـ دكەت.
رادەستكرنا چەپەران بۆ حەشدا شەعبی خیانەتەكا نەتەوی یە
دەما مرۆڤ ڤان هەموو كریاران بگهینیتە هەڤ، ئەنجام ئەڤە: هەپەگێ، یانی پەكەكێ د 19ێ جۆتمەهێ دا چەپەرێن پاراستنا كوردستانێ یێن ل چیایێ قەرەچۆخێ رادەستی چەكدارێن حەشدا شەعبی كرن. ئەڤە دهێتە وێ واتەیێ كو هەولێر و كەركووك، ناڤەندا باژار، ناڤچە، بیرێن پەترۆلێ و زەڤییێن غازا كۆر مۆر رادەستی حەشدا شەعبی كرن.
حەشدا شەعبی جورەكێ شیعەیانە و وەك عەرەبێن سوننی و لەشكرین ترك یێن كو عەفرین و سەرێكانیێ داگیر كرین. چاوا كو یێن كو عەفرینێ داگیر كرین، زیهنیەتا قڕكرنێ ل سەر كوردان دمەشینن، ملیسێن حەشدا شەعبی ژی هەمان تشتی دكەن. ژ بەر ڤێ یەكێ رادەستكرنا چەپەرێن قەرەچۆخ ژ بۆ دژمنی دهێتە واتەیا خیانەتا نەتەوی.
پرۆژەیا دۆرپێچكرنا كوردستانێ: گرێ جاسووسان، قەندیل، شەنگال و نها ژی قەرەچۆخ
مژارەكا گرنگ هەیە كو دڤێت رەوشەنبیر و دیرۆكناسێن كورد لێكۆلینان ل سەر بكەن. هەر جهێ كو پەكەكێ 40 سالن گۆتیە «ئەڤ دەر یا منە، كەس نكارە بكەڤە» پاشێ بوویە كەلەها كۆلۆنیالیست و داگیركەران. ئەو مژارەكە كو لێكۆلینەكا درێژ بۆ هەوجە دكەت. ئەم تەنێ دكارین جهێن كو پەكەكێ د ڤان 10 سالێن داویێ دا رادەستی ئیرانێ كرین، ب كورتی بنڤیسین.
پەكەكێ د 5ێ جۆتمەها 2011ێ دا خەتا سینۆری یا د ناڤبەرا ئیراق و ئیرانێ دا رادەستێ ئیرانێ كربوو. د رابردوویا دیرۆكێ دا چ دەولەت ل سەر لووتكەیا قەندیلێ سەروەر نەببوون. پەكەكێ هاتنا هێزێن پێشمەرگەیان قەبوول نەكر و ئەو لووتكە رادەستی هێزێن ئیرانێ كر. هەر وها گرەكێ گرنگ كو ب ناڤێ گرێ جاسووسان دهێتە ناسكرن رادەستی دەولەتا ئیرانێ كر. ب ڤی رەنگی پەكەكێ كەلەها هەرە گرنگ یا بەرخوەدانێ یا كوردان ئانكو چیایێ قەندیلی تەسلیمی ئیرانێ كر. پەكەكە تەنێ ل قونتارێن چیایی مایە لووتكە و سلسیلا چیایی د دەستێ ئیرانێ دا یە.
د 1ێ خزیرانا 2018 دا فەرماندارێ سپایێ پاسدارێن ئیرانێ سەردار شەكوری ئەڤ پەیڤە ب كار ئینابوو: «مە ئامادەكاریێن گرنگ ژ بۆ دابینكرنا ئەولەهیا سینۆرێن ئیرانێ كرن و ئەنجامێن سەركەفتی مە ب دەست ئێخستن. پشتی 60 سالان مە ئالایێ خوە ل چیایێ قەندیلێ بلند كر. ژ بۆ جێبەجێكرنا ڤێ پلانا مە هێزێن خوەجهی هاریكارییەكا مەزن دا مە». ئەڤە گۆتنێن گەنەرالێ ئیرانی ب ئاوایەكی زەلال نیشان ددەن كو پەكەكە ل شوونا كو لووتكەیێن قەندیلی رادەستی كوردان بكەت، رادەستی دەولەتا ئیرانێ كرن.
پشترە ژی رەوشەك ب هەمان رەنگی ل شەنگالێ ژی پێكهات. چاوا كو پەكەكە ل چیایێ قەرەچۆخێ وەك جەردەڤان هات بجهكرن و دەما ژێ را گۆتین دەركەڤە ژێ دەركەت، دێ هەمان تشت ل شەنگالێ روودەت. پەكەكە ب ئیرادەیا خوە نەچوو شەنگالێ. پەكەكە ژ ئالیێ ئیرانێ ڤە هات شاندن بوو شەنگالێ. گەر ئیران ژێ را ببێژیت دەست ژێ بەردە، ئەو دێ دەست ژێ بەردەن.
ب ڤێ پەرسپەكتیڤێ ڤە گاڤا ئەم ل بریارا قەرەچۆخێ بنێرین ب زەلالی دهێتە فێمكرن. پرۆژەیەك هەیە كو كوردستانێ یەك ب یەك دۆرپێچ بكەت. ئەگەر پەكەكە پارتیەكا راستەقینە یا كوردستانی با، دەما ئەو قاس ئێریش ل سەر كوردان دهاتن كرن، ئەوێ دا هزرا رادەستكرنا چەپەرێن خوە ژ بۆ پێشمەرگە كەت. ل گۆر گۆتنێ چەوا كو ژ مەخموورێ دەركەت ب بەهانەیا كو ترك نەهێنە تێدا، وی دەمی بۆچی ئەڤ هشیاری بۆ دەڤەرێن دی نیشان نەكر. واتە بۆچی شەكف، رۆژهلاتێ مەتینا، خانتوور، زنارێ كێستە، كورەژار و لێلكان رادەستی پێشمەرگێ كوردستانێ نەكر كو ترك داكو ترك نەهێنە وان دەڤەران؟ لێ پەكەكێ هەموو هەولێن پێشمەرگێ كوردستانێ بۆ ئەولەهییا خەلكێ دەڤەرێ وەك «ئێرش ل سەر خوە» پێناسە كرن. هەموو سینۆرێ باكوور رادەستی ئارتێشا ترك كر ڤێجا نوكە ژی خەتێن باشوورێ هەرێمێ رادەستی دەولەتا ئیراقێ دكەت. پەكەكە هێزەكا كرێگرتییە كو تەنێ دەستكەفتێن باشوور تێكببەت. ژ بەر كو د ڤێ یاریێ دا پەكەكە «هەڤالێ خوادنێن پرۆژەیا دۆرپێچكرن و وێرانكرنا كوردستانێ یە». رادەستكرنا چییایێ قەرەچۆخ بۆ حەشدا شەعبی ل سەر ڤێ پلانێ پێك هاتییە.

ژێدەر: ژ پەیچێ‌ (داركا مازی):

https://darkamazi.net/archives/

دیدار، سالار محەمەد دۆسكی:

2-4

هەر خێزانەكا مرۆڤەكێ‌ نێزكی وان ل گەل پێشمەرگەی بایە ئەمن دا ب شەف چیت وێ‌ خێزانێ‌ بەرزەكەت، دەنگۆیێ‌ ڤەگوهاستنا خێزانا مە گەهشتە بابێ‌ من كو نێزیك دێ‌ هەوە ژژی بەرزەكەن و برایێ‌ من (عەبدوللا) ژ عەسكەریێ‌ رەڤی بوو وی دەمی هەر كەسەكێ‌ هاتبا دەستەسەركرن ئێكسەر دهاتتە سێدارەدان و هەتا سالا 1985ێ‌ بیرا من دهێت چەند گەنج ل گورەپانا بنگەهێ‌ لاوان هاتینە سێدارەدان و ترسەكا مەزن بۆ خەلكی دروست ب بوو، وەك خێزان مە بریاردا دەركەڤین ژ دهۆكێ‌ و ب ترۆمبێلا پەروەردێ‌ كو یا ئێكەتیا مامۆستان بوو و یا (مستەفا موسی) بوو وی دەمی 14 زالگەه ژ دهۆك هەتا دێرەلوكێ‌ هەبوون و مە گەلەك نەخوشی و مەترسی دیتن هەتا مە گەهاندیە دێرەلوكێ‌ و بتنێ‌ (عەبدوللا) برایێ‌ من ل گەل من بوو چونكە هارب بوو من ل گەل خوە ئینا و خێزانا مە ب ترۆمبێلەكا دی هات و چیرۆكەكا گەلەك نەخوش بوو و هەتا گەلەك جاران دناڤبەرا گرتنێ‌ دا چنە مابوو و سوپاس بۆ خودێ‌ قورتال بووین و گەهشتینە دێرەلوكێ‌ هەیڤا 11 بوو و ب چیایی سەركەفتین و چووینە (بێرومان) ناف نێروەیا و مە پەیوەندی ب شورەشا گولانێ‌ كر و هەڤالێن لقێ ئێك گەلەك بخێرهاتنا مە كر و بیرا مە دهێت هەتا ئێزگێ‌ دەنگێ‌ كوردستانێ‌ بخێرهاتنا مەكر و من برایێ‌ خوە عەبدوللا مە پەیوەندی ب پێشمەرگەی كر ل لقێ ئێك سالا 1985 بووینە پێشمەرگە وی دەمی شەهید (سمكو ئامێدی، محەمەد تەیب) (عەبدولعەیز تەیب، نێچیرڤان ئەحمەد، رەمزی شەعیان، عومەر ئورەی، تەیار سەلیم، ئحسان ئامێدی، فەرج میرزا، حەسەن شبیب، بەهجت ئاڤدەل و كاك سەلام ) هەمی لقێ‌ بوون و گەلەك كەیفا مە پێ‌ هات وی دەمی (جقسی) ب ئاڤێ‌ كارەب چێكر بۆ لقێ‌ ڤە گوهاست، هزر هات كو تاقیگەهەكا وێنان ل ناڤ شورەشێ‌ دانین وی دەمی ئامیرەكێ‌(لارجەرێ‌) ب دەست پێشمەرگەی كەفت بوو، و رابووین ب دانانا وێ‌ تاقیگەهێ‌ و پێشتر پێشمەرگەی فلمێن وێنان هەمی دبرنە ئیرانێ‌ ب رێكا پێشمەرگەكی و ئەو فلم دهاتنە شووشوتن و ئەڤە ب هەیڤان ڤە دكێشا و هزرا دانانا موختبرێ‌ ل شورەشێ‌ ئێكەم جار بوویە و مە ل چیای دانا و بوومە بەرپرسێ‌ وێ‌ بەشی و دووف دا بەپرسێ‌ پشكا (ئنساتێ‌) ل گەل كاك (ئحسان توفیق) پێكڤە بووین و مە هزرێن باش كرن و مە ئێكسەر وێنە دەرتێخستن و هەتا مە هندەك نامیلەك دروستكرن و دەنگ و سەركەفتن ئینا، مخابن وەك راگەهاندنا حزبی و حوكمی كەسێ‌ بەحسێ‌ ڤێ‌ چەندێ‌ نەكریە و بتنێ‌ چەند هەڤال نەبن وەك (كامیران مەرعی، شاكر ئەتروشی، وەسفی حەسەن) بووینە و بەحسێ‌ گەلەك تشتی هاتەكرن و بەحسێ‌ ڤێ‌ پشكا هندا گرنگ نەهاتەكرن، لقێ‌ ئێك بەر ب قوناغێن باش چوو خەبات و قارەمانیا پێشمەرگەی گەلەك هەبوون و هەبوونا راگەهاندنێ‌ گەل ڤان تشتەكێ‌ باش بوو(سەعید بامەرنی) وێنەگرێ‌ ڤیدیویێ‌ بوو و ل شەرێ‌ كانی ماسێ‌ بریندار ب بوو، كامیرا ڤیدیویێ‌ رادەستی من كر و من كارێ‌ وێنەگرتنێ‌ ژی كر و ئەو مامۆستایێ‌ من بوویە بۆ ئەنجامدانا ڤی كاری سالا 1987ێ‌ وی دەمی جەنابێ‌ سەرۆكی ل دەڤەرا مە بوو ناف نێروەی یا و ل گەل باب و برایێن خوە چووینە حزورا جەنابێ‌ سەرۆكی ل دەڤەرێ‌، دوژمنی ئاگەه ژ هاتنا جەنابێ‌ وی هەبوو گەلەك بزاڤ هاتنەكرن بۆ شەهیدكرنا جەنابێ‌ وی هەمی رێك هاتنە بكارئینان لێ‌ سوپاس بۆ خودێ‌ گیانێ‌ وی یێ‌ پاراستی بوو چونكە د دەستێن ئەمین دابووینە، وی دەمی لقا ئێك ل (زێوە شكاك) بوویە و بارەگایێ‌ لقێ‌ ل سەری بوویە و نێزیك بارەگایێ‌ لقێ‌ بارەگایێ‌ حزبا شوعی هەبوو و جارەكێ‌ حوكمەتا عیراقێ‌ هێرش كرە سەر بارەگایێ‌ لقێ‌ بەلێ‌ چ زیان نەبوون ژوانا قومبلێن كێمیاوی بووینە چونكە گەلی بوو و ئاف و ریبار بوو زێدەتر ئاڤێ‌ برن و سەر بارەگایێ‌ شوعیان ڤە چوو و زێدەتر (20) بریندار و شەهید هەبوون وی دەمی من دەست هاڤێتە كامیرێ‌ چووم بۆ وێنەگرتنێ‌ وی دەمی شەهید (نزار) ل گەل من هات و گەلەك كارتێكرن ل سەر مە هاتەكرن و چاڤێن مە سور بوون و ناف چاڤێن شەهید (نزار) گەلەك پیستێ‌ وان رابوو سوپاس بۆ خودێ‌ مە سەرێ‌ خوە دكرە ئاڤێ‌ دا و بارەگایێ‌ لقێ‌ فەرمان دا بچمە ئیرانێ‌ و چارەسەریا خوە بكەم و دیسا مە پوستەك ژی بۆ مەكتەبا سیاسی هەبوو و دەمێ‌ چوویم ناف چاڤێن من گەلەك تێشان و هاتینە ئاگەهداركرن كو هژمارەكا پێشمەرگەی دێ‌ ژ لژنا گولان چیت و ئەو لژنە ل ناف دەڤەرا رێكانیان دا بوو ئانكو سەر (جەم جی ) دا بوو و چوومە دەڤەرێ‌ دا بگەهمێ‌ و بابێ‌ من نەهێلا بتنێ‌ بچم و گوت دێ‌ گەل تە هێم و هەتا گەهشتینە جهێ‌ لژنا (گولان) هەڤالێن دەڤەرێ‌ گۆتن ئەو پێشمەرگێن لژنێ‌ ئەڤە زێدەتر سێ‌ دەمژمێرە چووینە و وەرزێ‌ زڤستانێ‌ بوو و هەر گرۆپەكێ‌ بچیتە ئیرانێ‌ دڤێت پێنچ شەف و پێنچ رۆژان ب پیان بچیت قوناغێن گەلەك سەخت بوون و دڤێت گرۆپ بن و مە بزاڤكرن بگەهینێ‌ و چەند گوندان چووین و شەف ب سەرمە داهات و بەفرەكا زێدەتر لێكر و هەتا نێزیكی (شیتكێ‌) ئەمێ‌ چینە بەفرێ‌ را و گەلەك رەزالەت و سارما مە دیت هەتا گەهشتینە روویێ‌ شین و ب داڤەرستێ‌ دەربازبووین و (پێندرو) سەر كەفتین و گەهشتینە (سپیندارێ‌) و بلا ژبیرنەكەین ئەم هەمی خێزان و پێشمەرگێن لقێ ئێك قەردارێن مللەتی نە كو پێشمەرگە دحەواندن و نان دایێ‌ گوندێ‌ (سپیندارێ‌) ل دەڤەرا بارزان مالا (شێخو سپینداری) جهێ‌ رێزگرتنێ‌ یە و ئەگەر ئەو نەبانە رەنگە گەلەك پێشمەرگەی گیانێ‌ خوە ژ دەست دابایە چونكە ئەو گوند ل سەر رێكێ‌ بوو و ئەوان گەلەك پێشمەرگە حەواند و قەدرێ‌ وان گرت و چووین وێرێ‌ دیسا پێشمەرگە چوو بوو و هەا دووماهی گوند گوندێ‌ (زێتێ‌) یە و دووڤ دا دبیتە ئاخا توركی و (7) كیلومەتر دڤێت ب رێكێن نەقانوونی ژ ئاخا توركیا دەربازبی چونكە لایێ‌ دی ئیراقە و چەتە و لەشكرێ‌ عیراقێ‌ یە و دڤێت وێ‌ سێ گوشێ‌ را دەربازبی و هەتا دگەهیتە سەر رویبارێ‌ (كەتی نەی) و ئەو رویبار سنورە لایەك ئیراق و لایەك توركیایە و من شارەزایەك دەڤەرێ‌ هەبوو چونكە پێشتر ژی هەمان جه دا دەربازی ئیرانێ‌ بوویمە و راستی دەڤەرەكا ب مەترسی بوویە و هەتا دەربازبووین گەلەك نەخوش بوو و ژڤان بوو بگەهینە گەلیێ‌ رەش ل سەر سنوری چونكە لەشكرێ‌ ئیرانێ‌ هەردەم ل هەیڤا 11 و 12 خوە ڤەكێشیت و دەما خوە ڤەدكێشیت ئەو بەفرەكا زور دهێت و ئەگەر بەفر بیت ئەم نەشێن بچین و هەتا (5) مەترا بەفر دهێت و مە دیت یێ‌ بزاڤا خوە ڤەكێشانێ‌ دكەن و من سلاف كر و گۆتن هوون بارزانی نە؟ من گۆتێ‌ بەلێ‌ جهێ‌ مە ل گەل خوە كر و نێزیكی (7) دەمژمێران ل گەل چووین و گەلەك جهان رێك نەبوو و شەفەل ل گەل بوون و رێك ڤەدكر و هەتا گەهشتینە (نەغەدێ‌) مە گەلەك نەخوشی دیت و چووینە مەكتەبا سیاسی ل (راژان).