سەرۆك مەسعود بارزانی ل سەلاحەددین پێشوازی ل ئێریك شوڤالییێ بالیۆزێ فڕەنسا ل ئیراقێ كر.
د دیدارەكێ دا شوڤالییێ سلاڤێن سەرۆكێ فڕەنسی ماكرۆن گەهاندنە سەرۆك بارزانی هەروەسا هەردو ئالیان باس ل ڕەوشا سیاسی و ڕوودانێن دەڤەرێ كر. پەیوەندیێن دناڤبەرا حوكمەتا هەرێما كوردستانێ و حوكمەتا ئیراقا فیدرال تەوەرەكێ دی یا دیدارێ بوو و بزاڤێن چارەسەركرنێ بلند هاتنە هەلسەنگاندن. بالیۆزێ فڕەنسا ل ئیراقێ دەستخوەشی ل بڕیارا سەرۆك بارزانی كر كو ژ پێخەمەت ئارامكرنا ڕەوشێ بارەگەهێ جڤاتا سەركردایەتیا پارتی دیموكراتی كوردستان پێشكێشی زانكۆیا كەركووك كر و بڕیارەكا حەكیمانە هەژمارت.

سەرۆك مەسعود بارزانی ب هەلكەفتا وەغەركرنا نڤیسەر و ڕەوشەنبیرێ ناڤدارێ ئوردنێ سالح قەلاب پەیامەكا هەڤخەمیێ بەلاڤكر و تێدا هاتیە: ب مخابنیەكا مەزن ڤە دەنگوباسێ وەغەركرنا نڤیسەر و ڕەوشەنبیرێ ناڤدارێ ئوردنی سالح قەلاب گەهشتە من، كو دۆستەكێ نێزیك یێ من بوو و بەرگریكارێ دلسۆزێ گەلێ كوردستانێ بوو. سەرەخوەشیێ ل برایێ بەڕێز شاهـ عەبدوللایێ دویێ پاشایێ ئوردن و مالباتا ڕەحمەتی سالح قەلاب دكەم.

سەرۆكێ حوكمەتا هەرێما كوردستانێ، مەسرور بارزانی پێشوازی ل ئێریك شوڤالییێ بالیۆزێ فڕەنسا ل ئیراقێ كر و د كۆمبوونەكێ دا سەرۆكێ حوكمەتا هەرێمێ ڕاگەهاند پێدڤیە حوكمەتا ئیراقا فیدرال مافێن دستووری و شایستەیێن دارایی یێن هەرێما كوردستانێ دابین بكەت ب تایبەت پشتی كو حوكمەتا هەرێما كوردستانێ ب داتا و پێزانینێن هوور، ڕۆهنكرنێن پێدڤیە پێشكێشی لژنەیا دارایی یا جڤاتا نوونەران و ئالیێن پەیوەندیدارێن حوكمەتا ئیراقا فیدرال كرین. مەسرور بارزانی دوپات كر ژی كو پێدڤیە حوكمەتا ئیراقێ شایستەیێن دارایی بهنێریت، چونكە نابیت ئێدی مافێ فەرمانبەرێن هەرێما كوردستانێ بهێتە پێشێلكرن. هەر د وێ كۆمبوونێ دا باس ل گرنگیا پاراستنا ئاسایش و سەقامگیریا ئیراقێ و هەرێما كوردستانێ وپاراستنا نوونەرایەتیێن دبلۆماسی و هێزێن هەڤپەیمانان هاتە كرن.

كۆمیتەیا ناڤەندی یا پارتی دیموكراتی كوردستان داخوازدكەت ب زووترین دەم دووماهی ب كێشە و ئاستەنگان بهێتە كرن و چارەسەریا بنەڕەتی بۆ پرسا مووچە و شایستەیێن دارایی یێن هەرێما كوردستانێ بهێتە كرن، كۆمیتەیا ناڤەندی یا پارتی دیاركر ژی كو بارەگەهێ پارتی ل كەركووكێ وەكو دیاریەك دێ پێشكێشی زانكۆیا كەركووك هێتە كرن.
كۆمیتەیا ناڤەندی یا پارتی دیموكراتی كوردستان ب سەرپەرشتیا سەرۆك مەسعود بارزانی و ب بەرهەڤبوونا نێچیرڤان بارزانی و مەسرۆر بارزانی و ئەندامێن كۆمیتەیا ناڤەندی كۆمبوو و پاشی بەیاننامەیەك ل دۆر كۆمبوونێ بەلاڤكر كو ئاماژە دكەت، باس ل شەش تەوەرێن سەرەكی هاتە كرن و بڕیارێن پێدڤی بۆ هاتنە وەرگرتن.
وەكو د بەیاننامەیا كۆمیتەیا ناڤەندی یا پارتی دا هاتی، ئەو شەش تەوەرێن باس ل سەر هاتیە كرن پێك دهێن ژ ڕەوشا سیاسی یا ئیراقێ و هەرێمێ و دەڤەرێ ب گشتی، بابەتێ پەیوەندیێن ناڤخوەیی یێن هەرێمێ و ئالیێن سیاسی، بابەتێ بارەگەهێ پارتی ل كەركووكێ، بابەتێ حوكمەتا هەرێما كوردستانێ، بابەتێ ناڤخوەیا پارتی و بابەتێ كەسوكارێن سەربلندێن شەهیدان.
سەبارەت پرسا مووچەیێن فەرمانبەرێن هەرێمێ، كۆمیتەیا ناڤەندی یا پارتی دبێژیت» هیڤیدارین هەر چ زووترە دووماهی ب كێشە و ئاستەنگان بهێتە دان و چارەسەریا بنەڕەتی بۆ پرسا مووچە و شایستەیێن دارایی یێن هەرێما كوردستانێ و هەموو وان بابەتێن دی ژی بهێتە كرن، كو د بەرژەوەندیا پڕۆسەیا سیاسی و سەقامگیریا وەلاتی دایە».
ل دۆر پرسا بارەگەهێن پارتی ل كەركووكێ، د بەیاننامەیا كۆمیتەیا ناڤەندی یا پارتی هاتیە» كۆمبوونێ بڕیار دا پارتی ئاڤاهیێ بارەگەهێ بەرێ یێ جڤاتا سەركردایەتیا خوە ل كەركووكێ پێشكێشی زانكۆیا كەركووك بهێتە كرن وەكو دیاریەك بۆ قوتابیێن وی باژێری و پڕۆسەیا خواندن و ڕەوشەنبیریێ و پێشئێخستنا باژێری».

سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ ڕادگەهینیت: محەمەد شیاع سۆدانی، سەرۆك وەزیرێن ئیراقێ هێشتا نەشیایە گەلەك ژ سۆزێن خوە بجهبینیت، هەڤدەم دبێژیت: حوكمەتا ئیراقێ د پرسا ڕوو ب ڕووبوونا گەندەلیێ گەلەك یا سستە.
ڤیان سەبری، سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ گوت» كۆمەكا كارنامەیان ل كابینەیا محەمەد شیاع سۆدانی نەهاتنە بجهئینان، ب تایبەت ئەو پرسێن تایبەت ب كەركووكێ، د كابینەیا وی دا ئالیێ قانوون دانانێ هەتا نوكە نەهاتیە بجهئینان، ئەوا هاتیە بجهئینان ژی تنێ قانوونا هەلبژارتنان بوو.
سەرۆكا فراكسیۆنا پارتی ل جڤاتا نوونەرێن ئیراقێ گوت ژی» ئالیێ بجهئینانێ ژی، ئەو خالێن تایبەت ب هەرێما كوردستانێ ڤە نەهاتینە بجهئینان، كۆمەكا كێشەیان ژی د قانوونا بودجەیا گشتی یا ئیراقێ دا بۆ هەرێما كوردستانێ دروستبووینە ب تایبەت د بابەتێ مەزاختیێن ڕاستەقینە، هەروەسا ل دۆر مووچەی ژی پێدڤی بوو دو ترلیۆن و 100 ملیار دینار بۆ هەرێما كوردستانێ هاتبانە هنارتن بۆ مەهێن 9 و 10 و 11».
ڤیان سەبری دیاركر ژی» هەتا نوكە پرسا ئاساییكرنا ڕەوشا كەركووكێ، پرسا مادەیێ 140 ژ دستوورێ ئیراقێ و قەرەبووكرنا ئەو كەسێن كو زیانداربووینە نە هاتینە بجهئینان».
سەرۆكا فراكسیۆنا پارتی ل جڤاتا نوونەرێن ئیراقێ ئاماژە ب وێ چەندێ ژی كر» هندەك دۆسێیە هەبوون گەلەك د گرنگ بوون حوكمەتێ ڕاگەهاندبوو كو كارێن وێ یێن بەراهیێ نە، ئێك ژوان بەرهنگاریا هەژاریێ بوو، هەروەسا بەرهنگاربوونا گەندەلیێ نوكە نەهاتینە بجهئینان، هەتا نوكە ژی بهایێ دۆلاری ل بازاری نەهاتیە جهگیركرن، هەڤدەم پێنگاڤێن ڕوو ب ڕووبوونا گەندەلیێ ئیراقێ گەلەك د سستن».
ڤیان سەبری خویاكر» قانوونا بودجەیا گشتی یا ئیراقێ لەونما نەهاتیە بجهئینان بۆ وێ چەندێ پشكەكا وی پارەی نەچیتە د خزمەتا هەوا هەلبژارتنێن جڤاتا پارێزگەهێن ئیراقێ».
ڕۆهنكر ژی» هەكە باس ل كارێن حوكمەتا ئیراقێ د دەمێ سالەكێ دا بكەین، هەروەكو حوكمەتێن بەرێ بوو كو سۆزێن خوە بجنەئیناینە».
سەبارەت هنارتنا 700 ملیار دیناران بۆ مووچەیێن فەرمانبەرێن هەرێما كوردستانێ، سەرۆكێ فراكسیۆنا پارتی دیموكراتی كوردستان ل جڤاتا نوونەرێن ئیراقێ دبێژیت» بڕیاربوو ل هەفتیا بۆری 700 ملیار دینار بۆ هەرێما كوردستانێ بهێنە هنارتن، بەلێ هەتا نوكە نەهاتینە هنارتن، كێشەیێن مە ل گەل بەغدا ئەون هەر ڕێككەفتنەكێ د گەلدا بكەین ئەو پێگیری وان ڕێككەفتنان نابن و وەكو خوە بجهنائینن».
سالەك ب سەر پێكئینانا كابینەیا نوو یا حوكمەتا ئیراقێ ب سەرۆكایەتیا محەمەد شیاع سودانی ب پشكداریا ئالیێ شیعی و كورد و سوننە دەرباز دبیت، ل كارنامەیا حوكمەتا محەمەد شیاع سودانی سۆزا بجهئینانا وان بڕگان هاتبوو دان كو تایبەت بوون ب پرسا كوردان د ئیراقێ دا، كو بۆ چارەسەریا بنەڕەتی یا كێشەیان هاتبوون دانان، بەلێ هەتا نوكە ئەو بڕگەیێن پەیوەندی ب پرسا كوردان و مافێن وان ڤە هەی، نەهاتینە بجهئینان.
محەمەد شیاع سودانی ل دەمێ وەرگرتنا باوەریێ ژ ئالیێ جڤاتا نوونەرێن ئیراقێ ڤە و خواندنا كارنامەیا حوكمەتا خوە، سۆز دابوو د چارچۆڤەیێ دستوورێ ئیراقێ دا كێشەیێن هەلاویستی د ناڤبەرا بەغدا و هەولێرێ دا چارەسەر بكەت و بۆ هندەك ژ وان كێشەیان دەمێ مەهەكێ تاكو شەش مەهان بۆ دیاركربوو، ژوان دەركرنا پڕۆژە قانوونا پەترۆلێ و غازێ و بجهئینانا مادەیێ 140 و مووچە و شایستەیێن دارایی یێن هەرێما كوردستانێ، بەلێ پشتی دەربازبوونا سالەكێ ل سەر ژیێ ڤی كابینەیا محەمەد شیاع سودانی، ژ ئەگەرێ ڕێگریا ئالیێن سیاسی، داخوازیێن گەلێ كوردستانێ وەكو خوە نەهاتینە بجهئینان .

ل دووماهی كۆمبوونا جڤاتا وەزیرێن هەرێما كوردستانێ، ب سەرپەرشتیا مەسرور بارزانی، سەرۆكێ حوكمەتا هەرێمێ و و ب بەرهەڤبوونا قوباد تالەبانی، جێگرێ سەرۆكێ حوكمەتا هەرێمێ، ئەنجامێن كۆمبوونا هەڤپشك د ناڤبەرا لژنەیا دارایی یا جڤاتا نوونەرێن ئیراقێ و شاندێ حوكمەتا هەرێما كوردستانێ ب سەرۆكایەتیا وەزیرێ دارایی و ئابۆری و ب بەرهەڤبوونا وەزیرا دارایی و سەرۆكێ دیوانا چاڤدێریا دارایی یا حوكمەتا فیدرال، ژ ئالیێ ئەندامێن شاندێ حوكمەتا هەرێمێ هاتە بەرچاڤكرن و ڕۆهنكرێن پێدڤی ب هەژمار و داتایێن دروست سەبارەت ڕەوشا دارایی و مووچەیێن هەرێمێ هاتنە پێشكێشكرن.
د كۆمبوونێ ئاماژە هاتە كرن كو د كۆمبوونا ل گەل لژنەیا دارایی یا جڤاتا نوونەران، شاندێ هەرێمێ ب ڕاپۆرتەكا 30 بەرپەران و ب هەژمار و داتایێن دروست، بەرسڤا هەموو پرسیارێن تایبەت ب بودجەیا هەرێما كوردستانێ دا ل دۆر داهات و مەزاختیان و پەترۆلێ و دەرگەهێن سنووری و پڕۆسەیا هووربینیا هەڤپشك یا هەردو دیوانێن چاڤدێریا دارایی یا فیدرالی و هەرێمێ و میلاكێ گشتی و مووچەیان.
جڤاتا وەزیران، وەزارەتا دارایی و ئابۆری و شاندێ دانوستاندكار ڕاسپارد كو د پەیوەندیا بەردەوام دا بن ل گەل لژنەیا دارایی یا جڤاتا نوونەران وەزارەتا دارایی یا حوكمەتا فیدرال بۆ بەرجەستەكرنا وان بنەمایێن كو ل كۆمبوونا شاندێ هەرێمێ و لژنەیا دارایی ل سەر هەڤڕا بوون، ب تایبەتی ژی جوداكرنا تەخانكریێن مووچەیێن هەرێمێ ژ بیڤەرێ مەزاختیێن راستەقینە، هەڤشێوەیێ دەڤەرێن دی یێن ئیراقا فیدرال و ڕاستڤەكرنا مادەیێن پەیوەندیدار ب ڤی بابەتی د قانوونا بودجەی دا.
پاشی ژ ئالیێ فەریق سلێمان، ڕێڤەبەرێ گشتی ل دیوانا چاڤدێریا دارایی ل هەرێما كوردستانێ، پۆختەیێ ب ڕێڤەچوونا پڕۆسەیا هووربینیا هەڤپشك یا هەردو دیوانێن چاڤدێریا دارایی هاتە بەرچاڤكرن كو ل سالا 2023 هاتبوونە ئەنجامدان. دیوانا چاڤدێریا دارایی ل هەرێمێ ئاماژە ب هەماهەنگیا وەزارەت و دەزگەهێن هەرێمێ دا بۆ سەرئێخستنا پڕۆسەیا هووربینیێ ب ڕێكا پێدانا پێزانین و داتایێن پێدڤی و پەیوەندیدار ب داهات و مەزاختیان و میلاكی گشتی و ئاسانكاریێن پێدڤی بۆ ڤەكرنا دەرگەهێ دەزگەهان بۆ تێمێن هەڤپشك یێن هەردو دیوانێن چاڤدێریا دارایی كو د ئەنجامدا سێ ڕاپۆرتێن هەڤپشك یێن هەردو دیوانان هاتنە پێشكێشكرن تایبەت ب داهات و خەرجیان ب گشتی و پەترۆلێ و میلاكێ گشتی یێ هەرێمێ و مووچەیان. د ڤێ ڕاپۆرتێ دا پشتی هووربینیا هەردو دیوانێن چاڤدیریا دارایی ، هەژمارا فەرمانبەرێن هەرێمێو گۆژمەیێن مووچەیێن وان هاتنە پشتڕاستكرن.
جڤاتا وەزیرێن هەرێمێ پشتەڤانیا خوە ل پڕۆسەیا هووربینیا هەڤپشك یا هەردو دیوانێن چاڤدێریا درایی دیاردكر. ب ئاراستەیێ بەرچاڤكرنا ڕاستیان و پشتڕاستكرنا هەموو ئالیەكی كو هەرێما كوردستانێ، هەروەكو بەردەوام ب زەلالی، هەموو پێزانین و هەژماران بەرچاڤ دكەت و هیچ نینە كو ڤەشێریت و هیچ بهانەیەك بۆ حوكمەتا فیدرال نەهێتە هێلان كو ئاستەنگان دروست بكەن بۆ مەزاختنا شایستەیێن دارایی یێن هەرێمێ.
جڤاتا وەزیرێن هەرێمێ هەموو وەزارەت و دەزگەهێن حوكمەتا هەرێمێ ڕاسپاردن كو د بەردەوام بن د هەماهەنگیێ دا و هاریكاریا دیوانا چاڤدێریا دارایی بكەن و ئاسانكاریێ بۆ دەستەیێن هەڤپشك یێن هووربینیێ و وەرگرتنا پێرابوونێن پێدڤی بۆ تێبینی و سەرنجێن تەكنیكی یێن ژمێریاری و دارایی تاكو هیچ بهانەیەك بۆ وەزارەتا دارایی یا فیدرال نەهێتە هێلان ب تایبەتی ژیپشتی وێ ڕاپۆرتا هەڤپشك یا هەردو دیوانێن چاڤدێریا دارایی یا فیدرالی و هەرێمێ، نوكە هەژمارا فەرمانبەرێن هەرێمێ و گۆژمەیێن مووچەیێن وان پشتی پڕۆسەیا هووربینیێ هاتنە پشتڕاستكرن، ئیدی ئەركێ حوكمەتا فیدرالی یە و ب تایبەتی وەزارەتا دارایی، هەڤشێوەیێ دەڤەرێن دی یێن ئیراقێ مووچەیێن فەرمانبەرێن هەرێمێ ژی د دەمێ خوە دا بهنێریت كو شایستەیێ قانوونی یێ فەرمانبەرایە.