، لەزگین جوقی
ژ ئەنجامێ هێرشا تیرۆرستێن داعش و هەبوونا گرۆپێن نەشەرعی د ناڤ شنگال دا، 48 هزار خانیێن وەلاتیان هاتینە ژناڤبرن و پتر ژ 12 هزار وەلاتیێن شنگال داخوازا قەرەبووكرنێ كرینە و هەتا نوكە كەس نەهاتیە قەرەبووكرن».
عومەر عەلی، جێگری پارێزگارێ نەینەوا بۆ كارۆبارێن ئاوارە و رێكخراوان راگەهاند:» بەرنامێ حوكمەتا عێراقێ دا نینە، خانیان بۆ خەلكێ زەرەرمەند شنگال ئاڤا بكەت، ژ ئەنجامێ هێرشا تیرۆرستێن داعش بۆ سەر شنگال ل سالە 2014ێ هەتا نوكە 48 هزار خانی خرابووینە و زەرەرمەندبووینە، نوكە هندەك رێكخراو بەرهەڤیان دكەن بچنە شنگال خانیان ئاڤا بكەن، لێ یا ب زەحمەتە ئەڤ هژمارا خانیان هەموو بهێنە ئاڤاكرن».
جێگری پارێزگارێ نەینەوا بۆ كارۆبارێن ئاوارە و رێكخراوان دیار كر:» رێكخراوەك دێ ب گوژمێ دوو ملیۆن دولاران هاریكاریا شنگال كەت و دێ هژمارەكا خانیان ل قوبیلەتی چیایێ شنگال بۆ زڤرینا ئاواران ئاڤا كەت، هەروەسا رێكخراوەكێ ژی هندەك خانیی ئاڤاكرینە بۆ زڤرینا ئاواران، دەمێ رێكخراوەك خانیی ئاڤا كەت بۆ خێزانەكا ئاوارە مەرج ئەوە، ئەو خێزان ڤەگەریتە شنگال «.
ئاشكەرا كر:» كار ل سەر بجهئینانا بەرنامێ رێكخراوان دهێتە كرن بۆ ڤەگەراندنا ئاوارێن شنگال ب تایبەتی ژی خەلكێ گرعزێر و سیبا شێخدری ل دەڤەرێن قوبیلەتا شنگال ڤەگەرن، ژ بەر كو خەلكەكێ گەلەك كێم زڤریە قوبیلەتا شنگال و نوكە كار یێ دهێتە كرن ئاوارە ڤەگەرن».
عومەر عەلی گۆت ژی:» خەلكێ شنگال بەردەوام داخوازا قەرەبوونێ دكەن، هەتا نوكە ل دووڤ زانیاریان 12 هزار وەلاتیێن شنگال مامەلێن خۆ بۆ وەرگرتنا قەرەبووكرنێ پێشكیشكرینە، لێ هێشتا كەس نەهاتیە قەرەبووكرن».
باپیر خدر حەجی، سەرۆكێ باژێرڤانیا شنگال دیار كر: «هەتا رێكەفتنا شنگال بجه نەهێت، دەستێ ئاڤەدانی ناگەهیتە شنگال، ئەڤە نەه سال تەمامبوون ل سەر جینۆسایدا شنگال و هەتا ئەڤرۆكە ژی گرۆپێن نە شەرعی ناهێلن دەستێ ئاڤەدانی بگەهتە شنگال «.
نيشاندان