ب بەرهەڤبوونا د.عەلی تەتەر، پارێزگارێ دهۆكێ و سەرۆكا زانكۆیا پۆلیتەكنیكی یا دهۆكێ و چەندین كۆمپانی و رێكخراوان پێشانگەها دیتنا دەلیڤێن كاری بۆ گەنج و دەرچوویێن كۆلیژ و پەیمانگەهان ل هولا چالاكیێن وەرزشی ل پەروەردا دهۆك رۆژئاڤا هاتە ڤەكرن.
پارێزگارێ دهۆكێ گەریانەك د ناڤ پێشانگەهێ دا كر و ژ نێزیك سەحكرە كار و بەرهەمێن كۆمپانیێن پشكدار و دەستخوشی ل رێكخەرێن پێشانگەهێ كر، ب تایبەتی زانكۆیا پۆلیتەكنیكی یا دهۆكێ و رێكخراوا (WFP) یا خوارنا جیهانی ل دهۆكێ و هەموو پشكداران، پارێزگاری خواست ئەڤ جۆرە بەرنامە د بەردەوام بن، بۆ هندێ گەنج و دەرچوویێن كۆلیژ و پەیمانگەهان دەلیڤێن كاری بۆ خوە ببینن و خزمەتا خێزان و وەلاتێ خوە بكەن، دیسا پشتەڤانیا پارێزگەهێ بۆ هەر هاریكاری و راوێشكاریەكێ بۆ پێشئێخستنا ڤان جۆرە پڕۆژەیان دیار كر.
هەژی گۆتنێ یە 40 كۆمپانی و رێڤەبەریێن پیشەیی پشكداریی د پێشانگەهێ دا كریە و دهێتە چاڤەرێكرن دەلیڤێن كاری بۆ پتر ژ 200 گەنج و دەرچوویان ئەوێن راهێنان ل سەر چەند پیشەیان كری ب رێكا كۆمپانیێن پشكدار بهێنە دیتن.

پەیڤدارێ وەزارەتا كارەبێ ئاشكرا كر، قووناغەكا دی یا گرێدانا پیڤەرێن زیرەك دێ هێتە ئەنجامدان و دبێژیت: بجهئینانا سیستەمێ پریپەید ب تنێ وەكی تێست هاتیە ئەنجامدان و هێشتا بڕیارا دووماهیێ ل دۆر سیستەمێ پریپەید نەهاتیەدان.
ئومێدئەحمەد، پەیڤدارێ وەزارەتا كارەبێ بۆ رۆژناما ئەڤرۆ دیار كر، ل هەرێما كوردستانێ سیستەمێ پیڤەرێ زیرەك گەهشتیە قووناغێن دووماهیێ و گۆت: «هەتا نوكە زێدەتری ملیۆنەك و 350 هزار پیڤەرێن زیرەك هاتینە گرێدان، د قووناغا ئێكێ دا ملیۆنەك و 450 هزار پیڤەر دی هێنە گرێدان، قووناغا دوویێ دێ‌ هێتە دەستپێكرن و پیڤەرێ زیرەك بۆ هەموو پشكدارێن كارەبێ دێ هێتە گرێدان هەتا دووماهی ب پرۆسا گرێدانا پیڤەرێ زیرەك دهێت، پشتی پیڤەرێن زیرەك هاتینە گرێدان، ئەو بارگرانیا ل سەر تۆڕێن كارەبێ ب شێوەیەكێ بەرچاڤ كێمبوویە».
ل دۆر سیستەمێ پریپەید ژی ئومێد ئەحمەد گۆت: «سیستەمێ پریپەید یێ كارەبێ ل دەستپێكێ ل ستی و پڕۆژەیێن وەبەرهێنانێ و بازاڕی دێ هێتە بجهئینان، هێشتا بڕیارا دووماهیێ ل سەر نەهاتیەدان، چونكی نوكە ب تنێ وەكی تێست دهێتە بجهئینان هەتا بزانین دێ هەتا چەند یێ سەركەفتی بیت، د دووڤ دا دێ بڕیارا دووماهیێ ل سەر بجهئینانا سیستەمێ پریپەید هێتەدان».

دهۆك، لەزگین جوقی:
ب بزاڤێن پەرلەمانتارێن پارتی دیمۆكراتی كوردستان ل پەرلەمانێ‌ ئیراقێ‌ رازیبوون ل سەر ئاڤاكرنا سێ‌ نەخۆشخانە و پێنج بنگەهێن ساخلەمیێ‌ ل دەڤەرداریا شنگالێ‌ هاتیە كرن.
مەحما خەلیل، پەرلەمانتارێ‌ پارتی ل جڤاتا نوونەرێن ئیراقێ‌ بۆ ئەڤرۆ گۆت: «پشتی ئەم چووینە پەرلەمانێ‌ ئیراقێ‌، مە شیایە هەژمارەكا مەزن یا رازیبوونا پڕۆژەیان بۆ خزمەتكرنا خەلكێ‌ شنگالێ‌ ب دەستڤەبینین، ژ وان ژی ئاڤاكرنا سێ‌ نەخۆشخانە و پێنج بنگەهێن ساخلەمیێ‌، بڕیارە نەخۆشخانەكا 100 تەختی ب گوژمێ‌ 77 ملیار دیناران ل سەنتەرێ‌ دەڤەرداریا شنگالێ‌ بهێتە ئاڤاكرن و نەخۆشخانەكا 50 تەختی ژی ب گوژمێ‌ 55 ملیار دیناران ل ناوچەداریا سنوونێ‌ بهێتە ئاڤاكرن و نەخۆشخانەكا 100 تەختی ژی ل گرعزێر یا دهێتە ئاڤاكرن، دیسا پێنج بنگەهێن نموونەیی یێن ساخلەمیێ‌ ژی ل شنگالێ‌ دێ‌ هێنە ئاڤاكرن».

دەزگەهێ خێرخوازیێ بارزانی ل سنوورێ دەڤەرداریا ئاكرێ چار قوتابخانە ل چار جهێن جودا ئاڤاكرن و رادەستی پەروەردێ كرن.
بێوار كەریم، بەرپرسێ دەزگەهێ خێرخوازیێ بارزانی ئۆفیسا ئاكرێ بۆ ئەڤرۆ گۆت: «دەزگەهێ خێرخوازیێ بارزانی ل سنوورێ دەڤەرداریا ئاكرێ چار قوتابخانە ل گوندێن كانیدڕێ، گەرمكا، بیێ و مالەموسێ ئاڤاكرن».
ناڤهاتی گۆتژی: «ئەو گوندێن قوتابخانە بۆ هاتینە ئاڤاكرن، پێشتر قوتابخانەیێن وان وەكو پێدڤی نەبوون و هندەك مال كربوونە قوتابخانە».

دهۆك، لەزگین جوقی:

رێڤەبەرێ‌ ناوچەداریا فەیدیێ‌ دیار كر، دەست ب چێكرنا پڕۆژەیێ‌ جاددەیێن ناڤخوەیی ل كۆمەلگەهێن شاریا و دومیز سەر ب ناوچەداریا فەیدیێ‌ ڤە ب گوژمێ‌ پتر ژ چار ملیار دیناران هاتە كرن.
عادل ئەمین، رێڤەبەرێ‌ ناوچەداریا فەیدیێ‌ بۆ ئەڤرۆ گۆت: «حوكمەتا هەرێما كوردستانێ‌ گرنگیەكا مەزن ددەتە ناوچەداریا فەیدیێ‌، ب تایبەتی د وارێ‌ چێكرنا جاددەیان دا، نوكە پڕۆژەیێ‌ چێكرنا جاددەیێن ناڤخوەیی ل كۆمەلگەهێن شاریا و دومیز دهێتە بجهئینان، ل سەنتەرێ‌ دومیز ب گوژمێ‌ دو ملیار و 300 ملیۆن دیناران جاددە دهێنە چێكرن، ل كۆمەلگەها شاریا ژی ب گوژمێ‌ دو ملیار و 150 ملیۆن دیناران جاددە دهێنە چێكرن».
گۆتژی: «ئەڤ پڕۆژە نوكە د قووناغا بجهئینانێ دانە و د پلان دایە پتر جاددە ل سنوورێ‌ ناوچەداریا فەیدیێ‌ بهێنە چێكرن».

ئەڤرۆ، زنار تۆڤی:

دەڤەردارێ‌ شێخان دیار كر، ل دەڤەرداریا شێخان نەخۆشخانەكا 200 تەختی دێ هێتە ئاڤاكرن، بودجە و ئەرد ژی بۆ هاتینە تەرخانكرن.
سەردار شێخ یەحیا، دەڤەردارێ‌ شێخان بۆ رۆژناما ئەڤرۆ گۆت: «نەخۆشخانەكا 200 تەختی ل دەڤەرداریا شێخان د پلانا سالا 2023ێ دایە و د بودجەی دا هاتیە پەسەندكرن و پشتی مە داخواز كری و ئێخستیە د ناڤا پلانا بودجەیێن گەشەپێدانا پارێزگەهان دا، گوژمێ‌ 76 ملیار دیناران بۆ هاتینە تەرخانكرن و پتر ژ 17 دۆنەمێن ئەردی ژ لایێ سەرۆكێ حوكمەتا هەرێما كوردستانێ ڤە ل سەنتەرێ دەڤەرداریا شێخان بۆ هاتینە تەرخانكرن، هەر چەندە هەتا نوكە بودجە نەكەفتیە د بیاڤێ بجهئینانێ دا، هەر دەمێ بودجە بهێتە مەزاختن، دێ دەست ب ڕێكارێن ئیداری كەین و دێ نەخۆشخانە هێتە ئاڤاكرن».
ناڤهاتی گۆتژی: «خەلكێ دەڤەرداریا شێخان و ناوچەداریێن سەر ب وێ‌ ڤە و دەڤەرداریا تلكێف و دەوربەر ژی دێ مفای ژ وێ نەخۆشخانێ بینن، نەخۆشخانەك ل شێخان هەیە و ل سالا 1978ێ هاتیە دروستكرن و یا كەڤنە، ئەو نەخۆشخانە تێرا خەلكێ شێخان ناكەت، لەوما ب دروستكرنا ڤێ نەخۆشخانا نوو، دێ خزمەتەكا باش بۆ خەلكێ دەڤەرداریا شێخان هێتە كرن».

رەمەزان زەكەریا

ل سنوورێ دەڤەرداریا ئاكرێ ب چەند قوناغا رێیێن چەندین گوندێن دەڤەرێ دهێنە سەخبێركرن و دروستكرن و قێركرن ب كوژمێ چەندین ملیار دیناران. رێڤەبەرێ رێك و پران ل ئاكرێ ژی دبێژیت: ل گۆرەی پلانێ‌ هژمارەكا زۆر یا رێیێن گوندان ل سنوورێ‌ ئاكرێ‌ دێ‌ هێنە ڤەكرن و قێركرن.

ئەندازیار محسن میرانی، رێڤەبەرێ رێك و پران ل ئاكرێ بۆ ئەڤرۆ گۆت: ل سنوورێ دەڤەرداریا ئاكرێ هژمارەكا پرۆژێن رێك و پران هاتینە دروستكرن و بۆ هندەك پرۆژان ژی دەرخستە هاتیە دروستكرن، بەلێ كوژمێ پرۆژەی مە نەشیایە ل سەر پێشینەیا هەیڤانە یا رێڤەبەریا خۆ دروست بكەین، لەورا ژی مە دەرخستە بۆ دروستكریە بۆ وێ چەندێ بهێنە دروستكرن.
ناڤبری گۆتژی: نوكە ل سنوورێ گوندێن دەڤەرداریا ئاكرێ چەندین پرۆژێن رێك و پرا د قوناغا بجهئینانێ دانە، وەك رێكا ناهاڤا سیتكا قۆناغا ئێكێ 1200 مەتر ب كوژمێ 413 ملیۆن و 500 هزار دیناران هەروەسا قۆناغا دوێ یا هەمان پرۆژە 9 كیلۆمەتر ب كۆژمێ ئێك ملیار و 617 ملیۆن دیناران دهێتە بجهئینان و دەست ب قێركرنێ دهێتە كرن.
ناڤهاتی ئاشكراكر: رێكا گوندێ جۆجەر گەورە و تۆبزاوە 2 كیلۆمەتر و نیف ب كۆژمێ 201 ملیۆن دیناران، هەروەسا رێكا گوندێ مام خەلیفە ل سەر پێشینەیا هەیڤانە یا رێڤەبەریا رێك و پران ل ئاكرێ دهێتە سەخبێركرن، دگەل چەندین رێیێن دی یێن گرنگ و ستراتیژی ب كۆژمێ ئێك ملیار و 161 ملیۆن دیناران هاتینە بجهئینان.
گۆت ژی: رێیا شەرەفۆنا قەسروك كەندە گول ب كۆژمێ ئێك ملیار و 13 ملیۆن دیناران، رێیا زێلكا فەخری 5 كیلۆمەتر و ئێكمالە و قادسیا مەزن 1600 مەتر و گلێنە 1500 مەتر و كانی هەسپان 125 مەتر ئەڤ پرۆژە هەموو ب كوژمێ ئێك ملیار و 174 ملیۆن دیناران دهێنە بجهئینان و هەتا نوكە دو ژوان پرۆژان تەمام بووینە و سێ د قوناغا بجهئینانێ دانە.
خویاكر: رێیا هەر سێ گوندێن شوش و شەرمن و گوند دێ هێنە قێركرن، هەروەسا رێیا گوندێ شوش 4500 مەترە و شەرمەن 600 مەترە و گوندك 7 كیلۆمەترە ب كوژمێ ئێك ملیار و 195 ملیۆن دیناران هێنە بجهئینان و قێركرن.