وەزارەتا خواندنا بلند و ڤەكۆلینێن زانستی یا حوكمەتا هەرێما كوردستانێ بڕیارەكێ د بەڕژەوەندیا وان دو قوتابیێن ژ ئێك خێزان ل سیستەمێ پارالێل د خوینن ددەت.
وەزارەتا خواندنا بلند د وێ بڕیارێ دا دیاركریە، هەكەر دو قوتابی ژ خێزانەكێ ل سیستەمێ پارالێل بخوینن، بۆ سالا نوو یا خواندنێ 2023 – 2024 ب ڕێژەیا ٥٠% لێخوشبوون ژ كرێیا خواندنێ بۆ هەردویان دێ هێتە كرن، ئانكۆ هەر ئێك ژ وان دێ نیڤا پارێ پشكا لێ دخوینیت دەت.
هەولێر، قائید میرۆ:
پەیڤدارێ وەزارەتا شەهید و ئەنفالكریان ئاشكرا كر، ب سەرۆكایەتیا وەزیرێ شەهیدان بۆردەك بۆ زارۆكێن بەرزەبووی یێن هەلەبجە و دەڤەرێن دی ژی هاتیە پێكئینان و ئەو بۆرد دێ بڕیارا ئێكلاكەر ل سەر هەر ئاریشەیەكێ دەت یا گرێدایی زارۆكێن بەرزەبووی بیت.
عادل حەمە سالح، پەیڤدارێ وەزارەتا شەهیدان بۆ رۆژناما ئەڤرۆ دیار كر، ژ لایێ وەزارەتا شەهید و ئەنفالكریان ڤە بۆردەك هاتیە پێكئینان تایبەت ب زارۆكێن بەرزەبووی و گۆت: «وەزیرێ شەهید و ئەنفالكریان ب خوە سەرۆكایەتیا وی دكەت و هەر ئاریشەیەك ل دۆر زارۆكێن بەرزەبووی هەبیت ژ لایێ ئەڤی بۆردی ڤە دێ هێتە ئێكلاكرن، چونكی ل سەردەمێ كیمیابارانا هەلەبجە و كارەساتێن ل سەردەمێ رژێما بەعس چەندین زارۆك بەرزەبووینە و بادەكێن وانا هەلاویستی ماینە».
عادل حەمە سالح گۆتژی: «نوكە پێڤە هەر زارۆكەكێ بهێتە دیتن یان خێزانەكێ گومان ل سەر كەیسا زارۆكێ خوە هەبیت، ب تایبەتی ئەڤێن ل ئیرانێ ژ لایێ بۆردا تایبەت یا وەزارەتا شەهیدان و ئەنفالكریان دێ هێتە ئێكلاكرن و بڕیار ل سەر هێتەدان، ئەو ژی پشتی پشكنینێن نۆشداری بۆ دهێنە كرن و لیژنە بڕیارێ ل دۆر چارەنڤیسێ وان ددەت، ئەڤە ژی پێنگاڤەكا باشە بۆ وان خێزانێن زارۆكێن وان دبەرزەنە و نوكە هندەك كەس هەنە خوە ب زارۆكێن وان دزانن».
ئەمیر ئەترووشی:
رێڤەبەرێ ئاڤا دهۆكێ دیار كر، ئاڤا ژێر زەڤی یا د مەترسیێ دا و یا فەرە پێكڤە ڤی سامانی ب پارێزین، حوكمەتا هەرێمێ ب هەموو شیانێن خۆ یا بەردەوامە ژ بۆ دابینكرنا ئاڤا پاڤژ بۆ هاولاتیان و پێشڤەبرنا ژێرخانا ئاڤێ، بەلێ بەرپرسایەتیا پاراستنا ڤی سامانی یا هەڤپشكە ل سەر حوكمەتێ و هاولاتیان، دڤێت كۆمەلگەه هاریكار بیت و پشكداربیت دگەل حوكمەتێ ژ بۆ زامنكرنا دابینكرنا ئاڤێ، نوكە ل سەرانسەری جیهانێ مەترسیێن ل سەر ئاڤا شرین هەین، گوهۆرینێن سەقای و وەرزێن هشكەسالی یێن بەردەوام كارتێكرنەكا راستەوخۆ ل سەر ژێدەرێن ئاڤێ هەیە.
ئەندازیار ڤەگێر ئەحمەد رێڤەبەرێ ئاڤا دهۆكێ بۆ رۆژناما ئەڤرۆ دیار كر،پێدڤیە باشتر و پتر و چالاكتر كار بكەین ژ بۆ پێشڤەبرنا زانینا خۆ ل سەر ئاڤێ و بەرهنگاربوونا مەترسیێن پاشەرۆژێ و دروستكرنا گوهۆرینێ، مخابن دەمێ دبێژن ئاستێ ئاڤا بن ئەردی یا بەرەف كێمبوونێ دچیت، ئەگەر بۆ ڤێ چەندێ ڤەدگەڕیت ئەڤە 20 سالە مە ئاریشەیا ئاڤێ ب جدی وەرنەگرتیە و هەر بیر یێ دهێنە لێدان بێی هرز تێدا بهێتەكرن.
رێڤەبەرێ ئاڤا دهۆكێ ئەو ژی گۆت: ب گشتی ژێدەرێن ئاڤێ ل كوردستانێ كێم بووینە و گەلەك نموونە ل سەر ڤێ چەندێ هەنە، گوندێ بەرێ بهار ئەڤ سالە بیرا وان هشك بوو و نەچار بووین بیرەكا دی بۆ ئاڤا ڤەخوارنێ بكولین، گوندێ ئێمنكێ (3) بیرێن ئاڤێ مە كولاینە و دیسا گوندێ بێسرێ ب هەمان شێوە و زاویتە بیرەك و باگێرا دو بیر هاتینە كولان. ئەڤە هەمی ل سنورێ ناحیا زاویتە و ئەگەر ل ناحیا مانگێشكێ گوندێ رەشانكێ، گوندێ باخورنیفێ و چەندین گوندێن دی ژی هەنە كو ژێدەرێن ئاڤێ نەماینە و بیرێن وان هشك بووینە و نەچار بووینە بۆ هندەك بیرێن دی بكولین، ئەڤە بەروەخت هەتا حوكمەتا هەرێما كوردستانێ هزر ل ژێدەرەكێ دی بكەت بۆ دابینكرنا ئاڤێ ب شێوەكێ گشتی ئاڤا بن عەرد ئاستێ وێ گەلەك نزم بوویە.
ئەندازیار ڤەگێر ئەحمەد عەلی ئەو ژی گۆت: پێ نەڤێت كێمبوونا ئاڤێ كارتێكرن ب گشتی هاتیەكرن، هەتا باژێرێ دهۆكێ ژی رێژا ئاڤێ هاتیە كێمكرن و ئەڤە ژی وێ دكەت ژیێ وێ كێمتر بوویە، ل دور كوالێتی یا ئاڤێ ژی بەری هەیڤەكێ مە بیرەك ل گوندێ باجلورێ كولا ئاڤا وێ یا زەلال بوو، بەلێ بۆ ڤەخوارنێ یا باش نەبوو و ماوێ چەند رۆژە ئاڤا وێ هاتیە ڤەكرن و دێ چارەك بۆ هێتە دیتن و گوندێ ئێمینكێ ب هەمان شێوە، ب گشتی نە ب تنێ ئاڤا بن عەرد كێم بوویە، بەلكو ئاڤا بن عەرد ژی پیس بوون زێدە بوویە، ئەڤە ژی ئەگەرەكە دبیتە بارگرانی بۆ حوكمەتێ دروست بیت و پێشبینی دكەم سال بۆ سالێ گرفتێن ئاڤێ زێدەتر لێ بهێن، لەوما داخاز ژ حوكمەتا هەرێما كوردستانێ دكەم كار ل سەر زێدەكرنا ژێدەرێن ئاڤێ بهێتەكرن.
رێڤەبەریا گشتی یا چاندنێ ل پارێزگەها دهۆكێ د قۆناغا دووێ یا جۆداكرنا زەڤیێن چاندنێ ل سنوورێ دهۆك و مووسلدا بەردەوامە و ڕێڤەبەرێ گشتی یێ چاندنێ ژی دبێژیت: بزاڤ دهێنە كرن ب سەركەفتیانە قۆناغا دوویێ ژ لایێ سنووران ڤە بهێنە دیاریكرن و د قۆناغا ئێكێدا سنوورێ وان دوو گوندان ل ڕۆژهەلاتێ ڕووبارێ دیجلە هاتبوو دیاریكرن و نوكە ژی و د قۆناغا دوویێدا سنوورێ ڕۆژئاڤایێ هاتییە دیاریكرن».
ئەحمەد جەمیل، ڕێڤەبەرێ گشتی یێ چاندنێ ل پارێزگەها دهۆكێ بۆ رۆژناما ئەڤرۆ دیار كر: «د بەردەوامیا دیاركرنا زەڤیێن چاندنێ یێن سنوورێن هەردوو پارێزگەهێن دهۆك و مووسلێدا، ل دووڤ فەرمانەكا كارگێڕی یا پارێزگەها دهۆكێ جۆداكرنا زەڤیێن چاندنێ ل سنوورێ دهۆك و مووسل بەردەوامە».
رێڤەبەرێ گشتی یێ چاندنێ ل پارێزگەها دهۆكێ گۆتیشی: «هەر ئێك ژ گوندێن قەسر مەلا تەیب سەر ب ناحیا باتێلێ ل سنوورێ قەزا سێمێلێ و تل ئەبوزاهر ئەلشەرقیە ل ناحیا زوممار سەر ب قەزا تەلەعفەر ڤە ل سنوورێ وان ب شیوەیەكێ یاسایی و سەركەفتیانە ب پیڤەرێن زیرەك و ئەندازیارێن شارەزا و دلسۆز هاتە دیاریكرن».
دیسان گۆتژی: «د ڕێورەسمێن جۆداكرنا زەڤیێن چاندنێ دناڤبەرا دهۆك و مووسلدا، ڕێڤەبەرێ ناحیا زوممار و فەرمانگەهێن پەیوەندیدار یێن دهۆك و مووسلێ ئامادەبوونە و هەمی جۆرە پشتەڤانی و هاریكاری دایە دیاركرن دا كۆ ب سەركەفتیانە قۆناغا دوویێ ژ لایێ سنووران ڤە بهێنە دیاریكرن و دهێتە زانین د قۆناغا ئێكێدا سنوورێ وان دوو گوندان ل ڕۆژهەلاتێ ڕووبارێ دیجلە هاتبوو دیاریكرن و نووكە ژی و د قۆناغا دوویێدا سنوورێ ڕۆژئاڤایێ هاتییە دیاریكرن».
سەرۆكێ ئێكەتییا سەندیكا كرێكارێن كوردستانێ لقێ دهۆكێ راگەهاند، بەهرا پتر یا جهێن كاركرنێ ل دهۆكێ پێگیرییێ ب رێنمایێن وەزارەتا كار و كاروبارێن جڤاكی ناكەن، ئێدی هەر پرۆژەیەكێ پێگیرییێ نەكەت، دێ كەڤیتە بەر سزایێن قانوونی.
وەلات ئەمین ئۆزمانی سەرۆكێ ئێكەتییا سەندیكا كرێكارێن كوردستانێ لقێ دهۆكێ ل دۆر بریارا وەزارەتا كار و كاروبارێن جڤاكی یا كو دڤێت كرێكارێن كۆمپانی و جهێن كاركرنێ ب رێژەیا 75%ێ كوردبن دیاركر، نێزیكی 90 هزار جهێن كاركرنێ ل دهۆكێ هەنە، لێ بەهرا پتر یا وان جهان پێگیرییێ ب رێنمایێن وەزارەتا كار و كاروبارێن جڤاكی ناكەن و هەتا 50%ێ ژی كرێكارێن وان د بیانینە، لێ ئێدی هەر جهەكێ پێگرییێ نەكەت دێ هێتە سزادان.
گوت ژی : ئەڤ بریارە هەموو پرۆژەیێن كاركرنێ بخۆڤە دگرت، چ كۆمپانی بن یان پرۆژەیێن بچووك بن، هەروەسا هەموو پرۆژەیێن دەستوورییا كاركرنێ هەبیت یان ژی نە، دڤێت پێگیرییێ ب ڤێ بریارێ بكەن، لژنەیێن وان دێ ژ سوبەهی وێڤە ل هەردوو دەمێن سپێدێ و ئێڤارییان دەست ب سەرەدانێن خوە كەن، هەر پرۆژەیەكێ كاركرنێ یێ كو كرێكارێن وی ب رێژەیا 75%ێ كورد نەبن دێ هێتە سزادان.
بێوار شكری:
د دەمێ دوگیانیێ دا، ژنان پێدڤی ب چاتڤدێریەكا تایبەت ژ پشكنبنان و سەرەدان بۆ نوشداران و چاوانیا خوارنێ و ڤەخوارنێ و رەوشا وێ و زارۆكێ وێ هەیە داكو مەترسیێن دەرئەنجامێ وێ كێم ببن ب تایبەت هەكە ژن یا بچووك یان گەلەك یا مەزن بیت ژلایێ ژیێ خوڤە, هژمارەك نۆشدارێن دێرینیێن ژنان و زارۆكبوونێ ل دور ڤی بابەتی د ئاخڤن.
د. ئەلماس منصور یاقو، تایبەتمەندا نەخۆشیێن ژنام و زارۆكبوونێ دیاركر یا باش ئەوە دەمێ ژن یا ب دوگیان بیت هەر زوی پرسیارا خو بكەت، كا یا ب دوگیانە یان نە، ئەگەر دیاربوو یا ب دوگیانە، پێدڤیە هەر هەیڤ پرسیارا خو بكەت، و پشكنینێن پێدڤی بو خو بكەت كا پێدڤی ب چیە، و گۆت: دەمێ دبیتە دو هەیڤ سونەرەكێ بگریت، و پشتی دبیتە پێنج هەیڤ سونەرەكا دی بگریت، چونكو ل پێنج هەیڤیێ زارۆك تەمام دبیت و دیاردبیت كا چ ئاریشە هەنە، هەر چنەبیت دابزانیت، و بەردەوام چاڤدێریا خو بكەت هەتا زارۆك پەیدادبیت، هەمی پشكنینێن پێدڤی بخو بكەت، و ئەگەر فشارا وێ بلندبیت، ل نەخۆشخانێ بهێتە نڤاندن، ئەگەر فشارا وێ یا بلندبیت و ئاڤا زارۆكی یا كێم بیت، لازم ژ دایكبوونا وێ بلەز بێخن، نەهێلن هەتا ئەو بخو پەیدابیت.
دەربارەی پرسیارەكێ ئەرێ چ پشكنین د پێدڤیە بۆ ژنان د دەمێ دوگیانیێ دا، د. مائدە یوسف شمدین، تایبەتمەندا نەخۆشیێن ژنان و زارۆكبوونێ، گوت: گرنگترین پشكنین بو ژنا دوگیان ئەوە، ئەگەر ژنا دوگیان چ نەخۆشی نەبن، پشكنینا هیموگلوبینی و رێژا خۆینێ و ئەگەر كێمخوینی هەبیت پێدڤیە جورێ وێ بزانین، و گۆتژی: پشكنینا دەستئاڤا گشتی و یا شەكرێ، و سونەرێ بو تەئكیدكرنێ كا دوگیانە و جێمكە یان نە و بو دیاركرنا هندەك ئاریشا گەلەك یا گرنگە و ل دور خوارنێ ژی گرت: هەمی خارن و ڤەخارن بو ژنێن دوگیان دروستە، ب تایبەت ئەو ژنێن گەنج و نە د قەلەو، بەس ئەگەر ژنەكێ نەخۆشیەك هەبیت، پێدڤیە ئەو خارن و ڤەخارن ل دووف وان نەخۆشیان بن، و ئە ژنێن قەلەو پێدڤیە خارنا خوە كێم كەن، ب تایبەتی نان و برنجی و ئەو تشتێ دبنە ئەگەرێ قەلەویێ وەك دوهنیاتان، و پێدڤیە هەمی ژنێن دوگیان گرنگیەكتباش بدەنە سەر زەرزەواتان ب گشتی گیزا و فستەقا.
چ مەترسی بۆ ژنان د دەمێ دوگیانیێ دا پەیدادبن؟ د. ساهیرە محمد صدیق، تایبەتمەندا نەخۆشیێن ژنتم و زارۆكبوونێ دیاركر ئەگەرێن گرێدایی ب دایكێ ڤە بەری دوگیانیێ، ژیێ وێ یە، دبن 17 سالیێ دا و د سەر 35 سالیێ دا، كێشا ژنكێ و قەلەوی و زەعیفینە، ئەگەر ژ پێنج زارۆكا زێدەتر هەبن، یان گەلەك نشتەرگەریێن قەیسەری هەبن، نەخۆشیێن دەمدرێژ وەك فشارا خۆینێ و شەكرێ و نەخۆشیێن دلی و گۆلچیسكا، و یێن خۆینێ نە، و گوت: هندەك ئەگەرێن دەروونی نە، و هندەك مەترسی گرێداینە ب دوگیانیێ ڤە، خۆینبەربون د هەرسێ قوناغێن دوگیانیێ دا گەلەك مەترسیە بو سەر نەخۆشێ، زارۆكێن جێمك و پتر و ئاڤا زارۆكی یا زێدە بیت، هەروەساپەیدابوونا زارۆكی بەری وەختێ خو، نەزیف پشتی ژ دایكبوونالا زارۆكی فشارا خۆینێ و شەكر گەلەك جارا د دوگیانیێ دا دمینن،هەتا پشتی دوگیانیێ دمینن، كێشا زارۆكی ئەگەر ژ چار كیلویان پتربیت، ئەوژی دبیتە مەترسی ل سەر ژیانا دایكێ.
ل دور گرنگیا سونارێ د دەمێ دوگیانیێ دا، د. خدیجە زین العابدین، تایبەتمەندا تیشك و سونارێ دیاركر مفایێن سونەرێ ئەون دا دا مرۆڤ سەكتێ ل رەحمی و مەبیزی كا چ تەشەوهاتێن خولقی نینن، و دابزنین چەند زارۆك د زكی دا هەنە، و داخل رەحمە یان خارجی رەحمە، و نمویا زارۆكو و ژیێ وی بزانیتـ، كایێ ل دیف وەختێ خو مەزن دبیت، وەزعێ زارۆكی د رەحمی داك ا یێ دروستە یان نە، و سەرافكا بچیكی دروستە یان نە، و هەڤال بچیك ل جهێ خویە یان نە، یا ژ هەمیا گرنگتر كا چ كێماسی هەنە یان نە.
قەیس وەیس:
ب فەرمی هەردو یاریزانێن پارێزگەهێ و یانەیا دهۆك بۆ یارییا تێنسا ئەردی زەلال سەعید و لانا ئاڤدەل دێ پشكداری قارەمانییا نێڤدەولەتی ل سەر ئاستێ كچان كەن، ئەوا دهێتە چاڤەڕێ كرن هەڤڕكیێن وێ وەلاتێ بەحرێنێ ل ناڤەراستا مەها بهێت مێڤاندارییا وێ بكەت.
ل دۆر ڤێ یەكێ سەعید ركا پخەلیل ئەندامێ ئێكەتییا تێنسا ئەردی بۆ رۆژنامەیا ئەڤرۆ دیار كر ل حەفتییا بوری ب پشكدارییا 20 یاریزانێن كچ و كوڕ یێن دژیێ 14 سالی و ئاستێ پێشكەفتیان، ڤاڤارتنێن بۆ یاریزانێن ل سەر ئاستێ پارێزگەهێن ئیراقێ ل یاریگەهێن پاێشمەرگە ل هەولێرێ هاتنە ئەنجامدان ژبۆ ژێگرتنا هەلبژارتیێ ئیراقێ، ل سەر ئاستێ كچان نەهـ یاریزان پشكداربوون و چار یاریزان هاتنە ژێگرتن خوە بەرهەڤكرن بۆ قارەمانییا نێڤدەولەتی BILLIE JEAN KING CUP ئەوا بڕیارە ل17 چرییا ئێكێ یا بهێت ل سەر ئاستێ هەلبژارتیێن وەلاتان پایتەختێ بەحرێن مەنامە مێڤاندارییا وێ بكەت.
ژلایێ خوەڤە ئاڤدەل حەسەن راهێنەرێ كچێن پارێزگەها دهۆكێ و هەلبژارتیێ ئیراقێ گۆت:ل سەر ئاستێ كچان نەهـ یاریزانێن سۆپەر و بژاردە ل سەر ئاستێ ئیراقێ پشكداری ڤاڤارتنان بوون پشتی هەڤڕكییەكا دژوار ئەوا ب شێوەیێ خول دهاتە كرن چار یاریزانێن رێزێن ئێكێ هاتنە ژێگرتن بۆ ناڤ رێزێن هەلبژارتیێ ئیراقێ دا ئەو ژی زەلال سەعید و لانا ئاڤدەل ژ پارێزگەها دهۆكێ، نورا زیاد ژ بەغدا و ئالا ناسر ژ هەولیرێ، بڕیارە بۆ ماوەیێ بهێت بەرنامە و پلان بهێنە دانان و راهێنانان بهێنە كرن ژبۆ باشترین بەرهەڤی بۆ قارەمانییا نێڤدەولەتی ل بەحرێنێ.
دوهی ب شێوەكێ فەرمی ل یاریگەها سێمێلێ تیما تەپا پێی یا یانەیا دهۆك دەست بەرهەڤییان كر خوە بەرهەڤكرن بۆ وەرزێ نوو یێ خولا ئیراقێ یا پیشەكاران، ئەوا دهێتە چاڤەڕێكرن هەڤڕكیێن وێ ل ناڤەراستا چڕییا ئێكێ یا بهێت بۆ جارا ئێكێ ل دووڤ سیستەمێ پیشەكاران و ب شێوەكێ نوو و سەرپەرشتییا فیدراسیۆنا لالیگا یا ئسپانی.
جاسم محەمەد حاجی رێڤەبەرێ تیمێ و سكرتێرێ یانەیێ بۆ رۆژنامەیا ئەڤرۆ گۆت: پشتی ب دووماهی هاتنا پرۆسێسا ئینانا یاریزانان بۆ ناڤ رێزێن تیمێ و بجهـ ئینانا قۆناغێن دووماهیێ یێن خالێن رێپێدانا ئاسیایی و سیستەمێ ڤارێ، دوهی ب فەرمی تیما مە دەست ب ئێكەم یەكا خوە یا راهێنانێ كر ب بەرهەڤبوونا نێزیكی25 یاریزانێن مە، ژبلی هەر شەش یاریزانێن پیشەكار ئەوێن ژبەر ژڤانێ پلێتا فرۆكێ بڕیارە ل سێ شەمبییا بهێت بگەهنە ناڤ رێزێن تیمێ دا، پێنەڤێت ئەڤ پێنگاڤە هەمی ژی ب پلان و بەرنامە بوویە پێخەمەت تیمەكا بهێز و باشتر ژ وەرزێ بوری و ئەو چەندە ژی ب مەرەما پشكدارییەكا سەرفەراز و دلێ جەماوەرێ ژی خوەشبكەین و رژدین وەرزێ ئەڤ سالە جودا بیت و ب هیڤی نە پشتەڤانێن یانەیێ دناڤ یاریگەهێ دا بەردەوام ئاهنگا ب گێرن.
ژلایەكێ دووڤە ناڤهاتی پشتەڤانییا بەردەوام یا حوكمەتا هەرێما كوردستانێ و پارێزگارێ دهۆكێ ب ئاستەكێ بلند و باش قەلەم دا و گۆت: هەر بەردەوامییا پشتەڤانییا دارایی و مەعنەوی یا حوكمەتا هەرێمی و پارێزگاری گەشبینن دێ ل دووڤ پلان و بەرنامەیێ خوە بەردەوامبیت و چاڤەڕێ كەمپێ راهێنانێ نە ژبەركو ئێك ژ خالێن گرنگ یێن بەرهەڤیانە ژبەركۆ قۆناغەكا هەستیارە بۆ كادرێ راهێنانێ و دبیت گوهۆڕین ژ هەبن ژ وانان یاریزانان ئەوا دێ ل دووڤ خواستا كادرێ راهێنانێ بیت.
بۆ زانین یانەیا دهۆكێ گرێبەستا سێ یاریزانێن خوە یێن پیشەكار نوو كر بوو ئەو ژی یێ كۆتیڤۆاری یانیك زاكێری، یێ بەرازیلی لۆكاس مۆزێز ویێ غانا نۆرۆ سۆلێ، ژلایەكێ دووڤە گرێبەستا سێ پیشەكارێن دی ئیمزاكربوو ئەوژی یێ بەرازیلی دۆمینێك ڤێنێسیۆس و هەردو پیشەكارێن غانا رۆبێن ئەكوا و ماكسوێل.
راهێنەرەكێ یارییا كیكبۆكسینگا پارێزگەها دهۆكێ گازندە ژ ئێك دادڤانێن باژێرێ خوە كر ئەوێ بوویە ئەگەر خالێن یاریزانێ كوڕێ دهۆكێ و هەلبژارتیێ ئیراقێ زانا سالح بەرانبەر هەڤڕكێ خوە یێ ئوردنی كێمتر لێبكەت و تووشی خوسارەتیێ بكەت بۆ كێشەیا 67 كگم و ئەوی راهێنەری دادڤانێ دهۆكێ ب ئەگەرێ ڤێ خوسارەتیێ دا زانین و غەدر هەژمارت، د چارچووڤێ قارەمانییا عەرەبی دا ئەوا دوهی هەڤڕكیێن وێ ل باژێرێ سلێمانیێ هاتینە كرن.
زێدەتر ئەوی راهێنەری ئەوێ نەڤیایی ناڤێ وی ئاشكەرا بیت و پێزانین وی ل دەڤ رۆژنامەیا ئەڤرۆ پاراستی نە گۆت: ل ئەینیا بۆری یاریزانێ پارێزگەهێ و خودانێ ناسناڤێ قارەمانییا بوری زانا سالح گەهشتبوو قۆناغێن پێش دووماهیێ و شیابوو ئاست ئەنجامێن سەركەفتی تۆماربكەت، د یارییا پێش دووماهیێ دا بەرانبەر یاریزانێ ئوردنی سێ دادڤانان خالێن هەڤڕكیێ بۆ هەردو یاریزانان دنڤێسان ل دووڤ روودانێن یاریێ، ل دووماهیێ خال هاتنە كۆمكرن، دادڤانێ مەغربی بۆ زانایی خال هژمارتن و پێدڤی ب خالێن ئێك ژ دادڤانێن دی بوو یێ ئوردنی و یێ ئیراقی كو خەلكێ پارێزگەها دهۆكێ بوو، مە پێشبینی دكر دێ دادڤانێ مە خالان بۆ یاریزانێ مە بلند كەت لێ مخابن بەرۆڤاژی پێشبینییان بۆ یاریزانێ ئوردنی هژمارت ئەڤچەندە وەكو غەدر ل كوڕێ باژێرێ خوە كر.
بۆ زانین ژ بلی یاریزانێ كوڕ یێ پارێزگەهێ دگەل هەلبژارتیێ ئیراقێ پێنچ یاریزانێن كچ پشكداری كربوون و گەهشتبوونە یاریێن دووماهیێ ئەوا هەڤڕكیێن وان ل سەر سیستەمێ فۆل كۆنتاك دهاتنە كرن ئەو ژی، پەیدا ئەحمەد 48كگم، شایان هاشم 52 كگم، پەریسا بریندار 56كگم، ئاشنا سالح كەكو 60كگم، شایەن هاشم 65كگم.
د ناڤ هەڤڕكیێن قارەمانیێ دا سێ دادڤانێن پارێزگەهێ ژی یاری ب ڕێڤە دبرن ئەوژی زێرەڤان سالح فەقی، محەمەد ئەمین عەلی و توخیب ئەحمەد قرۆ.
ستێرێ بەرازیلی و یاریزانێ یانەیا مانچستەر یونایتد یا ئنگلتەرایێ ئەو تۆمەتا ژلایێ هەڤالا خوە ب دژی وی ل دادگەهێ ب نەوەیی دەرئێخستیە كو بوویە ئەگەر ژ هەلبژارتیێ بەرازیل بهێتە دوورئێخستن.
ل دووڤ راپۆرتا رۆژنامەیا ئێكسترا یا بەرازیلی دیاركر ئەنتۆنی ژلایێ هەڤالا خوە ب ناڤێ رایسا دی فرێتاس ل بنگەهێ پۆلیسان هاتیە تۆمەتباركرن ب توندۆتیژیێ و پالدانا ب زیان، ئەڤ داواكارا هەڤالا وی بۆ ئەگەر كو فیدارسیۆنا تەپا پێی یا بەرازیل بەروەخت ئەنتۆنی دووربێخیت هەتا ئاریشە چارەسەربیت.
ژلایێ خوەڤە یاریزانێ ناڤهاتی بۆ تۆرا s.bt یا بەرازیلی گۆتنێن رایسا دی فرێتاس ب نەوەیی دەردئێخیت و گۆت: چو رەنگان نە دگەل هەڤالا خوە و نە چو ژنان توندوتیژی نە كرییە رێزەكا مەزن ل ژنان دگرم، رۆژا دادگەهێ دێ هەمی بەلگەیێن خوە بەردەست كەم و زێدەتر دێ هندەك بەلگەیێن دی یێن دژی وێ دیاركەم.
نيشاندان