رێڤەبەرێ گشتییێ خانووبەران راگەهاند، كار بۆ ئەلكترۆنیكرنا كەرتێ خانووبەران ل هەرێما كوردستانێ یێ بەردەوامە و ب دیتنا وی ژبلی ڤەگەراندنا دەمی، كەیسێن خانووبەران دێ ب شێوەیەكێ دروستتر هێنە هەلگرتن، هەروەسا دێ ژ دەستكاری و سەختەكارییان هێنە پاراستن و گۆت: ئێك مامەلەیا تۆمارا خانوویان ژ 400 مامەلەیان پێك دهێت، هەموو زانیاری تێدانە، ب ئەلكترۆنیكرنا وان كاران دێ پێدڤی ب دەمەكێ درێژ بیت.

د. لوقمان عومەر رێڤەبەرێ گشتییێ تۆماركرنا خانووبەران ل هەرێما كوردستانێ راگەهاند، بزاڤێن حوكمەتێ بۆ ئەلكترۆنیكرن و دیجیتالكرنا كەرتێ خانووبەران د بەردەوامن، ئەو سیستەمە پێدڤی ب چەند سالایە، لێ كار و پێنگاڤان دەستپێكرییە.
دكتۆر لوقمان عومەر وەسا دبینیت ئەو سیستەمە گەلەك یێ باشە، ئەو كەرتە دێ ژ دزی و سەختەكاری و دەستكاریكرنان پتر یێ پاراستی بیت.
سەبارەت دەمێ كاركرنێ ب سیستەمێ نوو، رێڤەبەرێ گشتییێ تۆماركرنا خانووبەران ئاماژە ب هندێ دا، ئێك مامەلەیا تۆمارا خانوویان ژ 400 مامەلەیان پێك دهێت، هەموو زانیاری تێدانە، ب ئەلكترۆنیكرنا وان كاران دێ پێدڤی ب دەمەكێ درێژ بیت، دڤێت هەموو زانیاری ژلایێ فەرمانبەرێ راهێنان پێكریڤە بهێنە تۆماركرن و ئەوژی پێدڤی ب دەمییە.
رێڤەبەرێ گشتییێ تۆماركرنا خانووبەران گوت: هەموو كارێن كرین و فرۆتنا خانووبەران، تۆماركرن گوهۆرین و هەموو مامەلە هەتا دووماهیێ دێ ب رێكا ئەوی سیستەمی بن، لەوما پشتی تمامبوونێ، ئاسانكارییێن زێدەتر بۆ فەرمانبەران دێ بەردەست بن و بۆ وەلاتییان ژی دێ بیتە ئەگەرەك بۆ كێمكرنا رۆتینێ.
رێڤەبەرێ گشتییێ تۆماركرنا خانووبەران ل هەرێما كوردستانێ بەحس ل هندێ كر، سەرباری پەیرەوكرنا سیستەمێ ئەلكترۆنییێ كەرتی، دەسبەرداری شێوازێ پەیرەوكرییێ نوكە نابن، هەردوو سیستەم دێ هێنە پەیرەوكرن.

ئامێدیێ‌، مەحمود نهێلی

ژ بەر خرابیا رێیا سەرەكی یا هاڤینگەها بیاوێ‌ ل سنورێ‌ ناوچەداریا دێرەلۆك كارتێكرن ل رێژا هاتنا گەشتیاران ل وێ‌ دەڤەرێ‌ كریە. گەشتیار و خودانێن جهێن گەشتیاری ژی داخاز دكەن جادەیا وێ‌ دەڤەرێ‌ بهێتە سەخبێركرن.

سلێمان صەبری گەشتیارەكە و ژ بۆ بوراندنا دەمێ‌ خوە و هینكرنا لەشێ‌ خوە، سەرەدانا ڤێ‌ هاڤینگەهێ‌ كریە، لێ‌ یێ‌ شەپرزەیە و دیارە رێكێ‌ بۆ وێ‌ نەخوەشكریە تا گەهشتیە جهێ‌ مەبەست. بۆ رۆژناما ئەڤرۆ دیار كر، ئەو بەردەوام سەرەدانا ڤێ‌ هاڤینگەهێ‌ دكەن و گۆت: ئەڤ هاڤینگەهە ئێك ژ هاڤینگەهێن گەلەك خوەشە ل دەڤەرێ‌ و رۆژانە خەلكەكێ‌ زۆر قەست دكەنێ‌، لێ‌ مخابن رێكا ڤێ‌ هاڤینگەهێ‌ گەلەكا بێ‌ سەروبەرە و داخاز دكەت كو ئەو رێ بهێتە چێكرن بۆ وێ‌ یەكێ‌ گەشتیار ب ئاسانی سەرەدانا وێ‌ دەڤەرێ‌ بكەن.
نەوزاد موحەمەد خودانێ‌ ئێك ژ جهێن گەشتیاریە ل بیاوێ‌ دیار كر، وان مەزاختنەكا زۆر ل ڤێ‌ هاڤینگەهێ‌ كریە و ب رەنگەكێ‌ گەلەك جوان چێكریە بۆ وێ‌ یەكێ‌ گەشتیار قەست بكەنێ‌ و گۆت: رۆژانە هژمارەكا زۆرا خەلكی قەستا جهێن مە دكەن، لێ‌ گازندا هەموویان ئەوە كو رێكا وان یا بێ‌ سەروبەر و خرابە و داخاز كر، ئەو رێكا هاڤینگەه و جهێن وان یێن گەشتیار بهێتە چێكرن.
عومەر بیاوەیی خودانێ جهەكێ گەشتیاری یە ل بیاوێ‌ گۆت: ڤێرێ‌ جهەكی سەرەكی یە بۆ جهێن گەشتیاری رۆژانە گەشتیارێن ناڤخوە و یێن عیراقێ‌ ژی سەرەدانا جهێ‌ مە دكەن و دیار كر: داخازا سەرەكی یا وان چێكرنا جادێ‌ و گەهاندنا كارەبێ‌ یە بۆ جهێ‌ وان.
و گۆت: ئەم شیانە چەندین گەنجێن بێ‌ كار ل ڤان جهان بدەینە كاری و نێزیكی سەد جهێن گەشتیاری هەنە و یێن گەنجان جودانە و یێن خێزانی ژی جودانە و جهێن خوەش و دیمەنێن دلڤەكەر ل ڤێرێ‌ هەنە.
هەلبژێرێ‌ گوندێ‌ بیاوێ‌ بۆ رۆژناما ئەڤرۆ دیاركر، وان گەلەك جاران بزاڤ كرینە و داخازا خوە گەهاندیا ناوچەداریێ‌ و تا پارێزگەهێ‌ ژی هەر دێ‌ بێژن بلا و تا نوكە رازیبوون ل سەر نەهاتیە كرن و گۆت: زێدەباری ئەڤە جهەكی گەشتیاری یە، ژیانا هەژمارەكا زۆرا جوتیاران ژی ل سەر چەمێن ڤی گوندی یە و گۆت: ئەڤە گوندەكی ئاڤەدانە و یێ‌ خراب.
ناڤهاتی داخاز ژی كر، رێكا گوندێ‌ وان بهێتە چێكرن، هەروەسا كارەب بهێتە گەهاندن بۆ ڤی گوندی دا ئەو ژی بشێن دەست ب ئاڤەدانیێ‌ بكەن و خەلكێ‌ گوندی ڤەگەرنە ناڤ گوندێ‌ خوە دەست ب ئاڤەدانیێ‌ بكەن ئەڤە ژ بلی وێ‌ یەكێ‌ دێ‌ مفایەكی باش ژی ژێ هێتە وەرگرتن ژلایێ‌ گەشتیاری ڤە.
رێبەر سادق موستەفا رێڤەبەرێ‌ ناوچەداریا دێرەلۆك بو رۆژناما ئەڤرۆ دیاركر، بەری نوكە ڤەدیتن بۆ رێكا گوندێ‌ بیاوێ‌ كو دكەڤیتە سنورێ‌ ناوچەداریا دێرەلۆكێ‌ هاتیە چێكرن ژلایێ‌ رێڤەبەریا رێك و پران ڤە و گۆت: ل سەر داخازیا وان ئەڤ ڤەدیتنە ب نڤیسارەكی هاتیە بلند كرن بۆ پارێزگەها دهوكێ‌ بۆ وێ‌ یەكێ‌ ئەڤ جادەیە بهێتە چێكرن و نوكە ئێكە ژ وان پرۆژان یێن هاتیە پێشكێشكرن .
ئاشكرا ژی كر، گوندێ‌ بیاوێ‌ جهەكێ‌ گەشتیاری یە و رۆژانە خەلكەكێ‌ زۆر ل سەر وێ‌ جادەیێ‌ هاتن و چونێ‌ دكەن ژ بەر وێ‌ یەكێ‌ وان ب فەردیت كو جادا وی گوندی بهێتە چێكرن و ژ بەر وێ‌ یەكێ‌ كریە د پرۆژێن پلانكری دا یە و ئەو هیڤی دكەن ئەو پرۆژێن ل پارێزگەها دهوكێ‌ رازیبوون ل سەر دهێتە كرن پرۆژێ‌ چێكرنا رێكا گوندێ‌ بیاوێ‌ ژی دگەل دا بیت.

ئەمیر ئەترووشی:

ئێكەتییا سەندیكا كرێكارێن كوردستانێ راگەهاند، د ماوێ‌ ئەڤ سالە دا و هەتا نها ل هەرێما كوردستانێ 30 كرێكاران گیانێ خۆ ژ دەستداینە و 24 كرێكارێن دی برینداربووینە و گۆت: پترین گیان ژ دەستدانا كرێكاران ل سلێمانییێ هاتینە و ل دهۆكی1 كرێكارەكی و ل زاخۆ ژی كرێكارەكی گیانێ خۆ ژ دەستدایە.

عەبدولقادر ناوبەردانی، ئەندامێ مەكتەبا بجهئینانا ئێكەتییا سەندیكا كرێكارێن كوردستانێ ڕاگەهاند، ئەڤ سالە ل هەرێما كوردستانێ 30 كرێكاران گیانێ خۆ ژ دەستداینە و 24 كرێكارێن دی برینداربووینە.
هەروەسا دیار كر، پترین گیان ژ دەستدانا كرێكاران ل سلێمانییێ هاتینە تۆماركرن كو 13 كرێكاربوون، پاش ل ئیدارەیا گەرمیان 8 كرێكاران گیانێ خۆ ژ دەستداینە، ل هەولێر 7 كرێكار، دهۆك 1 كرێكار و ل زاخۆ ژی 1 كرێكاری گیانێ خۆ ژ دەستدایە.
ل دووڤ ئامارێن گیان ژ دەستدانێ یێن كرێكاران ل ئێكەتییا سەندیكا كرێكارێن كوردستانێ؛ ل سالا 2022 ل هەرێما كوردستانێ‌ 41 كرێكاران گیانێ خۆ ژ دەستدایە، ل سالا 2021 ژی ل هەرێما كوردستانێ‌ 37 كرێكاران گیانێ خۆ ژ دەستداینە، و ل سالا 2020ی ژی ل هەرێما كوردستانێ‌ 35 كرێكاران گیانێ خۆ ژ دەستدایە و ل سالا پترترین كرێكاران ل هەرێما كوردستانێ‌ گیانێ‌ خوە ژ دەستداینە كو هژمارا وان گەهشتبوو 62 كرێكاران.