سەرۆكێ هەرێما كوردستانێ، نێچیرڤان بارزانی ل ڕێوڕەسمێ دەرچوونا خولا چارێ یا پەیمانگەها دادوەری پەیڤەك پێشكێشكر و تێدا باس ل وێ چەندێ كر، كارێ دادوەریێ ئەركەكێ ب زەحمەت و بەرپرسیارەتیەكا مەزنە بەرانبەر خودێ و بەرانبەر ویژدان ومرۆڤایەتیێ.
سەرۆكێ هەرێما كوردستانێ گوت ژی» قانوونێ دەستهەلات ب دادوەری دایە كو یێ ئازاد بیت، ئەو ئەركێ دەستهەلاتا دادوەری و دادوەرانە، سەربخوەییا خوە بپارێزن، ئەركێ دادوەر كو ب خوە قبوول نەكەت و ڕازی نەبیت هیچ كەس و ئالیەك دەستهەلاتا خوە ب سەر دا ب سەپینیت».
نێچیرڤان بارزانی دیاركر ژی كو كێشە و ئاستەنگ ل بەردەم جڤاتا دادوەری هەنە، بەلێ د رژدن ل سەر ئەنجامدانا چاكسازیێ تێدا، هەروەسا دوپاتی ل وێ چەندێ ژی كر كو پێدڤیە پڕۆژە قانوونەكا تایبەت ب داواكارێ گشتی ل هەرێما كوردستانێ بهێتە بەرهەڤكرن و خولا داهاتی یا پەرلەمانێ كوردستانێ پەسەند بكەت.
سەرۆكێ هەرێما كوردستانێ د پەیڤا خوە دا ئاخڤتنێن خوە ئاراستەی دەرچوویێن خولا چاری یا پەیمانگەها دادوەری ل هەرێما كوردستانێ كر و گوت» هەوە كارەكێ ب زەحمەت هەلبژارتیە، هیڤیا سەركەفتنێ بۆ هەوە دخوازم دڤێ ڕێكا ب زەحمەت دا یا هەوە هەلبژارتی».
نێچیرڤان بارزانی ب دادوەرێن هەرێما كوردستانێ ڕاگەهاند» كارێ هەوە ڕاستەوخوە ل گەل وەلاتیان و داخوازی و مافێن وانایە، هوون پارێزەرێن مافێن هەموو تەخ و چینێن جڤاكی و ماف و مولكێ گشتی نە».
سەرۆكێ هەرێما كوردستانێ دوپاتی سەربخوەبوونا دادگەهان كر و ڕاگەهاند» سەربخوەییا دەستهەلاتا دادوەری و سەروەریا قانوونێ ژ بنەمایێن سەرەكی یێن حوكمڕانیا دروست و سەركەفتیە د وەلاتی دا».
هەروەسا گوت ژی» دادوەری بنەمایێ حوكمڕانیێ یە و پارێزەرێ جڤاكی و سیستەمێ سیاسی یە ل هەر وەلاتەكی».

ئەندامەكێ مەكتەبا سیاسی یا پارتی دیموكراتی كوردستان ڕاگەهاند: حوكمەتا هەرێما كوردستانێ هەموو پێگیریێن خوە ل بەرانبەر حوكمەتا فیدرالی بجهئیناینە، بەلێ ئەوا هەتا نوكە د ڤان سێ مەهان دا دبینین، وەكو پێدڤی بابەتێ مووچەی، شایستەیێن دارایی یێن وەلاتیان و مادەیێ 140 یێ دستووری نەهاتینە بجهئینان.
پشتیوان سادق، ئەندامێ مەكتەبا سیاسی و بەرپرسێ مەكتەبا ڕێكخستنا دهۆكێ یا پارتی دیموكراتی كوردستان سەبارەت پەیوەندیێن پارتی و ئێكەتیێ، گوت» ئەو كێشەیێن د ناڤبەرا پارتی و ئێكەتیێ دا هەین، كێشەیێن مەزن نینن و قابلی چارەسەركرنێ نە، د ژیانا سیاسی دا، ئەو ئەڤراز و نشیڤی د پەیوەندیێن سیاسی دا هەنە».
پشتیوانی گوت ژی» ب دیتن و باوەریا پارتی، ئێكڕێزی و تەباییا كوردستانێ، زێدەتر خزمەتا پڕۆسەیا سیاسی و پرسا ڕەوایا گەلێ كوردستانێ دكەت و باوەریا مە ئەوە مافێن مە یێن دستووری ب ئێكڕێزیێ و تەباییێ دێ ب دەستڤەهێن».
پشتیوان سادق ئاماژەكر» وەكو پارتی ب دیتنا مە د بنەڕەتدا پەشێمانیبوونەك د بجهئینانا دستووری ( ژئالیێ حوكمەتا فیدرالی) ڤە هەیە و ڕەوشەنبیریا هەڤپشكیێ، پێكڤەكاركرن و بجهئینانا ڕێككەفتنان ژی یا لاوازە، بەلێ ئەڤە ڕامانا وێ چەندێ نینە دووماهی پێ هاتیە، مە وەكو پارتی و حوكمەتا هەرێما كوردستانێ باوەری ب وێ چەندێ هەیە، ب دانوستاندنێ كێشەیان چارەسەر بكەین».
بەرپرسێ مەكتەبا ڕێكخستنا دهۆكێ یا پارتی دوپاتیێ ل وێ چەندێ دكەت» ئەوا پێدڤی ل سەر حوكمەتا هەرێما كوردستانێ ل بەرامبەر حوكمەتا فیدرالی، ئەنجامدایە. پێشتر گەلەك كەسان، ب تایبەتی هندەك كەسان ل ناڤخوەیا كوردستانێ دگوت، حوكمەتا هەرێما كوردستانێ پەترۆلێ ڕادەستی بەغدا ناكەت، لەوما حوكمەتا فیدرالی پێگیر نابیت، نوكە ئەوا ل سەر هەرێما كوردستانێ ب زێدە ژی هاتیە بجهئینان».
ب دیتنا پشتیوان سادقی» نابیت بابەتێ ژیار و مووچەیێن خەلكێ هەرێما كوردستانێ تێكهەلی هیچ بابەتەكێ دی بهێتە كرن» و ب پێدڤی ژی دزانیت» پرسا مووچەی ڕاستەوخوە مەهانە بێی كێشە بهێتە بجهئینان» . هەروەسا دبێژیت» ئەوا هەتا نوكە ئەم د ڤان سێ مەهان دا دبینین، وەكو پێدڤی بابەتێ مووچەی، شایستەیێن دارایی یێن وەلاتیان، مادەیێ 140 و چەند بابەتێن دی وەكو پێدڤی نەهاتینە بجهئینان، بەلێ بێی ئومێد نینین ودێ بەردەوام بین ل دانوستاندنێ بۆ چارەسەركرنا كێشەیان».
خویاكر ژی» هەرێما كوردستانێ ژ نوو بەر ب پاشڤە نازڤریت و قەوارەیەكە ژ هەموو ڕوویەكی ڤە واقعەكە، پێدڤیە ئەم هەموو ژی زێدەتر بپارێزین».

ئەندامێ دەستەیا كارگێریا مەكتەبا سیاسی و پەیڤدارێ فەرمیێ پارتی دیموكراتی كوردستان د چاڤپێكەفتنەكێ دا ل گەل دەنگێ ئەمریكا، بەرسڤا چەند پرسێن ل سەر ئیراقێ و هەرێما كوردستانێ و پەیوەندیێن پارتی و ئالیان و هەلبژارتنان دا.
د پشكەكا وێ دیدارێ دا مەحموود محەمەد دبێژیت» نوكە خواندنەكا بابەتیانە دڤێت بۆ وێ چەندێ كو بزانین ئیراق چاوان ژ ڤێ ڕەوشێ بهێتە دەربازكرن، قۆناغا نوكە یا مەترسیدارە و گوهۆڕین ب لەزن، دبیت گەلەك ژ دەستهەلاتدارێن ئیراقێ ڤێڕانەگەهن د گەل گوهۆڕینان بچن، لەوما دبینین ل گەلەك تشتان دا دجهـدا ماینە، وەلات ب ڤی شێوازی دشێین بێژین یێ پڕە ژ ئالۆزیێن سیاسی و ئابۆری».
سەبارەت پرسا ئابۆری سەربخوە ل هەرێما كوردستانێ، مەحموود محەمەد ڕاگەهاند» هەرێما كوردستانێ یا زەنگینە ب سامانێن سروشتی و كانزایان، ئەوا د دستووری دا هەی، ڕێك ب هەرێما كوردستانێ دایە مفای ژ ڤان بابەتان وەربگریت، بەلێ ب حوكمێ چەند تشتێن دی ڕێك ل ڤێ چەندێ هاتە گرتن، ئەڤە ژی بابەتێ سەركەفتن و نەسەركەفتنێ نینە، بەلكو بابەت ڕێكگرتنە ل هەرێما كوردستانێ تاكو ئابۆرێ سەربخوە نەبیت، ئەوژی دو تشتێن ژێك جودانە، ئانكو ئەڤ ڕێكگرتنە ل هەرێما كوردستانێ، ئەوە كو ئابۆرێ سەربخوە نەبیت».
پەیڤدارێ پارتی دیموكراتی كوردستان ل دۆر پەیوەندیێن پارتی ل گەل ئێكەتیێ ب هەم باش و هەم ب خراب هەژمارتن و گوت» پەیوەندیێن مە هەم د باشن و هەم د خرابن، پەیوەندی د باشن كو پێدڤیە پێكڤە كاربكەین و بزاڤان نەكەین ب ڕێكا دامودەزگەهێن حوكمەتا ئیراقێ كێشەیان بۆ هەڤدو دروست بكەین، كو مخابن دەمەكە ئێكەتی نیشتمانی كوردستان وێ چەندێ دكەت، هەروەسا پەیوەندی هەم د خرابن ژی ژ وێ چەندێ ئەو كێشەیێن كو هەین ب دانوستاندنێ ل گەل هەڤدو چارەسەر ناكەین، بەلكو پەنایێ دبەینە هندەك ئالیێن دی بۆ چارەسەریێ».
مەحموود محەمەد زێدەتر گوت» ئێكەتیێ تنێ كێشە بۆ پارتی دروست نەكرینە، بەلكو كێشە ل بەغدا ژی دهێنە دروستكرن، بودجە تنێ بۆ پارتی دیموكراتی كوردستان نینە، بەلكو بۆ هەرێما كوردستانێ یە، قانوونێن مە هەین تنێ بۆ پارتی نینن، بەلكو بۆ هەرێما كوردستانێ نە، ئانكو جوداهی هەیە ژ وێ چەندێ كێشەیان بۆ مە دروست بكەن، هەكە مە كێشەیەك ژی ل كوردستانێ بۆ ئێكەتیێ دروست كربیت، كێشە د ناڤبەرا مە و ئێكەتیێ دایە، بەلێ ئەو كێشەیێن ئەو ب ڕێكا بەغدا دروست دكەن، كێشەیە بۆ هەموو پڕۆسەیا سیاسی یا هەرێما كوردستانێ و بۆ ئابۆرێ هەرێما كوردستانێ و بۆ ئیدارە و قەوارەیێ هەرێما كوردستانێ».

ل دۆر هەلبژارتنێن هەرێما كوردستانێ، گوت» خوزی بەری سالەكێ هەلبژارتن هاتبانە ئەنجامدان دەمێ ماوەیێ پەرلەمانی بەر ب سەرڤەچوونێ دچوو، تووشی ڤان بڕیارێن ل ڤێ دوماهیێ ژی نەدبوو، مە گەلەك بزاڤ ژی كرن بەلێ مخابن هەلبژارتن نەهاتنە ئەنجامدان، مە بەرهەڤی ژ ڕوویێ تەكنیكی و سیاسی و ئیداری ڤە کرینە، كادرێن حوكمەتێ، سەرۆكێ هەرێمێ، ئەوا پێدڤی بیت یا ئەنجامدای و بڕیار بۆ هاتیە دەركرن، دمینیت ل سەر وێ چەندێ كو كۆمسیۆنا هەلبژارتنێن ئیراقێ دێ چ كەت و چاوان دی كاری بڕێڤەبەت، كو ئەم دێ ڕێكخوەشكەر بین تاكو بشێن كارێن خوە ب شێوەیەكێ ڕێكوپێك ئەنجام بدەن».

دەمێ چەند ڕۆژایە هێزێن ئەمریكی ل ئیراقێ و سووریێ چەند لڤین دەستپێكرینە، هەڤدەم پەیڤدارێ بەرێ یێ هەڤپەیمانیا نێڤدەولەتی دژی داعشێ ڕادگەهینیت، ئەو لڤینە د ئاسایی نە و تنێ لێكگوهارتنا هێزان بوو.
مایلز كاگینز، پەیڤدارێ بەرێ یێ هەڤپەیمانیا نێڤدەولەتی یا دژی داعشێ سەبارەت لڤینێن چەكدارێن داعشێ ل سووریێ و ل ئیراقێ و كەمپا هۆلی یا تایبەت ب داعشێ گوت» هەڤپەیمانیا نێڤدەولەتی یا دژی داعشێ كار دكەت بۆ وێ چەندێ گەفێن داعشێ ب تایبەتی ل كەمپا هۆلی نەهێلیت و نوكە 50 هزار ئەندامێن داعشێ د ناڤ وان كەمپان دا د دەستەسەر كرینە».
ئاماژە كر ژی» كۆمەكا هۆكاران هەنە بۆ دوبارە دیاربوونا داعشێ ب تایبەتی ل وان جهێن بەرفرهە كو ئەو ل دەستپێكێ ژێ دەركەفتن، هۆكارێ سەرەكی ژی د نوكە دا هەبوونا ناكۆكیان و بەر ئێككەفتنا ئالیێن دژی ئێك و ناكۆك ژ وان ژی هەبوونا حەشدا شەعبی و هێزێن دی یێن جودا جودا ب تایبەت ل شنگالێ و هەبوونا لەشكرێ ئیراقێ ل دەڤەرێ و پێشمەرگە ژی ل دوور، هەژاری ژی ل دەڤەرێ هۆكارەكێ دی یە یێ ئەگەرێ دوبارە دیاربوونا چالاكیێن داعشێ ل دەڤەرێ».
د پشكەكا دی یا ئاخڤتنێن خوە دا سەرنج بۆ وێ چەندێ ڕاكێشا» نەبوونا دەستهەلاتا حوكمەتێ ب سەر هندەك دەڤەرێن ئیراقێ، وەكریە داعش دوبارە بكەڤیتە لڤینێ و چالاكیان ڕێكبێخیت بۆ وێ چەندێ جارەكادی دەست ب كریارێن خوە بكەت».
مایلز كاگینز ل دۆر لڤینێن نوو یێن ئەمریكا ل ئیراقێ و سووریێ ڕۆهنكر» ئەوا ڕوودای پێك دهێت ژ لێكگوهارتنا هێزێن ئەمریكی یە ل ئیراقێ و سووریێ، د دەمەكی دا ئەو پڕۆسەیە ڕوو ددەت، پێدڤی ب هێزا زێدەتر دكەت بۆ پاراستنا ئاسایشا وان هێزان».
ناڤبری ئاماژەكر كو گونگرێسێ ئەمریكی قانوونەك بەرهەڤكریە بۆ وێ چەندێ دەمێ سالەكێ هاریكاری بۆ هێزێن پێشمەرگەی د بەردەوام بن و گوت» ئەمریكا پشتەڤانیێ ل هەرێما كوردستانێ دكەت د پڕۆسەیا ئێكگرتنا هێزێن پێشمەرگەی دا، بەلێ د نوكە دا هندەك گرۆپێن سیاسی هەنە كو ناخوازن ئەو ئێكگرتنە ڕوو بدەت، بەلێ ئێكگرتنا پێشمەرگەی بۆ ب هێزبوونا هەرێما كوردستانێ یا گرنگە و پێدڤیە حزب بەرژەوەندیا ئێكگرتنا هێزێن پێشمەرگەی ل سەر بەرژەوەندیێن حزبی دا ببینن».
هەروەسا گوت» ئاسایش و سەقامگیریا هەرێما كوردستانێ بۆ كۆمپانیێن ئەمریكی یا گرنگە بۆ وێ چەندێ ل هەرێما كوردستانێ پڕۆژەیان دەستپێبكەن».
گوت ژی» پەیوەندیێن د ناڤبەرا ئەمریكا و هەرێما كوردستانێ و هێزێن پێشمەرگەی ب هێزن».