سەربەست لەزگین، ئەندامێ مەكتەبا سیاسی و بەرپرسێ مەكتەبا رێكخستنا پارتی ل پارێزگەها دهـۆكێ دوهی 27/11/2024 ل بارەگایێ مەكتەبێ پێشوازی ل شێخ نیاز نەقشەبەندی، رێڤەبەرێ گشتی یێ حەج و عومرێ ل وەزارەتا ئەوقاف و كاروبارێن ئایینی یا حكومەتا هەرێما كوردستانێ و شاندێ د گەل داكر و د رونشتنەكێ دا كارێ وان یێ پیرۆز بلند هەلسەنگاند، بۆ هنارتنا زیارەتكارێن مالا خودێ بۆ بجهـئینانا فەرزەی حەج و عومرێ.
هەروەسا هەردو ئالیان تەكەز ل سەر بجهـئینانا رێنمایێن حكومەتا هەرێما كوردستانێ كر بۆ پاراستنا گیانێ زیارەتكارێن مالا خودێ.
دیسا هەر دوهی 27/11/2024 سەربەست لەزگین، ئەندامێ مەكتەبا سیاسی و بەرپرسێ مەكتەبا رێكخستنا پارتی ل پارێزگەها دهـۆكێ ل بارەگایێ مەكتەبێ پێشوازی ل ئەحمەد سابیر، سەرۆكێ ئێكەتیا مامۆستایێن كوردستانێ و شاندێ د گەل دا كر و د روونشتنەكێ دا رۆلێ ئێكەتیا مامۆستایێن كوردستانێ بلند هەلسەنگاند ژ لایێ بلندكرنا هەستا نەتەوایەتی و هشیاركرنا تاكێ كورد.
سەربەست لەزگین گۆت: «مامۆستا هەلگرێ ئالایێ زانست و زانینێ نە و بەرێ بنیاتێ كارێ پەروەردێ و فێركرنێ نە، شیاینە كاودانێن دژوار دەرباز بكەن، لەوما ئەم هەردەم تەكەزیێ ل سەر ب دەستڤەئینانا ماف و داخوازیێن مامۆستایان دكەین».

ب ئامادەبوونا ڕەوشەنبیران و نڤیسەران و هونەرمەندێن باژێڕێ‌ سلێمانیێ ل رۆژا 26/11/2024 ئێكەمین دیدارا گۆڤارا هەردەم ل هۆلا ڕامادا ل سلێمانیێ بڕێڤەچوو، كو یا
تایبەت بوو ب (ئەدەبی زارۆكان، هونەرێ درامایێ‌، پۆپۆلیزم و زیرەكیا دەستكرد)ڤە.
دیدارێ‌ (گوتار، دۆكیۆمێنتاری، پانێڵ، میۆزیك و ستران و پێشكێشكرنا گۆڤارێ‌) ب خوەڤە گرتبوو، ل دەستپێكێ‌ گوتارا دیدارا هەردەم ژ لایێ‌ خاتوو (ژیان جەلال) سەرنڤیسەرا گۆڤارا هەردەم هاتە پێشكێشكرن، پاشی (د. هەڤال ئەبوبەكر) پارێزگاری سلێمانیێ، د پەیڤەكێ‌ دا بەحسێ‌ كرنگی و بهایێ پڕۆژە و چالاكیێن كولتووری و گرنگی و تایبەتمەندیا گۆڤارا هەردەم بۆ خزمەتا ر كولتوور و ڕۆژنامەگەریێ كر.
پاشی د. سالار عوسمان، بەرپرسێ بەشێ ڕەوشەنبیری و ڕاگەهاندنا پ. د. ك د پەیڤەكێ‌ دا پڕۆژەیێ گۆڤارا هەردەم بۆ مێڤانان دیاركر، ئەرك و ڕۆڵی ڤی پڕۆژەی باشتر ناساند، پاشی هیڤی خواستن گۆڤار ژ وەرزانە ببیتە مەهانە.
پاشی دۆكیۆمێنتارییەك ل دۆر گۆڤارا هەردەم هاتە پێشكێشكرن و پانێلەك ژی ب ناڤونیشانێ‌ (كولتوور، د ناڤبەرا دەرفەت و ئالنگاریان دا) بڕێڤەچوو.

ب بەرهەڤبوونا د. عەلی تەتەر، پارێزگارێ دهۆكێ و د. داود سلێمان، سەرۆكێ زانكۆیا دهۆكێ و چەندین مامۆستا و قوتابیێن زانكۆیێ، دوهی 27/11/2024 ل سەنتەرێ بێشكچی بۆ ڤەكۆلینێن مرۆڤایەتی ل زانكۆیا دهۆكێ (دیدارا سەلاحەددین ئەیۆبی) هاتە ئەنجامدان.
پارێزگارێ دهۆكێ د پەیڤا خوە دا دیار كر، سەلاحەددین ئەیۆبی كوردە و گومان ل سەر كوردبوونا وی ناهێتە كرن و گۆت: «گەلەك ناڤێن كەسوكار و مالباتا وان ناڤێن كوردی بووینە، كاریگەرترین كەسایەتیێ وی سەردەمی بوو، جهێ شانازیێ یە بۆ مە كوردان و جیهانا ئیسلامی، گەلەك دەستكەفتی د وارێ ئایینی و لەشكری و مرۆڤایەتی و زانستی دا هەبوون».
پاشی چەندین ڤەكۆلین و پێزانین ل سەر ژیان و دەستهەلاتداریا سەركردە سەلاحەددینی ژ لایێ پشكدارێن دیدارێ ڤە هاتنە بەرچاڤكرن.
ئەڤ دیدارە ژ لایێ سەنتەرێ بێشكچی بۆ ڤەكۆلینێن مرۆڤایەتی و ب هەڤكاری ل گەل هەردو پشكێن مێژوویێ ل كۆلیژێن زانستێن مرۆڤایەتی و پەروەردا بنیات هاتبوو رێكخستن.

زنار تۆڤی:

د دو رۆژێن بۆری دا، پێلەكا سەرمایێ پڕانیا دەڤەرێن پارێزگەها دهۆكێ ڤەگرتبوو، د ئەنجامدا رێژەكا باش یا بەفرێ ل گەلەك دەڤەرێن پارێزگەها دهۆكێ باری، هەروەسا بەفر ل دەرگەهێ سنووریێ سەرزێری و سەنتەرێ ناوچەداریا كانیماسێ یا سەر ب دەڤەرداریا ئامێدیێ ڤە باری و سەقایێ وێ دەڤەرێ گەلەك ساربوویە، دیسا هەتا نوكە 167 ملیمێن بارانێ ژی ل ناوچەداریا كانیماسێ بارینە.
مستەفا ئەحمەد، ژ هۆبا چاندنا ناوچەداریا كانیماسێ، بۆ رۆژناما ئەڤرۆ دیار كر، د دو رۆژێن بۆری دا پێلەكا بەفرێ دەڤەرا كانیماسێ ڤەگرتیە و د ئەنجام دا 12سم بەفرێ ل دەرگەهێ سنووریێ سەرزێری بارینە، هەروەسا چار سەنتیمەترێن بەفرێ ل سەنتەرێ ناوچەداریا كانیماسێ ژی بارینە و بەفر ل چەندین گوندێن وێ دەڤەرێ بارییە و سەقایێ وێ دەڤەرێ گەلەك ساربوویە، هەروەسا رێیا هاتنوچوونێ ژ بەفرێ هاتییە رامالین و نوكە هاتنوچوونا رێڤنگان ل دەرگەهێ نێڤدەولەتیێ سەرزێری یا ئاساییە.

دهوك، لەزگین حوقی:

بەرپرسێ تەكنیكی ل رێڤەبەریا سەخبێری و پاراستنا رێك و پران ل پارێزگەها دهۆكێ دیار كر، حەفت تیم بۆ ڕامالینا بەفرێ ل پارێزگەها دهۆكێ هاتینە پێكئینان و گۆت: «ئەڤ تیمێن ڕامالینا بەفرێ 24 دەمژمێران دێ د ئامادەباشیێ دا بن».
هەڤال عەلی، بەرپرسێ تەكنیكی ل رێڤەبەریا سەخبێری وپاراستنا رێك وپرا ل پارێزگەها دهۆكێ دیاركر.
تیمێن رامالینا بەفرێ ل كانی ماسێ و چەلكێ و سەرسنك و سیارەتیكا ومانگیش و بابلو و سێمێل بلاڤكرینە ئەڤ تیمێن رامالینا بەفرێ بەردەوام دئامادەباشێ دانە بۆ پاڤژكرنا جادەیان ونەهێلانا چیبوونا ئاستەنگێن هاتن وچوونێ ل هەمی دەڤەرێن سەر پارێزگەها دهۆكێ ڤە.