نوونەرێ بازرگانیا هەرێما كوردستانێ‌ ل بەغدا ئاشكرا كر، حوكمەتا ئیراقێ كارتا نیشتیمانی كریە بنەما بۆ چێكرنا پلێتا ئاهێن خوارنێ‌ یێن مەهانە و دبێژیت: هەر وەلاتیەكێ كارتا نیشتیمانی نەبیت، ژ ئاهێن خوارنێ‌ یێن مەهانە دێ هێتە بێ بەهركرن.
حسێن سەبری، نوونەرێ بازرگانیا هەرێمێ ل بەغدا بۆ رۆژناما ئەڤرۆ دیار كر، ئەڤە سالەكە بازرگانیا ئیراقێ فۆرمێن ئاهێن خوارنێ راگرتینە و بڕیارە ببیتە ئەلكترۆنی و گۆت: «نوكە ل پارێزگەها واست وەكی تێست چێكرنا پلێتان ب ئەلكترۆنی هاتیە دەستپێكرن و بڕیارە هەموو ئیراقێ ڤەگریت، حوكمەتێ كارتا نیشتیمانی كریە بنەما بۆ پلێتا ئاهێن خوارنێ و هەمان كۆدێ ل سەر كارتا نیشتیمانی دێ بیتە كۆدێ ئەلكترۆنی یێ ئاهێن خوارنێ‌ یێن مەهانە، لەوا هەر كەسەكێ كارتا نیشتیمانی نەبیت، ژ ئاهێن خوارنێ‌ یێن مەهانە دێ هێتە بێ بەهركرن».
حسێن سەبری گۆتژی: «ئەپلیكەیشنەك دێ هێتە دانان و ناڤێن وەلاتیان ب شێوەیێ ئەلكترۆنی دێ تێدا هێنە تۆماركرن، ئەگەر سیستەم بۆ ئەلكترۆنی ئیدی تۆماركرن و ژێبرنا ناڤان بۆ ئاهێن خوارنێ‌ یێن مەهانە، پێدڤی ب سەرەدانا فەرمانگەهێن ئاهێن خوارنێ ناكەت، بەلكو دێ وەلاتی ب شێوەیێ ئەلكترۆنی شێن مامەلەیێن خۆ بڕیڤە ببەن و سیستەمەكێ پێشكەفتیە».

هەولێر، قائید میرۆ:

پەیڤدارێ دەستەیا گشتیا گەشتوگوزارێ خویا كر، هژمارا گەشتیارێن بیانی بۆ هەرێما كوردستانێ بلندبوویە و دبێژیت: حوكمەتا هەرێمێ پلانەكا هەشت سالی بۆ ڤەژاندنا كەرتێ گەشتوگوزارێ هەیە.
ئیبراهیم عەبدولمەجید، پەیڤدارێ دەستەیا گەشتوگوزارێ بۆ رۆژناما ئەڤرۆ دیار كر، د چارچوڤێ پلانا هەشت سالیا گەشتوگوزارێ دا زێدەكرنا گەشتیارانە بۆ هەرێما كوردستانێ، ب تایبەتی گەشتیارێن بیانی و گۆت: «نوكە رێژەیا هاتنا گەشتیارێن بیانی زێدەبوویە، بەری نوكە رێژەیا هاتنا گەشتیارێن بیانی 15% بوو، بەلێ نوكە 25%ێ یا گەشتیارێن دهێنە هەرێما كوردستانێ یێن بیانینە و ل وەلاتێن جودا سەرەدانا جهێن گوزاری دكەن، زێدەبوونا هژمارا گەشتیاران ژی بۆ ڤێ چەندێ ڤەدگەڕیت، حوكمەتا هەرێما كوردستانێ ئاسانكاری بۆ هاتنا گەشتیارێن بیانی كرینە».
ئیبراهیم عەبدولمەجید گۆتژی: «نوكە گەشتیارێن بیانی بێ ڤیزا دشێن بهێنە هەرێما كوردستانێ و پشتی گەهشتنێ مامەلەیێن خۆ بڕێڤە دبەن، هەروەسا هژمارا پڕۆژەیێن گەشتیاری ژی زیدەبوویە و سەرنجا گەشتیاران راكێشایە بۆ هەرێما كوردستانێ، پلانێن حوكمەتێ بۆ كەرتێ گەشتوگوزاری و راكێشانا گەشتیاران گەلەكن».

ئامێدیێ، مەحمود نهێلی:
ب هەلكەفتا رۆژا جیهانی یا بەرهەنگاربوونا توندوتیژییا دژی ئافرەتان ل سنوورێ دەڤەردارییا ئامێدیێ چەندین چالاكی دهێنە ئەنجامدان، ژ وانا ژی: خەلاتكرنا هەژمارەكا ئافرەتێن چالاكە.
بارین حەسەن، بەرپرسا ئەنجوومەنێ ئامێدیێ یا ئێكەتیا ئافرەتێن كوردستانێ بۆ رۆژناما ئەڤرۆ دیار كر، ب هەلكەفتا روژا جیهانی یا بەرهەنگاربوونا توندوتیژیا دژی ئافرەتان ئەوان چالاكیێن خوە دەستپێكرینە و گۆت: «چالاكیێن مە بەهرا پتر ژ گێڕانا سمیناران پێك دهێن، كو ل هەموو ناوچەدارییان دێ هێنە گێڕان، زێدەباری خەلاتكرنا هەژمارەكا ئافرەتان».
هەر ب ڤێ هەلكەفتێ پەیمانگەها تەكنیكی یا ئامێدیێ ب هەماهەنگی ل گەل نڤیسینگەها ئامێدیێ یا بەرهەنگاربوونا توندوتیژیا دژی ئافرەتان و خێزانێ، روژا جیهانی یا بەرهەنگاربوونا توندوتیژیا دژی ئافرەتان ساخكر و سمینارەك ب ڤێ هەلكەفتێ ل پەیمانگەهێ پێشكێشكر.
د ڤێ سمینارێ دا بەحسێ‌ جۆر و شێوازێن توندوتیژیێ ل هەمبەری ئافرەتان هاتە كرن، هەروەسا بەحسا چاوانیا بەرهەنگاربوون و نەهێلانا توندوتیژیێ و ئەگەر و فاكتەرێن دبنە ئەگەر بۆ توندوتیژیێ هاتە كرن.

دهۆك، پەروین سەلاح:

نازم محەمەد، رێڤەبەرێ بازرگانیا دەخلودانی ل پارێزگەها دهۆكێ بۆ رۆژناما ئەڤرۆ دیار كر، گەڕا هەشتێ یا پارەیێ جۆتیارێن پارێزگەها دهۆكێ ل رۆژا 24/11/2024 گەهشتە دهۆكێ و دبێژیت: ئەڤ پارە گەهشتە بانكا ناڤەندیا ئیراقێ ل هەولێرێ و ئێكسەر هاتە ڤەگوهاستن بۆ بانكا داسنیا، ئەڤ پارە ژی بۆ سەر هژمارا هەر سێ سایلۆیێن فەیدیێ و شێخان و زاخۆ هاتە ڤەگوهاستن، گوژمێ‌ پارەی 43 ملیار دینارن، ژ وی گوژمەی ژی: 14 ملیار دینار بۆ سایلۆیا فەیدیێ نە ل بانكا گارە، حەفت ملیار بۆ سایلۆیا زاخۆنە ل بانكا خابیر و 22 ملیار بۆ سایلۆیا شێخان ل بانكا شێخان.
ناڤهاتی گوت: «هەر دوهی ل سایلۆیا فەیدیێ دەست ب بەلاڤكرنا پارەی هاتبوو كرن، پارە ژی ل دووڤ رێزبەندیا وەرگرتنا گەنمی دهێتە بەلاڤكرن و پێدڤیە هەر جۆتیارەك سەرەدانا سایلۆیێ بكەت بۆ وەرگرتنا پارەیێ خۆ، هەر جوتیارەكێ گەنمێ خوە ل 29/6/2024 هەتا 10/7/2024 رادەستی سایلۆیا فەیدیێ و شێخان و زاخۆ كری ژ وەرگرتنا وی پارەی دێ‌ مفادار بیت».
گوتژی: «وەكو دیار پارەیێ جۆتیارێن پارێزگەها دهۆكێ بۆ سالا 2024ێ (152) ملیار دیارن، هەتا نوكە 118 ملیار دینار هاتینە هنارتن و ب تنێ 34 ملیار ماینە، وەزارەتا بازرگانیا ئیراقا فیدرال سۆز دایە پارەیێ مایی ژی ب زووترین دەم ب هنێریت».

زاخۆ، دلۆڤان هالۆ:

ئەحمەد ڕەمەزان، بەرپڕسێ ڕاگەهاندنا ڕێڤەبەریا پۆلیسێن زاخۆ بۆ ڕۆژناما ئەڤرۆ دیار كر كو دوهی 26/11/2024 ل زاخۆ گەنجەكێ 37 سالی ب چەقۆیان هاتە كۆشتن.
بەرپڕسێ ڕاگەهاندنا ڕێڤەبەریا پۆلیسێن زاخۆ، ئاماژە ب وێ چەندێ ژی كر كو تاوانبار هاتیە دەستەسەركرن و ڤەكۆلین د گەل دا بەردەوامە و گۆت: «ل دەمێن داهاتی ئەگەرێن كۆشتنا وی گەنجی دێ هێنە دیاركرن».