بۆ دەمێ دو رۆژان كۆڕبەندێ ئاسایش و ئاشتیێ ل زانكۆیا ئەمریكی ل باژێرێ دهۆكێ (مێپس 2024) ب بەرهەڤبوونا سەرۆك بارزانی و چەندین سیاسەتەمەدار و كەسایەتیێن هەرێمێ و ئیراقێ و جیهانی هەروەسا 124 كەسایەتیێن ئەكادیمی ژ 40 وەلاتێن هاتە گرێدان و تێدا هەژمارەكا پانێل و ووركشۆپان ل دۆر رەوشا نوكە یا جیهانێ و رۆژهەلاتا ناڤین هاتنە پێشكێشكرن.
هشیار زێباری: رەفتارێن هندەك گرۆپان نێزیكە ئیراقێ بكێشنە دناڤ شەڕ و ناكۆكیێن دەڤەرێ دا
هشیار زێباری، ئەندامێ مەكتەبا سیاسییا پارتی د پانێلەكیدا ل كۆڕبەندێ مێپس راگەهاند» ژ ئەگەرێ رەفتارا نە بەرپرسیارانەیا چەند گرۆپ و ئالییەكێن نە دەولەتی و نە حكومی، نێزیكە ئیراقێ بكێشنە شەڕ و ناكۆكیێن دەڤەرێ، ڤێ چەندێ ژی ئەنجامێن باش بۆ نابن» .
گۆت ژی» گەندەلی گەفەكا جدییە ل بۆ وەلاتی و ب دیجیتالكرنا دارایی، دێ فاكتەرەكێ گرنك بیت بۆ روو ب رووبوونا گەەندەلیێ، هەروەسا ل ئیراقێ مە هەموو مەرجێن سەركەفتنێ یێن هەین، بەلێ مە حوكمڕانییەكا رێكوپێك نینە».
حەیدەر عەبادی: رۆژهەلاتا ناڤین ل پێشبەری گوهۆڕینێن بنەرەتی دایە
حەیدەر عەبادی سەرۆك وەزیرێن ئیراقێ یێ پێشتر ل كۆڕبەندێ مێپس گۆت» ئەڤرۆ رۆژهەلاتا ناڤین یا ل پێشبەری گوهۆڕینێن بنەرەتی دا، ئەوژی ژ ئەگەرێ وی شەڕێ ل دەڤەرێ هەی و ئەنجامێ جیۆ – سیاسیێ هەی و ئیراق ژی پشكەكە ژێ».
گۆت ژی» ستراتیژییا نوو بۆ ئیدارەیا ئەمریكی دێ هێتە پێش كو دێ كاریگەری ل سەر مە ژی هەبیت، هەروەسا دزانین ژی ململانێ ل رۆژهەلاتا ناڤین و ئۆكرانیا و ئاسیا یا هەی كو كاریگەرییەكا تمام ل سەر هەموو جیهانێ هەبوو».
خەمیس خەنجەر: ئیراق بەردەوام دەڤەرا دروستبوونا قەیران و ئاستەنگ و كێشەیایە
خەمیس خەنجەر، سەرۆكێ هەڤپەیمانییا سیادە ل كۆڕبەندێ مێپس یێ پێنجی ل دهۆكێ راگەهاند، رەوشا تەناهیێ یا خراب یا رۆژهەلاتا ناڤین، ئاستەنگ و دیاربوونا داعشێ، ئەگەرن بۆ تێكچوونا سەقامگیرییا هەموو دەڤەرا رۆژهەلاتا ناڤین، ئەو بابەت گرنگترین بابەتن كو د ڤی كۆڕبەندیدا ئاخڤتن ل سەر هاتیە كرن.
خەمیس خەنجەر گۆت ژی» نابیت ئەم پێكڤە رەفتارێ ل گەل هەموو وان بابەتێن مە باس لێكری بكەین، بەلكو پێدڤییە روونین و ئێك ئێكە دانوستاندنێ ل سەر بكەین، هەروەسا دەولەت بەرپرسا ئێكێیە ژ بەلاڤكرنا سیاسەتا رۆژهەلاتا ناڤین، لەوما دەولەت نەشێت پێشڤەبرنێ دابین بكەت، هەكە سامانی و دەستهەلاتێ دابەش نەكەت، هەروەسا نابیت ب چاڤێ رەخنەگرانە بنێرینە رەوشا جیۆ- سیاسی».
گۆت ژی» ئیراق بەردەوام دەڤەرا دروستبوونا قەیران و ئاستەنگ و كێشەیان بوو، دبیت دیاركرنا كێشەیان یا ب ساناهی نابیت، كو بووینە ئەگەرێ ژ دەستدانا سەقامگیریێ، هیچ پێدڤی ناكەت ئەم روونین ئاخڤتنان دوبارە بكەین، پێدڤییە ئەم ب كریار پێنگاڤان ب هاڤێژین، ل ڤێ دەڤەرێ ژ دەستدانا دیموكراسییەتێ، مە گەندەلی هەبوو، نەبوونا سیستەمێ دادوەری هەبوو و مە لاوازییا دەزگەهێن دەولەتێ مە هەبوو».
خویاكر ژی» هەموو یێن مە باس كرین، دبیت كارڤەدانێن كێشەیەكا كوورتر بن، كو پێك دهێت ژ كێشەیا هەرێمایەتی، ب تایبەت پشتی شەڕێ جیهانیێ دویێ و ژناڤچوونا دەولەتا عوسمانی».
رێبەر ئەحمەد: ب كارئینانا ئاخا ئیراقێ ژ ئالیێ گرۆپێن چەكدار ڤە رەت دكەین
رێبەر ئەحمەد، وەزیرێ ناڤخوە ل هەرێما كوردستانێ د چارچۆڤەیێ پانێلەكێ كۆڕبەندێ مێپس ل دهۆكێ، راگەهاند ب كارئینانا ئاخا ئیراقێ ژ ئالیێ گرۆپێن چەكدار ڤە رەت دكەین، ب تایبەتی هند ژ وان دژی بەرژەوەندییا ئیراقێ كار دكەن.
رێبەر ئەحمەد گۆت» د دەمێ بۆریدا مە دو لیوایێن هەڤپشك ژ پێشمەرگەی و لەشكرێ ئیراقێ پێكئینان و هەروەسا مە كارێ باش یێ ئەنجامدای و ئۆپەراسیۆنێن هەڤپشك ژی مە ل وان دەڤەرێ ڤالاتییا ئەمنی تێدا هەی، یێن كرین».
دیاركر ژی» ل باشوورێ كەركووكێ ڤالاتییا ئەمنی یا مەزن د ناڤبەرا لەشكرێ ئیراقێ و پێشمەرگەی دا یا هەی، ئەو ئاماژە ژی دبێژنە مە، كو دڤێت هەماهەنگی د ناڤبەرا بەغدا و هەرێمێ و جڤاكێ نێڤدولەتیدا هەبیت. دبیت ژی جارەكا دی پەیوەندیێن خوە ل گەل جڤاكێ نێڤدەولەتی رێك بێخین، نەشێین ب تنێ روو ب روویێ تیرۆرێ ببین، چونكە تیرۆر تنێ ل ئیراقێ نینە، بەلكو ل سووریێ و ل هندەك وەلاتێن دی ژی یا هەی».
شیرەتكارێ ئاسایشا نیشتمانییا ئیراقێ: هەرێما كوردستانێ نموونەیا پێكڤەژیانێ و لێبۆرینێیە
قاسم ئەعرەجی، شیرەتكارێ ئاسایشا نیشتمانییا ئیراقێ د پانێلەكێ كۆڕبەندێ مێپس ل دهۆكێ راگەهاند» هەرێما كوردستانێ ل 1991 هاتە پێكئینان و بوو پەناگەها سەركردەیێن ئیراقێ، هەروەسا دشێم بێژم هەرێما كوردستانێ نموونەیا پێكڤەژیانێ و لێبۆرینێ بوو، ئەڤێ چەندێ ژی كاریگەرییا ئەرێنی ل سەر ئیراقێ هەبوو».
گۆت ژی» د رەوشا نوكە یا ئیراقێ دا جهێ گۆتارا تائیفی نابیت» ئاشكرا كر ژی» ژ سالا 2022 هەتا 2024 مەزنترین پڕۆسەیا زڤراندنا كەسوكارێن داعشێ ژ كەمپا هۆل ل سووریێ بۆ ئیراقێ هاتە ئەنجامدان».
سەرۆكێ جڤاتا نوونەرێن ئیراقێ: گوهۆڕین ب سەر نەخشەیێ رۆژهەلاتا ناڤین دا یێ هاتی
د. مەحمود مەشهەدانی، سەرۆكێ جڤاتا نوونەرێن ئیراقێ د چارچۆڤەیێ كۆڕبەندێ (مێپس) گۆت» گوهۆڕین ب سەر نەخشەیێ رۆژهەلاتا ناڤین دا یێن هاتین، گرێیا ئالۆزییان ل وان جهێن كو هەبوون بەر ب دەڤەرێن دی بەرفرەهبوویە، د هەمان دەمدا رێككەفتنێن كەڤن گرنگی پێ ناهێتە دان».
گۆت ژی» دۆنالد ترەمپ، ل نێزیك دێ دەمێ سەرۆكایەتییا وی دەستپێكەت و دڤێت بزاڤێن سیاسی هەبن، هەروەسا ئەم ژی خوە ژ وان كێشە و قەیرانان دوور بگرین».
قۆنسلێ ئەمریكا ل هەولێرێ: پلانا حوكمەتا هەرێمێ بۆ بەرهنگاربوونا گەندەلیێ یا گرنگە بۆ پێشڤەبرنا ئابووری
ستیف بیتنەر، قۆنسلێ گشتیێ ئەمریكا ل هەولێرێ، ل كۆڕبەندێ (مێپس) گۆت» د دەمێ 20 سالێن بۆریدا پەیوەندیێن ئەمریكا و ئیراقێ زێدەتر پشتبەستن ب رەوشا ئەمنی ڤە كریە، بەلێ ل گەل هاتنا ئەلینا رۆمانووسكی وەكو بالیۆزا ئەمریكا ل بەغدا، دو سال و نیڤان بەری نوكە بزاڤكر سەرنجا وێ ل سەر ئالیێ ئابووری ژی بیت».
گۆت ژی» مە چار رەشنڤیسێن تێكگەهشتنێ ل گەل ئیراقێ هەبوون سەبارەت پشتبەستنێ ب وزەیا وەلاتێن دەوروبەر».
دیاركر « دخوازین وەبەرئێنانا ئابوورییا ئەمریكی ل ئیراقێ یا سەركەفتی بیت و مفا بۆ سەقامگیریێ هەبیت، سەركەفتنا ڤێ پڕۆسەیێ پێدڤی ب سەقامگیریێ یا هەی، بەلێ بۆ وێ سەركەفتنێ پێدڤییە ئیراق ژینگەها وەبەرئێنانێ پەیدا بكەت، ژ وان ژی پێشڤەبرنا زەلالیێ و بەرهنگاربوونا گەندەلیێ و حوكمێ قانوونێ».
ئاماژەكر ژی» دزانم حوكمەتا هەرێما كوردستانێ پلان بۆ بەرهنگاربوونا گەندەلیێ یا هەی، ئەڤە گەلەك یا گرنگە بۆ دوبارە ئاڤاكرنا باوەریێ، هەروەسا پێشڤەبرنا ئابووری».
پیتەر گالبرێت: حوكمەتا هەرێمێ د پرسا ئێزدییاندا گەلەك یا هاریكار بوو ل گەل مە
پیتەر گالبرێت، دبلۆماتكارێ ئەمریكی یێ بەرێ د كڤانیچ پانێلەكێ كۆڕبەندی دا گۆت» سوپاس بۆ هاریكاری و پشتەڤانییا مەسرور بارزانی، سەرۆكێ حوكمەتا هەرێما كوردستانێ، پرسا ئێزدییان، بابەتەكێ مرۆڤایەتییە، حوكمەتا هەرێمێ گۆتە مە دێ هاریكارییا هەوە كەین، وان ترۆمبێل وئێمناهی دابینكر و مۆلەتدا، لەوما دشێم بێژم نێزیكی 20 دایكێن ئێزدی ل گەل نێزیكی 30 زارۆیان ب دیدارا هەڤدو شاد بوون».
گۆت ژی» مخابن ئەڤە تراژیدییەكا راستەقینەیە چونكە دڤێت بزڤرن بۆ ناڤ جڤاكێ خوە، ئەو شاشییا وان نینە كو هاتینە رەڤاندن، ئەو شاشییا وان نینە كو دەستدرێژی ل سەر هاتیە كرن».
فەرهاد ئەترووشی: فیدرالی ل ئیراقێ تنێ درووشمە
فەرهاد ئەترووشی، ئەندامێ بەرێ یێ جڤاتا نوونەرێن ئیراقێ ژ فراكسیۆنا پارتی و پارێزگەرێ دهۆكێ یێ بەری د چارچۆڤەیێ پانێلەكیدا ل كۆڕبەندێ مێپس گۆت» حوكمەتا ئیراقێ بۆ بجهئینانا مادەیێ 140 یێ دستووری، یا خەمسارە، چونكە كاری ب دستووری ناكەت».
رۆهنكر ژی» دیاركرنا سنووران بابەتەكێ دستوورییە و ب رێكا مادەیا 140 ئەو بابەتە دێ هێتە رێكخستن و ئێكلاكرن».
ئەترووشی ئاماژەكر» دروستكرنا گرۆپێن چەكدار ل ئیراقێ كو گەفێ ل ئاسایشا وەلاتی دكەت، بەرۆڤاژی دستوور و قانوونێن كارپێكریە».
دوپاتكر ژی» ئیراق رۆژ ب رۆژ و ب شێوازێن جودا جودا دخوازیت هەرێما كوردستانێ وەكو تاكە هەرێما فیدرالی ل ئیراقێ لاواز بكەت».

دانا عەبدولكەریم، وەزیرێ ئاڤەدانكرن و ئاكنجیكرنێ ل حوكمەتا هەرێما كوردستانێ‌ دوهی 24/11/2024 سەرا پارێزگەها دهۆكێ دا و ژ لایێ د. عەلی تەتەر، پارێزگارێ دهۆكێ پێشوازی لێ هاتە كرن و د هەڤدیتنەكێ دا ب ئامادەبوونا چەندین رێڤەبەرێن گشتی بەحسێ كار و پڕۆژەیێن وەزارەتا ئاڤەدانكرنێ د بیاڤێ رێك و پران و ئاكنجیبوونێ دا، نەخاسمە چێكرن و سەخبێركرنا رێكێن سەرەكی د ناڤبەر پارێزگەهێن هەرێمێ و سەنتەرێ پارێزگەهان و دەڤەرداری و ناوچەداریان دا هاتە كرن.
وەزیرێ ئاڤەدانكرن و ئاكنجیكرنێ د كۆنگرەكێ‌ رۆژنامەڤانی دا دیار كر، ل سەر دەمێ كابینەیا نەهێ یا حكومەتا هەرێما كوردستانێ پتری 549 پڕۆژەیێن رێك و پران و ئاكنجیبوونێ، ب گوژمێ ئێك ترلیۆن دیناران كەفتینە د وارێ بجهئینانێ دا، هندەك ب دووماهی هاتینە و كار ل سەر یێن دی بەردەوامە و گۆت: «د سالا نوو ژی دا پڕۆژە دێ د بەردەوام بن و ئەم دخوازین پارێزگەها دهۆكێ هاریكاربیت بۆ بجهئینانا بەرنامێن وەزارەتێ».
پارێزگارێ دهۆكێ گرنگیا رێك و پران بۆ خەلكێ پارێزگەهێ بەرچاڤكر و گۆت «80% ژ بودجا پارێزگەها دهۆكێ بۆ چێكرنا رێك و پران هاتیە تەرخانكرن و پشتەڤانیا پارێزگەهێ بۆ هەر هاریكاریەكێ دیاركر».
دیسا هەر دوهی 24/11/2024 د. عەلی تەتەر، پارێزگارێ دهۆكێ پێشوازی ل رۆدوو بۆتۆن، نوونەرێ نوو یێ ئێكەتیا ئەورپا ل هەرێما كوردستانێ كر و د هەڤدیتنەكێ دا بەحسێ رەوشا دەڤەرێ و پەیوەندیێن هەرێما كوردستانێ ل گەل ئێكەتیا ئەورۆپی و ئەو پشتەڤانیا ئێكەتیا ئەورۆپی د بیاڤێ‌ سیاسی و كارگێری و دارایی دا پێشكێشی هەرێما كوردستانێ و پارێزگەها دهۆكێ دكەت؛ هاتە كرن.
دیسا هەر دوهی د. عەلی تەتەر، پارێزگارێ دهۆكێ پێشوازی ل میكیلی كامیروتا، قونسلێ گشتی یێ وەلاتێ ئیتالیا ل هەرێما كوردستانێ كر.

رێڤەبەرێ گشتیێ ساخلەمیا پارێزگەها دهۆكێ دیار كر، دەزگەهێ خێرخوازیێ بارزانی و رێكخراوا مەین یا نەرویجی هەڤكاریا سەنتەرێ نەخوشیا شەكرێ یێ‌ سەر ب رێڤەبەریا گشتیا ساخلەمیا پارێزگەها دهۆكێ كرن.
د. ئەفراسیاب موسا، رێڤەبەرێ گشتیێ ساخلەمیا پارێزگەها دهۆكێ بۆ ئەڤرۆ ئاشكرا كر، 34 هزار نەخۆش ل سەنتەرێ دهۆك یێ نەخوشیا شەكرێ هاتنیە توماركرن و گۆت: «دوهی 24/11/2024 دەزگەهێ خێرخوازیێ بارزانی و رێكخراوا مەین یا نەرویجی 54 هزار دەرزیێن ئنسۆلێنێ‌ رادەستی ساخلەمیا دهۆكێ كرن و بێ بەرامبەر ل سەر نەخوشان دێ‌ هێنە بەلاڤكرن».

شڤان عەبدی، بەرپرسێ ڕاگەهاندنا ئیدارەیا سەربخوە یا زاخۆ بۆ ڕۆژناما ئەڤرۆ دیار كر، گوهدار شێخۆ، سەرپەرشتێ ئیدارەیا سەربخوە یا زاخۆ پێشوازی ل دەیڤد تافۆری، سەرۆكێ ئەنجوومەنێ بارزگانیا ئەمریكا ـ كوردستانێ‌ و شاندێ د گەل دا كر.
بەرپڕسێ ڕاگەهاندنا ئیدارەیا سەربخوە یا زاخۆ خویا ژی كر، د هەڤدیتنەكێ دا بەحس ل گرنگییا باژێرێ زاخۆ هاتە كرن، كو باژێرەكێ ستراتیژی و سنووری یێ گرنگە و ل گەل سێ وەلاتان گرێدایی یە، باژێرەكێ بازرگانی و گەشتیاری و چاندنێ و هونەری و شوونواری یە. دەیڤد تافۆری، خوەشحالییا خوە بۆ ڤێ سەرەدانێ‌ دەربڕی و گۆت:»كوردستان وەلاتەكێ جوانێ خوەزایی و بازرگانییە و زاخۆ ژی باژێڕەكێ گەلەك جوان و پاقژە».

هەولێر، قائید میرۆ:

سەرپەرشتیارێ بجهئینانا سەرژمێریێ ل هەرێما كوردستانێ ئاشكرا كر، ل دووماهیا ڤێ مەهێ‌ قووناغا سێیێ یا سەرژمێریێ دێ‌ هێتە كرن و پێدڤیە ئەندامەكێ خێزانێ بەرهەڤ بیت بۆ پڕكرنا فۆرما زانیاریان.
مەحموود عوسمان، سەرپەرشتیارێ سەرژمێریێ ل هەرێما كوردستانێ بۆ رۆژناما ئەڤرۆ دیار كر، دەرگەهێن هۆلێن راهێنانێ بۆ راهێنانا بژمێران دێ‌ هێنە ڤەكرن و بۆ دەمێ پێنج رۆژان دێ راهێنانێ كەن و گۆت: «رۆژا 30ی ڤێ‌ مەهێ‌ قووناغا سێیێ یا سەرژمێریێ ل سەرانسەری هەرێما كوردستانێ دێ بڕێڤەچیت و 30 هزار كارمەند دێ ل سەر هەموو دەڤەران هێنە بەلاڤكرن بۆ تۆماركرنا وان زانیاریێن پێدڤی یێن هاتینە دیاركرن بۆ سەرژمێریا گشتی».
گوتژی: «قووناغا سێیێ یا سەرژمێریێ ب ۆتۆماركرنا هووركاریانە و پێدڤیە‌ سەرۆك خێزان یان ئەندامەكێ خێزانێ بەرهەڤبیت و ل مال بیت، هەتا بشێت هاریكاریا تیمێن سەرژمێریێ بكەت و زانیاریان بدەتێ‌ و بەرسیڤا هووركاریێن د ناڤا فۆرما سەرژمێریێ دا بدەت».

ئامێدیێ‌، مەحمود نهێلی:

ژ بۆ پتر گرنگیدان ب كەرتێ‌ گەشتوگوزاری و راكێشانا گەشتیاران بۆ دەڤەرا ئامێدیێ‌، رازیبوون ل سەر هەژمارەكا پڕۆژەیێن گەشتیاری ل دەڤەرا ئامێدیێ‌ هاتیە كرن، ژ وان ژی چێكرنا پرەكا شیشەیی یە ل سوولاڤێ‌.
ئەندازیار ئەڤراز حەسەن، سەرۆكێ‌ باژێرڤانیا ئامێدیێ‌ بۆ رۆژناما ئەڤرۆ دیار كر، چێكرنا ڤێ‌ پرا شیشەی ل سنوورێ‌ دەڤەرداریا ئامێدیێ‌، دێ‌ بیتە ئەگەر پتر گەشتیار سەرەدانا دەڤەرێ‌ بكەن و پر دكەڤیتە سوولاڤێ‌ و گۆت: «رازیبوون ل سەر چێكرنا ڤی پرۆژەی هاتیە كرن و پارێزگارێ‌ دهۆكێ‌ بەرێ‌ بنیاتی بۆ دانایە و ب گوژمێ‌ ملیارەك و 740 ملیار دیناران دێ‌ هێتە چێكرن».
ناڤهاتی گۆتژی: «ئەڤ پرا شیشەی دكەڤیتە سەر جاددەیا سەرەكی یا ئامێدیێ‌ ل هنداڤی سوولاڤێ‌ و گۆت: «مەرەم ژ چێكرنا ڤێ‌ پرێ‌ بۆ جوانیا وی جهی پتر راكێشانا گەشتیارانە بۆ دەڤەرێ‌«.