سەرۆكێ دەستەیا وەبەرهێنانێ ل هەرێما كوردستانێ دیار كر، ئێك ژ كارێن دەستپێكی یێن وان، ئینانا زۆرترین وەبەرهێنەرێن بیانییە، كو بهێن پڕۆژەیێن وەبەرهێنانێ ل هەرێما كوردستانێ ئەنجام بدەن.
د. محەمەد شوكری، زێدەتر بۆ رۆژناما ئەڤرۆ دیار كر، ئێك ژ كارێن كابینەیا نەهێ یا حكومەتا هەرێما كوردستانێ، كو گەلەك ب رژدی كار ل سەر هاتیە كرن، ئینانا وەبەرهێنەرێن بیانییە بۆ هەرێما كوردستانێ، ژبەركو هەرێما كوردستانێ پێدڤی ب سەرمایەی هەیە و ژێرخانەكا گەلەك باش ژی هەیە و گۆت: «مە پێدڤیێن دەستپێكی هەنە و وەبەرهێنەرێن بیانی دشێن بهێنە هەرێمێ و كار تێدا بكەن، ئەم ژی وەكو حكومەتا هەرێمێ دێ هەموو ئاسانكارییان بۆ كەین، دیسا هەتا نوكە ئەم شییاینە هژمارەكا باش یا وەبەرهێنەرێن بیانی بینینە هەرێما كوردستانێ و پڕۆژێن وەبەرهێنانێ ئەنجام بدەن».
ناڤهاتی گۆتژی: «نوكە ئەم دشێین پتر وەبەرهێنەران رابكێشینە هەرێما كوردستانێ، بۆ ڤێ مەرەمێ ژی مە بەرهەڤیێن گەلەك باش كرینە، ئەم بەردەوام ژی ل گەل وان ل سەر خەتین بۆ هندێ ئەو وەبەرهێنەرە بهێنە كوردستانێ و كارێن وەبەرهێنانێ بكەن و پتر ژی د بیاڤێن چاندنێ، پیشەسازی، گەشتوگوزار و تەكنەلۆژیایێ دا كار دكەن».
د. محەمەد شوكری زێدەتر گۆت: «سیستەمێ پێشكەڤتی یێ بانكی ل هەرێما كوردستانێ و ب ئەلكترۆنیكرنا مامەلەیان بۆ برێڤەبرنا كاروبارێن وەبەرهێنەران بۆ پڕۆژەیان، بوویە ئەگەر پتر وەبەرهێنەرێن بیانی بهێنە هەرێما كوردستانێ‌، نوكە ل هەرێما كوردستانێ نێزیكی 50 پڕۆژەیان ب سەرمایەیێ پتری 10 ملیار دۆلاران ژ لایێ وەبەرهێنەرێن بیانی و وەلاتیێن عەرەبی و ئورۆپی و وەلاتێن دیتر یێن جیهانی ل هەرێما كوردستانێ دهێنە ئەنجامدان».

رێڤەبەرێ ئامارا پارێزگەها دهۆكێ راگەهاند، پێشوەخت بەرهەڤیێن سەرژمێریێ هاتینە كرن و دبێژیت: ل رۆژێن 17 و 18 و 19ی ڤێ‌ مەهێ‌ بژمێرێن سەرژمێریا گشتی دێ دەست ب كاربن و زانیاریان ژ خەلكی وەرگرن.
چیاڤان عەبدولرەزاق، رێڤەبەرێ ئامارا پارێزگەها دهۆكێ بۆ ئەڤرۆ خویا كر، بژمێرێن سەرژمێریا گشتی د ناڤ تاخ و كۆلانان مال ب مال دێ چن و گۆت: «ئەم دخوازین هەمی خەلكێ دهۆكێ ل رۆژێن 20 و 21ێ مەهێ‌ دبەرهەڤ بن، چونكو دەمێ ژڤانێ‌ تۆماركرنێ ب دووماهی بهێت، ئەم نەشێین كەسێ تۆمار بكەین، ب تنێ دێ زانیاریێن زێدەتر ژ خەلكی هێنە وەرگرتن».
گۆتژی: «ئاكنجیێن دهۆكێ‌ و ئاوارە ل دهۆكێ‌ دێ هێنە تۆماركرن، كار هاتیە كرن پرۆسێسا سەرژمێریێ‌ ل دهۆكێ گەلەك ب باشی بهێتە كرن، دوهی 17/11/2024 زانیاریێن دەستپێكی ژ خەلكی هاتنە وەرگرتن، د هەردو رۆژێن قەدەغەیا هاتنوچوونێ دا دێ بژمێر سەرەدانا مالان كەن».

د ئۆپەراسیۆنەكا سێ شەڤی دا، هێزێن بنگەهێ نەهێلانا ماددەیێن هۆشبەر ل پارێزگەها دهۆكێ شیان گرۆپەكێ مەزنێ بازرگانیكرنێ‌ ب ماددەیێن هۆشبەر دەستەسەر بكەن.
ل دووڤ زانیاریان دەمێ سێ شەڤانبوو هێزێن بنگەهێ نەهێلانا ماددەیێن هۆشبەر سەرەداڤێن گرۆپەكێ مەزن و ب ترس یێ كڕین و فرۆتنا ماددەیێن هۆشبەر ب دەستكەفتین و شەڤا دی شیان هەمی ئەندامێن ئەوی گرۆپی ب تەمامی بگرن.
كارێ سەرەكی یێ‌ وی گرۆپێ ب ترس ئینان و فرۆتنا ماددەیێن هۆشبەربوو ل سەر تەخا گەنجان، لێ‌ شەڤا دی ل سەنتەرێ باژێرێ دهۆكێ هاتنە گرتن.
بەری حەفتیەكێ ژی د ئۆپەراسیۆنەكێ دا، هێزێن هەمان بنگەهـ شیان مەزنە بازرگانەكێ ماددەیێن هۆشبەر ل دەوروبەرێن باژێرێ دهۆكێ بگرن.

هەولێر، قائید میرۆ:

جێگرێ سەرۆكێ ئێكەتیا وەبەرهێنەرێن كوردستانێ دیار كر، د كابینەیا داهاتی یا حوكمەتا هەرێما كوردستانێ‌ دا چەندین پڕۆژەیێن ستراتیژی هاتینە بەرهەڤكرن و بڕیارە بهێنە ئەنجامدان، ب تایبەتی گەشەپێدانا كەرتێ پیشەسازی و وەبەرهێنانێ.
كەمال ئاغا گەردی، جێگرێ سەرۆكێ ئێكەتیا وەبەرهێنەرێن كوردستانێ بۆ رۆژناما ئەڤرۆ خویا كر، چەندین پڕۆژەیێن ستراتیژی هاتینە بەرهەڤكرن و بڕیارە پشتی دەست ب كاربوونا كابینا دەهێ ل سەر دەستێ مەسرور بارزانی بهێنە ئەنجامدان و گۆت: «ئەو پڕۆژە دێ بنە ئەگەرێ زێدەتر پێشڤەبرنا ژێرخانا ئابووری یا هەرێما كوردستانێ و خۆمالیكرنا بەرهەمێ نوكە ل بازاڕی هەیە، ڤان سالێن دوماهیێ هژمارەكا كارگەهێن جوراوجۆر هاتینە دامەزراندن و چەندین كارگەهێن دیژی د پلاندانە، پشتی تەمامبوونێ ژی هەرێما كوردستانێ دێ كێمتر پێدڤی ب بەرهەمێ دەرڤە هەبیت».
كەمال ئاغا گەردی گۆتژی: «ل چەند سالێن بۆری حوكمەتا هەرێما كوردستانێ گرنگیەكا زۆر ب كەرتێ وەبەرهێنانێ دایە، ب تایبەتی كەرتێ پیشەسازی و بازرگانی پێشكەفتنێن بەرچاڤ ب خۆڤە دیتنە، ئەڤە ژی بوویە ئەگەرێ زەنگینكرنا ژێرخانا ئابووریا هەرێما كوردستانێ و زێدەكرنا بەرهەمی و دەلیڤەیێن كاری».

رەمەزان زەكەریا:

پیشەسازیا ئاكرێ د ناڤ سەنتەرێ باژێری دا دێ‌ هێتە ڤەگوهاستن و جهێ وێ دێ‌ بیتە پاركەكا سەردەمیانە.
د. دلاوەر بۆزۆ، دەڤەردارێ ئاكرێ بۆ ئەڤرۆ گۆت: «رێكارێن ڤەگوهاستنا پیشەسازیا ئاكرێ د ناڤ سەنتەرێ باژێری دا بۆ ئالەڕەشێ ل دەرڤەی ئاكرێ دبەردەوامن و چەندین قووناغ هاتینە بجهئینان».
ناڤبری گۆتژی: «رووبەرێ ئەو ئەردێ پێدڤی ل دەرڤەی باژێری ببیتە پیشەسازیا نوو یا ئاكرێ هاتیە دیاركرن، كو دكەڤیتە ئالەڕەشێ، قەرەبوویا خودانێن ئەردی دێ‌ هێتە كرن».