دوهی چارشەمبی 13/11/2024، ل سەلاحەدین سەرۆك مەسعود بارزانی پێشوازی ل فەخری كەریم، سەرۆكێ دەزگەهێ ئەلمەدا بۆ رەوشەنبیری و راگەهاندنێ كر.
د دیدارەكێدا، وەكو د بەیاننامەیا بارەگەهێ بارزانیدا هاتی» سەرۆكێ دەزگەهێ ئەلمەدا بۆ رەوشەنبیری و راگەهاندنێ پیرۆزباهییا سەركەفتنا هەلبژارتنێن پەرلەمانێ كوردستانێ و پشكدارییا بەرچاڤ یا هەڤوەلاتییان د وان هەلبژارتناندا ل سەرۆك بارزانی كر و هیڤی خواست ئەنجامێن وان هەلبژارتنان د خزمەتا سەقامگیریێ و ڤەژاندنا هەرێما كوردستانێ دا بیت».
هەر د وێ دیدارێدا بیر و بۆچوون ل دۆر رەوشا سیاسییا ئیراقێ و پێشهاتێن دەڤەرێ هاتنە لێكگوهارتن.

سەرۆكایەتییا هەرێما كوردستانێ راگەهاند، د كۆمبوونا دناڤبەرا نێچیرڤان بارزانی و سۆدانی دوپاتی ل پێكئینانا حوكمەتا نوو یا هەرێما كوردستانێ، دۆسێیێن هەڤپشكێن دناڤبەرا بەغدا و هەولێرێدا و رەوشا دەڤەرێ كر.
سەرۆكایەتییا هەرێما كوردستانێ بەیاننامەیەك ل دۆر كۆمبوونا نێچیرڤان بارزانی، سەرۆكێ هەرێما كوردستانێ و محەمەد شیاع سۆدانی، سەرۆك وەزیرێن ئیراقێ ل هەولێرێ بەلاڤكر.
د بەیاننامەیا سەرۆكایەتییا هەرێما كوردستانێدا هاتیە» د كۆمبوونێدا ئەنجامێن هەلبژارتنێن خولا شەشێ یا پەرلەمانێ كوردستانێ، پەیوەندیێن هەولێر – بەغدا، هەروەسا رەوشا وەلاتی و دوماهی پێشهاتێن دەڤەرێ، هاتن باسكرن».
هەروەسا د بەیاننامەیێدا هاتیە» سەرۆك وەزیرێن ئیراقێ محەمەدج شیاع سۆدانی، پیرۆزباهی ل هەرێما كوردستانێ كر بۆ سەركەفتنا هەلبژارتنێن پەرلەمانێ كوردستانێ و پشكدارییا بەرفرهە یا هەڤوەلاتیێن هەرێما كوردستانێ د پڕۆسەیا هەلبژارتناندا بلند هەلسەنكاند كو نیشانا هشیارییا سیاسییا گەلێ كوردستانێیە و پێگیربوونە ب پڕۆسەیا دیموكراسی».
سەرۆكایەتییا هەرێما كوردستانێ د بەیاننامەیا خوەدا دیاركر» هەردو ئالییان دوپاتی ل سەر گرنگییا ب هێزكرنا میكانیزمێن هەماهەنگیییا هەڤپشك و پێدڤییا چارەسەركرنا دۆسێیێن هەڤپشك د ناڤبەرا هەولێرێ و بەغدا ب رێكا دیالۆگا ئاڤاكەر و پێگیریبوون ب دستوورێ ئیراقێ كر. هەروەسا د هەڤڕا بوون ل سەر گرنگییا بەردەوامبوونا دانوستاندنێ بۆ ب هێزكرنا هاریكاریێ و پێشڤەبرنا پەیوەندییان د ناڤبەرا واندا».
سەرۆكایەتییا هەرێما كوردستانێ گۆت ژی» ژ ئالیێ خوەڤە، پشتگیرییا سەرۆك وەزیرێن ئیراقێ سۆدانی و ئالیێن پەیوەندیدارێن ئیراقێ كر بۆ سەرئێخستنا هەلبژارتنێن پەرلەمانێ كوردستانێ و دوپاتی ل سەر گرنگییا ب هێزكرنا هاریكارییێ د ناڤبەرا هەولێرێ و بەغدا ل قۆناغا داهاتیدا كر».
د تەوەرەكێ دی یێ كۆمبوونێدا، ب گۆڕەی سەرۆكایەتییا هەرێما كوردستانێ» پێشهاتێن رۆژهەلاتا ناڤین و كاریگەریێن وێ ل سەر ئیراقێ هاتانە گەنگەشەكرن. سەبارەت ڤێ چەندێ هەردو ئالییان دوپاتی ل سەر پێدڤییا دوورئێخستنا وەلاتی ژ ڤەرێژێن ململانێیا هەرێمی و كارێ هەڤپشك بۆ پاراستنا ئاسایشێ و سەقامگیریێ كر».
پەیوەندیێن ئیراقێ و هەرێما كوردستانێ ل گەل وەلاتێن دەوربەر و دەڤەرێ و چاوانییا پیشڤەبرنا وان ئالییەكێ دی كۆمبوونێ بوو.

دوهی چارشەمبی 3/11/2024، مەسرور بارزانی، سەرۆكێ حوكمەتا هەرێما كوردستانێ ل فرۆكخانەیا نێڤدەولەتییا هەولێرێ، پێشوازی ل سەرۆك وەزیرێن ئیراقا فیدرال محەمەد شیاع سۆدانی كر.
پێشەوا هەورامانی، پەیڤدارێ حوكمەتا هەرێما كوردستانێ، گۆت» گرنگییا سەرۆك وەزیرێن ئیراقێ بۆ چارەكرنا كێشەیان ل گەل حوكمەتا هەرێما كوردستانێ پێنگاڤەكا باشە، هەروەسا رۆلێ سەرۆك وەزیرێن ئیراقێ ب شێوەیەكێ بوو هەكە كێشە ژی هەموو نەهاتبنە چارەسەركرن، هێشتا دەرگەهێ دانوستاندنێ نەهاتیە دائێخستن».
پەیڤدارێ حوكمەتا هەرێما كوردستانێ ئاماژە ب وێ چەندێ ژی كر» هاتنوچوون و دانوستاندنێن بەردەوام دناڤبەرا سەرۆكێ حوكمەتا هەرێما كوردستانێ و سەرۆك وەزیرێن ئیراقێ هەبوون، لەوما هاتنا وی پێنگاڤەكا ئەرێنییە».
گۆت ژی» د كۆمبوونێدا، كۆمەكا بابەتان هاتنە باسكرن، هەروەسا مەسرور بارزانی، سەرۆكێ حوكمەتا هەرێما كوردستانێ ب سەرۆك وەزیرێن ئیراقێ گۆت، دڤێت بابەتێ مووچەی ژ هەموو كێشەیێن دی بهێتە جوداكرن».
باس ل وێ چەندێ ژی كر» 6 لادۆلار بۆ تێچوویێ بەرهەمئینان و ڤەگوهاستنا پەترۆلێ، هەروەسا سەرۆكێ حوكمەتا هەرێما كوردستانێ دخواز ژ سەرۆك وەزیرێن ئیراقا فیدرال كر، ئالیێ سیێ كو ل جڤاتا وەزیران بڕیار ل سەر هاتیە دان بهێتە د ناڤ دانوستاندناندا، بۆ وێ چەندێ ئەو رۆهن بكەن كو تێچویێ ڤەگوهاستن و بەرهەمئینانا پەترۆلێ چەندە».
هەروەسا گۆت ژی» ئەو ئالییە زوو بهێتە دیاركرن و دەستبكار بیت تاكو كارێن خوە ل زەڤیێن پەترۆلی یێن هەرێما كوردستانێ بكەن».
پێشەوا هەورامانێ، پەیڤدارێ حوكمەتا هەرێما كوردستانێ دیاركر ژی» مەسرور بارزانی، سەرۆكێ حوكمەتا هەرێما كوردستانێ دیاركر ژی كو راگرتنا پەترۆلا هەرێما كوردستانێ زیان ب گەنجینەیا ئیراقێ یا گەهاندی، كو ژ ئەگەرێ راگرتنا هنارتنا پەترۆلا هەرێما كوردستانێ 21 ملیار دۆلار زیان یێن گەهشتینە ئیراقێ».
پەیڤدارێ حوكمەتا هەرێما كوردستانێ راگەهاند ژی» سەرۆك وەزیرێن ئیراقا فیدرال تێكگەهشتن بۆ بابەتان هەبوو، لەوما ئەم د گەشبینین كو ئەڤێ كۆمبوونێ دێ ئەنجامێن باش بۆ هەبن».
پێشەوا هەورامانی دوپاتكر ژی» سەرۆك وەزیرێن ئیراقێ پشتڕاستی دا كو هەرێما كوردستانێ دێ پشكەك بیت ژ راستڤەكرنا بودجەی، كو ئەڤە ل سەر داخوازییا مەسرور بارزانی، سەرۆكێ حوكمەتا هەرێما كوردستانێ بوو كو ب سۆدانی گۆت، مووچە مافێ خەلكێ هەرێما كوردستانێیە، د بەرامبەر ژی دا حوكمەتا هەرێما كوردستانێ چ ل سەر ملێ وێ بیت دێ كەت».

دوهی چارشەمبی 13/11/2024، نێچیرڤان بارزانی، سەرۆكێ هەرێما كوردستانێ، پێشوازی ل ئالبرێشت فۆن ڤیتكە،قۆنسلێ گشتیێ نوو یێ ئەلمانیا ل هەرێما كوردستانێ كر.
سەرۆكایەتییا هەرێما كوردستانێ د بەیاننامەیەكێدا بەلاڤكر» د دیدارەكێدا قۆنسلێ گشتیێ نوو یێ ئەلمانیا ل هەرێما كوردستانێ، پیرۆزباهییا سەركەفتنا هەلبژارتنێن خولا شەشێ یا پەرلەمانێ كوردستانێ ل نێچیرڤان بارزانی، سەرۆكێ هەرێما كوردستانێ و گەلێ كوردستانێ كر و حێبەتییا خوە ب رێژەیا پشكداریێ د هەلبژارتناندا نیشاندا. هەروەسا ل گەل سەرۆكێ هەرێما كوردستانێ، قۆناغا داهاتی و بزاڤێن پێكئینانا كابینەیا نوو یا حوكمەتا هەرێما كوردستانێ، گەنگەشەكر.
هەردو ئالییان دوپاتی ل خواستا دو ئالییانە بۆ پێشڤەبرنا پەیوەندیێن ئەلمانیا ل گەل ئیراقێ و هەرێما كوردستانێ و بەرفرەهكرنا هاریكارییا هەڤپشك، ب تایبەتی د وان واران كو بۆ هەرێما كوردستانێ د گرنگن، كر. سەبارەت ڤێ چەندێ نێچیرڤان بارزانی، سوپاس و پێزانینا هەرێما كوردستانێ بۆ پشتەڤانییا ئەلمانیا ل ئیراقێ و هەرێما كوردستانێ، دەربڕی.
پەیوەندیێن هەولێرێ – بەغدا، رەوشا دەڤەرێ و مەترسییا ڤەرێژێن ئالۆزیێن رۆژهەلاتا ناڤین، تەوەرەكێ دی یێ كۆمبوونێ بوو.

دوهی چارشەمی 13/11/2024، نێچیرڤان بارزانی ،سەرۆكێ هەرێما كوردستانێ، د دیدارەكێدا ل گەل مەحمود فاروق یوسف، قۆنسلێ نوو یێ مسرێ ل هەرێما كوردستانێ، پیرۆزباهییا دەستبكاربوونێ لێكر و هیڤییا سەركەفتنێ بۆ خواست، هەروەسا هەموو پشتەڤانییەك بۆ سەرئێخستنا ئەركێ وی، دیاركر.
د دیدارەكێدا هەردو ئالییان خوساتا دو ئالییانە بۆ پێشڤەبرنا پەیوەندییان و هاریكارییا هەڤپشك د هەموو واراندا، ب تایبەتی ژی وارێ بازرگانی دوپاتكر، سەبارەت ڤێ چەندێ باس ل لڤین و ئاستێ بازرگانی د ناڤبەرا هەرێما كوردستانێ و كۆمارا مسرێ هاتە كرن.
هەلبژارتنێن هەرێما كوردستانێ، رەوشا ئیراقێ و دەڤەرێ ب گشتی، تەوەرەكێ دی یێ دیدارێ بوو.

نڤیسینگەها محەمەد شیاع سۆدانی، سەرۆك وەزیرێن ئیراقێ راگەهاند، ل دیدارا سۆدانی و مەسرور بارزانی، سەرۆكێ حوكمەتا هەرێما كوردستانێ، هەردو ئالییان دوپاتی ل بجهئینانا بڕیارێن داگەها فیدرالی سەبارەت پێدانا مووچەیێن فەرمانبەران.
نڤیسینگەها سەرۆك وەزیرێن ئیراقێ، پشتی كۆمبوونا سۆدانی و مەسرور بارزانی، بەیاننامەیەك بەلاڤكر و تێدا هاتیە، سۆدانی ل دەستپێكا دیدارێ پیرۆزباهییا سەركەفتنا هەلبژارتنێن پەرلەمانێ كوردستانێ ل مەسرور بارزانی كر.
نڤیسینگەها محەمەد شیاع سۆدانی سەرۆك وەزیرێن ئیراقێ بەلاڤكر ژی» پشكەكا دی یا دانوستاندنان ل دۆر كێشەیێن د ناڤبەرا حوكمەتا هەرێما كوردستانێ و حوكمەتا فیدرال بوون، ژوان بزاڤێن بۆ هنارتنا پەترۆلا هەرێما كوردستانێ و گرنگییا رێكخستنا بزاڤان بۆ مفایێ هەڤوەلاتییان ل سەرانسەری وەلاتی».
ل دۆر پرسا مووچەی، نڤیسینگەها سۆدانی ئاماژە ب وێ چەندێ كر» سۆدانی و مەسرور بارزانی دوپاتی ل گرنگییا بجهئینانا بڕیارا دادگەها فیدرالی بۆ پێدانا مووچەیێن فەرمانبەرێن حوكمەتا هەرێما كوردستانێ».
ب گۆڕەی نڤیسینگەها سەرۆك وەزیرێن ئیراقێ، د دیدارەكێدا» دوپاتی ل پێدڤییا پێكئینانا كابینەیا نوو یا حوكمەتا هەرێما كوردستانێ هاتە كرن» و سەرۆك وەزیرێن ئیراقێ بەرهەڤییا هاریكاریكرنا حوكمەتا فیدرالی د پرسا پێكئینانا وێ كابینەیێدا دەربڕی».
هەر د وێ كۆمبوونێدا باس ل بەرهەڤیێن تایبەت ب ئەنجامدانا سەرژمێرییا گشتی ئاكنجییان كر ل گەل بەرچاڤكرنا هەموو بزاڤان بۆ سەرئێخستنا پڕۆسەیێ.
د پشكەكا دی یا دیدارێدا، دوماهی پێشهاتێن رەوشا دەڤەرێ هاتە گەنگەشەكرن.
ژ ئالییەكێ دیڤە، حوكمەتا هەرێما كوردستانێ د بەیاننامەیەكێدا بەلاڤكر» سەرۆك وەزیرێن ئیراقێ، پیرۆزباهی ل سەرۆكێ حوكمەتا هەرێما كوردستانێ كر ب هەلكەفتا سەركەفتنا هەلبژارتنێن پەرلەمانێ كوردستانێ وئاماژە ب وێ چەندێ كر كو سەقامگیرییا سیاسییا هەرێما كوردستانێ، بنەمایەكێ گرنگ یێ سەقامگیرییا هەموو ئیراقێیە، سەرۆك وەزیرێن ئیراقا فیدرال، هەروەسا دوپاتی ل گرنگییا پێكئینانا كابینەیا نوو یا حوكمەتا هەرێما كوردستانێ كر ژ پێخەمەت پێشڤەبرنا زێدەتر یا هاریكاریێ و هەماهەنگیێ د ناڤبەرا حوكمەتا هەرێما كوردستانێ و حوكمەتا فیدرالدا».
بەلاڤكر ژی» د كۆمبوونەكێدا گەنگەشە ل دۆر كێشە و پرسێن تایبەت ب مووچە و پشكا هەرێما كوردستانێ ژ بودجەیا گشتییا فیدرال، دەستپێكرنا هنارتنا پەترۆلا هەرێما كوردستانێ و بەرهەڤیێن سەرژمێرییا گشتییا ئاكنجییان ل ئیراقێ هاتە كرن».
بەلاڤكر ژی» سەبارەت ب پرسا مووچەی، سەرۆكێ حوكمەتا هەرێما كوردستانێ، دوپاتی ل پێدڤییا دوورئێخستنا پرسا خەرجكرنا مووچەیێ هەرێمێ ژ هەر ناكۆكییەكا سیاسی كر، ل بەر رۆناهییا بڕیارا دادگەها بلند یا فیدرالی، هەڤشێوەیێ دەڤەرێن دی یێن ئیراقێ».
حوكمەتا هەرێما كوردستانێ هەروەسا دیاركر ژی» ل دۆر دەستپێكرنا هنارتنا پەترۆلا هەرێما كوردستانێ ژی، دوپاتی ل گرنگییا دەستپێكرنا پڕۆسەیا هنارتنا پەترۆلا هەرێمێ ب زووترین دەم و نەهێلانا ئاستەنگ و كێشەیێن پێشبەری پڕۆسەیێ هاتە كرن، ب شێوەیەكێ كو د بەرژەوەندییا هەموو هەڤوەلاتیێن هەرێما كوردستانێ و ئیراقێ دا بیت».
ل دۆر سەرژمێرییا گشتییا ئاكنجییان، حوكمەتا هەرێما كوردستانێ باس ل وێ چەندێ كر كو تەوەرەكێ دی یێ كۆمبوونێ یێ تایبەت بوو ب سەرژمێرییا گشتییا ئاكنجییان ل ئیراقێ، سەبارەت ڤێ چەندێ» د هەڤڕابوون ل سەر سەرئێخستنا پڕۆسەیێ بۆ مەبەستا گەشەپێدانێ، ب ل بەرچاڤ وەرگرتنا تێبینیێن هەرێما كوردستانێ ژ ڤی ئالی ڤە».