چاڤەڕێ دهێتە كرن ئەڤرۆ چار یاریێن دی ژ هەڤڕكیێن گەڕا حەفتێ یا خولا ستێرێن ئیراقێ یا فوتبۆلێ بهێنە كرن، جەماوەرێ وەرزشی یێ كوردستانی دێ چاڤ ل یارییا كلاسیكۆیەكا دی یا ئاگرین بن، یاریێن دهۆك بەرانبەر شورتە و جەوییە بەرانبەر نەفت میسان هاتینە پاشئێخستن ژبەر پشكدارییا دهۆكێ د كۆپا كەنداڤی دا و پشكدارییا شورتە و جەوییە د چامپیۆنزا ئاسیا دا.
كوڕێن خابوور دێ بزاڤێن ڤەگەڕاندنا سەركەفتنان كەن
ناڤ ئەرد و جەماوەرێ خوە دا تیما یانەیا زاخۆ ب ژڤانە ل دەمژمێر 7:45 شەڤ مێڤاندارییا یانەیا هەولێر بكەت ئێك ژ كلاسیكۆیێن پرانییا پشتەڤانێن كوردستانێ و ئیراقێ چاڤەڕێ ژبەر گرنگی و هێزا وێ، هەروەسان ژبەر هەبوونا نمایش و پشتەڤانیەكا مەزن یا جەماوەرێ زاخۆ دناڤا یاریگەهێ دا كو دبیتە خالا هێزێ بۆ یاریزانان، كوڕێ خابووری هەتا نوكە دو سەركەفتن، سێ وەكهەڤی و خوسارەتیەك هەیە و نەهـ خال كۆمكرینە ل رێزا 10ێ دهێت، ڕاهێنەرێ تیما زاخۆ یێ قەتەری تەلال ئەلبلۆشی ڕاگەهاند بوو دڤێت د ناڤ ئەردێ خوە دا جەماوەرێ خوە ئاشتبكەین، هەموو یاریزان بەرهەڤن و چەكێ مە مۆرالا یاریزانان و پشتەڤانێن مە نە كو نمرا ئێكن ل سەر ئاستێ خولا ستێرێن ئیراقێ.
هەولێر دێ شەڕی بۆ ئەنجامەكێ باش كەت
ژلایێ خوەڤە تیما یانەیا هەولێر دێ هێتە باژێرێ زاخۆ و باش دزانیت ئەركێ وێ ب سانەهی نینە بەرانبەر تیمەكا لێكدایی و جەماوەرەكێ ئێكجار مەزن، هەرچەندە دێ بێ بەهربیت ژ ستێرێ خوە ئوسامە رەشید و پشكدارییا هێرشبەرێ وێ شێركۆ كەریم د گۆمانێ دایە ژبەر هنگاڤتنان، كوڕێن كەلهە و منارە ل رێزبەندیا شەشێ دانە ب 11 خالان ژ سێ سەركەفتن، دو وەكهەڤی و ئێك خوسارەتی هەیە، هەرچەندە ئامار د بەرژوەندییا یانەیا پایتەختێ كوردستانێ دانە، زاخۆ حەفت سەركەفتن و هەولێر 15 سەركەفتن بەرانبەر 10 وەكهەڤییان یاریێن وان ب دووماهی هاتینە.
ل دۆر ڤێ یاریێ وەحید رەشید شرۆڤەكارێ وەرزشی ل پارێزگەها دهۆكێ بۆ رۆژنامەیا ئەڤرۆ گۆت: ئێك ژ گرنگترین یاریێن ڤێ حەفتیێ نە، هەردەم یاریێن دناڤبەرا یانەیێن كوردستانێ تایبەتمەندیا خوە یا هەی و پێشبینییا یارییەكا ب هێز دكەم، دبیت دگەل یانەیێن دی یێن خولا ئیراقێ ئاست و ئەنجامێن بەرۆڤاژی هەبن، لێ دگەل ئێك دێ جودابن، دبینم زاخۆ نێزیكترە بۆ سەركەفتنێ، ژبەركو دێ دناڤ ئەرد و جەماوەرێ خوە دا بیت دیسان ئەو ئەنجامێن هەردو یاریێن بۆری وەكو گڤاشتنەكێ ل سەر یاریزانایە دڤێت جەماوەرێ خوە ئاشتبكەتـ هەرچەندە هەولێر ژی تیمەكا ب سانەهی نابیت و دێ شەڕی بۆ ئەنجامەكێ باش هەكە وەكهەڤی ژی بیت، ب هیڤییا وێ یەكێ یاریەكا جوان بهێتە دیتن.
دوبارە دێ خولا ئیراقێ هێتە ڕاوەستاند
فدراسیۆنا فوتبۆلا ئیراقێ راگەهاند پشتی ب دووماهی هاتنا یاریێن گەڕا حەفتێ ژ هەڤڕكیێن خولا ستێرێن ئیراقێ دێ خول دوبارە هێتە ڕاوەستاندن پێخەمەت بەرهەڤیێن هەلبژارتیێ ئیراقی بۆ هەردو یاریێن گەڕا پێنجێ و شەشێ ژ چارچووڤەیێ ڤاڤارتنێن كێشوەرێ ئاسیا بەر ب دەربازبوون بۆ مۆندیالا 2026ێ دیاركرن ئەوا چاڤەڕێ یە ل ناڤەڕاستا مەهێ كو هەڤدەمە دگەل ڤاڤارتنێن كێشوەرێن ئۆرۆپا، ئاسیا، ئەفریقیا و ئەمریكا باشۆر كو دێ بۆ ماوەیێ ئێك حەفتی هێتە ڕاوەستاندن.
فدراسیۆنا فوتبۆلا ئیراقێ یاریێن گەڕا هەشتێ ژ خولا ستێران بۆ ئێك حەفتی پاشڤەبر ژبۆ دەلیڤەدان بۆ هەلبژارتیێ ئیراقێ بەرهەڤی بۆ هەردو دیدارێن خوە یێن گرنگ د خولێ دا ئەو ژی دگەل هەلبژارتیێ ئوردن دناڤ ئەرد و جەماوەرێ خوە ل 14ێ چریا دویێ دەمژمێر7:15 شەڤ، یارییا دویێ دێ ل 19ێ هەمان مەهـ بیتە مێڤانا هەلبژارتیێ عومانێ ل دەمژمێر هەشتی شەڤ هێتە ئەنجامدان
وەحید رەشید: هەردەم یاریێن د ناڤبەرا یانەیێن كوردستانێ دا تایبەتمەندیا خوە یا هەی و پێشبینییا یارییەكا ب هێز دكەم
نيشاندان