سه‌رۆكێ حوكمه‌تا هه‌رێما كوردستانێ، مه‌سرور بارزانی، پێشوازی ل دیلان یه‌شیلگۆز وه‌زیرا داد یا هوله‌ندی كر و ددیداره‌كێ دا دانوستاندن ل دۆر پێشڤه‌برنا په‌یوه‌ندیێن هه‌رێما كوردستانێ و هوله‌ندا هاته كرن ب تایبه‌تی هه‌ماهه‌نگی د ناڤبه‌را ده‌ستهه‌لاتا دادوه‌ری یا هه‌ردوئالیان دا.
د ته‌وه‌ره‌كی دی یێ كۆمبوونێ، باس ل گرنگیا به‌رده‌وامبوونا پشته‌ڤانیا هه‌رێما كوردستانێ د روو ب رووبوونا تیرۆرستێن داعشێ و هاریكاریا قوربانیێن ده‌ستێ تاوانێن رێكخراوا تیرۆرستی یا داعشێ هاته كرن.
ئه‌ڤرۆ:
كۆربه‌ندێ ئابووریا جیهانێ دێ ده‌ستپێكه‌ت و سه‌رۆكێ حوكمه‌تا هه‌رێما كوردستانێ مه‌سرور بارزانی ژی بۆ فه‌رمی بۆ وێ كۆربه‌ندێ هاتیه ڤه‌خواندن و ئێك ژ ته‌وه‌رێن سه‌ره‌كی یێ كۆربه‌ندێ ژی دێ كاریگه‌ریا شه‌رێ رۆسیا و ئۆكرانیایێ ل سه‌ر ئابووریا جیهانێ بیت.
كۆربه‌ندێ بلند یێ ئابووریا جیهانێ ل داڤۆسێ ل رۆژێن٢٢ هه‌تا ٢٦ ڤێ مه‌هێ دێ برێڤه چیت و گه‌له‌ك سه‌ركردێن جیهانێ بۆ كۆربه‌ندێ هاتینه ڤه‌خواندن، سه‌رۆكێ حوكمه‌تا هه‌رێما كوردستانێ مه‌سرور بارزانی ژی ب فه‌رمی بۆ كۆربه‌ندێ داڤوسێ هاتیه ڤه‌خواندن.
لیژنا ئاماده‌كار د داخۆیانیه‌كێ دا دیار كریه كو ل سه‌ر داخوازا گه‌له‌ك ژ پشكداربوویێن كۆربه‌ندێ وان بریار داینه كو رۆسیا بۆ كۆربه‌ندێ نه‌هێته ڤه‌خواندن، بێگومان كاریگه‌ریا شه‌رێ نها یێ د ناڤبه‌را رۆسیا و ئۆكرانیایێ دا ل سه‌ر ئابووریا جیهانێ دێ ئێك ژ ته‌وه‌رێن سه‌ره‌كی یێ كۆربه‌ندێ بیت.
لیژنا ئاماده‌كار ئاماژه ب هندێ ژی كریه كو ئێك ژ ته‌وه‌رێن دی یێ سه‌ره‌كی ژی دێ بابه‌تێ پیسبوونا ژینگه‌هێ بیت، چونكو نها ل گه‌له‌ك وه‌لاتێن جیهانێ سه‌قا پیس بوویه و مه‌ترسیه‌كا گه‌له‌ك مه‌زن ل سه‌ر ژیانا مرۆڤان دروست كریه، هه‌روه‌سا رێژه‌یا ئاڤێ ل پڕانیا ده‌ڤه‌رێن جیهانێ كێم بوویه، هشكه‌سالیێ ژی كارتێكرنا خوه ل به‌رهه‌مێن خوارنێ كریه، ئانكۆ مه‌ترسیه‌كا گه‌له‌ك مه‌زن ل سه‌ر خوارنێ هه‌یه و هه‌روه‌سا دهێته پێشبینیكرن كو ژ به‌ر شه‌رێ نها ل ئۆكرانیایێ و هه‌روه‌سا هشكه‌سالیا ل هنده‌ك وه‌لاتان رێژه‌یا به‌رهه‌مئینانا گه‌نمی گه‌له‌ك كێم بیت، ئه‌و یه‌ك ژی دێ بیته ئه‌گه‌ر كو ل جیهانێ رێژه‌یا برسیبوونێ ب ره‌نگه‌كێ به‌رچاڤ زێده‌تر لێ بهێت، ژ به‌ر هندێ ژی د كۆربه‌ندێ ڤێجارێ دا دێ به‌حسێ ڤان بابه‌تان هه‌موویێ هێته كرن.
ل گۆر داخۆیانیا لیژنه‌یا ئاماده‌كار دو سالێن بۆری ژ به‌ر ڤایرۆسێ كۆرۆنایێ كۆربه‌ند نه‌هاتیه گێران لێ ئه‌ڤساله چو ئاریشه نینن و كۆربه‌ندێ داڤۆسێ دێ ب ره‌نگه‌كێ ئاسایی برێڤه چیت و ل رۆژهه‌لاتا ناڤین، ئۆرۆپا، ئه‌مریكا، ئه‌فریقیا و هه‌موو ده‌ڤه‌رێن جیهانێ دێ سه‌ركردێن وه‌لاتان پشكداریێ د كۆربه‌ندێ دا كه‌ن.
چاڤدێرێن سیاسی ژی دیار دكه‌ن كو كۆربه‌ندێ داڤۆسێ دشێت ب باشێ به‌حسێ قه‌یرانێن نها ل جیهانێ بكه‌ت، لێ مخابن كۆربه‌ندێن وه‌سا جهێ بریاردانێ نینن، ژ به‌ر هندێ ژی دڤێت سه‌ركردێن جیهانێ و خوه‌دانێن بریاران ب باشی گوهداریا دانوستاندنێن ل داڤۆسێ بكه‌ن، چونكو مه‌ترسیێن مه‌زن ل سه‌ر جیهانێ هه‌نه، ب تایبه‌تی ژی شه‌رێ نها ل ئۆكرانیایێ كارتێكرنه‌كا خوه یا گه‌له‌ك مه‌زن ل ژیانا هه‌موو وه‌لاتیان كریه، نها ل پڕانیا وه‌لاتێن ئۆرۆپا ژی ژ به‌ر شه‌رێ ل ئۆكرانیایێ بهایێ كه‌لوپه‌لێن خوارنێ گه‌له‌ك گران بووینه و هه‌كه ره‌وش وه‌سا به‌رده‌وام بكه‌ت دێ بیته ئه‌گه‌رێ ده‌ستپێكرنا قه‌یرانه‌كا دی یا مه‌زن ل جیهانێ، ژ به‌ر هندێ ژی گرنگه هه‌موو وه‌لاتێن جیهانێ پێكڤه رۆسیا نه‌چار بكه‌ن كو ئێرشێن خوه بده‌ته راگرتن.
ئه‌ڤرۆ:
فایق ئۆزتورك په‌یڤدارێ پارتا كۆماری یا گه‌ل راگه‌هاند كو ئاكپارتیێ هه‌تا نها گه‌له‌ك سۆز داینه كوردان لێ نه‌شیایه پرسا كوردی ل توركیا چاره‌سه‌ر بكه‌ت، ژ به‌ر هندێ ژی نها ره‌وشا ناڤخوه‌یی یا توركیا گه‌له‌ك خراب بوویه، ب شه‌ری پرسا كوردی ناهێته چاره‌سه‌ر كرن و مخابن هه‌تا نها ئاكپارتیێ چو پرۆژه ژی بۆ چاره‌سه‌ركرنا پرسا كوردی به‌رهه‌ڤ نه‌كرینه.
ناڤهاتی راگه‌هاند كو پارتا وان دڤێت پرسا كوردی ل په‌رله‌مانێ توركیا بهێته چاره‌سه‌ر كرن، پارتا وان تنێ هێزا سیاسی یه كو به‌رهه‌ڤه پرسا كوردی ل په‌رله‌مانێ توركیا چاره‌سه‌ر بكه‌ت و یا كو هه‌تا نها چو هێزه‌كا سیاسی ل توركیا نه‌شیای بكه‌ت پارتا كۆماری دێ ئه‌نجام ده‌ت.
چاڤدێرێن سیاسی یێن كورد ل توركیا ژی دیار دكه‌ن كو ئارمانجا سه‌ره‌كی یا پارتا كۆماری بده‌ستڤه‌ئینانا ده‌نگێن كوردانه، چونكو د بنه‌مایێ خوه دا پارتا كۆماری پتر ژ ئاكپارتیێ ل دژی مافێن ره‌وا یێن گه‌لێ كورده و هه‌تا نها پارتا كۆماری بخوه ژی چو پرۆژه‌یه‌ك بۆ چاره‌سه‌ركرنا پرسا كوردی به‌رهه‌ڤ نه‌كریه و داخۆیانیێن په‌یڤدارێ پارتا كۆماری ژی به‌رهه‌ڤیه بۆ هه‌لبژارتنان و بده‌ستڤه‌ئینانا ده‌نگێن كوردان.
ئه‌ڤرۆ:
نه‌فتالی بینیت سه‌رۆك وه‌زیرێن ئسرائیلێ راگه‌هاند كو گوهۆرینێن مه‌زن ل جیهانێ و ده‌ڤه‌رێ د رێ دانه و بێگومان دێ كارتێكرنا خوه ل ئسرائیلێ ژی كه‌ن، ژ به‌ر هندێ دڤێت ئه‌م ب هه‌موو ره‌نگه‌كێ خوه بۆ هه‌ر گوهۆرینه‌كێ به‌رهه‌ڤ بكه‌ین، مخابن نها هنده‌ك هێز د ناڤ ئسرائیلێ دا ژی وه‌كو پێدڤی هه‌ست ب مه‌ترسیێن ل سه‌ر پاشه‌رۆژا وه‌لاتێ مه نه‌كرینه.
سه‌رۆك وه‌زیرێن ئسرائیلێ ئه‌و یه‌ك ژی دیار كر كو به‌ری نها وان ل گه‌ل پڕانیا وه‌لاتێن عه‌ره‌بی رێككه‌فتنێن ئاشتیێ ئیمزا كرینه و بزاڤێن ئسرائیلێ بۆ ئاشتی و ئارامیێ ل ده‌ڤه‌رێ دێ به‌رده‌وام بن، لێ ئیران و هنده‌ك هێزێن دی به‌رده‌وام ئالۆزیان دروست دكه‌ن، چونكو شه‌ر و ئالۆزی بۆ ئیرانێ و هێزێن سه‌ر ب وێ گه‌له‌ك گرنگن، ده‌مێ شه‌ر و ئالۆزی هه‌بن ئه‌و دشێن پێگه‌هێ خوه بهێز بكه‌ن، ژ به‌ر هندێ ژی مه دڤێت ئه‌مریكا و وه‌لاتێن دی یێن هه‌ڤپه‌یمانێن مه ل جیهانێ هه‌ست ب به‌رپرسیاریا خوه بكه‌ن، هه‌ر مه‌ترسیه‌ك ل سه‌ر ئسرائیلێ هه‌بیت دێ كارتێكرنا خوه ل رۆژهه‌لاتا ناڤین و هه‌موو هه‌ڤپه‌یمانێن ئسرائیلێ ژی كه‌ت.
هه‌ولێر، قائید میرۆ:
به‌رپرسه‌كێ ده‌سته‌یا گشتیا وه‌به‌رهێنانێ ئاشكرا كر، ئه‌ڤ ساله مۆله‌تدان ب پڕۆژه‌یێن وه‌به‌رهێنانێ سه‌دێ سه‌د زێده‌بوویه و دبێژیت: ب تنێ ئێك مۆله‌ت بۆ پڕۆژه‌یه‌كێ ئاكنجیبوونێ هاتیه‌دان و 27 مۆله‌ت بۆ كه‌رتێن دی بووینه.
موخلس سه‌لیم، رێڤه‌به‌رێ گشتیێ قانوونی ل ده‌سته‌یا وه‌به‌رهێنانێ بۆ رۆژناما ئه‌ڤرۆ دیار كر، ئه‌ڤ ساله هه‌تا نوكه 28 مۆله‌تێن وه‌به‌رهێنانێ بۆ ئه‌نجامدانا پڕۆژه‌یێن وه‌به‌رهێنانێ هاتینه‌دان و گۆت: “سه‌دێ سه‌د دانا مۆله‌تان زێده‌بوویه، به‌لێ حوكمه‌تا هه‌رێما كوردستانێ زێده‌تر دخوازیت گرنگیێ ب كه‌رتێن چاندن و پیشه‌سازی و گه‌شتیاری بده‌ت، نه‌ك كه‌رتێ ئاكنجیبوونێ، ئه‌ڤ ساله ژ سه‌رجه‌مێ 28 مۆله‌تان ب تنێ ئێك مۆله‌ت بۆ پڕۆژێ ئاكنجیبوونێ بوویه”.
موخلس سه‌لیم گۆتژی: “كار یێ دهێته كرن، كه‌رتێ وه‌به‌رهێنانێ بۆ ره‌وشا ئاسایی و به‌رێ ڤه‌گه‌ڕیت، ئه‌و 28 پڕۆژێن مۆله‌ت ژی وه‌رگرتی 12 ژ وان ل پارێزگه‌ها هه‌ولێرێ نه و 12 پڕۆژه ل سلێمانیێ و 2 پڕۆژه ل دهۆكێ، ل ئیداره‌یێن راپه‌ڕین و گه‌رمیان ژی 2 مۆله‌ت داینه پڕۆژه‌یێن وه‌به‌رهێنانێ”.
دهۆك، له‌زگین جوقی:
به‌رپرسێ راگه‌هاندنا پۆلیسێن پارێزگه‌ها دهۆكێ دیار كر، د ده‌مێ بۆری دا ل سنوورێ ناوچه‌داریا زاویته گه‌له‌ك حاله‌تێن دزیێ په‌یدابوون، پشتی پۆلیسان ده‌ست ب ڤه‌كۆلینان كری شیان هه‌ژماره‌كا تومه‌تباران ده‌سته‌سه‌ر بكه‌ن.
هێمن سلیمان، به‌رپرسێ راگه‌هاندنا پۆلیسێن پارێزگه‌ها دهۆكێ بۆ رۆژناما ئه‌ڤرۆ گۆت: “نێزیكی 20 مه‌زره‌عان ل سنوورێ ناوچه‌داریا زاویته هاتینه شه‌لاندن و كه‌ره‌ستێن بهاگران ژ هنده‌ك مه‌زره‌عان هاتینه دزین، وه‌كو: پارچه‌یێن هه‌مه‌جۆر یێن چه‌كی، تێله‌فزیۆن و ئامیره‌یێن كاره‌بێ و چاندنێ، ئه‌ڤ دزیه ژ لایێ به‌نده‌كێ دزیكه‌ران ڤه دهاتنه ئه‌نجامدان، ئه‌ڤ باندێ دزیكه‌ران پێكهات ژ دو دزیكه‌ران پێك دهات و د ده‌مێ دزیكرنێ دا چه‌ك ژی بكاردئینا”.
گۆتژی: “ئه‌فسه‌ر و پۆلیسێن دهۆكێ شیان تومه‌تباران ده‌سته‌سه‌ر بكه‌ن و دانپێدان ب تاوانێن خوه یێن دزیكرنێ كرینه، لێ ئه‌و كه‌لوپه‌لێن دزین، هنده‌ك ژ وان، ژ لایێ دزیكه‌ران ڤه هاتینه فرۆتن”.
هێمن ئاماژه ب وێ چه‌ندی ژی كر كو ده‌مێ دزیكه‌ر هاتینه ده‌سته‌سه‌ركرن چه‌ك د ده‌ستان دا بوو، بزاڤ دكرن خوه راده‌ست نه‌كه‌ن، لێ پۆلیسێن دهۆكێ شیان وان ده‌سته‌سه‌ر بكه‌ن، دیسا ژییێ وان تومه‌تباران د ناڤبه‌را 25 بۆ 30 سالیێ دابوو”.
دهۆك، زنار تۆڤی:
ئه‌ندامه‌كێ په‌رله‌مانێ كوردستانێ داخواز دكه‌ت بابه‌تێ ره‌وشه‌نبیریا ساخله‌میێ بكه‌ڤیته د ناڤ پرۆگرامێن خواندنێ دا، ژ به‌ركو تووشبوونا وه‌لاتیان ب هنده‌ك جۆرێن نه‌خۆشیان زێده‌بوویه و ئێك ژ ئه‌گه‌ران نه‌بوونا ره‌وشه‌نبیریا ساخله‌میێ یه.
محسن دۆسكی، ئه‌ندامێ په‌رله‌مانێ كوردستانێ و بۆ رۆژناما ئه‌ڤرۆ گۆت: “رێژا تووشبوونا وه‌لاتیێن هه‌رێما كوردستانێ ب نه‌خۆشیێن (شه‌كرێ، مێلاكێ و په‌نجه‌شێرێ) و گه‌له‌ك نه‌خۆشیێن دیتر، رێژه‌كا ئاسایی نینه، ل گۆره‌یی هه‌ژمارا ئاكنجیێن هه‌رێما كوردستانێ، ب مخابنی ڤه، ئه‌ڤ رێژه رۆژ بۆ رۆژێ د زێده‌بوونێ دایه، دبیت هنده‌ك ژ هه‌بوونا ڤێ رێژا مه‌زن، بۆ نه‌بوونا ره‌وشه‌نبیریا ساخله‌میێ ڤه‌بگه‌ڕیت، هه‌روه‌سا چاره‌سه‌ریا ئه‌ڤان نه‌خۆشیان یا ب زه‌حمه‌ته و پاره‌كێ زۆر پێ دڤێت، ڤێ چه‌ندێ ژی بارێ حكومه‌تێ گه‌له‌ك گران كریه، د هه‌مان ده‌م دا گه‌له‌ك خێزان ده‌یندار بووینه، گه‌له‌ك نه‌خۆش ژی هه‌نه چاڤه‌رێی مرنێ دكه‌ن، چونكی چو شیان نینن، چاره‌سه‌ریا خوه بكه‌ن”.
گۆتژی: “ئه‌ز ب پێدڤی دبینم، هه‌ر ژ قووناغا سه‌ره‌تایی هه‌تا دگه‌هیته زانكۆیێ، بابه‌تێ ره‌وشه‌نبیریا ساخله‌میێ بكه‌ڤیته د ناڤ پرۆگرامێن خواندنێ دا، هه‌موو زانیاری ده‌رباره‌ی ئه‌گه‌ر و چاره‌سه‌ریێن هه‌موو نه‌خۆشیان تێدا بهێنه دیار كرن، ئه‌ڤ چه‌نده دێ نفشێ نوو ژ ڤان جۆره نه‌خۆشیان پارێزیت، ئه‌ز دشێم بێژم بابه‌تێ ره‌وشه‌نبیریا ساخله‌میێ ب شێوه‌كێ به‌فره‌هتر پێدڤیه‌كا ڤی ده‌میه، كو بهێته خواندن”.
زاخۆ، عه‌لی حاجی:
به‌رپرسێ راگه‌هاندنا پۆلیسێن زاخۆ د كۆنگره‌یه‌كێ رۆژنامه‌ڤانی دا دیار كر، ل رۆژا ئه‌ینیا بۆری ئافره‌ته‌كا 42 سالی هاته كوشتن و هه‌تا نوكه ژی ب كوژێ وێ نه‌هاتیه ده‌سته‌سه‌ركرن.
رائید نه‌هشه‌ت سه‌لمان، به‌رپرسێ راگه‌هاندنا پۆلیسێن زاخۆ گۆت: “ل رۆژا ئه‌ینی 20/5/2022 ئافره‌ته‌كا 42 سالی، كو خه‌لكا كۆمه‌لگه‌ها رزگاری بوو، ل دانێ سپێدێ ب مه‌ره‌ما ئه‌نجامدانا كارێ خوازخوازۆكیێ قه‌ستا باژێرێ زاخۆ كربوو، ل ده‌مژمێر 5:00 ئێڤاریا هه‌مان رۆژ، ئه‌م وه‌كو پۆلیسێن زاخۆ هاتینه ئاگه‌هدار كرن، كو لاشه‌كێ ل گوندێ حسێن ره‌شۆ ل نێزیك خابیری، پۆلیسان ڤه‌كۆلینێن ده‌ستپێكی كرن، دیاربوو ب رێیا هێزا ئامیره‌كی، كو ب سه‌رێ وێ ئافره‌تێ كه‌فتیه و هاتیه كوشتن، ته‌رمێ وێ بۆ نۆشداریا داد ل باژێرێ دهۆكێ هاتیه ره‌وانه‌كرن، پۆلیسێن زاخۆ لژنه‌یه‌ك پێكئینایه ژ بۆ دووڤچوونا ڤێ كه‌یسێ و ڤه‌كۆلین یا به‌رده‌وامه، لێ هه‌تا نوكه بكوژێ وێ ئافره‌تێ نه‌هاتیه ده‌سته‌سه‌ر كرن”.
گۆتژی: “ل دووڤ ڤه‌كۆلینێن ده‌ستپێكی ژی چو كێشه‌یێن خیزانی د ناڤبه‌را وێ و هه‌ڤژینێ وێ دا نه‌بوون”.
ل دووماهیێ گۆت: “چو چه‌كه‌ك د كوشتنا وێ دا نه‌هاتیه ب كارئینان، به‌لێ تشته‌ك ل سه‌رێ وێ ئافره‌تێ كه‌فتیه و ئێكسه‌ر گیانێ خوه ژ ده‌ست دایه، پشتی دووڤچوونێ، دیار بوویه، كو ئه‌و ئافره‌ته ل گوندێ حسێن ره‌شۆ نه‌هاتیه كوشتن، به‌لكو ل جهه‌كێ دیتر هاتیه كوشتن و ل دووڤ دا بۆ وی جهی هاتیه ڤه‌گوهاستن و هاڤێتن”.
زاخۆ، دلۆڤان هالۆ:
شڤان عه‌بدی، به‌رپڕسێ ڕاگه‌هاندنا ئیدارا سه‌ربخوه یا زاخۆ بۆ ڕۆژناما ئه‌ڤرۆ دیار كر كو ب سه‌رپه‌رشتیا گۆهدار شێخۆ، سه‌رپه‌رشتێ ئیدارا سه‌ربخوه یا زاخۆ و ب ئاماده‌بوونا دكتۆر بێوار خنسی ڕاوێژكارێ سه‌رۆكێ جڤاتا وه‌زیران و شاره‌زایێ كاروبارێن ژێر زه‌ڤی و ئاڤێ و لایه‌نێن په‌یوه‌ندیدار كۆمبوونه‌ك هاته ئه‌نجامدان.
به‌رپڕسێ ڕاگه‌هاندنا ئیدارا سه‌ربخوه یا زاخۆ ئاماژه ب وێ چه‌ندێ ژی كر، مه‌ره‌م ژ ڤێ كۆمبوونێ چاوانیا به‌رهنگاریا هشكه‌سالیێ و چاره‌سه‌ریا وێ بوو، هه‌روه‌سا سه‌خبێركرنا سكرێن بچووك ژ بۆ به‌رژه‌وه‌ندیا گشتی ل سنوورێ ئیدارا سه‌ربخوه یا زاخۆ، هه‌موو ئالیان بیر و بۆچوون و پێشنیارێن هه‌ڤدو گه‌نگه‌شه‌كرن، كا ب چ شێوه باشترین ڕێك و چاره‌سه‌ری بهێنه دیتن ژ بۆ به‌رهنگاربوونا هشكه‌سالیێ ل سنوورێ ئیدارا سه‌ربخوه یا زاخۆ.
ئه‌ڤرۆ، نه‌وزاد هلۆری:
هه‌بوونا به‌رمایكێن زۆر ل هه‌رێما كوردستانێ، زێده‌باری ئاریشه‌یێن ژینگه‌هی و ساخله‌می بۆ وه‌لاتیان دروستكرینه، هه‌ڤده‌م وه‌كو داهات مفا ژ دووباره بكارئینانا وان ناهێته وه‌رگرتن، شاره‌زایه‌كێ ژینگه‌هێ ژی دده‌ته دیاركرن كو ژینگه‌ها كوردستانێ ب زێده‌بوونا به‌رمایكا دهێته تێكدان.
مه‌عروف مه‌جید، ژینگه‌پارێز و سه‌رۆكێ رێكخراوا ئاینده یا پاراستنا ژینگه‌هێ بۆ رۆژناما ئه‌ڤرۆ گۆت: (ئێك ژ ئاریشێن هه‌ری مه‌ترسی هه‌مبه‌ر ژینگه‌ها هه‌رێما كوردستانێ و تێكدانا ژینگه‌هێ و كارتێكرن ل ساخله‌میا مرۆڤی، زێده‌بوونا به‌رمایكێن مال و جهێن گشتی یه ل كوردستانێ، یا ژ وێ یه‌كێ نه‌خوشتر ژی ئه‌وه كو چو مفا وه‌كو دووباره بكارئینان ژ وان به‌رمایكا ناهێته وه‌رگرتن و پرانیا وان ژی ناهێنه چاره‌سه‌ركرن ب رێیا دووباره بكارئینانا وان یان ژی بن ئاخكرنا وان كو چو كارتێكرن ل ژینگه‌ه و ساخله‌میا مرۆڤان نه‌كه‌ت).
زێده‌تر گۆت: (ل هه‌رێما كوردستانێ رۆژانه نێزیكێ حه‌فت هزار ته‌نێن به‌رمایكێن مال و جهێن گشتی یێن وه‌كو خارنگه‌ه و كافیتریا و بازار و جهێن بڤی ره‌نگی هه‌نه، سالانه دبیته پتری دوو ملیون و 500 هزار ته‌نان، جهێ داخێ یه پتری 50% ژ وان به‌رمایكا پێكدهێن ژ خوارنێ، بێگومان چه‌ند ئه‌گه‌رێن سه‌ره‌كی هه‌نه، نه هوشیاریا وه‌لاتیان و به‌رپرسیاره‌تیا وان بۆ پاراستنا ژینگه‌هێ، هه‌ند ژی بۆ كێمبون و دوباره بكارنه‌ئینانا ئالیێن شوله‌ژێ یه ب دانانا كارگه‌هێن ڤاڤارتن و ریسایكلینكرنا وان به‌رمایكایه).
ناڤبری دیاركر ژی كو ل هه‌رێما كوردستانێ 21 كارگه‌هێن جوداكرن و ڤاڤارتنا به‌رمایكا هه‌نه و گۆت ژی: (پرانیا ئه‌و به‌رمایكێن كو ل كوردستانێ هه‌نه، دووباره ناهێنه چاره‌سه‌ركرن ب رێیا دووباره مفا وه‌رگرتن یان ژی چاره‌سه‌ركرن و بن ئاخكرنا وان كو كارتێكرن ل ژینگه‌ه و ساخله‌میا وه‌لاتیان نه‌كه‌ت، مه چه‌ندین جاران داخوازكریه كو گرنگی ب پاراستنا ژینگه‌هێ بهێته‌دان چ ب رێیا زێده‌كرنا كارگه‌ه و و چاره‌سه‌ركرنا به‌رمایكا وان بیت یان ژی بكارئینانا زه‌رفێن كاغه‌زی بیت ل شوونا نایلونی جهێ دلخوشیێ بو كو ل هنده‌ك بازار و خارنگه‌ه و نانپێژیان دهاته په‌یره‌وكرن به‌لێ ب گشتی زۆر كێمه، دیسان دانانا باجێ ل سه‌ر هنده‌ك ژ جورێن كه‌لوپه‌لان كو كارتێكرنێ ل ژینگه‌هێ دكه‌ن، بو نموونه پلاستیك، د نوكه دا ل هه‌رێما كوردستانێ پتر ژ ملیونه‌ك خێزان هه‌نه، ئه‌گه‌ر هه‌ر خێزانه‌ك مه‌تر و نیڤێن سفرا خوارنێ بدانن و بهاڤێژن، دبیته پتر ژ ملیونه‌ك و 500 هزار مه‌ترێن نایلونی كو ئه‌ڤ یه‌ك ژی زوره).
ل دوماهیێ گۆت: (ئه‌گه‌ر دووباره مفا ژ به‌رمایكا بهێته وه‌رگرتن ل وی ده‌می هه‌ند دێ ژینگه‌ها هه‌رێما كوردستانێ یا پاراستی بیت، هه‌ند ژی دێ مفا ژ به‌رمایكا وه‌كو دووباره بكارئینان هێته وه‌رگرتن، هه‌ند ژی دێ هزاران كه‌س بنه خودانكار ل وان كارگه‌ه و جها و بڤێ یه‌كێ ده‌لیڤێن كاری هێنه دابینكرن و بێ كاری كێم بیت، یا ژ هه‌موان خوشتر ئه‌وه كو دێ كێمتر ئه‌ڤ كه‌لوپه‌لێن زیاندار هێنه كوردستانێ).
نيشاندان