ئه‌ڤرۆ:

حكومه‌تا هه‌رێما كوردستانێ ڕاپۆرتا خوه‌ یا سێیێ ده‌رباره‌ی چاكسازیێ پێشكێشی په‌رله‌مانێ كوردستانێ كر.

وه‌یسی مه‌لا سه‌عید، ئه‌ندامێ لژنا ده‌سپاكیێ‌ ل په‌رله‌مانێ كوردستانێ راگه‌هاند: جڤاتا وه‌زیرێن هه‌رێما كوردستانێ ڕاپۆرتا خوه‌ یا سێیێ ده‌رباره‌ی چاكسازیێ‌ بۆ په‌رله‌مانێ‌ كوردستانێ‌ هنارتیه‌ و گه‌هشتیه‌ ده‌سته‌یا سه‌رۆكایه‌تیا په‌رله‌مانی ژی.

وی ئه‌ندامێ لژنا ده‌سپاكیێ‌ دیار كر ژی، ئه‌و ڕاپۆرته‌ گه‌هشتیه‌ ده‌سته‌یا سه‌رۆكایه‌تیا په‌رله‌مانێ‌ كوردستانێ‌ و بۆ لژنه‌یێن په‌یوه‌ندیدار ژی هاتیه‌ هنارتن، دیسا په‌رله‌مانی ژی لژنه‌یا ده‌سته‌یا ده‌ستپاكیێ راسپاردییه‌، كو ل گه‌ل وه‌زاره‌تێن په‌یوه‌ندیدار كۆمبوون ب مه‌به‌ستا ئاسانكاری و بجهئینانا یاسایێ‌ بهێنه‌ كرن.

ئه‌ڤرۆ:

ب مه‌ره‌ما دابینكرنا ئارێ‌ هه‌یڤانه‌ یێ‌ پشكا وه‌لاتیان، وه‌زاره‌تا بازرگانیا ئیراقێ‌ گه‌نمی ژ ئوسترالیا و ئه‌لمانا دئینیت و پێنج هزار ته‌نێن وی گه‌نمی ژی بۆ كارگه‌هێن ئاری گه‌هشتینه‌ پارێزگه‌ها دهۆكێ‌.

نازم محه‌مه‌د عه‌لی، رێڤه‌به‌رێ رێڤه‌به‌ریا بازرگانی یا ده‌خلودانی ل پارێزگه‌ها دهۆكێ‌ دیار كر كو وه‌زاره‌تا بازرگانی یا ئیراقێ گه‌نم ژ ئوسترالیا و ئه‌لمانیا ئینایه‌ ئیراقێ و بۆ دهۆك تیڤی گۆت: “هه‌تا نوكه‌ پێنج هزار ته‌نێن گه‌نمی گه‌هشتینه‌ پارێزگه‌ها دهۆكێ‌ و ل سه‌ر سایلۆیێن فه‌یدیێ و شێخان هاتینه‌ به‌لاڤكرن، ئه‌و گه‌نم دێ ل سه‌ر كارگه‌هێن ئاری یێن پارێزگه‌ها دهۆكێ‌ هێته‌ به‌لاڤكرن، داكو بكه‌نه‌ ئار و وه‌كو به‌هرا هه‌یڤانه‌ ل سه‌ر وه‌لاتیێن پارێزگه‌ها دهۆكێ‌ بهێته‌ به‌لاڤكرن”.

رێڤه‌به‌ریا بازرگانی یێ‌ ده‌خلودانی ل پارێزگه‌ها دهۆكێ‌ بۆ گۆتژی: “به‌ری ئه‌و گه‌نم ل سه‌ر كارگه‌هێن ئاری بهێته‌ به‌لاڤكرن تێست بۆ هاتیه‌ كرن و ل دووڤ وێ تێستێ ئاره‌كێ باش ژ وی گه‌نمی دهێته‌ دروستكرن”.

زاخۆ، دلۆڤان هالۆ:

شڤان عه‌بدی، به‌رپڕسێ ڕاگه‌هاندنا ئیدارا سه‌ربخوه‌ یا زاخۆ بۆ ڕۆژناما ئه‌ڤرۆ دیار كر كو هه‌موو باخچه‌ و شۆسته‌یێن جاده‌یان ل ئیدارا سه‌ربخوه‌ یا زاخۆ دێ هێنه‌ نووژه‌نكرن و خه‌ملاندن، و كه‌سكاتی لێ هێته‌ چاندن.

به‌رپڕسێ ڕاگه‌هاندنا ئیدارا سه‌ربخوه‌ یا زاخۆ، ئاماژه‌ ب وێ چه‌ندێ ژی كر كو گۆهدار شێخۆ، سه‌رپه‌رشتێ ئیدارا سه‌ربخوه‌ یا زاخۆ ل گه‌ل ڕێڤه‌به‌ریا باخچه‌ و پشكا شۆسته‌یان یێن سه‌ر ب سه‌رۆكایه‌تیا باژێڕڤانیا زاخۆ ڤه‌ كۆمبوونه‌ك ئه‌نجام دا و گوت: “ل دووڤ ڕاسپاردا سه‌رپه‌رشتێ ئیدارا سه‌ربخوه‌ یا زاخۆ پێدڤیه‌ د ده‌مه‌كێ نێزیك دا هه‌موو باخچه‌ و شۆسته‌یێن جاده‌یان د ناڤ باژێرێ زاخۆ دا بهێنه‌ نووژه‌نكرن و خه‌ملاندن و كه‌سكاتی لێ بهێته‌ چاندن، ده‌ردوورێن وان ژی بهێنه‌ به‌ردان و ڕاكرن”.

ئامێدیێ، مه‌حمود نهێلی:

د ڤان هه‌یاما دا هه‌ژماره‌كا زۆر یا مێشێن هنگڤینی ل سنورێ ناحیا دێره‌لۆك و شێلادزێ تووشی نه‌خۆشیه‌كا كوژه‌ك بووینه‌ و دورێن 70% مێشێن خه‌لكی مرینه‌. مێشه‌ڤانه‌ك ژی دبێژیت: وی نێزیكێ 100 مێشان هه‌بوونه‌ و بارا پترێ ژێ مرینه‌ و نوكه‌ ب تنێ سیهه‌ك یێن ماین ئه‌و ژی د لاوازن و خویاكر، ئه‌و وه‌ك خه‌لكێ گوندێ گه‌له‌كا هه‌موو مێشان خودان دكه‌ن و هه‌ژماره‌كا زۆرا مێشان ل ڤی گوندی هه‌نه‌. ئه‌ڤ ساله‌ مرن كه‌فتیه‌ ناڤ مێشێن وان و ناهێته‌ زانین ئه‌گه‌ر چنه‌.

هێرش زێباری ئاكنجیێ گوندێ گه‌له‌كا یێ ناوچه‌داریا دێره‌لۆكێ بۆ رۆژناما ئه‌ڤرۆ دیار كر، د ڤێ هه‌یاما داویێ دا مێشێن وان یێن هنگڤینی رۆژ بۆ رۆژێ به‌ر ب كێم بوونێ دچن و هژماره‌كا مه‌زن ژێ مرینه‌ و گۆت : وی نێزیكی حه‌فتێ مێشان هه‌بووینه‌، ب تنێ بیسته‌كێن ماین ئه‌و ژی د لاواز و نه‌خۆشن و به‌رڤ نه‌مانێ دچن.

ئاشكرا ژی كر، مێشێن مامێ وی نیزیكی سه‌د مێشا ژناڤ چووینه‌ و نه‌ماینه‌، ئه‌ڤ نه‌خۆشیه‌ پشتی سه‌رمایا ڤێ داویێ په‌یدا بوویه‌. ئه‌و ئه‌گه‌رێن سه‌ره‌كی یێن ڤێ نه‌خۆشیێ بۆ پیسبوونا ژینگه‌هێ و هه‌بوونا سه‌رمایێ و د ده‌مێ شه‌ڤێ دا ڤه‌دگه‌رن و گۆت: چێدبیت نه‌خۆشیه‌كا ڤایروسی ژی بیت، چونكو رۆژانه‌ هژماره‌كا مێشێن وان تووشی نه‌خوه‌شیێ دبن. ل ده‌سپێكێ مێشا تووشی نه‌خۆشیێ بووی نه‌شێت بفریت و پاشان هێدی هێدی كێم دبن و ژناڤ دچن.

ره‌شید سه‌لمان، مێشه‌ڤانه‌ ل سنورێ ناحیا دێره‌لۆكێ بو رۆژناما ئه‌ڤرۆ دیاركر، وی نێزیكێ 100 مێشان هه‌بوونه‌ و بارا پترێ ژێ مرینه‌ و نوكه‌ ب تنێ سیهه‌ك یێن ماین ئه‌و ژی د لاوازن و خویاكر، ئه‌و وه‌ك خه‌لكێ گوندێ گه‌له‌كا هه‌موو مێشان خودان دكه‌ن و هه‌ژماره‌كا زۆرا مێشان ل ڤی گوندی هه‌نه‌. ئه‌ڤ ساله‌ مرن كه‌فتیه‌ ناڤ مێشێن وان و ناهێته‌ زانین ئه‌گه‌ر چنه‌ و دیار كر، تا هه‌یڤا سێ یا ئه‌ڤ ساله‌ ژی مێشێن وان د باشبوونه‌ لێ پشتی هه‌یڤا سێ و نه‌ڤرۆزێ باران گه‌له‌ك هاتن و گه‌له‌ك ڤه‌كێشان و ته‌نگاڤی درێژ بوونه‌ و كارتێكرن ل مێشین وان هاته‌كرن.

ناڤهاتی ئاشكرا ژی كر، كو ئه‌ڤ نه‌خوه‌شیه‌ یا وه‌سایه‌ ئه‌ڤرۆ دێ سه‌حكه‌یه‌ مێشێ یا باشه‌ و سوبه‌هی دێ سه‌حكه‌یێ یا لاوازه‌ و به‌رڤ خرابیێ دچیت و ژ ناڤ دچیت.

و گۆت ژی: ئه‌ڤه‌ ئێكه‌م ساله‌ نه‌خوه‌شیه‌كا ب ڤی ره‌نگی توشی مێشێن وان دبن و به‌ری نوكه‌ ژی دمرن، به‌لێ تا ده‌هه‌كا ژناڤ دچوون، لێ ئه‌ڤ ساله‌ مێشێن وان ڤه‌بریان. مه‌ ل وه‌رزێ زڤستانێ‌ حه‌لانه‌كه‌ك دابوویێ و مێشێ گه‌له‌ك حه‌ژێ دكر و خوه‌ تێڤه‌ دا و هنده‌ك دبێژن ئه‌گه‌ر ئه‌وه‌ ئه‌ڤجار ئه‌م نزانین ئه‌گه‌رێ سه‌ره‌كێ یێ ژ ناڤچوونا مێشێن مه‌ چیه‌ نزانین سه‌قا و كه‌ش و هه‌وایه‌ یان ژی توز و خولبارینه‌ یان  ژی نه‌خوه‌شیه‌كا ڤایروسی یه‌.

ڤی مێشڤانی دیار ژی كر، وان كه‌سانێن شاره‌زا ئاگه‌هدار كرینه‌، لێ هه‌تا نوكه‌ جۆر و ئه‌گه‌رێ ڤێ نه‌خوه‌شیێ نه‌هاتیه‌ زانین و پێدڤیه‌ لایه‌نێن په‌یوه‌ندیدارێن چاندنێ چاره‌سه‌ریه‌كێ بۆ ببینن تا كو ئه‌ڤ مێشێن وان ژ ڤێ نه‌خوشیێ بهێنه‌ رزگار كرن و زیانێن گه‌له‌ك مه‌زن ژی نه‌گه‌هنه‌ وان.