ئه‌ڤرۆ:

ئه‌كادیمی و چاڤدێره‌كێ سیاسی ل دۆر سه‌ره‌دانا مه‌سرور بارزانی، سه‌رۆكێ حوكمه‌تا هه‌رێما كوردستانێ بۆ وه‌لاتێ توركیا و كۆمبوونا وی ل گه‌ل ره‌جه‌ب ته‌یب ئه‌ردۆگان سه‌رۆك كۆمارا توركیا، راگه‌هاند، ئه‌و سه‌ره‌دانا سه‌رۆكێ حوكمه‌تا هه‌رێمێ و كۆمبوون ل گه‌ل سه‌رۆكێ كۆمارا توركیا، گرنگیا خوه‌ یا سیاسی و ئابووری و وزه‌ و جیوسیاسی یا هه‌ی و گرنگیا پێگه‌هێ هه‌رێما كوردستانێ ل سه‌ر ئاستێ ده‌ڤه‌رێ ژ روویێ دابینكرنا سه‌قامگیریێ و وزێ دیار دكه‌ت.

د. رێبوار بابكه‌یی، چاڤدێرێ سیاسی، گۆت” رۆلێ سه‌رۆكێ حوكمه‌تا هه‌رێما كوردستانێ د ڤێ كابینێ دا ب چه‌ند بنه‌ما وستراتیژیه‌كا ڤه‌ دگرێداینه‌، ژوان  نه‌هێلانا كێشێن د ناڤبه‌را هه‌رێما كوردستانێ و به‌غدا وچه‌سپاندن و ب هێزكرنا ته‌ناهیێ ل هه‌رێما كوردستانێ وبه‌رفره‌هكرنا بازنێ دۆستایه‌تیێ ل گه‌ل وه‌لاتان و ب كارئینانا هێزا وزێ هه‌م بۆ دروستكرنا پشته‌ڤانیا سیاسی و هه‌م ژی بۆ فره‌جۆركرنا ژێده‌رێن ئابووری ل هه‌رێما كوردستانێ، كو ڤێ چه‌ندێ ژی دێ ره‌نگڤه‌دانه‌ ل سه‌ر ب هێزكرنا پێگه‌هێ هه‌رێما كوردستانێ د هه‌ڤكێشێن سیاسی دا هه‌بیت” .

رێبواری ئاماژه‌ كر ژی” روودانێن ڤێ دووماهیێ ل ده‌ڤه‌رێ و ئه‌ورۆپا رووداین، ئه‌نجامێن وێ راستیێ نه‌ كو گۆرانكاریه‌كا نوو یا ب رێڤه‌ و جیهان یا به‌ر ب نه‌خشه‌كێ نوو یێ وزێ ل سه‌ر ئاستێ جیهانێ گاڤا د هاڤێژیت”.

هه‌روه‌سا دیاركر” گرنگیدان ب كه‌رتێ وزا هه‌رێما كوردستانێ ژ كارێن ستراتیژی یێن سه‌رۆكێ حوكمه‌تا هه‌رێما كوردستانێ یه‌ و مه‌ ئه‌و ژی دیت ده‌مێ مه‌سرور بارزانی ل كۆربه‌ندێ ئیمارات دووپاتی ل وێ چه‌ندێ كری كو دشیاندایه‌ هه‌رێما كوردستانێ ببیته‌ سه‌نته‌ره‌كێ گرنگ بۆ دابینكرنا وزێ ل سه‌ر ئاستێ ده‌ڤه‌رێ، هه‌م بۆ ناڤخوه‌ و هه‌م ژی بۆ وه‌لاتان”.

وی چاڤدێرێ سیاسی پتر رۆهنكر” ئه‌و گۆرانكاریێن هاتینه‌ ئه‌نجامدان، كو هه‌رچه‌نده‌ راسته‌ شه‌ر ژی پشكه‌ك ژ وان گۆرانكاریان پێك دئینیت، به‌لێ وی شه‌ری ره‌هنده‌كێ سیاسی ژی یێ هه‌ی و پشكه‌ك ژ وه‌لاتان مفای ژێ دبینن، دبیت ژی ئه‌مریكا كو داخواز ژ ئێكه‌تیا ئه‌ورۆپی كریه‌ كو ئه‌مریكا ببیته‌ ژێده‌رێ دابینكرنا وزێ، به‌لێ ژ ئه‌گه‌رێ دووراتیا ئه‌مریكا ژ ئه‌ورۆپا ژ روویێ جوگرافی ڤه‌، د نوكه‌ دا ئه‌سته‌مه‌ ئه‌مریكا بشێت هه‌م وزێ بۆ ئه‌ورۆپا دابین بكه‌ت و هه‌م ژی تێچوویا ڤه‌گوهاستنا زۆر ل سه‌ر دكه‌ڤیت”.

خویاكر” هه‌رێما كوردستانێ خودانا وزه‌كا باشه‌، ب تایبه‌تی غازا سروشتی، د ده‌مه‌كی ژی دا په‌ترۆل به‌رامبه‌ر غازێ ل بازارێ وزێ پێگه‌هێ خوه‌ یێ جاران یێ ژده‌ستدای و نوكه‌ سه‌رده‌مێ غازێ یه‌، ڤێ چه‌ندێ راسته‌وخوه‌ دێ كاریگه‌ری ل سه‌ر ب هێزكرنا په‌یوه‌ندیێن سیاسی یێن هه‌رێما كوردستانێ هه‌بیت و نوكه‌ هه‌رێما كوردستانێ رۆژانه‌ نیڤ ملیار پێ سێجاركی غازا سروشتی و زێده‌تر ژ نیڤ ملیۆن به‌رمیلێن په‌ترۆلێ رۆژانه‌ به‌رهه‌م دئینیت، رامانا ڤێ چه‌ندێ ژی ئه‌وه‌، كو هه‌رێما كوردستانێ شیانێن دابینكرنا وزێ بۆ ناڤخوه‌یا هه‌رێما كوردستانێ و ئیراقێ یا هه‌ی و دشیاندایه‌ ببیته‌ پشكه‌ك ژ ژێده‌رێن وزێ بۆ ئه‌ورۆپا و وه‌لاتێن دی ژی”.

سه‌باره‌ت گرنگیا سه‌ره‌دانا مه‌سرور بارزانی، سه‌رۆكێ حوكمه‌تا هه‌رێما كوردستانێ بۆ وه‌لاتێ توركیا، د. رێبوار بابكه‌یی دبێژیت” د نوكه‌ دا توركیا تاكه‌ ده‌روازه‌یه‌ بۆ هنارتنا په‌ترۆل و غازا هه‌رێما كوردستانێ، توركیا دشێت ببیته‌ وه‌لاتێ ترانزێت بۆ ڤه‌گوهاستنا په‌ترۆل و غازا هه‌رێما كوردستانێ بۆ وه‌لاتێن ئه‌ورۆپا”.

وه‌زیرێ په‌ترۆلا ئیراقێ، ئیحسان عه‌بدولجه‌بار راگه‌هاند، گرێبه‌ستێن په‌ترۆلی یێن هه‌رێما كوردستانێ سه‌رپێچیێن مه‌زن نینن و هه‌موو ددروستن و تنێ مه‌ كێشه‌ ل گه‌ل 20% ژ وان گرێبه‌ستان هه‌یه‌ و پێدڤیه‌ پێداچوون ل سه‌ر بهێته‌ كرن و وه‌زاره‌تا په‌ترۆلێ رێچاره‌ به‌رچاڤكرینه‌ بۆ چاره‌سه‌ركرنا پرسا په‌ترۆلا هه‌رێمێ د چارچۆڤێ دستوورێ ئیراقێ و بریارا دادگه‌ها فیدرالی، ناڤبری گه‌شبینیا دیاركركو حوكمه‌تا هه‌رێمێ ب پێشنیازێن وان رازی ببیت و دیارك ركو پێدڤیه‌ هه‌ردو ئالی داگیرانێ ژ پشكه‌كا داخوازیێن خوه‌ بكه‌ن بۆ گه‌هشتن ب ره‌شنڤیسه‌كێ هه‌ڤپشك. دووپاتكر ژی كو ئه‌و د پێگیرن ب سێ خالان ئه‌وژی پێداچوون ب گرێبه‌ستێن په‌ترۆلی و دروستكرنا كۆمپانیا په‌ترۆلا كوردستانێ و سیاسه‌تا پێشڤه‌برنا كێلگێن په‌ترۆلی و هنارتنا په‌ترۆلێ كو ب هه‌ڤپشكی د ناڤبه‌را هه‌رێما كوردستانێ و به‌غدا بریار ل سه‌ر بهێته‌ دان.

هه‌ولێر، قائید میرۆ:

ئه‌ندامه‌كێ لژنا ره‌وشنبیری و لاوان ل په‌رله‌مانێ‌ كوردستانێ‌ ئاشكرا كر، ل گوره‌ی پڕۆژه‌قانوونه‌كێ سندۆقه‌ك بۆ خانه‌نشینێن هونه‌رمه‌ندان دێ هێته‌ دامه‌زراندن و دبێژیت: پڕۆژه‌ ئاراسته‌ی سه‌رۆكایه‌تیا په‌رله‌مانی هاتیه‌ كرن و ل نێزیك دێ خواندنا ئێكێ بۆ هێته‌ كرن.

محسن دۆسكی، ئه‌ندامێ‌ لژنا ره‌وشنبیری و لاوان بۆ رۆژناما ئه‌ڤرۆ دیار كر، قانوونا سندۆقا خانه‌نشینیا هونه‌رمه‌ندان یا به‌رهه‌ڤه‌، كو خواندنا ئێكێ بۆ بهێته‌ كرن و گۆت: “پرۆژه‌قانوون ئاراسته‌ی سه‌رۆكایه‌تیا په‌رله‌مانی هاتیه‌ كرن، هه‌تا ده‌مه‌كێ نێزیك بكه‌ڤیته‌ د ناڤا كارناما كۆمبوونا داهاتیا په‌رله‌مانێ كوردستانێ دا، به‌رهه‌ڤكرن و ده‌ركرنا قانوونا خانه‌نشینیا هونه‌رمه‌ندان ب مه‌ره‌ما خزمه‌تكرنا وانایه‌ و هه‌مبه‌ر ئه‌ڤێ خه‌باتا هونه‌رمه‌ند پێشكێشی خه‌لكێ كوردستانێ و وه‌لاتێ خوه‌ دكه‌ن”.

محسن دۆسكی گۆتژی:”ل گوره‌ی ئه‌ڤێ قانوونێ سندۆقه‌ك بۆ خانه‌نشینیا هونه‌رمه‌ندان دێ هێته‌ دامه‌زراندن و ده‌سته‌كه‌ك بۆ برێڤه‌برنا سندۆقێ دێ هێته‌ پێكئینان، كو نوونه‌رێن وه‌زاره‌تا ره‌وشنبیری و دارایی و سه‌ندیكا هونه‌رمه‌ندان تێدا بن، خانه‌نشینكرنا هونه‌رمه‌ندان ب زۆری نابیت ل سه‌ر ئه‌ڤێ سندۆقێ، به‌لێ هه‌ر هونه‌رمه‌نده‌ك ئه‌گه‌ر بخوازیت ئه‌ڤه‌ دێ پشكداریێ كه‌ت و ل سه‌ر ئه‌ڤێ سندۆقێ دێ‌ هێته‌ خانه‌نشینكرن”.