زاخۆ، دلۆڤان هالۆ:
هونەرمەندێ گەنج یێ باژێڕێ زاخۆ ئەحمەد یەحیا د دیدارەکێ دا بۆ ڕۆژناما ئەڤرۆ دیار کر کو ل دەستپێکێ من ل قوتابخانێ ستران د گۆتن، لێ وەکو ئێکەم کارێ من یێ هونەری ل سالا 2005 من سترانەك بناڤێ برین ژ پەیڤ و ئاوازێن خوە تۆمار کر و کلیپ کر، و ل پتریا کەنالان هاتە پەخش کرن، و بەرهەمەکێ باش بوو و خەلکێ گەلەك حەز ژێ کر.
ناڤهاتی ئاماژە ب وێ چەندێ ژی کر کو من 36 ستران و 17 کلیپ هەنە، و ئەز پتر ب سترانا من بێریا تە کرییە ژ پەیڤ و ئاوازێن من بناڤودەنگ بووم، و بەهرا پتر یا سترانێن من ژ پەیڤ و ئاوازێن من بخوە نە، لێ من پەیڤ و ئاوازێن ئەحمەد عیسا فەتاح و یونس ئۆرەیی و دینۆ گولی و ئاوازێن زەمان محەمەد گۆتینە.
گۆت ژی:»گەلەك کەسان هاریکاریا من کرییە ب تایبەت فاخر ئەحمەد و زەمان محەمەد، و خێزانا من ژی پشتەڤانە بۆ کارێ من چونکی ئەگەر خێزانا مرۆڤی هاریکار نەبیت مرۆڤ نەشێت بەردەوام بیت ل سەر هونەری، و مرۆڤ نەشێت کارێن باش بکەت و یێ سەرکەڤتی بیت، ئەز هەر دوو ئامیرێن مۆزیکێ عودێ و سازا باغلەمە دزانم بژەنم، لێ ئەز پتر حەز ژ سازێ دکەم، دڤێت هونەرمەند خوە پێش بێخیت و بەرهەمێن باش دروست بکەت و مرۆڤ خوە نەهێلیت ب هیڤیا حکومەتێ ڤە هەتا کو هاریکاریا مرۆڤی بکەت، چونکی ل جیهانێ هەمیێ هونەرمەند هاریکاریا حکۆمەتێ دکەت».
زێدەتر ژی گۆت:»هونەرێ ستران گۆتنێ ژیانە بۆ مرۆڤی و دگەل مرۆڤی دژیت و دبیتە هەڤال لگەل مرۆڤی، هونەر هەم یێ ب سەبرە و هەم ژی مرۆڤ خزمەتا خەلکێ خوە دکەت، و ئەز پتر حەز ژ حەز ژ سترانێن سلۆ دکەم، و سترانێن کوردەواری بن ل سەر بابەتێن وەلاتی و دایکێ و ژیانێ و هەڤالینیێ، و هەمی کەس خوە تێدا ببینن، من دوو سترانێن نوو دروست کرینە، ئێك ژ وان ژ پەیڤ و ئاوازێن ئەحمەد عیسا فەتاحی نە، و سترانەك ژی بناڤێ سۆز ژ پەیڤ و ئاوازێن من بخوە نە، من یا کلیپ کری و ئامادە کری، و ب هاریکاریا شێرزاد شەرنەخی هاتیە تۆمارکرن، و کامیرە و مۆنتاژ لایێ جانسۆ زاخۆیی هاتیە کرن، من گەلەك سترانێن دی یێن خوەش هەنە کو ل داهاتی دێ وان ژی بەلاڤکەم».
نيشاندان