عـەمـەر هـەرگـوشـی

د مێژوویا خۆدا سەرۆك نێچیرڤان بارزانی د خەبات و تێكوشینا خۆ دا د بزاڤەكا گران دا بوویە داكو بشێت ب دەستەكی درێژتر د خزمەتا دۆزا رەوایا كوردایەتیێ دابیت و بشێت ئەو دیرۆكا تە ژی قوربانی و فیداكاری دەولەمەنتر لێ بكەت و ناڤ و ناڤودەنگیا كوردان رێزدارتر و هەژیتر لێبكەت.
جەنابێ وی د ڤێ ئەركێ خۆ دا زۆرێ سەركەفتی بوویە و قووناغ و ئەڤرازیێن زۆر یێن بڕی و كاریە وەك كارێزمایەك ببیتە دەنگێ ملەتەكێ بندەست و زۆرلێكری و شیایە ل چەقێ ناڤەندیێ دیبلۆماسێ، سەركەفتنێن مەزن ب دەست خۆڤە بئینیت و سەركردە و ناڤدارێن جیهانی شانازیێ ب تێكەلی و سەرەدەریا زانستی و دیبلۆماسیا وی بكەن د وارێ پەیوەندیێن نێڤدەولەتی دا و رۆلێ پیرۆزێ وی ل بنیاتنانا پەیوەندیێ دۆستایەتیێ و برایەتی ل سەر بناخێ رێزلێكنان و پاراستنا ئاسایش و ئاشتیێ ل دەڤەرا رۆژهەلاتا ناڤەراست.
ئەو سەركردەیێن جیهانی ئەوێن سەرەدانا بەغدایێ‌ دكەن حێبەتی دمینن دەما های ژێ دبیت كو هەمە لایەنێن ئیراقی ستایشێ رۆلێ پیرۆزێ سەرۆك نێچیرڤان دكەن د ئاڤاكرنا ئیراقەكا تازە دا، سەرۆك ئەردۆگان ب شانازیڤە دەستێ خۆ ل سەر سینگێ خۆ دادنیت بۆ سەرۆك نێچیرڤان و رۆلێ پیرۆزێ وی ل بنیاتنانا ئاشتیێ، ئەڤە ژبلی وێ رێزێ یا سەرۆكێ ڤاتیكانێ‌ و سەرۆك ترەمپ و سەرۆك ماكرۆن و سەركێ ئیتالیا و هەمی سەركردەیێن بەرنیاسێن دۆستێن كورد كو ب ئاشكەرا وەك سەركردەكێ جیهانی ل رۆلێ پیرۆزێ وی مێزە دكەن.
جەنابێ نێچیرڤان ب كریار و كریارێن خۆ شیا ببیتە شۆرشگێرەكێ راستەقینەیێ رێبازا بارزانی و هەمی شەهیدێن كوردستانێ و كاریە باوەریا گەلێ كوردستانێ و جەنابێ سەرۆك بارزانی ب دەست خۆڤە بینیت و ببیت گولەك د بەر سەرێ خانەوادێن شەهیدان و هەمی ئازاردیدەیێن كوردستانێ.
رۆلێ پیرۆزێ وی ل خزمەتا گەلێ كوردستانێ و د ئاڤەدانیا كوردستانێ بنیاتنانا بناخێ دیموكراتیەتێ دا جهێ شانازییا گەلێ كوردستانێ و هەمی دیموكراتخواز و پێشكەفتنخازێن كوردستانێ و دەڤەرێ یە و هەتا دیرۆك هەیە ب پێنڤیسێ زێرین دێ ل بەپەرێن خۆ نڤیسیت٠
ئەڤرۆ جەنابێ نێجیرڤان خۆیاكر كر كو رۆلەكی دلسۆزێ رێكا كوردایەتیێ و پارتایەتێ و پێشمەرگایەتیێ یە و هەتا سەر ئێسكی تێكەلی ئومێد و خوزیكێن بەلەنگازێن كوردستانێ یە و هەتا سەركەفتنا ئێكجاری بهێن دان ل دەف نینە.
ئەو رێزا سەرۆك نێچیرڤان بۆ وەلاتێ خۆ و میللەتێ خۆ پەیدا كری جهێ سەرفرازیا هەمی كوردەكێ خۆدان وژدانە و دلنیایی و ئارامیێ د بەشیتە هەمی خەلكێ كوردستانێ و لایەنێن سیاسیێن كوردپەروەر و مزگینیا پێشەرۆژەكا گەش و تەژی گرنژین و زەردەخ ددەتە تەڤایا هەڤوەلاتیان.

عـەمـەر هـەرگـوشـی

ئیرۆ ژ هەر دەمەكی پتر بەرچاڤ رۆهنی ئاشكەرا دبن و دۆخێ كو ناڤچە تێ دپەڕیت، ب هەمە ئالۆزی و ترسناكیا ڤە وەسا خۆیا دكەت كو مەترسی و گوهۆرینێن گەلەك مەزن دێ ل دەڤەرێ‌ روودەن، هەلبەت كوردستان ڤێجارێ ئەگەر راستەوخۆ نەكەڤیتە ناڤ چ شەڕان، رەنگە پەڕمیشێكن ئاگری بەربكەڤن، ژ بەر ڤێ چەندێ پێدڤیە هەمی پارت و لایەنێن كوردستانی، ئەوێن د خەما گەلێ كوردستانێ دانە رابنە سەرپیا و هەلوەستێ نەتەوەیی و كوردپەروەرانە یێ خۆ رابگەهینن و ژ بۆ بەرژەوەندیا بالا یا نەتەوەیی ژ هەمی دەمەكی پتر د تەبا و ئێكگرتی بن، دیارە كو دەمێ گۆتارا بۆری و ئێدی دەمێ كریارا یە پێدڤیە ب لەز هەمی لایەنێن كوردی خۆ ب بەرپرسیار بزانن د ڤێ دەمێ چارەنڤیسازدا ئێكگرتی و تەبا بن.
هاتنا ئیرانییان بۆ ئیراقێ هاتە سنوورداركرن و ژ نهۆ پێڤە ئیرانی، نكارن بێ ڤیزە بهێنە ئیراقێ، ئەمریكا داخواز ژ هەڤوەلاتیێن خۆ كر هەتا بشێن رۆژهەلاتا ناڤین خۆ بپارێزن و سەرۆك ترەمپی گۆت دێ شەڕێ ل سەر ئیرانێ فرەتر لێ هێت.
ئەڤە ڤێ چەندێ خۆیا د كەت كو ئەو ئاشتییا ئیراقیا خەبات بۆ دكر یا كەفتیە بن هەرەشەیان و مەترسیێن شەڕی، ئیران ژی ژ لایێ خۆڤە هەرەشەیان دكەت كو بەحرێن و كویت بگریت و دۆخێ ئیراقێ ژی تێكبدەت.
ئەوە بۆ دەمێ یازدە رۆژانە ل سەر ئێك ئیران دهێتە بومبەبارانكرن و ئەڤرۆ ب توندی تەهرانا پایتەخت ژی هاتە بومبە بارانكرن.
ڤێجا ئەگەر كوردستانی و ئیراقی بەری دۆخەك ئالۆزتر لێ بهێت، بەرنامەكی شایستە بۆ خۆ دانەنێن د دۆخێ شەڕان و ئالۆزیێن گران دا ئەگەر دوعایا بكەن نەخا چ پێ چێنابیت، وەسا دهێتە خۆیاكرن كو هەمی خۆ بۆ شەڕی بەرهەڤ دكەن و ئەوێن هەولا ئاشتیێ و تەبایێ ددەن دیار نینن.
یا دیارە كو ئیراقی نەشێن نە شەڕی راگرن نە شەڕی دەستپێبكەن بەلێ دكارن هەڤدوو بگرن و بەرژەوەندیا وەلاتێ خۆ ل بەرچاڤ بگرن و هەولبدەن ب كێمترین زیان ڤە ڤێ قووناخا گران دەرباس بكەن، بلا ئیراقی باش بزانن ئەگەر ئەو ب خۆ د خەما وەلاتێ خۆ و خەلكێ ئیراقێ، دا نەبن بلا چاڤەرێی هندێ نەكەن كو كەس ل شینا وان خەمێ لێ بخۆت و ل شوینا وان رۆندكان برێژیت.
ئەو بەرنامەیێ ئیرانێ بۆ ئیراقێ هەیی، خۆزی نیڤ هند ئیراقییان بەرنامە بۆ وەلاتێ خۆ هەبا، یان ئەو بەرنامەیێ ئەمریكا بۆ ناڤچە و ئیراقێ هەیی، خۆزی ئیراقی شیابان رۆلەكێ دیار د ڤان بەرنامەیان دا لەیزتبان، جهێ داخێ یە كو ئیراقی ئەڤرۆ ژ هەمی دەمەكی پتر د پەرتەوازە و پەریشانن و ژ هەمی دەمەكی پتر جوداهی و لێكترازان د ناڤبەرا وان دا هەیە.
گوناهەكا مەزنە لایەنێن كورد د ڤێ دەرفەتا مێژوویی دا، بیرێ پتر ل بەرژەوەندیێن حزبی بكەنەڤە و چارەنڤیسا گەلێ مە و بەرژەوەندیا بلندا نەتەوەیا كورد نەكە كارێ پێشیێ و ل سەر پرۆژەیەكی نەتەوەیی د ئامادە نەبن دەستان بئێخنە ناڤ دەستێ هەڤ و ل هەڤ بێن.

عـەمـەر هـەرگـوشـی

ئێك ژ شانازیێن گەلێ كوردستانێ ئەوە كو خۆراگرێن كورد رەوشتێ مەردایەتی و خۆراگریێ ل بنێ زیندانان پاراست و ب هزاران گەنجێن وەلاتێ مە ل سەردەمێ رژێما بەعس بوونە نموونەیێن بەرخۆدانێ و قەهرەمانیێ و ئامادەبوون پاتەیێ سیدارێ هەلبژێرن و شەهید بكەڤن، بەس یا كێم بۆ دوژمنی نەدانن؛ ل بن هیچ دۆخەكی ئەشكەنجەدانێ خۆ نەچەمینن، كوڕ و كچێن كوردستانێ شییان ل بنێ زیندانان دا كولتوورەكی كوردانە یێ پڕ شانازی نیشا جەلادێن مرۆڤ كوژ بدەن، جهێ داخێ یە كو ئەڤرۆ مرۆڤەكی وەكی كاك شاسوار خۆ ب كورد و سەركردە دزانیت و نەشیا ڤێ كولتوورێ رەسەنێ كوردایەتیێ بپارێزیت ب دو زەللەهێن كۆماندۆیا كەفتە سەر چۆكان و ئەوا د خەیالا كوردان و شۆرشگێران دا، نەبوو شاسواری ئەنجامدا, خۆ كرە ئالەتێ دەستێ یەكێتی و كەفتە جەنگەكا گران ل گەل كوردینیێ و پشتا خۆ كرە تاگیر و مەبدەئێن خۆ و هزار پلەیان بادا، ل جهێ هندێ كو ب سەربەزی د بنێ زیندانێ دا ئان بمریت ئان ب سەربەرزی بهێتەدەر و تەعدایێ قەبوول نەكەت ب سەرێ شۆر هاتەدەر و سەڕێ خۆ بۆ تەعدایێ چەماند و نوكە ژی بوو پشكەك ژ وان كەسێن كو تەعدا ل دژی وی و بزووتنەوەیا وی و تاگیرێن وی ئەنجامدای، هێشتا دخوازیت ببیتە تەعداكەرەكی خراپتر ژ یەكێتیێ‌ بۆ سەر ئازادیێ و پێشێلكرنا مافێ مرۆڤی و دوژمنایەتیكرنا هەرێما كوردستانێ.
چ كوردەكی دلسۆز باوەرنەدكر كو شاسوار دێ هەمی رێكوردان شكێنیت و دێ ناڤێ وی چیتە د دیرۆكێ دا كو ب لەزترین و زیرەكترین كەس دچوو كو ب ساناهی و ب كێمترین زەللەهان، كێم دانیت و تەعدایێ ل سەر خۆ قەبیل بكەت، من نەزانییە كەس ب ڤێ رەنگی پشتا خۆ د حزبا خۆ و دەستكەفتێن مللەتێ خۆ بكەت.
دەما كو شاسوار د زیندانێ دا بوو ئەندام پەرلەمانتار(ئۆمێد محەمەد) ل سەر لیستا نەوەی نوێ د ڤیدیۆیەكا بەردەست دا دبێژیت (فەخر و شانازیێ دبەم كو سەرۆكێ نەوەی نوێ دێ شێت مە ب ساناهی فرۆشیت، ئەز وەكی پەرلەمانتارەكی جولانەوەیا مە و هەمی پەرلەمانتارێن دیتر یێن مە و هەمی خۆبەخش و هەمی دەنگدەرێن مە بفرۆشیت بەس خۆ بچەمینیت بۆ ئێكەتی و پارتی دێ ئازاد بیت و هەمی تشتەك ژی دێ ب دویماهیك هێت، بەس ئەو ڤێ ئێكێ ناكەت ژ بەر دو ئەگەران، ئەگەرا ئێكێ ژ بەر وێ ئیرادەیێ ئەوا وی هەی و ئەو قەزیا وی باوەر پێ هەی، سێزدە سالە ئەز وی ناسدكەم چ ل راگەهاندنێ چ وەكی سیاسەت، ئەز دزانم چ مەعدەنەكێ هەی ئەز دزانم چەند مەردە، ئەگەرا دووێ ئەوە ئەو خۆ بدەستڤەنادەت، دا ئەم شەرمەزار نەبین ). ڤێجا ئەوە راستی خۆیا بوو ئەو مەعدەنێ كو كاك ئۆمید باس دكەت تەنەكە دەرچوو و ب ساناهی هەمی ئەندام پەرلەمان و خۆبەخشێن ل پش پشتا وی شەرمەزاركرن و پێچەوانەی بۆچوونێن هەمیان شاسواری خۆ ب ساناهی چەماند و ب سەرێ شۆڕ هاتە ئازادكرن، ڤێجا پرسیارا مە ژ هەمی تاگیر و خۆبەخشان و پەرلەمانتاران و ئەندامێن بزاڤا نەوەی نوێ ئەوە پشتی هنگۆ شاسوار ب ئازادی دیتی و مەعدەنێ وی یێ راستی هنگۆ ناسكری و هنگۆ ب هەردو چاڤێن خۆ دیت چاڤا وی هنگۆ جولانەوەیا خۆ فرۆت دا نازێن ئەوێن تەعدا و غەدرلێكری راگریت و ببیت پشكەك ژ وێ بەرنامێ دژە كورد و دژە هەرێم كو هەمی جار وی وەسا خۆیا دكر كو ئەو دلسۆزێ هەرێمێ و خەلكێ هەرێما كوردستانێ یە، ئەوە بەرپیێن وە رۆن بوون و ئاڤ زەلال بوو و رەش و سپی ژێكجودا بوون، ئێدی ئۆبالەكا مەزن ل ستویێ هەركەسەكییە دەما ب چاڤێن خۆ دبینیت مرۆڤەك بەرانبەر خەلكێ خۆ وە تاگیرێن خۆ بێ بەلێن و بێ هەلوەست و خائین دەرچوو و دیسا ژی هەر خۆ ب تاگیرێ وی بزانیت، هەمی ڤان كوردان ئەوێن دەنگێ خۆ دایە نەوەی نوێ، ب ئاشكەرا خیانەت ل وان هاتەكرن، ئەز باوەرم ژی خەلكێ كوردستانێ یێ هشیارە و چو جاران دوجا خۆ ل پەیاكێ نادەت كو پێشتر لێ تەپك بوو بیت، ئێدی ئەگەر شارسواری جارا ئێكی فێر ل دەنگدەری كر خۆدێ تولێ ژ شاسواری ڤەكەت، بەلێ ئەگەر جارا دوویێ فێل ل دەنگدەری كر خۆدێ تۆلێ ژ دەنگدەری ڤەكەت.
د دیرۆكێ دا گەلەكان خیانەت یا كری و بەلێ ژ شەرمان دا، خۆ ل خەلكی ڤەدشێرن و ل روویێ وان ناهێت بهێنە دیوانخانەیا من، من نە بیهیستیە مرۆڤێ خیانەتكار ب ڤێ رەنگێ شاسواری خۆ ب رێنیشادەر و بریاردەر ب خەلكی بدەت ناسین ل سەر بێسەروبەری بێ ئەقلیا خۆ یی بەردەوام بیت.
ئەوێ سڤكاتیێ‌ ب كولتوورێ خۆڕاگریا كوردان ل زیندانێ دا كری ب دو زەللەهان تەسلیم بی بۆ هندێ یی باشە دو زەللەهێن دی لێدەن دا دەست ژ خیانەتا خاكفرۆشیێ بەردەت.

عـەمـەر هـەرگـوشـی

پشتی جوداهی و ل هەڤنەهاتنەكا درێژ بۆ كۆسپ دروستكرن، د رێكا پێكئینانا حوكمەتا هەرێمێ و دژایەیكرنا بەرنامێ خزمەتگوزاریا هەرێمێ و حەزێن پارتی بۆ پاراستنا ئاسایش و ئاڤەدانیا هەرێمێ، نەوەی نوێ و یەكێتی نیشتمانی رێكەفتنەكا گوماناوی و بێسەروبەر واژۆكر و دڤێت نیشا خەلكێ كوردستانێ بدەن كوب دارێ زۆرێ دێ شێن بریار وهەلوەستێن خۆ یێن دژە نیشتمانی ب سەر سەرێ خەلكێ كوردستانێ دا سەپینن و ئەگەر نەشێن حوكمەتێ ژی پێكبینن ب ئاشكەرا دبێژن چ حوكمەت بێی مە ل كوردستانێ ناهێنە پێئانین كو ئەو ژی بۆمبەكا ترسناكە د رێكا پۆسەیا دیموكرسیەتێ و ڤێ هەڤسەنگیێ دا یا كو هەلبژارتنێن كوردستانێ هەنبەر هەمی لایەنێن كوردستانێ نیشانكری.
پشتی هەمی هەولێن یەكێتیێ‌ بۆ سەپاندنا دەسهەلاتا خۆ ب سەر خەلكێ كوردستانێ و فەشەل بۆناوێ، تازە ب شێوازەكی دیتر و ب كەڤلەكی دیتر وەكی پەپولا خۆ نیشاددەن كو دێ ئەو ل دویڤ حەز و مەرمێن خۆ و ئاخایێن خۆ دێ حوكمەتەكێ پێكئینن ل دژی ئیرادەیا خەلكێ كوردستانێ و زۆرینەیا رەهایا دەنگدەرێن كوردستانێ، هەر چەندە ئەو بۆ دزانن كو هەرێمەكێ پارتی لێ دەستهەلاتداربیت و ناهێلیت پێنگاڤێن ل دژی دیموكراتیەتێ و پیلانێن ناحەزێن كوردستانێ تێدا سەربگرن و دژێ ئیرادە خەلكێ كوردستانێ هیچ بریارەكێ بسەپینن.
هەمی دانن ل سەر هیچ تشتەكی نەوەی نوێ و یەكێتی نەكارینە رێبكەفن ب تنێ كارینە ل سەر بەرنامێ دژی پاریی و حوكمەتا هەرێمێ رێك بكەفن ، یا خۆیایە ئەو د دەستێ خودا نینەو ئەو ژ هەركەسكی چێتر دزانن كو ئەو رێكەوتنا وان بۆ خزمەتا كورد و كوردستانێ نینە و ب تنێ درێژە دانە ب فێ ئەركێ قورس ئەوێ ژ دەرڤە ب ریمۆت، كۆنترولێ بۆ دهێتە دیاركرن.
نەوەی نوێ و یەكێتی دو هێزێن دژ هەڤ و ناتەبا و هزر جودا د ناڤبەینا شەڤەك و رۆژەكان دا بوونە ئەزیز و خۆشتڤیێن هەڤدو و هەروەكی چو جاران خۆدان دو هزرێن جودا و بەرنامەیێن جودا نە بووبن، هەمی دزانن ئەو رێككفتنە ئەنجامێ باوەری و باوەریەكا دروست نینە د ناڤبەرا وان دا، بەلكی ئەنجامێ ڤان شەق و زەللایە ئەڤێن كاك شاسواری د بنێ زیندانێ دا ل سەر دەستێ كۆماندویا دا پێ ئێشای، یەكێتی ب خۆ ژی دزانیت نە شاسواری رۆژەكی باوەری ب یەكێتی هەبوویە نە نوكە باوەری ب بەرنامە و خەباتا یەكێتی هەیە، بەلێ بتنێ ژبەر هندێ یە كو دێ شێن ب رەنگەكی نا یاسایی كورسیێن پەرلەمانیێن نەوەی نوێ دێ ب كورسیێن یەكێتی ڤە سیكۆتین كەن و دێ وەكی ئێك فراكسیۆن هێنە پێش، كو وان ژبیركریە، ئەگەر وان خواستبا ببنە ئێك فراكسیۆن دڤییا بەری هەلبژارتنا ب ئێك لۆگۆ و ئێك بەرنامە و ئێك لیستە هاتبانە مەیدانێ و دەنگدەران بلا دەنگ ب ئێك لیستێ دابا، دا ئەڤرۆ ب شانازی ڤە گۆتبا كورسیێن مە سیه و نەه كورسینە، د مێژوویا چ وەلاتێن دیموكراسی دا نە بوویە دو فراكسیۆنێن دژهەڤ پشتی هەلبژارتنێ ب هەمان ئەنجامێ كورسیا خۆ بكەن ئێك لیست و ئێك فراكسیۆن ئەوە نە دیموكراسیەت رێكێ ددەت وان نە پارتی دیموكراتی كوردستان ئامادەیە دەمێ خۆ ل گەل ڤان بۆچوونان ب هەدەر بدەت.
پارتی ب ئاشكەرای لیستا خۆ راگەهاند و بەرنامەیێ خۆ بۆ خزمەتا خەلكێ كوردستانێ راگەهاند و كاندیدێن لیستا خۆ دیاركرن و ب گۆرەی ئەنجامێن راگەهاندنا كۆمیسۆنا بلندا هەلبژارتنا پارتی سەركەفتیا ئێكێ‌ یا بێ ڕكابەر بسەركەفت و كەس زیندانی نەكر و چ دەڤەر بومبەباران نەكرن و داخواز ژ هەمی لایەنان كر كەرەم كەن دا حوكمەتا هەرێما كوردستانێ ل سەر بنچینێ هەلبژارتنان ب گۆرەی ئستحقاقێن هەلبژارتنا حوكمەتێ پێكبینن، بەلێ یەكێتی پەنا بۆ هەمی شێوازێن دژەیاسا و دەستووری برن دا رێگریێ ل پێكئینانا حوكمەتێ بكەن و رێكەفتنەكا فاشل ل گەل نەوەی نوێ بكەن دا ئاستەنگەكا دی بئێخنە د رێكا پێكئینا حوكمەتێ دا و بۆ دەمەكی درێژێ دی خۆزیكێن گەلێ كوردستانێ بۆ پێكئینانا حوكمەتێ گیرۆ بكەن.

عەمەر هەرگۆشی

دەما مرۆڤ ل سۆشیال میدیایێ و دەزگەهێن راگەهاندنا یەكێتی رادمینیت دێ بینیت ب تنێ بەحسا ژمارەیا كورسیێن خۆ یێن پەرلەمانی دكەن و بهارێ بۆ خۆ دئینە چۆكان، باشە ئەگەر ئەو راست بێژن كو ئەو زۆرینەنە و دێ كارن پەرلەمانی كاڕا بكەنەڤە، بلا كەرەم كەن كەسێ‌ رێ ل وان نەگرتیە و حوكمەتا هەرێمێ و گەلێ كوردستان هەمی دێ هاریكاریا هەر لایەنەكی كەن كو بكاریت پەرلەمانی كاڕا بكەن و حوكمەتێ ب رەنگەكێ یاسای و دەستووری پێك بینن، ئەگەر ئێكێتی ل گەل جەماوەرێ كوردستانێ و تاگیرێن خۆ یا راستگۆ و خۆدان ئاخفتنا خۆ بیت، بلا ئەڤرۆ نەكەتە سوبەهی، هەر زویكا بلا داخوازا كۆمبوونا پەرلەمانی بكەت و هەمی لایەك ب رەنگەكی كوردانە و دلسۆزانە دێ د خزمەتا كۆمبوونا پەرلەمانی دا بن، داكو بشێن ڤێ ڤالاهیا مەزن یا گیرۆبوونا كاڕاكرنا پەرلەمانی پڕ بكەنەڤە.
هەمی خەلكێ كوردستانێ ل بەندا لایەنێن سیاسینە ب تایبەتی پارتی و یەكێتی كو ب لەز هەول بدەن ڤێ داخوازیا رەوایا خەلكێ كوردستانێ بئینە جی، ئەڤرۆ بەرپرسیاریەتەكا مەزنا ل ملێن پارتی و یەكێتی وەكی دو هێزێن سەرەكیێن كوردستانی كو د ڤێ قووناخا سەخت و ئالۆز دا بكاربن د ئاستێ حەز و خواستێن گەلێ كوردستانێ دا بن و ل گۆر ئەنجامێ هەلبژارتنا پەرلەمانی كاڕا بكەن و حوكمەتا هەرێما كوردستانێ پێكبینن، یەكێتی و نەوەی نوێ مە ژیێ مە بر هندی كورسیێن پەرلەمانی بهژمێرن و ل دەستگەهێن راگەهاندنێ دیاربكەن كو ئەو زۆرینەنە و هێزەكا جەماوەریا مەزنا ل پشت پشتا وان، ل ڤێرە پێدڤیە بێژین ئەگەر ئەو راست بێژن و ل گەل خەلكێ كوردستانێ د راستگۆنە بلا كەرەم كەن پشكداریێ د كۆمبوونا پەرلەمانی دا بكەن و هینگی سەنگا راستەقینەیا هەر لایەنەكی دێ دیاربیت و پێدڤی نابیت هەر رۆژ كورسیێن خۆ بهژمێرن.
زۆر جاران هندەك قوتابی پشتی تاقیكرنا وەزاری دێ ل گۆرەی پرسیارا نمرەیێن خۆ هەژمێرن هندەك قوتابی ژی دێ بێژنێ ڤان زویكا دێ ئەنجامێ تاقیكرنا ب رەنگی فەرمی دەرچیت، ڤێجا ئەوان ژی بلا كورسیان نەهژمێرن، بلا بهێنە پەرلەمانی رۆژا تاقیكرنا فەرمی یە و ئەنجامێن راستەقینە دێ خۆیابن بۆ دەر و جیرانان كا كی نوونەرێ راستەقینەیێ مللەتێ خۆیە.
ئەز باوەرم ئەگەر یەكێتی و نەوەی نوێ باوەری ب ئاخفتنێن خۆ هەبان، ئەو دا رۆژا ئێكێ پەرلەمانی كاڕا كەنەڤە و تاكلایەنە دا حكومەتێ پێك ئینن، گرفتا مەزنا وان ئەوە كو نكارن د رێكا هەلبژارتنان و ب رەنگەكی دیموكراتی تشتەكی زێدەرتر ب دەسخۆڤە بینن ژ ڤی تشتی یێن ژ لایێ پارتیڤە دەست وان دكەڤیت.
پارتی هەمی جاران خوازیارا هندێ یە كو گرفت و ئالۆزیان د رێكا گفتۆگۆیان و رەنگەكی برایانە چارەسەر بكەن، بەلێ دەما یەكێتی هەرەشا كاڕاكرنا پەرلەمانی ب پڕانیا كورسییان دكەت، دیسا پارتی منەتبارە ئەگەر ب رەنگی قانوونی و دەستووری ب ڤێ كاری رابیت و هەمی هاركاریێن شایستە دێ ئێخیتە د خزمەتا وان دا.
ئەو پەرلەمانە مولكێ هەمی كوردانە و بەرهەمێ خوین و قوربانیێن گەلێ كوردستانێ یە و جهێ چارەسەریا گرفت و كێشەیێن نەتەوەیی یە و پێدڤیە هەمی لایەن بەژنا خۆ بۆ نەوی بكەن و د خزمەتا پەرلەمانی دا بن.
پێدڤیە یەكێتی پەیڤێن خۆ بكەتە كریار و ئەوا ل پشت مایكرۆفوونان دبێژیت، بلا كەرەم بكەت ل هۆلا پەرلەمانی بسەلمینیت و وێ پشگیری و زۆرینەیا كورسیێن پەرلەمانی نیشا خەلكێ كوردستانێ بدەت.

عـەمـەر هـەرگـوشـی

ئیرۆ كوردستان یا كەفتیە د ناڤ دۆخەكێ‌ سەختێ‌ هەڤركیێن سەربازی و سیاسیێن ناڤچەیی و هەمی چاڤ ل سەر هندێنە هەر كەس ل گۆر بەرژەوندیێن نەتەوەیێن خۆ و وەلاتێ خۆ پێنگاڤان بهاڤێژیت.
ئەو دویكلا شەڕان و ئەو هەمی خوین رژتنە ل دەردۆرێ وەلاتێ مە، ئەنجامێن هندێنە كو هەر كەس و دزانیت كو پارێزگاریێ ژ بەرژەوەندیێن خۆ دكەن، ئەو شەڕێ قورسێ ئەمریكا و ئیرانێ هەمی ئەگەرێن هندێنە كو وان ولاتان دڤێت بەرژەوندیێن خۆ بپارێزن، پرسیارا هەرێ مەزن ئەوە ئەرێ گەلا بەرژەوندیێن گەلێ مە د چ بزاڤەكێ دانە؟
یان ئەو هێزێن پێداگیریێ ژ بەرژەوەندیێن بالا یێن گەلێ كوردستانێ دكەن ل كیڤەنە؟
پێدڤیە ل سەر هەمی لایەن و كەسەكی كوردپەروەر ئەڤرۆ ل مەیدانا خەباتێ ب رۆلێ خۆ یێ نەتەوەیی رابیت و شیان و هێزا خۆ بئێختە د خزمەتا دۆزا رەوایا كوردستانێ و هەمی بەژەوەندیێن كەسی دا و تایبەتی بئێخنە د خزمەتا بەرژەوەندیا نەتەوەی دا و هەمی لایەن خۆ ژ بەرژەوەندیێن بەرتەنگ یێن حزبایەتی بپارێزن، ل ڤێ قووناخا نازك ل گەلێ خۆ خۆدی دەركەڤن و گرنگیا كوردستانێ د جوگرافیا سیاسی دا بئێخنە بەرچاڤان و بكاربن د بەرهەڤ بن و د ئاستێ ترسناكیا روودان و و بوێرێن ناڤچەی بن.
كوردستان ل ئاسمانی نینە و یا ل ناڤچەیەكا ترسناك كو ل دەردۆرێ وێ ئاگر دباریت و كاڤل و وێرانیێ هەمی ناڤچەیێ گرتی، ئەگەر گەلێ كوردستانێ ب ئێكگرتن و تەڤاییا خۆ هێزا خۆ نیشا جیهانێ نەدەن وێ گاڤێ زیانێن مەزن دێ ب دۆزا نەتەوەیا كورد كەڤن و ترس دێ ل سەر هندێ پەیدا بیت كو ریسا كوردان دیسا ببت هری و دەستكەفتیێن گەلێ مە بكەڤنە بەر هەرەشە و گەفێن نەیارێن خاكا مە.
خواست و پەیام و دەستپێشخەریێن جەنابی سەرۆك بارزانی هەمی د چارچووڤەیێ ڤێ هندێ دانە كو ژ خەمخۆریا خۆ بۆ دۆزا رەوایا گەلێ كوردستانێ دئێختە د خزمەتا خەلكێ كوردستانێ دا، داكو بكاربن ڤێ قووناخا سەخت یا خەبات ب سەلامەتی ببرن و ئەو مەترسی و هەرەشێن دەردۆر كاریگەریەكا خراب ل سەر گەل و وەلاتێ مە نەبیت و خۆزی و ئومێدێن شەهیدێن كوردستانێ د پاراستی بن.
ژ بۆ بەرژەوەندیا گەلێ كوردستانێ هەقە هەمی لایەنێن كوردستانی ل دویڤ داخوازا سەرۆك بارزانی بێن و پێكڤە بجڤن دا بكارن ب رەنگەكی برایانە و گیانەكی كوردانە گرفتێن د ناڤبەرا خۆ دا چارەسەر بكەن و ب گیانەكی ئێكگرتی دەستان بئێخنە ناڤ دەستێ هەڤدو دا پتر كوردستانێ ئارام بكەن و ب دەستەكی درێژتر د خزمەتا تەناهیێ و ئاڤەدانیێ و دۆزا رەوایا كوردی دا بن.

عـەمـەر هـەرگـوشـی

پشتی دو سال ل سەر تەمەنێ هەلبژارتنێن پەرلەمانی بۆرین، هێشتا حوكمەتا هەرێما كوردستانێ پێكنەهایتیە و بەرژەنگ د وەسانە كو د دەمەكی نێزیك دا، ئەڤ ئێكە روینادەت و حوكمەت پێك ناهێت.
پشتی دو سالان ژ ئینان و برنا رستیەك بۆ هەمی كەسی ئاشكرا بوو كو ئەو هەجەت و بەهانەیێن یەكێتی كو كریە مەرج ژ بۆ پێكئینا حوكمەتی چ بنچینە و راستی ژبۆ نینە و ئەو ئەگەرێن پێكنەئینانا حوكمەتێ نینە، ئەگەرا مەزن و دیار یا پێكنەئینا حوكمەتێ ئیرادەیا یەكێتیە كو پتر مەیلا هەی ل گەل لایەنێن دیتر یێن نەحەزێن گەلێمە تێكەلیا چێكەت و پتر ل دویڤ خواست و شیرەتێن وان بزاڤێ بكەت و كێمتر ل دویڤ ئامۆژگاریێن گەلێ كوردستانی و پارتی بزاڤێ بكەت.
رەنگە ژ مێژە بیت یەكێتی بریار ستاندبیت و خۆ ئێكلاكر بیتەڤە كو نەهێتە ناڤا حوكمەتەكێ كو پێگێ گەلێ كوردستانێ ل كوردبەندێن نێڤدەولەتی ب هێز و قاهیم بكەت و كورد ببینە خۆدیێ وەلاتەكی ئارام و پێشكەفتی و ئازاد، ل دەستپێكا بانگەشێ هەلبژارتنا كاك بافلی، گۆت كەس بێی ئێكەتی نابیتە مودیر عامیش و پاشێ قوبادی ژی شەكرەك شكاند و گۆت حوكمەتەك ل كوردستانێ پێكناهێت؛ ئەگەر ب دلێ‌ بافلی نەبیت، ئەڤە ئاماژەیێن دیارن كو مەرەما یەكێتیێ‌ ل هەلبژارتنا پێكئینا حوكمەتێ نەبوو بەلكی بۆ رێگریكرنێ بوو ل پێكئینانا حوكمەتێ، چونكی ئەو وێ ئێكێ دزانن كو لایەنەكێ وەكی یەكێتی ب تنێ ل ژێر هیچ دۆخ و مەرجەكی نەشێت حوكمەتێ پێكبینیت، بەلێ ب تنێ دێ شێت رێگریێ كەت ل پێكئینانا حوكمەتێ، ئەو هەلوەستێن نوی و مەرجێن تازەیێن یەكێتی بۆ هندێ نینە دا حوكمەت پێكبێت، بەلكی بۆ هندێنە دا پێكئینا حوكمەتا هەرێمێ‌ گیرۆ بكەن و بێژنە ئاغایێن خۆ؛ كو د كارێ خۆ دا د سەركەفتی بووینە كو رێگری یا كری دا حوكمەتا كوردان و كوردستانێ سەرنەگریت، یەكێتی نیشتمانی و هەمی لایەنێن كوردستانی باش دزانن ئەگەر هەر لایەنەك ل هندەك مافێن خۆ ژی خۆش ببیت ل پێناڤ پێكئینانا حوكمەتێ، ئەوە شانازی و سەروەرییە بۆ وان نەخاسمە ئەگەر پتر ژ ئیستحقاقێن هەلبژاتنێ بۆ یەكێتی فەراهەم بكەن و ئاسانكاریێن پتر بۆ بكەن و ڤێ جار ژی قایل نەبیت.
یەكێتی ئەگەر د چ شۆلێن خۆدا سەكەفتن ب دەستڤە نەئینابیت؛ ئەڤە بێگومان د كۆسپ دروستكرن د رێیا پێكئینانا حوكمەتێ دا یا سەركەفتی بوویە.
د ماوەیێ دو سالێن رابردوو دا هەجەت و بەهانەیەك نەما نەئینن دا گرفتان بۆ پێكینانا حوكمەتێ چێكەن هەمی د بێ مفا و بێ بنەمابوون، بەلی یەكێتی دلێ خۆ پێ خۆشكر وەدزانی دێ باوەریێ ب خەلكی ئینن كو ئەو دلسۆزێن حوكمەتا هەرێمێ و دیموكراتیەتا هەرێمێنە، بەلێ هەر زویكا راستی خۆیا بوو بۆ هەمی لایەكی ئاشكرابوو كو دەستێ بینیا یێ كەتیە ناڤ مەسەلێ و یەكێتی نیشتیمانی و كاك بافل یێن گیرۆدە و حەیری مایین د ناڤبەرا خزمەتكرنێ ب خۆزی و ئۆمێدێن خانەوادێن شەهیدان، یانژی پایەبەند بوون ب ڤان سۆز و بەڵێنان ئەوێن یەكێتی داینە دوژمنێن گەلێ مە و ناحەزێن حوكمەتا هەرێمێ.
واتا و مانایا ئاخفتنا كاك قوبادی زۆرا مەزنە كو دبێژیت حوكمەتەك ل كوردستانێ پێكناهێت كو ب دلێ باڤلی نەبیت.
ڤێجا گرفتا كوردان زۆرا مەزنە پارتی و دیموراتخوازا هەمیان؛ دڤێت حوكمەتەك ل كوردستانێ پێك بێت ب دلێ كوردان بیت و د خزمەتا كوردستانێ دابیت، رەنگە یەكێتیی ژی حوكمەتەك بڤێت ب دلێ بافلی بیت و د خزمەتا بیانیان دابیت.

عـەمـەر هـەرگـوشـی

ئەڤە دو سال ل سەر هەلبژارتنێن پەرلەمانێ كوردستانێ دەربازبوون و هەتا نها نەكارینە پەرلەمانی كاڕا بكەنەڤە و حوكمەتا هەرێمێ پێكبئینن. هەر رێیەكێ پارتی گومان ژێ بر بیت؛ هانایێ بۆ بری كو بگەهن رێكەفتنەكێ كو ل بەر سیبەرا وێ حوكمەتا هەرێما كوردستان بهێڤە دامەزراندن ، ب مخابنیڤە بەربەست و كێشەیێن ناڤخۆ و دەرەكی نەهێلا ئەڤ ئارمانجا گەلێ كوردستانێ و پارتی بهێتە جی.
سەرۆك بارزانی ژ خەمخۆری و دلسۆزیا خۆ بۆ گەلێ كوردستانێ و خاكا پیرۆز، داخواز ژ هەمی لایەنێن كوردستانی كر كو پێكڤە بجڤیێن و چارەسەیەكا گونجای بۆ ڤێ رەوشا گران ببینن كو پارتی ب هەمی هێزا خۆ دێ پشتەڤانیێ لێ كەت.
هەلبەت پارتی د مێژوویا خۆدا قوربانیێن بێ ژمارە داینە دا گەلێ كوردستانێ ئازاد و رزگار و بەختەوەر ببیت؛ ئەڤرۆ سەرۆك بارزانی ب هەمی هێز و كاریگەریا خۆڤە ل مەیدانێ پشتەڤانی و هاریكاریا هەمی خەمخۆر و دلسۆزەكی كوردستانێ دكەت؛ شیانێن خۆ بمەزێخن گەلێ كوردستانێ ژ ڤێ چەقبەستیا دانوستانان و ب كاڕاكرنا پەرلەمانی و پێكئینانا حوكمەتا هەرێما كوردستانێ رزگار كەت و مزگینیا چارەسەریا بدەنە خانەوادێن سەربەرزێن شەهیدان و تەڤایا گەلێ مە.
هەمی دزانین ل ڤێ كاڤدانێن كو ناڤچە و ئیراق تێكەفتی، تشتەكی دبێژتە مە كو ل سەر گەلێ كوردستانێ و لایەنێن سیاسی پێدڤیە ل هەمی دەمەكی پتر د ئێكگرتی بن و بەرژەوەندیێن تەنگ یێن حزبایەتیێ بكەنە قوربانی بەرژەوەندیێن بەرزێن گەلی و نیشتیمانی ..قووناخ ڤێ ئێكێ ژ گەلێ مە دخوازیت كو هەمی لایەن ل دویڤ دەستپێشخەریا سەرۆك بارزانی بهێن و قوربانیان ب داخوازێن خۆ یێن حزبایەتی بدەن، دا نیشا جیهانا دەرڤە بدەین كو گەلێ كوردستانێ دیموكرات یی ئێكگرتی و تەبایە و ل پێناڤ خاك و بەرژەوەندیێن نەتەوەیی ئامادەنە هەمی قوربانیان بدەن، هەر ئەو ئێكە ژی كو گیانێ شەهێدێن مە ئاسۆدە دكەت و مزگینیێ ددەتە هەمی هەڤوەلاتیان كو گەلێ كوردستانێ ب ئێكگرتن و تەڤاییێ دێ بەر ب قووناخەكا مەزنتر ڤە بچیت و خەونێن گەلێ مە ب ساناهیتر دێ ب دەستڤەهێن.
بێگومان ب پلا ئێكێ پارتی و پاشێ هەمی لایەنێن دی یێن ل بەر تەرزایا هەڤسەنگاندنەكا مێژووی بۆ خەمخۆری و قوربانیدانێ ل پێناڤ رزگاربوون ژ ڤێ دۆخێ نەخواستی، ژبەر هندێ ژی گەلێ كوردستانێ باوەریەكا موكم یا هەی كو سەرۆك بارزانی بەرانبەر ڤێ بەرپرسیاریەتیا مێژووی دێ پشتەڤانەكێ ب هێز بیت بۆ هەر چارەسەریەكێ لایەنێن كورد ب فەر بزانن و كۆدەنگیەك ل سەر هەبیت.
یا ل سەر ملێ هەر كوردەكی خۆدان وژدان ئەڤە شیانێن خۆ بكاربینیت، دا ئەو پەرلەمان و ئەو حوكمەتە ب هێزەكا نووڤە بكەڤنە خزمەتا كورد و كوردستانێ و نەهێلن دلێ دوژمنێن خاكا مە ل سەر مە خۆش ببیت و ئەو ئازادی و رزگاریا نوكە كو رویبارەكێ‌ خوینێ یێ بۆ هاتیە رێتن ب هەدەر نەچیت، هەمی دلسۆزێن گەلێ كوردستانێ ل بەندێنە رۆژێن داهاتی مزگینیێن خۆش یێن ئێكرێزی و تەباییێ بدەنە خەلكێ كوردستانێ و حوكمەتا هەرێما كوردستانێ ژی ب دەستەكی درێژتر د خزمەتا خەلكێ خۆ دا بیت.

عـەمـەر هـەرگـوشـی

ل ڤان دوماهییان دا رۆلێ پیرۆزێ پارتی د وارێ سیاسەتێ و دیبلۆمەسیەتێ دا بۆ هەمی لایەكی ب دیار كەفت, پێگێ ب هێز و شیانێن پارتی ل دۆخێن سەخت و رۆژێن تەنگاڤیان خۆیا دبیت.
د دەمەكی دا كو ناڤچە و ئیراق د قووناخەكا سەخت دا دبۆرن؛ بارەگایێ سەرۆك بارزانی یێ بوویە رەشمالا مەزنا خڕكرنا لایەنێن ئیراقی بۆ لێك نێزیكبوون و برایەتیێ و تەباییێ و راوێژا جەنابێ وی وەك چارەسەری و دەرمان دبینن بۆ دۆخێ ئالۆزێ ئیراقێ ب تایبەت كو ئالەنگەری و كوسپێن مەزن د رێكا پێكئینانا حوكمەتێ دا هەبن.
سەردانا سەرۆكێ هەرێمێ رێزدار نێچیرڤان بارزانی بۆ بەغدا كاردانەڤەكا باش هەبوو ل سەر ئاستێ ناڤخۆی و دەرڤە، هەمی لایەن د هایدارن كو جەنابێ وی كاری رۆلەكێ پیرۆز بلەیزیت بۆ لێك نێزیكرنا لایەنێن ئیراقی و بەرگریكرن ژ ماف و خواستەكێن گەلێ كوردستانێ و شییا بەرچاڤرۆهنیەكا باش بدەتە خەلكێ كوردستانێ كو گرفێتن د ناڤبەرا لایەنێن ئیراقی و كوردستانی دا بەر ب چارەسەریێ ڤە ببەت، ئێدی پارتی ل هەردەرەكی ئامادەیە بۆ چارەسەرییان و دوماهیئینان ب گرژی و ئالۆزییان.
سەرەدانا رێزدار مەسرۆر بارزانی سەرۆكێ حوكمەتا هەرێما كوردستانێ بۆ توركیا پەردە ل سەر راستیەكێ راكر كو بێی ل بەرچاڤگرتنا هەلوەست و رامانێن حوكمەتا هەرێما كوردستانێ، گرفت و ئالۆزی ناهێنە چارەسەركرن و بێی چارەسەریەكا راستەقینە بۆ دۆزا رەوایا كوردی ئاشتی و برایەتی ل ناڤچێ‌ سەرناگریت، ئەو رۆلێ پیرۆزێ حوكمەتا هەرێما كوردستانێ د وارێ دیبلۆماسیەتێ و دیموكراسیەتێ و ئاشتیێ و ئاڤەدانیێ دا یێ بوویە جهێ سەرنج و تێبینیێن هەمی وەلاتێن هەڤسوی و د هەر تەنگاڤی و ئالۆزیەكێ دا راوێژیێ ب حوكمەتا هەرێمێ دكەن و ئێدی حوكمەتا هەرێمێ یا بوویە چەقێ قورساییا چارەسەركرنا گرفتێن ناڤچەیی و راوێژكرن ب را و بۆچوونێن جەنابێ سەرۆك بارزانی كو یا بوویە عورفەكا نێڤدەولەتی و ل ئەمریكا و ئەورۆپا و هەمی وەلاتێن ناڤچەیێ‌ پەنایێ‌ بۆ راوێژێن جەنابێ وی دئینن و راستگۆیی و شەهرەزایی و خەمخۆریا جەنابێ سەرۆك بارزانی ل پێناڤی ئاشتیێ و برایەتیێ و ئێكرێزیێ دا یا بوویە جهێ باورەیا هەمی دیموكراتخواز و مرۆڤ دۆستان.
گەلێ كوردستانێ ل هەمی پارچەیان ئەڤرۆ جەنابێ سەرۆك بارزانی ب پشت و پەنایێ خۆ دزانن و وەكی فریاد رەسەكی گاڤێن تەنگاڤیا ئومێدێ دخوازن ب هەبوونا جەنابێ وی كورد و كوردستان د دەستەكی ئەمین دا بن و ئەو بەڵایێن رووی د ناڤچەی كری ب كێمترین زیان ڤە ل سەر خەلكێ مەدا ببۆرن.
پارتی هەر رۆژ چێتر دسەلمینیت كو جەرگێ هێزا دیمۆكراسیەتێ یە و روویێ راستەقینەیێ كۆلنەدانا خەلكێ كوردستانێ یە بۆ ئازادی و رزگاریا وەلاتێ خۆ.

عـەمـەر هـەرگـوشـی

ژبلی هندێ كو گەلێ كوردستانێ ب دەردێ داگیركاریێ و زۆرداریا ل سەر خەلكێ كوردستانێ دنالینیت، یێن بووینە قوربانیێن ڤان شەڕ و جەنگان ئەوێن ل سەر وەلاتێن داگیركەرێن كوردستانێ دهێن مەشاندن، ل رۆژئاڤا بێی كو گەلێ كوردستانێ چ بەرژوەندی د ڤان شەڕان دا بن، یان رۆژەكێ ببنە ئەگەرەك بۆ شەڕی، چارەنڤیسێ وان ب رەنگەكی ئۆتۆماتیكی هات گرێدان ب رژێما داگیركەر و هەمی جاران ژی ژ لایێن هێزێن هندەك لایەنێن سووری ڤە هێرش دكرنە سەر، ل ڤێ شەڕێ نەخواستی دا ل رۆژئاڤا گەلێ كوردستانێ ژ هەمیان پتر قوربانیدان و خاكا وان ژ هەمی جهەكی پتر هات كاڤلكرن د دوماهیێ دا حساب بۆ هەمی لایەنان هاتەكرن و گەلەك ژ هێزێن تیرۆررست ژی هاتنە رێزداركرن، بەلێ هەتا ڤێ گاڤێ چ حسابەك بۆ گەلێ كوردستانێ و خاكا كوردان و قوربانیێن گەلێ مە نە هاتەكرن.
ل رۆژهەلاتێ كوردستانێ رەوشا كوردا خراپتر بوو
ئاگرەكی ژ هەمیان هەلتر ب سەر سەرێ كوردان دا باری ژمارەكا زۆرا كوردان كو ب زۆرەكی ل رێزا سوپایێ ئیرانی دابوون هاتنە كوشتن؛ بێ ژمار باژێران كوردان هاتنە بومبەبارانكرن، ژ هەمیان پتر باجا شەڕەكی دا كو نە سەر ل ناڤ سەرابوو، نە پەز ل ناڤ پەزابوو، ژ دویر و نێزیك پەیوەندی ب شەری ڤە نەبوو، نوكە ژی پشتی كاڤلكرنا ئیرانێ رۆژهەلاتێ كوردستانێ ژ كاڤلكرنێ بێ پار نەبوو برینێن گەلێ كوردستانێ ژ هەمیان كویرتر و ب ژانتر لێ هاتن، دەما كو ئیران د بن ئابلۆقەیا ئابوەری دا ب دەردێ گران دنالینیت و برس و نەداری گەلێ ئیرانێ دگریت؛ بەلایا هەرا مەزن تووشی كوردان دبیت و نەداری و ئابلۆقەیا ئابووری ژ هەمیان پتر كاریگەریێ ل سەر دكەت، د هیچ دەنگوباسان دا ناڤێ كوردان ناهێت ئینان و چ حساب بۆ كوردان و مافێن نەتەوەیێ كورد ناهێتە كرن.
مە هەمیان ل بیرە دەما رژێما دكتاتۆرا سەدام خاكا كوێتێ داگیركری؛ گەلێ كوردستانێ ژ عەرەبان پتر زیان ڤێكەتن و قوربانیێن بێ شۆمار دان، نە رۆژەكێ كوردان خواستیە كو كوێت بهێتە داگیركرن وە نە د بەرژەوەندیا كوردان دا بوویە، ل دویماهیێ ژی ل جاتی هندێ كو حساب بۆ مافێن گەلێ كوردستانێ بهێتە كرن، سەدام وەكی گورگێ هار بەردا خەلكێ كوردستانێ و مەزنترین كۆچبەری و د دیرۆكا ناڤچێ دا هاتە ئەنجامدان.
گونەهەكا مەزنە گەلێ كوردستانێ باجەیا هەلەیێن داگیركەرێن كوردستانێ بدەن و ژ لایێ جڤاكا نێڤدەولەتی و نەتەوێن ئێكگرتی ڤە، ئەینی حسابا بۆ داگیران دهێتەكرن بۆ كوردان ژی بكەن، چونكو زۆرداریەكا مەزن ل سەر گەلێ كوردستانێ ژ لایێ داگیركەران ڤە دهێتە مەشاندن، گەرەكە زلهێزێن جیهانی سۆز و رێزەكا مەزن بۆ مافێن نەتەوەیێن گەلێ كوردستانێ هەبیت و ل بەر رۆناهیا گاردا مافێن مرۆڤی و ل دۆر قانوونا نێڤدەولەتی سەرەدەری ل گەل كێشەیا نەتەوەییا كوردی بهێتەكرن و چارەسەریێن گونجای بۆ ڤەبینن، هەمی جاران بزاڤا رزگاریخوازا كوردستانێ تەكەزی كریە كو چو جاران رۆژهەلاتا ناڤین ئارامیێ ب خۆڤە نابینیت ئەگەر كێشەیا گەلێ كوردستانێ بێ چارەسەر بمینیت.