NO IORG
Authors Posts by سالح محه‌مه‌د ته‌يرۆ

سالح محه‌مه‌د ته‌يرۆ

سالح محه‌مه‌د ته‌يرۆ
52 POSTS 0 COMMENTS

72

رۆژنامه‌ڤانی پیشه‌یه‌كا ئه‌خلاقی و مرۆڤی یه‌، ئه‌ركێ وێ كۆمكرن و لیكۆلینێن ل سه‌ر راستیا ده‌نگ و باسان و د رێا سازییه‌كا راگه‌هاندنێ را بگه‌هینته‌ وه‌لاتیان. پتریا جاران ژی گرێدایی روودانێن رۆژانه‌یه‌، دیسا پره‌كا په‌یوه‌ندیانه‌ دنێڤبه‌را خه‌لكی و ده‌ستهه‌لاتێ دا و ب هه‌می ئالیێن خۆڤه‌ و د سیسته‌مێ برێڤه‌برنا ده‌ستهه‌لاتا دیمۆكراسی دا ده‌ستهه‌لاتا چارێ یه‌ ل حوكمرانیا ده‌وله‌تێ، له‌وما فه‌ره‌ مرۆڤێ رۆژنامه‌ڤان، نه‌مازه‌ هه‌كه‌ گرێدایی سازیه‌كا راگه‌هاندنێ بیت (رۆژنامه‌ و كۆڤار) وه‌كو په‌یامنێر ڤی پیشه‌یا ئه‌خلاقی ب ئه‌مانه‌تڤه‌ بگه‌هینیت و نه‌ك ب تنێ ئارمانجا وی ره‌شكرنا به‌رپه‌رێ رۆژنامێ ب چه‌ند دێركه‌كانه‌ و ب مانشێته‌كێ مه‌زن و ئارمانج ل به‌خشینا سه‌رێ هه‌یڤێ بیت، كو ب هزرا من ئه‌ڤ جۆره‌ رۆژنامه‌ڤانه‌ هه‌كه‌ د هه‌می ژیانا خۆ دا د ڤی ئه‌ركی دا بیت، نابیته‌ رۆژنامه‌ڤان و نڤیسكاره‌ك و نكاریت ب دروستی خزمه‌تا په‌یڤا ره‌سه‌نا كوردی و خزمه‌تا گه‌لێ خوه‌ بكه‌ت و وی پیشه‌یێ ئه‌خلاقی و مرۆڤایه‌تی ژی بگه‌هینیت، چونكو سه‌ره‌ده‌ریكرنا ڤان كه‌سێن هه‌ وه‌كو كارگه‌ره‌ك ل گه‌ل سازیه‌كێ دایه‌ نه‌ك وه‌كو راگه‌هاندكاره‌كێ خودان شیان كو ئارمانج ئه‌و بیت ببیته‌ راگه‌هاندكار و رۆژنامه‌ڤانه‌كێ سه‌ركه‌فتی، ره‌نگه‌ خه‌لكه‌ك پرسیار بكه‌ت و بێژیت هه‌ر كاره‌ك ل گه‌ل هه‌ر داموده‌زگه‌هه‌كێ بهێته‌كرن ب به‌رامبه‌ره‌؟ ئه‌ڤه‌ راسته‌ مافه‌كێ هه‌ر تاكه‌ كه‌سه‌كێ یه‌ كو هه‌مبه‌ری وی كارێ دكه‌ت ل به‌رامبه‌ر ژی هه‌بیت، چونكو ژێده‌ره‌كێ برێڤه‌برنا ژیانا وی یه‌، لێ یا گرنگ ئه‌وه‌ كو هه‌رده‌م ب چاڤه‌كێ بلند به‌رێ خوه‌ بده‌ته‌ ڤێ پیشه‌یی و هه‌رده‌م هه‌ول بده‌ت ئارمانجا گشتی و خزمه‌تكرنا گه‌ل و وه‌لاتێ خوه‌ ل پێشیا خزمه‌تا كه‌سایه‌تیا خوه‌ دابنێت، دیسا فه‌ره‌ مرۆڤێ رۆژنامه‌ڤان كه‌سانه‌كێ ب وێره‌ك بیت و هه‌رده‌م هه‌ول بده‌ت ل راستیان بگه‌رهێن و دژی كارێن گه‌نده‌لڤان و گه‌نده‌لكاران بیت و هه‌ر كێموكاسیه‌ك ژی ل هه‌ر سازیه‌كێ ببینیت و هه‌ول بده‌ت به‌لگه‌یێن راست و دروست ل سه‌ر كۆم بكه‌ت و بگه‌هینته‌ سازیێن په‌یوه‌ندیدار، چونكو مه‌ بڤێت یان نه‌ڤێت راگه‌هاندن دڤیا ببیته‌ چاڤدێر ل سه‌ر كاروپرۆژێن سازیێن حوكمه‌تێ هه‌تاكو بكاریت وی ئه‌مانه‌تی ب ئه‌مانه‌تڤه‌ بگه‌هینیت و پتر خزمه‌تا گه‌ل و وه‌لاتێ خوه‌ بكه‌ت، ل ڤێره‌ چه‌ند پرسیار دهێنه‌ پێش، ئه‌رێ ئه‌ڤ جۆره‌ كه‌سه‌ ب تنێ ئه‌و به‌رپرسیارن ل ڤی ئه‌ركی یان ئه‌و سازیا راگه‌هاندنا ئه‌و ب سه‌رڤه‌ هنده‌ك به‌رپرسیاره‌تی دكه‌ڤیته‌ ستوویێ وان؟ باشه‌ بۆچی هه‌تا نوكه‌ رۆژنامه‌ڤانه‌كێ ده‌ڤه‌را به‌هدینان نه‌شیاینه‌ ئێك گه‌نده‌لڤانان ئاشكرا بكه‌ن و نه‌مازه‌ ل سنۆرێ ده‌ڤه‌را به‌هدینان؟ ب هزرا من ب تنێ ئه‌ڤ رۆژنامه‌ڤانه‌ به‌رپرسیار نینه‌ به‌لكو ئه‌و سازیێن ئه‌و ب سه‌رڤه‌، ئه‌و ژی به‌رپرسیارن ژ به‌ركو فه‌ره‌ هنده‌ك جاران ئه‌و ژی ل گه‌ل په‌یامنێرێ خوه‌ ڤێ داخوازیێ لێ بكه‌ن و هه‌كه‌ دیت و ب درێژاهیا وی ده‌مێ ل گه‌ل كار دكه‌تن، ب تنێ ئارمانجا وی كۆمكرنا دراڤی یه‌ بگه‌هنه‌ قه‌ناعه‌تێ كو ئه‌ڤ كه‌سه‌ هه‌ژی وی پیشه‌یی نینه‌، چونكو مه‌ گۆت پێدڤی یه‌ مرۆڤێ رۆژنامه‌ڤان و راگه‌یاندكار دڤیا یێ وێره‌ك بیت و ل چه‌وانیا نه‌ره‌ڤیت و به‌رگریێ ل مافێن گشتی یێن ڤی ملله‌تی بكه‌ت و خوه‌ ب خودانێ راستی و سه‌روه‌ت و سامانێ ئه‌ڤی ملله‌تی بزانیت ئه‌وێن خه‌لكه‌ك ب غه‌در و خیانه‌ت بۆ خوه‌ حه‌لالكری، لێ ب مخابینڤه‌ دبێژم كو هه‌تا نوكه‌ مه‌ ئه‌ڤ جۆره‌ رۆژنامه‌ڤانه‌ ل ده‌ڤه‌را به‌هدینان نه‌دیتینه‌ و هه‌كه‌ هه‌بن ژی زۆر دكێمن و هه‌كه‌ نه‌ بێژین هه‌ر نینه‌، هه‌ر چه‌نده‌ چو ده‌مه‌كێ ئه‌ز ل گه‌ل هندێ نینم و نه‌بوویمه‌ كو رۆژنامه‌ڤان رابیت ب ناڤزراندنێ یان ل ئاسایشا نه‌ته‌وی بده‌ت، لێ فه‌ره‌ یێ هشیار بیت و په‌یوه‌ندیێن وی ل گه‌ل هه‌می سازیه‌كێ د موكم بن و ل دووڤ راستیان بگه‌ریێت، له‌وما جاره‌كا دی دبێژم ئه‌و رۆژنامه‌ڤانێ ب تنێ ئارمانج كۆمكرنا دراڤی بیت نه‌ دبیته‌ رۆژنامه‌ڤان و نه‌ دكاریت خزمه‌تا گه‌ل و وه‌لاتێ خوه‌ بكه‌ت و یادی ژی بلا به‌رسڤ بۆ خوینده‌ڤانان بیت.

146

هه‌ر چه‌نده‌ ئه‌ز ل ڤێره‌ نا زڤرمه‌ دیرۆكا ملله‌تێ‌ كورد بۆ پابه‌ندبوون و پێگیركرنا وان ب ئایینێ‌ پیرۆزێ‌ ئیسلامێ‌، چونكو یا دیار وبه‌رچاڤه‌ كو ملله‌تێ‌ كورد ژ هه‌می نه‌ته‌وه‌كێ‌  دیتر ساناهیتر بوویه‌ كو بوویه‌ بوسلمان، لێ‌ هه‌رده‌م ئه‌ڤی ملله‌تی باوه‌ر زوو ب زوو باوه‌ری ئینایه‌، ڤێجا نزانم ژ دلسۆزی و راستۆیا وان بوویه‌ یان ژ نه‌زانین و ساده‌ و ساویلكاتیا وان بوویه‌ و خه‌لكه‌كێ‌ دوژمن و نه‌حه‌ز فێل لێكرینه‌، ئه‌ڤجا ب هه‌ر ئه‌گه‌ره‌كێ‌ بیت، تاكو ژ بابه‌تێ‌ مه‌به‌ست دوورنه‌كه‌ڤم كو ئه‌و ژی ئه‌ڤ مانشێتا بابه‌تی یه‌ و بێگومان د سیسته‌مێ‌ دیموكراسیێ‌ دا بیروبۆچوون و ره‌خنه‌ دئازادن، هه‌ر كه‌سه‌ك یێ‌ ئازاده‌ ل سه‌ر چ بیروبۆچوون بیت، لێ‌ چو ده‌مه‌كێ‌ ئه‌ز ل گه‌ل وێ‌ ئازادیێ‌ نینم كو ببیته‌ ئه‌گه‌ر و كارتێكرنه‌كا نیگه‌تیڤ ل سه‌ر ئاسایشا هه‌رێما كوردستانێ‌ هه‌بیت و جهێ‌ مه‌ترسیێ‌ بن، ئه‌م هه‌می دزانین كو هه‌ر ژ پشتی سه‌رهلدانا گه‌لێ‌ كوردستانێ‌ ل بهارا ساڵا (1991) ده‌لیڤه‌كا زێرین بۆ گه‌لێ‌ كوردستانێ‌ دروستبوو وگه‌لێ‌ مه‌ شیا بێهنا ئازادی و سه‌رفه‌رزایێ‌ بكێشیت كو ئه‌و ب سه‌دان ساڵ بوو ملله‌تێ‌ كورد خه‌بات و به‌رخودان و قوربانیدان ژێرا دكر و د دان، هه‌ر ل ڤێ‌ ئازادیێ‌ كو دوژمن و نه‌حه‌ز و نه‌یارێن كوردستانێ‌ چاڤ پێ‌ بلند نه‌دبوون هزره‌كا دی یا دوژمنكاری و ل ژێر په‌رده‌یه‌كا دی یا ئایینێ‌ ئیسلامی بكارئینا، كو ئه‌و ژی هزرا سه‌له‌فی یا توندره‌و بوو نه‌ یا دروست و پاك یا په‌یاما ئه‌سمانی پێ‌ هاتی و پێكئینانا گرۆپێن ئیسلامی یێن توندره‌و نه‌مازه‌ ل سنۆرێن پارێزگه‌ها سلێمانیێ‌ مینا (انصار الاسلام، جند الاسلام …هتد) كو ئه‌ڤ جۆره‌ هزره‌ دژی سیسته‌مێ‌ دیمۆكراسیێ‌ و هه‌لبژارتنایه‌ و باوه‌ری ب ڤی سیسته‌می هه‌ر نینه‌، لێ‌ شیان و ڤیان دو تشتێن ژێكجودانه‌ و هه‌ر ئه‌و هزرێن توندره‌و یێن دبێژنه‌ خوه‌ سه‌له‌فی رۆژ ب رۆژ به‌ربلاڤ  بوون و هه‌تا شیان بۆ چه‌ند هه‌یڤه‌كان ده‌ڤه‌ره‌كێ‌ داگیر بكه‌ن و حوكمرانیێ‌ ب هه‌مان هزرا نوكه‌ داعش دكه‌ن په‌یره‌و بكه‌ن كو ئێك ژ وان هزران ئه‌و بوو، كه‌سێ‌ نه‌چیته‌ نڤێژا هه‌ینیێ‌ ل وی سه‌رده‌مێ‌ (300)سێ‌ سه‌د دینار ژێ‌ دهاتنه‌ وه‌رگرتن وه‌كو سزایه‌كێ‌ ئایینی و قه‌ده‌غه‌كرنا ئافره‌تی ل خویندنێ‌ وگوه نه‌دانا ئامرازێن موزیكێ‌ ولێدانا جه‌لدان و..هتد ، لێ‌ زوی ب زوی ده‌ستهه‌لاتا حوكمه‌تا هه‌رێما كوردستانێ‌ هه‌ست ب وێ‌ مه‌ترسیا مه‌زن یا وان توندره‌وان كر و ب هه‌ڤكاری ل گه‌ل ده‌وله‌ته‌كا مه‌زن یا ئه‌مریكا شیان وان لایه‌نێن توندره‌و ژناڤببه‌ن، هه‌ر چه‌نده‌ وه‌كو حوكمرانیا وان ژ ناڤچوو لێ‌ وه‌ك هزر هه‌تا نوكه‌ كارتێكرنا خوه‌ هه‌یه‌ و به‌لگه‌ه ل سه‌ر گۆتنا مه‌ په‌یوه‌ندیكرنا گه‌نجێن وێ‌ ده‌ڤه‌رێ‌ ب ناڤ رێزێن داعش نوكه‌ ژی  یا به‌رده‌وامه‌. ئه‌ڤرۆ ژی كو ئه‌م دبینین هنده‌ك ژ ڤان بیروباوه‌رێن توند یێن ئیسلامی كو خوه‌ ب سه‌له‌فی دده‌نه‌ نیاسین هه‌مان رێبازا وان هه‌یه‌ كو عیباده‌ت و به‌ركرنا جل وبه‌رگێن وان وسه‌ره‌ده‌ریا وان نه‌ك یا وه‌كی مه‌ بوسلمانا یه‌ و ئه‌م رۆژانه‌ ژی لبه‌رچاڤێن خوه‌ دبینین، دیسا ب هزرا ئه‌ڤان كه‌سێن هزر به‌رته‌نگێن ئیسلامی ب تنێ‌ ئه‌و د دروستن وئه‌م بوسلمانێن دی هه‌می بیدعه‌چی وخورافاتچینه‌ و ئه‌وێ‌ وه‌كی وان نه‌بیت ئه‌و وان ب دروست نزانن و هه‌تا پێگیریێ‌ ژی ب چ فه‌توایێن لیژنا فه‌توایا ئیسلامی یا وه‌زاره‌تا ئه‌وقا وكاروبارێن ئایینی ل هه‌رێما كوردستانێ‌ ناكه‌ن و به‌لگه‌ه ل سه‌ر گوتنا مه‌ ل ده‌مێ‌ كو (سلف العقاری) ژ لایێ‌ لیژنا فه‌توایا  یا سه‌ر ب وه‌زاره‌تا ئه‌وقافا كاروبارێن ئایینی ڤه‌ ل حوكمه‌تا كوردستانێ‌ هاتیه‌ دان كو حه‌لاله‌ خه‌لك بۆ خوه‌ وه‌ربگریت ڤان سه‌له‌فیان حه‌رام دكر، ئه‌ڤان كه‌سێن هان باوه‌ری ب سیسته‌مێ‌  په‌یره‌وكرنا پرۆسیسا دیمۆكراسی وهه‌لبژارتنان نیه‌ و ئه‌ز باوه‌رم چه‌ندین هه‌لبژارتنێن ل كوردستانێ‌ هاتینه‌ كرن ئه‌ڤان جۆره‌ كه‌سان ئه‌گه‌ر چووبنه‌ سه‌ر سندوقێن ده‌نگدانێ‌ ژی ده‌نگ نه‌دایه‌ وكارتا وان یا سپی بوویه‌ و چوونا وان ژی ژ به‌ر ترسێ‌ بۆیه‌، هه‌لبه‌ت ل ده‌مێ‌ كو مرۆڤی باوه‌ری ب سیسته‌مێ‌ دیمۆكراسی نه‌بیت بێگومان خودان باوه‌ریه‌كا دی یه‌، ژمێژه‌یه‌  ئه‌ز ل وێ‌ باوه‌ریێ‌ دامه‌ كو ئه‌ڤ جۆره‌ كه‌سه‌ مه‌ترسیان وان ژ رێخراوا تیرۆرستا قاعیده‌ و داعشا نوكه‌ كێمتر نینه‌ و نه‌خۆشیه‌كا كوشنده‌ و مه‌ترسیدار ل سه‌ر هه‌رێما كوردستانێ‌ یه‌، له‌وما باشتر ئه‌وه‌ كو تشت ژ نیسكێ‌ ئه‌م نه‌هێلین ببیته‌ گیسك، هه‌لبه‌ت به‌رفره‌هبوونا ڤێ‌ هزرا توندره‌وی ژی ئه‌گه‌ر و سه‌ده‌م و هانده‌ر و پالپشتێن خوه‌ هه‌نه‌ و ژبلی دوژمنێن ده‌ره‌كی خه‌لكه‌كێ‌ دی هه‌یه‌ كو هه‌رده‌م هه‌ول دده‌ن ئه‌ڤێ‌ هزرا توندره‌ویا سه‌له‌فی به‌رفره‌ه بكه‌ن د ناڤ جڤاك و ملله‌تێ‌ مه‌ دا، نه‌مازه‌ هنده‌ك مامۆستایێن ئایینی ئه‌وێن هه‌مان هزر هه‌یی ((مه‌به‌ستا من هه‌می ماموستایێن ئایینی نینه‌)) و هه‌روه‌توف هنده‌كێن دی كو دبنه‌ ئه‌گه‌را هه‌لگرا ڤێ‌  ڤایروسێ‌ و به‌لاڤبوونێ‌ ڤێ‌ نه‌خۆشیا كوشنده‌ د ناڤ جڤاكێ‌ مه‌د ا كو ئه‌و ژی ئه‌و خه‌لكه‌ یێ‌ نیڤ مامۆستایی ئایینی كو ده‌رچوویێ‌ چو مزگه‌فته‌كا مه‌زن یا ئایینی و په‌یمانگه‌ه و كولیژه‌كا ئیسلامی  و باوه‌رنامه‌كێ‌ نینه‌ و ئینانا نامیلكه‌ و پرتووكێن ده‌وله‌تا سعودیا ویێن عه‌ره‌بی هه‌مان هزر هه‌یی و نه‌مازه‌  ل ده‌مێ‌ كو خه‌لكه‌كێ‌ هه‌مان هزر قه‌ستا سعودیێ‌ دكه‌ن بۆ بجهئینانا عومرێ‌ و حه‌جێ‌ وهه‌روه‌توف كه‌ناله‌كێ‌ ئاسمانی یێ‌ تایبه‌ت ب ڤان هزرانڤه‌ و په‌خشێن خوه‌ یێن رۆژانه‌ په‌خش دكه‌ت. له‌وما فه‌ره‌ كو په‌رله‌مانێ‌ كوردستانێ‌ و حوكمه‌تا هه‌رێما كوردستانێ‌ ب گشتێ‌ و نه‌مازه‌ وه‌زاره‌تا ئه‌وقاف و كاروبارێن ئایینی هزره‌كێ‌ بۆ ڤان جۆره‌ كه‌سانێن توندره‌وێن ئیسلامی سنۆره‌كێ‌ بۆ دابنێن و زیان ل نیڤه‌كێ‌ ژی بزڤریته‌ڤه‌ هه‌ر قازانجه‌ و بلا ئازادیێ‌ ژی سنۆرێن خوه‌ هه‌بن و ئه‌و سنۆر بهێنه‌ پاراستن ئه‌وێن دبنه‌ ئه‌گه‌را شێواندنا ڤێ‌ ئه‌زمۆنا مه‌ یا دیمۆكراسی، ئه‌گه‌ر خودێ‌ نه‌خواسته‌ ئه‌ڤێ‌ جارێ‌ رێخراوا تیرۆرستا داعش به‌ر ب كوردستانێ‌ زێده‌تر هاتبان ئه‌ز باوه‌رم ئه‌ڤ جۆره‌ كه‌سه‌ دا ب گه‌رمی پێشوازیا وان كه‌ن و سامان و شه‌ره‌ف و كه‌رامه‌تا مه‌ دا بۆ خوه‌ حه‌لال كه‌ن وه‌كو غه‌نیمه‌، له‌وما دبێژم داعش ژی ل هه‌رێما كوردستانێ‌ هه‌نه‌، ل دووماهیێ‌ فه‌ره‌ د هشیاربین ژ ڤان جۆره‌ كه‌سان وگه‌نج و لاوێن خوه‌ هشیار بكه‌ین و به‌رده‌وام د هوشیاریێ‌ دا بن ژ پیلانێن وان تاكو ئه‌ڤ ده‌ستكه‌فتیێن هه‌رێما كوردستانێ‌ بهێنه‌ پاراستن و بگه‌هیننه‌ هه‌می مافێن خوه‌ یێن ره‌وا.

website security
WP Facebook Auto Publish Powered By : XYZScripts.com