ساڵح محه‌مه‌د ته‌یرۆ
ل دووڤ سیسته‌مى پارتایه‌تى و خوه‌ه‌گونجاندن ل گه‌ل بارودۆخێن نوو و پێداچوون و هه‌لسه‌نگاندنا كارێن حزبى و هاتنا خوینه‌كا نوى هه‌ر حزبه‌ك ل دووڤ په‌یره‌ و پرۆگرامێ خوه‌ چه‌ند سالان جاره‌كێ كۆنگرێ خوه‌ ئه‌نجام دده‌ت ، ل دووڤ ئه‌وا بریارا ل سه‌ر هاتیه‌ دان پارتى دیمۆكراتى كوردستان ل به‌ره‌ كۆنگرا خوه‌ یا (14) ل دوماهیا ئه‌ڤ ساله‌ ل باژێرێ دهۆكێ ئه‌نجام بده‌ت.
یا دیاره‌ پێنگاڤا ئێكێ یا كۆنگره‌ی هه‌ر حزبه‌كێ ده‌ستنیشانكرنا نوونه‌رێن ئه‌ندامێن وى حزبێ یه‌ بۆ كۆنگره‌یێ، له‌وما بۆ كۆنگرێ داهاتى یێ پارتى پێدڤیه‌ كۆمه‌كا مه‌رجان بهێنه‌ دانان بۆ هندێ كه‌سێن خودان شیان و خزمه‌ت و شاره‌زا د كارێ حزبى دا خوه‌كاندید بكه‌ن نه‌كو هنده‌ك كه‌س خو كاندید بكه‌ن كو رامان و مه‌به‌ستا كۆنگره‌یێ ژى نزانن كو مخابن د كۆنگره‌یێن به‌رێ دا ئه‌ڤ حاله‌ته‌ هه‌بوون و ئه‌ركه‌ ژى ل سه‌ر ئه‌ندامێن پارتى كو بێ به‌رچاڤ وه‌رگرتنا عه‌شیره‌تگه‌ریێ و مرۆڤانى و به‌رژه‌وه‌ندیێن تایبه‌ت ده‌نگێ خوه‌ بده‌نه‌ وان كاندیدان كو ب راستى دلسۆز و رێڤینگێن رێبازا پیرۆزا پارتى و بارزانى نه‌مرن كو دكارن ب دروستى زۆرترین خزمه‌تا پارتى و گه‌لێ خوه‌ بكه‌ن.
پشتى هه‌لبژارتنا ئه‌ندامێن كۆنگره‌یێ پێدڤیه‌ ئه‌و ئه‌ندام بزانن كو ئه‌و حزبه‌كێ نه‌ كو زێده‌تر ژ نوونه‌رێن زێده‌تر ژ 76 سال ژ خه‌بات و به‌رخودانێ دا دایه‌ ل پێناڤ دۆزا ره‌وا گه‌لێ خوه‌ دا و بۆ ڤێ ژى ده‌ریایه‌كا خوینێ دایه‌ له‌وما ل ڤێره‌ ئه‌ركه‌كێ ره‌وشتى و نه‌ته‌وه‌یى دكه‌ڤیته‌ سه‌ر ل ده‌كمى ده‌مگدانێ ب سه‌ركردایه‌تیێ ده‌نگێ خوه‌ بده‌نه‌ وان كاندیدان كو ب راستى هه‌ست ب به‌رپرسیاره‌تى دكه‌ن و نێزیكن ژ داخوازى و نه‌خۆشى و ئیشێن ئه‌ندام و جه‌ماوه‌رێ پارتى نه‌ك وان كه‌سان كو خوه‌ دووركرینه‌ ژ جه‌ماوه‌رى و سه‌ردانا ئۆرگانێن حزبى و دلسۆز و خه‌باتكه‌ر و ماڵباتێن شه‌هیدان ژى ناكه‌ن، به‌لكو مژوولى بازرگانى و كارێن خوه‌ یێن تایبه‌تن، هه‌روه‌سا پێدڤیه‌ ل سه‌ر ئه‌ندامێن كۆنگره‌یێ په‌یره‌و و پرۆگرامه‌كێ نوى و سه‌رده‌میانه‌ دابرێژن كو دگه‌ل كه‌توارێ ئه‌ڤرۆ بگونجیت و په‌یكه‌ر و شێوازه‌كى نوى یێ رێكخستنى دابنێن كو ئه‌ڤ په‌یكه‌رێ نوكه‌ یێ كه‌ڤنه‌ و دل گه‌ل ڤى سه‌رده‌مى و خه‌باتا ئاشكرا و شارستانى ناگونجیت كو دڤى په‌یره‌و و پرۆگرامى ب ئۆرگانێن كێم یێن حزبى زۆرترین خزمه‌تا جه‌ماوه‌ر و رێكخستێ بهێته‌كرن.
داكو ئه‌ڤ كۆنگره‌ یێ سه‌ركه‌فتى و بیت و دادپه‌روه‌رى تێدا هه‌بیت و ئه‌ندامێن پارتى ژى ل ئه‌نجامێن وێ درازى بن، پێدڤیه‌ به‌رى هه‌لبژارتنان رێ بهێته‌ گرتن ل دابه‌شكرنا به‌رتیلان، ڤێجا ئه‌و به‌رتیل پاره‌ یان ژى به‌خشینا پله‌ و پۆستان بیت داكو ئه‌نجامێن هه‌لبژارتنان ده‌ربرینێ ژ بۆچوون و داخوازیێن راسته‌قینه‌ یێن ئه‌ندامێن پارتى بكه‌ن.
ل دوماهیێ دبێژین ب هیڤى نه‌ كۆنگره‌یه‌كا سه‌ركه‌فتى و جۆرى بیت و ببیته‌ ئه‌گه‌رێ زێده‌تر پێشڤه‌چوون و سه‌ركه‌فتنا پارتى ژ هه‌مى لایه‌كى ڤه‌ كو هه‌ر كورد و كوردستانیه‌كێ دلسۆز ژى ڤێ چه‌ندێ دخوازیت.

سالح محه‌مه‌د ته‌یرۆ
هه‌ر ل ده‌ستپێكا هه‌بوونا مرۆڤایه‌تیێ و په‌یدابوون و دروستبوونا جڤاكان ئاریشه‌ و روودان دروست بووینه‌ و یا دیاره‌ ژى كو د هه‌ر كێشه‌ و ئالۆزیه‌كێ دا دو لایه‌ن هه‌نه‌ كو هه‌ر ئێك ژ وان كو ب خودان ماف دزانیت و یێ به‌رامبه‌ر ب نه‌حه‌ق دزانیت، له‌وما ل ده‌مێ كو دادوه‌رى ل سه‌ر هه‌ر كێشه‌ و ئاریشه‌كێ بهێت، پێدڤیه‌ ل ده‌ستپێكێ پێزانینێن ته‌مام ل سه‌ر ئاریشێ بهێنه‌ كۆمكرن و بۆ ڤێ ژى پێدڤیه‌ ئاخفتنا هه‌ردو لایه‌نان بهێته‌ وه‌رگرتن، هه‌تاكو ب راست و دروستى بریار ل سه‌ر بهێته‌دان و خودان ماف بگه‌هیته‌ مافێ خوه‌.
لێ یا مه‌ پێ مه‌به‌ست ئه‌وه‌ ل پشتى په‌یدابوون و زۆربوونا سازیێن راگه‌هاندنێ و ب تایبه‌ت ژى تۆرێن جڤاكى گه‌له‌ك جاران مرۆڤ ل ڤان تۆران دبینیت كو ژماره‌یه‌كا زۆر یا خه‌لكى هه‌ر زوى و بێكو ئاگه‌هداربن ل سه‌ر روویێ راسته‌قینه‌یێ بابه‌تى بریارو بۆچوون ل سه‌ر بابه‌تان دهێنه‌دان و هێرشان دكه‌نه‌ سه‌ر لایه‌ن و كه‌سان و ژبلى هندێ گه‌له‌ك جاران ناڤزراندن ل به‌رامبه‌ر ب هنده‌ك كه‌س و لایه‌نان دهێنه‌ كرن، لێ ل یا هه‌موویان دیارتر ئه‌وه‌ كو مخابن هنده‌ك سازیێن راگه‌هاندنێ یێن حزبان بێكو پره‌نسیپێن رۆژنامه‌ڤانیێ ل به‌رچاڤ بگرن روودان و ئاریشه‌یان ڤه‌دگوهێزن و به‌لاڤ دكه‌ن و ل پێناڤ به‌رژه‌وه‌ندیێن به‌رته‌نگ یێن حزباتیێ ل دووڤ راستیا بابه‌تان ناچن و ئاخفتنا هه‌مى لایه‌نان وه‌رناگرن و ئه‌گه‌ر راستیا بابه‌تى ژى بزانن به‌لاڤ ناكه‌ن به‌لكو ب وێ ره‌نگى به‌لاڤ دكه‌ن ئه‌وا وان دڤێت و یا دیاره‌ ژى مه‌به‌ستا وان ل ڤێ چه‌ندێ ئاراسته‌كرنا خه‌لكى یه‌ ل دووڤ به‌رژه‌وه‌ندیێن وان لایه‌نان و دروستكرنا كه‌ربوكینێ یه‌ د ناڤ جڤاكێ دا، ل پێناڤى ڤێ چه‌ندێ ژى، مخابن هه‌تا كاره‌سات و روودانێن سروشتى و دلته‌زین ژى دهێنه‌ بكارئینن وه‌ك كه‌ره‌سته‌یه‌كێ شه‌ڕێ سیاسى هه‌ر وه‌ك چاوا مه‌ ل ڤێ داویێ ل روودانا دلته‌زینا خه‌ندقینا ژنه‌ك و زارۆیێن وێ ل گونده‌كێ قه‌زایا ئاكرێ دیتین كو سازیێن راگه‌هاندنێ یێن هه‌ڤدژى حوكمه‌تا هه‌رێمێ مه‌زنى و خه‌مگینیا ڤێ روودانێ ل به‌رچاڤ نه‌گرتن و راستیا بابه‌تى ڤه‌نه‌گوهاستن و ئاخافتنا مالباتا قوربانیێن ڤێ روودانێ ژى وه‌رنه‌گرتن، به‌لكو ب هه‌مى شێوه‌یه‌كێ هه‌ولدان ڤێ روودانێ بكاربینن بۆ ناڤزراندنا حوكمه‌ت و سازیێن وێ و هه‌روسا دروستكرنا نه‌باوه‌ریێ د ناڤبه‌را خه‌لك و ده‌ستهه‌لاتێ دا، لێ وه‌كى مه‌زنان گۆتى وه‌ریسێ دره‌وێ یێ كورته‌، له‌وما ب ئاخافتنا كه‌سوكارێن قوربانیێن وێ روودانێ راستیا بابه‌تى دیاربوو، هه‌روه‌سا نه‌راستیا كه‌نالێن هه‌ڤدژ یێن حوكمه‌تێ ژى دیاربوو.
ل دووماهیێ دبێژین كارێ رۆژنامه‌ڤانیێ كۆمه‌كا پره‌نسیپێن خوه‌ هه‌نه‌ كو پێدڤیه‌ هه‌ر سازیه‌كا راگه‌هاندنێ و رۆژنامه‌ڤانه‌ك د كارێ خوه‌دا وان پره‌نسیپان جێبه‌جێ بكه‌ت كو ل هه‌موویان دیارتر ئه‌وه‌ ئاخفتنا هه‌مى لایه‌نێن هه‌ر كێشه‌ و روودانه‌كێ بهێنه‌ وه‌رگرتن و دوور ژ به‌رژوه‌ندیێن حزبى دووڤچوون بۆ راستیا بابه‌تان بهێته‌كرن به‌رى بهێنه‌ به‌لاڤكرن، ل پێناڤى ڤێ چه‌ندێ ژى پێدڤیه‌ سه‌ندیكا رۆژنامه‌ڤانێن كوردستانێ ب هه‌ڤكارى ل گه‌ل هه‌رئێك ژ وه‌زاره‌تا ره‌وشه‌نبیرى یا حوكمه‌تا هه‌رێما كوردستانێ و داواكارێ گشتى ب كارێ چاڤدێریكرنا سازیێن راگه‌هاندنێ رابیت و هه‌ر سازیه‌كا پێگیرنه‌بیت ب پره‌نسیپان كو نه‌راستیان به‌لاڤ بكه‌ت و ئاشتیا جڤاكى تێك بده‌ت سزا بدات، هه‌روه‌سا ژ لایێ خوه‌ڤه‌ پێدڤیه‌ خه‌لك ژى زووى باوه‌ریێ ب هه‌ر پێزانینه‌كێ نه‌ئینن و ب له‌ز بریارێ ژى نه‌ده‌ن به‌رى كو راستییا بابه‌تان ژ هه‌مى لایه‌كێ ڤه‌ بزانن.

سالح محه‌مه‌د ته‌یرۆ

پشتى كۆمسیۆنا هه‌لبژارتنێن سه‌ربخوه‌ یین ئیراقێ، ئه‌نجامێن ده‌ستپێكى یێن هه‌لبژارتنێن نوونه‌رین جڤاتا ئیراقا فیدرال ئه‌وا كو ل رۆژا 10/10/2021 هاتیه‌ كرن راگه‌هاندى، دیاربوو كو رێژه‌یا پشكدارى ل ده‌نگدانێ یا كێم بوو و ده‌نگێ پڕانیا پارتێن سیاسى یێن كوردستانى كێمبوون، ژ وان ژى پارتى دیمۆكراتى كوردستان كو سه‌ره‌رای هندێ كو ئێكه‌م حزبا سه‌ركه‌فتى بوو ل كوردستانێ، لێ د ڤان هه‌لبژارتنان ب سه‌دان هزاران ژى ده‌نگێن كێمكرن به‌راورد ب هه‌لبژارتنێن ساڵا 2018 سه‌ره‌راى گه‌هشتنا سێ نفشێن دى بۆ ده‌نگدانێ.
ئه‌گه‌ر مرۆڤ ب وژدان و بوێرانه‌ ل سه‌ر ئه‌گه‌رێن كێمبوونا رێژه‌یا ده‌نگده‌ران راوه‌ستیت دێ دیاربیت كو كۆمه‌كا ئه‌گه‌ران هه‌نه‌، ژ وان ژى دویركه‌فتنا سه‌ركردایه‌تیا پارتى ژ جه‌ماوه‌رى و ئه‌و دیوارێ یێ به‌رامبه‌ر گله‌ و گازنده‌ و داخوازێن خه‌لكى هاتیه‌ دروستكرن و كو ب تنێ د ده‌مێ هه‌ڵبژارتنان سه‌ره‌دانا ده‌ڤه‌ران دكه‌ن و ب سالان ژى كه‌س ژ وان سه‌ره‌دانا ئۆرگانێن خوه‌ یێن حزبى ناكه‌ن و ل ده‌مێ هه‌لبژارتنان ل جهێ سه‌ره‌دانا كه‌سوكارێن سه‌ربلندێن شه‌هیدان و خه‌باتگێرێن دێرین بكه‌ن سه‌ره‌دانا كۆمه‌كا كه‌سێن ده‌ستنیشانكرى دكه‌ن و یا ژ وان ڤه‌ خه‌لك هه‌مى یێ گرێدایه‌ ب وان كه‌سان ڤه‌ و ب سه‌ردانكرنا وان دێ خه‌لك هه‌مى رازى بیت د ده‌مه‌كێ دا د ڤى سه‌رده‌مى دا تاكى ئازادى و سه‌ربه‌خوه‌یا خوه‌ هه‌یه‌ و وه‌ناكه‌ن ژى كه‌س ل جهێ وان بریارا وان یا سیاسى بده‌ت، هه‌روه‌سا گه‌له‌ك ژ به‌رپرسێن حزبى و حكومى ل جهێ خزمه‌تكرنا خه‌لكى و رێڤه‌برنا ئه‌ركێ خوه‌ ب بازرگانى و به‌رژه‌وه‌ندیێن تایبه‌ت یێن خوه‌ڤه‌، داكو ئه‌ڤه‌ ب چ ره‌نگه‌كى ل گه‌ل ئێك ناگونجن و هه‌ڤدژن، ژ لایه‌كێ دى ڤه‌ دلسۆزێن رێبازا پارتى و بارزانیێ نه‌مر هاتینه‌ پشتگوه هاڤێتن و ئینانا پێشا وان كه‌سێن كو ئه‌ڤرۆ ژى دگه‌ل دا، بیت باوه‌رى ب ڤێ رێبازى نه‌بوویه‌، ل هه‌ر ده‌ڤه‌ره‌كێ ژى چه‌ند ماڵبات و كه‌سه‌ك هاتینه‌ ده‌ستنیشانكرن كو هه‌ر پله‌ و پۆست و ئمتیاز و دامه‌زراندنه‌ك بۆ وانن و ئه‌و ب تنێ مفادارن و خه‌لكێ دى هاتیه‌ پشتگوههاڤێتن كو ب راستى ئه‌ڤه‌ كاره‌ساته‌، هه‌روه‌سا ژ لایێ رێكخستنێ ڤه‌ كۆمه‌كا به‌رپرسان هاتینه‌دانان كو د ئاست و هه‌ستێ به‌رپرسیاره‌تى دا نینه‌ و ل جهێ خزمه‌تكرنا خه‌لك و جه‌ماوه‌رێ حزبا خوه‌ ب خزمه‌تكرنا خوه‌ڤه‌ د مژوولن و سۆز و په‌یمانێن بێ بنه‌ما دده‌نه‌ خه‌لكى، جهێ ئاماژێ یه‌ ژى كو رێژه‌ و ژماره‌یه‌كا مه‌زن یا ته‌خا گه‌نجان پشكدارى د ڤێ هه‌لبژارتنێ دا نه‌كرن ب ئه‌گه‌رێ بێكاری و نه‌دامه‌زراندنێ د ده‌مه‌كێ دا خودان باوه‌رنامه‌نه‌ وچه‌ندین ساڵێن ژیێ خوه‌ د خواندنى دا ده‌ربازكرینه‌، هه‌روه‌ها گرانبوونا بهایێ كه‌لوپه‌ل و پێدڤیێن وه‌لاتیان د بازارى دا ئه‌گه‌ره‌كێ دى بێزاربوون و تۆره‌بوونا خه‌لكى یه‌ كو بلا بازار یێ ئازاد ژى بیت، لێ پێدڤیه‌ دویڤچوون هه‌بیت و نه‌هێته‌ قورخكرن ژ لایێ هنده‌ك كه‌س و كۆمپانیێن دیاركرى كو زۆربه‌یا وان یێن به‌رپرسانن، داكو هه‌ڤڕكیه‌كا ره‌وا هه‌بیت كو ئه‌ڤه‌ دێ د به‌رژوه‌ندیا وه‌لاتیان و ئه‌رزانكرنا بهایان دا بیت.
ل دوماهیێ دبێژین پێدڤیه‌ پارتى لێزڤرینه‌كا بله‌ز د هه‌مى ئاستان دا بكه‌ت و ل سه‌ر هه‌مى خالان راوه‌ستیت و ده‌ستى دانیته‌ سه‌ر برینان و چاره‌ بكه‌ت به‌ریا هه‌لبژارتنا په‌رله‌مانێ كوردستانێ بهێته‌كرن، ئه‌گه‌ر نه‌ د وێ باوه‌ریێ داینه‌ كو رێژه‌یا ده‌نگدانێ د ڤێ هه‌لبژارتنێ دا دێ كێمتر بیت ژ یا ئیراقێ.

ساڵح محه‌مه‌د ته‌یرۆ
ل ڤێره‌ نازڤرینه‌ڤه‌ بۆ دیرۆكا پڕ سه‌روه‌ریا پارتى دیمۆكراتى كوردستان كو ئه‌ڤه‌ زێده‌تر ژ حه‌فتێ و پێنج ساڵانه‌ د قادا خه‌بات و تێكۆشین و قوربانى و به‌رخودانێ دایه‌، لێ ل ته‌ڤایا هه‌لبژارتنێن هاتینه‌ ئه‌نجامدان ل پشتى سه‌رهلدانا بهارا سالا 1992 و هه‌تا یا رۆژا 12/5/2018، ڤێجا بگره‌ ژ هه‌لبژارتنێن په‌رله‌مانێ كوردستانێ و یێن نوونه‌رێن جڤاتا ئیراقا فیدرال كو هه‌رده‌م ئێكه‌ما بێ ركابه‌ر بوویه‌ و سه‌ره‌راى هنده‌ك جاران بۆ به‌رژه‌وه‌ندیا گشتى ته‌نازول ل هنده‌ك مافێن خوه‌ ژى كرى یه‌ تاكو ئال‌وزى و كێشه‌ دروست نه‌بن و ئه‌ڤ ئه‌زم‌ونا ب خوین و خوه و رۆندكێن ئه‌ڤى ملله‌تى بده‌ستڤه‌هاتین نه‌هێنه‌ شێواندن و ژناڤبرن.
ڤان هه‌لبژارتنێن پێشوه‌خت یێن جڤاتا نوونه‌رێن ئیراقا فیدرال كو ل به‌ره‌ ل رۆژا 10/10/2021 بهێته‌ ئه‌نجام و هه‌ر ل ده‌ستپێكا هه‌وا بانگه‌شه‌یا هه‌لبژارتنان و ل رٍه‌وشتێ بلندێ سه‌ركردایه‌تیا سیاسى یا پارتى دیمۆكراتى كوردستان كو ته‌ڤایا ده‌زگه‌هێن راگه‌هاندنێ و سۆشیال میدیا و كادر و ئه‌ندام و لایه‌نگیرێن خوه‌ ئاگه‌هداركرن كو ب ره‌نگه‌كێ ئارام و دویر ژ شێواندن و ناڤزراندن پارت و لایه‌نێن سیاسى یێن كوردستانى جه‌ماورێ خوه‌ به‌رهه‌ڤ بكه‌ن بۆ سه‌ر سندۆقێن ده‌نگدانێ و پێگیر بن ب رێنما و راسپارده‌یێن كۆمسیۆنا بلندا سه‌ربخوه‌یا هه‌لبژارتنان و ده‌مێ خوه‌ ب به‌رسڤێن لایه‌ن و كه‌سان و بێشۆلڤه‌ نه‌به‌ن.
خه‌لك ئه‌ڤى پارتێ ب خودانێ ده‌ستكه‌فتى و پارێزڤانیا ده‌ستكه‌فتیان ژى دزانیت، ژبلى ڤێ چه‌ندى ب راستى پارتى دیمۆكراتى كوردستان یا سه‌لماندى ب هه‌مى سه‌ره‌ده‌رى و كریارێن خوه‌ڤه‌ و ب به‌رپرسیارانه‌ یا خه‌مخۆر بوویه‌ ل پێناڤ ل كه‌دارنه‌كرنا ناڤوبانگێن كورد و كوردستانیان، هه‌روه‌تۆف ب ره‌نگه‌كێ پاكژ و خاوێن و ب سه‌نگیا خوه‌ و ب ئێك ده‌نگى و ره‌نگى و ب بریارا مه‌ركه‌زى و ته‌نازول نه‌كرینه‌ ژ داخوازیێن گه‌ل و وه‌لاتى و گرتنا به‌رسینگێ وان ململانێ و ناحه‌زان و ئه‌و پیلانێن كو هاتینه‌ و دهێنه‌ دارێشتن ل دژى هه‌رێما كوردستانێ و ب ره‌نگه‌كێ ئارامى راوه‌ستا و خۆراگر بوو و دویر ل ناڤزراندن و شێواندنێ كو ئه‌ڤه‌ چه‌ندین خه‌سله‌تێن دى یێن كوردپه‌روه‌ریێ و وه‌لاتپارێزیێ بوونه‌ فاكته‌رێن سه‌ره‌كى كو هه‌رده‌م پارتى دیمۆكراتى كوردستان پێشره‌و بوویه‌ و دێ پێشره‌و ژى بیت و دێ ئێكه‌ما بێ ركابه‌ر بیت، چونكو پارتى باش لسه‌ر كاودانان رادوه‌ستیت و پاش بریارى دده‌ت و خودانێ بریارا خۆیه‌ و بریارێ ژ كه‌سێ وه‌رناگریت و ب ئارمانجێن نه‌ته‌وى و نیشتیمانیڤه‌ یا گرێدایه‌ نه‌ك ب مه‌رجێن به‌رته‌نگ ڤه‌ چونكو خودانێ قوتابخانه‌یه‌كا راسته‌قینه‌ یا كوردایه‌تیێ یه‌ كو ئه‌و ژى قوتابخانا بارزانیێ نه‌مر و پارتى دیمۆكراتى كوردستانه‌.
هه‌لبه‌ت دپشتراستین ژى كول هه‌لبژارتنێن نوونه‌رێن جڤاتا ئیراقا فیدرال یاكو دێ هێته‌كرن دێ پارتى ئێكه‌م بیت نه‌ك ب تنێ ل سه‌ر ئاستێ هه‌رێما كوردستانێ به‌لێ ل سه‌ر ئاستێ ئیراقا فیدرال هه‌روه‌كى هه‌لبژارتنێن به‌رێ. ئه‌و لایه‌نێن كو خه‌ونان ب لاوازكرنا پارتیڤه‌ دبینن دێ تووشى مه‌زنترین شكه‌ستن بن، لێ ئه‌ز باوه‌رم بێهنا وان ب وان ئاسته‌نگ و ناڤزراندنێ ژى ناهێت ئه‌وا ئه‌و دكه‌ن جاره‌كا دى هه‌ولا هندى دده‌ن كو دیمۆكراسیه‌ت ل هه‌رێما كوردستانێ نینه‌ و ڤێ هه‌لبژارتنێ ژى دێ ب ته‌زویر و ساخته‌كارى ل قه‌له‌مده‌ن و ب ڤێ چه‌ندێ زه‌ره‌ره‌كا دى ئێخنه‌ سه‌ر وان زیان و كاره‌ساتا ئه‌وێن ب سه‌رێ ئه‌ڤى ملله‌ته‌یى ئیناین و نزانن و نه‌ڤێن بزانن كو ئه‌ڤرۆ ملله‌تێ كورد یێ هوشیاره‌ و سه‌رده‌مێ هندێ نه‌مایه‌ كو ب پروپاگندێن وان یێن دویر ل راستیێ خه‌لكى بسه‌ردا ببه‌ن و ئه‌ڤرۆ سه‌رده‌مێ پێشكه‌فتنا ته‌كنولوژیایه‌ نه‌ك چه‌رخێن به‌رێ یه‌.
جاره‌كا دى هه‌ر وه‌كى هه‌مى جارێن به‌رێ گه‌لێ كوردستانێ باوه‌ریێ بده‌ته‌ڤ ب پارتى دیمۆكراتى كوردستان و خۆیا ژى بكه‌ت كو هه‌ر پارتى و رێبازا پیرۆزا بارزانیێ نه‌مر رێبازا گه‌لێكه‌ بۆ ئازادى و سه‌رفه‌رازى و سه‌رخوه‌بوونا كوردستانێ خه‌باتێ دكه‌ت و هه‌رده‌م به‌رژه‌وه‌ندیا گشتى لسه‌ر هه‌مى به‌رژه‌وه‌ندیه‌كێ دانایه‌، لێ فه‌ره‌ پارتى دیمۆكراتى كوردستان پشتى هه‌لبژارتنێن په‌رله‌مانێ نوونه‌رێن جڤاتا ئیراقا فیدرال بهێنه‌كرن چاڤخشاندنه‌كا بله‌ز د سه‌ره‌ده‌ریكرنا هنده‌ك به‌رپرسان دا بكه‌ت و گورانكاریان ژى ل هنده‌ك سازیان دا بكه‌ت و ئه‌و دیوارێ ب كۆنكریتى هاتیه‌ ئاڤاكرن دنێڤبه‌را به‌رپرس و وه‌لاتیان بشكێنیت و ژناڤببه‌ت و ب وێره‌كى لسه‌ر كێموكاسیان راوه‌ستیت و بێژیته‌ گه‌نده‌لڤانان ئێدى به‌سه‌ و توخیب بۆ بهێنه‌ دانان و درێژه‌ ب وى به‌رنامێ چاكسازیێ ئه‌وێ ژ لایێ كابینه‌یا نه‌هێ یا حوكمه‌تا هه‌رێما كوردستانێ ب سه‌رۆكایه‌تیا مه‌سرۆر بارزانى بریار ل سه‌ر دایى بده‌ت هه‌تاكو ل هه‌لبژارتنێن پاشه‌رۆژێ یێ په‌رله‌مانێ كوردستانێ ژى خه‌لكێ كوردستانێ پتر به‌ر ب سندوقێن هه‌لبژارتنانڤه‌ بچن و باوه‌ریێ ب پارتى دیمۆكراتى كوردستان و رێبازا پیرۆزا بارزانیێ نه‌مر بده‌ن.

ساڵح محه‌مه‌د ته‌یرۆ
ئێك ژ پره‌نسیپێن دیمۆكراسیێ هه‌لبژارتنن كو خه‌لك نوونه‌ر و كاندیدێ خوه‌ ب ئازادى و بێ دودلى به‌ربژێریت، ڤێجا بۆ هه‌ر سازیه‌كێ بیت، لێ فه‌ره‌ ل ده‌مێ كۆ مرۆڤ قه‌ستا سندۆقێن ده‌نگدانێ بكه‌ت و باش هزر د ده‌نگێ خوه‌دا بكه‌ت كو چ لیست بیت یان به‌ربژار هه‌ژى وى ده‌نگى یه‌ كو به‌ربژار بكه‌ت و ب نوونه‌رێن خوه‌ ل وێ سازیێ بزانیت، ژبه‌ركو ئه‌ڤ ده‌نگه‌ مافه‌ك و ئه‌مانه‌ته‌كێ ئه‌خلاقى و ئایینى و نه‌ته‌وى و نیشتیمانى یه‌ و د هه‌مان وه‌خت دا ئه‌ركه‌كه‌ ژى و به‌رپرسیاره‌تیه‌كیا دیرۆكى یه‌ ژى لسه‌ر ستویێ مرۆڤى، له‌وما فه‌ره‌ ب ئه‌مانه‌تڤه‌ ئه‌ڤى ئه‌مانه‌تى و ڤى ئه‌ركى و به‌رپرسیاره‌تیێ بگه‌هینیت و وى ده‌نگى بده‌ته‌ و به‌ربژارى كو یێ پشتراست بیت دێ كاریت خزمه‌تا كورد و كوردستانیان كه‌ت، ئه‌گه‌ر ئه‌م ب وژدانڤه‌ به‌رێ خوه‌ بده‌ینه‌ به‌ربژارێن پارتى دیمۆكراتى كوردستان بۆ جڤاتا نوونه‌رێن ئیراقا فیدرال كو ئه‌ڤ پارته‌ لسه‌ر ده‌ستێ بابێ روحى یێ نه‌ته‌وا كورد بارزانیێ نه‌مر هاتیه‌ ئاڤاكرن كو ب پارتیا دایك دهێته‌ نیاسین و بوویه‌ خواندنگه‌هه‌كا راسته‌قینه‌ یا بلندكرنا هه‌ستا نه‌ته‌وایه‌تى و كوردایه‌تیێ و نه‌ك ل ڤێ پارچا كوردستانێ، به‌لكو ل هه‌ر چار پارچێن كوردستانێ و ئه‌و پارتیا شیایى بۆ ده‌مێ (75) سالان د قادا خه‌بات و تێكۆشان و به‌رخودان و قوربانیدانێ دا بیت و رۆژه‌كێ ل رۆژان مساومه‌ لسه‌ر بهۆسته‌كا ئاخا پیرۆزا كوردستانێ نه‌كرى و ناكه‌ت ژى و شۆره‌شه‌ك ژى كرى یه‌ قوربانى ل پێناڤ زڤراندنا ئاخا هه‌رێما كوردستانێ ئه‌وێن ل ده‌رڤه‌یى هه‌رێمێ و نه‌مازه‌ كه‌ركووكا دلێ كوردستانێ بۆ سه‌ر هه‌رێما كوردستانێ و هه‌روه‌كى بارزانیێ نه‌مر كه‌ره‌مكرى و گۆتى: (كه‌ركووك كوردستانى یه‌ ئه‌گه‌ر ئێك كورد ژى تێدا نه‌بیت…) ئه‌ڤێ پارتێ د دیرۆكا خوه‌دا یا پڕ سه‌روه‌رى و ل پێناڤ ئارمانجێن نه‌ته‌وى و رزگاركرنا كوردستانێ چه‌ندین شۆرش به‌رپاكرینه‌ و شۆرشێن بارزان یا ئێكێ و دویێ و پشكداریكرنا دامه‌زرێنه‌رێ وێ دگه‌ل كۆمه‌كا پێشمه‌رگێن قه‌هره‌مان ل كۆمارا كوردستانێ ل مهابادێ و بڕینا سنوورێن سێ ده‌وله‌تان و ئاواره‌بوون و په‌رینه‌ڤه‌ ل رووبارێ ئاراس بۆ ئێكه‌تیا سۆڤیه‌تا به‌رێ ل پێناڤ ملله‌تێ كورد و گه‌هاندنا ده‌نگێ ملله‌تێ كوردێ زولم و سته‌ملێكرى و شۆرشا مه‌زنا ئیلۆنێ و شۆره‌شا گوڵانا پێشكه‌فتنخواز، شیایه‌ چه‌ندین ده‌ستكه‌فتیێن مه‌زن بۆ ملله‌تێ كورد ب خامێن زێرین ل به‌رپه‌رێن دیرۆكا بزاڤا رزگاریخوازا كوردستانێ تۆمار بكه‌ت مینا رێكه‌فتنا (11/ئادارا/1970) كو بۆ جارا ئێكێ بوو رژێما ئیراقا وى سه‌رده‌مى دان ب نه‌ته‌وێ كورد دابنیت ل ئیراقێ كو نه‌ته‌وا دویێ یه‌، هیچ گومان ژى تێدا نینه‌ كو ئه‌ڤ ئازادى و ئارامى و پێشكه‌فتنا بله‌ز یا ئاڤاكرن و پێشڤه‌چوونا هه‌رێما كوردستانێ و باشبوونا بارێ ئابۆرى یێ خه‌لكێ كوردستانێ به‌رهه‌مێ خه‌بات و به‌رخودان و گیانفیداكاریا پارتى دیمۆكراتى كوردستان و رێبازا پیرۆزا بارزانیێ نه‌مره‌، و هیچ پێنه‌ڤێت شیایه‌ ملله‌تێ كورد ژى ب جیهانێ بناسینیت، ئه‌ڤرۆ ژى پارتى دیمۆكراتى كوردستان ب سه‌رۆكاتیا به‌رێز ((مه‌سعود بارزانى)) یا به‌رده‌وامه‌ لسه‌ر هه‌مان رێبازا پیرۆز و بوویه‌ سه‌رۆكه‌كێ ئاشتیخواز و دیمۆكراسیخواز و پشت و په‌نایێ لێ قه‌ومایێن ملله‌تێ كورد ل هه‌ر پارچه‌یه‌كا كوردستانا مه‌زن و بوویه‌ كارێزما نه‌ك ل هه‌رێما كوردستانێ ب تنێ، به‌لكو ل رۆژهه‌لاتا ناڤێن و ل رۆژئاڤا ژى. گومان ژى تێدا نیه‌ و به‌لگه‌ه ژى دروهن و ئاشكرانه‌ كو هه‌ر ئه‌ڤ پارتیه‌ و سه‌رۆكێ وێ یه‌ به‌رگریێ ل مافێن گه‌لێ كوردستانێ دكه‌ت و بووینه‌ چه‌په‌رێن پۆلایێ بۆ به‌رسینگگرتنا بووسه‌ و پیلانێن دوژمن و نه‌حه‌زێن كوردستانێ، ئه‌م باوه‌رین ژى كو ده‌وله‌تبوونا كوردستانێ ژى دێ لسه‌ر ده‌ستێ سه‌روۆك بارزانى بیت كو ئه‌ڤه‌ هیڤى و ئۆمێدا كوردستانیایه‌، له‌وما ل رۆژا 10/10/2021 و بۆ هه‌لبژارتنا پێشوه‌خت یانوونه‌رێن جڤاتا ئیراقا فیدرال ده‌نگدان ب به‌ربژارێن پارتى دیمۆكراتى كوردستان ئه‌ركه‌كێ نه‌ته‌وى و نیشتیمانى یه‌ و گه‌هاندنا وى ئه‌مانه‌تى یه‌ ب ئه‌مانه‌تڤه‌ و به‌رپرسیاره‌تیا مرۆڤایه‌تى یه‌ و رێزگرتنه‌ ل خوینا شه‌هیدێن رێبازا پیرۆزا كوردایه‌تیێ و ئاینده‌كێ گه‌شێ كوردستانێ.

سالح محه‌مه‌د ته‌یرۆ
ده‌ست ب هه‌وا پرۆپاگندێن هه‌لبژارتنا هاتیه‌ كرن بۆ هه‌لبژارتنێن نوونه‌رێن جڤاتا ئیراقا فیدرال یا پێشوه‌خت ئه‌وا كو لبه‌ره‌ ل (10/10/2021) بهێته‌كرن، هه‌لبه‌ت مافه‌كێ ره‌وا و خوه‌زایى یه‌ كو هه‌ر لایه‌نه‌كێ سیاسى بۆ كاندیدێن خوه‌ یێن به‌ربژێركرى بۆ په‌رله‌مانێ ئیراقێ پرۆپاگنده‌یان بۆ خوه‌ بكه‌ن و جیهانێ بۆ خه‌لكى بكه‌نه‌ بحه‌شت و هه‌ول بده‌ن كو خه‌لكه‌كێ بۆ لایێن خوه‌ رابكێشن بۆ رۆژا ده‌نگدانێ و لسه‌ر سندۆقا ده‌نگى بده‌نێ، هه‌ر لایه‌نه‌ك وكه‌سه‌ك خوه‌ به‌ربژێركرى ئه‌وان ژى به‌رنامێ خوه‌ هه‌یه‌ و هه‌ر ئێك ژڤان ژى د نێڤ هه‌وا پرۆپاگندێن هه‌لبژارتنا و ل راگه‌هاندن و میدیایێن خوه‌ دێ به‌رنامێ خوه‌ بۆ وه‌لاتیان دیار و ئاشكرا كه‌ن، ئه‌ڤ چه‌نده‌ ژى ل هه‌مى وان ده‌وله‌تان دهێنه‌ كرن ئه‌وێن سیسته‌مێ دیمۆكراسى د حوكمرانیا خوه‌دا په‌یره‌و دكه‌ن نه‌مازه‌ ل ده‌وله‌تێن رۆژئاڤا.
لێ یا گرنگ ئه‌وه‌ كو هه‌ر لایه‌ن و كه‌سه‌كێ خوه‌ به‌ربژاركرى د ده‌مێ پرۆپاگندان دا هه‌ست ب به‌رپرسیاریه‌كا ره‌وشتى و نه‌ته‌وه‌ى و نیشتیمانى و دیمۆكراسى و پاراستنا مافێ مرۆڤى یێ به‌رامبه‌ر بكه‌ت و خوه‌ دویربێخیت ل شێواندن و ئێشاندن و گوتنێن لاواز و نه‌ د جهێ خوه‌دا و برینداركرنا لایه‌نێ به‌رامبه‌ر، چونكو مرۆڤ هند یى ئازاده‌ هه‌تاكو ئازادیا به‌رامبه‌ر نه‌شێوینیت و ئازادیى ژى سنۆرێن خوه‌ هه‌نه‌، ژ به‌ركو به‌رییا هه‌مى تشته‌كێ ئه‌م هه‌مى كورد و كوردستانینه‌ و مه‌ هه‌میان ژى ئێك ئارمانج هه‌یه‌ كو ئه‌وژى به‌ره‌ڤانیكرن ژ مافێن ده‌ستوورى و قانوونى یێن هه‌رێما كوردستانێ و پاراستنا حوكمه‌تا هه‌رێما كوردستانێ و ده‌ستكه‌فتیێن وێ و هه‌ر ئێك ل مه‌ ژى یێ ئازاده‌ بۆ ده‌نگدانێ و ده‌نگێ دێ ته‌ وى به‌ربژارى ئه‌وێ كۆ مرۆڤ دزانیت كو كارى یه‌ دێ كاریت خزمه‌تا ئه‌ڤى ملله‌تى بكه‌ت ، دیسان تاكو ئه‌ڤ هه‌لبژارتنه‌ ب ره‌نگه‌كێ دیمۆكراسى و پاكژ و بێ كێشه‌ و ئالۆزى برێڤه‌بچن و ببنه‌ جهێ رازیبوونا خه‌لكێ كوردستانێ و ده‌رڤه‌، چونكو ئه‌ڤرۆ ل كوردستانێ ب ده‌هان كونسولخانێن ده‌وله‌تێن بیانى و ب سه‌دان كۆمپانی و رێكخراوێن جڤاكا سڤیل هه‌نه‌، ڤیجا بلا ئه‌ڤ پرۆپاگندێن راگه‌هاندنا هه‌لبژارتنین بهێن د جهێ خوه‌دا بن و نه‌بنه‌ ئه‌گه‌را شه‌رى راگه‌هاندن و په‌رۆكا و ئالۆزى و دودلى و شێواندنا هزروبیروبۆچوونێن خه‌لكێ كوردستانێ و نه‌بنه‌ جهێ كه‌یفخۆشیا دوژمن و نه‌حه‌زێن كوردستانێ، هه‌روه‌سا فه‌ره‌ ئه‌م هه‌مى د هوشیاربین و د ئاستێ ڤێ به‌رپرسیاره‌تیا دیرۆكى دا بین و ئه‌م بكارین كو روویێ دروستێ مرۆڤێ كوردستانێ د په‌یره‌وكرنا دیمۆكراسیه‌تێ دا نیشا هه‌مبه‌رى خوه‌ بده‌ین و ڤێ ره‌نج و ماندیبوونا هه‌تا ئێره‌ ژى هاتى بپارێزین و به‌ره‌ڤانیێ ژى ژێ بكه‌ین، ئه‌ڤ هه‌لبژارتنێن داهاتى ئه‌زمۆنه‌كا هه‌رى گرنگه‌ بۆ گه‌لێ كوردستانێ و نه‌مازه‌ ل ڤان بارودۆخێن ئیرۆ رۆژهه‌لات تێ ده‌ربازدبیت.
پێدڤیه‌ لایه‌نێن سیاسى ژى رحا وه‌رزشى یا دۆراندن و سه‌ركه‌فتن لجه‌م هه‌بیت و رێزێ ل یێ سه‌ركه‌فتى بگریت و نه‌كه‌ڤیته‌ د بازنێ كرێتكرن و حێجه‌تان دا دیسا ملكه‌چیێن بریار و راسپاردێن كۆمسیۆنا بلندا سه‌ربخوه‌یا كوردستانێ بن، لێ فه‌ره‌ ئه‌ڤه‌ژى ل بیرامه‌ نه‌چیت كو پێدڤیه‌ كۆمسیۆنا بلندا سه‌ربخویا هه‌لبژارتنا به‌رییا هه‌وا پرۆپاگندان چه‌ند بریارێن توند بۆ وان لایه‌ن و كه‌سێن دڤێن سه‌رپێچكاربن ده‌ربێخیت و لدویڤ قانوونێن كۆمسیۆنێ سه‌ره‌رده‌رى دگه‌ل سه‌رپێچكاران بهێته‌كرن، چونكو ئاگر ب زلكه‌كێ ژى دبه‌ربیته‌ رێله‌كێ وهه‌ر چه‌نده‌ ئه‌ز باوه‌رم خه‌لكێ مه‌ژى یێ هوشیاره‌.

ساڵح محه‌مه‌د ته‌یرۆ

ئه‌گه‌ر ئه‌م به‌رپه‌رێن دیرۆكا پڕ سه‌روه‌ریا بزاڤا رزگاریخوازا كوردستانێ هه‌لده‌ینه‌ و ب هویرى لسه‌ر رابوه‌ستین كو ملله‌تێ كورد گه‌له‌ك سه‌رهلدان و به‌رخودان و شۆرش به‌رپا كرینه‌ ل پێناڤ رزگاریا كوردستانێ و گه‌هشتن ب مافێن خوه‌ یێن ره‌وا مینا هه‌مى نه‌ته‌وه‌یه‌كێ كۆ ئه‌و ژى سه‌رخوه‌بوونه‌، لێ شۆرشا (11 ئیلۆنێ /1961) كو هاتیه‌ هژمارتن ب مه‌زنترین و رێخستیترین و ب له‌شكره‌كێ رێوپێك و باوه‌ریه‌كا موكم ب هه‌ستا نه‌ته‌وى یا شۆرشگیرَى بوویه‌ و خودان دیرۆكه‌كا پڕشه‌نگداره‌ و ئه‌ڤ شۆرشه‌ نه‌ ب تنێ بۆ رزگاریا كوردستانێ بوویه‌، به‌لكو بۆ رزگاربوونا ئیراقێ ژى بوویه‌ ل حوكمرانیا تاكره‌وى و دكتاتۆرى و به‌لگه‌ لسه‌ر گوتنا مه‌، كو درووشمێ ڤێ شۆرشێ (دیمۆكراسى بۆ ئیراقێ و ئۆتۆنۆمیێ راسته‌قینه‌ بۆ كوردستانێ) بوو و درووشمێ پێشمه‌رگه‌ى ژى (كوردستان یان نه‌مان) بوو، ئه‌ڤ شۆرشه‌ ب رێبه‌رایه‌تیا پارتى دیمۆكراتى كوردستان و ب سه‌ركردایه‌تیا بابێ روحى یێ نه‌ته‌وا كورد بارزانى مسته‌فا بوویه‌، هه‌ر چه‌نده‌ د دیرۆكا ئه‌ڤێ شۆرشێ دا زۆر جاران هه‌ول و بزاڤ دنێڤبه‌را سه‌ركردایه‌تیا شۆرشێ و حوكمه‌تا ناڤه‌ندیا ئیراقێ یا وى سه‌رده‌مى دهاتنه‌كرن كو وان كێشه‌یێن د ناڤبه‌را هه‌ردو لایاندا بهێنه‌ چاره‌سه‌ركرن و بزڤرنه‌ڤه‌ بۆ سه‌ر مادێ ده‌ستوورى كو ل شۆرشا (عه‌بدولكه‌ریم قاسم) دا دان ب مافێن گه‌لێ كورد هاتبوو دان و د به‌نده‌كا ده‌ستوورى دا هاتبوو كو كورد و عه‌ره‌ب هه‌ڤپشكن د ئیراقێ دا، لێ ب مخابنیڤه‌ مرۆڤ دبێژیت كو لسه‌رده‌مێ حوكمرانیا عه‌بدولكه‌ریم قاسمى و ژ به‌ر كاریگه‌ریا ده‌وروبه‌رێن عه‌بدولكه‌ریم و یێن ده‌ره‌كى ژى ئه‌ڤ داخوازیێن ره‌وا دهاتنه‌ پاشگوهخستن و دیسا ئه‌و زولم و سته‌ما ل ڤى گه‌لى دهاته‌كرن و هه‌روه‌توڤ ل پشتى نه‌مانا حوكمرانیا عه‌بدولكه‌ریم قاسم و عارفى ژى و هاتنا رژێما به‌عسا گۆر ب گۆر هه‌مان هه‌لویستێ دوژمنكارانه‌ به‌رامبه‌ر گه‌لێ كوردستانێ، مرۆڤ دكاریت بێژیت زێده‌تر ژ ده‌ستهه‌لاتا قاسمى ل كوردستانیان دهاته‌ كرن، له‌وما رۆژ ب رۆژێ هه‌لویستێ نه‌ته‌وى ل جه‌م تاكى كورد موكم دبوو و كۆم ب كۆم ب هه‌مى ئایین و نه‌ته‌وه‌ و مه‌زهه‌ب و ته‌خ و توێژڤه‌ خه‌لكێ ب شه‌ره‌فێ كورد و كوردستانێ په‌یوه‌ندى ب شۆرشێ دكرن و دبوونه‌ پێشمه‌رگه‌ بێ به‌رامبه‌ر و ب نان و چه‌ك و پارزینكێ پڕ بیروباوه‌ر، د ڤێ شۆرشێ دا چه‌ندین داستانێن بێوێنه‌ لسه‌ر ده‌ستێن پێشمه‌رگه‌ى هاتنه‌ تۆماركرن و دربێن مه‌زن ل دوژمن و دویڤه‌لانكان دهاتنه‌ وه‌شاندن مینا داستانا زاویته‌ و مه‌تین و هندرین و زۆزك… هتد.
ئه‌گه‌ر هنده‌ك بزڤرینه‌ڤه‌ بۆ ده‌ستكه‌فتیێن ڤێ شۆرشێ بۆ گه‌لێ كوردستانێ دزۆرن و ئه‌وێن كو هه‌تا نوكه‌ ئه‌م هه‌مى شانازیێ پێڤه‌ دبه‌ین ئه‌وه‌ كو بۆ جارا ئێكێ و د مێژوویا حوكمرانیا ده‌ستهه‌لاتا ئیراقێ دانپێدانا نه‌ته‌وێ كورد بوویه‌ ل ئیراقێ كو نه‌ته‌وێ كورد دووه‌م نه‌ته‌وه‌یه‌ ل ئیراقێ و ئه‌ڤه‌ژى ل رێكه‌فتنا دیرۆكیا (11/ئادارا/1970) دا بوو، دیسا د ڤێ شۆرشێ دا پارتى دیمۆكراتى كوردستان و ب رێبه‌رایه‌تیا بارزانیێ نه‌مر شیان كورد و كوردستانیان لبن ئێك چادرگه‌ه رێك بێخن، ڤێجا بگره‌ ل خانقین هه‌تا زاخۆ و ب بێ جوداهى و هه‌مى د ئێك سه‌نگه‌ر دا بوون كو ئه‌ڤه‌ژى ده‌ستكه‌فتى یه‌كا هه‌ره‌ مه‌زنه‌ یێ ڤێ شۆرشێ.
د ده‌مه‌كێ دا كو ئه‌م یادا (60)مین ساڵڤه‌گه‌را ئه‌ڤێ شۆرشێ دكه‌ینه‌ڤه‌، رۆژهه‌ڵاتا ناڤین و ئیراق و هه‌رێما كوردستانێ یێن د قۆناغه‌كا هه‌ستیار ده‌رباز دبیت و هه‌تاكو بكارین به‌رسینگێ پیلانێن دوژمن و داگیركه‌رێن كوردستانى بگرین فه‌ره‌ بزڤرینه‌ڤه‌ بۆ هه‌مان هه‌ستا نه‌ته‌وى و نیشتیمانى و وه‌لاتپارێزیا یا شۆرشا مه‌زنا ئه‌یلۆلێ و ریكخستنا ناڤماڵا كوردى یه‌.
دیسا ئه‌م یێن به‌ر ب هه‌ڵبژارتنێن په‌رله‌مانێ ئیراقا فیدرالڤه‌ دچین كو لبه‌ره‌ ل 10-10-2021 بهێته‌ ئه‌نجامدان، راسته‌ گله‌و گازنده‌ هه‌نه‌ لێ فه‌ره‌ بۆ ڤان هه‌لبژارتنان ئه‌وان گله‌ و گازنده‌یان بده‌ینه‌ ئالیه‌كێ و هه‌مى ب جۆش و خرۆشڤه‌ قه‌ستا لسه‌ر سندوقێن ده‌نگدانێ بكه‌ین و ده‌نگێن خوه‌ بده‌ین هه‌تاكو بكارین پتر كورسیان ل په‌رله‌مانێ ئیراقێ بده‌ستڤه‌ بینین و نوونه‌رێن مه‌ بكارن پتر به‌ره‌ڤانیێ ژ مافێن ده‌ستوورى و یاسایى یێن هه‌رێما كوردستانێ بكه‌ن ژبه‌ركو ب نه‌چوونا مه‌ ئه‌و گله‌و گازنده‌ چاره‌سه‌ر نابن به‌لكى دێ زێده‌تر بن.

ساڵح محه‌مه‌د ته‌یرۆ

ئه‌ڤه‌ (33) ساڵ ب سه‌ر مه‌زنترین كریارێن جینۆسایدكرنا گه‌لێ كوردستانێ یێن ل ده‌ڤه‌رێن ئازادكرى و ل ژێر په‌ردێ ئایه‌ته‌كا قورئانا پیرۆز بناڤ ئه‌نفال ده‌ربازبوون كو دویماهیك كریارا ئه‌نفالا هه‌شتێ بوو ل ده‌ڤه‌را به‌هدینان، گه‌ر ئه‌م ب وژدانڤه‌ ل سه‌ر كریارا به‌دناڤێن ئه‌نفالان بنڤیسین و فاكته‌رێن وێ یێن نیگه‌تیڤ ل سه‌ر جڤاكێ مه‌ ل هه‌مى ئالیه‌كێڤه‌ دزۆرن و یا ژ هه‌میان گرنگتر و ئارمانج و مه‌ره‌ما رژێمێ پێ هه‌یى كو ئه‌و ژى نه‌مانا نه‌ته‌وه‌یه‌ك و ملله‌ته‌ك بناڤێ كورد و و وه‌لاته‌ك ژى بناڤێ كوردستان و بزاڤه‌ك ژى بناڤێ بزاڤا رزگاریخوازا كوردستانێ. ب هه‌رحال ئه‌نفال هه‌ر ئه‌نفاله‌، ڤێجا چ ل گه‌رمیان هاتبیته‌كرن یان ل ده‌ڤه‌را به‌هدینان و ل هه‌ر بهۆسته‌كا ئاخا كوردستانێ بیت و ئه‌ڤ كریارێن ئه‌نفالا ژى ب هه‌شت قویناغان دا ده‌ربازبوون كو دویماهیك قۆناغا وێ یا هه‌شت بوو و ل رۆژا (25/8/1988) ل ده‌ڤه‌رێن ئازادكرى ل زاخۆ و هه‌تا ده‌ڤه‌رێن شێخان و ئاكرێ ده‌ستپێكر و هه‌رچه‌نده‌ ب نیاز بوون ل ڤێ مێژوویا ل سه‌رى دیار هێرش بهێته‌ ده‌ستپێكرن لێ دیار بوو كو هه‌مى هێزێن رژێمێ دڤیان نه‌هاتبوونه‌ ئاماده‌كرن بۆ ڤێ كریارا به‌دناڤا ئه‌نفالێ، له‌وما ل رۆژا (27/8/1988) ب دروستى هێرشه‌كا به‌ربلاڤ ب هه‌مى چه‌كه‌كێ مه‌زن و ب پالپشتیا چه‌ندین فه‌وجێن جاشان و بكارئینانا چه‌كێ كێمیایى ئینا سه‌ر ده‌ڤه‌رێ و ب هزاره‌ها خه‌لكێ ڤان ده‌ڤه‌ران و ئه‌و خه‌لكێ ل جهێن ئازادكرى و هه‌رده‌م پالپشتێن بزاڤا ئازادیخوازا كوردستانێ و مالێن وان بنگه‌هێن پێشمه‌رگه‌ى هاتنه‌گرتن و ئه‌نفالكرن و هنده‌ك ل وى خه‌لكى بێگونه‌ه و پشتى كو ژلایێ له‌شكرێ رژێمێ ڤه‌ هاتینه‌گرتن و ل پێشچاڤێن خێزانێن وان هاتنه‌ گولله‌بارانكرن مینا كاره‌ساتا گوندێ كورێمه‌ى، دیسا بكارئینا چه‌كێ كێمیایى و نه‌مازه‌ ل گه‌لیێ بازێ و چه‌ندین ده‌ڤه‌رێن دى و چه‌ندین پێشمه‌رگه‌هێن قه‌هره‌مان ب ئه‌گه‌را ئه‌وى چه‌كێ دژى مرۆڤایه‌تیێ هاتیه‌ بكارئینان هاتنه‌ شه‌هیدكرن.
بێگومان ئه‌نفال هه‌ر ئه‌نفاله‌ ڤێجا چ ل گه‌رمیان بیت یان ل ده‌ڤه‌را به‌هدینان بیت و مه‌به‌ستا من جوداهى نیه‌ دنێڤبه‌را ڤێ ده‌ڤه‌رێ و ده‌ڤه‌ره‌كا دى و هه‌ر كه‌سه‌كێ كورد و كوردستانى هاتبیته‌ ئه‌نفالكرن ئه‌ز ب كه‌سوكارێن خوه‌ دزانم، چونكو ئه‌ز ئێك ژ وان كه‌سامه‌ كو به‌رییا هێرش ده‌ست پێ بكه‌ت ب چه‌ند رۆژان مه‌ گوند و ماڵ و سه‌روه‌ت و سامانێ خوه‌ بجه هێلایى و به‌ر ب سنوورێ توركیا كه‌فتینه‌ رێ و مه‌ خوه‌ گه‌هاندى یه‌ سه‌ر سنوورێ توركیا و ل گوندێ (زێوه‌ ـ ئه‌رتووش) چووینه‌ ناڤ ئاخا توركیا، ئه‌و كاره‌سات و تراجیدیێن من د ڤێ كریارێ دا دیتى كو هه‌تا نها ژى ل پێشچاڤێن منه‌.
د ده‌مه‌كێ دا كو ئه‌م ئه‌ڤێ یادا پڕ كاره‌سات و ته‌راجیدى ساخ كه‌ینه‌ڤه‌ رۆژهه‌لاتا ناڤین ب گشتى و نه‌مازه‌ ئیراق و هه‌رێما كوردستان یا د قۆناغه‌كا هه‌ستیار و دژواردا ده‌رباز دبیت و هه‌تاكو هه‌رێما كوردستانێ بكاریت ژ ڤێ قۆناغێ ده‌رباز ببیت و به‌رسینگێ هه‌مى پیلانێن دوژمن و داگیركه‌رێن كوردستانێ بگریت و باشترین به‌رسڤ بۆ نه‌حه‌ز و نه‌یارێن كوردستانێ ژى رێكخستنا ناڤمالا كوردى یه‌ ب ئێك هه‌ڵویستیا نه‌ته‌وى و نیشتیمانى و دویر ژ به‌رژه‌وه‌ندیێن به‌رته‌نگێن حزبایه‌تى. دیسا فه‌ره‌ ئه‌م په‌ند و عیبره‌تان ژ ڤان كریارێن هۆڤانه‌ وه‌ربگرین هه‌تاكو جاره‌كا دى گه‌لێ كوردستانێ تووشى جینۆساید و ئه‌نفالكرنێ نه‌بنه‌ڤه‌ و بگه‌هنه‌ وان ئارمانجێن كو ساڵه‌ها ساڵه‌ خه‌بات و تێكۆشین و به‌رخودان و قوربانیدان ژێرا دهێته‌كرن و دان كو ئه‌و ژى سه‌رخوه‌بوون و ده‌وڵه‌تبونا كوردستانێ یه‌.
ل دویماهیێ و ب ڤێ بیره‌وه‌ریێ پێشنیار دكه‌م بۆ كابینه‌یا نه‌هێ یا حوكمه‌تا هه‌رێما كوردستانێ كو ب كابینه‌یا ئاڤه‌دانكرن و چاكسازیێ هاتیه‌ ئاڤاكرن و ب به‌رژه‌وه‌ند ژى دزانم كو پتر چاڤخشاندنه‌كێ د ژین و ژیارا ماڵباتێن سه‌ربلندێن شه‌هیدێن ئه‌نفالكرییا ب گشتى و نه‌مازه‌ یێن به‌هدینان دا بهێته‌كرن، چونكى هه‌ر ئه‌ڤ ئه‌نفالكریى و ماڵباتێن وان بون كو بوینه‌ پشته‌ڤان و هاریكارو فاكته‌ر بو هه‌لگیرساندنا ئاگرێ شۆرشا گوڵانا پێشكه‌فتنخواز. هه‌روه‌توڤ ژى بۆدجه‌یه‌كا تایبه‌ت بهێته‌ دابینكرن بۆ كه‌لا نزاركێ كو ب سه‌دان تاوانێن هۆڤانه‌ د ڤێ كه‌لێ دا دژى وان ئه‌نفالكریان هاتینه‌ ئه‌نجامدان و ببیته‌ مۆزه‌خانه‌یه‌ك ژى بۆ نفشى داهاتى و شاندێن بیانى ل ده‌مێ سه‌ره‌دانا هه‌رێما كوردستانێ دكه‌ن پتر سه‌رهه‌لى وان كاره‌ساتان ببن ئه‌وێن ب سه‌رێ گه‌لێ مه‌دا هاتین…

سالح محه‌مه‌د ته‌یرۆ
ئه‌گه‌ر ئه‌م هنده‌ك بزڤرینه‌ڤه‌ بۆ دیرۆكا خویناوى ئه‌وا كو د نێڤ هیزێن سیاسى یێن رزگاریخوازیا كوردستانێ و حوكمه‌تێن داگیركه‌رێن كوردستانێ هاتینه‌ روودان، دزڤریته‌ڤه‌ بۆ دیرۆكه‌كا به‌ریا ب چه‌ندین سالان، ب هزرا من ژى هه‌ر ئه‌ڤ ناكۆكیێن ناڤخوه‌یى بووینه‌ كو بووینه‌ فاكته‌ر و سه‌ده‌م سه‌ره‌كى كو هه‌تا نها ئه‌ڤ ملله‌ته‌ ب مافێن خوه‌ یێن ره‌وا نه‌گه‌هشتین و سه‌ره‌راى هنده‌ك فاكته‌رێن ده‌ره‌كى، هه‌رده‌مێ ئارمانجێن ئه‌ڤى ملله‌تى نێزیك بووینه‌ كو بگه‌هنه‌ ئارمانجێن خوه‌ یێن خه‌بات و قوربانیدان ژێرا هاتیه‌كرن و دان دوژمن و نه‌حه‌زێن ئه‌ڤى ملله‌تى پیلان و بووسه‌ داناینه‌ و ئه‌م بخوه‌ ژى ڤێجا ل ژێر هه‌ر په‌رده‌یه‌ك و ناڤه‌كێ بیت، بووینه‌ داروده‌ستێن وان بۆ ب سه‌رگرتنا وان پیلان و قوربانیێن سه‌ره‌كى هه‌ر ئه‌ڤ ملله‌تێ ژار و په‌ریشان بوویه‌، لێ یا مرۆڤ پێ دلگران دبیت ئه‌وه‌ كو سیاسه‌تمه‌دارێن كورد مفا ژ وان سه‌ربۆرێن تاڵ وه‌رنه‌گرتینه‌، له‌وما فه‌ر بوو كو هه‌ر كه‌سه‌كێ خوه‌ ب كورد بزانیت و هه‌ست ب به‌رپرسیاره‌تیا ئه‌خلاقى و ئایینى و نه‌ته‌وى ونیشتیمانى بكه‌ت، ڤێجا سه‌ر ب هه‌ر لایه‌نه‌كێ سیاسى بیت یان بێ لایه‌ن بیت و ل هه‌ر پارچه‌یه‌كا كوردستانا داگیركرى بیت ل دژى شه‌ڕێ براكوژیێ رابوه‌ستیت و نه‌بیته‌ پاڵه‌ بۆ خۆشكرنا ئاگرێ شه‌ڕێ مالوێرانیێ و پاش دیرۆك ره‌حمێ ب كه‌س دا نابه‌ت، فه‌ره‌ ئه‌ڤه‌ ژى ل بیرا مه‌ نه‌چیت كو وه‌كو ئه‌ركه‌كێ نه‌ته‌وى و نیشتیمانى هه‌ر لایه‌نه‌كێ سیاسى یێ كورد یى كو ئه‌ڤرۆ د قادا به‌رخودانێ دا ژیوارێ هه‌رێما كوردستانێ بزانیت و ئه‌و لایه‌نێن پارچێن دى ژى یێن كوردستانێ تاكو ب كارن پتر كاریگه‌ریا خوه‌ ببینن ل سنوورێ خوه‌، چالاكیێن خوه‌ یێن شۆره‌شگێرى ئه‌نجام بده‌ن، هه‌تاكو ئه‌ڤ چالاكیێن وان ل سنوورێ هه‌رێما كوردستانێ نه‌كه‌ڤنه‌ د به‌رگومانا ده‌وله‌تێن هه‌ڤسوى كو هه‌رده‌م ل به‌هانه‌ه‌یان دگه‌رهێن بۆ هه‌رێما كوردستانێ ئه‌وا ل باشۆر دروست بووى.
ئه‌م هه‌مى دزانین كو ئه‌و ئه‌زمۆنا نه‌خۆش و مالوێرانیێ كو د سالێن شیستان دا ل چه‌رخێ بۆرى ده‌ستپێكرى و ب سه‌دان گه‌نج و لاو و شۆره‌شگێر و دلسۆز و كوردپه‌روه‌ر بوونه‌ قوربانى و سۆته‌مه‌نیێن ڤان شه‌ران دا، دنێڤبه‌را لایه‌ن و هێزێن رزگاریخوازیێن كوردستانێ لێ خۆیا ژى بوو، كو هیچ هێزه‌ك ب شه‌ڕى نكاریت هێزا دى ژناڤببه‌ت و ب تنێ زه‌ره‌ر و زیان نه‌بن ب هه‌ر دو لایه‌نێن شه‌ڕكه‌ر، ئه‌م دپشتراستین ژى و دیرۆكێ ژى یا سه‌لماندى كو داگیركرن و خوه‌سه‌پاندن ب زه‌برى هێز و چه‌ك وته‌قه‌مه‌نى و بێ پشته‌ڤانیا گه‌ل و ملله‌تى دێ دووماهیا وێ كاره‌سات و مالوێرانى بیت.
ئه‌ڤرۆ ژى كاودانێن هه‌رێما كوردستانێ و به‌رژه‌وه‌ندیا گشتى ژ مه‌ داخواز دكه‌ن كو سه‌ره‌راى ئه‌و ناكۆكیێن سیاسى یێن د ناڤبه‌را لایه‌نێن سیاسى ل هه‌رێما كوردستانێ، لێ ب هیچ ره‌نگه‌كێ وه‌كو ئه‌ركه‌كێ ئه‌خلاقى و ئایینى و نه‌ته‌وى و نیشتیمانى و هه‌ستكرن ب به‌رپرسیاره‌تیێ د دلخۆش نه‌بن ب ڤان پێكدادانێن هاتینه‌ روودان و دهێنه‌ روودان د ناڤبه‌را گه‌ریلایێن په‌كه‌كێ و پێشمه‌رگه‌هێن كوردستانێ ل سنوورێ هه‌رێما كوردستانێ، چونكو ئه‌ڤ شه‌ڕێ ل نێڤبه‌را هێزێن په‌كه‌كه‌ و هێزێن پێشمه‌رگه‌هێ كوردستانێ و ل هیچ ده‌م و سه‌رده‌مه‌كێ دا و نه‌مازه‌ دڤان كاودانادا دبه‌رژه‌وه‌ندیا گه‌لێ كوردستانێ و په‌كه‌كێ ژى دا نینه‌ و فه‌ره‌ په‌كه‌كه‌ ژى سنوورێ خوه‌ یێ خه‌بات و به‌رخودانێ بزانیت، ره‌نگه‌ ئه‌ڤه‌ پیلانه‌ك بیت بۆ پتر به‌رفره‌هكرنا شوون پێن داگیركه‌رێن كوردستانێ بۆ باشۆرێ كوردستانێ.
له‌وما فه‌ره‌ ژى گه‌ریلایێن په‌كه‌كێ ژى هه‌ست ب ڤێ چه‌ندێ بكه‌ن و شه‌ڕێ خوه‌ ببه‌نه‌ڤ باكۆرێ كوردستانێ كو چیایێن وان گه‌له‌ك وگه‌له‌ك ژ چیایێن كوردستانا باشۆر ئاسێترن بۆ به‌ره‌ڤانیكرن ل وێ پارچا كوردستانێ ئه‌گه‌ر ڕاست ببێژن، پێدڤى یه‌ ل سه‌ر حوكمه‌تا عیراقا فیدرال و حوكمه‌تا هه‌رێما كوردستانێ ب هه‌مى لایه‌نه‌كێ سیاسى یێ كورد و كوردستانى ڤه‌ و ب هه‌مى ره‌نگه‌كێ رێ ل ڤان جۆره‌ شه‌ڕان بگرن.
دیسا د هه‌مان ده‌م دا فه‌ره‌ كو پاراستنا سه‌روه‌ریا ئاسایش و ئارامى و سه‌قامگیریا هه‌رێما كوردستانێ ل كارێن پێشه‌كیا هه‌مى حزبێن كوردستانا باشۆر و یێن دى ژى بن و ب هیچ ره‌نگه‌كێ مساومه‌ ل سه‌ر نه‌هێته‌كرن و وه‌سا ل میدیا و راگه‌هاندنێن خوه‌دا دیار بكه‌ن كو ب تنێ لایه‌نه‌ك به‌رپرسیاره‌ نینه‌ ب هاتنا ڤى له‌شكرێ توركیا بۆ هه‌رێما كوردستانێ و باش بزان كو فاكته‌رێن هاتنا وان په‌كه‌كه‌یه‌ .دیسا هزر نه‌كه‌ن ئه‌ڤ شه‌ڕه‌ ل سنوورێ فلان لایه‌نى یه‌ نه‌خێر و سه‌د جاران نه‌خێر، به‌لكو ل سنوورى هه‌مى كورد و كوردستانێ یه‌ و پشكه‌كه‌ ژ هه‌رێما كوردستانێ و ب سه‌دان شه‌هید ژى ژێرا هاتینه‌ دان ل هه‌مى لایه‌نه‌كێ هه‌تاكو هاتیه‌ڤ رزگاركرن، ڤێجا خودان چ بیرو بۆچوونێن سیاسى بن، دیسا په‌كه‌كه‌ ژى د سیاسه‌تا خوه‌دا بچیته‌ڤه‌ و به‌س بیت ئه‌ڤان گه‌نج و لاوان ب كوشتن بده‌ت و بێكو ئارمانجه‌كا نه‌ته‌وى و نیشتیمانى یا دیار و زه‌لال بیت.

سالح محه‌مه‌د ته‌یرۆ
ئه‌م هه‌می دزانین كو شۆره‌شا ئه‌یلۆلا مه‌زن ب رێبه‌ریا پارتی دیمۆكراتی كوردستان و سه‌ركردایه‌تیا حه‌كیمانه‌ یا بابێ روحیێ نه‌ته‌وا كورد بارزانیێ نه‌مربوو و درێژترین شۆره‌شا بزاڤا ئازادیخوازا كوردستانێ بوو، د ڤێ شۆره‌شێ دا چه‌ندین ده‌سكه‌فتیێن مه‌زن بۆ ملله‌تی كورد هاتنه‌ تۆماركرن كو هه‌تا ملله‌تێ كورد مایه‌ پێدڤیه‌ شانازیێ پێڤه‌ بكه‌ن. دوژمن و هێزێن داگیركه‌ر هزره‌كا مه‌زن بۆ ڤێ شۆره‌شێ دكر، له‌وما هه‌رده‌م هه‌ول و بزاڤێن كوشنده‌ ژلایێن دوژمنان ڤه‌ دهاتنه‌كرن بۆ نه‌هێلان و بنبڕكرنا ئه‌ڤێ شۆره‌شێ و پیلان ل دووڤ پیلانێ دادرێشتن بۆ بێ ده‌نگكرنا ئه‌ڤێ شۆره‌شێ، لێ ئیرادا ملله‌تێ كورد ب هه‌می ته‌خ و توێژان ڤه‌ ژ هه‌می پیلانێن وان مه‌زنتر بوو و رۆژ ب رۆژێ باوه‌ریا خه‌لكێ كوردستانێ ب ڤێ شۆره‌شێ موكمتر ببوو و دربێن مه‌زن ژی ل دوژمنان دوه‌شاندن، له‌وما رژێما به‌عسا گۆر به‌ گۆر نه‌چاربوو ل وی سه‌رده‌می هه‌وارا خوه‌ بۆ ئیك ژ مه‌زنترین ده‌وله‌تێن زلهێزێن وی سه‌رده‌می و ده‌وله‌تا ئیرانێ ببه‌ت، بۆ دارێشتنا پیلانه‌كێ ب به‌رامبه‌ر ته‌نازولكرن ژ چه‌ندین پارچه‌یێن ئاخا عیراقێ راوه‌ستاندن وراگرتنا هاریكاریێ بۆ شۆره‌شا ئه‌یلۆلا مه‌زن و ئه‌وبوو رێكه‌فتنا خیانه‌تكاریا جه‌زائیر ل رۆژا (٦/ئادارا/١٩٧٥) دنێڤبه‌را شاندێ عیراقێ ب سه‌ركردایه‌تیا (سه‌دام حسین) جێگرێ سه‌رۆك كۆمارا عیراقا وی سه‌رده‌می و( محه‌مه‌د ره‌زا شاه په‌هله‌وی) شایێ ئیرانێ ول پایته‌ختێ جه‌زائیر وب ئاماده‌بوونا (هه‌وار بومیدیه‌ن) سه‌رۆكێ جه‌زائیر یێ وی سه‌رده‌می هاته‌ مۆركرن د نێڤبه‌را عیراقێ و ئیرانێ و ب پالپشتیا هێزێن زلهێز، ل ئه‌نجامێن ئه‌وێ رێكه‌فتنا خیانه‌تكار شۆره‌شا ئه‌یلۆلا مه‌زن تووشى مه‌زنترین هه‌لنگفتنێ بوو و بۆ ده‌مه‌كێ كێم شۆره‌ش راوه‌ستا و ب هزاران خه‌لكێ دلسۆز و شۆره‌شگێر و خودانشیان ئاواره‌یی ئیرانی بوون و ئه‌وێن كو ل عیراقێ ژی مایین تووشى گرتن وكوشتن و ئه‌شكه‌نجه‌ و ڤه‌گوهاستنێ بوون، ب راستی بێ ئومێدیێ بالێ خوه‌ ل سه‌رئاسمانێ كوردستانێ كێشابوو و ب جاره‌كێ كوردستان ره‌ شپوش ببوو، لێ هیچ ده‌مه‌كێ بێ ئۆمیدیێ پارتی و بارزانی نه‌گرتیه‌ و رامانا بێ ئومیدیێ ژی نزانن، چونكو هه‌روه‌كی بارزانیێ نه‌مر كه‌ره‌م كری ((ل سه‌ركه‌فتنا مه‌غرۆر نه‌بن و ل شكه‌ستنا ژی بێ ئۆمێد نه‌بن))، له‌وما هه‌ر زوی ب زوی هزر د وێ چه‌ندێ دا كر كو جاره‌كا دی شۆره‌ش ده‌ست پێ بكه‌ته‌ڤه‌ و ئه‌وبێ ئۆمێدیا ل جه‌م خه‌لكێ كوردستانێ دروست بوویی بكه‌ته‌ ئومێده‌كا گه‌شتر و مه‌زنترووێ بێ ئومێدیێ بره‌ڤینیت، له‌وما ل رۆژا (٢٦-گولانێ – ١٩٧٦) شۆره‌شا گولانا پێشكه‌فتنخواز هاته‌ راگه‌هاندن و ل ده‌ستپێكێ ل ژێر ناڤێ سه‌ركردایه‌تیاكاتی ئاگرێ شۆره‌شێ گه‌ش بوو، لێ به‌رخودانا یا ده‌ستپێكێ یا ئه‌ڤێ شۆره‌شێ جوداهیه‌ك هه‌بوو ل شۆره‌شا ئه‌یلۆلا مه‌زن كو ئه‌وژی شۆره‌ش ب ره‌نگه‌كێ پارتیزانی ده‌ستپێكر, هه‌لبه‌ت خه‌لكێ كوردستانێ ب گشتی ونه‌مازه‌ دلسۆز وكوردپه‌روه‌ر و وه‌لاتپارێز و پارتی په‌روه‌ران زوی ب زوی په‌یوه‌ندی ب رێخستنێن شۆره‌شا گولانا نیشتیمانخوازكرن و ب هه‌می ره‌نگه‌كێ بوونه‌ پالپشت و هانده‌رێن شۆره‌شێ وكو ئه‌ڤ شۆره‌شه‌ درێژه‌پێدانا شۆره‌شا ئه‌یلۆلا مه‌زنه‌ و به‌رسڤه‌كا توندبوو بۆ دوژمنی، چونكو دوژمن گه‌هشتبوو وێ قه‌ناعه‌تێ كو ئێدی شۆره‌شه‌ك وكێشه‌یه‌ك ل عیراقێ نابیت ب ناڤێ كورد هه‌روه‌كی سه‌رۆكێ عیراقا وی سه‌رده‌می ((احمد حسن البكر)) د په‌یڤه‌كا خوه‌ دا گۆتی: (قدا نتهت القچیه‌ الكوردیه‌ فی العراق الی الابد..) هه‌ر ئه‌ڤ شۆره‌شه‌ و یێن بزاڤا ئازادیخوازا كوردستانێ بوون كو بووینه‌ ئه‌گه‌رێ هندێ جه‌ماورێ كوردستانێ ل به‌هارا ساڵا (١٩٩١) سه‌رهلدانێ بكه‌ت و ئاخا پیرۆزا كوردستانێ ل دوژمنان پاقژ بكه‌ن و ئه‌ڤرۆ ببینه‌ خودان سه‌رۆكایه‌تیا هه‌رێمێ و په‌رله‌مان و حوكمه‌ت رۆژ ب رۆژ كوردستان به‌ر ب ئاڤه‌دانكرنێ ڤه‌ دچیت.

له‌وما فه‌ره‌ كو ئه‌م هه‌می به‌رهه‌مێ ئه‌ڤان شۆره‌ش و به‌رخودانێن گه‌لێ مه‌ بپارێزین كو ئه‌ڤرۆ هنده‌ك ژ وان ئارمانجان گه‌هشتینه‌ و ئه‌م ل ژێر سایه‌یی وێ دژین كوئه‌و ژی حوكمه‌تا هه‌رێما كوردستانێ یه‌ و ئه‌ڤه‌ ژی دزڤریته‌ڤه‌ بۆ ئێك هه‌لویستی ورێخستنا ناڤمالا كوردی و ئه‌م هه‌می ب هه‌ڤرا كاربكه‌ین هه‌تا كو بگه‌هینه‌ وان ئارمانجان ئه‌وێن شۆره‌ش و سه‌رهلدان ل پێناڤ دا راپه‌ری و ب هزاران شه‌هید بووینه‌ قوربانی و ب ساڵان خه‌بات و تێكۆشان و به‌رخودان ژێرا هاتیه‌كرن، دێ بلا یادا(٤٥) مین سالڤه‌گه‌را شۆره‌شا گولانا پێشكه‌فتنخواز پتر ببیته‌ هانده‌ر و پالپشت بۆ پاراستنا ئه‌ڤان ده‌سكه‌فتیان، زێده‌تر رێخستنا مالا كوردی بیت.