دبیت ئه‌ڤ ناڤه یێ گران بیت بۆ پرانیا رایا گشتی كو دێ ئۆپه‌راسیۆن گه‌له‌ك یا دژوار بیت وه‌كو كاره‌كێ له‌شكری، لێ ل دووڤ وان سه‌ربۆرێن مه وه‌ك پێشمه‌رگه ل گه‌ل رێخراوا نه‌رێخستی ب ره‌نگه‌كێ رێكوپێكێ سه‌ربازی، دوور نینه ب دیتنا من ئه‌ڤ ئۆپه‌راسیۆنه گه‌له‌ك رۆژان ب خوه‌ڤه بگریت، نموونه ژی ئه‌و ده‌ڤه‌رێن پێشمه‌رگه‌ی رزگار كرین، وه‌كو ئۆپه‌راسیۆنا ده‌ڤه‌رێن میحوه‌رێن، به‌ربه‌ستا مووسلێ، جه‌سه، زومار، كارێزێ، حه‌گنه، قه‌سه‌ریجێ، وانكه، و هتد، كو هه‌ژمارا مه ب سه‌دان جاران ژ یا وان پتر بوو، ئێك ژ وان ئۆپه‌راسیۆنان نێزیكی 8000 سه‌ربازان بوون، ل به‌رامبه‌ر ژی گه‌له‌ك ب ساناهی ئه‌وان جهێن خوه به‌ردابوون و به‌رهنگاریا وان نه ل وی راده‌ی بوو یا مه هزر بۆ ددانا و به‌لێ جاره‌كا دن دێ زڤرمه ڤه و بێژم ژی كو ل دووڤ پره‌نسیپا له‌شكری ناببیت مرۆڤ پێشدیتنا ساناهی بدانیت و هه‌می كاروباران بدانیت ساناهیتر ژ كه‌تواری، به‌لێ دڤێت بزه‌حمه‌تتر بدانیت، به‌لێ ل ڤێره بلا ڤه‌رێژا گۆتنێ وه‌كو ژیوار بۆ هه‌می خه‌لكی بلا ئه‌م ته‌ماشه بكه‌ینه هێزا داعشێ ل مووسلێ هه‌ر وه‌كو قه‌بارێ وێ بخوه نه گه‌له‌ك نزم نه‌دانین و گه‌له‌ك مه‌زن ژی نه‌كه‌ین زێده رادێ خوه. ئه‌ڤ ئۆپه‌راسیۆنه ل دووڤ پێشنیازا من پێدڤیه پارڤه بیته چه‌ندین قووناغان و ب ڤی ره‌نگی:
1. قووناغا میدیایی و پرۆپاگندێ: پلانه‌كا رێخستی یا دارێتێ ب تێروته‌سه‌ل بهێته دانان ژ لایێ راگه‌هاندنا ژۆرا عه‌مه‌لیاتان ڤه ب هه‌ماهه‌نگی ل گه‌ل هه‌والگێریا له‌شكری یا گشتی و چقێن وێ یێن هێزا پاراستنێ و ئه‌فسه‌ره‌كێ شاره‌زا و ئه‌كادیمی سه‌رپه‌رشتیێ ل سه‌ر بكه‌ت، ئه‌ڤه ژی هه‌كه ب من بیت:
أ ـ كو ئێزگه‌هه‌كێ تایبه‌ت بو بهێته ده‌ستنیشانكرن و بلا ئێزگێ ده‌نگێ مووسل بیت چونكو ستافێ وێ یێ به‌رهه‌ڤه نها ل كوردستانێ و په‌خشا وێ ل مووسلێ هه‌یه و هه‌می ئێزگه‌ه و كه‌نالێن عیراقێ و ده‌ڤه‌رێ پرۆپاگندێ بۆ بكه‌ن، چونكو سه‌ره‌رای هندێ كو داعشێ ل مووسلێ سانسۆر داناینه سه‌ر ئامیره و تلفزیۆنان، به‌لێ هه‌نه ب دزیڤه هه‌لدكه‌ن و ئه‌نترنێت ژی هه‌یه خه‌لكێ مووسلێ ب دزیڤه بكاردئینن، كو چاوا ل ته‌دمور وه‌لاتیه‌كێ سووریی بۆ رۆژناما ئێندیپێندت داتا و ڤیدیۆ فرێدكرن ب دزیڤه.
ب ـ ئاراسته‌كرنا پرۆپاگنده‌یان بۆ خه‌لكێ مووسلێ بلا ب بۆیاغه‌كا ئاینێ ئیسلامێ بیت چونكو داعشێ ژی ئه‌و ستایل ل ده‌سپێكێ بۆ ئاراسته‌كر ب هه‌له‌ماری هه‌تا ده‌ستێ دانایه سه‌ر. چونكو مووسلی خوه ددانن كه‌سێن موته‌دین و موسلمان زێده‌ی راده‌ی.
ج ـ بلا هاڤێتنا به‌لاڤۆكان ب رێیا فرۆكان ڤه بهێته كرن، گۆتارێن ده‌روونی ب شێوازه‌كێ ساده بن، كو وان بڤێت نه‌ڤێت به‌لاڤۆك بگه‌هنه به‌رده‌ستێ وان، كه‌س نامینیت كو ئه‌و مزگینی نه‌گه‌هیتێ و كه‌یفا وان دێ پێ هێت چونكو بێهنا وان گه‌له‌ك ته‌نگ بوویه، كو ئێدی ئه‌و ژی دێ تێر بن و پرانیا وان ئێدێ ته‌رویجا تیرۆرێ ناكه‌ن و ده‌ڤ گازنده نامینن، یا وان دیتی ئه‌و باش ڤه‌مراندن.
د ـ بلا گۆتاره‌كا تایبه‌ت ئاراسته‌كری بیت بۆ شه‌رڤانێن داعشێ كو وان تێبگه‌هینن ئه‌و یێن شه‌ڕێ موسلمانان بخوه دكه‌ن و ئه‌ل نه ل سه‌ر حه‌قیێ نه، گه‌له‌ك ژ وان یێن دیل دكه فتنه ده‌ستێن پێشمه‌رگه هزر دكرن كو كورد نه‌موسلمانن.
2 ـ قووناغا بۆردومانێ:
ئه‌ڤه ژی دی ب دو جۆران بیت، یا ئه‌سمانی به‌ری یا تۆپخانێ یه، دێ یا جه‌خت بیت و ئارمانجێن زێندی ب خوه‌ڤه گریت، بلا هنده‌ك پر بهێنه په‌قاندن، جهێن له‌شكری، هه‌ر چه‌نده ئه‌و دێ بزاڤێ كه‌ن ئارمانجان بڤه‌شێرن و چنه د ناڤ خه‌لكێ سڤیل دا، له‌ورا خوه هێرش و به‌رگیركرنا وان ژی یا له‌شكری نابیت، به‌لێ هه‌والگێری فه‌ره ل ڤێره رۆلێ خوه ببینیت وه‌كو مه ل سه‌ری ژی ئاماژه پێ كری.
بۆردۆمانا تۆپخانێ و راجیمێ ژی دێ پتر رۆلێ خوه بینیت ژ به‌ر كو كریار دێ یا له‌شكری بیت، ل ڤێره ژی ژ به‌ر بیناهیكرن (ره‌صدی) دێ هه‌بیت، یا باش ئه‌وه ژی هه‌كه ئه‌نترنێتێ راسته خوه بهێته گرێدان باشتره چونكو هه‌ژمارێن ئه‌حداسیاتان د دیاركرینه ل سه‌ر نه‌خشه‌یی. دێ پشته‌ڤانیا هێرشێ هێته كرن ل ده‌مێ (اقتحام) ێ و هێرشێن هه‌مه‌ر و ده‌رۆعان، كو ل وان ئارمانجان بده‌ن یێن به‌رهنگاریێ دكه‌ن، ل ڤێره ژی هێزا داعش گه‌له‌ك باوه‌ریا خوه ددانه ته سه‌ر قه‌ناسان، دێ ئه‌ڤ خاله چه‌نده‌كێ یا ئالۆز بیت. دڤێت سه‌رباز باش جلك و كه‌لوپه‌لێن درع راپێچیت.
3 ـ قووناغا پێشڤه‌چوونێ:
پێشڤه‌چوونا دووماهیێ دڤێت پشتی پلانه‌كا دی بیت یا چاوانیا دۆرپێچكرنێ، دڤێت پلانا ته‌عبیێ ل ڤێره بهێته دارێتن ژ لایێ ئه‌فسه‌رێن بسپۆر ڤه بۆ دانانا تیرێن هێرشبرنێ، دڤێت ئه‌و ده‌ڤه‌رێن قورتالبوونا وان بهێنه گرتن یێن كو فرۆكه نه‌بینیت و نه‌شێت لێبده‌ت، پێدڤیه ئالیات بهێنه دادان ب په‌راشۆتان ل جهێن ستراتیژی و هه‌ر وه‌سا هێزه‌كا باش یا سه‌بازێن په‌راشۆتان بهێنه دادان، هه‌لبه‌ت ئه‌ڤه ژی دمینیت ل سه‌ر جۆرێ وی له‌شكرێ نیزامی هه‌كه یێن هه‌ڤپه‌یمانان بن، به‌لێ هه‌كه هێزا پێشمه‌رگه‌ی بن، یا ژ من ڤه مه نه‌واته‌كا باش هه‌یه و ئه‌ز ب خوه ژی وه‌كو ئه‌فسه‌ره‌ك (عقید) ئێك ژ سه‌رپه‌رشتێن ئێكه‌م خۆلا ئه‌فه‌سه‌ران بووم یێن ل له‌شكرێ تایبه‌ت هاتینه مه‌شقدان ده‌مێ ب پلا (نه‌قیب) بووم، كو خۆله‌ك بهێته ڤه‌كرن و مه ژی هێزا په‌راشۆتڤانان هه‌بیت، ئه‌ڤه زێده‌باری دادانا فرۆكێن ب پانه‌ك هێلیكۆپته‌ر بۆ دانانا هێزێن مللی چو ژ پێشمه‌رگه‌ی یان حه‌شدا شه‌عبی یان یه‌كه‌یێن له‌شكرێ عیراقێ. پاشی دێ ب هه‌مه‌ر و تانك و دروعان پێشڤه‌چوون دێ یا رێكوپێكك و سه‌ركه‌فتی ببیت.
4 ـ قووناغا دۆرپێچكرنێ:
هه‌می ده‌ڤه‌ر دێ هێنه ئاسێكرن پشتی كو به‌رگریكرن نه‌مینیت، یا باش ئه‌وه ئقتیحام زوو نه‌هێته كرن، ژ به‌ر كریارێن ته‌خریبێ چاندنا عه‌بواتان و تێنتیان ژ دوور ڤه، بلا چه‌ند رۆژان ژ دوور ڤه بهێنه چاره‌سه‌ركرن دا زیانێن گیانی نه‌بن، پاشی بلا هێزێن ئه‌ندازێ ب هوشیاری و ب بكارئینانا رۆبۆتان و ئامیره و درۆعان چاره‌سه‌ری بهێنه كرن هه‌ر وه‌سا مفا ژ دیلبوویان وه‌ربگرین بۆ دیاركرنا داتایێن چاندنا ئه‌لغام و ته‌خریباتان.
5 ـ قووناغا هێرشكرنێ:
ئه‌ڤ قووناغه دێ یا ب زه‌حمه‌ت بیت، دڤێت پلان و ئارمانجێن وان یێن گرنگ بن، وه‌كو لێدانا سه‌رانێن وان ژ ئه میر و به‌رپرسێن وان دا مۆرالا وان بهێته خار، دڤێت هه‌می ئه‌و سه‌ربازێن دچنه هێرشا ده‌سپێكێ یا ته‌ماسی ل گه‌ل دوژمنی یا مغاویر بیت و مه‌شقدایی بیت ل سه‌ر كریارێن پیشه‌یا مه‌یدانێ (مهنه المیدان). د ا خوه ژ مه‌ترسیا ئاگرێ دوژمنی بپارێزن و ئه‌و هه‌می راسپارده‌یێن زانستێ له‌شكری بكاربینن.
هه‌كه هات و ئه‌ڤ ئۆپه‌راسیۆنه هاته ده‌سپێكرن دێ بیته ئه‌گه‌ره‌ك كو پشتا داعشێ بشكێت و هه‌ر ب له‌ز ئه‌و ئۆپه‌راسیۆنێن باژێرێن دیتر ژی بهێنه ده‌سپێكرن. هه‌كه له‌شكرێ هه‌ڤپه‌یمان و ئه‌مریكیان پشكدار ببن دێ گه‌له‌ك زوو و به‌لكو ب سعه‌تان ئۆپه‌راسیۆنێ ئه‌نجامبده‌ن وه‌كو سه‌ربۆرا 2003 یا رۆخیانا به‌غدایێ.
نووترين نووچه
- دڤێت ئالیێن سەركەفتی د هەلبژارتناندا ب پێكئینانا حوكمەتا نوو دلێ گەلێ كوردستانێ خوەش بكەن
- هیڤی یە قـانوونا بودجـەیێ ببیتـە ئەگـەرێ چـارەسەركـرنا كێشەیێن هـەلاویستی
- گرنگییا ڤەكرنا قونسلخانەیا عومانێ ل كوردستانێ گەنگەشەكر
- دوپاتی ل پێشڤەبرنا پەیوەندیێن هەرێمێ و ئیرانێ هاتە کرن
- سەرۆكێ حوكمەتێ دوپاتیێ ل پێكڤەژیانا ئاشتییانە دكەت
- ئارمانجا سەرەكییا كۆمبوونا مەزلۆم عەبدی ئێكگرتنا بەرەیێ كوردی بوو ل سووریێ
- سەرۆك بارزانی هیچ داخۆیانییەك ل دۆر پۆستێ سەرۆك وەزیرێن ئیراقێ نەدایە
- هیڤیدارین ببیتە دەستپێكا چارەسەكرنا هەموو كێشەیان
- پێشوازیێ ل دەنگدانا جڤاتا نوونەرێن ئیراقێ د راستڤەكرنا بودجەی دا دكەین
- ڤیان سەبری: قانوونێن زێدەتر بۆ بەرژەوەندییا ئیراقێ و هەرێما كوردستانێ دێ دەركەین
شیرزاد نایف
ده‌مێ هه‌لویست به‌رته‌نگ دبیت
ده‌مێ هه‌ڵویست به‌رته‌نگ دبیت، كه‌سێ های ژ كه‌سێ نامینیت، هه‌موو دبێژن هه‌ر په‌ز و پێپكا خوه، هه‌كه مرۆڤ ئه‌ندامێ گرۆپێ بیت، پێدڤیه گیانێ ته‌ڤایێ سه‌ربگریت و ره‌وشت هینگی دیار دبیت، به‌لێ مخابن ئێدی گیانێ هه‌ڤالینیێ كێم بوویه دنێڤ گرۆپێ دا و هه‌ر ئێك بزاڤێ دكه‌ت گۆشتێ هه‌ڤالێ خوه بخۆت، نه‌خاسمه هه‌كه هه‌ڤالێ مرۆڤی یێ دلساخ بیت، دێ كه‌یسا خوه لێ گرن و ئه‌و باشی بیته پاریه‌كێ ده‌ڤێ كه‌یسۆیان، ڤی سه‌رده‌می وژدانێ رۆلێ ڵاواز گێرایه د رێڤه‌برینا به‌رژه‌وه‌ندیا گشتی دا، ل ده‌مێ ملله‌تێ مه ل بن داگیرا دوژمنی دا بوو، له‌ورا گه‌له‌ك جاران چاڤنقاندن ل هنده سه‌رپێچیان و خاپاندنا هنده‌ك ئۆفیسان دهاته هه‌ژمارتن وه‌كو فلیه‌ك یان كاره‌كێ باش دهاته ل قه‌له‌مدان، ب تایبه‌ت ژی ئۆفیسێن حزبی و عه‌سكه‌ری یێن زڤڕ، دبیت ڤایرۆسێ ڤی كاری د به‌رژه‌وندیا نه‌ته‌وی دا بیت، ئه‌ڤه ل جهێ خوه و مژاره‌كا دیه، به‌لێ ئۆفیسێن به‌رژه‌وه‌ندیا ملله‌تی بخوه دكه‌ن، هه‌لبه‌ت ئه‌ڤه دهاتنه ژێكجوداكرن و نابیت ماسی د ئاڤێن شێلی دا دبهێنه گرتن، ئه‌ڤ هێڤێنه هه‌تا نها پیچه‌كێ مایه و به‌لكو ژ راده‌یێ زیانلێكرنا فه‌رمی بووریه و ته‌ڤلی سه‌رپێچێن كه‌سان و هه‌ڤال و هه‌ڤكاران بوویه و ئه‌م یێن غه‌درێ ل هه‌ڤدو دكه‌ین، ئه‌ڤێ چه‌ندێ پۆلینا خوه ژی هه‌یه، بگره ژبندیواران و كه‌یسۆیان و ئه‌وێن جه و پلێن باش بۆ خوه ژێگرتین و نڤینێن گه‌رم و نه‌رم بۆ خوه داناینه و جهێن نه‌خۆش بۆ یێن ل ژێر خوه دا داناینه، خوارنا خوه‌ش دانایه به‌ر خوه و سه‌رتیكێ ماستی بۆ لایێ خوه زڤراندیه، ئه‌ز ژی دكارم ژ قه‌ستا خوه نه‌ساخ كه‌م و رۆندكێن تیمساحان بۆ سروودا نشتیمانی بینمه خار، به‌لێ ئه‌ڤرۆ ئه‌م پێدڤی گیانه‌كێ نه‌ته‌وی یێ ئێكگرتینه د هه‌موو بیاڤان دا، بلا ئه‌ڤ برسا دوژمنی ئه‌ڤرۆ ئاراسته‌ی مه كری نه‌بیته ئه‌گه‌ره‌ك كو پتر خینا ئێكودو بهه‌لمێژین، هه‌كه ئه‌م بۆ هه‌ڤدو نه‌بینه قوَربان و هه‌كه ئه‌م هه‌ڤڕكێی ل سه‌ر قوَربانیدانێ نه‌كه‌ین، ل شوونێ هندێ كو هه‌ڤركیێ ل سه‌ر ته‌شقه‌لان بكه‌ین، ئێدی چاره‌نڤیسێ مه دێ كه‌فته د ده‌ستێن وی دژومنی دا یێ خرابیێ بۆ كڕی و ئه‌و ل نێڤبه‌را خوه دا ببنه شاما شه‌ریف، بلا په‌یڤینا بابێ كارێزمایێ بارزانیێ نه‌مر ل بیرا مه بیت ده‌مێ ل باكۆ گۆتی: مه گوه لێ نه‌بوویه كو ناڤێ ئێكی د دیرۆكێ دا چوویی كو خوارنێن خوه‌ش دخوران و ل سه‌ر نڤینێن نه‌رم دنڤست.. به‌لێ گه‌له‌ك ژ كه‌یسۆییان یێن ئه‌ڤرۆ ب ناڤێ بابێ نه‌ته‌وی خوه شه‌ریف دكه‌ن و ژ لایه‌كێ دیڤه گۆشتێ هه‌ڤالێ خوه دخۆت و ئه‌ركێ خوه و بارێ خوه ددانیته سه‌ر یێ هه‌ڤكارێ خوه و خوه دهێلیته ل هێڤیا تێكۆشانا وی. ئه‌ڤنه كینه؟! شاره‌زایێن ته‌شه‌قلان و هونه‌رمه‌ندێن خاپاندنێ، ژبیرا خوه دبه‌ن كو ئه‌و یێن ل ده‌سپێكی خوه دخاپینن و پاشی هه‌ڤكارێ خوه و خه‌زمه‌تكارێ خوه. وه‌رن باش د رامانا قه‌نجاتیێ و تێكۆشانێ بگه‌هین، هه‌كه چاره‌نڤیسێ مه دێ ب سزایێن خودایی هێنه نڤیسین.
ئه‌ز ئاغا.. تو ئاغا، ملله‌ت ما بێ خۆلام!!
دبیت د دیوان و كۆچكا ئاغایان دا پستپسته‌كا ب ئه‌ده‌ب هه‌بیت كو هنده‌ك ئاغیێن ده‌ستكرد ده‌ركه‌فتینه دبێژنێ ئاغایێن تۆزوبا!! و هه‌ر سیكه‌كێ بازاره‌ك هه‌یه و سیكا ئاغا و پسئاغایان ژی ئه‌ڤ مژاره‌یه!!، ئه‌و ئاغایێن ته‌حویل و یێن دروست نه ئه‌وه هه‌ست پێ ناكه‌ن كو ئه‌و (ژماره‌یا كاتی) و فه‌حصن، ئه‌و هه‌میێ دزانن، دیسا هنده‌كێن دیتر ژی هه‌نه (عبرالساتر)ن. یێن تۆزبا ب پاره‌ی هاتینه و یێن عبر الساتر ب هێزێ و زه‌ڤڵه‌كان هاتینه!، جۆرێ ئێكێ ئه‌ون یێن بۆ خوه پۆستێ ئاغاتیێ كڕین ب پاره‌ی. ڤێ مژارێ دبیت ئه‌ڤه جارا چارێ یان یا پێنجێ بیت كو ل سه‌ر دنڤیسم، لێ یا ژ هه‌میێ باشتر ئه‌وه بێژین كو باژارێ مه باژارێ ئاغایانه و مرۆڤ د ئه‌غه‌واتان د هه‌لنگڤیت، هه‌لبه‌ت ژبلی ئاغایێن ره‌سه‌ن كو ژمێژه د بنه‌مال دا ئاغا و جامێران ژ خوه شه‌رمن و بلا ژ مه عاجز نه‌بن، مه نه‌ك به‌حسا وانه، به‌لێ ئاغایێن ده‌ستكرد یێن ب پاره‌ی هاتینه چێكرن، یان ئاغایێن بۆیاغكری، هه‌ر چه‌نده ئه‌و ژی دحه‌قن، چونكو ئه‌م دبێژین (هه‌یی به كورێ كه‌ری به)!!، بارودۆخێن جڤاكێ هه‌موو پیڤه‌ر وه‌رگه‌راندن كو دونیا به‌ره‌ڤاژی لێبهێت، ئاغا و پسئاغا ره‌زیل بوون و پاره نه‌مان ل سه‌ر جادێ برێڤه‌چوون و حه‌قێ ترومبیلێ ڤێ نه‌مان، یێ ره‌شه‌كێ وی و شڤان و گاڤانێ وێ یێ كه‌ڤن، د ئاخر مۆدێلا ترومبێلێ را د به‌ڕا چوو و خوه ب سه‌ر ڤه نه‌دبر، دلێ ئاغایی ب خوه سۆت، رۆژه‌ڤا مه به‌ره‌ڤاژی هات، ئه‌فسه‌رێن مه‌زن یێن پله‌ییێن وان ته‌مه‌تی یێن سه‌رۆكێ ده‌وله‌ته‌كێ مفلس بوون و جندی بۆقی بۆ خودانێ مۆنیكایێ و هه‌ر دو ژی ل سه‌ر ئه‌ركێ خوه، سه‌رباز دنڤیت و فه‌رماندێ وی زێره‌ڤانیێ لێدكه‌ت!! ب راستی دبێژن خودێ نه‌زانان برێڤه‌دبه‌ت، ئه‌م هه‌موو یێن دكه‌ین بۆ پاره‌ی، یا گه‌هشتیه وی راده‌یی كو پۆستێن سه‌روه‌ری یێن دهێنه كڕین و فرۆتن، چارنڤیسه‌كێ مه‌ترسیداره گه‌له‌ك، كو پاره بۆ مه ببیته پیڤه‌ر. ل ڤێره بیرا من ل گۆتنه‌كا بابێ كارێزمایێ كوردستانێ دهێت ده‌مێ ل باكۆ گۆتی: مه نه‌دیتیه دیرۆكێ به‌حسێ ئێكی كری كو ل سه‌ر نڤینێن نه‌رم دنڤست و خوارنێن خۆش دخوارن، به‌لێ ل سه‌ر وی كه‌سی یێ تێكۆشی بۆ خزمه‌تا وه‌لاتێ خوه. به‌لێ وه دیاره مه ئه‌و بۆ خوه نه‌كریه وانه و ل سه‌ر چووینه و كی دخوینیت و كی دنڤیسیت؟!! له‌ورا حالێ مه ژی بوویه ئه‌ڤه و ئه‌م هه‌موو بووینه ئاغا و بۆ خوه ل ده‌وله‌تبوونا ـ ئاغاستانێ ـ دگه‌ریێن!! ئه‌ز دبێژم ئه‌م پێدڤی فۆرماتكرنه‌كێ ینه خوه تافیل بكه‌ین ژ پوفكرنێ و ژیانا رۆخسار و مه‌زنكرنێ، هه‌ر كه‌سێ نه‌فسا خوه مه‌زن نه‌كه‌ت، ئه‌و بخوه دێ مه‌زن بیت و دێ بیته ئاغا و بابێ ئه‌غه‌واتان، وه‌رن خوه فۆرمات بكه‌ین و خوه ژ تۆزێ داقوتین و نه‌بینه ئاغایێن تۆز و با!!
دیمۆكراسی ژ بۆ عه‌شیره‌تبوونێ!!
هه‌ر وه‌كو ئه‌م ژ كوچكی ده‌ركه‌فتین چووینه د ته‌نویرێ دا. مه گۆت دا خوه ژ ئاگره‌كێ بچووك ده‌ربێخین چونكو ئه‌م سۆتین، مه نه‌زانی دێ چینه د ئێكێ گه‌رمتر دا، مه گۆت دێ چاڤێ خوه كلده‌ین مه كوره كر!! پیڤاژۆیا دیمۆكراسیێ ژی وه‌لێ هاتیه وه‌كو وی كابرایێ گۆتی په‌رله‌مان بوویه جڤاتا عه‌شیره‌تان!! ئه‌ز نزانم دبیت ژی هنده‌ك نه ل گه‌ل بۆچوونا من بن، هه‌ر وه‌كو جاره‌كێ هه‌ڤاله‌كێ من یێ خۆشتڤی و ب عاقل ل سه‌ر مفایین عه‌شیره‌تیێ نڤیسی كو ژیواره‌كه ب كێر مه دهێت و بۆ جڤاكێ مه دگونجیت و گه‌له‌ك ئاریشێن جڤاكی كونترۆل دكه‌ت و. . هتد، به‌لێ هه‌كه ب دیتنه‌كا شارستانی و زانستی و تاقیكری ئه‌ڤه كاره‌ساته تو ب ناڤێ دیمۆكراسیێ سترانان بێژی و جلوبه‌رگێن دیمۆكراتی و سه‌رده‌م بكه‌یه به‌ر خوه و به‌حسا ده‌وله‌تبوونێ بكه‌ی و ژ لایه‌كێ دیتر ڤه پۆسته‌یێن خوه نه ل سه‌ر بیناته‌كێ ته‌كنۆقرات بدانی، به‌لێ ل سه‌ر بنیاتێ عه‌شیره‌تكانێ و ده‌ڤه‌ران و كه‌نكه و حه‌فك ستووران و تلیاردێران، نه‌ك ل سه‌ر بیناتێ شیانان و باوه‌رنامان و تایبه‌تمه‌ندیێ و درووشمێ خوه بكه‌یه ((وه‌كهه‌ڤی بۆ عه‌شیره‌تان))!! هه‌كه به‌راوردیه‌كێ بكه‌ین ل دۆر رۆلێ عه‌شیره‌تێ دنێڤبه‌را چه‌ند سالێن بووری و نوكه دا، دێ دیاربیت كو ئه‌م گه‌له‌ك پاشڤه‌چووینه به‌ر ب هه‌مبێزا كۆچكا عه‌شیره‌تێ و كه‌لا عه‌شیره‌تبوونێ خوه ل سه‌ر مه هه‌میان دانایه، به‌لێ به‌ری بیست سالان كه‌سێ نه دزانی عه‌شیره‌ت چیه. هه‌كه گه‌له‌ك دوور نه‌چین، به‌ری شه‌ش سالان من ژ نشكه‌كێ ڤه ئێك ژ ئاغایان دیت و من داخوازه‌ك ژێ كر، به‌لێ كابرای گه‌له‌كێ تۆره و نه‌رازیبوو و گۆت: كه‌س گوچكێ خوه ناده‌ته من و كه‌س نه‌مایه د ناڤ عه‌شیره‌تێ دا ئاڤه‌كێ بده‌ته من، نه ره‌شه‌كه و نه حه‌ره‌س و حوكمه‌ت ب تڕ و منه‌ت ب زۆری كریا خانیێ من دده‌ن، تو یێ من دبینی ئه‌ز چه‌ندێ ره‌زیل بوویم ل ده‌مه‌كی عه‌رد ل بن پێن من دهژیا و من ب تبلێ فه‌رمان ددان، به‌س نوكه كه‌س من ب بچووكه‌كی ژی حسێب ناكه‌ت، گۆته من تو بۆچی نه‌شیایی مافێ خوه ب ده‌ستخوه‌ڤه بینی؟ سویچێن ته‌نه پێدڤیه تو یێ زیره‌ك بی!! من ژی گۆتێ دڤێت ئه‌ز مه‌لاقی و گه‌نده‌لیێَ و دزیان بكه‌م، هینگی دێ بێژنه من تو یێ زیره‌كی و هینگی دێ مافێن خوه بده‌ستخوه‌ڤه ئێخم، چونكو ـ مه‌سه‌له‌كه ـ بوویه فلمێ هندی!!. به‌لێ نها جاره‌كا دی ئاڤ زڤریه سۆلینێن خوه و ئه‌و كابرا بوویه عه‌مێ گوزێ و كۆچكا وی گه‌رم بوویه و هه‌می گوچكێ خوه دده‌نێ و بووینه ره‌شه‌كه و حه‌ره‌س و پشتا وی بۆ دخورینن و تبلێن پیێن وی بۆ قورچینن و گیز و باهیڤان د هاڤێژنه د ترارێ ده‌ڤولێڤێن وی دا و خوه با د به‌ڕڕا ناچیت!!
سووریا یان گێلما گاڤانی؟!
گێلما گاڤانی ئیدیه‌مه‌كێ كورده‌واری و گوندیكی یه، بۆ هندێ دئێته گۆتن ده‌مێ ل گوندان گاڤان هه‌بوون، هه‌ڤكیفێن شڤانانه، هه‌لبه‌ت كارمه‌ندیا هه‌ردویان ژی ئێكه كو چاڤێدێریكرن و سه‌ركێشیا گیانه‌وه‌ران دكه‌ن، به‌لێ جوداهی ئه‌وه كو شڤان تنێ یێ په‌زی یه، لێ گاڤان یێ چێلان و هێستر و ده‌واران (یێن ژ په‌زی زه‌لامباشتر)، واته شڤان پله‌یه‌كێ رێزدارتره ژ گاڤانی، چونكو باره‌گایێ شڤانی كوتانه و یێ گاڤانه‌ی ژی گاڕانه، ب عه‌ره‌بی دبێژنێ جه‌وال یان راعی البقر، ب ئنگلیزی ژی دبێژنێ (كابۆیی ـ COBOY)، یان گرنگ گێلمه ناڤێ وێ خوارنێ بوو یێ خه‌لكێ گوندی پێشكێشی گاڤانی دكرن، كو دبێژنێ (گێلما گاڤانی)، ئه‌ڤه هه‌می مه ل سه‌ر چ ئینا؟! ئه‌و ره‌وشا نها ل سووریێ روودده‌ت، كه‌س تێناگه‌هیت، كا كی یێ حه‌قه و كی یێ نه‌حه‌قه، كی دزانیت شه‌ر د نێڤبه‌را كێ دایه، و ئه‌ڤه د به‌رژه‌وه‌ندیا كی دایه؟! هه‌می دزانن، كا كی مفادارێ سه‌ره‌كی یه ژ ڤێ گێلما گاڤانی، دبیت ژی هه‌كه ب بیرۆدزا پیلانگێریێ بیت، (نڤر یه المۆامره)، سه‌رێ هه‌ره‌مێ یه د رژێما سووریێ دا یێ ده‌سهه‌لاتدار، دا نه‌بیته به‌رده‌وامیپێدانا بوهارا عه‌ره‌بی یا به‌ری چه‌ند ساله‌كا كو ل پاش خوه ئه‌ڤ هشكباوه‌ری و گه‌مارا هه‌نێ هێلایی، هه‌لبه‌ت هه‌میان ژی دزانی كو چاره‌نڤیسێ به‌شار كا دا د كیژان قه‌سیسێ دا بیت، یان كیژ كونجا ل بن ئه‌رده‌ی وه‌كو بسمامێن خوه یێن عه‌ره‌ب، سه‌دام و قه‌زافی و موباره‌ك و. . هتد. لێ وه دیاره به‌شار ته‌مه‌تی نه‌ڤیێ وان بوو و زانی چاو خوه ژ به‌ر پاڤێژیت و سه‌د سه‌ران بكه‌ته كولاڤه‌كی چونكو ب هزره‌كا گه‌نجاتی دكتاتۆری.. هه‌می لێكخستن و زانی چاوا ده‌قێ خوه یێ بلیاردێ ل كیژ ته‌پێ بده‌ت و یێن دی هه‌میان بێخینته د سه‌لكێ دا، حه‌تا سه‌رشه‌قێن وی هاتین و ب كێله‌كا ژی مه كه‌فتین، ل ده‌سپێكێ هزێێن به‌رهنگار شه‌ڕێ رژێما سووری دكرن، نزانم پاشی هێزێن كوردی ژی ده‌ركه‌فتن، جبه‌هه‌تو لنوسره ده‌ركه‌فت، داعش ده‌ركه‌فت، په‌كه‌كه و په‌ژه‌كه و په‌دكه و یه‌ده‌په و پێشمه‌رگه ل كۆبانێ.. هه‌میان ژی لێكدان و هه‌میان ل له‌شكریِ سووریێ ددان، وان بخوه ژی لێكددان د نێڤبه‌را خوه دا، له‌ورا هه‌می به‌ربوونه ئێك و هه‌میان به‌شار ئه‌سه‌د ژبیركرن و ب هه‌ڤدوڤه مژوول بوون. ئه‌ڤێ چه‌ندێ بیرا من ل سه‌رهاتیه‌كێ ئینا، گۆت ل مووسل جاره‌كێ دوكانداره‌كێ زه‌خم شه‌ڕێ گه‌نجه‌كێ سنێله دكر و گه‌له‌ك دربێن مه‌زن لێدان، هه‌ڤالێ وی ژی نه‌شیا چ بكه‌ت، رابوو چوو هه‌می متایێن دوكانا وی تێكهه‌ل كرن، نیسك كرنه ناڤ نۆكێ، نۆك كرنه ناڤ برنجی، دانهێرك كرنه ناڤ ساڤاری و ساڤار گره ناڤ دانقوتی، ئار كره ناڤ گه‌نمی و. .. هتد. ب ڤی ره‌نگی تۆلا خوه ژێ ڤه‌كر وكره گێلما گاڤانی.. ئها یا ل سووریێ ژی رووده‌ت هۆسایه، دێ ڤێجا وه‌ره هه‌میان ژێكڤاڤێره!!.
نڤێژه‌ك ل جه‌هنه‌مێ!!
ما بۆچی ئه‌و نڤێژ ل به‌حشتێ نابیت ل شوونا جه‌هنه‌مێ؟ كارته‌كا گه‌ره‌نتیكرنا جهێ چاره‌نڤیسا مرۆڤانه، سه‌ره‌رای وێ گۆتنا دبێژیت كو نڤێژ و پێگیریا خودایێ ب تنێ ل سه‌ر دونیایێ یه ئه‌و به‌رهه‌مه یێ مرۆڤی بۆ ب خه‌بات و تێكۆشینا خوه بۆ بده‌ستڤه‌ئینانا به‌حه‌شتێ چنی. هینگی ژی ده‌مێ دچیته به‌حشتێ نڤێژ نامینن و ژیانا به‌رزه‌خێ یه، به‌لێ هه‌كه خودێ حه‌ز كه‌ت و به‌حه‌شت بۆ شه‌نسێ مه، بلا هینگی مرۆڤ بۆ دلێ خوه نڤێژه‌كێ ل وێرێ بكه‌ت، ژ به‌ر خۆشی و ئارامیا مه ل سه‌ر ئه‌ردی دیتی، ده‌مێ مه سه‌رێ خوه ددانا سه‌ر ئه‌ردی و هه‌می شه‌حناتێن سه‌رێ خوه ڤالا دكرنه ئه‌ردی، مرۆڤی خوه راده‌ستی هه‌مبێزا خودایی دكر، دل ئارام دبوو (ألا بِژكر اللهِ تُگمئِنُ القلوب) هینگی ئه‌و نڤێژ دێ یا ژدل بیت، لێ كاره‌سات ئه‌وه، كو مرۆڤ ل دۆزه‌خێ سه‌ر و ژنوو پووشمان بیت و پێدڤی نڤێژه‌كێ بیت ل وێ درێ!! چونكو ل سه‌ر دونیایێ خرابی دكر و نڤێژ نه‌دكرن، ژنوو و ل نیڤا (ترَتڕكێ) پووشمان ببیت و سه‌حا نڤێژه‌كێ بكه‌ت،!! پشتی چێ؟؟ مانێ ئه‌و نڤێژ چو مفایان ناگه‌هینته رب العالمین، چونكو یێ بێ منه‌ته و پێدڤی ب نڤێژا مه نینه، بكه‌ین یان نه!! به‌لێ ئه‌وی ئه‌و نڤێژ هه‌ر بۆ مه بخوه ڤیایه دا خرابیێ ل ئێكودو نه‌كه‌ین.. (إن الصلاه تنهی عن الفحشاء و المنكر) دا نه‌به‌ربینه ئێك، ئێكودو نه‌كوژین.. سه‌رێن ئێكودو نه‌بڕین، هه‌تكا كچێن هه‌ڤدو نه‌به‌ین، مالا ئێكودو تالان نه‌كه‌ین. فه‌لسه‌فا نڤێژێ و زكری ئه‌و نینه هه‌ما بۆ رۆتین مرۆڤ ڤه‌گێریت، یان ببنه دابونه‌ریت!! كو ببیته (عاده‌ت. . نه‌ك عیباده‌ت)!! لێ بۆ هندێ یه كو گه‌نده‌لیێ ل سه‌ر ئه‌ردی نه‌كه‌ین. له‌ورا كاره‌ساتا هه‌ری مه‌زنتر ئه‌وه یێ نڤیژ ل ئه‌ردی كرین و هاتیه جه‌هنه‌مێ ژی و ل وێرێ ژی ل سه‌ر نڤێژا خوه را پووشمان بوویی چونكو ب پراتیك نه‌كری و ل وێرێ داخوازا نڤێژه‌كا دیتر كری.. كو مرۆڤێن خودێ كوشتین و گۆتی (الله اكبر).. وه‌كو خودێ توعالا گۆتی: ((و لقد كرمنا بنی ادم و فچلناه علی العالمین))، ل گۆر گۆتنا پێشمه‌رگێ كوردستانێ (مه‌سعوود بارزانی) ده‌مێ گۆتی: (كلمه حق یراد بها باگل)!! ئها ئه‌وه كاره‌سات كو ل ئه‌ردی ژی نڤێژ كری و ل جه‌هنه‌مێ ژی نڤێژ كری و هه‌ردو ژی ژ ده‌ستخوه كرین دین و دونیا.. كو نڤێژا سپێدی بكه‌نه (ساعه صفر) یا هێرشان بۆ سه‌ر موسلمانان و زارۆیێن بێگونه‌ه. ئه‌ز بخوه وه‌كو پێشمه‌رگه هایدارم كو چه‌ندین جاران نڤێژا سپێدێ داعشان كریه سه‌ت سفرا هێرشێ ئیناینه سه‌ر مه، پشتی نڤێژا مه و نڤێژا وان شه‌ر بۆ مه ئینایه!!! ئه‌ڤجا كی بۆ خودێ دكه‌ت؟! ئه‌م یان ئه‌و!!.. . وان نیكاح دكر و مه ژنێن وان ستاره دكرن، یانژی ئه‌وان قه‌تل بۆ خوه كرینه په‌یره‌وێ موسلمانیێ یه. ئه‌ڤجا ل خوه بزڤرن و بلا نڤێژ نڤێژا ره‌حمێ بیت و نه نڤێژا كوشتن و تالانكرن و خوینریتنێ..
بۆ ژینگه‌هێ بزنێ بكه‌نه پیشه‌نگ!!
پاككرنا جهێ خوه لڤینه‌كا ب مفایه، ده‌مێ ته دێ بۆریت، نه‌خۆشی نامینیت، غه‌یبه‌تا خه‌لكی ناكه‌ی.. هتد بیرۆدزه‌كا ب ساناهی و سڤكه، گۆتنه‌كا كورده‌واریه ده‌مێ دبێژن: خوه بزن هه‌كه بمینیته ل ئاقای شه‌ڤه‌كێ جهێ خوه خۆش دكه‌ت. ئه‌ڤه گۆتنه گه‌له‌ك خۆش دهێته ڤه‌گێران د ناڤ گرۆپه‌كا هه‌ڤالێن من دا هاتیه گۆتن، كو ئێك ژ وان زۆرێ ب خیره‌ته و سڤكه و رحسڤكه، هه‌ر چه‌نده پیره‌مێره، به‌لێ پشكه‌كا ژیانا خوه ل ئه‌ورۆپا بۆراندیه، دبێژیته هه‌می گرۆپا خوه، ئه‌زێ بوویمه سڤكێ هه‌وه، هوون چاوا خیره‌ت دكه‌ن جهێ خوه پاقژ نه‌كه‌ن، خه‌مساری و ته‌مبه‌لی نه‌ساخیێ دئینیت.. . خوه بزن جهێ خوه خۆش دكه‌ت ده‌مێ دروونیت و هوون نه‌وه‌ناكه‌ن!!. ئه‌ڤجا هه‌كه مرۆڤی خوه مژوولكر ب پاقژكرنا جهێ خوه، مالا خوه، جهێ كاری، جهێ نڤستنێ، هه‌ر دێ ساخله‌میا مه یا پاك بیت، هه‌ر وه‌سا جوان بیت، نه‌خۆشی نامینن، دیسا ده‌مێ ته یێ زێرین دێ بۆریت و ته های ژ خوه نه، هزرێن خرابناك و ئه‌هریمانه نامینن، نه كارێن چه‌په‌ل و نه‌غه‌یبه‌تكرنا خه‌لكی، نه خیانه‌ت نه هه‌ر كاره‌كێ نه‌ساخ خوه بێكارێی دهێت، بێكاری نه رامان ژێ ئه‌وه كو ئێك نه‌هاتیه دامه‌زارندن یان یێ شۆل نینه و ده‌ستان دهه‌ژینیت، هه‌كه تو ل ئۆفیسا خوه ژی بی و چو كاران نه‌كه‌ی و پالده‌ی، ئه‌و ژی بێكاری یه، بابكاتلێن مه گۆتیه بێخیره‌ت ناچنه به‌حشتێ، ب تنێ هنده‌ك كار بكه‌ن و یێن دیتر روونن بێكار و به‌حسێ خه‌لكی بكه‌ن، دیسا ژی نه ب تنێ پاككرنا ژینگه‌هێ مرۆڤ به‌س خراب نه‌كه‌ت، لێ هه‌كه ببینیت، تشته‌كێ نه‌شاز هه‌یه ل سه‌ر جادێ یان كولانێ یان ل چۆلی، بزاڤێ بكه‌ت، ئه‌و شاشیا خه‌لكی چاره‌سه‌ر بكه‌ت، یانژی ل شوونا كارمه‌ندێ حوكمه‌تێ كارێ وی بكه‌ت، یان بزڤینێن به‌لاڤه‌كرنا ره‌وشه‌نبیریا پاقژیێ بكه‌ت، وه‌كو فه‌رمۆدا پیرۆزا پێغه‌مبه‌ری(س)، هه‌كه ته خرابیه‌ك دیت، ب ده‌ستێ خوه بگوهۆره، هه‌كه نه‌شیای ئه‌زمانێ خوه،هه‌كه نه‌شیایی ب دلێ خوه و ئه‌ڤه ژی لاوازترین باوه‌ریه.. ئه‌ڤجا ئه‌و بخوه ژی یێ به‌س ل شوونا چاكیه‌كێ نه‌كامیه‌كێ یكه‌ت، ل دووماهیێ دێ شه‌رمزار بیت، ئه‌و غه‌یبه‌ت هه‌می دێ به‌ره‌ڤاژی ل سه‌ر وی هێته ره‌نگڤه‌دان، ئه‌ڤجا ته‌ماشه‌ی بزنێ بكه‌ین و بۆ خوه بكه‌ینه پێشه‌نگ ده‌مێ جهێ خوه پاقژ دكه‌ت و سه‌رێ خوه ددانیت، به‌لێ نابیت ژ لایه‌كێ دیڤه ئه‌م بزنێ بكه‌ینه پێشه‌نگ، ب گه‌نده‌لیێ، چاوا؟! هه‌لبه‌ت ده‌مێ عه‌جه‌لا وێ بهێت، كو بچیت نانێ شڤانی بخۆت!! چونكو دبیت هه‌می بزن وه‌كو ئێك نه‌بن، وه‌كی وی كابرایێ د پێكه‌نینه‌كێ دا گۆتی: ما خوه نه ئه‌ز ب تنێ بزنم؟ نێ ئه‌ڤه هه‌می بزنن. !!
بندیوار ب گوهن!!
بندیوار رامانا بنیاتی دده‌ت، هه‌كه یێ ب هێز و موكم بیت ئه‌و دیوار ناكه‌ڤیت و نا رۆخێت، دڤێت ئه‌و كه‌ره‌ستێ ژێ دهێته دانان هند یێ ب هێز بیت كو به‌ری بحه‌لینیت!!، به‌س هه‌كه وه‌كو كه‌فشته‌یی (ب لێبۆرین ڤه) بیت، هینگی دێ بیته دیوارێ ل سه‌ر به‌فرێ!، كوردان گه‌له‌ك حه‌ز ژ دیواران كرینه و چه‌ندین په‌ند و په‌یڤین ئیناینه، وه‌كو مه گۆتی دیوارێ ل سه‌ر به‌فرێ.. یان دیوارۆ بۆ ته دبێژم. . یان پشت دیوار ب گوهن.. هتد. لێ یا كو دیوار ب گوهن، واته ده‌مێ تو د په‌یڤی ل سه‌ر پرسه‌كێ هشیاربه په‌یڤین دگه‌هنه جهێن لێپرسینێ، لێ مه دیت ل ڤان دووماهیان ئیدیه‌مێ (بن دیوار) زۆرێ به‌ربه‌لاڤه د ناڤ میدیاێن مه دا كو خودان مووچه‌نه به‌س نه‌ك یێن ده‌وام و ئه‌ركانه، هه‌ما به‌س بۆ مووچه‌ی هنده‌ك سه‌رپێچڤانان بۆ خوه نڤیسینه و ڤه‌شارتینه، كو ده‌وامێ ل مال بكه‌ن، لێ چونكو ئه‌و خودان هێزن له‌ورا بۆ خوه ئه‌ڤ كارێ بێكار بده‌ستڤه ئینایه، وه دیاره ب هێزن و خودان فیتامینن!!، هه‌كه به‌حسێ وان بكه‌ی و ره‌خنا نێگه‌تیڤ لێ بگری، ژبیر نه‌كه دێ په‌یڤ گه‌هیتێ هێشتا تو یێ ل ژۆرا به‌رژه‌وندیا گشتی ب مه‌سجه‌كێ یان په‌یوه‌ندیه‌كێ دێ گه‌هیتێ و ته خوه ل هێلا سۆر دا و تو ئاڤ وئاڤ تێچووی، وه‌كو ل ده‌زگه‌هه‌كی یێن ده‌وامێ ل مال دكه‌ن بلندبن و یێن وه‌كو ته خزمه‌تێ پێشكێش دكه‌ن نزم دبن، ته دڤێت ئه‌ڤه‌یه و ته دڤێت خوه بێده‌نگ بكه، هه‌ما خوه ل گه‌ل دیوارێ بگونجینه و ل سه‌ر شاشیێ برێڤه هه‌ره دا بۆ ته بقه‌تیێت تو نه‌شێی هه‌می دونیایێ راست بكه‌ی، چونكو جڤاكێ مه وه‌كو ترومبێلا تۆیۆتا یا كلاسیكه ل سه‌ر عه‌ته‌لێ و شاشیێ برێڤه دچیت و شاشیێ قه‌بوول دكه‌ت، ئه‌و جۆرێن عه‌قلێ ئه‌لكترۆنی پێڤه نه‌بیت، له‌ورا تو بشیێ خوه و بێده‌نگ بكه یانژی دیواری و ماچیكه!! چونكو ئه‌ڤ دیواره یێ مه‌زنه پێدڤی وه‌زاره‌ته‌كێ یه هه‌بیت ب ناڤێ وه‌زاره‌تا بندیواری!! دا كونترۆل بكه‌ت و پۆسته‌یێن وان بلند بكه‌ن، چونكو نه‌به‌س بندیوار ب گوهن، لێ ب ده‌ست و پینه و ب مه‌تالن ژی.
كه‌نكه‌نێن جه‌هنه‌مێ!!
دبێژن جه‌هنه‌مێ ژی پایته‌ختێ خوه هه‌یه چ سه‌عیر یان دره‌ك الاسفل للنار. . هتد، هاتیه دانان بۆ مێهڤانكرنا وان تاوانباران یێن دبنه سۆته‌مه‌نی، كو ژ لایێ زه‌بانیان ڤه دێ هێنه پێشوایكرن، ئه‌ڤجا كینه دێ لێ هێنه حه‌واندن؟!، ئه‌ون یێن خه‌لكی ل نیڤا مالا وان دكوژن و دیلكریان دسۆژن و ئه‌ردێن خه‌لكی داگیر دكه‌ن و دلۆڤانیێ ب خه‌لكی نه‌به‌ن، دبنه ئه‌گه‌رێ رێتنا خوینا مرۆڤان و موسلمانان، یێ ره‌حمێ ب كه‌سێ به نه‌به‌ت، نه مرۆڤێ خودێ یه ل گۆر ئایه‌تا پیرۆ ” فِبما رَحمه‌ٍ من اللهِ لِنْت ڵهم و لو كُنت فچاً غلیڤ القلب لأنفڤوا من حولك فأعف عنهم و استغفر لهم و شاورهم فی الامر.. ” دبیت هنده‌ك تشت نه‌ك حوكمێ مه بیت ئه‌م بده‌ین، لێ ب درێژیا ده‌مێن دیرۆكێ مه گوه ل سته‌مكاران بووینه و هاتینه گۆتن د پرتووكێن پیرۆز دا كو دێ دۆزه‌خێ هێنه ڤارڤارتن فیرعه‌وه‌ن، قارون، خودانێن فیل، خه‌لكێ عاد و پمود و المۆتفكات و هتد. لێ یێن سه‌رده‌مێ مه ژی هه‌ر به‌رده‌وامیدانا واننن، به‌س سته‌ما وان ب ره‌نگێن دیتر هاتینه سه‌پاندن، نه‌خاسمه ئه‌ڤێن هاتین ب ناڤێ ئیسلامێ بۆ خرابكرنا ئیسلامێ و مرۆڤاتیێ، ئه‌وێن ل ئه‌فغانستانێ و یێن ل دووڤدا، به‌ری چه‌ند رۆژه‌كان ژی دووماهی بزمار هاته قوتان د سندریكا به‌عسیان ژی كو عزه‌ت دۆری یێ ـ چڕـ بوویه، كو هه‌ر سه‌رێ فتنێ بوو د وێ مه‌عمه‌عا ل عیراقێ دورستبووی و هه‌ر ده‌م ئاسته‌نگ بوو ل هه‌مبه‌ری ملله‌تێ كوردێ ئاشتیخواز و بهێته ئازاردان، لێ ئه‌ڤه ژێ هاته سزادان (یمهل و لا یهمل)، كو ئه‌و ژی دێ بیته ژ كه‌نكه‌نیێن دووماهیێ، هه‌ر وه‌سا یێ دیتر ژی (به‌غدادی) میرێ داعشا خوینا وی ئه‌و ژی دێ بیته گرگره‌كێ دۆزخێ، چونكو ئه‌و بخوه ژی هه‌ست ب عه‌جه‌لا خوه دكه‌ت و هه‌ر ژ نوكه جهگیره‌ك بۆ خوه دانایه, كو دێ ل دووڤ شۆپا سیناریۆیا ئۆسامه و ئه‌یمه‌نێ زه‌واهری چن و بنه زلكێن شخارتا دۆزه‌خێ.. چونكو ئه‌ون یێن ژ سه‌نتا مرۆڤاتیێ ده‌ركه‌فتین، چونكو خوه گیانه‌وه‌رێ هۆڤ یێ كیڤی ژی هه‌كه بینیت مرۆڤه‌ك خوه ل به‌ر بچه‌مینت و ئالایێ دیلكرنێ راكه‌ت، دێ لێ بۆریت و چو هیما ناگه‌هینتێ، لێَ ئه‌ڤێن هه‌نێ چو حوكمی ب سه‌رێ دیلكریان ژ زارۆ و ژن و بێچاره‌یان دئینن؟! وه‌كو ئیسلام حوكمی دده‌ت كو سه‌ره‌ده‌ری بهێته كرن ب (بالتی هی أحسن). له‌ورا پیرۆزه دۆزه‌خ بۆ كه‌نكه‌یێن جه‌هنه‌مێ وه‌كو مه‌لایه‌كی ئه‌ڤ زاراڤه گۆتی.. و خودێ هاریكارێ بێگونه‌هان بیت.
تێكدانا ژینگه‌هێ ب خڕخڕێ!!
گه‌له‌ك جۆرێن تێكدانا ژینگه‌هێ هه‌نه، چونكو ژینگه‌ه نه ب تنێ جوانی و سروشته و پاكیا جه‌سه‌تی یه، به‌لێ یا هه‌یی تێكدانا رۆناهیێ ژی و یا بێهنێن نه‌خۆش و هه‌ر وه‌سا یا بهیستبوونێ ژی، ده‌نگێن نه‌شاز بۆ گوهێ مرۆڤی، تێكدانا ژینگه‌هێ. خڕ خڕ.. نه مۆزیكایه‌كا نه‌رمه.. خر خڕ نه گرگرا عه‌شقا و ڤیانێ یه. . و گرگرا شه‌ر و داستانایه؟؟ لێ ژ به‌رهه‌مێ نڤستنا هنده‌ك كه‌سانه ده‌نگه‌كێ نه‌شاز ژ ده‌ڤی دهێت، مرۆڤی های ژ خوه نینه، چه‌ندی خه‌و خۆش بیت و نڤین د گه‌رم و خۆش بن، ده‌ڤێ مرۆڤی ڤه‌دبیت و ئازادیا خوه دستینیت و ب هه‌ردو ملا دبیته خڕڕێن، هه‌كه گه‌له‌ك كه‌س بن ته هند دیت بوو ـ شه‌ڕه سه ـ (حاشا و ب لێبۆرین ڤه)، به‌لێ ل سه‌ر كیستێ جیران و ده‌وره‌به‌ران!! خودێ هاریكارێ هه‌ڤژنێن وان بن ییێن خڕخرێ دكه‌ن، چنكو ژن دلناهێلن ژ خه‌وه راكه‌ن و بێژنه زه‌لامێن خوه هوون یێن خڕخرَێ و زڕزڕێ دكه‌ن!!. له‌ورا هنده‌ك زارۆیان (ئه‌له‌مك) دئێتێ ژ ترسێن ده‌نگێ وی فلمێ (روعبێ) دا، ئه‌ڤه جارا ئێكێ بوو ئه‌م تووشی ڤی هه‌لویستی ببین، كو ب هه‌یامان بنڤین ل ئه‌ركێ سه‌ربازی یی ڤی شه‌ڕی، ئه‌ز ب خوه ژی ئێك بووم ژ وان یێن ته‌خسیری نه‌دكر د خرخرێ دا، به‌لێ من خوه گونجاند و ئیراده بۆ خوه چێكر كو وێ خرخرێ تۆنه‌كێ كێم بكه‌م و ل به‌ر خوه براوه‌ستم، به‌س هه‌ڤاله‌كێ مه كه‌سه‌كێ به‌رنیاسه د وارێ میدیایێ دا، له‌ورا كۆمه‌كا هه‌ڤالان مێهڤان كر كو ببیته مێهڤانێ وان و ب شه‌ڤ بۆ وان بپه‌یڤیت، به‌لێ سپێدێ چ قه‌ومی؟!، نه ئه‌و سیك و نه ئه‌و بازار.. وان گۆت: مه نه‌زانی دێ بۆ مه میدیاكاره‌ك هێت، به‌لێ بۆ مه ماتۆره‌ك هات!!.
ژ بلی خڕخڕێ ژی، هنده‌ك كه‌س گه‌له‌ك ب بیێ رێزگرتن ته هند دیت ده‌نگێ (ریگۆردێ ـ مسه‌جلێ) بلند كر چ ل مال یان ته‌كسیێ یان ئۆتوبیسێ و ره‌وشا خه‌لكی تێكدا، باشه به‌لكو ئێك حه‌ز ژ ده‌نگێ بلند ناكه‌ت یان ئه‌و مۆزیكه نه یا گونجایه ل گه‌ل ده‌می، بۆ نموونه سپێده‌هیان هنده‌ك شۆفێر گوه دده‌نه دهۆل و زڕنایێ، یان ل گه‌شته‌كێ وێ رۆژێ خێزانه‌كێ ده‌نگێ مسه‌جلا ترومبێلێ بلند كربوو و سترانه‌كا هندی یا گه‌رم ل سه‌ر بوو و كچێن وان سه‌ما ل به‌ر دكر وه‌سا تێكدانا مه كرسه‌رێ مه ئێشاند، ئه‌م چووین مه ب ده‌ست ڤه‌مراند. له‌ورا نه‌به‌س پاككرنا ژینگه‌هێ راكرنا گلێشی یه، به‌لكو خۆشكرنا هه‌ستا گوهێن مرۆڤانه ژی.. چونكو جاران كاتێكرنا مرۆڤی ل سه‌ر ژینگه‌هێ گه‌له‌كا بێ ره‌وشت و رامانه، سه‌ره‌رای كو خرخر نه ب ده‌ستێ مرۆڤی یه. ڤێ دووماهیێ ل پشتی هێرشا (جه‌سه) ل میحوه‌رێ به‌ربه‌ستا مووسلێ خوه ده‌نگێ بانگێ دیكلێن ره‌به‌ن یێن وی گوندی ژی كه‌فتبوو و ل سپێده‌هیان قێریا وی د ما حه‌فكێ را جوامێری، ژ به‌ر ده‌نگێ تۆپ و فرۆكان، ئه‌ڤجا دا قێریێ ڤه‌ده‌ت و نه دشیا تمام كه‌ت، پشكا دێ یا كۆپلا سه‌لیقا وی پشتی مه‌والێ ما د حه‌فكێ را!! قیی قیی قی.. ئه‌ئه‌ئه. . و توه هند دیت عه‌تسی.. ئه‌و ژی یێ حه‌ق بوو سه‌رێن رێیان ل به‌ر به‌رزه‌ببوون، له‌ورا ئه‌ڤه ژی مه‌زنترین تێكدانا ژینگه‌ها بهیستیبوونێ بوو. خوه بانگ هه‌لدێران ژی دڤێت ئه‌و كه‌سێ بانگ دده‌ت وه‌سا نه‌رم بیت كو بۆ گوهێن خه‌لكی خۆش ببیت، ئه‌ڤێ مه‌رجێن خوه هه‌نه، خوه ژ بلی خڕخڕێ ژی، ره‌وشته‌ك هه‌یه یێ ئاخفتنێ و ئه‌ده‌به‌ك، هنده‌ك كه‌س هند دئاخڤن ب ده‌نگێ بلند یێ ل به‌رامبه‌ر وی ژی نه‌شێت به‌رسڤا خوه بده‌ت چونكو ده‌لیڤێ نا ده‌نێ!! تۆنا ده‌نگێ وان هندا نه‌خۆشه خوه سه‌ماعا مۆبایلێ ددڕینن. وه‌رن ل خوه بزڤرین و بزانین چاوا چاره‌سه‌ریێ ب ده‌نگێ خۆش بكه‌ین.. چاره‌سه‌ریا خوه ژ خرخرێ بكه‌ین و ژینگه‌ها ده‌نگان تێكنه‌ده‌ین نه‌كو نه‌كو ئه‌و خرخر ببته گڕگڕ..
نيشاندان
WP Facebook Auto Publish Powered By : XYZScripts.com