NO IORG
نووترين نووچه
Authors Posts by شیرزاد نایف

شیرزاد نایف

شیرزاد نایف
176 POSTS 0 COMMENTS

108

ئه‌م هه‌می سیاسه‌تڤانین.. ئه‌م هه‌می هاتین هاتین. . بۆ سیاسه‌تێ جانفیداینه‌، ئه‌ڤ درووشمێ ڤان دووماهیان كو ژ سرووده‌كا خودێ ژێ رازی ته‌حسین تاهای هاتیه‌ دۆتن، به‌ربه‌لاڤبوویه‌ پشتی شه‌ڕ ب سه‌ر مه‌دا هاتی، بوویه‌ سوحبه‌ت و شازنازیبرنا هه‌ر وه‌لاتیه‌كی ل سه‌ر جادێ و ل هه‌می جهان، درووشمێ ((ئه‌م هه‌می پێشمه‌رگه‌ینه‌))، بلا و تشته‌كێ جانه‌ بۆ خورتكرنا مۆرالا پێشمه‌رگه‌ی، به‌س هه‌كه‌ یا راست بێژین وه‌سا نینه‌، هه‌می سیاسه‌تڤانێن حزبێینه‌، چونكو پێشمه‌رگێ حزبێ بهێزتره‌ ژ یێ نشتیمانی یان یێ وه‌زاره‌تێ و حوكمه‌تێ، هه‌ر كه‌سێ رابوو خوه‌ كره‌ سیاستڤان خوه‌ ناده‌ته‌ ب باراك ئۆبامایی، چونكو یا به‌حس لێ دهێته‌ كرن بۆ پێشمه‌رگاتیێ مه‌ دیت، ل رۆژا گۆینێ كه‌س یێ دیار نه‌بوو، بۆ هێرشبرنێ ده‌مێ ده‌لیڤه‌ به‌رته‌نگ دبوو ئه‌و هژمارا مه‌زن یا ل باژێرێ به‌حس ژێ دكه‌ن، ل به‌رۆكێن شه‌ڕی ب هه‌ژمار دبیته‌ ته‌مه‌تی تبلێن ده‌ستی، خوه‌به‌خشی ژی كته‌ك تێنه‌بیت، پرانیا وان هاتینه‌ بۆ دامه‌زراندنێ یانژی خوه‌شرینكرنێ وه‌كو نڤیسه‌ره‌كی گۆتی، خوه‌په‌خشن نه‌ك خوه‌به‌خشن!!، بۆ ریكلامێ و ل سه‌ر شاشێن تلفزیۆنێ و ئه‌نه‌ترنتێی خوه‌ نه‌مایش بكه‌ن، یێ قه‌هره‌مان ئه‌وه‌ یێ خه‌باتێ بكه‌ت و خوه‌ بێده‌نگ بكه‌ت، شه‌ڕی بكه‌ت و پۆف نه‌گه‌تێ، ئه‌م هه‌می بۆ ئه‌زماندرێژیێ و دیاركرنا زه‌بله‌كان مینا دبێژن بووینه‌ (قائد قوات القعاع) و رۆسته‌مێ زال، یێ چو نه‌كری بزاڤان دكه‌ت كو ببیته‌ هه‌می تشت، به‌س چاكیتێ وی و ریباتا وی پۆستێ وی یێ سیاسی و نه‌فس مه‌زنیا وی و مارێ ره‌ش د زكی دا به‌س بۆ به‌رژه‌وه‌ندیا خوه‌ یا به‌ریكێ یه‌ و كه‌س نه‌شێت دو په‌یڤان ل گه‌ل باغڤیت، هه‌كه‌ دێ بیته‌ عه‌ورێ گۆرگۆری، یێ هه‌یی ب ره‌خ ویڤه‌ و ته‌مه‌تی بابێ ویه‌ نه‌ ده‌لیڤێ دده‌تێ ئه‌و ژی پێش بكه‌ڤیت و پۆسته‌ بۆ وی بیت ناهێلیت دێ چیته‌ ده‌ف جه‌نابێ جه‌نابان و مه‌لاقیان بۆ كه‌ت و خوه‌ شرین كه‌ت و فه‌سادیێ بۆ جه‌نابێ خشیمی كه‌تس و خوه‌ ب ناڤێ پێشمه‌رگه‌ی كه‌ته‌ شامێ شه‌ریف. بهێلن پیشه‌یا پێشمه‌رگاتیێ ل دووڤ زانین و زانستی بیت و كه‌نگی ده‌بلۆم بووینه‌ دكتۆرا؟! تیماركار ب رێزگرتن ڤه‌ بووینه‌ نۆشدرا؟! رووپیڤه‌ر بووینه‌ ئه‌ندازیار.. هینگی ژی ببلا زارۆ ببنه‌ عه‌مید و عه‌قید و قوربانی ژی ببنه‌ هزار!!!.

80

هه‌ر كه‌سێ به‌رێ خوه‌ بده‌ته‌ ڤی مانشێتی، دێ بێژیت پێدڤی ناكه‌ت ئه‌ز ناڤه‌رۆكێ بخوونم، به‌س هه‌كه‌ بخوونیت باشتره‌ دا بزانیت چ د همبانكا من دا هه‌یه‌!!، برایێ من مانه‌ په‌یڤا پیًغه‌مبه‌رێ پیرۆز محه‌مه‌د (س) ئه‌و بوو یا گۆتی”من دخل بیت ابی سفیان فهو امن”؟، ئه‌ڤرۆ ژی هه‌می پێكڤه‌ یێن دهێنه‌ هه‌رێما كوردستانێ و ل وێ ئێمناهیێ دگه‌رن، باشه‌ ئه‌وێن خوه‌ ددانن خوه‌دیێًن ئیسلامێ و میریًن خیلافه‌تا ئیسلامێ چاوا مالا خه‌لكی وێرانكرینه‌ ئه‌وێن ل ده‌سپێكی خوه‌ بۆ وان دهه‌لاڤێت و تلیلی بۆ وان ڤه‌ددان چاوا كه‌فتنه‌ به‌ر خه‌فكا وان و نها یێن خه‌ونان ب كوردستانێ (شمالنا الحبیب ـ سابقاً) ڤه‌ دبینن، پشتی میرێن وان نیكاح ل شه‌رفا وان كرین و سه‌رێن وان بڕین و ب زۆری برینه‌ شه‌ڕی و كرینه‌ هه‌لامه‌ت، باشه‌ وێرێ بۆ وان نه‌یا ئامنه‌ و هه‌رێم یا ئامنه‌؟!! ئه‌وێًَن كوڕێن كوردستانێ ب ساخی بنئاخ دكرن و ئه‌نفال ب سه‌ری دئینان و گۆڕێن ب كۆم ژێ چێدكرن، نها یێن ل ڤێره‌ بووینه‌ خودان مال و مولك، هه‌ر ئه‌وبوون د گۆتنه‌ مه‌ هوون (كفره‌) نه‌، هه‌كه‌ ئه‌م كه‌فه‌ڕه‌ بین و مورته‌د بین، خوه‌ ئه‌م ژ ئه‌بۆ سوفیان خرابتر نین!! هه‌كه‌ مالا وی یا ئامن بیت باشه‌ یا مه‌ دێ یا چاوا بیت؟! هه‌كه‌ ئه‌وێن خوه‌ ددانن خیلافه‌ت و ب ناڤێ پێغه‌مبه‌ری دپه‌یڤن، چما هێرشان دئیننه‌ سه‌ر ئاخا وێ هه‌رێمێ و هه‌رێم ده‌ستێ براینینێ بۆ هه‌می نه‌ته‌وه‌ و ملله‌تان درێژ دكه‌ت و ئه‌وێ دكه‌ت یا خودێ و پێغه‌مه‌به‌ران گۆتی، هه‌رێم رۆژ بۆ رۆژ یا ئارامتر و سه‌قامگیرتر دبیت و ب دروستی یا دبیته‌ ئه‌و سالۆخا ئێًمناهیێ، سه‌ره‌رای هندێ ئه‌م نه‌ بۆ سفیانین، ئه‌م مالا تالبان و مالا بارزانین، بابێ نه‌ته‌وا مه‌ ب خوه‌ كه‌سه‌كێ ئاینزان بوو ب مه‌لاتیێ هاتیه‌ ناسین، له‌ورا ڤێره‌ نه‌ مالا ئه‌بۆ سفیانه‌ به‌لكو مالا هه‌میانه‌، به‌س ئه‌و نه‌ته‌وا زكێ خوه‌ ره‌ش كری خودێ ژی به‌ختا وان ره‌شكر و ئالایێن ره‌ش ب سه‌ر دا ئینان و گۆتن (الله اكبر) كو ب دورستی ئه‌و سالوخا سه‌رۆك مه‌سعود بارزانی دیاركی ل سه‌ر دسه‌پیێت كو (كلمه‌ حق یراد بها باگل) كریه‌ و راستی ژی دێ دیار بیت كا كی ژ مه‌ باوكی سوفیانه‌؟؟!!

159

چو نه‌مایه‌ دێ ره‌وشا پێشمه‌رگه‌ی خۆش بیت، دێ بۆدجه‌ په‌سه‌ند بیت، دێ مووچه‌ هه‌بن و ته‌راكوما چووی وه‌رگریت، دێ ده‌ینێن خوه‌ یێن موته‌راكم ده‌ت و ئێدی خودانێن ماركێتان ب باتكێ ل گه‌ل نائاخڤن!! دێ بیته‌ فه‌رمی و دێ بۆ وی ژی هه‌بیت كو بكاریت سولفه‌ و تششتێت وه‌كو هه‌می كارمه‌ندان هه‌بن، واته‌ دێ دانپێدان پێ هێته‌ كرن، ده‌مه‌كی جلكێن له‌شكری ل مه‌یدانكێ ب تنێ ب قه‌در بوون و حه‌مالان شانازی پێ دبر، ئه‌ڤرۆ ب په‌یدابوونا تیرۆرا داعشێ ژ نوو ئه‌ڤ جلكه‌ پیرۆز بووینه‌ و رۆژا خوه‌ ژی هه‌بوویه‌, هنده‌ك دبێژن: ما پێشمه‌رگه‌ چ دكه‌ت؟!! به‌س نزانن كو ب تنێ ئێك شه‌ڤ ل چۆلی و ل به‌ر سه‌رمایێ و برسێ و مه‌ترسیێ سه‌د ده‌فته‌ران دئینیت، دبێژن دێ چه‌ك ئێت دا بشێت به‌رگریێ دژی ڤی دوژمنێ دژوار و نه‌مرۆڤ بكه‌ت، دبێژن دێ ده‌رمالێن ختۆرێ) مه‌زێخن، پێشمه‌رگه‌ و دو سه‌د دینار، دبێژن دێ ملهێبا پاره‌ هێته‌ مه‌زاختن، بۆ پێشمه‌رگه‌ی، هه‌ر چاوا بیت باشه‌ و موسه‌كنه‌ بۆ دلێ.. جاره‌كێ ل سالا 1997 ده‌مێ ل سالێ ب تێ دو مووچه‌ هاتی بۆ پێشمه‌گه‌ی، هه‌می هه‌یڤان دگۆتن دێ دێ مووچه‌ ئێت و دێ مووچه‌ ئێت، ئێدی سه‌بۆره‌كا باش بۆ من دروست بوو، من گۆتێ ئه‌ز باوه‌رناكه‌م، هه‌میان گۆتن به‌لێ فلانی گۆت، من ب چاڤێ خوه‌ دیت، دێ هه‌ر ده‌ن، من گۆت: ئه‌ز هه‌ر باوه‌ر ناكه‌م، وان گۆت: به‌لێ ئه‌ڤه‌ ئه‌فسه‌رێ مووچان (رائید. فلان) هات و پاره‌ ئینایه‌ ل گه‌ل خوه‌، ئه‌وان گۆتن به‌س راسته‌ حه‌تا نه‌چیته‌ د به‌ریكێ دا ئه‌م باوه‌رناكه‌ین، به‌لێ من گۆتێ : نه‌خێر خوه‌ بچیته‌ دبه‌ریكێ ژی دا ئه‌ز باوه‌رناكه‌م!! وان گۆت چاوا؟! منه‌ گۆتێ دێ بیرا هه‌وه‌ ئینم، پاشی مه‌ وه‌رگرت.. ئه‌وان گۆتن : ها ته‌ وه‌رنه‌گرت؟ ته‌ باوه‌ركر؟ من گۆتێ هێشتا مایه‌ و دێ بینن!! ئه‌وبوو پشتی بێنه‌كێ ئ ه‌و رائید هات و گۆت: برا مووچێن خوه‌ بیننه‌ ده‌ر ژ به‌ریكا خوه‌ و بێشه‌كێ بكه‌ن، مووچێ فلان ئه‌فسه‌ری نه‌هاتیه‌.. مه‌ هه‌میان 50 دینار (یێن هینگی و مووچێ مه‌ 700 دینار بوون) مه‌ ئینانه‌ ده‌رێ.. . من گۆتێ:ها؟!! هه‌وه‌ باوه‌ر ژ من كر؟!! ئه‌وان هینگی باوه‌ر ژ من كر.. له‌ورا ئه‌ز ڤێ جارێ یێ پشتراستم كو دێ ره‌وشا پێشمه‌رگه‌ دروست بیت و بیته‌ لۆلۆ مرتاحۆ..

94

دبیت ئه‌ڤرۆ حه‌لاوه‌ بۆ مه‌ ناڤه‌كێ گران بیت و ده‌مێ مه‌ گوه لێدبیت، ئێكسه‌ر عێلنجی خوه‌ ل دلێ مه‌ دده‌ن، ژ به‌ر گرانیا وێ و سعراتێن گه‌رمێ و رێژه‌یێن كورسترۆلێ د ناڤدا و خرابیا وێ بۆ ساخله‌میا مرۆڤی، له‌ورا ئه‌م هه‌می ژێ دره‌ڤین دا قه‌له‌و نه‌بین و زیانێ نه‌گه‌هینته‌ مه‌ و شه‌كرا مه‌ بلند نه‌كه‌ت، نه‌مازه‌ ل ده‌مێ ئه‌م زارۆ، دا بینی پیكه‌م دگه‌ریان ل كۆلانێن مه‌ و گازی دكرن حه‌لاوه‌ ل به‌رامبه‌ر نعال، مه‌ ژی كه‌ڤنه‌ نعال خردكرن و دگوهارتن ل گه‌ل پله‌كا حه‌لاوا ره‌ش قه‌ره‌چان دفرۆت و دگێراند، هه‌ما چه‌ند داڤه‌ك بوون، ب تنێ ده‌ڤێ مه‌ شرین دكر، لێ گه‌له‌كا ب تام بوو وی ده‌می تشته‌كێ شرین بوو، یا ژ مه‌ڤه‌ ئه‌و ده‌سكه‌فتكه‌كێ مه‌زن بوو مه‌ ب ده‌ستڤه‌ئینایی و مه‌ نه‌دزانی كا مفایێ وێ نعالێ چه‌ند گه‌له‌ك بوو، بۆ ئه‌وان چونكو ب سه‌دان كلیۆیان خردكرن و دبرن وان ژی فرۆتنه‌ كارگه‌هێ و مفایه‌كێ باش ژێ وه‌ردگرت، لێ نها و پشتی ئه‌م مه‌زن بووین و تێگه‌هشتین ژ نوو مه‌ راستیا بابه‌تی زانی كو ئه‌م ل دووری باژێران بووین و كارگه‌هێن حه‌لاندنا نعالان هه‌نه‌ و ئه‌وان مینا عه‌ره‌ب دبێژن: “حه‌لاوه‌ ب سه‌رێ مه‌ دا دشكاند!! ” یا گرنگ ئه‌وه‌ ئه‌ڤ میناكه‌ وه‌كو ئه‌وێ یه‌ یا هێزێن مه‌زن ده‌مێ هێزێن بچووك نه‌چار دكه‌ن كو هه‌وجه‌ی خوه‌ دكه‌ن، ب بیردۆزا پیلانگێریێ (نڤریه‌ المۆامره‌) وه‌كو دروستكرنا شه‌ڕان و به‌رهه‌ڤكرنا زه‌مینه‌یا فرۆتنا كه‌لوپه‌لێن له‌شكری و چه‌كی و تانك و مۆشه‌كان!! هیڤیكرن ژ وان كو ئه‌و بخوه‌ دوهنێ مرۆڤی د سه‌رێ مرۆڤی بده‌ن و ئه‌م خوه‌ بۆ وان بهه‌لاڤێژێن كو شه‌ڕێ چه‌تیێن وان بكه‌ین، واته‌ هه‌ر دو لایه‌ن یێن ده‌ستكردن و خویندتاریا وان ژی یا ده‌رستكرده‌ و چو بنیاتێن دژوار نه‌بووینه‌، له‌ورا بووینه‌ سۆته‌مه‌نیێ هێزێن مه‌زن و هه‌ڤسویی مینا پله‌یی ستێشنێ (PLAY STATION) كونترۆل د ده‌ستان دایه‌ و ئه‌و هێزێن بچووك و خۆفرۆشان بۆ مه‌ره‌م و ئه‌گینده‌یێن خوه‌ برێڤه‌دبه‌ن و ل شوونا حه‌لاوێ بومبان دهاڤێژن و ل شوونا نعالێ بلا پترۆل بیت بۆ نموونه‌!!. هه‌ر چه‌نده‌ نعالێن مه‌ كوردان پربها بووینه‌، نها بوویه‌ حه‌حه‌ف ل سه‌ر، لێ ئه‌م ژی دێ ب خێرا وێ نعالێ وه‌رار بین و گه‌هینه‌ هێزێن مه‌زنێن جیهانی، چونكو نها مه‌ نعالێن خوه‌ گوهارتینه‌ ب پستالێ دا شه‌رێ وان چه‌تان بكه‌ین و ل شوونا هندێ كو ئه‌م نعالا خوه‌ د دوژمنی وه‌ركه‌ین، دربێن ئه‌سمانی ژی بۆ مه‌ بووینه‌ حه‌لاوه‌ و سیناریۆیا سالێن حه‌فتێ و هه‌شتێیان دزڤرینین، هه‌تا ئه‌م ژی تێبگه‌هین و مه‌زن دبین و حوكومه‌ێر دبین ئه‌م ژی حه‌لاوا خوه‌ بده‌ینه‌ ب نعال و دبینه‌ خودان مال و حال!!..

80

ل هه‌می جیهانێ هێمایێ نازكی و جوانی و بێگونه‌هیێ و گرنژینێ (زارۆنه‌)، هه‌می به‌حسێ روویێ گه‌شێ زارۆیان دكه‌ن و كه‌س به‌حسا روویێ دی یێ خرابیێ ناكه‌ت، ده‌مێ تاوانه‌كێ دكه‌ن و چاڤێن خوه‌ بلح دكه‌ن!! راسته‌ دبێژن ددانێن خوه‌ نیشا زارۆیان نه‌ده‌.. به‌س كیم جاران به‌حسێ خرابیێن وان دكه‌ین، نزانم بۆچی؟. دبیت چونكو ئه‌م ژی رۆژه‌كێ زارۆ بووین و مه‌ تێرا خوه‌ خرابی كرینه‌، راسته‌ هنده‌ك زارۆ ب دیمه‌نێ خوه‌ گه‌له‌ك دجانن به‌س بۆ خرابیێ ره‌فتارێن گیانه‌وه‌ران دكه‌ن، ژی ژ به‌ر كێمیا مێشكی، زارۆ جاران هنده‌ك كریاران دكه‌ن هه‌ر وه‌ك تاوان دهێنه‌ ل قه‌له‌مدان، هه‌كه‌ هه‌ر ئێك ژ مه‌ ئاماژێ بده‌ته‌ وان كریار و خرابیین ژ زارۆیان دیتین، ره‌نگه‌ نه‌هێنه‌ هه‌ژمارتن و فه‌رهه‌نگه‌كا مه‌زن ژێ بهێته‌ به‌رهه‌ڤكرن، چ ب كریارێن وان یانژی ب گۆتنێن وان!! په‌نده‌ك هه‌یه‌ دبێژیت: (په‌یڤا ڕاست) ژ ده‌ڤێن زارۆیان ده‌ردكه‌ڤیت. دبیت ب ئاخفتنه‌كێ تشته‌كێ وه‌سا ئاشكرا بكه‌ن كو كوشتن ل سه‌ر بهێته‌كرن، ب راستی زارۆیان تاوانێن مه‌زن كرینه‌، یا من دیتی ژ ل ده‌مێ ئاڤاكرنا خانیه‌كی و سه‌به‌كرنا بانی، كه‌س نه‌ما ل وێرێ، رابوون سۆندێ ئاڤێ ڤه‌كربوون و به‌ردابوون بن درسكێن سه‌بێ (ستوون)، هه‌كه‌ ب له‌ز نه‌گه‌هشتبامێ دا ژبن چیت و ئه‌و سه‌ببه‌ شكێت. دیسا چه‌ندین زارۆیان ئاگربه‌رداینه‌ مالان، نوكه‌ ل مه‌حه‌لا مه‌ هنده‌ك زارۆ هنده‌ دشیمن، دێ بێژی ئاگر و فلفلن، ب شه‌ڤ و رۆژ ل كۆلانان، چ شۆلا خرابه‌ دكه‌ن، گلۆپێن خه‌لكی و په‌نجه‌ر و ده‌رگه‌هان دشیكێنن، ده‌رگه‌هان دقوتن و دره‌ڤن، هنده‌ك زارۆ هه‌نه‌ هه‌ما پیچه‌ك یا مایی دێ بلۆكان ژ دیواران ڤه‌كه‌ن، زێده‌باری جڤینێن پیس، دڤێت نه‌بێژیێ وه‌نه‌كه‌.. هه‌كه‌ ته‌ گۆتێ ژی.. دێ بیه‌ نه‌خۆش مرۆڤ ودێ خرابتر لێكه‌ی، دێ ئاخفتنێن نه‌ جوان بێژنه‌ ته‌ یان دێ ترومبێلا ته‌ ب شه‌ڤ خیچ خیچ كه‌ن، دایك و باب ژی به‌رگریێ ژێ دكه‌ن، چه‌ندی مه‌ گۆتیێ: هه‌ڕن و شیمیان نه‌كه‌ن، بێ فایده‌یه‌!! مه‌ گۆتێ هه‌ر كه‌سێ نه‌چیت دێ دایكا وی دینه‌ شوو!! به‌لكو پتر كه‌یفا دایكێن وان دهێت و خرابتر لێدهێن!! هه‌كه‌ بێژم كو من ب چاڤێ خوه‌ دیتیه‌ زارۆیه‌كی له‌ق ل دیواران داینه‌ دبیت باوه‌رنه‌كه‌ن. جاره‌كێ ماله‌كا خودان كۆزه‌كا زارۆیێن شیم ل مه‌ بوونه‌ مێڤان، مه‌ تشته‌ك نه‌هێلا ل به‌ر ده‌ستان دا له‌قا لێنه‌ده‌ن، به‌لێ هاتن و به‌رێ خوه‌ ددانه‌ دیواران و دگۆتن: ههههه‌ ئه‌ڤه‌ دیوارن و بلۆكن چه‌ند دجوانن!!.
من چو دوژمناتیی و خوینداری نینه‌ ل گه‌ل چو زارۆیان به‌س، ئه‌ڤه‌ روویێ دێ یێ زارۆیانه‌. تشته‌كێ سه‌یر من دیت ل گه‌شتا خوه‌ بۆ توركیا، هه‌ر ژ دهۆكێ هه‌تا ئه‌نتالیا من خوه‌ زارۆیه‌ك نه‌دیت ل سه‌ر جادێ.. نزانم ئه‌و په‌روه‌ده‌كرنه‌ یانژی ژ سه‌رمان دابوو یانژی نورمال بوو. ل وێرێ گه‌له‌ك بێهنا من هات و من چو ڤایرۆس نه‌دیتن كو خه‌بسێ بكه‌ن یان گێله‌شۆیه‌كێ. ئه‌ڤجا تو ژی پشتا خوه‌ نه‌دێ و هه‌كه‌ ببینی یێ چاڤبلحه‌ بزانه‌ جه‌ریمه‌كا د چاڤین ویڕا!!.

86

د رۆژا جیهانێ یا شه‌كرێ دا په‌یامه‌كه‌ تایبه‌ت د ناڤبه‌را من و نه‌خۆشێن به‌لایا نه‌خۆشیا شه‌كرێ دا هه‌یین، هه‌كه‌ دستووری بیت ژ نۆشداران كو مایێ خوه‌ د پیشه‌یا وان بكه‌م، چونكو ئه‌ز ژی نۆشدارم ب گرۆڤه‌یا گۆتنا نۆشدارێن جیهانێ ده‌مێ دبێژن هه‌ر مرۆڤه‌ك نۆشدارێ خوه‌ یه‌!! مخابن ل ڤان داویان ئه‌ڤ نه‌خۆشیا شه‌كرێ رابوویه‌ سه‌ر خوه‌ و شیرێ خوه‌ راكریه‌ و گه‌له‌ك ژ خۆشتڤێن مه‌ داگیركرینه‌ و بۆ خوه‌ كریه‌ بوهار، لێ بلا ژبیر نه‌كه‌ت كو هه‌ر دینسزه‌كی حه‌یاسزه‌ك هه‌یه‌. له‌ورا هه‌كه‌ ناڤزراندن بیت ل وژدانا من، ئه‌ز دبێژم د شه‌ری دا گۆشتێ هه‌سپی ژی حه‌لال دبیت یانژی (شه‌ڕ خاپاندنه‌)!!
خۆشڤیێن من نه‌خۆشێن ئێشا (شه‌كرا نه‌ شرین) ژه‌هرا سپی: دێ ژ پێش نۆشدارێن شه‌كرێڤه‌ چه‌ند ئامۆژگاریێن ده‌روونی بایۆلۆژی سه‌مپتاوی ل ته‌ كه‌م، دا كو ڤێ شۆره‌شا ده‌خه‌س سه‌ركوت بكه‌ی و نه‌هێلی مه‌زنتر لێ بهێت و ئه‌و ترسا ته‌ ئه‌و بۆ خوه‌ بكه‌ته‌ خه‌ون، له‌ورا دبێژمه‌ ته‌ (سوكه‌ری) ملله‌ته‌كێ بێره‌وشته‌ د ناڤ خوینا ته‌ دا هه‌كه‌ تو ده‌سهه‌لاتداریه‌كا دلۆڤان لێ نه‌كه‌ی، دێ رابیته‌ سه‌ر خوه‌ و زیانێ گه‌هینته‌ هه‌می داموده‌زگه‌هێن له‌شی ته‌ وه‌كو داعشا ره‌نگز!!، نه‌مازه‌ ره‌هێن خوینا ته‌ و چه‌نده‌كێ یێ بێ ده‌لیڤه‌یه‌، هه‌كه‌ تو هه‌می خواسته‌كێن وی بۆ دابین نه‌كه‌ی دێ خیانه‌تێ ل ته‌ كه‌ت نه‌مازه‌ تو ده‌سهه‌لاته‌كا وه‌كو هه‌می ده‌سهه‌لاتانی ل وه‌لاتێن ده‌وروبه‌ر!!، زارۆیه‌كێ گه‌له‌كێ نازاندی یه‌ هه‌كه‌ تو مێژمێژۆكێ د ده‌ڤی را نه‌كه‌ی نا هێلیت تو بسته‌ بنڤی، ئه‌و دخوازیت تو خوه‌ بوه‌ستینی و تێكۆشانێ بۆ بكه‌ی خوه‌ برسی بكه‌ی، شه‌كر نه‌ ئه‌جنه‌یه‌كه‌ د ناڤ خوینا ته‌ دا كو ب عه‌زماندن و روقه‌یاتان بكه‌یه‌ ده‌ر!! لێ بۆ ڤێ چه‌ندێ من بۆخوه‌ سۆزه‌ك دایه‌ به‌رپه‌رێن رۆژناما ئه‌ڤرۆ كو ئه‌ز هاری هه‌وه‌ بكه‌م و ل گه‌ل هه‌وه‌ راوه‌ستم ل دژی ڤی درندێ شه‌كرێ، نه‌هێلم تو برسی ببی و نه‌مازه‌ ل ڤی چه‌رخێ زێرینێ حه‌مه‌ریێ!! هه‌ست پێ نه‌كه‌ی زكێ ته‌ یێ برسی بیت، كو ئه‌م هه‌می ل گه‌ل ڤان نه‌خۆشان و هه‌می نه‌خۆشێن دیتر ژی براوه‌ستێین و برینیێن وان ده‌رمان بكه‌ین، چونكو (لا یۆلم الجرح الا من به الالم.. ) یانكو هه‌ر كه‌س ژ مه‌ ل جهێ خوه‌ هاری نه‌خۆش و نۆشداران ژی بكه‌ت، بۆ سه‌هلكرنا پیڤاژۆیا نه‌خۆشان، یێ ل ناپێژیێ نانی دپێژیت بلا نانێ خوه‌ ره‌ش بكه‌ت و نه‌هلێت ل سرایێ راوه‌ستێت، كه‌سوكارێن وان بلا سه‌ره‌ده‌ریه‌كا نه‌رم و حه‌لین ل گه‌ل بكه‌ن، نه‌كو ب ده‌نگه‌كێ بلند و ب عه‌سكه‌رتای به‌رسڤا پسیارێن وان بده‌ین چونكو نۆشدارێن مه‌ (ته‌خسیریێ ناكه‌ن) هنده‌ نه‌خۆشان دنازینن كو ل ئه‌ورۆپا ژی وه‌سا نینه‌، چونكو نه‌ساخ ل رۆژئاڤا یێ عه‌زیزه‌ و ژ كه‌یفێن وی قه‌در و قیمه‌تا خه‌سته‌ دده‌تێ دا، های ژ نه‌خۆشیا خوه‌ نینه‌، یێن مه‌ ژی د وه‌سانه‌، نۆشدار ته‌مه‌تی نه‌ڤیێ نه‌خۆشیه‌كی یه‌ وێ سه‌ده‌ریا نه‌رم ل گه‌ل نه‌خۆشه‌كی دكه‌ت كو دزانیت ئه‌ڤه‌ مامۆستایه‌كه‌ و به‌ره‌باب ل بن ده‌ستی بووینه‌ وه‌زیرێن ساخله‌میێ و قایمه‌قام ل بن ده‌ستی ده‌رچووینه‌ ژ پێش سه‌رێ وی یێ سپی رادبنه‌ ڤه‌. هه‌كه‌ نه‌ هینگی نۆشدرا دێ بنه‌ ساخ و نه‌ساخ دێ بنه‌ نۆشدار!! چونكو هنده‌ك نۆشدارێن مه‌ دبێژن ئه‌م ژی به‌شه‌رین و ئه‌م دوه‌ستیێن بلا جاران ئه‌م ژی خوه‌ ل سه‌ر سه‌رێ نه‌ساخان تۆره‌ بكه‌ین. نها مژار ل دۆر وێ ئێكێ یه‌ كو شه‌كر نه‌بیته‌ (قدم السكری) و بڕین ـ به‌ته‌رـ كو نه‌خۆشترین چاره‌نڤیسه‌ نه‌خۆش ژێ دترسن و خودێ نه‌كه‌ت مالئاڤیكرن، به‌س مرن ب ده‌ستێ خودێ یه‌ و كاره‌ساتێن ژ نشكان ڤه‌ ژی هه‌نه‌ و عه‌داله‌تا مرنێ نه‌ یا گه‌نده‌له‌ و ژ مه‌ هه‌میان دگریت كورێ سه‌رۆكی و كوڕێ قه‌ره‌چی نانیاسیت! له‌وا هه‌كه‌ پارێزیا خوه‌ بكه‌م دێ شێم وی زارۆیێ نازك و شیم ل گه‌ل خوه‌ راكه‌م بێی زیانێ بگه‌هینته‌ من هه‌تا هه‌تایێ كو سه‌خبێریا خوه‌ بكه‌م و نه‌ك یا وی، بلا خانمێن نه‌ساخ پاقژیا پێن خوه‌ بكه‌ن و نه‌هێلن شه‌ق بكه‌ڤنه‌ بنێن پیێن وان ل هاڤین و زڤستانان گوره‌ ل به‌ر بن دا كول نه‌بن، بلا خه‌مێن دونیایێ نه‌كه‌نه‌ پشتی.

website security
WP Facebook Auto Publish Powered By : XYZScripts.com