بندیوار رامانا بنیاتی دده‌ت، هه‌كه یێ ب هێز و موكم بیت ئه‌و دیوار ناكه‌ڤیت و نا رۆخێت، دڤێت ئه‌و كه‌ره‌ستێ ژێ دهێته دانان هند یێ ب هێز بیت كو به‌ری بحه‌لینیت!!، به‌س هه‌كه وه‌كو كه‌فشته‌یی (ب لێبۆرین ڤه) بیت، هینگی دێ بیته دیوارێ ل سه‌ر به‌فرێ!، كوردان گه‌له‌ك حه‌ز ژ دیواران كرینه و چه‌ندین په‌ند و په‌یڤین ئیناینه، وه‌كو مه گۆتی دیوارێ ل سه‌ر به‌فرێ.. یان دیوارۆ بۆ ته دبێژم. . یان پشت دیوار ب گوهن.. هتد. لێ یا كو دیوار ب گوهن، واته ده‌مێ تو د په‌یڤی ل سه‌ر پرسه‌كێ هشیاربه په‌یڤین دگه‌هنه جهێن لێپرسینێ، لێ مه دیت ل ڤان دووماهیان ئیدیه‌مێ (بن دیوار) زۆرێ به‌ربه‌لاڤه د ناڤ میدیاێن مه دا كو خودان مووچه‌نه به‌س نه‌ك یێن ده‌وام و ئه‌ركانه، هه‌ما به‌س بۆ مووچه‌ی هنده‌ك سه‌رپێچڤانان بۆ خوه نڤیسینه و ڤه‌شارتینه، كو ده‌وامێ ل مال بكه‌ن، لێ چونكو ئه‌و خودان هێزن له‌ورا بۆ خوه ئه‌ڤ كارێ بێكار بده‌ستڤه ئینایه، وه دیاره ب هێزن و خودان فیتامینن!!، هه‌كه به‌حسێ وان بكه‌ی و ره‌خنا نێگه‌تیڤ لێ بگری، ژبیر نه‌كه دێ په‌یڤ گه‌هیتێ هێشتا تو یێ ل ژۆرا به‌رژه‌وندیا گشتی ب مه‌سجه‌كێ یان په‌یوه‌ندیه‌كێ دێ گه‌هیتێ و ته خوه ل هێلا سۆر دا و تو ئاڤ وئاڤ تێچووی، وه‌كو ل ده‌زگه‌هه‌كی یێن ده‌وامێ ل مال دكه‌ن بلندبن و یێن وه‌كو ته خزمه‌تێ پێشكێش دكه‌ن نزم دبن، ته دڤێت ئه‌ڤه‌یه و ته دڤێت خوه بێده‌نگ بكه، هه‌ما خوه ل گه‌ل دیوارێ بگونجینه و ل سه‌ر شاشیێ برێڤه هه‌ره دا بۆ ته بقه‌تیێت تو نه‌شێی هه‌می دونیایێ راست بكه‌ی، چونكو جڤاكێ مه وه‌كو ترومبێلا تۆیۆتا یا كلاسیكه ل سه‌ر عه‌ته‌لێ و شاشیێ برێڤه دچیت و شاشیێ قه‌بوول دكه‌ت، ئه‌و جۆرێن عه‌قلێ ئه‌لكترۆنی پێڤه نه‌بیت، له‌ورا تو بشیێ خوه و بێده‌نگ بكه یانژی دیواری و ماچیكه!! چونكو ئه‌ڤ دیواره یێ مه‌زنه پێدڤی وه‌زاره‌ته‌كێ یه هه‌بیت ب ناڤێ وه‌زاره‌تا بندیواری!! دا كونترۆل بكه‌ت و پۆسته‌یێن وان بلند بكه‌ن، چونكو نه‌به‌س بندیوار ب گوهن، لێ ب ده‌ست و پینه و ب مه‌تالن ژی.
نووترين نووچه
- نێچیرڤان بارزانی ب فەرمی بۆ وەلاتێ قەتەرێ دهێتە ڤەخواندن
- نێچیرڤان بارزانی و مەسرور بارزانی پیرۆزباهیێ ل شیرەتكارێ نوو یێ ئەلمانیایێ دكەن
- سەرۆكێ حوكمەتا هەرێمێ دوپاتیێ ل بهێزكرنا پەیوەندییان ل گەل هندستانێ دكەت
- خسرۆ گۆران: روودانێن دەڤەرێ كاریگەری ل سەر هەلبژارتنێن ئیراقێ نابیت
- نێزیكی 50 هزار تیرۆرست و كەسوكارێن وان مووچەیێ شەهیدان ژ حوكمەتا ئیراقێ وەردگرن
- بەغدا ب نە هنارتنا مووچەیێ خەلكێ كوردستانێ قەرەبوویا كێمبوونا داهاتییێن خوە دكەت
- نێچیرڤان بارزانی سەرەخوەشیێ ل ئەیاد عەلاوی دكەت
- مەسرور بارزانی: ئیراقێ پێدڤی ب حوكمڕانییەكا دادپەروەرانە هەیە
- تێكگەهشتنەكا باش هەیە و د زووترین دەم دا حوكمەت دێ هێتە پێكئینان
- وەزارەتا كۆچ و كۆچبەران سكالا دژی داخوازیێن مە بۆ مافێن ئاوارەیان تۆمار كریە
شیرزاد نایف
كه‌نكه‌نێن جه‌هنه‌مێ!!
دبێژن جه‌هنه‌مێ ژی پایته‌ختێ خوه هه‌یه چ سه‌عیر یان دره‌ك الاسفل للنار. . هتد، هاتیه دانان بۆ مێهڤانكرنا وان تاوانباران یێن دبنه سۆته‌مه‌نی، كو ژ لایێ زه‌بانیان ڤه دێ هێنه پێشوایكرن، ئه‌ڤجا كینه دێ لێ هێنه حه‌واندن؟!، ئه‌ون یێن خه‌لكی ل نیڤا مالا وان دكوژن و دیلكریان دسۆژن و ئه‌ردێن خه‌لكی داگیر دكه‌ن و دلۆڤانیێ ب خه‌لكی نه‌به‌ن، دبنه ئه‌گه‌رێ رێتنا خوینا مرۆڤان و موسلمانان، یێ ره‌حمێ ب كه‌سێ به نه‌به‌ت، نه مرۆڤێ خودێ یه ل گۆر ئایه‌تا پیرۆ ” فِبما رَحمه‌ٍ من اللهِ لِنْت ڵهم و لو كُنت فچاً غلیڤ القلب لأنفڤوا من حولك فأعف عنهم و استغفر لهم و شاورهم فی الامر.. ” دبیت هنده‌ك تشت نه‌ك حوكمێ مه بیت ئه‌م بده‌ین، لێ ب درێژیا ده‌مێن دیرۆكێ مه گوه ل سته‌مكاران بووینه و هاتینه گۆتن د پرتووكێن پیرۆز دا كو دێ دۆزه‌خێ هێنه ڤارڤارتن فیرعه‌وه‌ن، قارون، خودانێن فیل، خه‌لكێ عاد و پمود و المۆتفكات و هتد. لێ یێن سه‌رده‌مێ مه ژی هه‌ر به‌رده‌وامیدانا واننن، به‌س سته‌ما وان ب ره‌نگێن دیتر هاتینه سه‌پاندن، نه‌خاسمه ئه‌ڤێن هاتین ب ناڤێ ئیسلامێ بۆ خرابكرنا ئیسلامێ و مرۆڤاتیێ، ئه‌وێن ل ئه‌فغانستانێ و یێن ل دووڤدا، به‌ری چه‌ند رۆژه‌كان ژی دووماهی بزمار هاته قوتان د سندریكا به‌عسیان ژی كو عزه‌ت دۆری یێ ـ چڕـ بوویه، كو هه‌ر سه‌رێ فتنێ بوو د وێ مه‌عمه‌عا ل عیراقێ دورستبووی و هه‌ر ده‌م ئاسته‌نگ بوو ل هه‌مبه‌ری ملله‌تێ كوردێ ئاشتیخواز و بهێته ئازاردان، لێ ئه‌ڤه ژێ هاته سزادان (یمهل و لا یهمل)، كو ئه‌و ژی دێ بیته ژ كه‌نكه‌نیێن دووماهیێ، هه‌ر وه‌سا یێ دیتر ژی (به‌غدادی) میرێ داعشا خوینا وی ئه‌و ژی دێ بیته گرگره‌كێ دۆزخێ، چونكو ئه‌و بخوه ژی هه‌ست ب عه‌جه‌لا خوه دكه‌ت و هه‌ر ژ نوكه جهگیره‌ك بۆ خوه دانایه, كو دێ ل دووڤ شۆپا سیناریۆیا ئۆسامه و ئه‌یمه‌نێ زه‌واهری چن و بنه زلكێن شخارتا دۆزه‌خێ.. چونكو ئه‌ون یێن ژ سه‌نتا مرۆڤاتیێ ده‌ركه‌فتین، چونكو خوه گیانه‌وه‌رێ هۆڤ یێ كیڤی ژی هه‌كه بینیت مرۆڤه‌ك خوه ل به‌ر بچه‌مینت و ئالایێ دیلكرنێ راكه‌ت، دێ لێ بۆریت و چو هیما ناگه‌هینتێ، لێَ ئه‌ڤێن هه‌نێ چو حوكمی ب سه‌رێ دیلكریان ژ زارۆ و ژن و بێچاره‌یان دئینن؟! وه‌كو ئیسلام حوكمی دده‌ت كو سه‌ره‌ده‌ری بهێته كرن ب (بالتی هی أحسن). له‌ورا پیرۆزه دۆزه‌خ بۆ كه‌نكه‌یێن جه‌هنه‌مێ وه‌كو مه‌لایه‌كی ئه‌ڤ زاراڤه گۆتی.. و خودێ هاریكارێ بێگونه‌هان بیت.
تێكدانا ژینگه‌هێ ب خڕخڕێ!!
گه‌له‌ك جۆرێن تێكدانا ژینگه‌هێ هه‌نه، چونكو ژینگه‌ه نه ب تنێ جوانی و سروشته و پاكیا جه‌سه‌تی یه، به‌لێ یا هه‌یی تێكدانا رۆناهیێ ژی و یا بێهنێن نه‌خۆش و هه‌ر وه‌سا یا بهیستبوونێ ژی، ده‌نگێن نه‌شاز بۆ گوهێ مرۆڤی، تێكدانا ژینگه‌هێ. خڕ خڕ.. نه مۆزیكایه‌كا نه‌رمه.. خر خڕ نه گرگرا عه‌شقا و ڤیانێ یه. . و گرگرا شه‌ر و داستانایه؟؟ لێ ژ به‌رهه‌مێ نڤستنا هنده‌ك كه‌سانه ده‌نگه‌كێ نه‌شاز ژ ده‌ڤی دهێت، مرۆڤی های ژ خوه نینه، چه‌ندی خه‌و خۆش بیت و نڤین د گه‌رم و خۆش بن، ده‌ڤێ مرۆڤی ڤه‌دبیت و ئازادیا خوه دستینیت و ب هه‌ردو ملا دبیته خڕڕێن، هه‌كه گه‌له‌ك كه‌س بن ته هند دیت بوو ـ شه‌ڕه سه ـ (حاشا و ب لێبۆرین ڤه)، به‌لێ ل سه‌ر كیستێ جیران و ده‌وره‌به‌ران!! خودێ هاریكارێ هه‌ڤژنێن وان بن ییێن خڕخرێ دكه‌ن، چنكو ژن دلناهێلن ژ خه‌وه راكه‌ن و بێژنه زه‌لامێن خوه هوون یێن خڕخرَێ و زڕزڕێ دكه‌ن!!. له‌ورا هنده‌ك زارۆیان (ئه‌له‌مك) دئێتێ ژ ترسێن ده‌نگێ وی فلمێ (روعبێ) دا، ئه‌ڤه جارا ئێكێ بوو ئه‌م تووشی ڤی هه‌لویستی ببین، كو ب هه‌یامان بنڤین ل ئه‌ركێ سه‌ربازی یی ڤی شه‌ڕی، ئه‌ز ب خوه ژی ئێك بووم ژ وان یێن ته‌خسیری نه‌دكر د خرخرێ دا، به‌لێ من خوه گونجاند و ئیراده بۆ خوه چێكر كو وێ خرخرێ تۆنه‌كێ كێم بكه‌م و ل به‌ر خوه براوه‌ستم، به‌س هه‌ڤاله‌كێ مه كه‌سه‌كێ به‌رنیاسه د وارێ میدیایێ دا، له‌ورا كۆمه‌كا هه‌ڤالان مێهڤان كر كو ببیته مێهڤانێ وان و ب شه‌ڤ بۆ وان بپه‌یڤیت، به‌لێ سپێدێ چ قه‌ومی؟!، نه ئه‌و سیك و نه ئه‌و بازار.. وان گۆت: مه نه‌زانی دێ بۆ مه میدیاكاره‌ك هێت، به‌لێ بۆ مه ماتۆره‌ك هات!!.
ژ بلی خڕخڕێ ژی، هنده‌ك كه‌س گه‌له‌ك ب بیێ رێزگرتن ته هند دیت ده‌نگێ (ریگۆردێ ـ مسه‌جلێ) بلند كر چ ل مال یان ته‌كسیێ یان ئۆتوبیسێ و ره‌وشا خه‌لكی تێكدا، باشه به‌لكو ئێك حه‌ز ژ ده‌نگێ بلند ناكه‌ت یان ئه‌و مۆزیكه نه یا گونجایه ل گه‌ل ده‌می، بۆ نموونه سپێده‌هیان هنده‌ك شۆفێر گوه دده‌نه دهۆل و زڕنایێ، یان ل گه‌شته‌كێ وێ رۆژێ خێزانه‌كێ ده‌نگێ مسه‌جلا ترومبێلێ بلند كربوو و سترانه‌كا هندی یا گه‌رم ل سه‌ر بوو و كچێن وان سه‌ما ل به‌ر دكر وه‌سا تێكدانا مه كرسه‌رێ مه ئێشاند، ئه‌م چووین مه ب ده‌ست ڤه‌مراند. له‌ورا نه‌به‌س پاككرنا ژینگه‌هێ راكرنا گلێشی یه، به‌لكو خۆشكرنا هه‌ستا گوهێن مرۆڤانه ژی.. چونكو جاران كاتێكرنا مرۆڤی ل سه‌ر ژینگه‌هێ گه‌له‌كا بێ ره‌وشت و رامانه، سه‌ره‌رای كو خرخر نه ب ده‌ستێ مرۆڤی یه. ڤێ دووماهیێ ل پشتی هێرشا (جه‌سه) ل میحوه‌رێ به‌ربه‌ستا مووسلێ خوه ده‌نگێ بانگێ دیكلێن ره‌به‌ن یێن وی گوندی ژی كه‌فتبوو و ل سپێده‌هیان قێریا وی د ما حه‌فكێ را جوامێری، ژ به‌ر ده‌نگێ تۆپ و فرۆكان، ئه‌ڤجا دا قێریێ ڤه‌ده‌ت و نه دشیا تمام كه‌ت، پشكا دێ یا كۆپلا سه‌لیقا وی پشتی مه‌والێ ما د حه‌فكێ را!! قیی قیی قی.. ئه‌ئه‌ئه. . و توه هند دیت عه‌تسی.. ئه‌و ژی یێ حه‌ق بوو سه‌رێن رێیان ل به‌ر به‌رزه‌ببوون، له‌ورا ئه‌ڤه ژی مه‌زنترین تێكدانا ژینگه‌ها بهیستیبوونێ بوو. خوه بانگ هه‌لدێران ژی دڤێت ئه‌و كه‌سێ بانگ دده‌ت وه‌سا نه‌رم بیت كو بۆ گوهێن خه‌لكی خۆش ببیت، ئه‌ڤێ مه‌رجێن خوه هه‌نه، خوه ژ بلی خڕخڕێ ژی، ره‌وشته‌ك هه‌یه یێ ئاخفتنێ و ئه‌ده‌به‌ك، هنده‌ك كه‌س هند دئاخڤن ب ده‌نگێ بلند یێ ل به‌رامبه‌ر وی ژی نه‌شێت به‌رسڤا خوه بده‌ت چونكو ده‌لیڤێ نا ده‌نێ!! تۆنا ده‌نگێ وان هندا نه‌خۆشه خوه سه‌ماعا مۆبایلێ ددڕینن. وه‌رن ل خوه بزڤرین و بزانین چاوا چاره‌سه‌ریێ ب ده‌نگێ خۆش بكه‌ین.. چاره‌سه‌ریا خوه ژ خرخرێ بكه‌ین و ژینگه‌ها ده‌نگان تێكنه‌ده‌ین نه‌كو نه‌كو ئه‌و خرخر ببته گڕگڕ..
ده‌وله‌تا ئیسلامێ و ده‌وله‌تا كوردستانێ!!
ده‌وله‌تێن نه ده‌وله‌ت.. كوردستان و داعش.. بێی چو په‌یمان و چو یاداشتنامه‌یێن نێڤده‌ولی یێن فه‌رمی ل ناڤ كۆلانكێن جڤاتێن نه‌ته‌وێن ئێكگرتی دا، دو ناڤن دونیا هه‌ژاند، هه‌ڤسوویێن هه‌ڤن، به‌س هه‌كه ده‌وله‌تا ئیسلامێ ل عیراق و شامێ بیت، یا كوردستانێ ل چارانه، سه‌ره‌رای هندێ كو ئه‌ڤ هه‌ردو ناڤه ناهێنه به‌راوردكرن ل گه‌ل ئێك، چونكو ئالایێ ئێكێ یێ ره‌شه وه‌كو روویێ وێ (داعش) و ئالایێ كوردستانێ ره‌نگێن به‌حشتێنه!! وه‌كو روویێ وه‌ێ یێ سپی یه ل ده‌ف ئیسلاما دروست یا خودایی، هه‌ردو ژی ده‌وله‌تن ب (حبر ل سه‌ر كاغه‌زێ)، به‌لێ وه‌سا دیاره یا ئێكێ هاتیه بۆ ژناڤبرنا هه‌ردویان، چونكو ئه‌و نه‌ك ئیسلامه، داعشه و دووپشكه هاتیه بۆ ژناڤبرا هه‌ردویان ئیسلامێ و كوردستانێ ب ناڤێ ئیسلامێ، چونكو كوردستانێ ئیسلام پیرۆزكریه و بلند راگرتیه، ب گرۆڤه‌یا گه‌له‌ك به‌رنامێن ئافراندی یێن (ئه‌نتی كورد) و ل ژێر گه‌له‌ك ناڤان، هه‌می ژی هاتینه نه‌ك ب هێزێ و ئیراده‌كا پاك كو كوردان ژناڤ ببه‌رن، لێ ب خاپاندن و فند و فێل و كه‌یس ل نیازپاكیا تاكێ كورد و ده‌روونا وی یا بێگونه‌ه، ژ بێی شه‌نسیێ و قه‌ده‌را خاپینۆك ئه‌ڤ هه‌می ڤه‌رێژا كه‌ربوكینا ڤێ جیهانێ و كا هه‌ره فه‌لیته‌ك و كورێ شارعه‌كی ئیناینه و ب ره‌خه مه‌ڤه كانجی كرینه، ده‌وله‌ته‌كا نه‌ساخ ب ناڤێ ئیسلامێ ب مه‌ڤه‌دایه، ئه‌وان ئیسلام كریه (وه‌سیله) بۆ (غایه‌ته‌كێ) د نه‌فسا یه‌عقووبی دا، به‌س مه كوردستان كریه (وه‌سیله) بۆ (غایه‌ته‌كێ) د نه‌فسا خودایی دا، پێگیریا كوردان ئه‌وه یا خودێ ڤیایی، راسته ئه‌م حه‌ز ژ نه‌ته‌وا خوه دكه‌ین و پیرۆز دكه‌ین، ئه‌ڤه ژی مافه‌كێ ره‌وایه (إنا خلقناكم شعوبا و قبائلا لتعارفوا، إن اكرمكم عند الله اتقاكم) و ناسناما كوردان ژ كه‌ڤندا هه‌ر ته‌قوایا وان بوو ب كرنا نڤێژێ و خوداپه‌ریسیێ و هه‌می سه‌ركردێن وێ ئاینزان بووینه (شیخ و مشایخ و مه‌لا و موفتی و قازی و. . هتد) و داخوازا مافێ خوه ل گۆر شه‌ریعه‌تێ و پره‌نسیپێن خودایی گرینه، كورد ئێكه‌م كه‌س بوون باوه‌ری ب ئێكبوونا خودێ ته‌عالا ئینایی، ب گرۆڤا زه‌راده‌شتیێ، سه‌ره‌رای ڤێ چه‌ندێ دوژمنێن ئه‌ژده‌هاك پیلان داناینه بۆ ژێكڤه‌كرنا كوردان ژ ئیسلامێ، هه‌می هه‌ول ژناڤچووینه و نه‌شیاینه بكه‌ن، بۆ نموونه ل وێ هه‌ولا خراب یا خوه په‌قاندێ یا جاران كو ڤیاین ب رێیا سه‌روبه‌رێ مه‌لایان بابێ نه‌وته‌وا كورد مه‌لا مسته‌فا بارزانی ژناڤببه‌ن، به‌س ده‌ستێن فریشته‌یی ئه‌و ئاگرێ وان كره (بردا و سلام) ل سه‌ربارزانی، هه‌ر وه‌سا ئه‌ڤرۆ ژی یێن دهێن هه‌مان ستایلێ نه‌ساخ تاقی دكه‌ن و هه‌مان سیناریۆیێ دخوازن دوباره بكه‌ن، ئه‌ز وه‌كو تاكه ناڤه‌شێرم ڤێ میناكا من ب خوه دیتی، كو دیسا سه‌رۆك مه‌سعود بارزانی هه‌مان میراتێ كارێزمایێ به‌ری چه‌ند رۆژه‌كان، ل سه‌رێ چیایێ به‌تمه ل زومار ژ به‌ر دلنه‌ئارامیا وی د شه‌ڕی دا و حڕسا وی ل سه‌ر گیانێ پێشمه‌رگه‌ی، ده‌ڤێ وی یێ ب دوعا بوو و ژ به‌ر پێگریا وێ یا زێده و ژ له‌زكرن رابوو نڤێژا نیڤرۆ كر، ژ به‌ری هه‌لدێرانا بانگێ نڤیرۆ، نه‌خاسمه ده‌نگێ مزگه‌فتان نه‌دهاته، سه‌رێ چیایێ به‌تمه. ئه‌ڤجا ل ده‌ف خودێ ده‌وله‌تا دوست یا ئیسلامێ ده‌وله‌تا كوردستانێ یا سه‌ربخوه‌یه!! هه‌كه ئه‌زێ شاش بم بێژنه من!!.
ژنا كورد.. ژ رۆخساری به‌ر ب سومبولا جیهانی
چه‌ندی من بیره جڤاكێن مه ژ ژن و زه‌لامان، ژن وه‌ك وه‌لاتیا پله‌یا دو دیتیه و هه‌رده‌م مه وه‌كو دیكۆر و رۆخسار خۆیاكریه، هه‌رده‌م ژن ته‌په‌سه‌ر كریه، به‌س مه ژبیركریه كو بحه‌شت خودێ ته‌عالا دانایه ل بن پێن وێ. ، له‌ورا ئه‌ڤ بیردۆزه ل ڤێ پارچا مه یا ئه‌ردی یا ته‌په‌سه‌ر (كوردستان) كو پارچا مه ژی وه‌لاتیا پله دویه ل جیهانێ، ژنێ ب ئه‌رد ڤه كۆده‌تا كر ب پله‌یا 180 ل سه‌ر هێزا تاریێ یا دبێژنێ ده‌وله‌تا تاوانێ ل عیراق و شامێ!!، ژنا كورد ئه‌ڤ رۆخساره كره سومبل و هه‌می به‌ند شكاندن بۆ جیهانێ سه‌لماند كو نه‌خێر ئه‌و گه‌وهه‌ره!! ئه‌و گه‌ردۆنه، ئه‌و هێزه، خوراگریه هه‌می رامانێن ژیانێ یه، كۆبانێ وه‌كو میناك.. هه‌كه بازنه‌كێ ئه‌لكتریكی دروستبكه‌ین هێلا ره‌ش بێی سۆر دێ كاره‌ساتان په‌یداكه‌ت و مرنێ ئینیته به‌ر ده‌رازینكا مه، ئه‌ڤ لایه‌نێ دیتر ژی ته‌مامكه‌رێ وێ بازنێ یه، ئه‌ڤرۆ مه به‌هه‌شته‌ك دروستكریه ب نهێنیا هێزا ژنێ، ئه‌ز گه‌لك دوور ناچم به‌ری چه‌ند هه‌یڤه‌كان وه‌كو پێشمه‌رگه‌ك ل سه‌نگه‌ره‌كێ دژوار دا تووشی دوورپێچكرنێ بووین، مرنێ یاریا دومبه‌لێ بۆخوه ل گه‌ل مه دكر، دبیت چه‌ك و لۆجستیا مه ژی ل كێمێ دا رێ ل مه هاتنه گرتن، ب تنێ هێزه‌ك مابوو ئه‌م ڤه‌ژاندین وه‌كو دینامۆیا ژیانێ ئه‌و ژی په‌یوه‌ندیا مه ل گه‌ل دایكێ و هه‌ڤژینێ بوو، ده‌مێ دایكان ب كه‌ربا خوه پسیارا تڤه‌نگه‌كی كری كو ئه‌و بخوه بهێت و شه‌ڕێ دوژمنێن مرۆڤاتیێ بكه‌ت. ل وی ده‌می مه هه‌ست ب وێ وێ دینامۆیێ هێزا خوه یا ڤه‌شارتی كر و ئه‌م بووینه گومتله‌كێ ئاگرین و هه‌می به‌ند مه شكاندن و ئه‌م دوورپێچ ببوو بارانه‌كا ئاگرین ل سه‌ر چه‌كدارێن ده‌وله‌تا تاوانێ ل عیراق و شامێ، من خواست ڤێ نهێنێی د ڤێ رۆژێ دا بۆ جیهانێ نه‌مایش بكه‌م..
مژار هه‌كه دارێتنه‌كا مۆرالی بیت، بابه‌ت مۆراله و دچیته د زانسته‌كێ نۆشداری یێ سه‌مپتاوی دا، قووناغ مۆراله، مژار شه‌ڕ و جه‌نگه، زانستێ له‌شكری پشتبه‌ستیێ ب رێژه‌یا مه‌زن دكه‌ت، له‌ورا ئه‌م قه‌ردارێن وێ دایكێ و خووشكێ و هه‌ڤژیانێ نه كو خودایێ به‌حشت كریه دیاری بۆ بن پیێن وێ. ئه‌ڤ شه‌رێ ڤێ دووماهیێ نه خاسمه ل كۆبانا كوردستانی كا چه‌كدارێن ژن چه‌ند پله‌یا پیڤایی یا هێز و خوه‌راگریێ بۆ ڤێ جیهانێ سه‌لماند كو ل پێشیێ یه، ئه‌ڤه ده‌سكه‌فته‌ك بوو كو دیرۆكا كوردی جاره‌كا دی بڤه‌ژینیت و ببیته دینه‌مۆیا شانازیبرنا هه‌می ژنێن جیهانێ.. له‌ورا خوه‌یا بوو كو ژنا كورد كو سه‌رێ مه بلندكر و ئه‌و باجا ژنێن ئێزدی دایی بۆ سته‌ملێكرنێ پێدڤیه ببیته خاله‌ك ل سه‌ر ئه‌نیا دیرۆكا جیهانێ و ئه‌ڤ رۆژا هه‌شتی ئادارێ یا ژنێن جیهانێ كراسێ خوه یێ ره‌ش جاره‌كا بكه‌ته به‌ر خوه هه‌تا كو ژنێن ئێزدی ئازاد نه‌بن.
نانێ مه یێ د مه‌دحا ڕا !!
دبێژن هه‌ر سووكه‌كێ بازاره‌ك یێ لێ هه‌یی و ئه‌و ژینگه‌ها مرۆڤ تێدا دژیت جۆرێ كه‌دا ملێ مرۆڤی ده‌ستنیشان دكه‌ت، ل نێزیكی دریایێ كارێ فرۆتنا ماسیان هه‌یه، ئه‌و جهێ ئه‌م ژی لێ وه دیاره جهێ پوفكرنێ یه و ئه‌و كه‌سێ پتر نانێ خوه حه‌لال دكه‌ت، ئه‌وه یێ ته‌وێكان بده‌ته كابرایی. . ته‌و برا ته‌و. . هه‌كه جه‌نابێ سه‌یدایێ ته ژی پۆفكره سترانان ما چ ژ ته‌یه تو ژی دێ چه‌پلان لێده‌ی، راسته ته سه‌رێ وی نه‌ڤێت و تود زانی چو نینه مینا دهۆلێ نیڤا وی یا زڤالایه، به‌س هه‌كه پارێ ته زێده‌كر ژی، دێ ب دله‌كی و نه ب سه‌دان رابیه چه‌پان و له‌یزی ل نیڤا دیوانێ!! ژینگه‌ها مه ژینگه‌ها مه‌دحه و خوه‌مه‌زنكرێ یه باژێرێ رۆخسارانه، پایته‌ختێ پوفكرنێ یه. گه‌له‌ك ب دیمه‌نێ خوه گه‌هشتینه پۆستان، گه‌له‌ك قات و ریباتان بووینه دام!! جاران ئه‌ز دبێژم ” ل ده‌ف مه مه‌سئولی ب ده‌شبۆلی یه”، هنده‌ك ب مه‌شكا خوه یا مه‌زن بووینه دام و هنده‌ك ژی ب سه‌رێ خوه یێ مه‌زن ( ل گه‌ل رێزگرتنێ)، دبیت ب نێرینه‌ك بێژیت كو حه‌لالكرن ژی مه‌رجه، ما دبیت، تو نانی بده‌یه من و ئه‌ز ته لاواز بكه‌م و به‌را بهاڤێژمه وێ كانیكا من ئاڤ ژێ ڤه‌خواری، بلا هه‌می تشت د قانوونی بن، د زانستی بن، هه‌موو بۆ پێشڤه‌برنا به‌رژه‌وه‌ندیا گشتی بیت، لێ هه‌كه مژارا مه یا بیاڤێ مه‌دیایێ بیت، ل ڤێره ئایه‌ت به‌ره‌ڤاژی ل مه دهێته وه‌گه‌راندن، چونكو مه‌دیا واته ره‌خنه و ما ادراك ما ره‌خنه؟!! ئه‌م هێشتا د خوه ناگه‌هین كو د ره‌خنێ بگه‌هین، مینبه‌را ره‌خنێ و مه‌دیایێ نها بوویه مه‌عمه‌ع و مینا نه‌زارێ قه‌بانی گۆتی: بلا ئه‌ز بگه‌همه شاشیا خوه و بێژم به‌ری كو ئێكێ دیتر یێ بیانی بێژیت، له‌ورا جاران ئه‌م دكه‌ڤینه د ناڤبه‌را نال و بزماران دا، ئه‌رێ ئه‌ز باخڤم د مینبه‌را خوه دا یان نه؟! هه‌كه باخڤم، دبیت هنده‌ك هه‌ڤالێن من یێن نه‌زان د راستیا بابه‌تی نه‌گه‌هن و بێژن بابۆ مانێ مینبه‌را وی و یا من ئێكه و ئه‌م د توخیبێ مالا خوه دا دئاخڤین و چو جیران و خه‌لك ل سه‌ر جادێ نه‌ئاخڤن، لێ دێ بێژن یێ ئه‌زمان درێژه، یان ئه‌ڤه بۆ وی نامینیت و دێ بنه ماره‌كێ ره‌ش د زكی دا و دێ به‌ڤلاتیێ و ته‌بكێن كوژه‌ك بۆ دانن، هه‌تا وی راده‌ی كو خینا وی بده‌ست بكه‌ڤیت دێ فڕكه‌ن، هه‌ر چه‌نده هه‌كه ئالاڤێ مه‌دیایێ یێ نڤیسی بیت، كه‌س ناخوینیت، به‌س كی ژ فه‌سادان مشه‌ته‌ر؟! سه‌ره‌رای هندێ كابرا ناخوینیت، چونكو هه‌ر نزانیت بخوونیت و كاغه‌زێ به‌ره‌ڤاژی دگریت، به‌س ما كارێ مه‌لاق و فه‌سادان چیه؟! كو خوه شرین بكه‌ن و خوه بكه‌نه الخادم الامین!!. بلا به‌س بیت غه‌یبه‌ت و نه‌میمه، به‌س بیت حه‌نكان ب هه‌ڤدو بكه‌ین، نێ ئه‌م ژی هه‌ر كوڕێن وێ (.. . ) و وه‌لاتینه، پیشه‌یا من ئه‌ڤه‌یه كو راستیێ بێژم و بسه‌لمینم!! بابێ من هه‌ر بابێ ته‌یه و لایه‌نێ من هه‌ر یێ ته‌یه،چاوا ماف دایه ته كو وی كاری و وێ پیشه‌یێ بكه‌ی، یێ من ژی ئه‌ڤه‌یه، به‌س تو برایێ مه‌زنی و ئه‌ز یێ بچووكم مینا رویڤی گۆتی: خۆزی ئه‌ز برایێ بچووك نه‌بامه!! تو ژ من ب هێزتر و ب شیانتری و نه‌سریا ته یا ژ نن پتر، هه‌ر چه‌نده ته هه‌می داعویرا و چوو بوو (انا انزالناه فی الجیب) ما دێ غه‌درێ ل من كه‌ی؟! راسته ئه‌زێ دبینم تویێ دزیان دكه‌ی، تویێ خرابیێ دكه‌ی، ته دڤێت مه‌دحێن دره‌و ژی بكه‌م؟! نێ مه‌دحا ته بۆ ته نامینیت وه كوه بۆ گه‌له‌كان نه‌مایی و مه دیت چو ب سه‌ری هات؟!!. كه‌نكی هه‌لكه‌فتا مه‌دحان هات و بۆ تشته‌كێ ره‌وا، كو هه‌ژی مه‌دحان بیت، دێ كه‌م و ئه‌زێ مه منوون، وه‌كو جاره‌كێ من ل سه‌ر ئیسماعیل پێشكچی نڤیسی و هند مه‌دحێن وی كرن، پتر ئه‌ز بلندبووم ل جه‌م رۆژنامه‌نڤیسان، به‌س كارێ من نه مه‌دحه‌نه و بلا ئه‌زێ ده‌یندار بم باشتره ژ نانێ سه‌رشۆریێ و پوفكرنا ژ دره‌و..
ئه‌م هه‌می سیاسه‌تڤانین!!
ئه‌م هه‌می سیاسه‌تڤانین.. ئه‌م هه‌می هاتین هاتین. . بۆ سیاسه‌تێ جانفیداینه، ئه‌ڤ درووشمێ ڤان دووماهیان كو ژ سرووده‌كا خودێ ژێ رازی ته‌حسین تاهای هاتیه دۆتن، به‌ربه‌لاڤبوویه پشتی شه‌ڕ ب سه‌ر مه‌دا هاتی، بوویه سوحبه‌ت و شازنازیبرنا هه‌ر وه‌لاتیه‌كی ل سه‌ر جادێ و ل هه‌می جهان، درووشمێ ((ئه‌م هه‌می پێشمه‌رگه‌ینه))، بلا و تشته‌كێ جانه بۆ خورتكرنا مۆرالا پێشمه‌رگه‌ی، به‌س هه‌كه یا راست بێژین وه‌سا نینه، هه‌می سیاسه‌تڤانێن حزبێینه، چونكو پێشمه‌رگێ حزبێ بهێزتره ژ یێ نشتیمانی یان یێ وه‌زاره‌تێ و حوكمه‌تێ، هه‌ر كه‌سێ رابوو خوه كره سیاستڤان خوه ناده‌ته ب باراك ئۆبامایی، چونكو یا به‌حس لێ دهێته كرن بۆ پێشمه‌رگاتیێ مه دیت، ل رۆژا گۆینێ كه‌س یێ دیار نه‌بوو، بۆ هێرشبرنێ ده‌مێ ده‌لیڤه به‌رته‌نگ دبوو ئه‌و هژمارا مه‌زن یا ل باژێرێ به‌حس ژێ دكه‌ن، ل به‌رۆكێن شه‌ڕی ب هه‌ژمار دبیته ته‌مه‌تی تبلێن ده‌ستی، خوه‌به‌خشی ژی كته‌ك تێنه‌بیت، پرانیا وان هاتینه بۆ دامه‌زراندنێ یانژی خوه‌شرینكرنێ وه‌كو نڤیسه‌ره‌كی گۆتی، خوه‌په‌خشن نه‌ك خوه‌به‌خشن!!، بۆ ریكلامێ و ل سه‌ر شاشێن تلفزیۆنێ و ئه‌نه‌ترنتێی خوه نه‌مایش بكه‌ن، یێ قه‌هره‌مان ئه‌وه یێ خه‌باتێ بكه‌ت و خوه بێده‌نگ بكه‌ت، شه‌ڕی بكه‌ت و پۆف نه‌گه‌تێ، ئه‌م هه‌می بۆ ئه‌زماندرێژیێ و دیاركرنا زه‌بله‌كان مینا دبێژن بووینه (قائد قوات القعاع) و رۆسته‌مێ زال، یێ چو نه‌كری بزاڤان دكه‌ت كو ببیته هه‌می تشت، به‌س چاكیتێ وی و ریباتا وی پۆستێ وی یێ سیاسی و نه‌فس مه‌زنیا وی و مارێ ره‌ش د زكی دا به‌س بۆ به‌رژه‌وه‌ندیا خوه یا به‌ریكێ یه و كه‌س نه‌شێت دو په‌یڤان ل گه‌ل باغڤیت، هه‌كه دێ بیته عه‌ورێ گۆرگۆری، یێ هه‌یی ب ره‌خ ویڤه و ته‌مه‌تی بابێ ویه نه ده‌لیڤێ دده‌تێ ئه‌و ژی پێش بكه‌ڤیت و پۆسته بۆ وی بیت ناهێلیت دێ چیته ده‌ف جه‌نابێ جه‌نابان و مه‌لاقیان بۆ كه‌ت و خوه شرین كه‌ت و فه‌سادیێ بۆ جه‌نابێ خشیمی كه‌تس و خوه ب ناڤێ پێشمه‌رگه‌ی كه‌ته شامێ شه‌ریف. بهێلن پیشه‌یا پێشمه‌رگاتیێ ل دووڤ زانین و زانستی بیت و كه‌نگی ده‌بلۆم بووینه دكتۆرا؟! تیماركار ب رێزگرتن ڤه بووینه نۆشدرا؟! رووپیڤه‌ر بووینه ئه‌ندازیار.. هینگی ژی ببلا زارۆ ببنه عه‌مید و عه‌قید و قوربانی ژی ببنه هزار!!!.
كوردستان مالا ئه‌بۆ سفیان!!ش
هه‌ر كه‌سێ به‌رێ خوه بده‌ته ڤی مانشێتی، دێ بێژیت پێدڤی ناكه‌ت ئه‌ز ناڤه‌رۆكێ بخوونم، به‌س هه‌كه بخوونیت باشتره دا بزانیت چ د همبانكا من دا هه‌یه!!، برایێ من مانه په‌یڤا پیًغه‌مبه‌رێ پیرۆز محه‌مه‌د (س) ئه‌و بوو یا گۆتی”من دخل بیت ابی سفیان فهو امن”؟، ئه‌ڤرۆ ژی هه‌می پێكڤه یێن دهێنه هه‌رێما كوردستانێ و ل وێ ئێمناهیێ دگه‌رن، باشه ئه‌وێن خوه ددانن خوه‌دیێًن ئیسلامێ و میریًن خیلافه‌تا ئیسلامێ چاوا مالا خه‌لكی وێرانكرینه ئه‌وێن ل ده‌سپێكی خوه بۆ وان دهه‌لاڤێت و تلیلی بۆ وان ڤه‌ددان چاوا كه‌فتنه به‌ر خه‌فكا وان و نها یێن خه‌ونان ب كوردستانێ (شمالنا الحبیب ـ سابقاً) ڤه دبینن، پشتی میرێن وان نیكاح ل شه‌رفا وان كرین و سه‌رێن وان بڕین و ب زۆری برینه شه‌ڕی و كرینه هه‌لامه‌ت، باشه وێرێ بۆ وان نه‌یا ئامنه و هه‌رێم یا ئامنه؟!! ئه‌وێًَن كوڕێن كوردستانێ ب ساخی بنئاخ دكرن و ئه‌نفال ب سه‌ری دئینان و گۆڕێن ب كۆم ژێ چێدكرن، نها یێن ل ڤێره بووینه خودان مال و مولك، هه‌ر ئه‌وبوون د گۆتنه مه هوون (كفره) نه، هه‌كه ئه‌م كه‌فه‌ڕه بین و مورته‌د بین، خوه ئه‌م ژ ئه‌بۆ سوفیان خرابتر نین!! هه‌كه مالا وی یا ئامن بیت باشه یا مه دێ یا چاوا بیت؟! هه‌كه ئه‌وێن خوه ددانن خیلافه‌ت و ب ناڤێ پێغه‌مبه‌ری دپه‌یڤن، چما هێرشان دئیننه سه‌ر ئاخا وێ هه‌رێمێ و هه‌رێم ده‌ستێ براینینێ بۆ هه‌می نه‌ته‌وه و ملله‌تان درێژ دكه‌ت و ئه‌وێ دكه‌ت یا خودێ و پێغه‌مه‌به‌ران گۆتی، هه‌رێم رۆژ بۆ رۆژ یا ئارامتر و سه‌قامگیرتر دبیت و ب دروستی یا دبیته ئه‌و سالۆخا ئێًمناهیێ، سه‌ره‌رای هندێ ئه‌م نه بۆ سفیانین، ئه‌م مالا تالبان و مالا بارزانین، بابێ نه‌ته‌وا مه ب خوه كه‌سه‌كێ ئاینزان بوو ب مه‌لاتیێ هاتیه ناسین، له‌ورا ڤێره نه مالا ئه‌بۆ سفیانه به‌لكو مالا هه‌میانه، به‌س ئه‌و نه‌ته‌وا زكێ خوه ره‌ش كری خودێ ژی به‌ختا وان ره‌شكر و ئالایێن ره‌ش ب سه‌ر دا ئینان و گۆتن (الله اكبر) كو ب دورستی ئه‌و سالوخا سه‌رۆك مه‌سعود بارزانی دیاركی ل سه‌ر دسه‌پیێت كو (كلمه حق یراد بها باگل) كریه و راستی ژی دێ دیار بیت كا كی ژ مه باوكی سوفیانه؟؟!!
لۆ لۆ مرتاحۆ.. ..
چو نه‌مایه دێ ره‌وشا پێشمه‌رگه‌ی خۆش بیت، دێ بۆدجه په‌سه‌ند بیت، دێ مووچه هه‌بن و ته‌راكوما چووی وه‌رگریت، دێ ده‌ینێن خوه یێن موته‌راكم ده‌ت و ئێدی خودانێن ماركێتان ب باتكێ ل گه‌ل نائاخڤن!! دێ بیته فه‌رمی و دێ بۆ وی ژی هه‌بیت كو بكاریت سولفه و تششتێت وه‌كو هه‌می كارمه‌ندان هه‌بن، واته دێ دانپێدان پێ هێته كرن، ده‌مه‌كی جلكێن له‌شكری ل مه‌یدانكێ ب تنێ ب قه‌در بوون و حه‌مالان شانازی پێ دبر، ئه‌ڤرۆ ب په‌یدابوونا تیرۆرا داعشێ ژ نوو ئه‌ڤ جلكه پیرۆز بووینه و رۆژا خوه ژی هه‌بوویه, هنده‌ك دبێژن: ما پێشمه‌رگه چ دكه‌ت؟!! به‌س نزانن كو ب تنێ ئێك شه‌ڤ ل چۆلی و ل به‌ر سه‌رمایێ و برسێ و مه‌ترسیێ سه‌د ده‌فته‌ران دئینیت، دبێژن دێ چه‌ك ئێت دا بشێت به‌رگریێ دژی ڤی دوژمنێ دژوار و نه‌مرۆڤ بكه‌ت، دبێژن دێ ده‌رمالێن ختۆرێ) مه‌زێخن، پێشمه‌رگه و دو سه‌د دینار، دبێژن دێ ملهێبا پاره هێته مه‌زاختن، بۆ پێشمه‌رگه‌ی، هه‌ر چاوا بیت باشه و موسه‌كنه بۆ دلێ.. جاره‌كێ ل سالا 1997 ده‌مێ ل سالێ ب تێ دو مووچه هاتی بۆ پێشمه‌گه‌ی، هه‌می هه‌یڤان دگۆتن دێ دێ مووچه ئێت و دێ مووچه ئێت، ئێدی سه‌بۆره‌كا باش بۆ من دروست بوو، من گۆتێ ئه‌ز باوه‌رناكه‌م، هه‌میان گۆتن به‌لێ فلانی گۆت، من ب چاڤێ خوه دیت، دێ هه‌ر ده‌ن، من گۆت: ئه‌ز هه‌ر باوه‌ر ناكه‌م، وان گۆت: به‌لێ ئه‌ڤه ئه‌فسه‌رێ مووچان (رائید. فلان) هات و پاره ئینایه ل گه‌ل خوه، ئه‌وان گۆتن به‌س راسته حه‌تا نه‌چیته د به‌ریكێ دا ئه‌م باوه‌رناكه‌ین، به‌لێ من گۆتێ : نه‌خێر خوه بچیته دبه‌ریكێ ژی دا ئه‌ز باوه‌رناكه‌م!! وان گۆت چاوا؟! منه گۆتێ دێ بیرا هه‌وه ئینم، پاشی مه وه‌رگرت.. ئه‌وان گۆتن : ها ته وه‌رنه‌گرت؟ ته باوه‌ركر؟ من گۆتێ هێشتا مایه و دێ بینن!! ئه‌وبوو پشتی بێنه‌كێ ئ ه‌و رائید هات و گۆت: برا مووچێن خوه بیننه ده‌ر ژ به‌ریكا خوه و بێشه‌كێ بكه‌ن، مووچێ فلان ئه‌فسه‌ری نه‌هاتیه.. مه هه‌میان 50 دینار (یێن هینگی و مووچێ مه 700 دینار بوون) مه ئینانه ده‌رێ.. . من گۆتێ:ها؟!! هه‌وه باوه‌ر ژ من كر؟!! ئه‌وان هینگی باوه‌ر ژ من كر.. له‌ورا ئه‌ز ڤێ جارێ یێ پشتراستم كو دێ ره‌وشا پێشمه‌رگه دروست بیت و بیته لۆلۆ مرتاحۆ..
حه‌لاوه ل به‌رامبه‌ر نعال!!
دبیت ئه‌ڤرۆ حه‌لاوه بۆ مه ناڤه‌كێ گران بیت و ده‌مێ مه گوه لێدبیت، ئێكسه‌ر عێلنجی خوه ل دلێ مه دده‌ن، ژ به‌ر گرانیا وێ و سعراتێن گه‌رمێ و رێژه‌یێن كورسترۆلێ د ناڤدا و خرابیا وێ بۆ ساخله‌میا مرۆڤی، له‌ورا ئه‌م هه‌می ژێ دره‌ڤین دا قه‌له‌و نه‌بین و زیانێ نه‌گه‌هینته مه و شه‌كرا مه بلند نه‌كه‌ت، نه‌مازه ل ده‌مێ ئه‌م زارۆ، دا بینی پیكه‌م دگه‌ریان ل كۆلانێن مه و گازی دكرن حه‌لاوه ل به‌رامبه‌ر نعال، مه ژی كه‌ڤنه نعال خردكرن و دگوهارتن ل گه‌ل پله‌كا حه‌لاوا ره‌ش قه‌ره‌چان دفرۆت و دگێراند، هه‌ما چه‌ند داڤه‌ك بوون، ب تنێ ده‌ڤێ مه شرین دكر، لێ گه‌له‌كا ب تام بوو وی ده‌می تشته‌كێ شرین بوو، یا ژ مه‌ڤه ئه‌و ده‌سكه‌فتكه‌كێ مه‌زن بوو مه ب ده‌ستڤه‌ئینایی و مه نه‌دزانی كا مفایێ وێ نعالێ چه‌ند گه‌له‌ك بوو، بۆ ئه‌وان چونكو ب سه‌دان كلیۆیان خردكرن و دبرن وان ژی فرۆتنه كارگه‌هێ و مفایه‌كێ باش ژێ وه‌ردگرت، لێ نها و پشتی ئه‌م مه‌زن بووین و تێگه‌هشتین ژ نوو مه راستیا بابه‌تی زانی كو ئه‌م ل دووری باژێران بووین و كارگه‌هێن حه‌لاندنا نعالان هه‌نه و ئه‌وان مینا عه‌ره‌ب دبێژن: “حه‌لاوه ب سه‌رێ مه دا دشكاند!! ” یا گرنگ ئه‌وه ئه‌ڤ میناكه وه‌كو ئه‌وێ یه یا هێزێن مه‌زن ده‌مێ هێزێن بچووك نه‌چار دكه‌ن كو هه‌وجه‌ی خوه دكه‌ن، ب بیردۆزا پیلانگێریێ (نڤریه المۆامره) وه‌كو دروستكرنا شه‌ڕان و به‌رهه‌ڤكرنا زه‌مینه‌یا فرۆتنا كه‌لوپه‌لێن له‌شكری و چه‌كی و تانك و مۆشه‌كان!! هیڤیكرن ژ وان كو ئه‌و بخوه دوهنێ مرۆڤی د سه‌رێ مرۆڤی بده‌ن و ئه‌م خوه بۆ وان بهه‌لاڤێژێن كو شه‌ڕێ چه‌تیێن وان بكه‌ین، واته هه‌ر دو لایه‌ن یێن ده‌ستكردن و خویندتاریا وان ژی یا ده‌رستكرده و چو بنیاتێن دژوار نه‌بووینه، له‌ورا بووینه سۆته‌مه‌نیێ هێزێن مه‌زن و هه‌ڤسویی مینا پله‌یی ستێشنێ (PLAY STATION) كونترۆل د ده‌ستان دایه و ئه‌و هێزێن بچووك و خۆفرۆشان بۆ مه‌ره‌م و ئه‌گینده‌یێن خوه برێڤه‌دبه‌ن و ل شوونا حه‌لاوێ بومبان دهاڤێژن و ل شوونا نعالێ بلا پترۆل بیت بۆ نموونه!!. هه‌ر چه‌نده نعالێن مه كوردان پربها بووینه، نها بوویه حه‌حه‌ف ل سه‌ر، لێ ئه‌م ژی دێ ب خێرا وێ نعالێ وه‌رار بین و گه‌هینه هێزێن مه‌زنێن جیهانی، چونكو نها مه نعالێن خوه گوهارتینه ب پستالێ دا شه‌رێ وان چه‌تان بكه‌ین و ل شوونا هندێ كو ئه‌م نعالا خوه د دوژمنی وه‌ركه‌ین، دربێن ئه‌سمانی ژی بۆ مه بووینه حه‌لاوه و سیناریۆیا سالێن حه‌فتێ و هه‌شتێیان دزڤرینین، هه‌تا ئه‌م ژی تێبگه‌هین و مه‌زن دبین و حوكومه‌ێر دبین ئه‌م ژی حه‌لاوا خوه بده‌ینه ب نعال و دبینه خودان مال و حال!!..
نيشاندان
WP Facebook Auto Publish Powered By : XYZScripts.com