شێرزاد نایف
پشتى ده‌سپێكرنا بوهارا ئه‌ره‌بى یا جاران ل دووماهیا سالا 2010، گه‌له‌ك وه‌لاتێن ئه‌ره‌بى كه‌فتنه د كاروانێ رۆخیانێ دا، دوور ژ پرسگێركا ئیراقێ كو بوهارا وێ ژ یا وان نێزیكتر بوو و پێستركه‌ك ببوو كو ئه‌و ژى ل شۆپا وێ برۆخن حه‌تا راده‌یه‌كى ب شێوه‌یه‌كى بۆ ئێكێ دیتر، یا گرنگ مژارا وان دوورتره ژ یا ئیراقێ، به‌لێ میناكه‌ك ژ وه‌لاتێن كه‌فتینه به‌ر پێلا بوهارا ئه‌ره‌بى كۆمارا مسرا ئه‌ره‌بى بوو، لێ پشتى ڤان شۆرشان سه‌رگرتین، ره‌وشه‌كا ئالۆز ب سه‌ر گه‌لێن وان داهاتن، و زوى ب زوى ده‌ستهه‌لاتێن وان یێن نوى جهێ خوه نه‌گرتن، لێ هه‌روه‌كو مه دیتى كو جوانترین شۆرشێن بوهارا ئه‌ره‌بى یا مسرێ بوو، هه‌كه بێژین ژلایه‌نێ ئه‌وله‌هیێ ڤه، چونكو ل ده‌ستپێكا هه‌مى بیاڤان ئه‌وه، شیان ره‌وشێ كونترۆل بكه‌ن و ئاژاوێ گه‌له‌ك نه‌ڤه‌كێشا، دوور ژ مژارا لێكوگوهارتنا جۆرێن ده‌ستهه‌لاتێ ژ یێ ئیخوانان بۆ یێ نیمچه سه‌ربازى كو ژ مورسى بۆ سیسى، ئه‌گه‌رێن خوه یێن بابه‌تى هه‌بوون، ئه‌ڤجا ئه‌م ل گه‌ل وان هه‌مى وه‌لاتان به‌راورد ناكه‌ین، یا گرنگ بۆ مه ئیراقه، بۆچى وه‌كو مسرێ لێ نه‌هات كو زوى بسه‌ره‌كى بكه‌ڤیت؟
فاكته‌رێ ئێكێ یێ جوگرافى یه، مسرێ جهه‌كێ ستراتجیى یێ گرنگ هه‌یه و ئابوورێ وێ دڤێت هه‌ر د وه‌رارێ دا بیت و هه‌مى دونیایێ په‌یوه‌ندیێن راسته‌وخوه ل گه‌ل هه‌نه و رێكا پارچه‌یا سه‌رێ جیهانێ ب بنێ جیهانێ ڤه گرێدده‌ت. ژبه‌ر ده‌ریا سپى یا ناڤه‌راست و گرێدانا وێ ب ده‌ریا سۆر ڤه ب رێیا ده‌رته‌نگێ سوێس یێ گه‌میڤانیێ ڤه، و هه‌رسێ كێشوه‌ران پێكڤه گرێدده‌ت، ئاسیا و ئه‌ورۆپا و ئه‌فریقیا ل سه‌ر ئه‌رد. به‌لێ جهێ ئیراقێ ب تنێ ئێك ده‌رگه‌هێ ئاڤى یێ بچویك هه‌یه ئه‌و ژى به‌نده‌رێ فاوه ل سه‌ر ئاڤا كه‌نداڤى هه‌مى ره‌خێن وێ وه‌لاتێن ئاگرینن!!، و ژبه‌ر سیاسه‌تێن رژێما رۆخیا پرانیا وه‌لاتان كرینه دوژمن و هاتیه دۆرپێچكرن. تایبه‌ت ئیران كو هێشتا برینێن وێ یێن شه‌رێ حه‌فت سالى دنالن و ساخ نه‌بووینه.
فاكته‌رێ دویێ، هه‌بوونا سامانه‌كێ به‌شه‌رى یێ ب هێز كو ئه‌و ژى له‌شكرێ مسرى یه، له‌شكرێ وان نه‌رۆخیا گه‌لێ مسرێ خوه ب وى له‌شكرى ڤه‌گرت، ئێكسه‌ر وه‌كو سازیه‌كا به‌رهه‌ڤ، هه‌مى داموده‌زگه‌هێن ده‌وله‌تێ راگرتن، و مه‌دیت وه‌زیرێ به‌رگریا مسرى موشیر. محه‌مه‌د حسێن ته‌نتاوى چاوا سه‌ره‌دانا مه‌یدانا ته‌حریر ل قاهیره كر ل ناڤا خوه‌نیشاده‌ران وه‌كو سه‌رۆكه‌كى هاته پێشوازیكرن، و تانك و ده‌بابه‌یێن وان ل ناڤا جادده‌یان دا، چه‌ند ڤیانه‌كا موكم د ناڤبه‌را له‌شكرى و هه‌ڤوه‌لاتیان دا هه‌بوو. سه‌ربۆره‌كا سه‌ركه‌فتى بوو، جهێ خۆشحالیا هه‌مى جیهانى بوو. لێ له‌شكرێ ئیراقى هاتبوو پووچه‌لكرن ژ لایێ هێزێن هه‌ڤپه‌یمانان ڤه و ژێرخانا وێ یا به‌شه‌رى و یا مادى ل كێمیێ دایه ناخێ وێ لاوازكریه. ئێدى كه‌س نه‌شێت كونترۆل بكه‌ت، ژبه‌ر به‌ربه‌لاڤبوونا میلیشیێن جۆروجۆر. هه‌ر دیسا نێزیكبوونا ئیراقێ ژ ڤى كوژیێ جیهانێ یێ هشكباوه‌ریى لێ به‌ربه‌لاڤ و هنده‌ك حزبێن ئیسلاما سیاسى و ئیران ب ره‌خ ڤه، و ل سه‌ر دا ژى ئه‌ڤغانستان، و بنگه‌هێ تیرۆرا جیهانێ ئه‌لقاعیده و ل دویڤدا ژى نوسره و یێن وه‌كو وێ حه‌تا كو گه‌هشتیه داعش و خویشكێن وێ. به‌لێ مسرێ چو هه‌ڤسویێن ب وى ره‌نگى نه‌بوون. ژ هه‌ردو ره‌خێن خوه ڤه یێ باكۆر و یێ رۆژئاڤا ڤه هه‌مى ئاڤ بوو.. و د بن دا ژى وه‌لاتێن ئه‌فریقى یێن ژبرسان دا دنالن، و ل نیڤێ ژى رووبارێ درێژى نیلى پارچه‌یێن مسرێ دپارێزیت ژ مایتێكرنێن توندره‌و.
3ـ فاكته‌رێ جڤاكى و ره‌وشه‌نبیرى و شارستانى ژى گه‌لێ مسرێ دده‌ته ناسین و ب لاندكا شارستانى و ئایینان دهێنه ناسین، نابێژم ژ گه‌لێ ئیراقێ باشتره به‌لێ باندۆرێن هزرێن توندوتیژیێ و تائیفه‌یێن جۆره و جۆر ل سه‌ر دكاریگه‌رن و جۆره‌كێ مه‌زنكرنا ئایدیان دده‌نێ. كو حه‌زا تۆلڤه‌كرنێ و ته‌نازول نه‌كرنێ.. زێده‌بارى وى مێشكى سه‌ربازى و دكتاتۆرى وگیانێ تۆلڤه‌كرنێ یێ رژێمێن ل دویڤ ئێك د سه‌رێ خه‌لكى دا چاندى و په‌روه‌رده‌كرى. دبیت نه‌گونه‌ها هه‌ڤوه‌لاتیان بیت.
هه‌كه وه‌نه‌بیت ژى ئه‌م یێن دبینین مسر چاوا ژ لایێ ئاسایشێ ڤه ب ده‌سته‌كێ پوولایى كونترۆل ل سه‌ر كری، به‌لێ ئیراقێ هێشتا له‌شكره‌كێ نشتیمانى نینه.
نووترين نووچه
- پێدڤییە د پرۆسەیا سیاسی یا سووریێ دا هەلوەستێ كوردی ئێك بیت
- سەرۆكێ حوكمەتا هەرێمێ هەموو وەزارەت راسپاردن ب لەز لیستا مووچەیێ مەها ئادارێ بەرهەڤ بكەن
- هنارتنا پەترۆلێ دێ كاریگەری ل سەر داهاتێ ئیراقێ و كوردستانێ هەبیت
- حزبا كۆمۆنیستا چینی: ب گرنگیڤە دنێڕینە پەیوەندیێن خوە ل گەل پارتی دیموكراتی كوردستان
- رێككەفتنا 11 ئادارێ بەرهەمێ خەباتا پێشمەرگەی و هەموو تەخ و چینێن كوردستانێ یە
- رێككەفتنا 11 ئادارێ نموونەیا چارەسەرییەكا دادپەروەرانە بوو ل سەر بنەمایێ تێكگەهشتنێ
- سەرۆكێ هەرێما كوردستانێ: پێشوازیێ ل رێككەفتنا د ناڤبەرا سەرۆكێ سووریێ و فەرماندەیێ هەسەدێ دا دكەین
- مەسرور بارزانی: پێدڤییە كێشەیێن هەولێرێ و بەغدایێ ب شێوەیەكێ بنەڕەتی بهێنە چارەسەكرن
- رێككەفتنا 11 ئادارێ دەستكەفتا خەبات و قوربانیدانا كوردستانییان و شۆڕەشا مەزن یا ئیلۆنێ بوو
- مەسرور بارزانی و مستەفا كازمی رەوشا گشتی یا ئیراقێ و دەڤەرێ گەنگەشە كر
شیرزاد نایف
سۆپه‌ر لێڤڵ و بۆرجا ئیڤل!
شێرزاد نایف
قۆناغێن پێشڤه‌چوونا په‌یوه‌ندیێن هه‌رێما كوردستانا ئیراقێ ل گه‌ل فره‌نسا رۆژ بۆ رۆژ گه‌شه‌ترن و جهێ كه‌ربوكینا دوژمنێن ڤه‌شارتى یێن كوردانه، چونكو رێیه‌كا سه‌ركه‌فتى یه ب وى جۆرێ تێگه‌هشتنێ ل گه‌ل وه‌لاته‌كێ هه‌موو دونیا دزانیت یێ نه‌زیهه و خاپاندن و زه‌غه‌لى و موئامه‌ره د فه‌رهه‌نگا وى دا نینن، دیرۆكه‌كا سپى و سه‌ركه‌فتى هه‌یه، یاریێ پاقژ دكه‌ت، ب زه‌لامینى شه‌ڕى دكه‌ت، وه‌لاته‌كه شه‌رم ژ خوه دكه‌ت، هێمایێن وێ دونیا هه‌ژاندى یه ب ناڤێ خوه یێ بژاره و تو باوه‌ردكه‌ى نه‌ڤیێن وان خیانه‌تێ ل كوردێن سته‌ملێكرى بكه‌ن، نه‌ڤیێ ناپلیۆن پۆناپه‌رت، ڤۆلتێر، دیكارت، جان جاك رۆسۆ، سارته‌ر، فۆگۆ.. هتد. فاكته‌رێ خرابناك د سه‌رده‌ریكرنێ دا نینه، دۆستاتیا دروست دكه‌ن، بۆ نموونه هه‌كه وه‌لاته‌كێ هه‌ڤدوژ ل گه‌ل كوردان په‌نایا پرۆتۆكۆلێن موئامه‌راتى ببنه فره‌نسا، چه‌ندى به‌رژه‌وه‌ندیا وان یا ب بها بیت، خیانه‌تێ ناكه‌ن، وه‌كو گه‌له‌ك رێككه‌فتن و موئامه‌رات ل سه‌ر سه‌رێ كوردان هاتینه كرن، له‌ورا ژى ئه‌ڤ جۆرێ په‌یوه‌ندیان ژى یێ كو كه‌سێ نێچیرڤان بارزانى ژێ گرتى و ل سه‌رێ لیستا ئه‌جینده‌یێن په‌یوه‌ندیێن سیاسى دانایى، فه‌رنسا بوویه و ئه‌ڤ په‌یوه‌ندیانه د چه‌ندین قۆناغان ده‌ربازبووینه، هه‌روه‌كو ل مانشێتى مه كرینه لێڤڵێن سه‌ركه‌فتنێ.
چونكو هه‌رده‌م فره‌نسا ئێكه‌م وه‌لات بوویه د هاوارا كوردان دهێت ل ده‌مێن به‌رته‌گیان و نه‌خۆشیان، ل ده‌سپێكێ ب قۆناغا پاراستنێ و سه‌میانبوونێ بوویه، ل سه‌رهلدانا 1991 بگره فه‌رنسایا (فرانسۆا میتران) بۆ پاراستنا كوردان ل ئیراقێ ب ره‌نگه‌كێ فه‌رمى ب رێیا جڤاتا ئێمناهیا نیڤده‌ولى و په‌سنینا بریارا 688 ل 5 نیسانا 1991، به‌رێ بنیاتێ قانوونى ده‌ولى بوو، ژبۆ قه‌ده‌غه‌كرنا فرینا ئیراقى، ب هه‌ماهه‌نگى ل گه‌ل برتیانیا و ئه‌مریكا، پاراستن ب ڤى ره‌نگى بۆ هه‌رێما كوردستانێ دابینكر، ل گۆر وێ ئێكێ ژى ژیرخانا كیانێ كوردى ده‌سپێكر، ب شه‌رعیه‌تا ده‌ستوورى ل ئیراقا پشتى سه‌دام ل 2005. رۆلێ دانیال میته‌ران ژى هند یێ به‌رز بوویه ب ناڤێ دۆستا گه‌لێ كورد هاتیه ناڤداركرن.
ئه‌ڤ سه‌متا فره‌نسا به‌رده‌وام بوو ل گه‌ل مه كوردان و ل قۆناغه‌كا هه‌ستیار و مه‌ترسیدارتر ژى دیاربووڤه ل ده‌مێ هێرشا داعش سالا 2014 و هه‌روه‌سا هێرشا حه‌شدا شه‌عبى ژى پشتى پرۆسا ریفراندۆمێ ل چریا ئێك سالا 2017 ل سه‌رده‌مێ سه‌رۆكێ وێ فره‌نسۆا هۆلاند و سه‌ره‌دانا وى بۆ هه‌ولێرێ و به‌ره‌یێن شه‌ڕى ل گه‌ل سه‌رۆك مسعود بارزانى ده‌مێ په‌یوه‌ندیا ته‌لفۆنى هاتیه ئه‌نجامدان، هاتنا وى گه‌له‌ك به‌لانسێن مه‌زن گوهۆرین بۆ دوورخستنا مایتێكرنێن ده‌ولى ب به‌هانه‌یێن داعش و شه‌رێ سووریا و ناكۆكیێن د ناڤبه‌را رۆسیا و توركیا دا، دوور نه‌بوو ئه‌م ژى هاتباینه دۆراندن، دیاركر كو هه‌رێم نه‌یا بێخودانه و هنده‌ك وه‌لات هه‌نه پشتا راستیێ و مه‌زلۆمان دگرن!!. ئه‌ڤجا ئه‌ڤ مژاره ژ بیاڤێ مرۆڤاتى بوو یێ سیاسى و پرۆتۆكۆلى و ئابوورى و ئێمناهى و…هتد.
ل دووڤرا ژى و پشتى سه‌رده‌مى وى سه‌رۆكى، سه‌رده‌مێ ماكرۆنى هات، ئه‌و ژى به‌رده‌وام بوو ل گه‌ل هه‌رێمێ و د قۆناغا هه‌ستیار و چاره‌نیڤساز دا ژى ل مه بوو خودان ل ده‌مێ قه‌یرانا ئابوورى ل سه‌ر حه‌فكا مه شدیایى و بێهنا هه‌ڤوه‌لاتیان ته‌نگبوویى وحوكمه‌ت كه‌فتیه دده‌راڤێ نه‌خۆش دا و ململانا پتریا ده‌وله‌تان ل گه‌ل هه‌رێمێ گه‌هشتیێ لۆتكێ، سه‌رۆكێ حوكمه‌تا ئیراقێ حه‌یده‌ر ئه‌لعه‌بادى دڤیا دانپێدانێ ب هه‌رێمێ نه‌كه‌ت ب گه‌ل و حوكمه‌ت ڤه، به‌لێ ماكرۆنى پیشوازیا نێچیرڤان بارزانى كر و دیسا په‌یاما فره‌نسا یا ب هێز گه‌هشته هه‌مى لایه‌نێن زلهێز وه‌كو سه‌رۆكه‌كێ وه‌لاته‌كێ مه‌زن مه‌حفیرێ سۆر بۆ سه‌رۆكێ حوكمه‌تا هه‌رێمێ دانا.. ئه‌و لێڤلێ سه‌خت ژى ده‌ربازكر، ب راستى دڤێت ئه‌و قه‌نجى ببیته دیرۆكه‌كا شه‌نگدار د ناڤ به‌رپه‌رێن كوردینێ دا!.
له‌ورا ژى ب گه‌رمى و ل ده‌مێن گونجاى جاره‌كا دى پێشوازى ل سه‌رۆك و رێبه‌رێن هه‌رێما كوردستانێ دهێته‌كرن، د گه‌ل دا كۆمدبن. ب هیڤیا لێڤلێن بلندتر و بلندتر.
زه‌نگا سیپاپى.. مرنه‌كا نه‌خۆشتر!
شێرزاد نایف
نه‌خۆشترین ده‌نگێ تراژیدیك ز ه‌نگا خوه ل سه‌رێ مرۆڤى دده‌ت و مرۆڤى دكوژیت، ده‌نگێ ئامیره‌یێ نووچێكرى یه یێ هه‌ناسه‌كرنا ده‌ستكرد (cpapi)، كو وه‌كو چاڤدێریه‌كا چڕ دكه‌ت، بۆ نه‌خۆشێن بێنته‌نگیێ بارا پتر هاتیه ئافراندن و به‌ربه‌لاڤ بوویه پشتى به‌لاڤبوونا په‌تایا كۆرۆنایێ ل سه‌رانسه‌رى جیهانى، جاران پشكێن جودا هه‌بوون یێن چاڤدێریكرنا چڕ، (إنعاش) و نها ژى هه‌تا راده‌یه‌كى، به‌لێ ئه‌ڤ ئامیره‌یێ گه‌رۆك كو ئۆكسجینا فۆل و یا ئێكسه‌ر دده‌ت دكارین بێژینێ (ئینعاشه‌كا گه‌رۆك)، گه‌له‌كێ ب هێزه خوه دهاڤێته ناڤ سیهێن مرۆڤى و هاریكاریا هه‌ناسه‌كرنێ دكه‌ت، ماسكێ زى ب هێز دهێته شداندن ل سه‌ر ده‌ڤ و دفنێ، هه‌ر چه‌نده دبیت باندۆرێن لایه‌نى هه‌بن ل سه‌ر ساخله‌میا مرۆڤى به‌لێ ژ نه‌چارى و بۆ قورتالكرن ژ مرنێ دهێته گرێدان، هینگى دهێته گرێدان ده‌مێ ئامیره‌یێ ئۆكسجینى دگه‌هیته بلندترین راده‌یێ خوه، نه‌چار دبن سى پا پى گرێدده‌ن، هه‌لبه‌ت گرێدانا گه‌له‌ك ئامیره‌یان دبیته بارگرانى ل سه‌ر كارگه‌ها به‌رهه‌میئینانا ئۆكسجینى، و ژماره‌كا ده‌ستنیشانكرى هه‌یه بۆ هه‌مى پارێزگه‌هێ، راسته ئامیره‌كێ زۆرێ پێشكه‌فتى یه و یێ زیره‌كه و ب هونه‌ر دهێته گرێدان، به‌لێ تشتێ دخوازم بێژم و ئاراسته‌ى نوشدارێن به‌رهه‌ڤكارێن وى ئامیره‌ى دكه‌م وه‌كو پسیار، ئه‌ڤ زه‌نگا هندا نه‌خۆش یا ژێ دهێت هه‌ر ناڤبه‌را چه‌ند چڕكه‌یه‌كان زه‌نگا نه‌خۆش بۆ گوهان دهێته لێدان، مه‌ژیێ مرۆڤى دبه‌ت، مرۆڤى بێزار دكه‌ت نه خۆله‌كه و دونه و نه ساته‌كه و دونه رۆژن و حه‌فتى و هه‌یڤن ئه‌و تكتك مه‌ژیێ مرۆڤى دكۆلیت ب وى ده‌نگێ بلند، كو چو ڤالیۆم ژى پێڤه نینن تو بێده‌نگ بكه‌ى؟ هنده‌كان بێده‌نگ كرنه‌ك پێڤه هه‌یه به‌لێ ب تنێ بۆ ئێك خۆله‌كه، ئه‌رێ هه‌كه مرۆڤ چاڤدێرێ نه‌خۆشى بیت و ئه‌ڤ ده‌نگه مه‌ژیێ مرۆڤى بهه‌ژینیت، ئه‌رێ بۆ نه‌ساخى دێ چاوابیت یێ كو چ په‌یڤه‌ك ژێ نه‌هێت؟!.
ئه‌ڤه دۆخه‌كێ دوورنى یه، هه‌ر چه‌نده ئه‌م نه‌ك نوشدارێن ده‌روونینه، به‌لێ یا ب سه‌رێ مه دهێت، ئه‌م وه‌ك مرۆڤ خوه‌دى هه‌ست و نه‌ست و ده‌روون، پسیار ئه‌وه ئه‌رێ بۆچى نۆشدارێن ئه‌ڤ ده‌زگه‌هه چێكرین باشترین و ئاقلدارتینن، و ل ڤى سه‌رده‌مێ پێشكه‌فتى بۆچى ئه‌و تشت ل به‌رچاڤ وه‌رنه‌گرتیه؟! دبیت به‌رسڤ ئه‌و بیت، كو ئه‌و ده‌نگێ لێدانا له‌زاتیا دلى یان بێنته‌نگیێ كازى دكه‌ت، دا هه‌میان های ژێ هه‌بیت و ب له‌ز نۆشدار د هاوارێ بچن، به‌لێ یێ نه‌دیتى نزانیت چه‌ند ئه‌ڤ سه‌لیقا مرنێ، مرنێ نێزیك دكه‌ت، ژ به‌ر وان بیرهاتنێن نه‌خۆش یێن من ژ زه‌نگا ڤى ئامیره‌ى دیتین، ئه‌ز دلناهێلم بیرهاتنا وه‌غه‌ركرنا دایكا خوه بینم زمان پشتى ئه‌ڤ (سى پا پى) یه بۆ هاتبوو دانان.. وه‌غه‌را خێرێ بیت و مالا وێ به‌حه‌شتا به‌رین بیت.
په‌رتووكا ئیسماعیل تاهر ناهێَته پێكدادان!
شێرزاد نایف
نێزیكترین هه‌ڤالێ وى، مرۆڤى نه دزانى كى یه، من هزر دكر ئه‌زم ژ هه‌میان نێزیگتر بۆ وى، نه‌ك تنێ هه‌ڤال و هه‌ڤكار و هه‌ڤپیشه د وارێ ره‌وشه‌نبیرى و راگه‌هاندنێ دا، به‌لێ من هه‌ست كر برایه‌كه یان ئه‌ندامه‌كێ خێزانێ یه، چونكو چو ده‌لیڤه نه‌بوون سستى بكه‌ڤیته د هه‌ر كاره‌كى یان سه‌ره‌رده‌ریكرنه‌كێ دا ل گه‌ل وى، چو ئاجزیه‌ك ژى رۆژه‌كێ ژى په‌یدانه‌بوویه هه‌ر ژ ده‌مێ من نیاسى ژ سالێن به‌رى نۆتێ، هه‌كه تشته‌ك رویدابا ژى، وه‌كو حه‌نكێ بوویه، یان نه وى ل خوه‌دیار دكر كو یێ تۆره ژ من و نه‌من ژى، چونكو دل نه ددا مرۆڤى خه‌مبار بكه‌ت، پشتى وه‌غه‌ركرنێ بۆ من دیاربوو كو ئه‌و مرۆڤه یێ نێزیكى هه‌مى هه‌ڤال و كه‌سێن مه دنیاسین… نها پشتى وه‌غه‌ركرنا ئیسماعیل تاهر جانگیر ئه‌م دوجاركى زیانداربووین، ئێك وه‌كو كه‌سه‌كێ جڤاكى دل مه‌زن و جامێر و باوه‌ردار، و ژلایێ دى ڤه ژى، وه‌كو فه‌رهه‌نگه‌ك و بانكه‌كا پێزانینان و پڕى زانست و ره‌وشه‌نبیرى، هه‌مى ژى ژ وێ تێكۆشانا وى ب ژیانا خوه رابری ب ساله‌ها سالان ب خواندنێ و خۆپێگه‌هاندنێ و سه‌ربۆرێن بیاڤێن ره‌وشه‌نبیریى و رۆژنامه‌ڤانى و ئه‌ده‌بى و شه‌ریعه‌تێ، چونكو د هه‌مى بیاڤان دا سه‌بۆرێن دوور و درێژ هه‌بووینه و ب هه‌ردو زمانان عه‌ره‌بى و كوردى و ئنگلیزى ژى هنده‌ك جاران.. بیرا من دهێت ئه‌وى ل مالا خوه ئه‌رشیفه‌كێ زه‌نگین یێ په‌رتووكان هه‌بوون، بۆ نموونه ئه‌ز پێدڤى ب كۆڤارا (العربی) بووم، بۆ ڤه‌كۆلینه‌كێ، ته‌نێ وى هه‌مى هه‌ژمارێن وێ هه‌بوون، و باشترین كۆڤارا یا مه‌هانه یا عه‌ره‌بان بوو كو ل كۆیتێ ده‌ردكه‌فت.. هینگى ل گۆڤارا دیجله یا لاتینى كاردكر و ل رادیۆیێ ل تلفزیۆنێ كار دكر وه‌كو به‌رهه‌ڤكرنا نووچه و به‌رنامه‌یان، ل گه‌له‌ك رۆژنامه‌یێن ئیراقى وه‌كو ئه‌لسباح و ئه‌لسه‌باح ئه‌لجه‌دید، و گه‌له‌ك و گه‌له‌كێن دیتر یێن نه ل بیرا منن.. كه‌سه‌كێ خودان په‌یوه‌ندیێن گه‌له‌كێن گه‌رم بوو، هه‌ر جه و پۆستێ وه‌رگرتبا باره‌گایێ وى دبوو ناڤه‌نده‌ك گه‌له‌ك مرۆڤان قه‌ست دكرێ، ژ به‌ر هندێ بۆ من باش دیاربوو كو برێڤه‌برن مه‌رج ئه‌وه مرۆڤ یێ كاڕا بیت، چه‌ندى پۆسته‌یێ مه‌زن بیت، واته كه‌سایه‌تى مه‌رجێ برێڤه‌برنێ یه، ژبه‌ر هندێ من ددیت ئه‌و یێ هه‌ژى گه‌له‌ك پۆستێن به‌رزتر بوو، پێ هاتبانه راسپاردن، به‌لێ وه‌سا دیاردبوو ژ سه‌ره‌دریكرنێن خوه دا كه‌سه‌كێ ئارام و رازى ب هه‌ر شه‌نسه‌كى بوو، ئه‌وى ل شوینا هندێ كو شه‌ڕێ پله و پۆستا كربا، ئه‌وى ل هه‌ر جهێ لێ با خوه و ئۆفیسا خوه پێشدئێخست، خه‌لك ل دۆر خڕڤه‌دبوو، ژ رۆژنامه‌ڤان و هه‌لبه‌ستڤان و ره‌وشه‌نبیر و هه‌تا كه‌سێن گه‌له‌ك ساده ژى، ب دیوانا وى شاد دبوون، تشته‌ك نه‌بوو د فه‌رهه‌نگا وى دا كو دبێژنێ خۆمه‌زنكرن!. ئه‌و ب خوه كه‌سه‌كێ دیندار بوو و د بیاڤێ خودێ ناسینێ دا ژى جاره‌كى گۆتبوو، كو یه‌قینا من ب هه‌بوونا خودایه‌كێ ب تنێ یا مسۆگه‌ره، و یێ به‌رده‌وام بوو ل سه‌ر نڤێژى و ئه‌ركێن خوه یێن دینى، به‌لێ گه‌له‌ك خوه ده‌رنه‌دئێخست ژبه‌ر گه‌له‌ك كه‌سێن جودا ژ هزر و ئایدیێن وى، چونكو دیالۆگه‌كه ناگه‌هیته چ راده‌یان، و وى نه‌دڤیا ببیته ئه‌گه‌ر كو هنده‌ك هه‌ڤپیشه و هه‌ڤكارێن وى ژێ تۆره ببان.
شیره‌ته‌كا گه‌له‌كا جوان دكر، دگۆت من نه‌ڤێت من چو كه‌س هه‌بن پیچه‌كا هه‌ستیارێ ژى هه‌بیت د ناڤبه‌را من و وى دا، هه‌ر كه‌سێ د ناڤبه‌را من و وى دا یا نه‌خۆش بیت، ئه‌ز ناهێلم دڤێت ل گه‌ل هه‌میان یێ راست بم و چو ئاریشه و سلبوونه‌ك د ناڤبه‌را من و وى دا هه‌بیت، چو ئه‌و یێ نه‌حه‌ق بیت یان یێ به‌رامبه‌رى.. چه‌ندى به‌حسێ مه‌زنیا دلێ وى بكه‌ین بدوماهى ناهێت، گه‌له‌ك گرێداى باژارێ خوه دهۆكێ بوو، ته نه دزانى كیش عه‌شیره‌ته یان كیش لایه‌نه‌كه مرۆڤه‌كێ مللى بوو، حه‌ژ مرۆڤینیێ دكر، مخابن مه ژ ده‌ستدا و سلاڤان بۆ گیانێ وى یێ پاك دهنێرین…
مه چو دوژمن نینن!
مه چو دوژمن نینن!
شێرزاد نایف
یا ره‌وا و دروست ل سه‌ر ئاستێن نێڤده‌ولى دهێته گۆتن كو كه‌س دوژمنێ كه‌سێ نینه، به‌لى پا یا راستى ئه‌وه كو ئه‌م ب خوه هه‌مى دوژمنین ل پشت په‌ردا، كو دوژمناهى د ناڤبه‌را ئایدولۆجیان دایه، نه‌ك د ناڤبه‌را گه‌لان و ملله‌ت و نه‌ته‌وه‌یان دا، چونكو هینگى دێ بیته كاره‌سات نه مازه د ناڤ ئه‌ده‌بیاتێن سیاسه‌تێ دا. هه‌كه تو ل ره‌هوریشالێن سیناریۆیا پارچه‌بوونا مه وه‌كو كورد و كوردستانێ بگه‌ریێى و بڤه‌گه‌ریێه ده‌سیپێكێن رێككه‌فتنا سایكس پیكۆ، دێ بۆ ته دیار بیت كو ئه‌وێن مه ناڤێ دوژمن دانایه سه‌ر، ده‌ستێن خوه ب وێ رێككه‌فتنێ پیس نه‌كرینه، به‌لكو ئه‌م و ئه‌و یێن ئه‌م دبێژینێ (دوژمن) ب تنێ د ناڤ هه‌ڤسه‌نگیێ دا (عه‌بدوله‌مه‌ئمۆر) بووین، كێ ئه‌م پارچه كرین، دڤێت ئه‌و دوژمنێ دورست بیت، كا بۆچى و ژ به‌ر چو مه‌ره‌م ئه‌م خستینه د ناڤ ئالۆزیێن ڤێ هه‌ڤسه‌نگیێ دا و پشتى هینگى ده‌ڤه‌ر ب جه هێلایه؟! واته پێشده‌م خوه‌دیین ڤێ رێككه‌فتنێ، ئه‌ڤ ره‌هه‌نده ل پێشچاڤ وه‌رگرتینه، ئه‌وا وان خواستى بكه‌ن، كرن كو مه ئه‌ڤان نه‌ته‌وه‌یێن ل ڤێ كۆژیێ هه‌میان به‌رده‌نه ئێك، و تایبه‌ت ژى ئه‌م كورد ره‌وشا مه ژ یا هه‌میان خرابتر لێكرن و كرینه د ناڤ ته‌ڤنه‌كێ ئالۆز را! .
ژبه‌ر هندێ ژى ئه‌ڤ سه‌ره‌ده‌یكرنا سیاسى یا هنده‌ك حزبێن مه ل گه‌ل ده‌وربه‌ران دكه‌ن و ب تایبه‌ت پارتى دیمۆكراتى كوردستان یا دروسته و باشتر چاره‌نڤیسێ مه دزانن، سه‌ره‌راى هه‌بوونا هێز و ئیراده‌كا پۆلایى ژلایێ پێشمه‌رگێ كوردستانێ و ملله‌تى ژى، لێ كه‌س نه‌شێت د ده‌رئه‌نجامى دا شه‌ڕێ پتر ژ چار وه‌لات ب نه‌ته‌وه ڤه بكه‌ت، نه‌مازه ئه‌و یێن ل سه‌ر خورتیا زالبوونا ده‌ستهه‌لاتا خوه، ئه‌ڤا نها ب ده‌ست مه‌كه‌فتى ژى خێره‌كا مه‌زنه، ئه‌و ژى هه‌كه ئه‌و سیاسه‌تا شێتانه یا سه‌دامى نه‌با و ئه‌و مه‌زلۆمیه‌تا ل جیهانێ ده‌نگڤه‌دایى، باوه‌رم دا هه‌ر ب ڤى ده‌ستودارێ نها بیت یێ كو ئه‌و وه‌لات تێدا، ژ به‌ر هندێ ب دیتنا من یا شاشه بێدلیا توركیا یان ئیرانێ یان سووریێ بكه‌ین. و چو به‌هانه‌یان بۆ وان نه‌هێلین، و هه‌تا راده‌یه‌كێ باش ئه‌م شیایین په‌یاما خوه یا ره‌وا بگه‌هینینه وان و هه‌مى جیهانێ ژى، ئه‌وژى ب وێ سیاسه‌تا حه‌كیمانه یا مه‌رجه‌عێ كوردستانێ مه‌سعود بارزانى، ئه‌و ژ هه‌ر كه‌سه‌كى باشتر دزانیت، ره‌نگڤه‌دان و په‌نایێن ده‌وروبه‌ران دێ د چاوا بن، هه‌مى رێ ل وان گرتن كو بهێن هه‌ڤركیا مه بكه‌ن، له‌ورا یێن په‌نایێ دبه‌نه شیوه‌یێن ڤه‌شارتى ل پشت په‌رده‌یان و ژ به‌ر هندێ ژى جه‌نابێ وى خوه ژ گێرانا فه‌رمى یا ده‌ستهه‌لاتێ چه‌نده‌كێ دوور خست، وه‌كو دى ژى سیاسه‌ت هه‌ر سیاسه‌ته و جه‌نابێ وى ژى مه‌رجه‌عه.
دبینم وه‌كو پره‌نسیپه‌كێ لۆژیك چه‌ندى ئه‌م هه‌ڤالان بۆ خوه زێده‌بكه‌ین و دوژمنان كێم بكه‌ین، هنیگى ئه‌م دێ دسه‌ركه‌فتى بین, لێ نابیت ئه‌م پتر ڤان هۆڤان زێده‌تر بئازرینین. راسته هه‌ر وه‌كو مسعود بارزانى یێ مه‌رجه‌ع هه‌رده‌م دبێژیت، دڤێت گیانێ تۆلڤه‌كرنێ لاده‌ین و ل شووینێ ئه‌م خوه بیش بێخین، هه‌ر چه‌نده مه ئه‌و ژى ئه‌نجامدا، و مه سه‌ركه‌فتن ژى تێدا ئینا، كو ناڤوده‌نگیا سه‌ربۆرا هه‌رێما مه ده‌نگ ڤه‌دا ل جیهانى، لێ ل دووماهیێ كه‌ربوكین ودارێتا پیلانان ژ كه‌ربه‌كا داگرتى هاتنه هۆلى.
و ل دووماهیێ دبێژم، مه گه‌له‌ك ده‌ستێ ئاشتیێ و براینیێ درێژكریه، و بلا هه‌ر ل سه‌ر باشیێ د به‌رده‌وام بین و بلا ئه‌وێن كه‌ربوكین ژ بێگونه‌هێن مله‌تێ مه وه‌رگرتین بمینن د وێ كه‌ربێ دا حه‌تا كو ب وان ب خوه‌ڤه دپه‌قیت و و خێرێ بكه بلا د ئاڤێ بچیت .. و هه‌ربژیت ئاشتى!!
سه‌دام د ناڤبه‌را كنفى و كفنى دا
شێرزاد نایف
به‌رى چه‌ند رۆژه‌كان بیرهاتنا هه‌مبێزكرنا كنفێ سێدارێ ل دۆر حه‌فكا دكتاتۆرێ چه‌رخى (سه‌دام حوسێن) ب سه‌ر مه‌دا بۆری، ب ئه‌گه‌رێ سزاكرنا وى یا هه‌ژى كار و كریارێن وى، یێن شێتانه و سه‌رگه‌رمیێ و غرۆرێ ب چارنڤیسه‌كێ گه‌له‌كێ بێسه‌وبه‌ر ژیانا وى ب دووماهى هات. ب راستى ئه‌ڤ ده‌مێ هاتیه ژێگرتن بۆ ل سێداره‌دانێ تشته‌كێ سه‌رسۆمهێنه‌ر بوو، ل ڤێره پسیاره‌كا ب گومان دهێته پێش هه‌ر ژ هینگى و حه‌تا نها دهێته كرن، كى بوو ده‌ستێ هه‌رى بالا د سێداره‌دانێ داهه‌یی؟ هه‌لبه‌ت سه‌رێن هه‌رى مه‌زن یان ده‌ستێ ئه‌مریكا تێدا بوو و ئه‌ڤه خۆیاترینه، یانژى ده‌ستێ ئیرانێ تێدابوویه.. ل دووڤ په‌نده‌كا كوردى یا خوه ل سه‌ر دسه‌پینیت، ئه‌و ژى یا دبێژیت “مارى ب ده‌ستێ ئێكودو دكوژن”. هه‌رچه‌نده ئه‌ڤ هه‌ردو سه‌رێن مه‌زن وه‌ك دوژمن و به‌ڤل دهێنه خۆیاكرن، لێ ده‌رباره‌ى رژێما سه‌دامى كه‌س لێ نه‌ما خودان، هه‌ڤال و دوژمن ل خوه كربوونه دوژمن، ژ به‌ر وێ غروورا سه‌رێ وى خارى!!. نابێژم چه‌نده‌كێ وه‌لاتێ قه‌ته‌ڕ ده‌سپێشخه‌ریێن ره‌ڤاندانا وى یان حه‌واندنا وى ژ ئه‌مریكا دڤیان، ئه‌ڤه ژى وێ خۆیا دكه‌ت كو هه‌تا ئه‌ڤرۆ قه‌ته‌ڕ جۆره‌كێ چاڤدێریكرنا تیرۆرێ ل ده‌ف دهێته مه‌یزاندن. لێ ده‌رباره‌ى وێ كریارێ هه‌ر كى بیت بۆ مه وه‌ك كورد و هه‌رێما كوردستانێ، ئه‌و گرنگه ده‌ستێن كوردان ب خوینا وى سۆرنه‌ببوون، هه‌كه نها هه‌مى جیهانا عه‌ره‌بى ل مه داجڕیا بوو، چونكو حنێرا مه یا ب ده‌نگه، لێ وه‌كو دى هه‌ر كه‌سێ هاى ژێ نینه، ئه‌ڤ بیره‌وه‌ریا مراندنا وى بۆرى كه‌سێ خۆ به‌حس ێ نه‌كر، ته‌نانه‌ت كچا وى (ره‌غه‌د)ێ هه‌كه پۆسته‌كێ بچویك ئینابیته وه‌ك خار رۆتین، و دبیت هه‌رنه‌ئینابیته خار.. ئه‌ڤێ سێداره‌دانێ ئه‌و هه‌مى ئاگرێ درووشم و گه‌رموگۆریێن عرۆبه‌تێ و نشتیمانیاتان باش ڤه‌مراندن، هه‌تا كو ژئه‌نجامێ بوهارێن عه‌ره‌بى د دووڤ خوه دا ئینایین.. لێ وه‌كو دى ده‌رباره‌ى لایه‌نێ جێبه‌جێكار گومانا من گه‌له‌ك بۆ ئیرانێ دچیت، چونكو هنده‌ك سیناریۆ هه‌بوون دگۆتن كو ئه‌مریكا ل به‌رنه‌بوو وى حوكمى ل سه‌ر جێبه‌جێ بكه‌ن، به‌لێ هنده‌ك پلان و ئاراسته‌یێن ئیرانێ ب ده‌ستێ ئالیێن ناڤخوه‌یى ده‌ست تێدا هه‌بوو، ب گرۆڤه‌یا هندێ ئیران هه‌تا ئه‌ڤرۆ یا تۆلێن خوه ژ عیراقێ ڤه‌ده‌ت، یا شه‌ڕێ هه‌شت سالان، سه‌دامێ سونه ل سه‌ر ئیرانا شیعه سه‌پاندى، دخوازم میناكه‌كا هه‌ڤاله‌كێ خوه (دیدارا وى ل به‌رنامه‌كێ رادیۆیا دهۆك ژى هه‌یه) بینم چاوا بابێ وى ب ده‌ستێ ئیرانێ هاته كوشتن ل دووماهیا سالێن نۆتان و ل نیڤا مالا خوه دا ب ده‌بانجێ، و ناسنامه‌یا وى یا له‌شكرى ژى ل گه‌ل خوه برن، دا بسه‌لمینن كو ئه‌ڤه مه فلان كوشت و ئه‌ڤه ناسناما وى، چونكو ئه‌فسه‌رێ له‌شكرێ عیراقێ بوو، ل دووڤ گۆتنێن وى ژى كو ئه‌وان ئه‌و كریاره‌ك بوو یا وان پلانێن ئیرانێ دانایى پشتى رۆخیانا رژێما به‌عس هژماره‌كا زۆرا ئه‌فسه‌ر و شه‌ڕڤانێن له‌شكرێ عیراقێ كوشتین.. ئه‌ڤجا چاوا بۆ هه‌ڕشاندنا سه‌رێ مه‌زنێ عیراقێ ئه‌وان چ رۆله‌ك نه‌بیت؟! ره‌نگه ئیرانێ به‌رى ئه‌مریكا راكربیت بۆ سێداره‌دانا وى، ئه‌ڤه ژى نێزیكى سیاسه‌تا نه‌رم یا ئیرانێ یه، هه‌لبه‌ت بۆ ئه‌مریكا ژى نه‌خه‌م بوو ژبه‌ركو ئارمانج ئێك بوو!!. من دڤیا ئه‌ڤێ چه‌ندێ بگه‌هینم ب ڤێ هه‌لكه‌فتێ و سه‌ركه‌فتنا بالاهیا ده‌ستێ ئیرانێ د نیڤا عیراقێ دا.
ئیران وه‌ك زربابه‌كێ گونجای!
شێرزاد نایف
ده‌مێ (یوزارسیفێ راستگۆ) هاڤێتینه د بیرێ دا، هه‌مى ده‌رگه‌ه لێ نه‌هاتنه گرتن، پله‌كا هه‌ناسه‌كرنێ بۆ مابوو، و به‌ره‌به‌ره ژ مرنه‌كا نێزیك، قورتال بوو هه‌تا كو بوویه میناكێ پێگۆتنا ده‌ستهه‌لاتێ كو هه‌تا ئیرۆ ژى پێ دبێژن، خودانێ سه‌برێ به، میرێ مسرێ به!. ئه‌ڤجا یا ئه‌ز دبینم بژارده‌یه‌كه پێكیشى وان مه‌زنه سیاسه‌تمه‌دارێن مه دكه‌م یێن ڤێ رۆژنامێ دبینن و دخوینن یان په‌یام دگه‌هیتێ، پشتى من هزرا خۆ د نێزیكترین هه‌ڤسویى دا كری (یێن كو ئه‌م دبێژینێ ـ دوژمن!)، من دیت كو ئه‌ڤ نه‌ته‌وه پتریى هه‌میێن دى نێزیكى مه‌یه، ئه‌ز نابێژم (مه‌لك نه‌جاشی) یه، چونكو وان ژى گه‌له‌ك ژ باب و باپیرێن مه ژناڤبرینه ب هه‌ر رێ و شێوازه‌كى، به‌لێ ب گه‌له‌ك سه‌ده‌مان پتر مرۆڤێن مه‌نه، هه‌م ب زمانى، هه‌م ژى ب كرۆسۆمێن جه‌سته‌یى، سیاسه‌تا وێ یا نه‌رمتر ژ یا توركیا، چونكو رێژه‌یا كوردان ل توركیا پتر وێ هاندده‌ت كو یا توند و تیژ بیت ل گه‌ل تاكێ كورد، هه‌ر ل كیڤه بیت، بۆ میناك مه دیت به‌رى ده‌مه‌كى سه‌را راكرنا ئایێ كوردستانێ ل ترابزۆنێ چ ب سه‌رێ گه‌شتیارێن كورد ئینا!، زێده‌بارى هندێ كو ڤێكنه‌كرن دبیت یا نه‌ته‌وان و گه‌لان بیت، پتر ژ ده‌ستهه‌لاتان، به‌ره‌ڤاژى گه‌له‌ك جاران ده‌ستهه‌لاتا وان (یا توركى) ده‌ستێ مه گرتیه، لێ هه‌ر ئه‌ڤ گۆتنا دێرین یا هێمایه‌كێ كورد هه‌ر ژ وى ئه‌ردێ وێ بلند دبیت یا كو دبێژیت: دوژمنێ بابوكالان نابیته دۆستێ لاوان.!!
له‌ورا ئه‌ز دبینم نه‌ته‌وا فورس پتر دگونجیت ل گه‌ل مه كوردان، وه‌كو دى ماده‌م هه‌ر مافێن مه یێن دهێنه خوارن ژ بال ده‌ستهه‌لاته‌كا ژه‌نگى بێ سه‌روه‌ری ڤه، بلا بچینه بن سیبه‌را ئیرانێ ڤه، بلا ئه‌و مه بخۆت باشتره ژ ڤان كه‌سێن نزم د سه‌روه‌ریێ دا. كو یاریان بۆ خۆ ب نانێ هه‌ڤوه‌لاتیان دكه‌ن، وه‌كو دى ماده‌م كو ئیرانێ هه‌ر ئیراق داعویرایه، هه‌ما بلا هه‌میێ بخۆت!!.
ل ڤێره بیرا من دهێت ل بۆیه‌ره‌كا ده‌مێ كۆچا ملیۆنى بۆ دوریانا دچیت رێیه‌ك بۆ توركیا و ئێكا دى بۆ ئیرانێ.. پیره‌مێره‌كێ زانا ئه‌م راوه‌ستاندین و گۆته‌مه، نه‌چنه توركیا هه‌رنه ئیرانێ! گوهێ خۆ بده‌نه من من ئه‌ڤ رێدینه ژخۆ سپى نه‌كرینه، دێ پتر دلۆڤانیێ ب هه‌وه به‌ن ژ توركا، و گه‌له‌ك سه‌ده‌م گۆتن، ب دورستى ژى، خه‌لكێ ئیرانێ ب كورد و فورس ڤه، ئه‌م داناین سه‌ر سه‌رێ خۆ، لێ یێن چووینه توركى هه‌وه دیتن چ ب سه‌رى ئینان؟!. ئه‌ڤا ئه‌ز دبێژم، دێ مه ژ گه‌له‌ك مه‌عمه‌عان دوورئێخیت، وه‌كو مایتێكرنێن توركى و سیاسه‌تا عیراقا نه‌عیراقی! مژارا په‌كه‌كێ ل گه‌ل توركیا، لێ ب مه‌رجه‌كى كو ب ئاگه‌هداركرنا ئه‌مریكا، ب شه‌فافیه‌ت بۆ دیاركرن چونكو مه گه‌له‌ك ده‌رس وه‌رگرتینه ژ لێڤه‌بوونێن ئه‌مریكى پێخه‌مه‌ت سیاسه‌تا وێ!!.
هه‌مى داگیركه‌رێن كوردستانێ جۆرێن سته‌مێ ل مه كوردن كرینه، ئیران ژى ل گه‌ل وان، لێ ئه‌و ژ هه‌میان نه‌رمتر بوویه، وه‌كو دى، ئه‌ردێ ئیرانێ هندێ مه‌زنه، مینا كێشوه‌ره‌كى یه، ئه‌م ژى دى د ناڤدا به‌رزه بین، و ئه‌م و ئه‌و دو جڤاكێن گونجایینه ل گه‌ل هه‌ڤ. باورنا كه‌م مافێن مه بهێنه خوارن هه‌تا راده‌كێ باش.
جه‌ژنا بوونا مرنێ!
شێرزاد نایف
ژیان یا مری یه و مرن یا ژیایی و هه‌روهه‌ر یا مایی یه، جوانترین قانوونا بێ جوداهی یه و ژبه‌ر كو مرن حه‌قه و یا ب یه‌كسانی یه و و هه‌ر دێ هێت، دڤێت مرۆڤ ب پێشوازیكرنه‌كا بێ ترس سه‌رده‌ریێ ل گه‌ل بكه‌ت و ژێ نه‌رسیت، جوانترین جه‌ژن یا من بهیستی ئه‌وه یا ل مه‌سیكێ دهێته گێران و هنده‌ك وه‌لاتێن لاتینی و ئه‌مریكا و فلپین، مرنێ ساخ دكه‌ن ب دانانا ئاهه‌نگان ل هه‌ردو رۆژێن مه‌ها نۆڤه‌مبه‌را هه‌رسال و سه‌ره‌دانا گۆرستانێن خوه خه‌ملاندنا جلكێن خوه و مالێن خوه به‌رهه‌ڤكرنا قوربانییان و خوارنێن خۆش بۆ مریێن خوه یێن نێزیكترین، كا وان حه‌زژ چ خوارن دكرن بۆ كه‌سوكارێن خوه‌ه یێن وه‌غه‌ركری به‌رهه‌ڤ دكه‌ن و سفره‌كا خه‌ملاندی ب شه‌مالان و پاته‌یێن ره‌نگا و ره‌نگ دادنن، زارۆیێن وان جلك و ماسكێن په‌یكه‌رێن هه‌ستیێن مریان دكه‌نه به‌رخوه، دبێژن ل گه‌ل هاتنا داگیركه‌رێن ئیسپانی ل سه‌ده‌یا پازدێ، هنده‌ك ژ نه‌ریتێن مه‌سیحیه‌تێ یێن گرێدای ئاهه‌نگێن كاتۆلیكی یێن جه‌ژنا قتیسان و هه‌می ده‌روونان، بوویه ئه‌گه‌رێ رێككه‌فتێ ل گه‌ل ره‌وشه‌نبیریا مه‌كسیكێ یا مللی. ڤێجا گه‌له‌ك ڤان رێوره‌سمان بڕگه‌یێن جۆره و جۆره هه‌نه، گرنگیه‌كا باش دهێته دان ب زارۆیان ب په‌روه‌رده‌كرنه‌كا جوان و كه‌هیكرنا وان ل سه‌ر سه‌روبه‌رێ ژیانێ و قه‌ده‌رێ. ئێدی گۆرستان دبیته گۆره‌پانه‌كا جوان و خه‌ملاندی بۆ مریێن خوه دادنن.. ب دیتنا من تشته‌كێ جوانه و چاندنا غه‌ریزه‌كا زێندی یه و وێره‌كیێ كو ئێدی ئه‌و ڤه‌جنقینا ژ نشكان ڤه كه‌سێ نه‌گریت، رێوره‌سمه‌كا نۆشداری سه‌مپتاوی یه، مرۆڤ به‌رهه‌ڤیێن خوه بكه‌ت ب كار و كریارێن قه‌نج بۆ رۆژا وه‌غه‌رێ، سرنجه‌كا ئه‌قلانه‌یه دهێته كرن، هه‌ر وه‌سا ژبلی ڤی وه‌لاتی ژی خوه یێن به‌ری وان ژی گه‌له‌ك ملله‌تان سه‌ره‌ده‌ریه‌كا جودا هه‌بوویه ل گه‌ل ڤێ دیاره‌دێ وه‌كو ته‌حنیتكرنا مۆمیایێن مسڕیان و گه‌له‌كێن دیتر. لێ ل ڤێره دمینیت كا چما ئه‌م خه‌لكێ رۆژهه‌لاتی هند ب ترسه‌كا مه‌زن ته‌ماشه‌ی مرنێ دكه‌ین مه كریه فۆبیایه‌كا مه‌زن، ته‌ماشه‌ی گۆرستانێن مه بكه چاوا د بێسه‌روبه‌رن؟!، هنده‌ك گۆرستان ل وه‌لاتێن رۆژئاڤا هه‌نه، تو هه‌ر حه‌زدكه‌ی ته‌ماشه‌بكه‌یێ و بێهنا گول ره‌یحانان ل دفنا ته دده‌ت، ب شه‌ڤ ژی رۆناهیێن بلاجكتۆران و خۆشكرن و جوانكرنا سه‌روبه‌رێ وێ ده‌ڤه‌رێ، و هه‌ر ژ نوكه گۆرستانێن مه شكلێ دۆزه‌خێ دده‌ن!!، باوه‌ردكه‌م مرۆڤی هه‌كه ب ساخیا خوه كار بۆ جوانكرنا پاشه‌رۆژا خوه كر، هینگی ژی پاشه‌رۆژ دێ یا جوانتر بیت، ما مه كه‌نگی باژارێن خوه جوانكرینه دا گۆرستانێن خوه ژی جوان بكه‌ین، ژینگه‌ها جوان جڤاكه‌كێ جوان به‌رهه‌مدئینیت، جه‌ژنێن بوونێن خوه مه چو جاران نه‌دكرن و حه‌تا نها ژی ئه‌م گرنگێی پێ ناده‌ین، ئه‌ڤجا پا چاو ادێ جه‌ژنا بوونا مرنا خوه كه‌ین؟!
شووشتنا ئاڤێ..
شێرزاد نایف
مه‌له‌ڤانیكرن د ئاڤێن مه‌له‌ڤانگه‌هان دا، زۆرا ب مفایه بۆ هه‌مى لایه‌نێن ساخله‌میا مرۆڤى، هنده‌ك دبێژن نه‌خشۆیا گه‌هان (فه‌قه‌رات) ب رێژه‌یه‌كا مه‌زن چاره‌سه‌ر دكه‌ت، ژبلى مفاییێن دیتر یێن هه‌مى دزانن!، به‌لێ بێى پاككرنا ئاڤێ ب كلۆرێ مه‌ترسى زۆن، رۆژانه مێهڤانێن جۆره و جۆر ژ هه‌مى جهان سه‌ره‌دانێ دكه‌ن، كه‌سێن نه‌خۆش ب نه‌خۆشیێن ڤه‌گر و مه‌ترسیدار و هه‌ستیار، ب ڤایرۆسان به‌ردده‌نه د ناڤ ئاڤا گشتى دا، یان ئاڤ دهێته پیسكرن ب ده‌ستنڤێژا زراڤ یان یا دى، ژ لایێ زارۆیان ڤه یان كه‌سێن بێوژدان یان بێده‌ستى ئاڤێ پیس دكه‌ن ب میزا خوه یان خوها له‌شى یان دوهنێ له‌شى، راسته كلۆر و كه‌ره‌ستێن پاككرنێ هه‌تا راده‌كێ باش مرۆڤى دپارێزن هه‌ر وه‌سا هه‌بوونا فلته‌رێن زڤراندنا ئاڤێ به‌كتریایا پیس پاك دكه‌ن، بۆ نموونه ل دووڤ ژێده‌رێن ساخله‌مى هایبۆكلۆریدا كالسیۆم و لیتیۆم كلۆرا كاریگه‌ر به‌رهه‌م دئینن ئه‌وێ ڤایرۆس به‌كتریا و كه‌ڤزێ و میكرۆبێن هوور دكۆژیت و ڤایرۆسێ مێلاكێ د 16 چركیه‌یان دا دكۆژیت و یا قۆلۆنى دخۆله‌كه‌كێ كێمتر دا دكۆژیت، گه‌ر مرۆڤ پشتى ژ مه‌له‌ڤانگه‌هێ ده‌ردكه‌ڤیت، ب زكچوونێ كه‌فت یان هه‌لاڤێتنێ یان تایه‌ك هاتێ، زوو ل خوه بزڤریت و سه‌ره‌دانا نه‌خۆشخانێ بكه‌ت..
به‌لێ دڤێت مرۆڤ ژى ل به‌ر خوه رابوه‌ستێت، هه‌كه مرۆڤ یێ بریندار بیت نه‌چیته د ئاڤێ دا، كو به‌كتریا نه‌خۆشیان ئێكسه‌ر نه‌چیته د له‌شى دا، تایبه‌ت ژى ئاڤا گه‌رم یا جاكۆزى یان مرۆڤ جاران وێ ئاڤێ ڤه‌دخۆت بیێ كونترۆلا مرۆڤى و هه‌كه مرۆڤ زوى ژ ئاڤێ ده‌ركه‌فت ده‌ملده‌ست خوه پاقژ بكه‌ت، شامبۆیێ بكاربینیت و ئاڤا گه‌رم گه‌له‌ك جوداتره ژ یا ساڕ بۆ پاككرنا پیستى، ل گه‌ل جۆرێن دیتۆلا له‌شى.
ره‌وشه‌نبیریا پاراستنا ئاڤێ و راسپاردنا مێهڤانێن مه‌له‌ڤانگه‌هان دڤێت ژ دل بهێنه راسپارده‌كرن كو ئاڤێ پیس نه‌كه‌ن، چونكو جڤاكێ رۆژهه‌لاتى هه‌مى دزانن بۆ ڤان كریاران دبێ باوه‌رن!.
ژلایه‌كێ دى ڤه، ژبلى باشیێن كلۆرێ زیانێن وێ ژى ل سه‌ر چاڤان هه‌نه و حه‌ساسیێن له‌شى و وه‌راندنا پرچێ، دڤێن به‌رچاڤك بهێنه بكارئینان و كابا سه‌رى بهێنه بكارئینان، هه‌روه‌سا پشتى ژ سه‌رشوویێن ساۆنا و هه‌لمێ ده‌ردكه‌ڤن بچنه بن دۆشى كو ئه‌و خوه و ئه‌ره‌ق و دوهن ژ له‌شى پاك ببن و جاره‌كا دى نه‌به‌نه د ئاڤا گشتى دا، نها دبیت مه‌له‌ڤانگه‌ه هزر بكه‌ن ئه‌م یێن ل به‌رژه‌وه‌ندیا وان دده‌ین یان زیانێ ل رزقێ وان دكه‌ین، به‌لێ بلا ئه‌و هزر كه‌ن كورێن وان ژى هه‌ر رۆژه‌كێ دێ بنه مێهڤانێن مه‌له‌ڤانگه‌هێن وان، هینگى دێ ڤێ مژارێ ژ دل وه‌رگرن، چونكو ئه‌و ژى دهاریكارن ل گه‌ل تیمێن فه‌رمى یێن ساخله‌میێ و لایه‌نێن په‌یوه‌ندیدار.
ل ڤێره دو رێیێن گرنگ هه‌نه بهێنه بكارئینان، گوهارتنا ئاڤێ به‌رده‌وام و یا دى ژى ره‌وشه‌نبیركرنا خه‌لكى ب رێیا هشیاریا سازیێن ساخله‌میێ و لایه‌نێن فه‌رمى، هینگى دێ مفایه‌كێ باش ژ ئاڤێ و وه‌رزشێ وه‌رگین تایبه‌ت بۆ چاره‌سه‌ریێن سروشتى یێن گه‌هان و نه‌خۆشیێن دۆمدرێژ و ل دووماهیێ ژى، ئه‌ز ب خێر و مه‌له‌ڤان ب سلامه‌ت!!.
پاراستنا ژینگه‌ها حزبى!
شێرزاد نایف
(پیسبوونا ژینگه‌هێ گه‌فه‌كا نێزیكه ل سه‌ر تێكچوونا گه‌شتوگوزارێ و د ئه‌نجامدا ژى زیان گه‌هاندنا ئابوورى یه)
هه‌روه‌كو ژینگه‌هێ خوه ل مه نه‌كره خودان، ئه‌ڤه هنده ساله ئه‌م سروود و درووشمان ب ژینگه‌هپارێزیێ دبێژین ـ به‌لێ هه‌ر كه‌سه‌ك د چارچووڤێ لایه‌نێ خوه یێ حزبى دا!، قۆپكێ جگارێ ناهاڤێژینه ئه‌ردى، بۆ قۆدیكه‌كا پێپسیێ كو ژ ترومبێلان دهاڤێژن دكه‌ینه گرى، راسپارده‌یێن چاندنا شتلان ژ باژێرڤانیان ده‌ركه‌فتینه بۆ هه‌ڤوه‌لاتیێن هه‌ر كه‌سێ خانیه‌كى ئاڤاكه‌ت، یێ داره‌كێ ل به‌ر ده‌رگه‌هێ خوه نه‌چینیت، ته‌ئمیناتێن وى بۆ نازڤرن ژ به‌نكێ!. به‌لێ هێدى و ژ نشكه‌كێ ڤه، باژارێ مه یێ ب ناڤێ جوانیێ دهێته بناڤكرن، ده‌ردكه‌ڤیت پیسترین باژار؟!. چ راستیه‌كا ته‌كه‌زكری بۆ ڤێ مژارێ هه‌بیت یان نه؟! سه‌ربۆره‌كا مفاداره بۆ پتر جه‌ختبوون ل سه‌ر پاراستنا ژینگه‌ها مه یا گشتى گرێداى مرۆڤاتیێ، مینا په‌ندا دبێژیت (هه‌تا پیس نه‌بیت پاقژ نابیت!) ئه‌ڤه كابینا نه‌هێ هات ب فۆكسه‌كا هوور و دوورخستنا مه‌رامێن حزبی، ئه‌ڤه ئێكه ب كریار ژى هاتیه خۆیاكرن، یا دلخۆش بوو كو ده‌ملده‌ست حوكمه‌تێ ئه‌و پالاوگه‌هێن ژینگه‌ه پیسدكر دكارێ وان راوه‌ستاند و ل گازیا میدیایێ چوو، چونكو سه‌رێ هه‌رمى گه‌نج وخه‌مخۆرێ ڤى جیلى یه، د ناڤا جڤاكى دا و خه‌م و گله‌یێن هه‌ڤوه‌لاتیان د خۆله‌كان دا دگه‌هنێ، ئه‌ڤ راستیه ژى نه‌كو سه‌رئێكزێده‌كرن بیت ل هه‌مبه‌رى كابینه‌یا بۆری دا، چونكو ره‌وش هاته ڤه‌گوهاستن بۆ قووناغه‌كا دى، ب ئعتیباراتێن بابه‌تیانه هه‌ر روودانه‌كێ ژى سوحبه‌تا خوه هه‌یه!!. له‌ورا گرنگه سازیێن نێزیكى هه‌ڤالینیا ژینگه‌هێ ژ قه‌رقۆدێ به‌رته‌نگێ حزبى ده‌ربكه‌ڤن، به‌رێ خوه ده‌نه مسۆگه‌ركرنا پاشه‌رۆژا ژینگه‌ها كوڕ و نه‌ڤیێن خوه، و پاراستنا ژینگه‌هێ دڤێت ل هنداڤى ئاڤاهیێ سازیێن حزباتى به‌رفره‌هتر لێبهێت، هه‌مى خوه بكه‌نه خودان ل پاراستنا ژینگه‌هێ، چونكو ئه‌ڤ خه‌مساریا مه‌زن نه‌تنێ ل سنۆرێن هه‌رێماتیك یا هه‌ی و پاراستنا ژینگه‌هێ ل سه‌ر ئاستێ جیهانێ یا ل سه‌ر ئاستێن مه‌زنه، هه‌كه نه ئه‌ڤ شه‌ڕ و شه‌ماته یێن دهێنه‌كرن كه‌س ژ دل خوه لێ ناكه‌ت خودان هه‌ما ب تنێ جاران راپۆرتێن تلفزیۆنى دهێنه وه‌شاندن!
مژارا ئازراندنا پیسبوونا ژینگه‌ها مه و تایبه‌ت ل پارێزگه‌ها دهۆكێ كو ژێده‌ر به‌لاڤه‌بوونا وێنه‌یێن دیاركرنا جهێن پیس ل سه‌رنه‌خشه‌یا جیهانى ئاژانسا ناسا یه، چما ناكه‌ته به‌رنامه‌كێ جیهانى؟ چونكو ژینگه‌هێ ژى سنۆرێن خوه نینن، كه‌س مایێ خوه تێنه‌كه‌ت، ئه‌و خه‌مساری و خاپاندنا ل ئه‌سمانێ مه هاتیه كرن ژى، دڤێت بهێته گه‌لاله‌كرن، ئه‌رێ یا بێده‌ستى بوویه و خوه تێنه‌گه‌هاندنه یان ژى مه‌ره‌مه‌كا دى یه؟. چونكو گه‌فه‌كا مه‌زنه ل سه‌ر ژبلى ژیان و گیانا هه‌ڤوه‌لاتیان و ده‌ڤه‌رێ و ناڤوده‌نگیا كورد و كوردستانێ! هه‌ر دیسا گه‌فه‌كا نێزیكه ل سه‌ر تێكچوونا بیاڤێ گه‌شتوگوزارى و د ئه‌نجامدا ژى زیان گه‌هاندنا ئابوورێ هه‌رێمێ. ئه‌ڤجا ماده‌م جه‌نابێ سه‌رۆكێ هه‌رێما كوردستانێ چاندنا دارێ وه‌كو ئه‌مانه‌ت راده‌ستى سه‌رۆك وه‌زیرێن هه‌رێمێ كری و ئه‌وى ژى هه‌مان به‌رسڤ ب چاندنا دارێ كری بوویه بابه‌ته‌كێ گرنگ بۆ رایا جه‌ماوه‌رى و ره‌وشه‌نبیریا پاراستنا ژینگه‌هێ، و هه‌مى سازیێن هه‌رێمێ ژى ئه‌ڤ هه‌وه ب سه‌رگه‌رمى جێبه‌جێكرى؟ مانه گونه‌هه‌كه و غه‌دره‌كه ل سه‌روه‌ریا هه‌رێمێ دهێته‌كرن؟، ل ڤێره گله‌ی دكه‌ڤیته سه‌ر لایه‌نێن ژینگه‌هێ دپارێزن، كا چاوا ئه‌ڤ مژاره ل سه‌ر را ده‌بازبوویه؟! و كانێ چ بكه‌ت و چاره‌سه‌ری چیه؟! دڤێت پاراستنا هه‌نێ ژى یا دروست بیت، نه‌ك ل بن به‌رژه‌وه‌ندیێن كه‌سۆكى و حزبی بیت خزمه‌تكرنا گشتى ل به‌ر پیان تێبچیت!!
نيشاندان
WP Facebook Auto Publish Powered By : XYZScripts.com