شێرزاد نایف
ئه‌ڤان چه‌ند سالێن دووماهیێ گه‌له‌ك سه‌ربۆرێن ته‌حل و تیژ ب سه‌ر هه‌رێما كوردستانێ و ده‌ڤه‌رێ دا هاتن، چاره‌نڤیسێ مه خسته د بازنه‌كێ به‌رته‌نگ دا، هه‌ڤوه‌لاتیێن مه تووشى ڤه‌جنقینیێن مه‌زن بوون، سه‌رێن رێیا ل به‌ر مه و خوه سه‌ركردایه‌تیێن مه ژى به‌رزه‌بوون، راسته هه‌ره‌شه به‌هرا پتر د سیاسى بوون و پشتى هینگى بوونه سه‌ربازى و تیرۆرى و ئابوورى و جاره‌كا دن ژى بوونه سیاسى و خودێ دزانیت دێ ب شێوازێن دیتر هێرشان ئیننه وه‌لاتێ مه؟! ئارمانج ژى هه‌ر ژناڤبرنا ئه‌زمۆنا مه و هێما و پیرۆزى و سه‌رانێن مه ژى!، بۆ ڤه‌خواندن و پێرابوونێن خوه‌به‌رهه‌ڤكرنێ بۆ ده‌مێن پێشدا دڤێت ل ده‌ستپێكێ د سێ بیاڤان دا بیت، ئێك یا سیاسى و په‌یوه‌ندیین موكم و راست و ب هێز و بده‌ستخستنا هه‌ڤپه‌یمانێن مه‌زن، سه‌ره‌راى هندێ كو ئه‌م خاپاندینه و میناك ژى ئه‌مریكا، ئه‌ز نه ل گه‌ل هندێ مه، خه‌لكه‌ك وه‌سا باش دبینیت، هه‌ڤدژیا ئه‌مریكا و هه‌ر وه‌سا توركیا و ئیرانێ ژى، چونكو ئه‌م پێدڤى ب دۆستینیێ ینه، پتر ژ هندێ كو دوژمنان زێده بكه‌ین، به‌رژه‌وه‌ندیێن سیاسى خوه ل ڤان مژاران ناكه‌نه خودان!! ئه‌ڤه وه‌كو پوخته‌ك، ژلایێ دی ڤه ژى بیاڤێ ئابوورى و داهاتى و به‌لانسا بۆدجه‌یا حوكمه‌تێ و په‌یوه‌ندی ل گه‌ل به‌غدا و مگرتیێن دابڕینا به‌هره‌یێن مه ژ داهاتێ گشتى یێ عیراقێ، و سیاسه‌تێن زڤریێن هه‌رده‌م ل هه‌مبه‌رى مه دهێنه ئاراسته‌كرن، سه‌ره‌راى دستوورى و مافێن هه‌رێما كوردستانێ د ناڤدا، كو ده‌ستهه‌لاتا هه‌رێمێ و ل سه‌رێ وێ ژى سه‌رۆك مسعود بارزانى خودانێ به‌هرا شێرى یه د دستڤه‌ئینانا ڤان مافێن د ناڤ دستوورێ عیراقێ دا هاتیه تۆماركرن ب له‌په‌كێ ئاسنى، ژبه‌ر هاریكاریا ره‌وشا هینگى یا عیراقێ، سه‌ركه‌فتنه‌كا مه‌زن بوو بۆ گه‌لێ كورد د دیرۆكا خوه دا، به‌لێ به‌ره به‌ره هه‌ڤدژێن كیانێ كوردى ب هه‌مى رێیه‌كێ یێن دهێن ده‌ستێوه‌ردانێ د (شاسیێ) عیراقێ ـ بلا بیت ـ دا دكه‌ن، ئه‌ڤرۆ ژى ئارمانجا خوه كریه ئه‌و دستوور كو لێبده‌ن و به‌رتر بكه‌ن، ئه‌ڤه ژى نه یا ب ساناهى یه، چونكو هه‌ر تشتێ ب زه‌حمه‌ت هاتبیت و بهایێ وى یێ گران بیت، ب زه‌حمه‌ت ژى دێ ژ ده‌ست چیت، یا گرنگ ئه‌وه، د وارێ سه‌ربازى دا هاتنه هه‌رێمێ ب گه‌له‌ك رێ و شێوازان، ب ئاشكرایى و ب نهێنى، لێ نه‌شیان بشكێنن، تایبه‌ت د ڤى وارى دا، كو ئه‌و پتر مژارا مه‌یه، ئێدى ب تنێ هه‌بوونا ناڤێ پێشمه‌رگه‌ى، به‌ربه‌رست و (رادعه‌كێ) مه‌زنه ل به‌رسینگێ هه‌مى دوژمنان، كو ب ساناهى نه‌كارن هێرش بكه‌نه، سه‌ر ئه‌ردێن هه‌رێمێ، دبیت خه‌لكه‌ك بپرسیت و هزر بكه‌ت، ئه‌ڤه گه‌له‌ك مه‌زنكرنه یان مبالغه یه، له‌شكره‌كێ هندێ مه‌زن مینا وه‌لاتێ توركیا و هه‌رێمه‌كا بچووك ناهێنه به‌راوردكرن؟! دبیژین ئه‌ڤه نه‌ك مه‌رجه، هێز ناهێته پیڤان ب قه‌ربارێن رووبه‌رى یان هه‌ژمارا مرۆڤان، وله‌شكرێن خوه‌به‌خش یێن شۆرشگێر و خوه‌به‌خش، زۆر د مه‌ترسیدارن ل به‌رامبه‌ر یێن نۆرمال، دكارم بێژم ئه‌و هێرشێن چه‌كدارێن رێخراوا تیرۆرستى یا داعش، ژ فاكته‌ره‌كێ ته‌عبه‌وه‌ى سه‌ربازى تێدا هه‌بوو، دبێژنێ (هجمات جس) واته، لێدانا هێزه‌كێ ب تنێ بۆ زانینا قه‌بارێ وێ و ره‌نگڤه‌دان و سه‌نگا وێ، وان دیت ژى به‌رگریكرنا پێشمه‌رگه‌ى چه‌ندا ب زیان بوو ل سه‌ر چه‌كدارێن داعشێ، نه‌مازه پشتى هینگى ژى ئه‌و هێرشا ئێك رۆژى یا زۆرا مه‌زن ب باراندنا ئاگرى ل پردێ و سحێلا ل سه‌ر سه‌رێ پێشمه‌رگه‌ى، كو بهێن هه‌رێمێ و حوكمه‌تا وێ و سه‌ربۆرا وێ ژناڤببه‌ن، به‌لێ هه‌ر وان دیت كو پێشمه‌رگه‌ى شه‌ڕێ مانونه‌مانێ ل گه‌ل دكر، ئه‌ڤجا هه‌میان زانى ئه‌نجام و ره‌نگڤه‌دان چ بوون، ئێدێ مه‌رامێن سیاسى ته‌ڤلى ناڤا یێن سه‌ربازى كرن و ئه‌وبوو ل تێلا هه‌ستیار دان، و زانینیا خالێن لاواز چنه د ناڤ هێزا پێشمه‌رگه‌ى دا، و ئه‌و بوو ب رێیا حزبه‌كێ ئه‌و گرۆپا لایه‌ندارى ئیرانێ چاوا ئه‌و بۆیه‌را ئوكتۆبه‌رێ هاتیه دى یا كو نه‌ڤێت ل ڤێره نه‌مایش بكه‌ینه‌ڤه، ئه‌ڤجا هه‌تا نها ژى كو ده‌مێ نڤیسینا ڤێ گۆتارێ ژى، ئه‌ڤ هه‌وا هێرشكرنێ ب هه‌مى ره‌نگان یا به‌رده‌وامه به‌لێ ب گه‌له‌ك شێوه‌یان، دڤێت دهشیاربین ستسى و خه‌مساریێ د هه‌مى كاروبارێن خوه دا نه‌كه‌ین، كو كه‌یسا خوه ل مه بگرن.
ئه‌ڤجا ئه‌ڤ كه‌یسێن كو ژ نشكان ڤه‌بهێنه سه‌ر هه‌رێما مه یا كوردستانێ، دوور نینه د نه‌رم و نیان بن، وه‌سا مه بكوژن كو ئه‌م هه‌ست پێ نه‌كه‌ین، ئه‌ڤه ژى هه‌مى دچنه د خانه‌یا ئاسایشا نه‌ته‌وى دا و ئه‌و بیاڤێن بخوه‌ڤه دگریت، دكه‌ڤنه سه‌ر شانێن ده‌ستهه‌لاتا مه یا نوو، بزانیت چاوا و كه‌نگى خالان بدانیته سه‌ر په‌یڤان، سازیێن ئه‌وله‌هى هێشتا خوه ژ ناڤئێك بینیته ده‌ر، بۆ پاراستنا گیانێن هه‌ڤوه‌لاتیان!!. دمینیته وێرێ پلانا سه‌ربازى یا ژیر و چاوانیا رێكخستنا پێشمه‌رگه‌ى ب له‌شكره‌كێ ئێكگرتى و پیشه‌یى، دوور ژ حزب و حزبانێ، چونكو مه دیسا ئه‌نجامێن مایتێكرنێن حزبی د ناڤ هێزێن پێشمه‌رگه‌ى دا، ل كه‌ركووكێ چو هاته روودان، و بۆچى پێشمه‌رگه تووشى نسكۆیێ بوون، ما كێ دیتیه سه‌رباز بكه‌ته گرى، قاره‌مان رۆندكان ببارینن ژ به‌ر مخابنیا ب وێ ژده‌ستدانێ ببه‌ن؟! ژ به‌ر مایتێچوونا حزبی د ناڤ فه‌رمانێن رێزێن له‌شكرى دا، نه‌بوونا له‌شكره‌كێ ئێكگرتى و رێخستى، ده‌ستێ سیاسه‌تێن هه‌رێماتیك گه‌هشتنێ و ب رێیا حزبان ده‌مێ پێشمه‌رگه ڤه‌كێشای ژ كه‌ركووكێ و ده‌وروبه‌ران، چونكو هینگى هێزا پێشمه‌رگه‌ى د هه‌لویسته‌كێ بێوێنه دا بوون یێ سه‌ركه‌فتى بوو ل سه‌ر هێزا رێخستى یا داعش، وه‌ره دبه‌رز بوون، سه‌نگه‌رێن ئاسێ د دانایى بوون، چه‌كێ دوهنداى بوو، چه‌كێن دژى تانكان د به‌رهه‌ڤ بوون، سه‌روبه‌رێ به‌رگریكرنێ یێ ئه‌كتیڤ بوو، چو له‌شكر نه دشیان نێزیك سنۆران ببن، پلان ژى ئه‌و بوو ب رێككه‌فتن و سازان پێشمه‌رگه بهێته ڤه‌كێشان ژ وان ده‌ڤه‌رێن د ده‌ستێن وى دا، پشتى ب خوین و ئاگرى و ئاسنى ستاندین، كه‌یسا خوه ل وێ قووناغا به‌رته‌نگ گرت، كو پێشمه‌رگه مژوولێ لڤینا ڤه‌گوهاستنێ بوون، رابوون هه‌ر هینگى هێرشا خوه ئینان و دربێن خوه داوه‌شاندنه پێشمه‌رگێ هێشتا سه‌نگه‌ره‌ك نه‌كۆلای، هێشتا لێنانگه‌ها خوه نه دانابوو، كره بارانا ئاگری، ئه‌ڤه ژى مه‌زنترین خیانه‌ته و خاپاندنه، تو ببینى هێشتا بنگه‌هێن حزبا سه‌رۆك وه‌زیرێن هینگى حه‌یده‌رى ئه‌لعه‌بادى، ل باژێرێن مه‌بوو، و له‌شكرێ خوه یێ حه‌شدا شه‌عبی ئینایه سه‌ر سنۆرێن مه ب نیازا شكاندنا هیبه‌تا مه، به‌لێ به‌رسڤدان یا چاوابوو و چاوا زڤرینه‌ڤه جهێن خوه؟!، ب هه‌مى ره‌نگان ب نه‌رمى و تیژى هاتنه هه‌رێمێ، به‌لێ به‌رسڤدان ژى ژلایێ حوكمه‌تا مه‌ڤه، یا نه‌رم بوو به‌لێ پشتى گه‌له‌ك ره‌وش كه‌فتیه د ته‌قه‌له‌قێ دا و خه‌لك بێزار بووى و چه‌ندین قوربانى یێن گیانى و ده‌ستكه‌فت مه‌داین، مه‌ترسى یا دژوار بوو، له‌ورا بۆ مه گه‌له‌ك راستى دیاربوون، پشتى مه‌ترسیا سه‌ربازى ب دو ئاراسته‌یان ڤه هاتى ب گه‌فێن داعشێ و هه‌ر وه‌سا یا هێرشا عیراقى یا حه‌شدێ، و پشتى هینگى یا نه‌راسته‌وخوه یا توركیا ل سه‌ر رۆژئاڤا و گه‌فێن وێ بۆ باشۆر ژى، بۆ مه خۆیا بوو كو د ڤى بیاڤى دا، ئه‌م هێزا خوه یا پێشمه‌رگه‌ى باشتر و قاهیمتر بكه‌ین، دا ئه‌و هه‌لویسێن ژنشكان ڤه ب سه‌ر مه دا نه‌هێنه‌ڤه، ئه‌م وان شاشیێن خوه پاشگوه ڤه نه‌هاڤێژین، به‌لكو بۆ خوه بكه‌ینه وانه و سه‌ربۆر، تایبه‌ت د ناڤ سازیا پێشمه‌رگه‌ى دا، ئه‌و مژوول بوون ب خۆشیان و ره‌فاهیه‌تێ ڤه رابكه‌ین د ناڤ خوه دا و مه‌شق و راهێنان د به‌رده‌وام بن، خه‌م ژێ بهێته خوارن، راسته مه‌زاختنه، به‌لێ بلا نه‌مه‌ردی بهێته كرن هه‌مبه‌رى وه‌زاره‌تا پێشمه‌رگه‌ى. هه‌ردو یه‌كه‌یێن حزبی ببنه ئێك له‌شكر یێ رێكوپێك و ئه‌فسه‌رێن ئه‌كادیمى سه‌رپه‌رشیتیێ ل سه‌ر بكه‌ن، چونكو ب راستى سیسته‌مێ نها گه‌له‌كێ بێسه‌روبه‌ره، گه‌هشتیه وى راده‌ى سه‌ربازێ ژ هه‌میان ساده‌تر فه‌رمانا ل ئه‌فسه‌رێن مه‌زن دكه‌ن، چونكو یێ ب پشته دناڤ له‌شكرى ب خوه‌دا، ب حوكمێ زالبوونا عه‌شیره‌تیێ دناڤ رێزێن له‌شكرى دا، ئێدى ئه‌و ده‌سپلینا پیشه‌ی یا گرنگ بۆ ناڤ گه‌هێن ڤێ سازیا هه‌ستیار ژێكژێك كریه، و ئه‌فسه‌رێ خوه‌دان بریار نه‌چار بوویه راده‌ستى ڤى ژیوارێ وێرانكار ببیت، قانوون و یه‌كسانیێ د ناڤ هێزێن له‌شكرى دا یا بوویه كه‌س و ل دووڤ گێولێ خوه بریاران دده‌ن و چو رێیێن رۆتینى و فه‌رمى نینن، خوه جڤاتێن ڤه‌كۆلینان بهێنه دروستكرن، بووینه به‌رژه‌وه‌ندى و گه‌نده‌لى. ژبلى ئه‌ڤێ هه‌میێ پیشه‌یى و زانینا زانستێ شه‌ڕى د ناڤ تاكێن پێشمه‌رگه‌ى دا هه‌ر نه‌بوویه، له‌ورا ژى هند تووشى زیانان و ژده‌ستدانا گیانان بووینه، تایبه‌ت ڤى شه‌ڕێ داعش بۆ مه دیاربووكو (پیشه‌یا مه‌یدان) یا كێم بوو ژ زانستێ شه‌رڤانێن مه، گرنگى پێ بهێته‌دان.
هه‌بوونا گه‌له‌ك پاچێن هێزێن ژێكجودا، كه‌س ب فه‌رمانا كه‌سێ نینه وزنجیره‌كرنا وان نینه، هه‌لبه‌ت دێ شاشى هه‌بن و په‌یوه‌ندى و هه‌ماهه‌نگى دێ بیته مه‌ترسى ل دژى وان بخوه، ئالیه‌ته‌كا هه‌ڤپشك نینه، هه‌كه هه‌بیت ژى هه‌ما وه‌كو روخسار بوویه، وكه‌س نه‌شێت رێكبێخیت، هه‌ر ئێكى بۆدجا وى ژ یا یێ دى جوداتر ب جوداهیا ئه‌رد و ئه‌سمانان، هێزێن سه‌ر ب وه‌زاره‌تا عیراقێ ڤه ئمتیازاتێن وان دفۆلن مووچه د فۆلن، ژڤانێن مه‌زاختنێ، پارچێن ئه‌ردى، پله‌به‌رزكرن ئێك خۆله‌ك ب سه‌ر ڤه ناچن، یێن مه دگه‌هنه سێ چار سالان واته روتبه‌ك دێ ده‌مێ وێ خلاس بیت هێشتا نه‌هاتى، دێ بینى یێن زێره‌ڤانیێ دوجارى ژ یێن یه‌كه‌یێن هه‌ڤپشك باشترن، ئه‌و ژى ژى یه‌كه‌یێن 70 و 80 باشترن، ده‌رمالێن خێزانى و مه‌ترسیێ نینن، ئه‌ڤه 20 سال چوو هێشتا، ئه‌ڤ ئاریشه چاره‌سه‌ر نه‌بوون، چه‌ك ب دورستى ناهێته دان، دێ بینى ئه‌فسه‌ره‌كێ مه‌سله‌كى ل پێشیا به‌ره‌ى بێ چه‌ك و ته‌قه‌مه‌نى یه، بۆ نینه به‌لێ بۆ هنده‌ك شۆلێن بێشۆل، ده‌بانجه دبنه دیارى ژلایێ هنده‌ك به‌رپرسان ڤه، و كه‌س نه‌كاریت بپه‌یڤیت!. بۆ نموونه هه‌بوونا نایلۆنه‌كى ب بهایێ پێنچ هزار دیناران دێ پێشمه‌رگێ ساده پارێزیت ژ بارانێ و سه‌رمایێ ل شوونا كڕینا تشته‌كێ رۆخسارى!، دێ سۆزا ده‌نێ و چ بۆ ناكه‌ن چونكو بۆچى؟.! كیانێ دورست یێ سه‌ربازى نینه، ربێزگرتنا لیكگوهارتى نینه، یاكو دبێژنێ ده‌سپلین، یان دێ هێلن برسى، ژ به‌ر ته‌مایى د پاره‌یى دا، دلێ وان دێ ره‌ش بیت، دێ په‌نایێ به‌نه دزیێ یان خواستنێ یان كاره‌كێ یاخیبۆى، چونكو نكاریت باخڤیت هه‌ر تشتێ گۆت دێ ل رێ لێ گرن، ناهێلن بگه‌هیته فه‌رماندێ سه‌رى كو گازندا خوه بگه‌هینتێ.. هه‌كه ئه‌م وه‌ل سه‌ربازى نه‌كه‌ین حه‌زژ ئه‌ركێ خوه بكه‌ت، ئه‌و به‌رگریێ ژى ژ دل بۆ نه ناكه‌ت، هه‌رنه د ناڤ پێشمه‌رگه‌ى دا و بمینن ل گه‌ل حه‌تا ئێڤارى و ژ نێَزیك ئاریشێن وان بزانن، هینگى دێ خۆشتڤیاتى ژى په‌یدا بیت، و حه‌زژێكرنا وه‌لاتى.
هه‌كه ئه‌م سه‌ربۆرا وه‌لاتێ سویسرا بهینینه هۆلێ و ل سه‌ر بسه‌پینین، كا چه‌ند خالێن وه‌كهه‌ڤ هه‌نه د ناڤبه‌ر هه‌رێما كوردستانێ و سۆیسرا دا! دێ كارین بینه وه‌لاته‌ك كه‌س نه‌شێت چو گه‌فان ژى ل مه بكه‌ت، چونكوچو ژ مه نه‌یێ كێمه، ب رووبه‌رى و هه‌روه‌سا ب سه‌رژمێریا جهنشینیان،
سویسرا ئه‌و وه‌لاتێ كه‌س نه‌وێرین هێرش بكه‌ته سه‌ر؟ هه‌ر چه‌نده له‌شكرێ وێ یێ بچووكه و كه‌س نه‌وێریت خوه لێ بده‌ت؟! هه‌مى جۆرێن چه‌كى هه‌نه، هه‌مى هه‌ڤوه‌لاتیێن وێ دمه‌شقداینه ل سه‌ر چه‌كى وه‌كو یێن مه و ده‌مێ دبیته به‌رته‌نگى عمباریچن چه‌كى ڤه‌دبن و هه‌مى هه‌ڤوه‌لاتى دبنه له‌شكره‌كێ بیروباوه‌ر، ئه‌ڤه 500 ساله تووشى چو گه‌فان نه‌بوویى، خوه هیتله‌ر نه‌وێریا خوه لێبده‌ت، چونكو هه‌مى سه‌ركرده و له‌شكر و ده‌وله‌ت ب ساناهى گیانێ سه‌ربازێن خوه ب ساناهى تووش ناكه‌ن، بیرا من دهێت، جاره‌كێ سه‌رۆك ئه‌ركانێن له‌شكرێ توركیا گۆت، پاراستنا گیانێ ئێك سه‌ربازێ تورك ل سه‌ر حوكمه‌تا توركیا گرنگتره ژ مه‌زاختنا گۆژمێن مه‌زن یێن پاره‌یى.!. مه ژى ئه‌ڤرۆ بۆ جیهانێ هه‌میێ خۆیاكر كو ئه‌م ئه‌و شه‌رڤانین كه‌س نكاریت وه‌لاتێ مه داگیر بكه‌ت، پلانا ستراتیجى یا سۆیسرا یا كو ئه‌م به‌حس ژێ دكه‌ین، ئه‌وان ل باژارێن خوه تۆنێل و په‌ناگه‌هێن ناڤۆكى هه‌نه، عومبارێن چه‌كى و بنگه‌هێن تۆپخانه و مۆشه‌كان یێن ئاسێ هه‌ر ژ جنێڤ هه‌تا دگه‌هیته داڤۆس، هه‌روه‌سا ژى ژ زیۆرخێ هه‌تا لۆگانۆ، ل هه‌مان ده‌مى كادرێ وێ یێ نیزامى یێ سه‌ربازى نه‌ه هزار كه‌سن، پتریا وان ل ناڤ هێزا ئه‌سمانى دانه، به‌لێ یێن د ناڤ ئه‌وێن خزمه‌تا سه‌ربازى دكه‌ن ل ژێر مه‌شقێ دانه 10 ـ 15هزار سه‌ربازن، وه‌كو ژێده‌ر دیار دكه‌ن. هه‌روه‌كو مه ئه‌فسه‌رێن وان پترن ژ سه‌ربازان، هێزا یه‌ده‌ك هه‌یه. ل ده‌مێ دبیته ئاماده‌باشى یان به‌رته‌نگى یان گه‌فه‌ك هه‌مى دبیته ئێك پارچه. واته ملله‌ته‌كێ زانا دبیاڤێ شه‌ركرنێ دا. یێن دچنه د خزمه‌تێ دا بۆ ده‌مێ 90 رۆژان دهێنه مه‌شقدان و خه‌مسارى نینه وه‌كو ل ده‌ف مه ئاساناكارى هه‌یین، پشتى ده‌ردچن هه‌ر تاكه‌كى چه‌كه‌كى دده‌نێ چو ده‌بانجه بیت یان تڤه‌نگ ل گه‌ل دوساجۆرێن پرى فیشه‌ك، نه‌ك مینا ل ده‌ف مه، بۆ خوه بكڕه یا ندێ ئه‌فسه‌ر خانه‌نشیت بین هێشتا چه‌ك نینه، میناك ژى دزۆرن!، هه‌ردیسا ئه‌و سێ ده‌ستێن جلكێن له‌شكرى دده‌نێ ل گه‌ل هه‌مى وه‌رزێن سالێ بگونجن، زێده‌بارى درعه‌كێ دژى فیشه‌كان و خۆزه‌كى ل مال دپارێزیت و چو پشكنین ژى نینن.
سه‌ربازێ وان یێ یه‌ده‌ك سێ پۆلینكرنان ب گۆرى ژیێ وان دا دبۆرن، و ئه‌رك وه‌سا ل سه‌ر دهێنه پارڤه‌كرن، هه‌كه ل ده‌ف مه ژى خزمه‌تا سه‌ربازى هه‌بیت بۆ قوتابیێن تازه ده‌ردچن، نابنه بارگرانى ژى نه‌ك ل سه‌ر هه‌رێمێ و نه‌ژى ل سه‌ر خێزانێن خوه، گازندا بێكاریێ ژى دێ ب رێژه‌كا باش بێده‌نگ بیت و دێ وه‌كو خوه په‌روه‌رده كه‌ى و ره‌وشته‌كێ جوان ژى پێشكێش كه‌ت، هه‌ر دیسا هێزه‌كا یه‌ده‌ك بۆ گه‌له‌ك ئه‌ركان دێ مفایى ژێ بینین، و ده‌رباره‌ى ره‌گه‌زێ مێیان ژى ل سۆیسرا ئه‌و دخۆبه‌خشن.
ده‌ربارى مژارا ئابوورى و بۆدجێ ژى ب به‌راوردى، سۆیسرا ژ هه‌شت ملیۆن مرۆڤان نابۆریت، و بۆجا وێ یا سه‌ربازى چه‌ند ملیار دۆلارانه، ب سیسته‌مه‌كێ زه‌لال برێڤه‌دبه‌ن، وه‌زاره‌تا پێشمه‌رگه‌ى دكاریت ڤى ره‌نگه پرۆژه‌ى پێشكێشى په‌رله‌مانى بكه‌ت و ده‌نگدان ل سه‌ر بهێته‌كرن، و ئه‌زى پشتراستم ژى كو ئه‌وان ژ هه‌بوویه و كار ل سه‌ر دهێته كرن، به‌لێ ئاریشه هه‌ر ئه‌وه ده‌ستێوه‌ردانێن حزبی ب ئه‌جینده‌یێن ده‌ره‌كى یێن د ناڤ دا، له‌ورا ژى سازیێن له‌شكرى بۆ خوه د ره‌ڤن ژ ڤان پیلانێن ده‌ره‌كى. چونكو سازیا له‌شكرى بریارێ دده‌ت ل سه‌ر چاره‌نڤیسێ هه‌ر وه‌لاته‌كى.. ئه‌ڤجا مه هه‌ژمار هه‌یه، ئیراده‌كا ئاسنى هه‌یه، هه‌كه یا لازواز بوو، نها ژى هاته ئۆبدێتكرن، دڤێت ئه‌و دووڤچوون هه‌بیت، كانێ كى یێ هه‌ژى یه بۆ جهى هه‌ژى مفا ژ سه‌ربۆران بهێته وه‌رگرتن ب سیسته‌مه‌كێ ئه‌كادیمى و به‌حت و قانوونى. یه‌كسانى و وژدان سه‌روره بیت، نه‌ك ب تنێ سروودا هه‌میان بیت و ل سه‌ر ئه‌ردێ ژیوارى ژى چو دیار نه‌بیت، ئه‌م دكارین مفای ژى پرۆتۆكۆلێن دوله‌تى ژى ببینین. و مه دیتیه ژى به‌لێ دمینیت ئه‌م خوه رێكبێخین، ئێكبوونا سه‌روبه‌رێ له‌شكرى مه‌رجه، بۆ نموونه هه‌ر نه‌مایشكرنه‌كا سه‌ربازى په‌یامه‌كا ب هێزه بۆ هه‌مى لایه‌نێن ره‌نگه گه‌ف ژێ بهێن، مه ژى هه‌مى فاكته‌ر هه‌نه، نه‌خاسمه هه‌كه یێ بهێز بیت و خوه‌به‌خش و خوه‌دى ئیراده‌كا مینا یا پێشمه‌رگێ شۆره‌شگێرێ كوردستانێ.
نووترين نووچه
- پێدڤییە د پرۆسەیا سیاسی یا سووریێ دا هەلوەستێ كوردی ئێك بیت
- سەرۆكێ حوكمەتا هەرێمێ هەموو وەزارەت راسپاردن ب لەز لیستا مووچەیێ مەها ئادارێ بەرهەڤ بكەن
- هنارتنا پەترۆلێ دێ كاریگەری ل سەر داهاتێ ئیراقێ و كوردستانێ هەبیت
- حزبا كۆمۆنیستا چینی: ب گرنگیڤە دنێڕینە پەیوەندیێن خوە ل گەل پارتی دیموكراتی كوردستان
- رێككەفتنا 11 ئادارێ بەرهەمێ خەباتا پێشمەرگەی و هەموو تەخ و چینێن كوردستانێ یە
- رێككەفتنا 11 ئادارێ نموونەیا چارەسەرییەكا دادپەروەرانە بوو ل سەر بنەمایێ تێكگەهشتنێ
- سەرۆكێ هەرێما كوردستانێ: پێشوازیێ ل رێككەفتنا د ناڤبەرا سەرۆكێ سووریێ و فەرماندەیێ هەسەدێ دا دكەین
- مەسرور بارزانی: پێدڤییە كێشەیێن هەولێرێ و بەغدایێ ب شێوەیەكێ بنەڕەتی بهێنە چارەسەكرن
- رێككەفتنا 11 ئادارێ دەستكەفتا خەبات و قوربانیدانا كوردستانییان و شۆڕەشا مەزن یا ئیلۆنێ بوو
- مەسرور بارزانی و مستەفا كازمی رەوشا گشتی یا ئیراقێ و دەڤەرێ گەنگەشە كر
شیرزاد نایف
دستوورێ عیراقى یان ڤێرژنێ كوردى؟!
شیرزاد نایف
هه‌روه‌كو ئه‌ڤه دووماهى بهانه‌یه و رێیه پێ شه‌رێ نه‌ته‌وه‌یا مه دهێته كرن، به‌رده‌وامیدانه ب وێ هێرشا ژ لایێ وان وه‌لاتان ڤه یێن كوردستان ل سه‌ر هاتیه پارچه‌كرن، هه‌لبه‌ت ئه‌و ده‌ستكه‌فتێن به‌هرا شێرى ب به‌ركه‌فتین ژى ئه‌ون یێن ل ڤێ پارچا كوردستانا باشۆر هاتینه دى، ژ ئه‌نجامێ گه‌له‌ك بارودۆخێن بابه‌تیانه، مه نه‌ڤیت ل ڤێره هه‌میێ ڤه‌بگێرین، به‌لێ ئه‌وا د دستوورێ نها عیراقێ دا هاتیه نیسابكرن، ژ دوو ئه‌گه‌ران بده‌ست مه‌كه‌فتینه، ئێك ئه‌و سته‌ما مه‌زن یا رژیمَا عیراقێ یا به‌عس ل ملله‌تێ مه‌كرى و ئه‌و پاشمیێن ژ ئه‌نجامى هاتین ب شه‌رێ كۆیتێ و یێ ئیرانێ و شه‌رێ كه‌نداڤى، هینگى هند مژارا فۆبیا كوردستانیبوونێ ل سه‌ر وه‌لاتان یا گه‌رم نه‌بوو مینا ئه‌ڤرۆ هاتیه ژبیركرن، نه‌مازه عیراق مه‌ترسیى و هه‌ره‌شه‌رك بوو ل سه‌ر وه‌لاتێن ده‌ورۆرى عیراقێ، ژ به‌ر سه‌رگه‌رمیا رژێمێ و كه‌سێ سه‌دم حسێن كه‌س نه‌دشیا مینا ئه‌ڤرۆ مایێ خوه د ده‌ڤه‌رێ بكه‌ت، ڤێجا چو ل عیراقێ یان سووریێ و لوبنان و خوه ده‌ستێ خوه دگه‌هانده فه‌له‌ستینێ ژى و لێدانا ته‌لئه‌بیێ ژلایێ سه‌دام ڤه ب مۆشه‌كان ژى وه‌كو گرۆڤه ل سه‌ر ڤێ گۆتنێ، ئه‌ڤه ژ لا یه‌كى ڤه, و خالا دویێ ئه‌وه رۆلێ سه‌ركرده‌یا كوردستانى و تایبه‌ت ژى زانینا سه‌رۆك مسعود بارزانى و هایداربوونا وى یا دێرین ل سه‌ر بۆیه‌رێ و شاهره‌زایا وى، شیا ب زۆر ل سه‌ر عیراقێ و ده‌سهه‌لاتا ئه‌مریكى ل عیراقێ كو هینگى بۆل برێمه‌ر بوو، كو جۆره‌كێ هه‌ژى ڤێ هه‌رێمێ د دناڤ به‌ندێن دستوورێ عیراقێ یێ نووكرى دا ب نیسابا قانوونى بكه‌ت، مینا به‌ندێ 140 و هنده‌كێن دیتر، هه‌ر دیسا ئاماژه ب ڤى رۆلى گوهارتنا ئالایێ عیراقێ هه‌ژ ژوێ زانینێ بوو، كو ل ده‌ستپێكێ عیراقیان ئه‌ڤه چه‌نده ب نه‌رازیبوون پێشوازیكرن، به‌لێ به‌ره به‌ره به‌رسڤا هه‌مى پرسیارێن وان دان و عیراقى و گه‌لێ عیراقێ نها شانازیێ ب وى ئالایى دبه‌ن یێ مسعود بارزانى بۆ وان نیگاركرى!!. هینگى ل ده‌مێ روخیانا رژێما به‌غدا ده‌ستهه‌لاتا كوردى گه‌له‌كا زال بوو و ب هێزبوو، چو هێزێن سیاسى و له‌شكرى نه‌بوون ل عیراقێ ژبلى یێن كوردى، و د شیان دا بوو ده‌ستهه‌لاتا به‌غدا ده‌سته‌سه‌ربكه‌ت، به‌لێ نه‌یا ره‌وا بوو، و ره‌هه‌ندێن وێ د هزرا مسعود بارزانى دا بوون، له‌ورا خواست ب رێیێن ره‌وا یێن دستوورى و قانوونى خواسته‌كێن كوردستانێ بده‌ستڤه بینیت، چونكو هه‌مى سازیێن عیراقێ و مه‌زنه سیاسه‌تمه‌دارێن ئوپۆزسیۆنا عیراقێ ل بن پاراستنا هێزێن كوردستانى دا بوون، پێشمه‌رگه‌ى پتریا سازیێن هه‌ستیار و یێن تازه دامه‌زراندى پاراستن و نه‌واته‌كا نوو بۆ عیراقێ و دستوورێ وێ دامه‌زراند و ڤێرژنه‌كێ نوو بۆ دستوورێ عیراقێ نه‌سب كر، هه‌ر چه‌نده وه‌كو راستڤه‌كرنه‌كێ بوو بۆ یێ كه‌ڤنار به‌لێ ئوبدێتكرن ل سه‌ر عیراقه‌كا دیمۆكراسى فیدرالى بوو، ئه‌ڤه دستووره سه‌ره‌راى پێشلكرنێ ژ لایێ هنده‌ك ژ بلا (راخیت و ماخیت) یێن هنده‌م ژ ده‌ستهه‌لاتدارێن پشتى جڤاتا حوكمرانیا عیراقى هاتینه هاته پێشێلكرن مینا مالكى و حه‌یده‌ر عه‌بادى و جه‌عفه‌رى ژى رێژه‌یه‌ك، چونكو ده‌ستێن ده‌ره‌كى گه‌هشتنێ و تایبه‌ت ئیران، ئه‌وبوو یا مه دیتى و ده‌مه‌كێ درێژ ب سه‌ر ڤه چووى ژ هه‌داركێشانا كوردى ل سه‌ر هه‌مى سۆزێن خاپاندى و جۆرێن خیانه‌تێ، ب هه‌مى رێیا هاتن بۆ ژناڤبرنا ئه‌زمۆنا هه‌رێما كوردستانێ كو ژناڤببه‌ن مینا بانه‌یێن مالكى ل كه‌ركووكێ و شه‌رێ داعش و ژلایه‌كى ڤه توركیا گه‌فێن وێ یێن جاران، و چێكرنا رێخراوا تیرۆرستى یا داعش وه‌كو هه‌سپێ تراواده بۆ هنارتنا مه‌ره‌ما خوه و پشتى شكاندنا وێ ژلایێ پێشمه‌رگه‌ى ڤه رابوون ب ئاشكراى هێرشكرنه سه‌ر ئه‌ردێ هه‌رێمێ ژ به‌ر پرۆسا ریفراندۆمێ یا ژ ئه‌گه‌رێ وێ بێهنته‌نگیێ ده‌ركه‌فتى، درێژناكه‌م ئه‌ڤرۆ ده‌سته‌كێ دیار یێ كه‌یسا خوه ل خوه‌نیشادانێن جه‌ماوه‌رێ عیراقێ دگرن و دخوازن ماسیان د ئاڤا شێلى دا بگرن، دخوازن ل شاصیێ وى دستوورى بده‌ن یێ پیچه‌كا هه‌ناسێ تێدا ب هیڤى كری و سه‌ره‌رارى نه‌جێبه‌جێكرنا وى ب دروستى هه‌تا ئه‌ڤرۆ، به‌لێ چونكو هه‌مى بهانه هاتینه بڕین بۆ نه‌ئه‌نجامدانا و هاتنا كه‌سه‌كێ عادل و ب ناڤێ عادل عبه‌دلمه‌هدى، كو وى ژى چو به‌ربه‌ستێن ره‌وا نه‌بن رێگریێ ل بجهئینانێ بكه‌ت، ئه‌ڤه هاته روودان یا رووداى، ئه‌ڤ شه‌ره ژى یێ به‌ر ب دووماهیێ ڤه دچیت و نه‌شیان ڤایرۆسێ خوه یێ كوژه‌ك بگه‌هیننه ناڤا گه‌وهه‌رێ دستوورى دا، هه‌مى پیلان ل دژى راستیێ و ئیراده‌تا ب هێز دێ ژناڤ چن وه‌كو ژناڤ چووین ژى و هه‌ر دێ ملله‌تێ كورد مینیت و هه‌ر دێ بسه‌ركه‌ڤیت نه‌ك ب ئاخفتن به‌لێ ب كریار و ئه‌وا ل سه‌رى مه سه‌لماند، به‌لێ په‌یڤینه‌كه ددانمه به‌ر سینگێ كور و نه‌ڤیێن مه ل به‌ره‌بابێن بهێن و دێ بینن! چونكو بنواشه یێ خورستى یه و به‌ره‌باب بۆبه‌ره‌بابی خورستیتره و ب هێزتره، له‌ورا یێ گه‌شبینم!!..
رۆلێ كوردان د شه‌رێ نۆرماندى دا!
شیرزاد نایف
ئه‌ڤ دیرۆكا هه‌نێ ل كیڤه بوو هند یا مه‌زن و مه نه دزانى؟!، و جامێرى ئه‌م هند مه‌زن كرین، كو ئه‌م شیاباین هاری ئه‌مریكا بكه‌ین به‌رى پترى نیڤ چه‌رخێ سالان، به‌لێ هه‌ر وه‌كو جه‌نابێ سه‌رۆك ترامب شاشیه‌كا بچووك د داخۆیانیا خوه دا كر، ده‌مێ به‌حسى ڤى رۆلێ كوردان یێ هند یێ مه‌زن كری، ژبلى هندێ كو كورد ل ده‌ڤه‌رێن چیایى بوون، دوور ژ ده‌ریایى و چو هێز و كه‌لوپه‌ل و پاپۆر نه‌بوون هه‌ر وه‌كو ئه‌ڤرۆ ژى نینن!!. كو بگه‌هنه وى جهى كو پشكداریێ تێدا بكه‌ن، زێده‌بارى نه‌كه‌فتنا جوگرافیا وێ ل سه‌ر چو ده‌ریێن ئاڤێ و كنارێن ده‌ریا و ئۆقیانووسان، ئه‌و ژى هه‌روه‌كو نڤیسه‌ره‌كێ ئه‌كادیمى یێ ئه‌نگلیز ژى وه‌كو من گۆتاره‌كا ب ڤى ره‌نگى د (تایمز) دا نڤیسیه و دبێژیت، كو ترامپ ئه‌و شاشى كربوو كو كوردان نه تنێ پشكدارى د شه‌رێ جیهانى یێ دویێ دا كربوو، مل ب ملێ هه‌ڤپه‌یمانێن دژى نازیان، به‌لكو پشكداریه‌كا نه‌راسته وخوه كربوو د سه‌رخستنا دابه‌زاندنا نۆرماندى دا!!.
هنده‌ك ژێده‌ر دبێژن شه‌رڤانێن كورد رۆله‌كێ سه‌ره‌كى گێرابوو سه‌رخستنا كۆنترۆلا شاهنشینا ئێكگرتى یا بریتانیا دا ل سه‌ر عیراقێ، هاری هێزێن بریتانى كربوو كو عیراق نه‌كه‌ڤیته ده‌ستێن هێزێن لایه‌نگیرى نازیان.
هینگى وه‌كو هێزێن هۆزه‌كى و خێله‌كى بوون، بریتانیا پشتبه‌ستن ل سه‌ر دكر وه‌كو نوونه‌رێن كێمینه و هنده‌ك ته‌خ و گرۆپێن تائیفى. ئێ هاتوچوو ئه‌و پشكدارى رێژه‌یا 25% بوو ژ وان هێزێن چه‌كدار. كورد نه‌چاربوون چه‌كى راكه‌ن بۆ به‌رگریكرن ژ خوه. دیسا ژى پشتى كۆده‌تایا سه‌ربازى بۆ زڤرینا ره‌شید عالى گه‌یلانى یێ تاگیرى ئه‌لمانیا یا نازى بۆ سه‌رۆك وه‌زیریا عیراقێ، دیسا بریتانا هاته‌ڤه و شیا وان دووربێخیت و كوردان ل ڤێرێ پشكداری تێدا كربوو. ئه‌ڤه‌شاشیه‌كا بچووك ببوو وى سه‌رۆكێ مه‌زن كری.!! هه‌ر وى نڤیسه‌رى ژى ل تایمزێ نڤیسی یه كو ئه‌ڤ شه‌رێ ل عیراقێ یێ دوور بوو ژ كنارێن نۆرماندى، خوه هه‌ڤپه‌یمان ب خوه نه‌شیان نۆرماندى بێخن هه‌كه پاپۆرێن خوه دانه‌گرتبان ب سۆته‌مه‌نى.. باشه كوردێن ره‌به‌ن یێن (لاحول و لا قوه) هه‌یین چاوا هاریكاریا وان نه‌كربوو؟!… ئه‌ڤه چو خه‌ونا نه‌خۆش بوو ته ب مه كوردان ڤه‌دیتى. یا تراژیدى و كۆمێدى پێكڤه!! ب راستى د به‌ر گریێ را كه‌نیا مه هات ب ڤێ گۆتنێ!!
ژبه‌ر ڤێ ئێكێ كاك ترامپ بێگونه‌هیا داگیركرنا له‌شكرێ توركیا بۆ سه‌ر كوردستانا رۆژئاڤا دیاربكه‌ت، رۆناهیا كه‌سك دده‌ته ئاردۆگان كو هێرشكه‌نه رۆژئاڤا و پشتى چه‌ند ده‌مژمێره‌كان دبێژیت، هه‌كه توركیا هێرش كه‌ته كوردان، دێ سزایان دانمه سه‌ر!!. و پشتى هینگى مارى ب ده‌ستێن یێن ژێر خوه‌دا دده‌ته كوشتن و وان راسپارده دكه‌ت!!!. نه‌دووره به‌حسێ ڤێ گۆتارا من ژى بكه‌ت و بێژیت نڤیسه‌ره‌كى ل سه‌ر من نڤیسیه بلا ئه‌ردێ كوردان بهێته داگیركرن وه‌كو له‌یستۆكان!!
ئیمۆجیێن سیاسه‌تا به‌غدایێ
شێرزاد نایف
گه‌له‌ك جاران ئه‌ڤ سیناریۆیا هه‌ڤدیتن و رێككه‌فتن و كۆمبوون و دانوستاندنان د ناڤبه‌را به‌غدا و كوردستانێ دا ـ هاتیه دوباره كرن هه‌ر ژ سه‌رده‌مێن شۆره‌گشێن بزاڤا رزگاریخوازى كوردى و مه‌لا مسته‌فا یێ بارزانى یێ نه‌مر و حه‌تا ئه‌ڤرۆ ژى، پتریا وان ژى ئه‌نجام د دیار و ئاشكه‌را بوون، ل ده‌سپێكێ دا توند بن و بریارێن گه‌رم و گۆر ده‌ن، دا هێنه غه‌درێ كه‌ن، پاشى دا شكه‌ستنێ ل سه‌ر ده‌ستێ هێزا له‌شكرى یا كوردستانێ (پێَشمه‌رگه‌ى) ئینن، دا نه‌چار بن، هێنه ئاشێ هویر ( مینا ب زارێ جادێ بلا بیت، ڤێجا وه‌كو بیانناما 11 ئادارێ و دانا حوكمێ زاتى به‌رێ بنیاتێ كیانێ كوردستانى، ب دووڤ داخوزا بارزانیێ باب، پشتى هینگى جۆرێن خیانه‌تێ و زكره‌شیێ دكرن و دگه‌هشته‌نه راده‌یێ ژناڤبرنا بارزانى و سه‌ركرده‌یێن كورد، به‌لێ هه‌ر بسه‌رنه‌دكه‌فتن، چونكو بارزانى ب خوه یێ شارازا بوو د خواندن و راڤه‌كرنا نیازێن وان دا، و خودایێ ئه‌و دۆزا راست و دروست دپاراست، ئێك ژ وان پلانێن به‌رده‌وام ژى یا ئێكى شواتێ بوو، زیانێن مه‌زنتر ب كوردان كه‌فتین، هه‌لبه‌ت جهێ جێبه‌جێكار ژى خوه دیارنه‌كریه، به‌لێ یا دیاره، ب هه‌مى هه‌ولان یێن دهێن بۆ ژناڤبرنا ئه‌زمۆنا هه‌رێمێ، به‌لێ هه‌رده‌م سه‌رێ وان یێ ب چیایه‌كى دكه‌ڤیت، نها ژى شه‌رێ سار و پێشكێشكرنا نیازێن پاكه، هه‌لبه‌ت كه‌سێ نێچیرڤان بارزانى ژى د ڤى بیاڤى دا سه‌ربۆره‌كا موكم هه‌یه، له‌ورا مه سه‌روچاڤێن مه‌زنه‌به‌رپرسێن به‌غدا دیتن، ڤێ جارێ، گێمێ خۆشحالیێ یه و هیڤیدارین هه‌ر یا گه‌شبیت ره‌وش، به‌لێ ئه‌و هه‌ستا خوش و دیمه‌نێن ئیمۆجیێ كویفێ یێ دیار و پێشاڤ بوو ل سه‌ر رویێ به‌رپرسێن به‌غدا، ب ئۆمێدا گه‌هشتنا ڤى هێڤێنى بۆ سه‌ر روویێ هه‌مى هه‌ڤوه‌لاتیان، ئه‌ڤ گه‌شبینى و فه‌رشكرنا به‌ڕكى َ سۆر ژى ژ هه‌بوونا چه‌ندین فاكته‌رێن ب هێزه ل جه‌م ده‌ستهه‌لاتا كوردى، كو بارودۆخێنن نها هاتینه گوهۆرین و ره‌وشا هه‌رێمێ ب هێزتر لێهاتیه ژ لایێ گه‌له‌ك فاكته‌ران ڤه، چ بهێزبوونا كیانێ كوردى ژ لایێ وه‌لاتێن جیهانێ ڤه و په‌سنا وان، و ژلایه‌كێ دى ڤه هه‌ڤپه‌یمانیبوونا وێ ل گه‌لوه‌لاتێن مه‌زن، هه‌بوونا هێزا پێشمه‌رگه‌ى یا داعش شكێن، هه‌موو جهێ بایه‌خدانا به‌غدا یه ب هه‌رێمێ، ژ بلى هه‌بوون و ده‌ركه‌فتنا پترۆلێ ل سه‌رانسه‌رى هه‌رێمێ. زێده‌بارى ڤان هه‌مى فاكته‌ران، دمینتیه ل وێرێ هه‌بوونا خشته‌رێیه‌كا زانا و بهێز كو هه‌میان بۆ سه‌ركه‌فتنێ لێكبێخیت، هه‌لبه‌ت نێچیرڤان بارزانى وه‌كو سه‌رۆكێ نوو به‌رهه‌رمێ هه‌لبژارتنان و پتریا ده‌نگێن هه‌رێمێ یه، ئه‌ڤ هه‌مى پێدانێن هه‌یى لێكداینه و چه‌كه‌كێ ب هێزه د ده‌ستان دا، كو مافێن ڤى مله‌تێ هه‌ژار بۆ بده‌ستڤه‌بینیت و چو كاره‌ساتێن دیتر روونه‌دوه‌ن، و خوین نه‌هێته رێتن، په‌یوه‌ندیێن نێچیرڤان بارزانى هه‌یین و هونه‌رێ سه‌رده‌ریكرنێ یێ ژ سه‌ربۆرێ وه‌رگرتى، دێ مفای نه به‌س گه‌هینته هه‌رێمێ به‌لكو دێ لبه‌ر عیراقێ ژى ساناهى كه‌ت كو هه‌مى ئاریشه‌یێن هه‌لاویستى بهێنه چاره‌سه‌ركرن بێى كو نه‌عیمێ به‌غدا شین ببیت و حه‌سیدیێ ب سه‌ركه‌فتنا كوردى ببه‌ن.
پێدڤى ب سویندێ ناكه‌ت!
شێرزاد نایف
ژبلى رۆتین و رێوره‌سمێن دستوورى و قانوونى و رۆخساى و بۆیاغه‌كا نیڤده‌وله‌تى بۆ سویندخوارنا سه‌رۆكاتیا هه‌رێمێ، به‌لێ ئه‌ڤه دیتنه‌كا لاوه‌كى یه، كا كى پێدڤه‌ى ب سویندێ یه؟ خوه‌یێ هزاران شه‌هیدان و ته‌رخانكرنا هه‌مى ژیانا خوه بۆ رێبازا كوردینیێ و سه‌ركێشیكرنا به‌رسنكگرتنا هه‌مى نه‌خۆشیان، قه‌بوولكرنا هه‌مى جۆرێن ره‌خنه و هه‌ره‌شه‌یێن جۆره و جۆر، راگرتنا هه‌رێمێ ل ده‌مێن به‌رته‌نگیێ گه‌هشتینه لۆتكه‌یا خوه، كه‌سێ باوه‌رنه‌دكر دێ ژێ قورتال بین، ڤێجا هه‌ر ئێك ژ مه ل دووڤ گێۆلێ خوه ره‌خنه دگرت، نێچیرڤان بارزانى ل نه‌خۆشترین ده‌م ما ب تنێ، یێ ره‌خنه نه دكر، په‌یڤا راست ژى نه
دگۆت، وه‌ختێ دگۆت، ئه‌ڤ قووناغه دێ تێپه‌ریت، خه‌لكى باوه‌ر نه‌دكر، به‌لى هه‌ر گۆتنه‌كا وى گۆتى ده‌ركه‌فت راستى و هاته دى، ئه‌و هه‌ڤپه‌یمانیا هه‌ڤدژی حوكمه‌تا هه‌رێمێ هه‌مى هاته وه‌رگێران بۆ باشی و پشته‌ڤانیێ بوو په‌سنینه‌كا نیڤده‌ولى یا مه‌زن و د ناڤا رێوره‌سمێن سویندخوارانا وى دا یا دیار و پێشچاڤ بوو و ئاماژه‌یێن خێرێ بوون!!. ئه‌ڤ كه‌سێ ملێ خوه دایه به‌ر ئه‌زمۆنا مه یتا هه‌رێمێ و هه‌مى نه‌خۆشى ب سه‌ر دا ده‌ربازبووین، پێدڤى ب سویندێ نینه، ئه‌و سه‌رۆكێ خوه‌دى و هێز و بنه‌مال و دخوازیت ب ری َیا دیمۆكراسى ببیته سه‌رۆك، هێشتا ژى یێ سویندێ بۆ مه دخۆت، ماده‌م ب پتریا ده‌نگان و ب حه‌زا جه‌ماوه‌رى تو ده‌ركه‌فتى ژنوو تو سویندا ده‌ستێ راستى دده‌یه، مه، پا ئه‌م چو سویند بۆ ته بخوین؟!. وه‌دیاره ئه‌م گه‌له‌كێ هه‌ژینه له‌ورا مه شه‌نسێ بوونا سه‌روه‌ریه‌كا هۆسا جوامێر و ب روشت بووین..
د هه‌ر بیاڤه‌كى توشیایى سه‌ركه‌فتنێ بینی و مرۆڤ نه‌شێت ئێكێ ب سه‌ر یا دیتر بێخى، مه ل ده‌سپێكى گۆته ته ئه‌ندازیارێ ئاڤه‌دانیێ، به‌لێ د بیاڤێ كارێزماتیێ دا ژى رۆلێ خوه ئینا، بۆ ده‌ربازكرنا قه‌یرانان و به‌رگیریكرنێ و په‌یوه‌ندیێن دبلۆماسی ژى دا گێچ به‌ر ب به‌رزیێ ڤه چوو، سه‌بر و هه‌دار ژى ل وێ خه‌باتێ زێده‌بوون و بۆ هه‌میان دیاربوو كو ب وێ ته‌حه‌مولێ و نه‌رماتیێ هێزه‌كا مسۆگه‌ر هاته دى، هه‌كه نه لبه‌رى دو سالان كه‌سێن مینا عه‌بادى ئاگر بوو ل سه‌ر سه‌رێ هه‌رێمێ و ده‌وله‌تێن ده‌وروبه‌ر ژى، چونكو هه‌می ل دژى هه‌رێمێ ب گه‌ل و حوكمه‌ت ڤه راوه‌ستان ب تنێ ژ به‌ر دیاركرنا بریارا مافێ چاره‌نڤیس، له‌ورا هینگى هه‌لویستێ دبلۆماسى و زانینا سیاسى دخواست بێده‌نگى باشترین به‌رسڤ بیت، به‌لێ ئه‌و هه‌مى چوون و ئه‌و ما و ب هێزتر لێكه‌فت و گه‌هشته لۆتكه‌یا نه‌زاهه‌تێ و ب ئیراده‌تا ب كۆم ئه‌و په‌یڤینا دیرۆكه‌ى یا سه‌رۆك مسعود بارزانى دیسا جهێ خوه گرت ده‌مێ
گۆتى : خوه‌م شه‌رمزارى گه‌لى خوه ناكه‌م!!. ئه‌ڤرۆ شوونا وى هه‌مان میراتێ كارێزمایى ڤێرا گه‌هشت و ئه‌م ده‌ربازى كنارێ ئێمن كرین!!!. .
راكرنا ئه‌لغامێن سیاسى یێن ئالۆز!
شێرزاد نایف
هه‌موو نڤیسه‌ر و رۆژنامه‌نڤیس سه‌رده‌ریێ ل گه‌ل دیاركرنا میناكان دكه‌ن، پێشمه‌رگه ژى پێگیریێ ب فه‌رمان و پیڤاژۆیا سه‌ركرده‌یا خوه دكه‌ن، مافێ وانه و ئه‌ركێ وانه، له‌ورا من ژى ئه‌ڤ مژاره خسته روو و دوور ژ مه‌دحه‌كرن یان رۆتینبوونا گۆتاره‌كێ ئه‌ڤ تێكستێ ڤه‌كرى نڤیسى و ئینا زمان، دا كو پشتراستیه‌ك بۆ خه‌لكێ خوانده‌ڤان دیار بیت كو بزانن كه‌سێن زانا و مه‌زن و جهێ باوه‌ریێ دێ ڤى وه‌لاتێ برێڤه‌به‌ن و سه‌ركێشیا وى كه‌ن..
ئه‌ڤجا گرۆڤه‌یێن مه چنه؟!، هنده‌ك په‌یڤینان دێ دیاركه‌م و هوون بخوینن، كى بوو خودانێ ڤێ گۆتنێ.. ئه‌ڤ قووناغه دێ تێپه‌ریت.!! یان ده‌مێ جۆرێن دوژمنێن هۆڤ هاتین و هه‌ولێن ژناڤبرنا ملله‌تێ كورد كرین و ..هتد.
ئێدى جه نینه هه‌میێ ل ڤێره بینین بیرا خوه، به‌لێ ژ بلى هه‌ره‌شه‌یێن له‌شكرى هه‌روه‌سا پیلان و كریارێن سیاسى ژى رۆژ بۆ رۆژێ مشه‌بوون ل هه‌مبه‌رى حوكمه‌تا هه‌رێما كوردستانێ و تایبه‌ت ژى كه‌سێ نێچیرڤان بارزانى، گرێك ل دووڤ گرێكى ئالۆزتر لێهاتن، هه‌موو ژى بوونه سه‌ربۆر و ب ئه‌ندازیاریه‌كا سه‌لامه‌ت ئه‌م ژ هه‌مى گرێكان ده‌ربازكرین، دووماهى ئالۆزى ژى گیرۆكرنا پیكئینانا كابینا حوكمه‌تا نوویه، چونكو برێڤه‌برنا مرۆڤان ل ڤێ ده‌ڤه‌ر مه زۆرا زه‌حمه‌ته هه‌كه ل گۆر سایكۆلوجیا مرۆڤێن مه بیت، و ئه‌ڤه راستیه‌كه ژى كه‌س نكاریت هه‌مویان رازى بكه‌ت، هه‌ر حزبه‌كێ چه‌ندین سه‌رێن تێدا، ئه‌ڤ حزبێن د ناڤا كابینێ دا ، وه‌كو رێیه‌كا زۆرا دووربوو كو بهێنه رایێ، چاوا شیا ڤێ رێكا كورت نێزیك بكه‌ت!! شیا و ئه‌و رێكا درێژ كورت كر، ئه‌م گه‌هشتبووینه ره‌وشه‌كێ مه هزر نه‌دكر دێ ئه‌ڤ حزبێن هه‌نێ هێنه سه‌ر رێیه‌كێ، چونكو هنده‌كان ژ وان هه‌ما سیسته‌مێ وان تێكدان بوو و ئه‌ركێ وان ئه‌وه تنێ ئاسته‌نگان بداننه پێش و نه‌هێلن ئه‌ڤ خه‌لكه ب سه‌ره‌كى بكه‌ڤن و تایبه‌ت ژى ژبۆ هه‌ڤدژیكرنا پارتى دیمۆكراتى كوردستانه، ژ به‌ر وێ به‌هرا شێرى یا هه‌یى ژ په‌سنینا مللى و هژمارا كورسیێن خوه ل په‌رله‌مانى و كیانێ خوه یێ ب هێز هه‌م ل كوردستانێ و هه‌م ژى ل به‌غدا، ئێدى نه‌كامیا وان حزبان گه‌هشتبوو هه‌ستیى!!. ئه‌ڤ سه‌ركه‌فتنا پارتى و بتایبه‌ت سه‌ركێشێن وێ وه‌كو سه‌میانێن ریفراندۆمێ و سه‌ربخوه‌یا كوردستانێ، دروستكارێن خه‌ونا كوردبوونێ و سه‌ربخوه‌یێ بووینه ئارمانجا ده‌وله‌تێن مه‌زن و ب هه‌مى ره‌نگان یێن دهێن ئه‌زمۆنا وێ ژناڤببه‌ن، ستێركا وان یا دیار و پێشچاڤه كو نه‌دخواستن حوكمه‌تێ پێكبینن، له‌ورا ئه‌ندازیاریه‌كا بالا سه‌رۆكێ حوكمه‌تێ نێچیرڤان بارزانى زانى و شیا هه‌موو لایه‌نان بێده‌نگ بكه‌ت، به‌لكو ئه‌وى ئه‌و ب وه‌زیرێن خوه یێن ده‌رڤه و نوونه‌رێن مه‌زنه وه‌لاتان كێشانه هه‌ولێرێ و ل هه‌مبه‌رى ڤێ ئێكێ شیا ته‌نگێن به‌غدا سست بكه‌ت، دوور ژ فشارێن وه‌لاتێن باندۆرا وان ل سه‌ر به‌غدا، چاوا ل ناڤخوه پێكنه‌ئینیت؟!.
له‌ورا رۆلێ نێچیرڤان بارزانی د رێخستنا ناڤمالا كوردی دا و رێخۆشكرن بۆ پێكئنانا كابینا نوو، هه‌رگۆتنه‌كا وى دا خۆیا دبیت ل نه‌ورۆزێ: رێیا دوور زۆر مه بریه و قوربانیێن زۆر ژى مه داینه، گرێی امه ئه‌وه كوردستان دڤێت سه‌ربكه‌ڤیت.. ئه‌ڤجا ب راستى ئه‌ڤ سۆزێن وه‌سا یێن كه‌سێن مه‌زن دده‌نه مله‌تێ خوه، نه‌ك تشته‌كێ ب ساناهى یه، و گه‌له‌ك سه‌ركرده مه دیتینه كو جهێ باوه‌ریا خه‌لكى نینن و ئه‌و سۆزێن دده‌ن ناهێنه بجهئینان، ژبلى دۆخێن جودا كو مه‌زنتر بن ژ هه‌موو بۆیه‌ران!!. به‌لێ هه‌ر ژ ده‌سپیكێ ژى سۆزێن ئاشتیێ و ئاڤه‌دانیێ داینه و نه تنێ ئه‌م به‌لكو خه‌له‌كێ بیانى ژى دانپێدانێ ب ڤێ ئێكى دكه‌ن، هه‌كه نه چاوا هه‌ولێر دا بیته قیبله‌گه‌ها هه‌موو وه‌لات و سیاسه‌تڤان و مه‌زنه به‌رپرسێن سیاسى و ڤه‌كرنا كونسلخانه و جهێ كوربه‌ند و جڤین و كۆنفرانسێن گه‌له‌ك وه‌لاتان، مۆره‌كا فه‌رمى یه بۆ پێشڤه‌چوونا هه‌رێم كوردستانێ ژ هه‌ر رویه‌كى ڤه.
ئه‌ڤجا ده‌وله‌تمه‌دارێ كوردستانێ وه‌كو سه‌میانێ ئێكرێزیێ باوه‌ریێ دزانیت هه‌تا ناڤمالا كوردى ئێكگرتى نه‌بیت، ئه‌و ده‌رزێن مایین ژى راستڤه نابن، ژ به‌ر وان پره‌نسیپێن برایه‌تیێ و هه‌ڤدو قه‌بوولكرنێ، دڤێت ده‌روون و چاوانیا هزركرنێ و سه‌ره‌ده‌ریێ بهێته زانین بۆ گیانێ هه‌ڤنشتیمانیان بهێته ڤه‌گه‌ریان، له‌ورا مه دیت چه‌ندى ده‌رزه‌ك و په‌قه‌ك په‌یدا ببا، ده‌ملده‌ست د هانێ دچوو و ئه‌و ئاریشه چاره‌سه‌ر دكر، چه‌ندى دووركه‌فتن په‌یدا دبا هه‌ر دا هه‌موو بۆچوونان نێزیك كه‌ت و هه‌یڤیان د دلێ خه‌لكێ خوه دا چینیت، هه‌روه‌كو گه‌له‌ك جاران زیان ژى ب پارتى دیمۆكراتى كوردستان دكه‌فتن پێخه‌مه‌تى هه‌ڤدوقه‌بوولكرنێ و رازیكرنا لایه‌نێن دیتر، واته هه‌موو رێكێن ئاسته‌نگدانێ دابڕین و نه‌چاركرن هه‌موو بهانه‌یێن خوه بدووماهى بینن و راده‌ستى راستیێ و لۆژیكى ببن، ئێدى گه‌هشته راده‌كى نه تنێ هه‌ڤوه‌لاتیان تۆره‌بوونا خوه دیاركرن ل هه‌مبه‌رى ڤان حزبان، به‌لكو هه‌ر ئه‌ندامێن وان حزبان بخوه ژى نه‌قۆله‌بوون و بێزار بوون ژ وان بهانه‌یێن بێهانه!! كا چاوا پارتى هه‌رده‌م نه‌تنێ دۆست و هه‌ڤال به‌لكو دوژمن ژى نه‌چار كرینه ل دووڤ پارتى به‌رده‌ن و بهێنه سه‌ر رێكا حه‌ق، نه‌ك ب توند و زالبوونێ، به‌لكو ب نه‌رمیا خوه و سینگفره‌هیا خوه، سه‌ره‌راى هند پیلانێن مه‌زن و خیانه‌تكرنێن لێ هاتینه‌كرن، به‌لێ هه‌ر حزب ولایه‌نێ یا راست و حه‌ق بۆ خه‌لكێ خوه بخوازیت، ئێدى دادوه‌ریا ئه‌سمانى ژى دێ پشتا وێ بیت، و هه‌ر دێ بسه‌رئێخیت، له‌ورا ژى ئه‌ڤه دووماهى به‌ربه‌ست بوو د دووماهیا سیناریۆیا ڤى فلمى دا و چاو امه دیت به‌رى چه‌ند رۆژه‌كا سه‌ركێشێ رێخراوا تیرۆرستى یا داعشێ دانپێدان ب دۆراندنا خوه كر ل شه‌رێ باهۆزێ، ئێدى ئه‌و وه‌لاتێن ئاسته‌نگ ددانان د رێیا به‌رژه‌وه‌ندیا گه‌لێ كوردستانێ ژى دێ نه‌چارى وێ دۆراندنێ بن، چونكو هه‌موو رێك تاقیكرن كو حوكمه‌تا هه‌رێمێ ژناڤبچیت، و نه‌چوو به‌لكو بهێزتر لێهات، ئه‌ز دوور نابینم كو گیرۆبوونا ڤێ حوكمه‌تێ ژى ده‌ستێن ده‌ره‌كى تێدا هه‌بوون، ب وێ هزرێ هه‌كه حوكمه‌ت پێكنه‌هات، ئێدى خه‌لك دا بێزار بیت ژ ڤێ گیرۆبوونێ چونكو ده‌نگێ خوه ژ مێژه دایى و دا هه‌یبه‌تا حوكمه‌تێ ل پێشچاڤێن خه‌لكى ل كێمێ بده‌ت! خواستن ره‌وشێ بگه‌هیننه وى راده‌ى كو خه‌لك خوه بكوژیت ژ به‌ر ژێكێبژاله‌بوونا ناڤمالا كوردى!!. ئه‌ڤه ژى جۆره‌كێ شه‌رێ ده‌روونى یێ شه‌تره‌نجى یه، دوژمنێن مه‌زن ل پشت مه‌را بۆ دادرێژن، هه‌لبه‌ت ب پێشكێشكرنا مه‌رجێن ته‌عجیزى، حوكمه‌ت دێ گیرۆ بیت، چونكو نابیت ژى ئه‌ز حه‌قێ خوه ل دووڤ ته‌به‌رده‌م حه‌تا راده‌یه‌كى ته نڤیا من ده‌نگ هه‌بن بۆ خوه یا زێده‌تر ژ یا خوه دابنى، هه‌كه لایه‌نه‌ك غه‌درێ ل خوه بكه‌ت و ل وان زۆرینه‌یا ده‌نگێن خه‌لكێ خوه بكه‌ت ژى خودێ قه‌بوول ناكه‌ت، هه‌روه‌سا گونه‌هه مرۆڤ زێده‌ى حه‌قێ خوه‌ببه‌ت، بۆ وێ خه‌ونا كو مله‌ت پێشنه‌كه‌ڤیت و نه‌گه‌هیته ئارمانجێن خوه یێن راسته‌قینه، یا گرنگ ئه‌وه هه‌ڤسه‌نگى یا ئالۆز بوو یا سه‌خت بوو، كه‌سێ باوه‌ر نه‌دكر دێ ب سه‌ره‌كى كه‌ڤیت، به‌لێ ل دووماهیێ ئه‌م ب ده‌مى خساره‌ت بووین و گیرۆبوون ئه‌و زیان بوو یا دوژمنى بۆ مه دارێتى و دانایى به‌لێ ئه‌و ئیراده‌یا ئاسنى یا ب هێز شیا مه ژ ناڤ هه‌مى كۆلگه‌یێن مین و ئه‌لغامان را ده‌رباز كرین و گه‌هاندینه كنارێ ئێمن…
خۆبه‌خشێن پێشمه‌رگه و یێن به‌لێنده‌ر
شێرزاد نایف
بیرا من دهێت ل ده‌سپێكا شه‌رێ هۆڤانه‌یێ رێكخراوا تیرۆرستیا داعش، هه‌ڤاله‌كێ من یێ به‌لێنده‌ر په‌یوه‌ندی ب من كر، و نۆرونۆر وه‌كو بچووكا دگریا و هه‌مى هه‌ولیستێ خوه یێ قاره‌مانانه دیار كر كو دخوازیت بهێته سه‌نگه‌رێن شه‌ره‌فێ و تڤه‌نگێ هه‌لبگریت و ب خوه‌به‌خشى بهێته به‌رگریێ بكه‌ت ژ خاك و شه‌ره‌ف و كه‌رامه‌تا مله‌تێ خوه، هه‌روه‌سا ده‌ستێ هارێكاریێ بۆ هێزێن پێشمه‌رگه‌ى وه‌كو هانده‌ره‌كێ نشتیمانى و كوردپه‌وه‌رانه، دریغى تێدا نه‌كر، هه‌ر هینگى چو جاران ل خوه دیارنه‌كر كو ب ملیۆنان پاره‌یێ وى ژى هاته پاشكه‌فتن و ئه‌و قه‌ربارێ وى خستیه تێدا، بۆ ئاڤه‌دانكرنا هه‌رێما كوردستانێ، ب هه‌مى سامان و كه‌لوپه‌لێن وى، ژ سلنگ و قه‌لابه و ترێله و هه‌موو پێدڤیێن وى یێن ل به‌ر ده‌ست بۆ خزمه‌تا وه‌لاتى، ته‌خسیرى نه‌كربوو، پشتى قه‌یران ب سه‌ر مه هه‌میان داهاتى و دوژمنێن گه‌ل و نه‌ته‌وا مه بۆ مه ئینیاین، هه‌لویسته‌كێ ده‌مكى بوو، مه هه‌میان ملێ خوه دابه‌ر و ب هه‌ڤرا پشته‌ڤانیا ئێكودو كرن، هه‌تا ئه‌ڤ مه‌حنته ب سه‌ر مه هه‌میان رابوورى، هه‌ر هینگى سه‌رۆكێ حوكمه‌تێ نێچیرڤان بارزانى ته‌كه‌ز دكر كو ئه‌ڤ قووناغه د ده‌مكینه و دێ تێپه‌ریت، هه‌روه‌كو باوه‌ریه‌كا ب هێز هه‌بوو، كو دێ ره‌وش وه‌كو به‌رێ زڤریت، دینه‌مۆیا ڤێ باوه‌ریێ ژى، هه‌ر دادوه‌ریا دۆزا مه‌یه و راستى و راسته‌قینه‌یا نیازا پاكا وژدان و ئیراده‌تا خوه، ئه‌ڤ هه‌میه هاته روودان و ئه‌وى به‌لێنده‌رى و ب سه‌دان یێن مینا وى دیاركر كو ب دروستى هه‌ڤوه‌لات و نشتیمتانپه‌روه‌رن، ل سه‌ر ڤێ هه‌میێ را ژى هاتن چه‌كێ شه‌ره‌فێ راكرن، هه‌روه‌سا ژى به‌رى چه‌نده‌كێ ئه‌و ته‌رخانكرنا سه‌د ملیۆن دۆلاران ژلایێ سه‌رۆك حكومه‌تێ ( نێچیرڤان بارزانى) ڤه جهێ دلخۆشیا به‌لێنده‌ران و كرێكار و خه‌لكى و ئه‌ڤ په‌یڤینا دیرۆكى شوونپه‌نجه بوو و جهێ خوه گرت، به‌لێنده‌ران زانى ئه‌و بێهنته‌نگى هه‌موو بۆوان دێ بیته ده‌رفه‌ته‌كا خۆشتر و باشتر كو پتر هه‌موو لایه‌ن مفادار ببن، ل ئاینده‌یێ نێزیك، هینگى بیرا من هات كو پێشمه‌رگاتى ژى پره‌كا ب هێز و كاریگه‌ره كو ئه‌ڤ سیكه‌رێ تایبه‌ت و یێ حكومى پتر ژ خوه دگه‌هینته ڤه‌ئێك، چونكو هه‌بوونا پێشمه‌رگه‌ى واته ئوكسجینا ئارامیێ یه و هه‌مى كه‌س پێدڤی وێ سه‌قامگیریێ و ته‌ناهیێ نه، و كه‌س نینه د مالباتا وى دا كو شانازیا شه‌ره‌فا پێشمه‌رگاتیێ تێدا نه‌بیت، كوره‌كێ وى برایه‌كێ وى كه‌سه‌كێ و گیانێ خوه كرینه مه‌تال بۆ بلند راگرتنا وه‌لاتى. هه‌ر ئه‌و خه‌مخۆریا وان به‌لینده‌رێن خۆبه‌خش یێن گیان پێشمه‌رگه نه‌با، دبیت وه‌لاتێ مه تووشى قه‌یرانێن مه‌زنتر یێن گیانى با. ئه‌ڤجا ده‌سكه‌فت و ده‌رئه‌نجامێ وێ خه‌مخۆریێ نه‌با نها ئه‌ڤ سه‌روسیمایێ جوان و ئاڤا یێ وه‌لاتێ مه نه‌دبوو، چونكو رۆخسار ژى نێزیكرترین گرۆڤه‌یه بۆ نیشادانا دلپاكى و دادیا دۆزا مرۆڤى، ئه‌ڤجا به‌لێنده‌ر بیت یان پێشمه‌رگه، یان مامۆستا و هه‌مى ته‌خ و كایا و بژار هه‌موو خوه‌دى ئه‌و په‌روه‌رده‌نه یا شۆره‌شا ئیلۆل و گۆلانان و چاوا باب و باپیران كرینه، ئه‌م و كورێن خوه ژى هه‌ردێ كه‌ین و حه‌تا كو چاوا پاپۆرا نوحى ل سه‌ر ئه‌ردێ مه ب سه‌ره‌كى كه‌فتى، هه‌رى دێ ب سه‌ره‌كى كه‌ڤین.
تۆریزما خاله‌ك ل سه‌ر په‌یڤا حوكمه‌تێ!
شێرزاد نایف
پشتى سستبوونا وان هشكه‌سالیێن ب سه‌ر مه‌دا هاتین، كه‌سێ باوه‌رنه‌دكر هۆسا دێ وه‌كو میه‌كى ژناڤ هه‌ڤیرى دا ده‌ركه‌ڤینه ڤه! ژ وێ به‌رته‌نگیێ ده‌ركه‌ڤین ژ قه‌یران و هه‌ڤركیێن هه‌مه‌جۆر، نه‌بوونا مووچه‌یان و دۆرپێچیا فرۆكه‌خانان، گه‌فێن ده‌وله‌تێن مه‌زن بۆ گرتنا ده‌ریێن سنۆرى و .. هتد، ئه‌ڤنه‌هه‌موو ل ره‌خه‌كى، شه‌رێ ل سه‌ر هه‌رێمێ ژى ل ره‌خه‌كێ دى، به‌لێ هه‌ر وه‌كو سه‌رۆكێ حوكمه‌تێ نێچیرڤان بارزانى چه‌كه‌كێ جوداهه‌بوو، یێ ژ خوه پشتراستبوو كو دێ كاریت هه‌موو قووناغان تێپه‌رینیت و مه گه‌هینته كنارێ ئێمن، هێدى هێدى ب سیاسه‌ته‌كا نه‌رم و ئاقلمه‌ندى شیا هه‌میان بێده‌نگ بكه‌ت ئه‌وێن ب زمانێ ئاگری دخواستن ل سه‌ر مه زال ببن، ئه‌ڤ ژبلى ره‌خنه‌یێن ناڤخوه و ملمانێن حزبى و كریارێن ده‌ستنزمیێ بۆ دوژمنان، فرۆتنا ناڤوده‌نگیێ، مینا كریارا 16 ئوكتۆبه‌رێ، ئه‌ڤرۆ ئه‌و ئیراده شیا پتریا وان ئاسته‌نگان بشكێنیت، و ئها ئه‌ڤرۆ په‌یڤ هاتنه بنیاتنان، یا ماى خالان دابنیته سه‌ر په‌یڤان، و د رێوره‌سمێن پێشانگه‌ها گه‌شتیارى یا رۆهه‌لاتا ناڤه‌راست ل هه‌ولێرێ باشترین په‌یام پێشكێشكرن، ب به‌رهه‌ڤبوونا عه‌بدولئه‌میر وه‌زیرێ ره‌وشه‌نبیرى و گه‌شتیارى و شوونه‌رواێن عیراقى و هه‌ژماره‌كا وه‌زیرێن هه‌رێمێ و به‌رپرسێن هه‌رێمێ و كونسۆل و نوونه‌رێن وه‌لاتێن بیانى، ئه‌و زه‌مینه‌یا خۆش و توخمێن سه‌ره‌كى یێن دروستكرنا توریزمه‌كا میناك ل سه‌ر ئاستێ عیراقێ و رۆژهه‌لاتا ناڤین بهێته دانان، كو د به‌رنامێ حوكمه‌تا هه‌رێمێ دایه ئه‌ڤ پرۆژه حه‌تا سالا 2020 بهێته ئه‌نجامدان، دێ بیته ژێده‌ره‌كێ ئه‌كتیڤ یێ بده‌ستڤه‌ئینانا سامانه‌كێ هاریكار بۆ برێڤه‌برنا وه‌لاتى ب ره‌خ نه‌فت و گاز و چاندنێ ڤه، هه‌كه بهێته سه‌خبێریكرن، سه‌ره‌راى گیرۆبوونا ڤان پرۆژان ژ به‌ر وان كاودانێن سه‌خت یێن ب سه‌ر هه‌ریمى دا هاتین نها گه‌شه‌یه‌كا باشتر هه‌بوو.
ئه‌ڤ كاودانێن گوهۆرین ب سه‌ر ره‌وشێ دا ئیناین وه‌لێكر كو هنده‌ك مژارێن دى بكه‌ڤنه سه‌ر سكه‌یى، ل دووڤ پێدڤیاتیێ وه‌كو كارابوونا باشتر یا كه‌رتێ تایبه‌ت، كو هه‌ر دیسا ژى سه‌رۆك وه‌زیرى ئاماژه پێ دا كو ب پله‌یا ئێكێ پشتبه‌ستن پێ بهێته‌كرن, و مفا بهێته وه‌رگرتن ژ په‌ند و سه‌ربۆران، ئه‌ڤ بیاڤه ببیته داهاته‌كێ وه‌به‌رهێنه‌ر ل ره‌خه‌كى هه‌روه‌سا ژى كه‌رتێ چاندنێ ژى ل ره‌خه‌كێ دى زێده‌بارى پیشه‌سازى، هه‌كه خودێ نه‌كه‌ت و قه‌یرانه‌كا دى یان هشكه‌سالیه‌كا دى ب سه‌ر مه دا هات دا نه‌كه‌ڤیته ئاریشه‌یان، ئه‌ڤ په‌یامێن نێچیرڤان بارزانى ل گه‌ل به‌رهه‌ڤیێن ئاسانكاریێ نیشانا وێ ئێَكێ یه كو ده‌لیڤه‌یێن گه‌شتر یێن نێزیكن د رێیێ دا كو ژبلى مژده‌یێن خێرێ بن بۆ هه‌ڤوه‌لاتیان هه‌روه‌سا ژى بۆ وه‌به‌رهێنه‌ران و بازرگانان و كه‌رتێ تایبه‌ت ژى ئاسته‌نگێن رۆتینێ و رێنامایان و نڤیسكاران ژى نه‌مینن، ل دووڤ به‌رنامه‌یێن ریفۆرمێ و كاراكرنێ ئێدى ئه‌و دودلى و قه‌له‌قا جاران نه‌مینیت!. هه‌كه هات و خوه‌دیێن سه‌كته‌رێ تایبه‌ت هه‌ست ب ره‌شبینیێ بكه‌ن، یان شه‌نسێ كه‌سانێن د وى كه‌رتێ دا كاردكه‌ن ژ كرێكار و به‌لینده‌ر و كارمه‌ندان ژ شه‌نسێ یێن فه‌رمى كێمتر بیت، باوه‌رناكه‌م كێمتر بمینیت، چونكو هه‌ڤسه‌نگیه‌كا خوه‌جهه، چاوا ئه‌و سالێن بۆرین هه‌تا راده‌كى ره‌وشا وان باشتر بوو ژ یا كارمه‌ندێن حكومى، به‌لێ ئێدى ماده‌م یێ فه‌رمى دێ ئه‌كتیڤ بیت، ئێدى یێ تایبه‌ت ژى دێ مفادار بیت ژ لڤینا بازارى و داهاتێ گشتى، نه‌مازه سیاسه‌تا حوكمه‌تێ ژ سه‌رى وه‌ره ئه‌وه رۆله‌كێ باشتر بده‌ت سه‌كته‌رێ تایبه‌ت. دهه‌موو وارێن ئاڤه‌دانكرنێ دا، وارێ توریزمێ ژى گه‌شتوگوزار پتر دێ كه‌ڤیته سه‌ر ملێن ڤى كه‌رتى كو پێشڤه‌ببه‌ن.
هه‌ڤسه‌نگى و لێكگوهارتنا په‌یوه‌ندیێن هه‌رێمێ ماده‌م كو دێ ل گه‌ل عیراقێ باش بن، پێنه‌ڤێن دێ ل گه‌ل وه‌لاتێن ده‌وربه‌ر ژى باشبیت، چونكو ئێدى ئه‌و فۆبیا وان ژ ده‌وله‌تبوونا كوردستانێ دێ ته‌لاشى بیت، و ئه‌و سیاسه‌تێن جاران هه‌موو هاتنه شكاندن ژ لایێ نێچیرڤان بارزانى و هه‌موو بهانه‌یێن وان بۆ وان زڤراندن، و بهانه‌یا هه‌رێمێ ب هێزتر ده‌ركه‌فت كو ئاریشه ئه‌وه یا ل گه‌ل عیراقێ هه‌یى، كو هه‌موو ماف و ئمتیازاتێن هه‌رێمێ كێمتر لێكربوون ژ پله‌یا دو، به‌لێ عیراق ژى زڤرى سه‌ر هشێن خوه كوئه‌و ب كوردستانێ یا ب هێزه و ئه‌و حه‌سیدیا ل هه‌مبه‌رى كوردستانێ كریى بۆ وێ ب خرابى زڤری ڤه.. له‌ورا پشتراستین عیراق ژى ئێدى خوه تووش ناكه‌ت و ئه‌و كه‌سێن هه‌رده‌م عیراق نه‌چار كری مافێن كوردان بده‌نێ هێشتا بهێزترین حزبن ل سه‌رانسه‌رى عیراقێ و به‌لكو حزبا ئێكێ یه ژى ب شه‌عبیه‌تا خوه و ب ده‌نگێن خوه و كورسیێن خوه یێن په‌رله‌مانى.
د قه‌یرانان دا یێ ب تنێ بوو!
شێرزاد نایف
راسته د گۆتارا خوه یا جێواز دا نێچیرڤان بارزانى سه‌رۆكێ حوكمه‌تا هه‌رێما كوردستانێ گه‌له‌ك ب سه‌رگه‌رمى رۆلێ ملله‌ت ب گشتى ب باشى هه‌لسه‌نگاند و گۆت كو ملله‌تێ ده‌ستێ حوكمه‌تێ گرت و ل وان رۆژێن نه‌خۆش ته‌حه‌مول كر، ب نیڤ مووچه‌ى و ب پاشكه‌فت و گرانى و قه‌یران، به‌لێ مرۆڤ هه‌كه چاڤێ خوه ل هنده‌ك راستیان نه نقینیت، هنده‌ك تشتێن به‌ره‌ڤاژى مه دیتن و گوه لێبوون، ل ده‌سپێكا قه‌یرانێ ژبلى شه‌رێ حه‌شدا سه‌عبی ب سه‌ر مه‌داهاتى و بووین بێهنته‌نگى، گه‌له‌ك ره‌خنه هاتنه ئاراسته‌كرن ژ هنده‌ك حزبان و ژ هنده‌ك خه‌لكێ پالڤه‌دای ژ لایێ وان حزبان ڤه، مرۆڤى هه‌ستكر كو كاك نێچیرڤان یێ مایه بتنێ و ژبلى یێن كه‌یف پێ هاتى كو پارتى بهژیێت و چه‌ندى بهێته ئازاردان بۆ وان باشبوو، سه‌ر هندێ را ژى بزاڤێن وى دگه‌رم بوون و بۆ خۆله‌كه‌كێ ژى بێزار و بێ مۆرال نه‌بوو، دزانى كو ئه‌وى و مالبات و حزبا وى باشی د رابردویێ خوه دا یا چاندى هه‌ر دێ وێ باشیێ و چاكیێ هه‌لینن و به‌رهه‌مئینن، چونكو ئه‌و تۆڤێ وان چاندى یێ خومالى یه، ئه‌و ژى ئیراده‌یا گه‌ل زێده‌بارى خه‌بات و خوین و خوه‌ه و قوربانیدان، ئه‌ڤه ژى قانوونا دونیایێ یه و هه‌موو ئاینێن ئه‌سمانى ژى داكۆكیێ ل سه‌ر دكه‌ن، ژلایه‌كێ دى ڤه، مه‌رجه‌عێ وى و یێ كوردستانێ كه‌سه‌كێ مه‌زنه، مسعود بارزانى چه‌ندێ مه‌زن بوو، ده‌ست ژ پۆستێ سه‌رۆكاتیێ به‌ردا مه‌زنتر لێهات و هه‌موو ئه‌و كه‌سێن ره‌خنه لێ دگرتن بێده‌نگ كرن و ده‌ڤێ وان یێ نه‌ساخ هاته گرتن و گۆتنه‌كا جوان ل ڤێره دهێته بیرا من كو ل سه‌ر سۆشیال میدیایێ به‌لاڤبوویه،”ته منه‌ت ب پۆستێ سه‌رۆكاتیێ نینه ، به‌لكو پۆستێ سه‌رۆكاتیێ منته‌ت ب ته هه‌یه”، ب دروستى ژى وه‌سا هاته سه‌لماندن.
ئه‌ڤجا نها مه نه‌ڤێت ئه‌م برینێن كه‌ڤن نووكه‌ینه ڤه كا ل شوونا هندێ ڤان حزبێن كوردی پشته‌ڤانكربا و ملێ خوه دابا به‌ر وێ مه‌حنه‌تا ب سه‌ر نێچیرڤان بارزانى، رابوون خه‌نجه‌ر ل پشتێ دان، و گرۆڤه ژى رۆندكێن پێشمه‌رگه‌ى بخوه بوون یێن ب سه‌ر وان حزبان ڤه، به‌لێ پشتى ڤه‌بوونا گرێكان چاوا یێن دبنه ملحه‌م؟! و كه‌س نه‌زانیت كى بوو خوه‌دانێ كریارا چه‌په‌ل؟!. یا گرنك ئه‌وه مزگینیا نێچیرڤان بارزانى دێ دلێ خه‌لكى خۆشكه‌ت، به‌لێ هێشتا خودانێن ره‌خنه‌یان یێن به‌هانان دگه‌ریێن و ب دهۆلا وى دا بقوتن، هه‌لبه‌ت پتریان وان ره‌خنه‌گران ژى ئه‌ون یێن موسته‌فید، چونه كه‌ن و چو به‌رهه‌مى نه‌گه‌هیننه وه‌لاتێ خوه ژ بلى تێكدانێ و خوه شه‌ریفكرن ل سه‌ر نڤیسه‌ره‌كێ هه‌ژار یێ بخوازیت راستیان بده‌ته دیاركرن وه‌كو وژدان و رێیا خودێ، دێ بێژنێ متمه‌لق!. واته یێ به‌رگریا ژ سه‌میانێ نه‌كه‌ن؟ نانێ خوه حه‌لال نه‌كه‌ن، مادبیت بابێ ته نانى بده‌ته ته و تو به‌را بهاڤێژیێ؟! یان مه‌لاقى ئه‌وه مرۆڤ دزیا بكه‌ت و ب دهولا بابێ خوه داده‌ت و چو كه‌سپا نه‌كه‌ت ژبلى ئاخفتنێن نه ل هه‌ژى ره‌وشت و نه‌ریتێن ڤى مله‌تێ ره‌سه‌ن؟!
ئادار و رێككه‌فتن رێككه‌فتن!
شێرزاد نایف
چه‌ندین رۆژه رێك ل به‌ر مه كه‌فتین، یانكو سه‌رێن رێیا ل به‌ر خه‌لكى دبه‌رزه‌نه كو بۆچى حزبێن سه‌ره‌كى رێكناكه‌ڤن؟!، بلا باش ل بێرا مه بیت كو ئه‌م وه‌كو هه‌رێمه‌كا بچووك وه‌كو خاله‌كا بچووكین ل سه‌ر نه‌خشه‌یێ ڤێ جیهانێ ل نیڤا ئوقیانۆسه‌كێ مژدار داینه، ئه‌م یێن ل سه‌ر پشتا پاپۆره‌كێ و شلقێن مه‌زن یێن ئاڤێ یێن ب مه دكه‌ڤن، هه‌ر بایه‌ك ل دووڤ گێولێ خوه مه هاڤێته ره‌خه‌كى بۆ یێ دیتر، چو ژ قورسانان (رێگر) مشه‌تر ل به‌ر لێڤا كنارێن هشكاتیێ!. ئه‌ڤجا رێككه‌فتنا مه یا دوهى پێر كه‌فتیه د هه‌مان رۆژێن ئادار و نه‌وروز و سه‌رهلدانێن پیرۆز دا، ب لۆژیكا خوه هه‌ما ب ناڤێ وێ تشته‌كێ دلنیایه و پشتراسته، هه‌ر چو نه‌بیت ده‌رمانه‌كێ ب چاره‌سه‌ری یه بۆ ده‌روونێن ده‌نگێن مه یێن مه داین ب وێ گه‌رموگۆرێى ڤه، دونیا مه مه هه‌ژاند حه‌تا كو پرۆسا ده‌نگدانێ برێڤه‌چوویى ب سه‌ركه‌فتیانه، ئه‌ڤرۆ مادێ بیت هه‌ر بمینن (ئه‌ز چیا تو چیا رێككه‌فتن ما بێ ئیمزا؟)، ئه‌ڤجا گه‌له‌ك براده‌ر نه‌درازینه و دبێژن هوون هه‌ڤدو ب خیانه‌تێ تۆمه‌تبار دكه‌ن و چاوا ده‌ستێن خوه دكه‌نه تێدا؟!
بلا باش ل بیرا مه بیت كو دوور نه چین، به‌رى ساله‌كێ و چه‌نده‌كێ چو نه‌مابوو دا ئه‌م هه‌موو ب هه‌ڤرا تووشى كاره‌ساته‌كا وێرانكار بیت، بیراكێ دهێت ب شه‌ڤ و رۆژ ئه‌م ژ قه‌هرادا نه دنڤسیتن، چاره‌نڤیسێ مه كه‌فتبوو ده‌ستێ دوژمنان وه‌كو خوه بۆ مه كه‌ردكر!. به‌لێ حوكمه‌تا هه‌رێمێ ب چه‌ند ژده‌ستبه‌ردانێن هنده‌ك تشتێن كێم، ئه‌م چه‌ند بلندكرین پشتى هینگى!، كێم ژ خه‌لكى باوه‌ر دكر كو دێ عافیه‌تا مه‌زڤریت، ئه‌ڤرۆ ژى هه‌مان ترار و هه‌مان گه‌رماڤه ـ وه‌كو هنده‌ك دبێژن ـ ئه‌ڤ خوه‌چه‌ماندنه دێ مه ژ گه‌له‌ك ساچمه‌یێن كوژه‌ك پارێزیت و ئه‌و كه‌سێن ئیمزایا ڤێ رێكه‌فتنێ كرین ژ نووراتیا هه‌ردو حزبان ژى دو كه‌سێن به‌رنیاس و خوه دى دیرۆكه‌كا خه‌باتن، نه‌خواستن ڤێ سه‌رهلدانێ ب نه‌خۆشى ساخبكه‌نه ڤه و دیسا ژى په‌نجه‌كا دى یا كارا ئه‌نیا دیرۆكێ د مه‌ها ئادارا كوردان دا بخه‌ملینن و بێژنه جیهانێ و دوژمنان ئه‌م یێن هه‌یین و هوون نه‌كارن مه بنبر بكه‌ن، بلا هێشتا دوورتر نه‌چین، به‌رى دوسێ رۆژه‌كا كى بوو دگۆت چو كوردستان نینن ل وه‌لاتێ مه و یێ كوردستانا سه‌ربخوه دڤێت بلا بچیته كوردستانا باكۆرێ عیراقێ!!!. یا هه‌كه ئه‌م نه‌بینه ئێك سه‌ره‌راى هه‌موو لاوازیان ئه‌ڤه‌یه رێیا دورست، مانێ هه‌موو یێن دبێژن ئێكرێزى و ئێكرێزى، ئه‌ڤجا هه‌ر خرابیه‌كا هاتبیه كرن، باش بیت باشێن مه‌نه و خراب ببن ژى هه‌ر خرابێن مه‌نه و مالێ مه ئه‌ڤه یه مینا دبێژن!. بلا ئه‌م مفای ژ شاشیێن نه‌ته‌وه و ملله‌تێن دى ببینین، ئه‌ڤ عه‌ره‌ب یێن د ناڤ مه‌دا و ئه‌م یێن د ناڤ وان دا، هه‌ر ده‌م ئه‌و بخوه گله‌یێ ژ خوه دكه‌ن دبێژن، (عه‌ره‌ب رێككه‌فتن كو رێككنه‌كه‌ڤن)!!, ئه‌ڤه باشترین ده‌رسه، و هه‌كه تو یێ نه‌زان بیى به‌رێ خوه بده‌جیرانێ.!! هه‌كه نه دێ داعش جاره‌كا دى ب سه‌ر مه داهێنه ڤه، یێ گونه‌ه كری وه‌رن به‌رێ وى بده‌ینه رێیا راست و پێغه‌مبه‌رێ موسلمانان راست گۆت ده‌مێ گۆتى)انصر اخاك ڤتالم او مڤلوماً)، ئه‌ڤه كاك نێچرڤان بارزانى ئه‌و كر یا پێغه‌مبه‌رێ خودێ گۆتى و برایێ خوه یێ زالم بسه‌رخست؟!! ئه‌ڤ من ژى یا خوه گۆت و ئه‌ز هاتمه ڤه چو نه‌گه‌هشته من!!!.
نيشاندان
WP Facebook Auto Publish Powered By : XYZScripts.com