زنار تۆڤی
سالڤەگەرا 38 یا ئەنفالێ یە، هەر ژ 25 تەباخێ هەتا 6 ئیلۆنا سالا 1988 ێ ئەنفالا دەڤەرا بەهدینانە و دووماهی قووناغا ئەنفالێ بوویە، رژێما بەعسا ژ ناڤچوویی، ب هەموو جۆرێن چەكی هێرش ئینا سەر باژار و گوندێن كوردستانێ و د ئەنجامدا چار هزار و 500 گوندێن كوردستانێ كاڤلكرن و سۆتن و خەلكێ كوردستانێ دەربەدەر بوو.
هەروەسا ب چەندین قووناغێن جودا گوندێن دەڤەرا بەرواری بالا ژ ئالیێ رژێما بەعس ڤە، هاتینە سۆتن و كاڤلكرن و خەلكێ وان گوندان ل كەمپێن زۆرە مللی هاتینە خۆجهـكرن، قووناغا ل دووڤ وان دا ژ گوندێ مە ژی گرت، ل سالا 1987 رژێما بەعس هێرشەكا مەزن و بەرفرەهـ ئینا سەر دەڤەرا بەرواری بالا، ل 16.4.1987 ێ، مە گوندێ گركا بجهـ هێلا و ئەم چووینە گوندێ هرۆرێ ل دەڤەرا بەرواری بالا، هەر وێ سالێ گوندێ مە و زەڤی و ئاقارێ مە ژ ئالیێ جاش و خۆفرۆشان ڤە هاتە سۆتن و كاڤلكرن، ل ناڤەراستا سالا 1987، مە خانیەك ل گوندێ هرۆرێ ئاڤاكر و بۆ دەمێ سالەك و چار هەیڤا ئەم ماینە ل گوندێ هرۆرێ، پاشی ل 25.5.1988 ێ، هەوا ئەنفالێن رەش دەستپێكر، ل هەمان شەڤا 25.8.1988 گوندێ هرۆرێ هاتە بەردان و هەر وێ شەڤێ مە قەستا دەڤەرێن سەر سنوورێ توركیا كر و ئەم سێ شەڤا ماینە ل خەنۆكەیی، ل نێزیكی سنۆرێ باكورێ كوردستانێ، وی خەلكێ دەربەدەر، بزاڤ دكرن بچنە د ناڤا سنوورێ توركیا دا، بەلێ جەندۆرمان و هێزێن سۆپایێ توركی نەهێلا كەس بچیتە د ناڤا سنوورێ وان دا، ل گەل هندێ سۆپایێ توركی گۆت ئەم ناهێلین هوین بهێنە د ناڤا ئاخا توركیا دا و دێ هەوە تەسلیمی رژێما سەدامی كەین و ڤێ چەندێ ترسەكا مەزن ل دەف خەلكێ پەیدا كر و چارەنڤیسێ وی خەلكی خرابتر لێ هات و سەرێن رێیان ل بەر خەلكی بەرزەبوون، دەنگێ گریێ و زەمەزیرا زارۆیان د چوو بەر ئەسمانی و رەوش گەلەك خراب بوو، پاشی ل رۆژا 28.8.1988 ل گەل تاڤدانێ، ئەو خەلكە چوونە د ناڤ ئاخا توركیا دا، ل باكورێ كوردستانێ و سەرۆك ـ كۆمارێ توركیا تورگۆت ئۆزالی بریار دا، وی خەلكی وەكو پەنابەر ل توركیا وەربگریت، لەوما هەر زوو خەلك چوونە د ناڤ ئاخا توركیا دا و چوونە گوندێن شیڤرەزانێ، گەرەمیسێ، ئاشیتێ، ئارووشێ و ئەلەمینێ و بێرمانێ، هەر ل ئێڤاریا 28.8.1988 سنوورێ ئیراقێ ژ ئالیێ سەرباز و جاشان ڤە هاتە گرتن و جاشان ل سەرێ وان گر و ملان، دكرە گازی و دگۆتە وی خەلكی، وەرنە بۆ خۆ حوكمێ زاتی، وەرن نەڕەڤن.ئەم حەفتیەكێ ماینە ل گوندێ ئارووشێ، پاشی بۆ دەمێ سێ رۆژان ئەم چووینە سەربەستا ل ئاشیتێ ل گوندێ ئاشیتێ، ل دووڤ دا حوكمەتا توركی ئەم ب قەلابان ڤەگۆهاستینە كەمپا سلۆپیا، بەری بگەهینە سلۆپیا شەڤەكێ ماینە ل گوندكێ مەلێ، پاشی چووینە سلۆپیا دو حەفتیان ماینە ل وێرێ، حوكمەتا توركیا ل بەربوو، ئەو خەلكێ چووینە كەمپا سلۆپیا تەسلیمی رژێما ئیراقێ بكەن، بەلێ پاشی ئەم تەسلیم نەكرین، پاشی ل سەرێ هەیڤا 10 سالا 1988 ێ، ئەم چووینە كەمپا مێردینێ و چار سالان ماینە ل بن چادران، ل وێرێ مە گەلەك نەخۆشی و دەردەسەری دیتن، چەندین حەفتیان د ماینە بێی ئاڤ، بێی كارەب، ل بەر سەرما، گەرما هاڤینێ، تۆزێ و هەری و تەقنا زڤستانێ.
هەروەسا د ناڤا وێ كەمپێ دا، دەستهەلاتا توركی ل گەل ئەمنا ئیراقێ رێككەفتن و ل ئێڤاریەكێ نانێ ژەهركری دا خەلكێ وێ كەمپێ، د ئەنجامدا دو هزار و 52 كەس ب وێ ژەهرێ كەفتن و چەندەكا ژ وان گیانێ خۆ ژ دەست دا، هەر سال برینێن ئەنفالێ ساخ دبن و ناهێنە دەرمان كرن.
