ههر ژ كهڤندا مهزنان گۆتیه، میر ههر ههوجهى ماشێ یه، ههر چهنده خوارنا ماشا یا خۆشه، لێ یا دیاره میران حهز ژ خوارنا ماشان نهكریه و ماش خوارنا ههژارا بوویه، لهورا مهزنا ئهڤ گۆتنه گۆتیه، كو میر ههر ههوجهى ماشێ یه، لێ رۆژهك دێ هێت میر ژى دێ ماشێ خون، ههر چهنده ئهڤ ساله ژى حوكمهتا مه وهكر كو ئهم ژى وهكى میرى جارهكا دى ههوجهى ماشێ ببین و جارهكا دى ستێركێن خوه تژى ماش بكهین و ئێدى ژ نه چارى ل ماشان بڤهگهرین، لهورا نهبوونا گازا سپى وهكر كو جارهكا دى خهلك هزر ل دانانا سۆپا داران بكهن و ڤهگهرنه ژیانا بهرێ یا گوندان و خهلكێ ئهڤ ساله دلۆڤانى ب داران نهبریه و چامێن زهمانى ب سهرێ دارا ئیناینه، لهورا ههكه مرۆڤ سههردانا هندهك جهان بكهت، دێ بینیت كو فهرمان یا ب سهرێ داراى ئیناى و ئهڤ ساله بتنێ هندى 20 سالێن بهرى نوكه زیان یا گههشتیه دارستانێ و ههر چهنده خهلكێ ههقه، لهورا ههكه خهلكێ گاز نهبیت دێ دارا برن و دێ ل زڤستانا خوه پێ گهرم كهن، ههر وهسا ئهو گازا سپى ژى یا حوكمهتێ ژ دهولهت سهرێ خوه دایه خهلكێ ژى مرۆڤ نهشێت بكهته سۆپێ هندى یا پیسه و بهێن ژێ دهێت و حوكمهتێ وهكر كو ئهم جارهكا دى بزڤرینه ڤه ژیانا بهرى 30 سالان و ئهم دێ ئێدى ل بهر سۆپا دارا شهڤێن درێژ دهرباز كهین و ماشا خوه ژى خوین. ههروهسا نهبوونا كارهبێ ئاریشهكادى یا مهزنه بۆ خهلكێ گوندان و حوكمهتێ وهكر، كو جارهكادى ئهم لهمپه و فانۆسكێن خوه ههل بكهین و شهڤێن چریێن درێژ ل بهر رۆناهیا فانۆسكان ب بۆرینین و ماشا خوه ل تاریێ ب خوین، ههر چهنده ماوێ چهند سالان بوو مه لهمپه و فانۆس ژبیر كربوون، لێ حوكمهتێ وهكر كو جارهكا دى ئهم پێدڤى ببینێ، لهورا زۆربهیا شهڤان كارهبا گشتى زوو دچیت و ل گوندان خهلكێ موهلیده ژى نینن، لهورا یان دێ زوو نڤن، یان ژى دێ فانۆسكا خوه ههل كهن و دێ ل بهر چراكێ فانۆسێ شهڤبێریا خوه كهن، ڤێ جارێ ژى ئهم وهك میرى ههوجهى ماشێ بووین، یان ژى ئهم ههوجهى فانۆسكێ بووین، هندى مه ل بیره ئهم ژ فانۆسك و لهمپا قورتال نهبووینه و مه ب تاقێ خانى ڤه ههلاویستینه و ههر مه گۆتیه میر ههر ههوجهى ماشێ یه، لێ ڤێ جارێ میر ههوجهى سۆپێ و لهمپێ و فانۆسكێ ژى بوویه و نزا ئهم و میر دێ ژێ قورتال بین، یان ژى دێ ههر ههوجه بینێ و قورتال بوون بوو نینه.
نووترين نووچه
- سهرۆك بارزانی: گهفا قڕكرنا نهژادى ل دژى كوردان ل رۆژئاڤا ههيه
- پارتی یا بەرهەڤە هەر هاریكارییەكێ بۆ بڕێڤەچوونا پرۆسەیا ئاشتیێ ل توركیا پێشكێش بكەت
- هەڤڕكییا پۆستان ل ئیراقێ بۆ دەستكەفتێن كەسییە نەك بۆ خزمەتكرنا خەلكی
- دڤێت دەزگەهێ سەربازیێ ئیراقی پێگیری دەستووری بیت
- پارتی دو مەرجێن كوردانە بۆ پۆستێ سەرۆككۆماری هەنە
- مافێ پارتی یە وەك زۆرینەیا كوردان دەنگ داینێ پۆستێ سەرۆككۆماری دیار بكەت
- سەرۆك بارزانی و سام دەرمۆ پرسا پێكهاتەیان و رەوشا سیاسی گەنگەشەكر
- پارتی فوئاد حسێن و نەوزاد هادی بۆ پۆستێ سەرۆككۆماری بەربژار دكەت
- پارتی و ئێكەتی ل دۆر پێكئینانا كابینەیا نوو یا حوكمەتا هەرێمێ دێ كۆمبن
- گرنگە سەرۆككۆمارێ بهێت نوونەراتییەكا راستەقینەیا گەلێ كورد بكەت
زنار توڤي
نزانم ئهڤ وهلاته بۆ كێ خهمه؟!
ل وهلاتێ مه گهلهك تشتێن سهیر یێن ههین و نزا مرۆڤ چاوا و ژ كیرێ دهست پێ بكهت؟، و چاوا دهربرینێ ژێ بكهت؟، ژبهركو ل ڤى وهلاتى كهس ژ كهسێ یێ رازى نینه و ههر ئێك ب تمتمكا یێ دى دا ددهت، ههر ئێك یێ دى گونههبار و تۆمهتبار دكهت، ههروهسا ل ڤى وهلاتى هێشتا كهسێ نهگۆتیه ئهز یێ خهلهتم و فلان كێماتى ژ منه و ههر كهس خوه دبینیت دادوهر و یێ دروست، هێشتا مه نهزانیه خهلهتى و خهمساری ژ كێ یه؟. وهكو دیار خهلك ژى ژڤێ رهوشێ یێن بێزار بووی، ژبهركو قهیرانا ژى یا دایه دووڤ ئێك و یێن رادهێلنه ئێك، نزا دێ كهنگى ژێ ب دووماهى هێین و دێ ژێ قۆرتالبین، لهورا خهلك ل جادێ و ل تۆرێن كۆمهلایهتى دبێژن: “نزا ئهڤ وهلاته بۆ كێ خهمه”، ژبهركو خهلكێ مه گازندا ژ هندێ دكهن كو ئهڤه پترى 20 سالانه كارهبا گشتى یا د رهوشهكا بێ سهروبهر دا و خهلك خوزى یا رادهێلن، كا دێ كهنگى ژ دهنگێ موهلیدان و گهرما هاڤینێ رزگار بن، لهورا ههر دهمێ كارهبا گشتى بچیت، خهلك ل سهر تۆرێن كۆمهلایهتى وهسا دنڤیسن و ههروهسا دبێژن ژى، بۆ وهزیرێ كارهبێ خهم نینه كارهب بچیت و ما چ د خهما خهلكێ یه، چونكى ئهو یێ ل بهر كارهبێ و كارهبا وى ناچیت، ههكه دا ڤێ ئاریشێ چارهكهت، ئهم ژى ب دروستى نزانین كانێ بۆ وى خهمه یان نه و كانێ كارهبا وى 24 دهمژمێریه یان نه؟، ههروهسا دهمێ مووچه گیرو دبن و زوو نههێنهدان، خهلك دبێژن، وهزیرێ دارایى دخهمێ نینه و بهریكا وى یا فۆله و ههكه د خهمێ با دا زوو مووچێن خهلكێ هێنهدان، لهورا ل بهر مه ژى یا بهرزهبووى و نزانین بۆ وى ژى خهمه یان نه؟. یان ژى بهریكا وى یا فۆله یان نه؟. دیسا ل زڤستانێ ژى خهلك گهلهك پێدڤى گازا سپى دبیت و ئهڤ ساله بۆرى كو خهلكى ههمیێ بهرمیلا دویێ ژ بههرا خوه یا گازا سپى وهرنهگرت، خهلكى وهسا دگۆت، مانێ گاز و ههر تشتێ وهزیرێ سامانێن سرۆشتى بڤێت ل بهر دهستێ وى ههنه و بۆ وى خهلك خهم نینه و بلا ههر سر وان ببهت، ئهم ژى نزانین كانێ ل زڤستانێ وهزیرێ سامانێن سرۆشتى مایه ل بهر سهرمایێ یان نه؟، ژ ئهگهرێ نهبوونا گازا سپى، یان ژى سۆپێن وى پرى گازا سپى بووینه، ژبلى چهندین كارێن دى یێن رۆژانه كو خهلك پێدڤى دبنێ و دهمێ نههێنه قهتاندن خهلك ڤێ گۆتنێ دبێژن. لهورا ههر تشتهكێ خهلكێ مه هوسا وهردگریت و ب ڤى چاڤى دبینیت، لێ خۆزى مه زانیبا كانێ خهلك یێ ههقه یان ژى حوكمهت و جهێن شۆلهژێ؟، ههروهسا یا وهلێ هاتى ئێدى خهلك دبێژن بۆ من فلان تشت نهخهمه و یێدى دبێژیت بێڤان تشت بۆ من نهخهمه، یا ل بهر مهژى بهرزه بووى، لهورا ئهم ژى نزانین، ئێدى ئهڤ وهلاته بۆ كێ خهمه و بۆكێ خهم نینه؟!.
كوردینو بێ هیڤى نهبن!
چ جاران دیرۆك راستیان ژبیر ناكهت، خوه ههكه چهند سال و چهرخ ژى ب سهردا ببۆرن، ل دووماهیێ راستى ههر دێ دیار بیت، لهورا پشتى سهد سال ل سهر كۆمكوژى و قركرنا ئهرمهنان بۆرین، ژ نوو ل رۆژا 2/6/2016 پهرلهمانێ ئهلمانیا ب زۆرینهیا دهنگێن پهرلهمانتاران ئهڤ قركرنه وهكو جینۆساید ناساند، ئهڤ قركرنا ئهرمهنیان ل شهرێ جیهانیێ ئێكێ د ناڤبهرا سالێن (1915_1916) دا سهر دهستێ دهولهتا ئۆسمانى هاتیه روودان و د وێ قركرنێ دا ئۆسمانیان ب رهنگهكێ نهمرۆڤانه و دوور ژ ههمى رهوشت و ئهخلاقێن مرۆڤایهتیێ زارۆ و ژن و گهنج و كالێن ئهرمهنیان كوشتن بێى ههبوونا هیچ هێجهتهكێ، لێ ژبهركو ئهرمهنى بوون دكوشتن، ههروهسا دهولهتا ئۆسمانى ئهو ئهرمهنیێن ب هزاران سالان ل سهر وێ ئاخا باب و كالێن وان لێ دژیان دهرخستن و ل دۆرێن ملیۆنهك و 500 هزار ئهرمهنى د وێ قركرنێ دا هاتنه كوشتن و دهولهتا ئۆسمانى ئهرمهنى تهرابهرا كرن و بهرهف چارهنڤیسهكێ نهدیارڤه برێكرن.
ههر چهنده ئهڤا ب سهرێ مه كوردان هاتى ژ یا ئهرمهنیان مهزنتره، ژبهركو ب درێژاهیا دیرۆكێ كورد تووشى دهربهدهرى و مالوێرانیێ و قركرنێ بووینه و ل سهر جه و وارێن وان هاتینه دهركرن، ل سهر دهستێ رژێمێن گۆربهگۆرێن عیراقى ههر ژ دهمێ دروستبوونا دهولهتا عێراقێ ل سالا 1921 ههتاكو ژناڤچوونا رژێما بهعسیان ل سالا 2003. ههروهسا ههردهم رژێمێن عیراقى ڤیایه مافێ كوردان بن پێ بكهن و مللهتێ مه ژ ههمى مافێن وى بێ باركریه، لێ كوردان دهست نهداهێلایه و ههردهم بهرهڤانى ژ خوه كریه، ههر ل سهر دهمێ شۆرهشا ئیلۆنێ و گۆلانێ و ههتاكو سهرهلدانا سالا 1991، سهرهراى وێ ستهم و زۆریا حوكمهتێن ئێك ل دووڤ ئێكێن عیراقێ ب سهرێ مه ئیناین، كو چ نهمایه وان ب سهرێ مللهتێ مه نهئیناى، ههر ل سالێن (1970_1980) و ب چهندین قووناغان كوردێن فهیلى ل سهر جه و وارێن وان هاتینه دهركرن و ب هزاران هاتینه كوشتن، ههروهسا جینۆسایدكرنا ههشت هزار بارزانیا ل سالا 1983 و دیسان ههوا ئهنفالێن رهش ل دژى مللهتێ كورد ل سالا 1988 كو تێدا 4500 گوندێن كوردستانێ هاتنه كاڤلكرن و 182 هزار كورد هاتنه كوشتن و ههتا نوكه ژى چارهنڤیسێ وان نهیێ دیاره و كورد چ جاران وان رۆژێن رهش ژبیر ناكهن، دیسان هاتنا قهلهرهشكێن داعش و هێرشا وان بۆ سهر كوردستانێ و گرتن و كوشتنا ب هزاران زارۆ و ژن و گهنج و كچێن كوردێن ئێزدى تاوانهكا دى یه دژى مللهتێ كورد هاتیهكرن و ئهڤه ژى ئێكه ژ وان قركرنێن چهندین ساله ب سهرێ مه كوردان دا هاتى، ههروهسا قركرنا كوردان ل سهر دهستێ كۆمارا توركیا د شۆرهشا ئاگرى دا ل سالا(1927_1930) ل گهلیێ زیلان خالهكا دى یا رهشه ب ناڤ چاڤێن توركیاڤه و ئهو برین ناهێته ژبیركرن، لهورا ئهو جینۆسایدێن ب سهرێ مه هاتین ژ یێن ههمى جیهانێ پترن، لێ ههتاكو نوكه ژى وهلاتێن جیهانێ دانپێدان ب ڤان جینۆسایدان نهكریه و جیهان یا د گوهێ گاى دا نڤستیه و ئاگهه ژ مه نینه، لێ دڤێت ئهم بێ هیڤى نهبین و درژد بین و خهباتێ بكهین، لهورا پێدڤیه حوكمهتا ههرێمێ ب ههمى شیانێن خوهڤه كار بكهت و كهیسێن جینۆسایدا كوردان بگههینیته دادگهها نێڤدهولهتى و ههمى وهلاتێن جیهانێ، ژ پێخهمهت دانپێدانێ ب جینۆسایدا مللهتێ كورد بكهن، لهورا ههكه سهد سالێن دى ژى بچن دێ ههر جیهان دانپێدانێ پێ كهت، ل وى دهمى ئهم دێ بۆ گهلێن جیهانێ دهینه دیاركرن، كو چهندین جاران مللهتێ مه ل سهر دهستێ دوژمنێن مه یێن تورك و عهرهب و فارس هاتینه قركرن، لهورا ههر دێ بێژم كوردینو بێ هیڤى نهبن، ئهو رۆژ دێ هێت كو وهلاتێن جیهانى قركرنا كوردان بدهنه ناسكرن.
ب ڤی رهنگی بهرواری بالا دێ بیته بهرواری ڤالا
ههر ژ كهڤندا و ب درێژاهیا دیرۆكێ كوردستان بوویه مهیدانا شهڕ و شۆران و دوژمنان شهڕ ل سهر مه سهپاندیه و ژبهر ڤێ چهندێ خهلكێ مه چهندین جاران رهڤ و دهربهدهری و مالوێرانی و ژیانهكا سهخت و دژوار دیتیه و ئهڤه قهدهرا مه كوردان بوویه، دیسا بهری سهدان سالان باپیرێن مه بۆ بابێن مه گۆتیه و بابێن مه ژی بۆ مه ڤهگێرایه كو دێ چێ بیت، لێ سهرێ مه ژی سپی بوو، هێشتا چێ نهبوویه و رۆژانه ژیانا خهلكی دكهڤیته د مهترسیێ دا و ئهڤ دهڤهره جارهكا دی یا كهفتیه بهر لێمشتا تۆپ و فروَكێن توركی، لهورا پشتی تێكچوونا قووناغا پێڤاژویا ئاشتیێ ل توركیا و پهیدابوونا شهڕ و ئالۆزیان د ناڤبهرا پهكهكێ و حوكمهتا توركیا دا ڤێ چهندێ باندۆرهكا نهرێنی و خراب كریه سهر رهوشا دهڤهرێن سنووری یێ د ناڤبهرا ههرێما كوردستانێ و توركیا دا ب گشتی و ل دهڤهرا بهرواری بالا ب رهنگهكێ تایبهتی، ژبهركو هێزێن پهكهكێ ب رهنگهكێ دیار و بهربهلاڤ ل دهڤهرێن سنووری و ل نێزیكی گوندان خۆجه بووینه و دهڤهرا بهرواری بالا ئێكه ژ وان دهڤهران كو ههڤ سنووره دگهل توركیا، لهورا ڤێ چهندێ وهكریه كو نوكه دهڤهرا بهرواری بالا ببیته مهیدانا شهری د ناڤبهرا پهكهكێ و توركیا دا، كو خهلكێ دهڤهرا مه نهتێ و نهژێ، ههروهسا نوكه رۆژانه دهڤهرا بهرواری بالا ژلایێ سۆپایێ توركیا ڤه ب تۆپ و فرۆكان دهێته بومبه بارانكرن و زۆر جاران فرۆكه جهێن گهلهك نێزیكی گوندان بوردۆمان دكهن و زیانێن ماددی یێن مهزن گههاندینه خهلكێ ڤێ دهڤهرێ، ههر چهنده خهلكێ ڤێ دهڤهرێ نه دچهپهران دایه كو شهری دگهل داعشێ بكهن و ژ وی لایڤه ئارامی و تهناهی ههیه، كو داعش ژڤێ دهڤهرێ ددوورن، لێ رۆژانه خهلك یێ د جهنگهكێ دژوار دا كو حوكمهتا توركیا ب زۆری ل سهر خهلكی سهپاندیه و زۆلمهكا مهزن ل خهلكێ مه دكهن، كو ههر ل دهمێ بهربانگێ سبێ و نیڤرۆ و ئێڤاران و ههتا دبیته شهڤ ل جهێ خهلك گۆهداریا دهنگێ ئاوازێن خۆش و بلبلان بكهن و تهماشهی وهرزێ بهارا رهنگین بكهن، گۆهداریا دهنگێ تۆپ و بۆمبان دكهن و ئاگهه ژ چ دهنگێن دی نابیت، كو چیا و گوند و جهێن گۆزاری بوردۆمان دكهن. ههروهسا زارۆك و پیر و كال ههست ب ئارامیێ ناكهن و شهر و ئالۆزی هاتینه بهر دهرگههێ خهلكێ مه و ئێدی ژیانا خهلكێ ڤێ دهڤهرێ گهلهك نهخۆش بوویه و ههست ب ترسێ دكهن، چونكی جهلادێن توركی نزانن دلۆڤانیێ ب كهسێ ببهن و چ پهكهكێ ب كوژن یان ژی خهلكێ ڤێ دهڤهرێ وهسا د هژمێرن ههر كوردن، ههروهسا پهكهكێ ژی ئهو ههستا مرۆڤایهتیێ و كوردینیێ ل دهف نینه كو خوه ژ گوندان دوور بكهن و مهترسیێ ل سهر خهلكی پهیدا نهكهن، چونكی خهلك ئێدی نهوێرن بچنه چیایان و نهوێرن ئێدی ژ گوندێن خوه دوور بكهڤن و وهكو دیار پهكهكێ دڤێت ئهڤ دهڤهره خراب ببیت و خهلك ڤێ دهڤهرێ بهردهت، ئهگهر نه دا خوه ژ گوندان دوورئێخن. دیسان ژ ئهگهرێ بوردۆمانكرنا بهردهوام یا دهولهتا تورك كو ئهڤه بۆ ماوێ پتر ژ سالهكێ یا بهردهوامه، لێ هێشتا حوكمهتا ههرێمێ چ ههلویست دیار نهكرینه، كو ئێدی تۆپ و فرۆكێن توركیا گوندان تۆپباران نهكهن، لهورا خهلك بۆ پاراستنا گیانێ خوه دێ نهچاربن ڤێ دهڤهرێ چولكهن و ههر چهنده گهلهك ژ خهلكێ ڤێ دهڤهرێ گوندێن خوه بهرداینه و چولكرینه ژ ترسا بوردۆمانكرنێ، لهورا ب ڤی رهنگی ئێدی دهڤهرا بهرورای بالا دێ بیته بهرواری ڤالا.
ئهوا حهشد شهعبی دكهت چ ژ كریارێن داعشێ كێمتر نینه
ئهوا مه هزر بۆ دكر و ژێ چاڤهرێ ل خۆرماتوو روودا، یا دیاره ئهو كریارێن حهشد شهعبی د ڤان رۆژان دا كرین دێ ل گهلهك جهێن دی روودهن و ژمێژه پلان بۆ هاتیه دارێژتن یێن بۆ خوه ل دهلیڤان دگهرهن، لێ هێشتا بۆ ههلنهكهفتیه، لهورا ههكه گڤاشتن ل سهر وان نههێته كرن ژلایێ حوكمهتا ههرێمێ ڤه و رێ ل بهروان نههێته گرتن، ئهو دێ گهلهك ئالۆزیان بۆ خهلكێ ههرێمێ دروست كهن. حهشدا شهعبی ئهڤ چهنده ب هاریكاریا ئیرانێ و هندهك لایهنێن دی ئهنجامدایه و مهبهستا وان دگهل ئیرانێ و وان لایهنان ئهوه كو دۆخێ سیاسیێ ههرێما كوردستانێ و ئهڤ رهوشا ئارام یا ئهم تێدا دژین تێكبدهن، نوكه مهترسیا حهشد شهعبی ل سهر وان دهڤهرێن دهرڤهی ئیدارا ههرێمێ گهلهك یا ههی و گهلهك زهحمهت بۆ دڤێت ههتاكو بهێنه دهرخستن ژ وان جهان، ژبهركو ههر رۆژ ب هێجهتهكێ حهشدا شهعبی یێن هێزێن خوه ل وان دهڤهرێن كێشه ل سهر ههی زێده دكهن ب مهرهما شهرێ داعشێ و رزگاركرنا وان دهڤهران ژ دهستێ داعش. لێ مهرهما وان یا دیاره كو ئهو ژ بهر شهرێ داعشێ نههاتینه وان دهڤهران ل خۆرماتوو و كهركوكێ، لێ مهرهما وان یا سهرهكی ئهوه كو دربهكێ ل هێزێن پێشمهرگهی بدهن و ئهڤه چهندین جاران مهرهما وان یا پیس و چهپهل دیاربوو، چهندین پێشمهرگه ژلایێ وان ڤه د وان روو ب رووبوونا دا هاتنه شههیدكرن، چنكو ل وان دهڤهران حهشدا شهعبی نه شیایه شهرێ داعشێ بكهت و نهشیایه بهوَستهكا ئاخێ ژی ژ دهستێ وان رزگار بكهت، لهورا ئهوێ پێشمهرگهیان شههید بكهت چ جوداهی د ناڤبهرا وان و داعشێ دا نینه بۆ مه وهك كورد. باشتره ئهم بێژین حهشدا سهفهوی یان حهشدا داعشی و ئهڤ ناسناڤه گهلهك ژ بهژن و بالا وان دهێت، ژبهركو حهشدا شهعبی و داعشێ ئێك مهرهم پێ ههیه كو ئهو ژی كوشتنا كوردانه.
ههر چهنده ههر ژ دهمێ هاتنا حهشد شهعبی ل سالا 2014 بۆ دهڤهرێن خۆرماتوو و كهركوكێ سهرۆكێ ههرێما كوردستانێ مهسعود بارزانی ئهو لایهنێن بالا دهست ل وان جهان هایداركرن ژ مهترسیا حهشدا داعشی، كو نابیت رێ ب وان بهێتهدان بهێنه دناڤ ئاخا ههرێمێ دا، لێ مخابن وان لایهنان ئهڤ چهنده ب سستی ڤهگرت و هزرا ئهڤرۆكه نهكر و رێ دا وان ب ساناهی بهێنه دناڤ ئاخا ههرێمێ دا، لهورا پشتی شههیدكرنا چهندین پێشمهرگهیان و سوَتنا چهندین مالێن كوردان ژنوو وان لایهنان هزر كر كو دڤێت حهشدا شهعبی ژ وان دهڤهران بهێته دهرخستن، لێ دهخستنا وان دێ گهلهكا ب زهحمهت بیت، چنكو وان ههموو هزر كرینه و جهێن خوه باش چێكرینه و ههكه زۆری ل وان نههێته كرن ئهو دهرناكهڤن، چنكو حهشدا شهعبی و هندهك لایهنێن كوردی نوكه ب ههڤڕا یێن بووینه پالێن ئیرانێ و دڤێن سهقامگیریا كوردستانێ ژناڤ ببهن.
هندی زووتره ژ بهغدا ڤهبین دێ بۆ مه باشتربیت
عێراق بوویه وهلاتێ قهیرانا و ههتانوكه بهغدایا پایتهخت نهشیایه ببیته ناڤهندا بریاردانێ و ههروهسا نهشیایه ببیته جهێ چارهكرنا ئاریشهیان و بهرۆڤاژی كێشه و ئاریشه مهزنتر لێكرینه، لهورا رۆژ بۆ رۆژێ قهیرانێن عێراقێ مهزنتر و كورتر لێ دهێن، ههروهسا نوكه رهوشا عێراقێ گهلهك ئالۆز بوویه و ئێدی بهغدا وهلێ هاتیه كو لایهنێن سیاسی یێن عهرهب باوهری ب ئێك نهمایه و ل بهغدا بوویه چیڤ كێشكانێ و ههر ئێك چیڤی بوَ لایێ خوه راد كێشیت، یا دیاره كو لایهنێن شیعی دڤێن بالا دهست بن و جارهكادی دهستههلات بكهڤیته دهستێ وان و بكهیفا خوه دهستههلاتێ ل بهغدا برێڤه ببهن، نوكه شهرێ مهزن سهرا كوَرسیكی یه و بتنێ چاڤێ وان ل بهغدایه و ههموو دهڤهرێن دی یێن عێراقێ ژبیر كرینه و پشتگۆه خستینه، ههروهسا پهرلهمانێ عێراقێ ئێدی نهبوویه جهێ ژێك ڤاڤارتنا كیشهیان و ههیبهت و ناڤێ خوه ژ دهستدایه و نه شیایه ببیته جهێ رهزامهندیا خهلكێ.
ههر ژمێژه شیعه ههول ددهن بهاریكاریا ئیرانێ و وهلاتێن دهوروبهر ئالۆزیان پهیدا بكهن، ژ پێخهمهت بشێن جارهكادی دهستههلاتهكا تاك لایهنی ل عێراقێ بگرنه دهستێ خوه و ههرسێ سهرۆكاتیان ئیفلیج بكهن و كهسێن د بهرژهوهندا خوه دا داننه سهر كوَرسیێ دهستههلاتێ، ئهڤ چهندا دهێتهكرن ب پشتهڤانیا نوری مالكی و حهشدا شهعبی یه، مهرهما وان ژ ڤێ رهوشێ ئهوه كو پێگههێ كوردان ل بهغدا لاواز بكهن و ههروهسا لایهنێن سوننی ژی ژ ههڤدو دوور بكهن و ژ دهستههلاتێ دووربێخن.
ههر چهنده ئهم وهك مللهتێ كورد نوكه د قۆناغهكا ئالۆز دا دبوورین و توشی چهندین قهیران و گرفتان بووینه، لهورا دڤێت د نوكهدا ئهم د ئێكگرتی بین و ناڤمالیا كوردی رێكبێخین، چنكو بهغدا بۆ مه چ ناكهت، رۆژ بۆ رۆژێ شیعه دژی بهرژهوهندا مللهتێ مهنه و ههلویستێن تۆند بهرانبهر دوزا كوردی دیار دكهن، وان نهڤێت هندی سهرێ دهرزیكێ ژی كورد بگههنه ئارمانجێن خوه، ههكه ژ دهستێ وان بهێت، دێ ژ داعشان خرابتر سهرهدهریێ دگهل مللهتێ مه كهن، لهورا باشتره د ڤی باردۆخی دا ئهم ب ئێكجاری خوه ژ بهغدا ڤهكێشین و بریارا سهرۆكێ ههرێمێ بجه بینین و ریفراندۆمێ ل كوردستانێ ئهنجام بدهین، چنكو هندی زووتره ئهم ژ بهغدا ڤهبین بۆ مه باشتره، ژبهركو ب هیڤیا شیعهیان و بهغداڤه ئهم چ جاران ناگههینه مافێن خوه و نابینه وهلاتهكێ سهربهخۆ، لهورا كورد دبێژن: (رهشوَ بدهستێن خوه، ههكه دێ ئاڤ تهبهت).
وهكو دیار مانا كوردان ل بهغدا چ مفا تێدا نینه، چنكو نوكه كورد ل بهغدانه لێ بوَدجه و مووچه نینه، ههروهسا كورد ل بهغدانه لێ هێشتا ماددێ 140 وهك خوهیه و نههاتیه بجه ئینان و هێشتا ئهوا بهعسیان ل دهمێ دهستههلات وهرگرتی ل سالێن حهفتیان ل سهدێ بووری دگوت: سهبارهت دهڤهرێن دهرڤهی ئیدارا ههرێمێ نوكهژی شیعه یێ وێ دبێژن، لهورا نوكه مانا كوردا ل بهغدا چ بهرژهوهندا كوردان تێدا نینه.
ههروهسا حهیدهر عهبادی سهرۆك وهزیرێ عێراقێ ب هێجهتا پێكئینانا حوكمهتهكا تهكنۆكرات و ئهنجامدانا چاكسازیان،حوكمهتا بهرێ ههلوهشاند و حوكمهتا نوو ئاڤاكر،بتنێ مهرهما وی ئهو بوو كو كوردان ژ پۆستێن دهولهتێ دووربێخیت و ب كهیفا خۆ هندهك كهس دهست نیشانكرینه،ئهڤهژی نه دبهرژهوهندا كوردان دا بوویه و شیعهیان ڤیایه ب ڤێ چهندێ كوردان ژ بهغدا دوور بكهن،لهورا دڤێت ئێدی كوردان باوهری ب حوكمهتا عێراقێ نهمینیت،چونكی پشتی ئازادكرنا عێراقێ ل سالا 2003 ههتانوكه ژبلی كێشه و ململانێن سیاسی دگهل حوكمهتا عێراقێ،هیچ تشتهك ب دهست كوردان نهكهفتیه،لهورا هندی زووتر ژ عێراقێ ڤهبین بۆ مه باشتره.
364 رۆژێن سالێ ژینگهه و سرۆشتێ وهلاتێ مه د ناڤ گلێشی دا دخهندقیت
پاقژ راگرتنا ژینگههێ ئهركهكێ نیشتیمانییه ل سهر ملێن ههر تاكهكێ ڤی وهلاتی و دڤێت ئهم گرنگیێ بدهینه پاقژیا ژینگهها خوه، ژبهركو ژینگهها مه مالا مهیه و دڤێت ئهم مالا خوه ب پارێزین و ههردهم پاقژ بهێلین، لهورا ئێك ژ نیشانێن پێشكهفتنێ و شارستانیهتێ ل ههر وهلاتهكێ جیهانێ پاقژ راگریا ژینگهها وانه، ههروهسا ژینگهها ساخلهم دێ وهلاتهكێ ساخلهم و نڤشهكێ نوو بهرههم ئینیت و كهسێن د ناڤ وی وهلاتی ژی دا دژین دێ دوور بن ژ ههموو ئێش و نهخوهشیان.
ههلبهته كوردستان ژی ئێك ژ وان وهلاتانه یێن كو خۆدان ژینگهههكا جوان و دیمهنێن سهنجراكێش لێ ههنه، لێ هێشتا ئهم فێری رهوشهنبیریا پاقژیێ نهبووینه ل ڤی وهلاتی و ئهم نهشیاینه ب دروستی ژینگهها خوه پاقژ راگرین و ئهم كوردستانێ ب مالا خوه نزانین، لهورا ههر ئێك ژ مه ژ لایێ خوهڤه تێرا خوه ڤێ ژینگهها وهك ب ههشتێ پیس دكهت و ههر تشتهكێ خوار چ ل دهمێ هاژووتنا ترۆمبێلێ دا بیت دێ هاڤێژیت و هزر ناكهت كو ئهو یێ ژیانا خوه تێكددهت و یێ مالا خوه پیس دكهت، ههروهسا یا ژڤێ خرابتر ئهوه دهمێ خهلكێ مه قهستا سهیرانان دكهن، ههر ئێك ژ لایێ خوهڤه دێ بهرمایكێن خوه هێلیته دجهدا و راناكهت و هزر ناكهت كو ئهڤه وهلاتێ وی یه و دڤێت پاقژ راگریت و نههێلیت پیس بیت، ههست ب هندێ ناكهت كو ئهو یێ بێ رێزیێ بهرامبهر وهلاتێ خوه و ژینگهها خوه دكهت، لهورا دهمێ مرۆڤ تهماشهی وهلاتێن خهلكێ دكهت، دێ بینیت كو ژینگهها خوه وهك بیبلكا چاڤێن خوه دپارێزن و ههر ژ بچووكی ههتا مهزنی ناهێلن گلێشهك ژی بكهڤیته سهر جادێن وان و ناهێلن خهلكێ بیانی ژی وهلاتێ وان پیس بكهن و رێزێ ل ئاخا خوه دگرن.
لێ ل وهلاتێ مه بهرۆڤاژی ڤێ چهندێ یه و ئهم رێزێ ل ئاخا خوه ناگرین و هندی ژ مه بهێت ئهم پیس دكهین و بتنێ ئهم ب گوتن دبێژین، ئهم حهز ژ ئاخا وهلاتێ خوه دكهین، لێ بكریار یا دیاره كا ئهم چهند گلێشی و بهرمایكێن خوه دكهینه سهر ڤێ ئاخا پیرۆز، لهورا دیاركرنا رۆژهكێ وهك ههوا پاقژكرنا ژینگههێ ل دهوكێ ل سالێ ههمووێ تێرا هندێ ناكهت كو ئهم بێژین ئهم یێ ژینگهها خوه و وهلاتێ خوه پاقژ دكهین، ژبهركو 364 رۆژێن دی یێن سالێ وهلاتێ مه ناهێته پاقژكرن و ژینگهها وی دناڤ گلێشی را د خهندقیت و چاڤێن وی دمیننه زیق و زل و ل هیڤیا 4/4 دمینیت، ههتاكو هندهك خێر خواز بهێن و هندهك ژ ڤێ ژینگههێ پاقژ بكهن و بهرمایكێن خهلكێ و گلێشێ وان راكهن و وهكو دی وهكی كورد دبێژن: (پهرێ وهكی بهرێ)، ههر دهمێ ئهو رۆژ ب دووماهی بهێت،ج ارهكادی دێ خهلك ڤێ ژینگههێ و سرۆشتێ جوانێ كوردستانێ پیس كهن و وهكی بهرێ لێ كهن و پاقژ ناكهن.
سپێده باش وهلاتێ بهێنڤهدانا
براستی ئهم ل وهلاتهكێ سهیر دژین و مه دڤێت ئهم د زانا بین و پهرتووكا نه خوینین و خوه فێری زانیاریان نهكهین و خوه پێش نه ئێخین ب زانستی، دیسا مه دڤێت ئهم زهنگین و حال خوهش بین و زهحمهتێ نهبهین و كار نهكهین و مه دڤێت د كۆلینكا سۆپێ را پاره بۆ مه بهێن، ههروهسا مه دڤێت ئهم ماسیا ب خوین و نهبینه ماسیگر و دڤێت ئهم تهر ژی نهبین.
ئانكو گهلهك جارا دهمێ دهیباب دبێژنه كورهكێ خوه ئینشالا نهكهی و ب خوهی، ئاها ئهم ژی یێن وهلێ هاتین و مه دڤێت كار نهكهین و ب خوین، مه ههموو تشت دڤێن، لێ مهنهڤێت خوه زهحمهت بدهین و وی تشتێ مه دڤێت ب دهست خوهڤه بینین، ههر چهنده بۆ هندهكا وهسایه و ب ساناهی ل ڤی وهلاتی ههر تشتێ وان دڤێت بۆ دهێت و دشێن ب دهست خوه بێخن بێی هیچ زهحمهتهكێ ببهن.
لێ یا من دڤێت بێژم ئهوه كو مه نڤشهكێ گهلهك بێسهروبهر بهرههڤكریه و پاشهرۆژهكا شهپلی ل هیڤیا وانه، هوون ژی ڤێ چهند دزانن، ژبهركو نڤشێ ئهڤرۆ فێری تهمبهلیێ و بێ كاریێ بوویه و دبنی را حهژ كاری و خوه پێگههاندنێ ناكهت و ههموو هیڤی و داخوازیێن وان بێهنڤهدان و خهوه، ژبلی ڤێ چهندێ چ د مێشكێ وان دا نینه.
لێ ئهڤ چهنده ژی ههر نه بناسێن وانن، براستی مه سیستهمهكێ زۆرێ لاواز و بێ سهروبهر یێ پهروهردێ ل كوردستانێ ههیه و چ دووڤچوون بۆ پرۆسا پهروهردێ نینه، ژبهركو وهلاتێ مه وهلاتێ بهێنڤهدانایه و دڤێت ب ڤێ چهندێ بهێته بناڤكرن، مرۆڤ تێناگههیت هنده بهێنڤهدان بۆ چنه و چ مفا تێدا ههیه،ل هورا ل ڤی وهلاتی رۆژهكێ دویا بهری ههر بهێنڤهدانهكێ دهوام یا سست و لاوازه و پشتی ههر بهێنڤهدانهكێ ژی دو سێ رۆژان دهوام یا سسته و ب درۆستی ناهێهكرن، میناك ههیڤا ئادارێ ههمووێ حهفتیهكێ دهوام ناهێته كرن، ههروهسا دهمێ دبیته سهرێ سالێ یان ههر بهێنڤهدانهكا دیتر ههكه بكهڤیته رۆژێن سێشهمبی پشتی هنگێ قوتابی ب خوه رۆژێن ل دووڤرا ب خوه دكهنه بهێنڤهدان و ناچنه دهوامێ.
یان ژی ههكه بهێنڤهدانهك كهفته ئهینیێ حوكمهت دێ بریارهكێ دهت كو رۆژێن شهمبی و ئێكشهمبی ههردو دێ بنه بهێنڤهدان، ئهرێ بۆچی و ژبهر چ دێ ئهو ههردوو رۆژ بنه بهێنڤهدان؟ لهورا ئهم دبێژین كوردستان بوویه وهلاتێ بهێنڤهدانا و ئێدی قوتابی ب كهیفا خوهنه و ئهو ب خوه بهێنڤهدانا د دانن و ئاگهه ژ بریارێن وهزارهتا پهروهردێ نینه، لهورا پشتی بدوماهیك هاتنا بهێنڤهدانێن ئادارێ و دوباره دهستپێكرنا دهواما قوتابخانێ ل 26. 3. 2016 ل گهلهك قوتابخانان دهوام نههاتیه كرن و قوتابیا ب خوه كریه بهێنڤهدان و نهچووینه قوتابخانان، ئهڤ چهنده دیاردكهت كو ههتانوكه ئهم نه شیاینه نڤشهكێ ساخلهم و خهمخوَر بهرههڤ بكهین كو حهز ژ خواندن و پێشكهفتنێ بكهت.
لهورا دڤێت ئێدی بهێنڤهدان بهێنه كێمكرن و ئێدی خهمهك ژڤی بابهتی بهێته خوارن، ژ پێخهمهت بشێین نڤشهكێ نوو و باش بهرههڤ بكهین، ئهگهر ئهڤ چهنده نههێتهكرن، دێ رهوشا پهروهردێ و خواندنێ ل كوردستانێ سال بۆ سال بهرهف خرابتر ڤه چیت و دێ ئهڤ وهلاته بیته وهلاتێ بهێنڤهدانا.
ههتانوكه ل ههرێما كوردستانێ مفا ژ گهشتوگۆزارا زڤستانێ نههاتیه وهرگرتن
دهڤهرا بهرواری بالا ئێك ژ وان دهڤهرێن جوان و سهرنج راكێشه بۆ گهشتوگۆزارا زڤستانێ ل سهرانسهری پارێزگهها دهوكێ، سهرهرای ڤێ چهندێ ههتاكو نوكه مفا ژێ نههاتیه وهرگرتن و حوكمهتا ههرێمێ و جهێن شۆلهژێ هێشتا هزر ل ڤێ چهندێ نهكریه كو مفا ژ ڤی كهرتی بهێته وهرگرتن، ژبهركو ئهڤ دهڤهره دهڤهرهكا چیایی و پری دول و نهاله و ل وهرزێ زڤستانێ گهلهك یا گوَنجایه كو چهندین جۆره یاریێن بهفرێ لێ بهێنه ئهنجامدان و ههروهسا سالانه رێژهیهكا باش یا بهفرێ لێ دباریت و ماوهیهكێ زۆر دمینیت و ناحهلیێت، ئهڤهژی دێ بیته هوَكارهكێ باش كو سالانه ل ڤێ دهڤهرێ ڤیستهڤالێن زڤستانی ژی بهێنه ئهنجامدان، سهرهرای ههبوونا سرۆشتهكێ جوان و بالكێش ل ڤێ دهڤهرێ.
دیسان ئهڤ دهڤهره یا ههڤ سنۆره دگهل وهلاتێ توركیا و ههكه حوكمهتا ههرێمێ ههول بدهت دێ شێت سهرنجا گهشتیاران راكێشیت بۆ ڤێ دهڤهرێ ژ توركیا و باشوورێ عێراقێ و ههروهسا خهلكێ پارێزگهها دهوكێ ب خوهژی دێ قهستا ڤێ دهڤهرێ كهن و پرۆژێن گهشت و گوزاری ژی دێ هێنه ئاڤاكرن و گهلهك دهلیڤێن كاری ژی د ڤێ قهیرانێ دا دێ پهیدا بن، لێ ههكه حوكمهت ملێن خوه بدهته بهر و دبیت سهرنجا وهلاتێن ئهورۆپی بهێته راكێشان و ئهڤه دێ بیته داهاتهك باش ههم بۆ خهلكێ ڤێ دهڤهرێ و ههم ژی بۆ حوكمهتا ههرێمێ و دێ بیته ژێدهرهكێ بهێز بۆ ئابوورا وهلاتی ژی. دگهل ڤێ چهندێ خهلك دێ هزركهن كو حوكمهت گرنگیێ ب دهڤهرا وان ددهن و ئهڤه دێ بیته هوَكارهك كو گوند ژی بهێنه ئاڤاكرن و جارهكادی كهرتێ چاندنێ ژی دێ گهشهكرنێ ب خوه ڤه بینیت و خهلك دێ پتر بهرێ خوه دهنه كارێ چاندنێ، دێ كارێن وهبهرهێنانێ ل ڤێ دهڤهرێ هێنه ئهنجامدان و پرۆژێن گهشتیاری یێن گرنگ دێ هێنه ئاڤاكرن و ههروهسا فێقی و دهرامهتێ ڤێ دهڤهرێ دێ باش چیت و ئێدێ زهحمهت و خۆها جۆتیاران ب ههروه ناچیت و دێ ب كهدا دهستێ خۆوه ژین.
ژ لایهكێ دیڤه ئهو خهلكێ سهرهدانا ڤێ دهڤهرێ دكهن دێ هایداری كهلتۆرێ مه و شارستانهتیا مهبن و دێ زانن كو كورد ژی خۆدان رابووریهكێ بهێزن و دشێن ب دهستێن خوه ئابووریا خوه ژبلی گاز و غازێ پهیدا بكهن، ژبهركو رۆلێ گهشت و گۆزاری دئهڤرۆدا ژ رۆلێ گاز و غازێ كێمتر نینه، لێ ههتاكو نوكه ئهم نهشیاینه وهك ههرێما كوردستانی مفای ژێ ببینین و مه ژێرخانا گهشتیاری یا بهێز نینه، لهورا پێدڤیه حوكمهتا ههرێمێ خهمهكی ژ ڤی بابهتی ب خۆت و ئهڤ بابهته نههێته پشتگوه خستن و دڤێت پێنگاڤێن بلهز و جددی بۆ ڤی پرۆژهی بهێنه هاڤێتن، ژبهركو دێ سهركهفتنهكا باش بدهستڤه ئینیت.
ئهڤه نهخزمهته تو بۆ هونهرێ كوردی دكهی!
براستی زۆر جاران دهمێ مرۆڤ گوهداریا هندهك سترانان دكهت، مرۆڤ بێزاریا خوه ژێ دبینیت، ژبهر كو ب رهنگهكێ نهباش هاتینه چێكرن و مرۆڤ وهسا هزر دكهت كو وی سترانبێژێ ئهو سترانه گوتی یا ژبهلاخوه ڤهكری و بتنێ مهرهما پێ ئهو بوویه كو خهلك بزانن وی ژی سترانهك چێكریه، لهورا بهری چهند رۆژان من تهماشهی كهنالهكێ تیڤیێ دكر كو سترانبێژهك مێهڤانێ بهرنامهی بوو ل وێ تیڤیێ و بهحسێ سهربۆرا خوه یا هونهری دكر و ل دهمهكی گوت: من ژی سترانهك ل سهر پێشمهرگهی چێكریه و دگهل هندێ پێشكێشكارا بهرنامهی داخواز ژێكر كو سترانا خوه یا ل سهر پێشمهرگهی بێژیت، دهمێ مۆزیك هاتیه لێدان من گوتی ئهڤه دێ سترانا (من گوت مهلیلین لێ، ته دگوت مهلیلین لێ) بێژیت، ژبهر كو مۆزیكژهنی ئهو مۆزیك لێددا، لێ دهمێ وی سترانبێژی ئهو ستران گوتی، هندهك پهیڤێن ل سهر پێشمهرگهی دی دانابوونه سهر مۆزیكا ڤێ سترانێ و دگوت و ههروهسا دادیاكرن كو ئهڤ سترانه ژ پهیڤێن فلان ههلبهستڤانیه و ئاوازا فلانیه ژی، لێ مخابن! نزا ب چ رهنگ وی سترانبێژی ئهو مافه دایه خوه، كو سترانهكا فلكلۆرێ كوردی كو پتریا خهلكێ گوه لێبوویه و ئهو سترانبێژ بینیت و هندهك پهیڤێن دی دانیته سهر و بێژیت ئهڤه بهرههمێ منه. ئهڤه نهجارا ئێكێ یه فلوكلۆر ژ لایێ هندك نه شارهزایێن مۆزیك و ههلبهستێ دهێته شێلاندن و زێدهگاڤی ل مافێن فلوكلۆریستان دهێته كرن، ئهڤ زێدهگاڤی یه دڤێت بهێته سنوورداركرن و تیڤی و رادیۆن و دهزگههێن ڕاگههاندنێ خوهدی لێ ب دهركهڤن و بڤی رهنگی دێ شێین فلۆكلۆرێ خوه ژ هونهردزان بپارێزین، راسته فلوكۆر گهنجینا مه ههموویانه و مافێ ژێ گرتن و نووژهن كرن كارهك پیرۆزه لێ دڤێت ئیشارهت پێ بهێتهدان. ههر چهنده مه رێزێن مهزن بۆ خهبات و بهرخۆدانێن پێشمهرگهی ههیه و دڤێت ههردهم ستران و مۆزیكێن ب بۆها ل سهر خۆراگریا وان بهێنه گوتن. لهورا نابیت مۆزیك و پهیڤێن سترانێن فلكلۆری بهێنه گوهۆرین بۆ سترانهكا دیتر، ژبهر كو ئهڤ چهنده زیانێ دگههینیته فلكلۆرێ مه و دێ زیانێ گههینیته هونهرێ وی سترانبێژی ژی، ههروهسا پێدڤیه رێ ل بهر ڤان جوره كارێن هونهری بهێته گرتن و جهێن شۆلهژێ خهمهكێ ژڤی بابهتی بخۆن، چنكو ب هیچ رهنگهكی ئهڤ چهنده خزمهتا هونهرێ كوردی ناكهت.
نيشاندان
WP Facebook Auto Publish Powered By : XYZScripts.com