ئه‌ڤرۆ:
مه‌حموود محه‌مه‌د په‌یڤدار و ئه‌ندامێ لژنا بلند یا پارتی بۆ هه‌لبژارتنان راگه‌هاند، پێكئینانا هه‌ڤپه‌یمانیا كوردستانی ل گه‌ل لایه‌نێن دی یێن كوردستانی ب بژارده‌یه‌كێ دزانین كو پشتی دانوستاندن ل سه‌ر بهێته كرن.
ل دۆر میكانیزما هه‌وا هه‌لبژارتنان یا پارتی دیموكراتی كوردستان كا دێ ب چ شێوه بیت، مه‌حموود محه‌مه‌د گۆت” كۆمبوونێن جه‌ماوه‌ری نابن ژ ئه‌گه‌رێ ره‌وشا ساخله‌می ئه‌وا نوكه هه‌ی و دێ زێده‌تر وان رێنما و رێكارێن حوكمه‌تا هه‌رێما كوردستانێ ل دۆر ره‌وشا ساخله‌میێ راگه‌هاندین، ل به‌رچاڤ هێنه وه‌رگرتن”.
سه‌باره‌ت ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ، ئایا رێگری ل به‌رده‌م هه‌وا هه‌لبژارتنان یا به‌ربژارێن پارتی ل وان ده‌ڤه‌ران وه‌كو كه‌ركووك، دیالا و سه‌لاحه‌دین و هه‌تا نه‌ینه‌وا و پارێزگه‌هێن دی ژی هه‌بوو، و ئایا پارتی چاوا هه‌وا خوه یا هه‌لبژارتنان ل وان ده‌ڤه‌ران دكه‌ت، گۆت” ده‌مه‌كێ درێژه ل گه‌ل حوكمه‌تا ئیراقێ و داموده‌زگه‌هێن په‌یوه‌ندیدار ب پرسا ئه‌منی د دانوستاندنا دا بووین كو پێدڤیه ده‌لیڤا یه‌كسان بۆ هه‌موو به‌ربژاران بهێته ره‌خساندن بۆ هه‌وا هه‌لبژارتنان و په‌یوه‌ندی كرن ب جه‌ماوه‌رێ باوه‌ری پێ هه‌ی كو دێ ده‌نگێ خوه پێ ده‌ن، د وێ چه‌ندێ ئه‌م یێن گه‌هشتینه خالێن هه‌ڤپشك و ده‌مه‌كێ درێژه به‌ربژارێن مه هه‌ر ژ شنگالێ هه‌تا خانه‌قینێ و مه‌ندلی ب ئه‌ركێن خوه رادبن و هاریكاریا وان هاتیه كرن و هه‌تا نوكه چو كێشه بۆمه دروست نه‌بووینه”.
په‌یڤدارێ پارتی گۆت ژی” مه باوه‌ری یا ب خه‌لكێ خوه هه‌ی و ئه‌م د باوه‌ریێ ژی داینه كو خه‌لكێ مه باوه‌ری یا ب مه هه‌ی، له‌وما بزاڤا وێ چه‌ندێ دكه‌ین كو ئه‌و كێشێن هه‌تا نوكه ل ده‌وله‌تا ئیراقێ نه‌هاتینه چاره‌سه‌ركرن، ببنه فاكته‌ره‌كێ هاریكار بۆ چاره‌سه‌ركرنا وان بۆ وێ چه‌ندێ نه‌كه‌ڤنه ل سه‌ر ئێك كو هه‌ر وی ئه‌گه‌ری ئیراق گه‌هانه ره‌وشا ئه‌ڤرۆ تێدا دبۆریت، هه‌م ژ روویێ ئه‌منی، هه‌م خزمه‌تگوزاری و هه‌م ئابووری، ئه‌ڤ وه‌لاته وه‌لاته‌كێ زه‌نگینه، به‌لێ د نوكه دا راده‌یا هه‌ژاریێ ل هنده‌ك پارێزگه‌هان گه‌هشتیه رێژا 40 – 50% ئه‌ڤه ژی ب راستی كاره‌ساته بۆ وه‌لاته‌كێ وه‌كو ئیراقێ كو خودانا ڤی هه‌می داهاتی یه”.
پتر رۆهنكر” ژلایه‌كێ دی ڤه، بوچی وه‌لاتێ ئیراقێ هه‌ر ژ دامه‌زراندنا خوه د ناڤ كێشه و گرفت و شه‌رێن ناڤخوه‌یێ و ده‌ره‌كی دایه؟ ئه‌ڤه كێشه‌كا مه‌زنه، ئه‌ڤ چه‌نده ژی ژ ئه‌نجامێ وێ ئێكێ یه كو ئه‌و كێشێن د ناڤخوه دا هه‌ین، نه‌هاتینه چاره‌سه‌ركرن، ئه‌و كێشێن نه‌هێنه چاره‌سه‌ركرن ژی گه‌له‌ك جاران دێ ره‌نگڤه‌دان بۆ هه‌بیت بۆ ڤه‌گوهاستنا كێشان هنده‌ك كێشێن ده‌ره‌كی دێ هێنه دروستكرن، ئه‌و چه‌نده ژی كاره‌ساته بۆ ڤی وه‌لاتی كو تووشی ڤان هه‌موو قه‌یارانان بووی”.
ل دۆر پێشبینیێن هژمارا ده‌نگ و كورسیێن پارتی دێ د ڤان هه‌لبژارتنان دا بده‌ستخوه ئینیت، مه‌حموود محه‌مه‌د دبێژیت” مه باوه‌ری یا ب خه‌لكی هه‌ی و خه‌لكی ژی باوه‌ری ب بۆچوون و ئاراسته‌یا پارتی یا هه‌ی، چونكه ب دیتنا مه پارتی نوونه‌راتیا راسته‌قینه‌یا پێكهات و بۆچوونێن خه‌لكێ كوردستانێ ژ روویێ جڤاكی و سیاسی و كولتووری دكه‌ت و هه‌تا نوكه وان پشته‌ڤانیا هه‌م ل پارتی و هه‌م ل رێبازا بارزانی كریه، ڤێجارێ ژی ئه‌وا هه‌تا نوكه خواندن بۆ هاتیه كرن خه‌لكه‌ك و جه‌ماوه‌ره‌كێ ئێكجار زۆر، باوه‌ری ب وێ چه‌ندێ یا هه‌ی كو باوه‌ریا خوه بده‌نه پارتی دیموكراتی كوردستان بۆ وێ چه‌ندێ وان كێشێن ل گه‌ل به‌غدا هه‌ین بهێنه چاره‌سه‌ركرن، له‌وما ئه‌م ب نیازا وێ چه‌ندێ نه كو ژ بلی كورسیێن خوه بپارێزین وه‌كو ئێكه‌مین حزبا هه‌ره مه‌زنا ئیراقێ بمینین و كورسیێن خوه ژی زێده بكه‌ین”.
نيشاندان