ئه‌ڤرۆ:

ژ پشتی 2005 هه‌لبژارتنێن جڤاتا پارێزگه‌ها كه‌ركووكێ نه‌هاتینه‌ ئه‌نجامدان، هه‌رچه‌نده‌ پیچدڤی بوو ل سالا 2009 هه‌لبژارتن هاتبانه‌ ئه‌نجامدان، به‌لێ ژ ئه‌گه‌رێ ناكۆكیا پێكهاته‌یێن وی هه‌لبژارتن نه‌هاتیه‌ كرن.

بڕیاره‌ ل هه‌یڤا 10 یا ئه‌ڤساله‌ هه‌لبژارتنێن جڤاتێن پارێزگه‌هان ل ئیراقێ بهێنه‌ ئه‌نجامدان، پێكهاته‌یێن كه‌ركووكێ بۆچوونێن جودا یێن هه‌ین، ب تایبه‌تی كوردان گۆمان ژ تۆمارا ده‌نگده‌ران و گوهۆڕینا دیموگرافی پشتی سالا 2017 هه‌یه‌، كو كاریگه‌ری ل سه‌ر ئه‌نجامێ ده‌نگه‌كان هه‌بیت.

حاتم تائی، ئه‌میندارێ گشتیێ جڤاتا ئه‌ره‌بی ل كه‌ركووكێ گوت” مه‌ پێ باشه‌ هه‌لبژارتن ب فره‌بازنه‌یی بهێنه‌ ئه‌نجامدان، چونكه‌ ب ڤێ ڕێ مافێ پێكهاته‌یان دێ هێته‌ پاراستن و پێدڤیه‌ پێرابوونێن پێدڤی ژی بۆ پاقژكرنا تۆمارا ده‌نگدار بهێنه‌ وه‌رگرتن”.

كوردان ل هه‌لبژارتنێن سالا 2005 ب ڕێیا لیستا برایه‌تی پتریا ده‌نگێن كه‌ركووكێ بده‌ستڤه‌ئینان، ونوكه‌ كورد داخوازا ئه‌نجامدانا هه‌لبژارتنان دكه‌ن بۆ وێ چه‌ندێ ب وێ ڕێ دووماهی ب وێ ڕه‌وشێ بهێت. به‌لێ كورد ناڤه‌شێرن كو ترس ژ تۆمارا ده‌نگده‌ران یا هه‌ی، ب تایبه‌تی ئه‌و هه‌ژمارا خێزانێن كو پشتی سالا 2017 ئیناینه‌ دناڤ كه‌ركووكێ دا.

عه‌لی قه‌لایی، به‌رپرسێ پشكا هه‌لبژارتنێن كه‌ركووك – سه‌لاحه‌دین یا ئێكه‌تیێ دبێژیت” پشتی 16 ئۆكتۆبه‌رێ هه‌ژماره‌كا مه‌زن یا ئه‌ره‌بان هاتینه‌ دناڤ كه‌ركووكێ دا، هنده‌ك ژ وان ژ ئه‌گه‌رێ ئه‌ركێ له‌شكری هاتینه‌ كو سه‌ر ب له‌شكرێ ئیراقێ وحه‌شدا شه‌عبی و هێزێن ئه‌منی نه‌ و فۆرمێن ئاهێن خوارنێ و ناسنامه‌یێن وان هاتینه‌ ڤه‌گوهاستن بۆ كه‌ركووكێ”.

ئه‌ڤرۆ:

ئه‌ندامێ جڤاتا نوونه‌رێن ئیراقێ ژ فراكسیۆنا پارتی دیموكراتی كوردستان، ماجد شنگالی ڕاگه‌هاند، جڤاتا نوونه‌ران چاڤه‌ڕێی هاتنا پرۆژێ قانوونا بودجه‌یا سالا 2023 ژ ئالیێ حوكمه‌تێ دكه‌ت، هه‌روه‌سا دیاركر، ڕێككه‌فتن ل سه‌ر پرۆگرامێ وه‌زاری د چارچۆڤه‌یێ ئالیێن هه‌ڤپه‌یمانیا بڕێڤه‌برنا ده‌وله‌تێ كو حوكمه‌تا نوو پێكئینای هاتبوو كرن، به‌لێ هه‌تا پرۆژێ قانوونێ نه‌گه‌هیته‌ جڤاتا نوونه‌ران، دیار نابیت ڕێككه‌فتن چوویه‌ دبوارێ بجهئینانێ دا یان نه‌.

دوهی دوشه‌مبی 9 كانوونا ئێكێ 2023 هه‌ڤده‌م ل گه‌ل به‌رده‌وامیا ناكۆكیان د ناڤبه‌را ئالیێن سیاسی یێن ئیراقی سه‌باره‌ت شێوازێ به‌لاڤكرنا لژنه‌یێن جڤاتا نوونه‌ران و په‌سه‌ندكرنا پرۆژێ قانوونا بودجه‌یا سالا 2023، وه‌رزێ نوو یێ قانوون دانانێ یێ جڤاتا نوونه‌رێن ئیراقێ بۆ سالا 2023 ده‌ستپێكر.

هه‌ر چه‌نده‌ هه‌تا نوكه‌ ده‌سته‌یا سه‌رۆكایه‌تیا جڤاتا نوونه‌ران ژڤانێ ده‌ستپێكرنا ئێكه‌م ڕوونشتنا وه‌رزێ نوو یێ سالا 2023 یێ جڤاتا نوونه‌ران ڕانه‌گه‌هاندیه‌، به‌لێ بل گۆره‌ی ژێده‌رێن ڕۆژنامه‌ڤانی، ڕوونشتن ژ دووماهیا ڤێ حه‌فتیێ ده‌رباز نابیت، هه‌ر ب گۆره‌ی هه‌مان ژێده‌ران، نوكه‌ جڤاتا نوونه‌رێن ئیراقێ چاڤه‌ڕێی گاڤێن داهاتی یێن محه‌مه‌د شیاع سودانی، سه‌رۆك وه‌زیرێن ئیراقێ دكه‌ت بۆ وێ چه‌ندێ لژنه‌یێن جڤاتا نوونه‌ران دیاربكه‌ت، چونكه‌ د ده‌مێ سالا بۆری دا ژ ئه‌گه‌رێ پێكنه‌ئینانا حوكمه‌تا نوو، نه‌شیابوو وی كاری بكه‌ت.

ژ بلی پێكنه‌ئینانا لژنه‌یان، د ده‌مێ 10 هه‌یڤێن بۆری دا جڤاتا نوونه‌ران نه‌شیا پرۆژێ قانوونا بودجه‌یا سالا 2023 په‌سه‌ند بكه‌ت، ئه‌گه‌ ژی بۆ ناكۆكیێن د ناڤبه‌را ئالیێن سیاسی یێن ئیراقی و ب تایبه‌ت ناكۆكیێن د ناڤبه‌را حوكمه‌تا فیدرالی و حوكمه‌تا هه‌رێما كوردستانێ دزڤریت، چونكه‌ هه‌تا نوكه‌ هه‌ردو ئالیان ل دۆر پرۆژێ قانوونا ناڤبری نه‌گه‌هشتینه‌ ڕێككه‌فتنێ، سه‌رۆك وه‌زیرێن ئیراقێ ژی پرۆژێ وێ قانوونێ پێشكێشی جڤاتا نوونه‌ران نه‌كریه‌.

ماجد شنگالی، ئه‌ندامێ جڤاتا نوونه‌رێن ئیراقێ ژ فراكسیۆنا پارتی دیموكراتی كوردستان دبێژیت” جڤاتا نوونه‌ران چاڤه‌ڕێی هاتنا پرۆژێ قانوونا بودجه‌یا سالا 2023 ژ ئالیێ حوكمه‌تێ دكه‌ت، كو نابیت هاتنا وی بهێته‌ گیروكرن، ژ به‌ر كو حوكمه‌ت نوونه‌رایه‌تیا هه‌ڤپه‌یمانیا ( بڕێڤه‌برنا ده‌وله‌تێ) دكه‌ت كو ژ ئالیێ پتریا ئالیێن سیاسی یێن ئیراقی ڤه‌ هاتیه‌ پێكئینان”.

شنگالی گوت ژی” ده‌مێ پرۆژێ قانوونێ ژ ئالیێ جڤاتا وه‌زیران ڤه‌ دهێته‌ په‌سه‌ندكرن، پێدڤیه‌ د ده‌مه‌كێ كێم دا ژ ئالیێ جڤاتا نوونه‌ران ڤه‌ بهێته‌ په‌سه‌ندكرن”.

سه‌باره‌ت په‌یوه‌ندیێن د ناڤبه‌را حوكمه‌تا فیدرالی و حوكمه‌تا هه‌رێما كوردستانێ، ماجد شنگالی گوت” كوده‌نگی د ناڤبه‌را به‌غدا و هه‌ولێرێ دا د چارچۆڤه‌یێ ڕێككه‌فتنا سیاسی د چارچۆڤه‌یێ هه‌ڤپه‌یمانیا بڕێڤه‌برنا ده‌وله‌تێ دا هه‌بوو، كو ڕێككه‌فتن ل سه‌ر پرۆگرامێ وه‌زاری هاتبوو كرن، به‌لێ هه‌تا پرۆژێ قانوونێ نه‌گه‌هیته‌ جڤاتا نوونه‌ران، دیار نابیت ڕێككه‌فتن چوویه‌ دبوارێ بجهئینانێ دا یان نه‌”.

ژ ئالیێ خوه‌ڤه‌ محه‌مه‌د نوری، ئه‌ندامێ لژنه‌یا دارایی ل جڤاتا نوونه‌ران ڕاگه‌هاند” وه‌زاره‌تا دارایی مژوولی ب دووماهئینانا نڤیسینا ڕه‌شنڤیسێ پرۆژێ قانوونا بودجه‌یا 2023 یه‌ و وه‌زاره‌تا ناڤبری پێدڤی هنده‌ك برگه‌یێن دی یه‌ كو زێده‌ بكه‌ت و بودجه‌یا دارایی بهێته‌ دابینكرن بۆ فه‌رمانبه‌رێن گرێبه‌ست ئه‌وێن بووینه‌ هه‌میشه‌یی ل وه‌زاره‌ت و داموده‌زگه‌هێن دی یێن حوكمه‌تێ”.

گوت ژی” 95% كارێن به‌هه‌ڤكرنا پرۆژێ قانوونا بودجه‌یا 2023 یێن تمام بووین كو گۆژمێ وێ دبیته‌ زێده‌تر ژ 140 ترلیۆن دیناران”.

ئه‌ڤرۆ:

شیره‌تكارێ سه‌رۆكێ حوكمه‌تا هه‌رێما كوردستانێ بۆ كاروبارێن ده‌ڤه‌رێن كوردستانێ یێن ده‌رڤه‌ی ئیدارا هه‌رێما كوردستانێ ڕاگه‌هاند، بۆ بجهئینانا ماده‌یێ 140 پێدڤیه‌ ل گه‌ل وێ ڕێككه‌فتنا سیاسی ئه‌وا هاتیه‌ ئه‌نجامدان، پێرابوونێن دستووری بهێنه‌ وه‌رگرتن بۆ وێ ئێكێ ئه‌و ماده‌ بهێته‌ بجهئینان.

رێبوار تاله‌بانی، شیره‌تكارێ سه‌رۆكێ حوكمه‌تا هه‌رێما كوردستانێ بۆ كاروبارێن ده‌ڤه‌رێن كوردستانێ یێن ده‌رڤه‌ی ئیدارا هه‌رێما كوردستانێ، گوت” ئه‌و ب خوه‌ هه‌موو جاران ڕێككه‌فتنا سیاسی یا هاتیه‌ كرن بۆ وێ چه‌ندێ ماده‌یێ 140  بهێته‌ بجهئینان و لژنه‌یا وی ماده‌یێ دستووری بهێته‌ كاراكرن، به‌لێ پاشی نه‌هاتیه‌ بجهئینان، له‌وما یا پێدڤیه‌ ڤێجارێ كو لژنه‌ دهێته‌ كاراكرن، گاڤێن دستووری بهێنه‌ هاڤێتن، چونكه‌ گه‌له‌ك گیروبوویه‌ و پێدڤی بوو پێشتر ل دادگه‌ها دستووری سكالایێ تۆمار بكه‌ین، چونكه‌ نیه‌تێن حوكمه‌تێن ئیراقێ د باش نه‌بوون بۆ وێ چه‌ندێ ماده‌یێ 140 یێ دستووری بهێته‌ بجهئینان”.

رێبوار تاله‌بانی ئاماژه‌كر” هیڤیدارین د ڤێ كابینه‌یا نوو یا حوكمه‌تا ئیراقێ دا گاڤێن كریاری بهێنه‌ هاڤێتن بۆ وێ چه‌ندێ ماده‌یێ 140 یێ دستووری بهێته‌ بجهئینان و هه‌مان سیناریۆیێن حوكمه‌تێن پێشتر دووباره‌ نه‌بن، چونكه‌ كێشه‌ ب ته‌رخانكرنا 10 ملیار دیناران ناهێته‌ چاره‌سه‌ركرن و كێشه‌یا مه‌ كێشه‌یا ئه‌ردی یه‌ كو 100 ساله‌ خه‌بات بۆ دهێته‌ كرن، له‌وما نابیت ب 10 ملیار دیناران بهێینه‌ سه‌ردابرن، چونكه‌ پێدڤی بوو ماده‌یێ 140 یێ دستووری ل سالا 2007 هاتبا بجهئینان”.

ناڤبری ڕۆهنكر ژی” پێدڤیه‌ د چارچۆڤه‌یێ ڕێككه‌فتنا سیاسی ل دۆر بجهئینانا ماده‌یێ 140 پێرابوونێن دستووری بهێنه‌ وه‌رگرتن بۆ وێ چه‌ندێ بهێته‌ بجهئینان، چونكه‌ گه‌له‌ك جاران ڕێككه‌فتن یا هاتیه‌ كرن و نه‌هاتیه‌ بجهئینان، به‌لێ هه‌كه‌ دستوور بهێته‌ بجهئینان وی ده‌می دێ ماده‌ییچ 140 ژی هێته‌ بجهئینان”.

ئه‌ڤرۆ:

د سالا 2022 دا، هه‌ژماره‌كا ڕوودانان ل هه‌رێما كوردستانێ ڕوودان كو هنده‌ك ژوان ل سه‌ر ئاستێ ناڤخوه‌ و هنده‌ك ژی ل سه‌ر ئاستێ نێڤده‌وله‌تی كارڤه‌دانێن جودا جودا بۆ هه‌بوون.

ڕۆژا 16 كانوونا دویێ 2022، پێله‌كا به‌فربارینێ هه‌رێما كوردستانێ ڤه‌گرت و بۆ ده‌مێ چار ڕۆژان به‌رده‌وام بوو، ژ ئه‌گه‌رێ نزمبوونا پله‌یێن گه‌رمێ چه‌ند ڕۆژان بۆ بێهنڤه‌دان.

ڕۆژا 25 كانوونا دویێ 2022، سه‌رۆك وه‌زیرێن هه‌رێما كوردستانێ، مه‌سرور بارزانی ب سه‌ره‌دانه‌كا ئێك ڕۆژی گه‌هشته‌ (ئه‌بو زه‌بی) پایته‌ختێ ئیمارات و ل گه‌ل جهنشینێ ئه‌بوزه‌بی و جێگرێ فه‌رمانده‌یێ بلند یێ هێزێن چه‌كدار ل ئیمارات  محه‌مه‌د بن زاید كۆمبوو و په‌یوه‌ندیێن د ناڤبه‌را ئیمارات و ئیراقێ و هه‌رێما كوردستانێ هاتنه‌ باسكرن.

ڕۆژا 15 شوباتا 2022، سه‌رۆك وه‌زیرێن هه‌رێما كوردستانێ، مه‌سرور بارزانی ب داخوازنامه‌یه‌كا فه‌رمی یا میرێ قه‌ته‌ر، شێخ ته‌میم بن حه‌مه‌د ئال سانی سه‌ره‌دانا ده‌وحه‌ كر و ل گه‌ل مه‌زنه‌ به‌رپرسێن وی وه‌لاتی كۆمبوو.

ڕۆژا 18 شوباتا 2022، هه‌ر ئێك ژ سه‌رۆكێ هه‌رێما كوردستانێ، نێچیرڤان بارزانی و سه‌رۆك وه‌زیرێن هه‌رێما كوردستانێ، مه‌سرور بارزانی د چارچۆڤه‌یێ بڕێڤه‌چوونا كۆنفرانسێ ئاسایشێ ل میونخ ل ئه‌لمانیا ل گه‌ل سكرتێرێ گشتیێ نه‌ته‌وه‌یێن ئێكگرتی، ئه‌نتۆنیۆ گۆتیرێس كۆمبوون و هه‌ردوئالیان دووپاتی ل وێ چه‌ندێ كر كو هێشتا داعش مه‌ترسیه‌كا ڕاسته‌قینه‌یه‌ و ل ئیراقێ و سووریێ گه‌فان ل ئارامیێ و سه‌رقامگیریێ دكه‌ت.

ڕۆژا 24 شوباتا 2022، سه‌رۆكێ هه‌رێما كوردستانێ، نێچیرڤان بارزانی بڕیاردا ل ڕۆژا ئێكێ چریا ئێكێ 2022 پرۆسه‌یا هه‌لبژارتنێن په‌رله‌مانێ كوردستانێ بهێته‌ ئه‌نجامدان.

ڕۆژا 13 ئادارا 2022، هێرشه‌كا مووشه‌كی ل سه‌ر هه‌ولێرێ هاته‌ كرن و د وێ هێرشێ دا، مالا ڕێڤه‌به‌رێ كۆمپانیا كار، شێخ باز به‌رزنجی بوو ئارمانج و پاشی له‌شكرێ پاسدارێن ئیرانێ به‌رپرسیاره‌تیا خوه‌ ژ ئه‌نجامدانا وێ هێرشێ ڕاگه‌هاند.

ڕۆژا 14 ئادارا 2022، سه‌رۆك وه‌زیرێن ئیراقێ، مسته‌فا كازمی ب مه‌به‌ستا سه‌ره‌دانا جهێ هێرشا مووشه‌كی ل سه‌ر هه‌ولێرێ سه‌ره‌دانا هه‌رێما كوردستانێ كر و ل گه‌ل سه‌رۆك وه‌زیرێن هه‌رێما كوردستانێ، مه‌سرور بارزانی كۆمبوو و پاشی سه‌ره‌دانا جهێ توپبارانكرنێ كر.

ڕۆژێن 27 – 28 ئادارا 2022، كۆربه‌ندێ جیهانیێ وزێ ل باژێرێ ئه‌بو زه‌بی ل ئیمارات هاته‌ گرێدان، چه‌ندین به‌رپرس و شاره‌زایێن بوارێ وزێ تێدا پشكدار بوون و سه‌رۆك وه‌زیرێن هه‌رێما كوردستانێ، مه‌سرور بارزانی ئێك بوو ژ ئاخڤتنكه‌رێن سه‌ره‌كی یێن كۆربه‌ندی.

ڕۆژا 1 گۆلانا 2022، هێرشه‌كا مووشه‌كی ل سه‌ر پالاوگه‌ها كه‌ورگۆسك ل قه‌زا خه‌بات ل ڕۆژئاڤایێ هه‌ولێرێ هاته‌ ئه‌نجامدان.

ڕۆژا 21 گۆلانا 2022،  سه‌رۆك وه‌زیرێن هه‌رێما كوردستانێ، مه‌سرور بارزانی ب مه‌به‌ستا پشكداریكرنێ د كۆربه‌ندێ جیهانیێ داڤۆس دا، به‌ر ب وه‌لاتێ سویسرا بڕێكه‌فت و ل وێرێ چه‌ندین دیدار وكۆمبوون ل گه‌ل به‌رپرسێن بلند یێن وه‌لاتان ئه‌نجامدان.

ڕۆژا 26 خزیرانا 2022، هێرشه‌ك ل سه‌ر ژێرخانه‌یا گشتی و ده‌زگه‌هێن په‌ترۆلێ و غازێ ل هه‌رێما كوردستانێ هاته‌ ئه‌نجامدان.

ڕۆژا 30 خزیرانا 2022، سه‌رۆك وه‌زیرێن هه‌رێما كوردستانێ، مه‌سرور بارزانی فه‌رمانا داخستنا هه‌موو جهێن فرۆتنا چه‌كی ل هه‌رێما كوردستانێ ده‌ركر.

ڕۆژا 28 ئیلۆنا 2022، ب ڕێیا مووشه‌ك و درۆنان ئیرانێ هێرش كره‌ سه‌ر حزبێن ئۆپۆزسیۆنا ئیرانی ل قه‌زا كۆیه‌ یا سه‌ر ب پارێزگه‌ها هه‌ولێرێ و ناحیا پردێ یا سه‌ر ب پارێزگه‌ها كه‌ركووكێ و گوندێ زڕگوێز ل ناحیا تانجه‌ڕۆ یا سه‌ر ب پارێزگه‌ها سلێمانیێ كو د ئه‌گه‌ر دا هه‌ژماره‌كا مه‌زن یا قوربانیان كه‌فتن و هنده‌ك جه ژی ب ته‌مامی وێران بوون.

ڕۆژا 7 چریا ئێكێ 2022، ل تاخێ سه‌ربه‌ستی ل باژێرێ هه‌ولێرێ ب ڕێیا بۆمپه‌كا چاندی ب ترۆمبێله‌كێ ڤه‌ عه‌قید هاوكار جاف بوو ئارمانج و د ئه‌نجامدا ژیانا خوه‌ ژده‌ستدا و چه‌ند كه‌س ژ خێزانا وی بریندار بوون.

ڕۆژا 9 چریا ئێكێ 2022، په‌رله‌مانێ كوردستانێ ب پتریا ده‌نگێن په‌رله‌مانتاران، ژیێ ڤێ خۆلا په‌رله‌مانی هه‌تا دووماهیا وه‌رزێ قانوون دانانێ یا خۆلا پائیزی كو دبیته‌ دووماهیا سالا 2023 درێژكر.

ڕۆژا 28 چریا ئێكێ 2022، كابینه‌یا حوكمه‌تا ئیراقا فیدرال ب سه‌رۆكایه‌تیا محه‌مه‌د شیاع سودانی ل جڤاتا نوونه‌رێن ئیراقێ ده‌نگ پێ هاته‌ دان.

ڕۆژا 3 چریا دویێ 2022، كۆنگره‌یێ 14 یێ پارتی دیموكراتی كوردستان ل باژێرێ دهۆكێ ده‌سپێكر و د ئێكه‌م ڕۆژدا، سه‌رۆك مه‌سعود بارزانی ب سه‌رۆكێ پارتی دیموكراتی كوردستان هاته‌ هه‌لبژارتن و هه‌ر ئێك ژ نێچیرڤان بارزانی و مه‌سرور بارزانی ب جێگرێن سه‌رۆكێ پارتی دیموكراتی كوردستان هاتن هه‌لبژارتن.

ڕۆژا 14 چریا دویێ 2022، بۆ جارا دویێ ئیرانێ هێرشا مووشه‌كی ل سه‌ر حزبێن ئۆپۆزسیۆنا ئیرانی ل قه‌زا كۆیه‌ سه‌ر ب پارێزگه‌ها هه‌ولێرێ ڤه‌ ئه‌نجامدا.

ڕۆژا 17 چریا دویێ 2022، ژ ئه‌نجامێ ته‌قینا سیسته‌مێ غازێ (LPG) ل ئێك ژ مالێن تاخێ كازیوه‌ ل باژێرێ سلێمانیێ 15 كه‌سان ژیانا خوه‌ ژده‌ستدا و 12 كه‌سێن دی ژی بریندار بوون.

ڕۆژێن 21 – 22 چریا دویێ 2022، ئیرانێ ب ڕێیا مووشه‌ك و درۆنان هیرش ل سه‌ر حزبێن ئۆپۆزسیۆنا ئیرانی ل قه‌زا كۆیه‌ یا سه‌ر ب پارێزگه‌ها هه‌ولێرێ ڤه‌ ئه‌نجامدا و د ئه‌گه‌ردا ترس دناڤ ئاكنجیێن وێ ده‌ڤه‌رێ دا دروستكر و ئاكنجیێن گوندێ هه‌رمۆته‌ كو كریستیانن گوند چۆلكر.

ڕۆژا 27 چریا دویێ 2022، شانده‌كێ حوكمه‌تا هه‌رێما كوردستانێ ب مه‌به‌ستا دانوستاندن و ڕێككه‌فتنێ ل سه‌ر بودجه‌ی و شایستێن دارایی سه‌ره‌دانا به‌غدا كر كو ئێكه‌م سه‌ره‌دان بوو پشتی پێكئینانا كابینه‌یا نوو یا حوكمه‌تا ئیراقێ ب سه‌رۆكایه‌تیا محه‌مه‌د شیاع سودانی.

ڕۆژا 9 كانوونا ئێكێ 2022، سه‌رۆكا هنگاریا، كاتالین نۆڤاك سه‌ره‌دانا هه‌رێما كوردستانێ كر ود ده‌مێ دو ڕۆژێن مانا وێ دا ل هه‌ولێرێ، ل گه‌ل به‌رپرسێن هه‌رێما كوردستانێ كۆمبوو و پاشی سه‌ره‌دانا هێزێن هنگاری كر كو د چارچۆڤه‌یێ هه‌ڤپه‌یمانیا نێڤده‌وله‌تی یا دژی داعشێ ل هه‌رێما كوردستانێ و ئیراقێ هاتینه‌ جهگیركرن.

ڕۆژا 23 كانوونا دویێ 2022، سه‌رۆكا وه‌زیرێن ئیتالیا، جۆرجیا میلۆنی ب ڕێیا فرۆكخانه‌یا نێڤده‌وله‌تی یا هه‌ولێرێ گه‌هشته‌ هه‌رێما كوردستانێ، پشتی كۆمبوونێ ل گه‌ل به‌رپرسێن بلند یێ هه‌رێما كوردستانێ، سه‌ره‌دانا هێزێن وه‌لاتێ خوه‌ كر كو د چارچۆڤه‌یێ هێزێن هه‌ڤپه‌یمانیا نێڤده‌وله‌تی یا دژی داعشێ ل هه‌رێما كوردستانێ خزمه‌تێ دكه‌ن.

ڕۆژا 26 كانوونا ئێكێ 2022، ژ ئه‌گه‌رێ كێمبوونا به‌رچاڤكرنا دۆلاری ژ ئالیێ به‌نكا ناڤه‌ندی یا ئیراقێ ڤه‌، بهایێ 100 دۆلاران ل بازارێن هه‌رێما كوردستانێ گه‌هشته‌ ئاستێ 157 هزار و 500 دینارێن ئیراقی و ئه‌ڤه‌ جارا ئێكێ یه‌ د ده‌مێ 20 سالێن بۆری دا بهایێ دۆلاری بگه‌هیته‌ وی ئاستی ل به‌رامبه‌ر دینارێ ئیراقی.

ئه‌ڤرۆ:

ئه‌ندامێ مه‌كته‌با سیاسی یا پارتی و به‌رپرسێ مه‌كته‌با ڕێكخستنا سلێمانیێ و هه‌له‌بجه‌ یا پارتی، عه‌لی حسێن، ڕاگه‌هاند، وه‌كو پارتی بزاڤێ دكه‌ین به‌ری سه‌رێ سالێ ل گه‌ل ئێكه‌تیێ كۆمبین، هه‌كه‌ به‌ری سه‌رێ سالێ ژی كۆمبوون نه‌هێته‌ ئه‌نجامدان، ڕاسته‌وخوه‌ پشتی سه‌رێ سلێ دێ هه‌ردو ئالی كۆمبن.

عه‌لی حسێن گوت” پارتی بڕیار دایه‌ ب دانوستاندنێ هه‌موو كێشه‌یان ل گه‌ل ئالیێن سیاسی یێن هه‌رێما كوردستانێ چاره‌سه‌ر بكه‌ت، كێشه‌یێن د ناڤبه‌را پارتی و ئێكه‌تیێ دا ژی د ڕاگه‌هاندنێ دا و ب ڕێیا برۆسكان ناهێنه‌ چاره‌سه‌ركرن، به‌لكو هه‌ردو ئالیان پێدڤی ب كۆمبوونێ هه‌یه‌ بۆ چاره‌سه‌ركرنا كێشه‌یێن هه‌لاویستی”.

گوت ژی” دێ بزاڤێ كه‌ین به‌ری سه‌رێ سالێ ل گه‌ل ئێكه‌تیێ كۆمبین، به‌لێ هه‌كه‌ د وی  ده‌می دا كۆمبون نه‌هاته‌ كرن، ڕاسته‌وخوه‌ پشتی سه‌رێ سالێ دێ هه‌ردو ئالی كۆمبن و مه‌ به‌رده‌وام په‌یوه‌ندی ل گه‌ل ئێكه‌تیێ و ئالیێن سیاسی یا هه‌ی، مه‌رج نینه‌ هه‌كه‌ كۆمبوون نه‌بیت، په‌یوه‌ندی نه‌بیت و كۆمه‌كا گرفتان یێن هه‌ین ب دانوستاندنێن ڕۆژانه‌ چاره‌سه‌ر دكه‌ین”.

ل دووڤ گۆتنا عه‌لی حسێن، پارتی به‌رسڤا برۆسكه‌یه‌كا ئێكه‌تیێ بۆ ده‌ستپێكرنا دانوستاندنان دایه‌ و نوكه‌ ئه‌و وه‌كو پارتی چاڤه‌ڕێی ئێكه‌تیێ دكه‌ن بۆ ئه‌نجامدانا كۆمبوونێ”.

مه‌جید حه‌مه‌د ئه‌مین، ئه‌ندامێ جڤاتا سه‌ركرایه‌تیێ و به‌رپرسێ مه‌لبه‌ندێ سێ هه‌ولێرێ یێ ئێكه‌تی نیشتمانی كوردستان پێشتر ڕاگه‌هاندبوو” هه‌رچه‌نده‌ ژڤانه‌كێ دیاركری بۆ كۆمبوونێ د ناڤبه‌را پارتی و ئێكه‌تیێ دا نه‌هاتیه‌ دیاركرن، به‌لێ ب بۆچوونا من به‌ری سه‌رێ سالا نوو دێ كۆمبوون هێته‌ كرن”.

گوتبوو ژی” ڕه‌وشا هه‌رێما كوردستانێ و ده‌ڤه‌رێ و جیهانێ پتر مه‌ پالدده‌ت ب زووترین ده‌م كۆمبین و كێشه‌یێن دناڤبه‌را خوه‌دا چاره‌سه‌ر بكه‌ین”.

هه‌ولێر، قائید میرۆ

بڕیاره‌ ل سالا داهاتی سێ پرۆسه‌یێن هه‌لبژارتنان ل ئیراقێ و هه‌رێما كوردستانێ بهێنه‌ ئه‌نجامدان و به‌رپرسه‌كێ ده‌زگه‌هێ هه‌لبژارتنێن پارتی دیموكراتی كوردستان ژی دبێژیت، پارتی یا به‌رهه‌ڤه‌ بۆ پشكداریكرنێ د هه‌رسێ پرۆسه‌یێن هه‌لبژارتنان دا و به‌رهه‌ڤی ژی دهێنه‌كرن بۆ ڕاستڤه‌كرنا قانوونا هه‌لبژارتنێن ئیراقێ، هه‌روه‌سا ئاماژه‌كر، پارتی دیموكراتی كوردستان د هه‌موو پرۆسه‌یێن هه‌لبژارتنێن بۆری دا سه‌لماندیه‌ كو ئێكه‌ ژوان هێزێن سیاسی یێن كو جه‌ماوه‌رێ خوه‌ هه‌ی لسه‌ر ئاستێ ئیراقێ و هه‌رێما كوردستانێ و به‌رده‌وام ده‌نگێن پێدڤی د هه‌لبژارتنان دا بده‌ستڤه‌ دئینیت.

هاوار محه‌مه‌د، به‌رپرسێ پشكا قانوونی ل ده‌زگه‌هێ هه‌لبژارتنێن پارتی دیموكراتی كوردستان، بۆ ڕۆژنامه‌یا (ئه‌ڤرۆ) گوت” سێ پرۆسه‌یێن گرنگ یێن هه‌لبژارتنان ل سالا داهاتی ل ئیراقێ و هه‌رێما كوردستانێ دێ بڕێڤه‌چن ژوان هه‌لبژارتنێن هه‌رێما كوردستانێ و هه‌لبژارتنێن پێشوه‌خت یێن ئیراقێ و هه‌لبژارتنێن جڤاتێن پارێزگه‌هێن ئیراقێ، هه‌ر ژ نوكه‌ ئالیێن سیاسی به‌رهه‌ڤیان دكه‌ن بۆ هه‌لبژارتنێن سالا داهاتی و ده‌ست ب ڕاستڤه‌كرنا قانوونا هه‌لبژارتنێن ئیراقێ ژی هاتیه‌كرن، ب گوره‌ی ڕێككه‌فتنا دناڤبه‌را ئالیێن سیاسی یێن ئیراقێ دا هه‌ی، ل ده‌ستپێكێ دێ قانوونا هه‌لبژارتنان هێته‌ ڕاستڤه‌كرن و د دووڤدا دێ هێته‌ هنارتن بۆ جڤاتا نوونه‌رێن ئیراقێ ب مه‌ره‌ما په‌سه‌ندكرنێ، پشتی جڤاتا نوونه‌رێن ئیراقێ ده‌نگی ل سه‌ر دده‌ت و پڕۆژه‌ دبیته‌ قانوون دێ ده‌ست ب به‌رهه‌ڤیان هێته‌كرن بۆ بڕێڤه‌چوونا هه‌لبژارتنان ژوان ژی دیاركرنا بودجه‌یێ پرۆسه‌یا بڕێڤه‌چوونا هه‌لبژارتنان و دیاركرنا ژڤانێ بڕێڤه‌چوونا هه‌لبژارتنان”.

هاواری دیاركر ژی” پشتی په‌سه‌ندكرنا قانوونا هه‌لبژارتنان شه‌ش هه‌یڤ پێدڤی نه‌ هه‌تا كۆمسیۆنا بلند یا سه‌ربخوه‌ یا هه‌لبژارتنان ل ئیراقێ كار بۆ به‌رهه‌ڤیێن بڕێڤه‌چوونا هه‌لبژارتنان بكه‌ت، هه‌رچه‌نده‌ هه‌لبژارتنێن بۆری ژی یێن ئیراقێ دپێشوه‌خت بوون، به‌لێ دیاره‌ گه‌له‌ك ئاریشه‌ په‌یداببوون پشتی هه‌لبژارتنێن بۆری و داخوازیه‌ك بۆ بڕێڤه‌چوونا هه‌لبژارتنان یا هه‌ی، هه‌لویستێ پارتی دیموكراتی كوردستان ژی یێ خویایه‌ بۆ هه‌ر هه‌لبژارتنه‌كێ ل ئیراقێ و كوردستانێ، ده‌رباره‌ی هه‌لبژارتنێن داهاتی یێن ئیراقێ ژی پارتی دیموكراتی كوردستان به‌ری نوكه‌ ل سه‌ر ئاستێن بلند ئاشكراكریه‌ كو دگه‌ل بڕێڤه‌چوونا هه‌لبژارتنایه‌ ب مه‌رجه‌كی ئالیێن سیاسی ئه‌نجامێن هه‌لبژارتنان قه‌بوول بكه‌ن”.

هاوار محه‌مه‌د ئاماژه‌كر” پارتی دیموكراتی كوردستان خوه‌دی پێگه‌هه‌كێ جه‌ماوه‌ری یێ تایبه‌ته‌ ل سه‌ر ئاستێ ئیراقێ و هه‌رێما كوردستانێ، له‌وڕا ژی پارتی هه‌موو جاره‌كێ دگه‌ل بڕێڤه‌چوونا پرۆسه‌یا هه‌لبژارتنایه‌ د ده‌مێ خوه‌ یێ دیاركری دا، هه‌لبژارتنێن بۆری یێن ئیراقێ ژی باشترین به‌لگه‌نه‌ لسه‌ر پێگه‌هێ پارتی دیموكراتی كوردستان سه‌ره‌ڕای هنده‌ك ئاسته‌نگان ب تایبه‌تی ئالۆزیا ڕه‌وشا ده‌ڤه‌رێن كوردستانی یێن ژ ده‌رڤه‌ی ئیدارا هه‌رێما كوردستانێ پارتی ده‌نگێن پێدڤی بده‌ستڤه‌ ئینان و هه‌تا ل كه‌ركووكێ ژی پارتی باره‌گا ژی تێدا نه‌بوون به‌لێ به‌ربژارێ پارتی ده‌نگێ ئێكێ بده‌ستڤه‌ئینا، هه‌تا نوكه‌ ژی پارتی دیموكراتی كوردستان چ مه‌رجێن پێشوه‌خت نینن بۆ بڕێڤه‌چوونا هه‌لبژارتنان، به‌لێ ب شێوه‌یه‌كێ گشتی ڕێككه‌فتن بۆ پێكئینانا حوكمه‌تا ئیراقێ هاتیه‌كرن كو ڕه‌وشا ده‌ڤه‌رێن كوردستانی یێن ژ ده‌رڤه‌ی ئیدارا هه‌رێما كوردستانێ بهێته‌ ئاساییكرن و ماده‌یێ ١٤٠ ژ دستوورێ به‌رده‌وام یێ ئیراقێ بهێته‌ بجهئینان، چونكه‌ هندی ڕه‌وشا وان ده‌ڤه‌ران ئاسایی ببیت بۆ پرۆسه‌یا هه‌لبژارتنان باشتره‌، ب تایبه‌تی ژی هه‌كه‌ هه‌لبژارتنێن جڤاتێن پارێزگه‌هان ژی بهێنه‌ ئه‌نجامدان دده‌مێ خوه‌ دا و ئه‌ڤێ چه‌ندێ دێ كاریگه‌ری ل سه‌ر ڕه‌وشا وان ده‌ڤه‌ران هه‌بیت”.

ل دووماهیێ گوت” پارتی دیموكراتی كوردستان دێ به‌رهه‌ڤیێن تمام بۆ پشكداریكرنێ دهه‌لبژارتنێن سالا داهاتی دا كه‌ت، هه‌تا بشێت زۆرترین ده‌نگان بده‌ستڤه‌ بینیت”.

ئه‌ڤرۆ:

ئه‌ندامه‌كێ كورد د لژنه‌یا دارایی یا جڤاتا نوونه‌رێن ئیراقێ دا ئاشكراكر، هه‌موو بزاڤ دهێنه‌ كرن بۆ وێ چه‌ندێ هه‌تا هه‌یڤا شوباتا 2023 پرۆژه‌یێ قانوونا بودجه‌یا گشتی یا ئیراقێ بۆ سالا 2023 بهێته‌ په‌سه‌ندكرن و دبێژیت، نابین پشكا هه‌رێما كوردستانێ ژ بودجه‌یا گشتی یا ئیراقێ ژ 17% كێمتر بیت و به‌ری بهێته‌ جڤاتا نوونه‌ران ژی پشكا هه‌رێما كوردستانێ بهێته‌ دیاركرن.

سیپان شێروانی، ئه‌ندامێ لژنه‌یا دارایی ل جڤاتا نوونه‌رێن ئیراقێ، گوت” پرۆژه‌یێ قانوونا بودجه‌یا گشتی یا ئیراقێ بۆ سالا 2023 هێشتا یێ ل وه‌زاره‌تا دارایی یا ئیراقێ و بڕیاره‌ به‌ری بگه‌هیته‌ جڤاتا نوونه‌ران، پشكا هه‌رێما كوردستانێ تێدا بهێته‌ ئێكلاكرن، كو هه‌رێما كوردستانێ داخوازكریه‌ پشكا هه‌رێمێ ژ 17% كێمتر نه‌بیت، ئه‌م دگه‌ل وێ چه‌ندێ نینین پشكا هه‌رێما كوردستانێ ژ بودجه‌ی دناڤ جڤاتا نوونه‌ران دا بهێته‌ ئێكلاكرن، به‌رۆڤاژی پێدڤیه‌ به‌ری پرۆژه‌یێ قانوونا بودجه‌ی بهێته‌ جڤاتا نوونه‌ران، پشكا هه‌رێما كوردستانێ بهێته‌ ئێكلاكرن”.

ل دۆر وان هه‌ژمارێن دهێنه‌ به‌لاڤكرن، وی ئه‌ندامێ لژنه‌یا دارایی ل جڤاتا نوونه‌رێن ئیراقێ گوت” هێشتا هیچ یێ دیار نینه‌ كا پشكا هه‌رێما كوردستانێ چه‌نده‌، چونكه‌ پێشتر ڕێككه‌فتن د ناڤبه‌را ئالیان دا هاتیه‌ كرن و پێدڤیه‌ ل سه‌ر بنه‌مایێ ڕێژه‌یا ئاكنجیان بیت”.

ل خویاكر ژی” مخابن چه‌ندین ساله‌ سه‌رژمێریا گشتی ل ئیراقێ نه‌هاتیه‌ كرن و مه‌ داخواز كریه‌ 17% ژ بودجه‌یێ ئیراقێ بۆ هه‌رێما كوردستانێ بهێته‌ دیاركرن”.

هه‌روه‌سا گوت” نوكه‌ جڤاتا نوونه‌ران یا دبێهنڤه‌دانا زڤستانێ دا هه‌تا 9 كانوونا دویێ 2023، به‌لێ پێشبینیێ دكه‌ین هه‌تا هه‌یڤا شوباتا 2023 پرۆژه‌یێ قانوونا بودجه‌یا گشتی یا ئیراقێ بهێته‌ په‌سه‌ندكرن، ژ به‌ر كو ئه‌ڤه‌ سالا دویێ یه‌ پرۆژه‌یێ قانوونا بودجه‌ی گیرو دبیت و سه‌رۆك وه‌زیرێن ئیراقێ ژی پێداگیریێ ل سه‌ر په‌سه‌ندكرنا بودجه‌ی دكه‌ت”.

ئه‌ڤرۆ، سلێمانیێ، عه‌زیز هه‌ورامی

سه‌رۆك هه‌رێما كوردستانێ، نێچیرڤان بارزانی د ده‌ستپێشخه‌ریه‌كێ دا داخوازا ڕوونشتنا هه‌موو ئالیێن سیاسی دكه‌ت و ب دووماهی ئینانێ ب وێ ناكۆكیا د ناڤبه‌را ئالیان دا هه‌ی، جێگرێ سكرتێرێ حزبا زه‌حمه‌تكێشێن كوردستانێ ژی دبێژیت، پشته‌ڤانیێ ل ده‌ستپێشخه‌ریا سه‌رۆكێ هه‌رێما كوردستانێ دكه‌ین.

سه‌عید خالد، جێگرێ سكرتێرێ حزبا زه‌حمه‌تكێشێن كوردستانێ بۆ ڕۆژنامه‌یا (ئه‌ڤرۆ) گوت” پێشوازیێ ل هه‌ر ده‌ستپێشخه‌ریه‌كێ دكه‌ین ب تایبه‌تی ده‌ستپێشخه‌ریا نێچیرڤان بارزانی، سه‌رۆكێ هه‌رێما كوردستانێ، به‌رده‌وام هیڤیا مه‌ ئه‌وه‌ ده‌زگه‌هێ سه‌رۆكایه‌تیا هه‌رێما كوردستانێ وه‌كو ده‌زگه‌هه‌كێ نیشتمانی د خه‌ما پرسێن چاره‌نڤیسساز دابیت و ب ئێك چاڤ سه‌حكه‌ته‌ هه‌موو سالیێن سیاسی، ل ده‌مێن بۆری ژی دا شیایه‌ ڕۆلێ نیشتمانی ببینیت و گۆتار و كریارێن وی ل ده‌ف هه‌موو هێزێن سیاسی ب ئۆپۆزسیۆن و ده‌ستهه‌لات ڤه‌ د قه‌بوولكری نه‌”.

گوت ژی” ب دیتنا مه‌ نوكه‌ ده‌مێ ده‌ستپێشخه‌ریا سه‌رۆكێ هه‌رێما كوردستانێ یه‌ و كوردستانێ شیانێن ڤێ ڕه‌وشێ نینن، پێدڤیه‌ ژی بله‌ز هه‌موو ئالیێن سیاسی ب تایبه‌تی پارتی دیموكراتی كوردستان و ئێكه‌تی نیشتمانی كوردستان، كو به‌رپرسیاره‌تیا سه‌رخستنا قۆناغێ یا هه‌ی و پێكڤه‌ د ده‌ستهه‌لاتێ دانه‌، دگه‌ل هه‌ڤدوو كۆمببن و ده‌لیڤه‌یه‌ك یا هاتیه‌ پێش كورد پێكڤه‌ ل به‌غدا بشێن پشكا خوه‌ ژ ئه‌وا د دستوورێ ئیراقێ دا هاتی و مافێن خوه‌ بده‌ستڤه‌بینن”.

ناڤبری ئاماژه‌كر” به‌رده‌وام هاتیه‌ گوتن جوداهی یا ئاسایی یه‌ به‌لێ ئه‌وا نه‌ئاسایی ئه‌م وه‌كو ملله‌ته‌ك ل به‌رده‌م ئاسته‌نگێن مه‌زن داین، ڕه‌وشا ده‌ڤه‌رێ یا هه‌ستیاره‌ و دگوهۆڕینێن مه‌زن دایه‌، پێگه‌هێ كوردان ب ئێكده‌نگیێ دێ ب هێز بیت، به‌لێ ئه‌ڤ ڕه‌وشا نوكه‌ هه‌ی د به‌رژه‌وه‌ندیا چ ئالیان دا نینه‌، خه‌لكێ كوردستانێ یێ دلته‌نگه‌ كو ئه‌ڤ ڕه‌وشه‌ به‌رده‌وام بیت، گرژیێن د ناڤبه‌را ئالیان دا كاریگه‌ریا خراپ كریه‌ سه‌ر ئابووری و بازاری، به‌رده‌وام ژی مه‌ گوتیه‌ كو هێزا مه‌ د ئێكگرتنا مه‌ دایه‌ چ ل ناڤخوه‌ و چ ل ده‌رڤه‌ ژی وگه‌لێ كوردستانێ ژی پشته‌ڤانه‌ ئه‌ڤ ڕه‌وشا نوكه‌ هه‌ی نه‌مینیت و خالێن هه‌ڤپشك د ناڤبه‌را ئالیێن سیاسی دا یێن هه‌ین و دشیاندایه‌ ڕێكبكه‌ڤن و هه‌موو ئاسته‌نگان لاده‌ن و ب ڤێ چه‌ندێ دێ شێین زالبین ب سه‌ر هه‌موو كێشه‌ و گرفته‌كێ دا و به‌رپه‌ره‌كێ نوو بهێته‌ ڤه‌كرن”.

دیاركر” سه‌رۆكایه‌تیا هه‌رێما كوردستانێ تاكو ئاسته‌كێ باش چه‌تره‌كێ باش بوو بۆ ئالیێن سیاسی، هه‌موو ئالی پێشوازیێ ل ده‌ستپێشخه‌ریا سه‌رۆكێ هه‌رێما كوردستانێ دكه‌ن و ب دیتنا مه‌ پێدڤیه‌ پشته‌ڤانی ل سیاسه‌تا سه‌رۆكایه‌تیا هه‌رێما كوردستانێ بهێته‌ كرن”.

زیره‌ك كه‌مال، شیره‌تكارێ سه‌رۆكێ هه‌رێما كوردستانێ د داخویانیه‌كا ڕۆژنامه‌ڤانی دا ڕاگه‌هاندبوو” سه‌رۆكێ هه‌رێما كوردستانێ به‌رنامه‌یه‌ك یێ هه‌ی وه‌كو ده‌ستپێشخه‌ری و به‌رهه‌ڤی بۆ وێ چه‌ندێ هه‌موو ئالیێن سیاسی كۆمڤه‌كه‌ت بۆ ڕێكخستنا ناڤمالا كوردی، چونكه‌ سه‌رۆكێ هه‌رێما كوردستانێ خوه‌ ب چه‌ترێ هه‌موو ئالیه‌كی دزانیت، له‌وما بزاڤێ دكه‌ت ئالیێن سیاسی كۆمبكه‌ت”.

شیره‌تكارێ سه‌رۆكێ هه‌رێمێ گۆتبوو ژی” سه‌رۆكێ هه‌رێما كوردستانێ دووپاتیێ ل سه‌ر وێ چه‌ندێ دكه‌ت كو پێدڤیه‌ د ئێك هه‌لویست بین د پرسا دانوستاندنێ ل كه‌ل به‌غدا و پرسێن سیاسی و ل سه‌ر هه‌موو پرسان پێدڤیه‌ د ئێكڕێز و ئێكده‌نگ بین، چونكه‌ ئه‌و دێ بیته‌ هۆكارێ وێ چه‌ندێ هه‌م سه‌قامگیریا سیاسی و جڤاكی ل هه‌رێما كوردستانێ زێده‌تر به‌قه‌رار بیت و هه‌م ژی باوه‌ریا خه‌لكی ژی ب قه‌وارێ هه‌رێما كوردستانێ زێده‌تر ببیت و ل سه‌ر ئاستێ نێڤده‌وله‌تی ژی دێ ب هێزتربین و دێ مه‌ هه‌یبه‌ت و شكۆیا زێده‌تر هه‌بیت، له‌وما گرنگه‌ ئێك هه‌لویست و ئێكڕێز بین”.

ئه‌ڤرۆ:

سه‌رۆكێ حوكمه‌تا هه‌رێما كوردستانێ، مه‌سرور بارزانی، دوهی شه‌مبیێ 10/12/2022 ب به‌رهه‌ڤبوونا كاتالین نۆڤاك سه‌رۆكا هنگاریا، د ڕێوڕه‌سه‌كێ تایبه‌ت دا، قوتابخانه‌یا (مێلسۆ) یا نێڤده‌وله‌تی ل عێنكاوا ڤه‌كر.

سه‌رۆكێ حوكمه‌تا هه‌رێمێ د ڕێوڕه‌سمی دا په‌یڤه‌ك پێشكێشكر و دووپاتی ل سه‌ر گرنگیدانێ ب كه‌رتێ په‌روه‌ردێ كر ئه‌ركه‌كێ سه‌ره‌كی یێ كابینه‌یا نه‌هێ یا حوكمه‌تا هه‌رێما كوردستانێ.

هه‌روه‌سا پێگیریا حوكمه‌تا هه‌رێما كوردستانێ دووپاتكر بۆ زێده‌تر بهێزكرنا وێ پێكڤه‌ژیانا ئاشتیانه‌ ل هه‌رێما كوردستانێ هه‌ی و ئاماژه‌كر، هه‌رێما كوردستانێ یا بوویه‌ په‌ناگه‌هه‌كا ئارام بۆ وان كریستیان و ئێزدیێن ژ ئه‌گه‌رێ گه‌فێن تیرۆرێ ژ ده‌شتا نه‌ینه‌وا ڕه‌ڤین.

سه‌رۆكێ حوكمه‌تا هه‌رێما كوردستانێ خویاكر ژی كو هه‌رێما كوردستانێ پێشوازی ل زێده‌تر ژ دو ملیۆن وه‌لاتیێن ئیراقی و په‌نابه‌رێن سووری كریه‌، یێن پاراستین و جهێ ڤه‌حه‌واندنێ بۆ دابینكرینه‌، كو بێی پشته‌ڤانیا جڤاكێ نێڤده‌وله‌تی كاره‌كێ ب زه‌حمه‌ت بوو.

مه‌سرور بارزانی سوپاسیا به‌رهه‌ڤبوونا كاتالین نۆڤاك، سه‌رۆكا هنگاریا ژی كر و گوت” هنگاریا ئێك ژ وان وه‌لاتان بوو یێن به‌رده‌وام هاریكاریا هه‌رێما كوردستانێ كری ب تایبه‌تی د شه‌ڕێ دژی داعشێ دا”.

د پشكه‌كا دی یا ئاخڤتنێن خوه‌ دا، مه‌سرور بارزانی باسێ عێنكاوه‌ كر كو بوویه‌ جڤاكه‌كێ گه‌ش بۆ پێكڤه‌ژیانێ ئه‌ڤه‌ژی جهێ شانازیی یه‌ بۆ مه‌.

سه‌باره‌ت ڤه‌كرنا قوتابخانه‌یا (مێلسۆ) یا نێڤده‌وله‌تی، سه‌رۆكێ حوكمه‌تا هه‌رێما كوردستانێ ئاماژه‌ ب ڕۆل و هاریكاریێن حوكمه‌تا هنگاریا كر و دووپاتی ل وێ چه‌ندێ كر، گرنگیدان ب كه‌رتێ په‌روه‌ردێ ژ كارێن سه‌ره‌كی یێن ڤێ كابینه‌یا حوكمه‌تا هه‌رێما كوردستانێ نه‌ ژ پێخه‌مه‌ت ئاڤاكرنا وه‌لاته‌كێ بهێزتر.

سه‌رۆكێ حوكمه‌تا هه‌رێمێ پشته‌ڤانیا خوه‌ یا تمام بۆ هه‌موو گاڤه‌كێ بۆ زێده‌تر به‌ر ب پێشڤه‌برنا كه‌رتێ په‌روه‌ردێ دووپاتكر.

ل دۆر گرنگیا زانست و په‌روه‌ردێ، مه‌سرور بارزانی دیاركر” زانست و په‌روه‌رده‌ بناغێن پێشكه‌فتنا وه‌لاتێ مه‌نه‌ به‌ر ب پاشه‌ڕۆژه‌كا باشتر”.

سه‌رۆكێ حوكمه‌تا هه‌رێما كوردستانێ دیاركر ژی” گرنگیدان ب په‌روه‌ردێ باشترین وه‌به‌رئێنانه‌ د گه‌نجێن مه‌ دا ئه‌نجام بده‌ین، بۆ وێ چه‌ندێ ب شێویه‌كی په‌روه‌رده‌ بكه‌ین تاكو ل پاشه‌ڕۆژی ل بازارێ كارێ ناڤخوه‌ و ده‌رڤه‌ دا هه‌ڤڕكیێ بكه‌ن بۆ بده‌ستڤه‌ئینانا باشترین ده‌لیڤێن كاری”.

مه‌سرور بارزانی ئاماژه‌ ب دامه‌زراندنا ده‌سته‌یا باوه‌ری به‌خشینێ ب ده‌زگه‌هان و پرۆگرامێن په‌روه‌ردێ و خواندنا بلند ل هه‌رێما كوردستانێ كر، وه‌كو ئێك ژ گاڤێن حوكمه‌تا هه‌رێما كوردستانێ بۆ زێده‌تر گرنگیدانێ ب كه‌رتێ په‌روه‌ردێ و بلندكرنا ئاستێ زانستی یێ ناڤه‌ندێن خواندنێ ل هه‌رێما كوردستانێ.

ل دووماهیا په‌یڤا خوه‌، سه‌رۆكێ حوكمه‌تا هه‌رێما كوردستانێ، سه‌ره‌رای ده‌ربڕینا پێزانینان بۆ سه‌رۆكا هنگاریا ل به‌رامبه‌ر پشته‌ڤانیێن وه‌لاتێ وێ بۆ ڤه‌كرنا وێ قوتابخانه‌یێ، گوت” هه‌وه‌ پشت ڕاست دكه‌ین وه‌كو پێگیریا حوكمه‌تێ كو هاریكاریێن هه‌وه‌ ب باشی یێن هاتینه‌ مه‌زاختن د ڤه‌كرنا ڤێ قوتابخانه‌یێ دا”.

ئه‌ڤرۆ:

هیڤیدارین خه‌لكه‌ك بڕیارا كۆنگره‌ی و سه‌رۆك مه‌سعود بارزانی بۆ ڤه‌كرنا به‌رپه‌ره‌كێ نوو ب شێوازه‌كی دی تێنه‌گه‌هیت، به‌لكو وه‌سا تێبگه‌هیت كو ژ نیازپاكیا مه‌یه‌ بۆ خزمه‌تكرنا ڤی وه‌لاتی

پارتی دیموكراتی كوردستان د كۆنگره‌یێ خوه‌ یێ 14 دا ل باژێرێ دهۆكێ بڕیار دابوو به‌رپه‌ره‌كێ نوو ل گه‌ل ئالیێن سیاسی یێن هه‌رێما كوردستانێ ڤه‌كه‌ت و سه‌ره‌دانا هه‌موو حزبان بكه‌ت، په‌یڤدارێ پارتی ژی دبێژیت، هنده‌ك بڕیارێن كۆنگره‌ی و كۆمیته‌یا ناڤین بۆ خستنا سه‌رپێ یا ده‌زگه‌هێن پارتی یێن ماین و پشتی بجهئینانا وان دێ ده‌ست ب سه‌ره‌دانا هه‌موو ئالیێن سیاسی كه‌ین.

دوهی ئێكشه‌مبی مه‌حموود محه‌مه‌د، په‌یڤدارێ پارتی دیموكراتی كوردستان ل ده‌مێ ده‌ستبكاربوونا به‌رپرسێ مه‌كته‌با ڕێكخستنا سلێمانیێ – هه‌له‌بجه‌ یا پارتی، ڕاگه‌هاند” ئه‌م ل گه‌ل ئێكه‌تی نیشتمانی كوردستان دو حزبێن هه‌ڤڕكین، هیڤیا مه‌ ئه‌وه‌ ڕامانا هه‌ڤڕكیێ ل گه‌ل دژایه‌تیێ  دوژمنایه‌تیێ نه‌هێته‌ تێكهه‌لكرن. هنده‌ك جاران په‌یڤ دهێته‌ خواندن یان هنده‌ك دیدار دهێنه‌ كرن كو ناچنه‌ د خانه‌یا هه‌ڤڕكیێ دا و ب كه‌ربه‌كێ دچیت كو دخوازی ب ڕێیا ده‌زگه‌هێن ڕاگه‌هاندنێ بگه‌هینیه‌ یێ به‌رامبه‌ری خوه‌”.

په‌یڤدارێ پارتی دیموكراتی كوردستان ئه‌وژی گوت” ئه‌م ل سه‌ر كۆمه‌كا بابه‌تان بۆ خزمه‌تكرنا ڤی وه‌لاتی هه‌ڤڕكێن هه‌ڤدوینه‌، به‌لێ دبیت ڕێیێن مه‌ بۆ چاره‌سه‌ركرنا كێشه‌یان د جودا بن. هیڤیا من ئه‌وه‌ چاوان مه‌ بڕیارا كۆنگره‌ی و سه‌رۆك مه‌سعود بارزانی هه‌یه‌ بۆ وێ چه‌ندێ به‌رپه‌ره‌كێ نوو  ڤه‌كه‌ین، خه‌لكه‌ك ژی ڤه‌كرنا وی به‌رپه‌رێ مه‌ ب شێوازه‌كی دی تێنه‌گه‌هیت، به‌لكو وه‌سا تێبگه‌هیت كو ژ نیازپاكیا مه‌یه‌ بۆ خزمه‌تكرنا ڤی وه‌لاتی”.

بڕیار بوو پشتی كۆنگره‌یێ 14، پارتی سه‌ره‌دانا ئالیێن سیاسی یێن هه‌رێما كوردستانێ بكه‌ت، به‌لێ هه‌تا نوكه‌ وان سه‌ره‌دانان ده‌ست پێ نه‌كریه‌، مه‌حموود محه‌مه‌د، سه‌باره‌ت ڤێ چه‌ندێ دبێژیت”  كۆمه‌كا بڕیارێن كۆنگره‌ی و كۆمیته‌یا ناڤین یێن هه‌ین بۆ خستنا سه‌رپێ یا ده‌زگه‌هێن پارتی و پێدڤیه‌ بهێنه‌ بجهئینان. پاشی دێ ده‌ست ب سه‌ره‌دانا ئالیێن سیاسی یێن هه‌رێما كوردستانێ كه‌ین”.

په‌یڤدارێ پارتی ئاماژه‌كر ژی” دخوازین ب هه‌بوونا جوداهیان هه‌ڤدو قه‌بوول بكه‌ین و پێكڤه‌بوونا مه‌ ب وی ڕامانێ نینه‌ وه‌كو ئێك لێ بهێین، مه‌ د جوداینه‌ و جوداهیا مه‌ د چاره‌سه‌ریا كێشه‌یان دایه‌”.

مه‌حموود محه‌مه‌د خویاكر” هه‌كه‌ پارتی و ئێكه‌تی ل هه‌رێما كوردستانێ جوداهی هه‌بن، نابیت ل به‌غدا هه‌بن. دڤێت هه‌موو ئالی ب پارتی و ئێكه‌تی و كۆمه‌ل و ئێكگرتوو و گۆڕان و نه‌وه‌ی نوو پێكڤه‌ بین بۆ وێ چه‌ندێ گرانیه‌كێ بده‌ینه‌ پرۆسه‌یا سیاسی ئه‌وا كورد بڕێڤه‌ دبه‌ن و ئه‌و بابه‌تێن بۆ هه‌رێما كوردستانێ و ژیانا خه‌لكی دگرنگن، بجهبینین”.

په‌یڤدارێ پارتی دیموكراتی كوردستان دووپاتكر” دشیان دایه‌ ل هه‌رێما كوردستانێ ل دۆر هنده‌ك بابه‌تان مه‌ بۆچوونێن جودا هه‌بن و ل سه‌ر چاره‌سه‌ركرنا هنده‌ك كێشه‌یێن ناڤخوه‌یی د جودابین، به‌لێ ل به‌غدا دڤێت جوداهیا مه‌ ل گه‌ل خه‌لكه‌كی بیت كو دژی مافێن مه‌نه‌”.

سه‌باره‌ت چاره‌سه‌ریا كێشه‌یێن ئیراقێ و هه‌رێما كوردستانێ ل كابینه‌یا سه‌رۆك وه‌زیرێن ئیراقێ، محه‌مه‌د شیاع سودانی، مه‌حموود محه‌مه‌د دبێژیت” هه‌تا نوكه‌ كه‌لتوورێ چاره‌سه‌ركرنا كێشه‌یان ل ئیراقێ نه‌بوو، به‌لكو كه‌لتوورێ كۆمڤه‌كرنا كێشه‌یان ل سه‌ر ئێك و هه‌لگرتنا وان بۆ ده‌مه‌كی دی یێ به‌لاڤبوو، هیڤیا مه‌ ئه‌وه‌ ئه‌ڤ كه‌لتووره‌ ب دووماهی بهێت و د وێ ڕێككه‌فتنا سیاسی دا ئه‌وه‌ مه‌ ل گه‌ل ئالیێن سیاسی یێن ئیراقی گرێدای ئه‌ڤ كێشه‌یێن هه‌ین بهێنه‌ چاره‌سه‌ركرن”.

په‌یڤدارێ پارتی ئاماژه‌ ب وێ چه‌ندێ ژی كر” هه‌كه‌ ئومێده‌ك ژی ل ده‌ف مه‌ هه‌بیت ل سه‌ر وان ڕێككه‌فتن و دانوستاندنێن مه‌ ئه‌نجامداین و ئیمزا ل سه‌ر هاتیه‌ كرن، پێدڤیه‌ ئه‌وێن د خه‌ما ئێكپارچه‌ییا ئیراقێ و خه‌لكێ ئیراقێ دا، د ده‌مه‌كێ دیاركری دا دووماهیێ ب ڤی كه‌لتوورێ بینن و ڤان كێشه‌یان چاره‌سه‌ر بكه‌ن”.