ئەڤرۆ نیوز:
عەونی زیاب پەیڤدارێ وەزارەتا ژێدەرێن ئاڤێ ل عیراقێ راگەهاند: مستەفا کازمی سەرۆک وەزیرێ عیراقێ، مەهدی رەشید حەمدانی وەزیرێ ژێدەرێن ئاڤێ ل عیراقێ راستپاردیە ب سەرۆکاتیا شاندەکێ بۆ کۆمبوونەکێ ل گەل تورکیا ب مەرەما ئێکلاکرنا ئاریشێن ئاڤا رووبارێ دیجلە و فوراتی.
هەروەسا گوتیە ژی: عیراقێ گەلەک پێدڤی ب ئاڤێ هەیە، ژبەر وێ چەندێ نەگەهشتنا هەر رێککەفتنەکێ دێ گەلەک زیان گەهیتە عیراقێ.
ئه‌ڤرۆ نیوز:
بهایێ پترۆلێ ل بازارێن جیهانی ل چاڤ رۆژێن بوری بلند بوویه.
ئاژانسێن جیهانی به‌لاڤكرن، بهایێ پترۆلێ ئه‌ڤرۆ بلند بوویه ب ئاوایه‌كی بهایێ پترۆلا برێنت ب 44.44 دۆلاران ل بازارێن جیهانی كرین و فرۆتن پێ هاتیه‌كرن، بهایێ به‌رمیلا پترۆلا ئه‌مریكی ژی ب 41.65 دۆلاران كرین و فرۆتن پێڤه هاتیه‌كرن.
بلند بوون و داكه‌تنا بهایێ پترۆلێ د ده‌مه‌كی دایه، ژماره‌یكا ئه‌و وه‌لاتێن بۆ به‌رهنگاربوونا ڤایرۆسێ كورونایێ ل ته‌ڤایا كه‌رتێن پیشه‌سازی و بازرگانیێ راوه‌ستاند بوون، به‌لێ نوكه ب ئه‌گه‌رێ كێم بوونا مه‌ترسیێن كورونایێ، پشكه‌ك ژ چالاكیێن ئابووری ده‌ستپێكر، ئه‌ڤه‌ژی بوو ئه‌گه‌رێ بلندبوونا بهایێ پترۆلێ.
ئەڤرۆ نیوز:
په‌یڤدارێ حوکمه‌تا عیراقێ راگه‌هاند: ل ڤان نێزیكان شاندێ هه‌رێما کوردستانێ دێ سه‌ره‌دانا به‌غدا كه‌ت و ژ بلى گوتۆبێژان چ رێكێن دى دناڤبه‌را هه‌ردو ئالیان دا نینه.
ئه‌حمه‌د مه‌لا ته‌لال په‌یڤدارێ حوکمه‌تا عیراقێ د كۆنگره‌كێ رۆژنامه‌ڤانى دا دیار کر: دانوستاندن دناڤبه‌را هه‌ولێر و بەغدا د به‌رده‌وامن و ل ڤان نێزیكان ژى شاندێ هه‌رێمێ دێ سه‌ره‌دانا به‌غدا كه‌ت.
هەروەسا گوتیە ژی: دانوستاندن ئێکانە رێکە دناڤبه‌را هه‌رێم و به‌غدا دا بۆ چاره‌سه‌ركرنا ئاریشان لدووڤ دستۆرێ عیراقێ، دیسان نوکە دانوستاندن د به‌رده‌وامن و هەولێر و بەغدا دخوازن بگه‌هنه ئه‌نجامێن باش و ب ڤی رەنگی دێ ئاریشه به‌ره‌ف چاره‌سه‌ریێ ڤەچن .
ئەڤرۆ نیوز:
وەزارەتا ناڤخۆ راگەهاندنەک بەلاڤکریە و تێدا هاتیە: نابیت جهێن گشتی یێن وەکی (مارکێت، خوارنگەهـ و جهێن بازرگانی) رێ بدەنە وەلاتیان، بێی ماسک بچنە وان جهان، هەکە بەرۆڤاژی ڤێ چەندێ هاتە کرن، ئەو جهە دێ بۆ دەمێ 10 رۆژان هێنە گرتن و خودانێن وان جهان دێ ب گۆژمێ ملیۆن دیناران هێنە سزادان، گرتنا هەموو سەنتەر و کلینیکێن (نۆشدار، نۆشدارێن ددانان، کارمەندێن ساخلەمیێ و تاقیگەهان)، بۆ دەمێ 14 رۆژان.
. گرتنا هەموو جهێن گەشتیاری یێن وەکو (پارك، کافتیریا و چایخانان).
.بەردەوامبوونا گرتنا هۆلێن وەرزشی، لەشجوانی، مەلەڤانگەهـ و یانێن شەڤێ، قەدەغەکرنا سازدانا هەلکەغتێن جڤاکی دێ بەردەوامبیت، وەکو (بەهی، ئاهەنگ و هەلکەفتێن جڤاکی).
. خوارنگەهـ دێ ڤەکری مینن، بەلێ پێدڤیە ب تنێ ب شێوێ گەهاندنێ کارێ خوە بکەن، پێدڤیە رێنمایێن ساخلەمیێ بهێنە بجهئینان، دیسان راگرتنا هاتنوچوونا دناڤبەرا پارێزگەهـ و کارگێریێن سەربخۆ، هاتنوچوون ب تنێ دێ ژ بۆ رەوشێن ئاوارتە و گەلەک پێدڤی بیت، ئەو ژی دێ لدووڤ سیستەمێ رێپێدانا ئەلەکترونی بیت.
دیسان هاتنوچوونا د ناڤبەرا پارێزگەهێن هەرێمێ و عیراقێدا دێ بۆ دەمێ حەفتیەکێ هێتە راگرتن، لێ
رێ ب هاتنوچوونا دبلۆماتکارێن بیانی و هێزێن هەڤپەیمانان دناڤبەرا پارێزگەهـ و کارگیریێن سەربخۆ هاتیە دان.
دیسان رێ ب هاتنوچوونا ئاژانس، ڕێکخراوێن UN و رێکخراوێن نێڤدەولەتى ل سەرانسەری هەرێما کوردستانێ هاتیە دان، بۆ ڤێ چەندێ ژی فەرمانگەها پەیوەندیێن دەرڤە هاتیە راسپاردن.
. شۆفێرێن هەموو جۆرێن ترۆمبێلان (تایبەت، کرێ و بارهەلگر) پێدڤیە ئەو هەر کەسێ ل گەل وان ل ترۆمبێلێ سوار بیت، بەردەڤك و دەستگورکان بکار بینن، هەکە ئەڤ رێنمایە نەهێنە بجهئینان، ژ بۆ هەر جارەکا سەرپێچیێ شۆفێر دێ ب بهایێ (50,000) هزار دیناران هێتە سزادان.
. هەر کۆمڤەبوونەکا ژ دەرڤەی جهـ و ئاڤاهیێن حکومی و کەرتێ تایبەت، هەکە بەردەڤك نەهێنە بکارئینان و دووراتیا مێتر و نیڤان د ناڤبەرا هەر کەسەکیدا ل بەرچاڤ نەهێتە وەرگرتن، هەر سەرپێچکارەك دێ ب بهایێ (10,000) هێتە سزادان.
. پێدڤیە هەموو کارمەندێن سازی و فەرمانگەهێن کەرتێ تایبەت، رێنمایێن ساخلەمیێ ل بەر چاڤ وەربگرن و بەردەڤکان بکاربینن، هەکە رێنمایی نەهێنە بجهئینان دێ خودانێ کاری ب کوژمێ (150,000) هێتە سزادان.
. ئەو کەسێن ژ دەرڤەی وەلاتی ڤەدگڕنە هەرێما کوردستانێ، ل دەمێ سۆزنامێ دنڤیسین کو ل مال یان هۆتێلێ خوە کەرەنتین بکەن، ئەگەر پێگیری ب ئەوێ سۆزنامەیێ نەکەن، دێ ب کوژمەیێ ملیۆن دیناران هێنە سزادان.
ئەگەر پشکنینێن وان پۆزەتیڤ دەرچوون و ئەوان کەسەکێ دی تووشی ڤایرۆسێ کۆرۆنایێ کربیت، دێ هەموو مەزاختیێن نەخۆشێ ب رێیا وی تووشبووی ل سەر کیستێ وی بیت.
. دەرگەهێ سنۆری یێ ئیبراهیم خەلیل، دێ بۆ دەمێ حەفتیەکێ ل هەمبەری گەشتیاران هێتە گرتن، بۆ کارێن گەلەک پێدڤی ب تنێ دێ ب رەزامەندیا وەزارەتا ناڤخۆ بیت، بەلێ هاتنوچووبا بازرگانی دێ لدووڤ رێنمایێن ساخلەمیێ هەر وەکو بەری نوکە بیت.
. ل سەر ژوورێن ئۆپەڕاسیۆنێن پارێزگەهـ و کارگێریێن سەربخۆ، پشتی دەرچوونا ڤێ راگەهاندنێ دێ بۆ دەمێ حەفتیەکێ دووڤچوونا بجهئینانا هەموو خالێن بەیانناما وەزارەتا ناڤخۆ کەن، ب تایبەتی رێنمایێن ساخلەمی و بکارئینانا بەردەڤکان و دووراتیا د ناڤبەرا کەسان دا.
ئه‌ڤرۆ نیوز:
كۆمپانیه‌كا بیاڤێ به‌رهه‌مئینانا ده‌رمانان راگه‌هاند چاره‌سه‌ریا كورونایێ ب سه‌ركه‌فتی هاتیه تاقیكرن و چاره‌سه‌ریا توشبوویان بتنێ بۆ ده‌مێ 3 رۆژان دهێته‌كرن.
ئاژانسا رویته‌رز به‌لاڤكریه، كۆمپانیا ریلیف سیرابیوتیكس كۆ باره‌گه‌هێ وێ ل جنیفه ب هه‌ڤبه‌شی ل گه‌ل كۆمپانیه‌كا ئه‌مریكی ئیسرائیلی بناڤێ نیوروئارئێكس سه‌ركه‌فتی بوون ژ تاقیكرنا ده‌رمانێ د چاره‌سه‌ركرنا كورونایێ دا راگه‌هاند.
ئه‌و دو كۆمپانی ده‌رمانێ ئار ئێل ئێف 100 یان ئه‌فیبتادیل راگه‌هاند كو دشیێن بتنێ ب سێ رۆژان نیشانێن گرانێن كورونایێ دوماهیێ بینین و توشبوویان چاره‌سه‌ر بكه‌ن.
ده‌سته‌یا ده‌رمانێن ئه‌مریكی ل هه‌یڤا ته‌موزا بوری رێك دا ب كۆمپانیان ئه‌ڤی ده‌رمانی ل سه‌ر ئه‌وان كه‌ستان تاقی بكه‌ن كۆ نیشانێن گرانێن كورونایێ ڤه‌گرتین ل سه‌ر 70 كه‌سان هاتیه تاقیكرن و سه‌ركه‌فتن ب ده‌ستڤه ئینا.
ئەڤرۆ نیوز، زنار تۆڤی:
کامی کەمال پەیڤدارێ کومەلگەها دەروازێ نێڤدەولەتی یێ ئیبراهیم خەلیل، بۆ ئەڤرۆ نیوز دیار کر: ل دور رێکارێن ساخلەمیێ و پشکنینێن ڤایرۆسێ کۆرۆنایێ ل گەل ئەو گەشتیارێن ل دەروازێ کۆمەلگەھا نێڤدەولەتی یێ ئیبراھیم خەلیل ھاتنوچوونێ دکەن، رایا گشتی ئاگەھدار دکەین کو ئەم لدووڤ رێنمایی و بریارێن حوکمەتا ھەرێما کوردستانێ کار دکەین و بابەتێن کەرەنتینێ و ستافێ نۆشداری ل سەر سنوری و دیارکرنا ئەو گوژمێ پارێ کو ل پشکنینا کۆرۆنایێ دھێتە مەزاختن ژلایێ وەزارەتا ساخلەمیێ ڤە دھێنە دیار کرن و سەرپەرشتی کرن.
ناڤهاتی گۆت ژی: لدووڤ دوو؛اهی بریارا وەزارەتا ساخلەمیێ یا ژمارە (١٠٩) ل رێکەفتی (٣٠\٧\٢٠٢٠) گۆژمێ وی پارێ دھێتە وەرگرتن بۆ پشکنینا کۆرۆنایێ بۆ ھەر گەشتیارەکێ ژ سەد ھزار دیناران ھاتینە کێم کرن بۆ شێست ھزار دیناران.
هێشتا دبێژیت: ل دور ھاتنا شۆفێرێن ترومبێلێن بارھەلگرێن وەلاتێ تورکیایێ ئەم چاڤەرێی بەرھەڤبوونا میکانیزمێن پێدڤینە ژ لایێ ساخلەمیا دھۆکێ ڤە بۆ پشکنین کرنا وان شۆفێران کو ل ڤان نێزیکان دێ ھێنە بەرھەڤ کرن و دێ شێن پشتی جێبەجێکرنا رێکارێن ساخلەمیێ وەکی بەرێ ھێنە دناڤ ھەرێما کوردستانێ دا، لدووڤ وێ بریارا وەزارەتا ساخلەمیێ، پشکنینا کۆرۆنایێ ژبۆ شۆفێرێن ترومبێلێن بارھەلگر دێ سیھ ھزار دینار بن.
ئه‌ڤرۆ نیوز:
پشتی دیاركرنا رۆژا هه‌لبژارتنێن پێش وه‌خت ژلایێ سه‌رۆك وه‌زیرێ عیراقێ ڤه، سه‌رۆكێ جڤاتا نوونه‌رێن عیراقێ ره‌خنه ل بریارێ گرت و داخازا كۆمبوونا نه ئاسایی یا جڤاتێ كر.
دهی مسته‌فا كازمی سه‌رۆك وه‌زیرێ عیراقێ بریار دا، ل رۆژا 6/6/2021 هه‌لبژارتنێن پێش وه‌خت دێ ل عیراقێ هێنه ئه‌نجام دان، محه‌مه‌د حه‌لبوسی سه‌رۆكێ جڤاتا نوونه‌رێن عیراقێ راگه‌هاند پێدڤیه كۆمبوونا نه‌ئاسایی و یا ڤه‌كری ب به‌رهه‌ڤبوونا سه‌رۆكاتیان بهێته ئه‌نجام دان بۆ دانوستاندن ل سه‌ر هه‌لبژارتنێن پێش وه‌خت و هه‌لوه‌شاندنا جڤاتا نوونه‌رێن عیراقێ.
سه‌رۆكێ جڤاتا نوونه‌رێن عیراقێ ئه‌و چه‌نده ژی راگه‌هاند ده‌قێ رێكارێن دستوری بۆ هه‌لبژارتنێن پێش وه‌خت و هه‌لوه‌شاندنا جڤاتا نوونه‌ران، كۆ تێدا ب روونی ئاماژه پێ هاتیه‌دان، ب زۆرینه‌یا رها یا هژمارا ئه‌ندامێن جڤاتا نوونه‌ران یان ب ره‌زامه‌ندیا سه‌رۆك كۆماری، سه‌رۆك كۆمار بانگه‌وازیێ بۆ هه‌لبژارتنا پێش وه‌خت بكه‌ت.
ئەڤرۆ نیوز:
ئەندامەکی لژنا دارایی ل پەرلەمانێ عیراقێ دیار کر: لێک نێزیکبوونەکا باش دناڤبەرا هەولێرێ و بەغدا دا هەیە و ل ڤان نێزیکان بەغدا دێ مووچێ هەرێما کوردستانێ هنێریت.
ئیخلاس دلێمی، ئەندامێ لژنا دارایی ل پەرلەمانێ عیراقێ گۆتیە: لێک تێگەهشتنەکا باش دناڤبەرا هەولێر و بەغدا دا هەیە، چەند ئاماژەکێن باش بۆ چارەسەرکرنا کێشان و گەهشتن ب رێککەفتنێ هەیە،
بریارە ل ڤان نێزیکان بەغدا مووچێ فەرمانبەران رەوانە بکەت.
ئه‌ڤرۆ نیوز:
رێكخراوا یونسیف سه‌ر ب نه‌ته‌وه‌یێن ئێكگرتی راگه‌هاند ب ئه‌گه‌رێ بلاڤ بوونا ڤایرۆسێ كورونایێ و ئه‌وێ قه‌یرانا ئابووری ب ئه‌گه‌رێ كورونایێ ل جیهانێ سه‌رهلدایه حه‌فت ملیۆن زارۆك تووشی بێ خارنێ بوون.
هینریتا فور رێڤه‌به‌را رێكخراوا یونسێفێ سه‌ر ب نه‌ته‌وه‌یێن ئێكگرتی راگه‌هاند به‌ری بلاڤ بوونا ڤایرۆسێ كورونایێ 47 ملیۆن زارۆك ل سه‌ر ئاستێ جیهانێ ب بێ خوارنیێ لاوازیێ ڤه دنالین، زیانێن ئابووری یێن ڤایرۆسێ كورونایێ كۆ بۆ ده‌مێ حه‌فت هه‌یڤانه ل جیهانێ به‌لاڤ بووی ل سه‌ر زارۆكان زێده‌تر هه‌بوویه.
هینریتا فور ئه‌و چه‌نده ژی راگه‌هاند ب ئه‌گه‌رێ زێده‌بوونا رێژا هه‌ژاریێ و كێمبوونا خارنێ و گرانبوونا بهایێن تشتێن خوارنێ، ل ده‌ستپێكا به‌لاڤ بوونا كوورنایێ و تانوكه حه‌فت ملیۆن زارۆك ل ته‌ڤایا جیهانێ ریب ری بێ خوارنیێ بووینه.
نيشاندان