عیراق: دانوستاندن دێ به‌رده‌وام بن هه‌تا پێشیلكاریێن سه‌ر ئاخا عیراقێ بهێنه‌ راوه‌ستاندن

13/07/2020 11:24

ئه‌ڤرۆ نیوز:

حكومه‌تا عیراقێ ته‌ئكید كر كۆ ل گه‌ل توركیا دێ ل دانوستاندنێ ستراتیژی به‌رده‌وام بیت هه‌تا پێشیلكاریێن سه‌ر ئاخا عیراقێ راوه‌ستینیت.

لگۆری راگه‌هاندنه‌كا نڤیسینگه‌ها مسته‌فا كازمی سه‌رۆك وه‌زیرێ عیراقێ، ل جڤینا وزاری یا ئاسایشا نیشتمانی دانوستاندن ل سه‌ر چه‌ند بابه‌ته‌كان هاتیه‌ كرن ئێك ژ وان پێشیلكاریێن توركیا بوویه‌ بۆ سه‌ر ئاخا عیراقێ.

د ئه‌وێ كۆمبوونێ دا جڤاتا وه‌زیران ته‌ئكید ل سه‌ر به‌رده‌وامی دان ب دانوستاندنێن دیپلوماسی ل گه‌ل توركیا بۆ راوه‌ستاندنا ده‌ست درێژیێن بۆ سه‌ر ئاخا هه‌رێما كوردستانێ، خراپ سه‌ره‌ده‌ریكرنا په‌یوه‌ندیێن دناڤبه‌را هه‌ر دو ده‌وله‌تان دا، زێده‌باری زیانگه‌هاندن ب گیان و مالێ وه‌لاتیان.

وه‌زاره‌تا به‌ره‌ڤانیا توركیا 17 هه‌یڤا حوزیرانێ ب بهانه‌یا شه‌رێ دژی په‌كه‌كێ ده‌ست ب پرۆسه‌یا سه‌ربازی بۆ سه‌ر ئاخا هه‌رێما كوردستانێ راگه‌هاند ئه‌ڤێ چه‌ندێ ژی كارڤه‌دانێن ناڤخوی و جیهانی دیڤ خو را ئینان.

فه‌رمانا دەستگیرکرنێ بۆ سۆران عومه‌ری دەرکەفت

12/07/2020 20:31

ئەڤرۆ نیوز:

دادگەها ڤەكۆلینا هه‌ولێرێ یاداشتا ده‌ستگیركرنێ بۆ سۆران عومه‌ری ده‌ركر.
ده‌ركرنا وێ بریارا دادگەهێ پشتی هنگێ هات، دەمێ په‌رله‌مانی پارێزبه‌ندی ل سه‌ر په‌رله‌مانتارێ كۆمه‌لا ئیسلامی یا كوردستانێ، سۆران عومه‌ری هەلگرتی، داکو روو ب روو دادگەهێ ببیت‌.

لدووڤ وێ یاداشتا ده‌ستگیركرنێ‌، كو‌ سه‌رۆكاتیا دادگەها تێهه‌لچوونا دەفەرا هه‌ولێرێ/ دادگەها ڤەكۆلینا هه‌ولێرێ ئاراسته‌ی هه‌موو ئه‌ندامێن دادوه‌ری و سه‌رجه‌م ئه‌ندامێن پۆلیسان كریە‌، ئه‌و هێزێن فه‌رمان پێ هاتیەدان، کو‌ سۆران عومه‌ری وه‌ك تۆمه‌تبار ده‌ستگیر بكه‌ن و بده‌نە دادگەهێ، دیسان ل‌ بنگەهێ پۆلیسێن خانه‌قا سكالا ل ‌سه‌ر هاتیە تۆمار كرن.

سۆران عومه‌ر سه‌عید ئه‌حمه‌د ژ ‌دایكبوویێ 12/ 12/ 1978 ل باژێرێ هه‌ولێرێ ل‌ تاخێ نازستی ئاکنجی یە و ل سلێمانیێ ژی ل قه‌یوان ستی یه‌.

سۆران عومه‌ر، لدوڤ حوكمێن مادێ 433 ژ قانوونا‌ سزادانا عیراقی یا ژماره‌ 111 یا سالا 1969 دێ روو ب روو دادگەهێ بیت‌.

مادێ 433 ژ پشکا چارێ یا قانوونا سزادانێ‌ یا تایبه‌ته‌ ب‌ جوین و سفکاتیێ، ئەو مادە ژ‌‌ دو برگان‌ پێكهاتیه‌، د یێ ئێکێ دا ئاماژه‌ ب هندێ دایە‌، ئه‌و کەسێ جوینا ب هه‌ر كه‌سەکێ بدەت سزایێ وی یان گرتنە‌ یان ژی غه‌رامه‌ كرنه، دێ ب‌ ئێك ژ وان سزایان هێتە‌ سزا دان.

گوندێ بێدۆهێ هاتە تۆپباران کرن

11/07/2020 21:56

ئەڤرۆ نیوز، زنار تۆڤی:
پشتی ئێڤاریا ئەڤرۆ شەمبیێ، توپخانا سوپایێ تورکیا گوندێ بێدوھێ و ئەو چیایێ ل هنداڤی ناحیا کانی ماسێ، ل دەڤەرا بەرواری بالا تۆپ باران کریه و زیانێن مادی گەهاندینە خەلکێ گوادێ بێدۆهێ، دیسان ئاگر ژی بەردایه وی چیایێ ل هنداڤی کانی ماسێ.

سەربەست سەبری ئاکرەیی رێڤەبەرێ ناحیا کانی ماسێ بۆ ئەڤرۆ نیوز راگەھاند: ل دەمژمێر 5 ئێڤاری هەتا دەمژمێر 6:30 ئێڤاری تۆپخانا سۆپایێ تورکی شەش گولەتوپ ل سنورێ گوندێ بێدوھێ داینە، کو دو ژ وان تۆپان ب ناڤا گوندی کەفتینە و زیانێن مادی گەهاندینە خانیێن گوندیان و دیسان پەنجەرێن ھندەک مالان شکاندینە و چار توپێن دیتر ژی ب ناڤ چەمێن گوندی کەفتینە، ڤێ چەندێ وەکریه، کو ئێدی خەلکێ گوندی نەشێن کارێ چاندنێ بکەن.

سه‌رۆكێ حوكمه‌تا هه‌رێمێ دێ به‌رێ بنیاتێ پرۆژه‌یه‌كێ ستراتیژی ل سلێمانێ دادنیت

11/07/2020 12:14

ئه‌ڤرۆ نیوز:

سه‌رۆكێ حوكمه‌تا هه‌رێما كوردستانێ ب مه‌به‌ستا دانانا به‌رێ بنكارێ پرۆژه‌یێ ستراتیژی دێ سه‌ره‌دانا باژێرێ سلێمانیێ دكه‌ت.

ئه‌ڤرۆ ده‌مژمێر 2.30 رۆژا 11/7/2020، مه‌سرور بارزانی سه‌رۆكێ حوكمه‌تا هه‌رێما كوردستانێ و قوباد تاله‌بانی جێگرێ سه‌ر‌ۆكێ حوكمه‌تێ ل باژێرێ سلێمانیێ به‌رێ بنیاتی بۆ جاده‌یا 100 مه‌تری دانیت.

پرۆژه‌یێ جاده‌یا 100 مه‌تری یا سلیمانیێ ب سێ قوناغان دهێته‌ بجهكرن، قوناغا ئێكێ كۆ 33 كیلۆمه‌تران ژ تاسلوجه‌ ده‌ستپێ دكه‌ت بۆ گوندێ ده‌مركان ل توخیبێ عه‌ربه‌ت، قوناغا دوێ ژ ده‌مركان ده‌ست پێ دكه‌ت بۆ تونێلا پێشره‌و ل سیته‌ك، قوناغا سیێ ژ تونێلا پێشره‌و بۆ تاسلوجه‌.

وەزارەتا ساخلەمیا هەرێمێ نووترین ئامارێن کۆرۆنایێ بەلاڤکرن

10/07/2020 20:25

ئەڤرۆ نیوز:
وەزارەتا ساخلەمیا هەرێما کوردستانێ ئامارێن 24 دەمژمێرێن بوری یێن کۆرۆنایێ بەلاڤکرن، 211 کەسێن دی ل هەرێما کوردستانێ تووشبووینە و 11 کەس ژی مرینە، هەروەسا 139 کەسێن دی چێبووینە.
نوکە هژمارا تووشبوویان ل هەرێما کوردستانێ گەهشتە هەشت هزار و 937 کەسان، هەروەسا سێ هزار و 211 کەس چێبووینە و 305 کەس ژی ب کۆرۆنایێ مرینە.
هەروەسا گۆتیە: هژمارا تووشبوویێن نوو ب ڤی رەنگی یە:
(٧٠ ل هەولێرێ)، (٧١ ل سلێمانیێ، ٤٧ ل گەرمیان)
(١٠ ل دهۆكێ)، (١٣ ل هەلەبجە).
هژمارا چێبوویان ب ڤی رەنگی یە:
(١٢٤ ل هەولێرێ)، (٨ ل گەرمیان)، (دو ل دهۆكێ)
(٥ ل هەلەبجە)، دیسان (١١ تووشبوویی مرینە)
(دو ل هەولێرێ، ٧ ل سلێمانیێ، دو ل گەرمیان).

زاخۆ: ب کوژەکێ خوە رادەستی هێزێن ئەمنی کر

09/07/2020 21:47

ئەڤرۆ نیوز، عەلی حاجی :

بەرپرسێ راگەهاندنا رێڤەبەریا پولیسێن دهوکێ د کونگرەیەکێ روژنامەڤانی دا بۆ دەزگایێن راگەهاندنێ دیار کر: پشتی ل رێکەڤتی ٥/٧/٢٠٢٠ ل سەر جادا گشتی یا دادگەها زاخۆ کەسەکێ رابوو ب تاوانا کوشتنێ، ئەڤرۆ وی ب کوژی خوە رادەستی هێزێن ئەمنی کر.

زێدەتر موقەدەم هێمن سلێمانی گۆت : ئەو ب کوژێ ل رێکەڤتی ٥/٧/٢٠٢٠ رابووی ب کوشتنا کەسەکێ ٣٥ سالی بناڤێ حەجی ئەحمەد ب گولەیێن دەبانجێ ل سەر جاددەیا سەرەکی یا دادگەها زاخۆ و تومەتبار ژ جهێ روودانێ بەرەڤ جهەکێ نەدیار رەڤی و پشتی پولیسان شیایی هەمی پێزانینان ل دور بکوژی تومار بکەت کو دیار بوو گەنجەکێ ٢٢ سالی بناڤێ ( م س ح ) رابویە ب وێ روودانێ و ئێکسەر فەرمانا گرتنێ ژلایێ دادگەها ڤەکولینێ ل زاخۆ بۆ وی تومەتباری دەرچوو بەلێ پشتی روودانێ وی بکوژی خوە بەرزە کر و رادەستی پولیسان نەکر،پشتی چار روژان ژ ليگەریان و کارکرنێ ژلایێ پولیسێن پارێزگەها دهوک و ئەفسەرێن پولیسێن زاخۆ و ب هەڤکاریا کەس و کارێن بکوژی، ئەڤرۆ پێنجشەمبێ ٩/٧/٢٠٢٠ ل دەمژمێر ٥:٠٠ ئێڤاری خوە رادەستی پولیسێن زاخۆ کر و نوکە دا ل ژێر ڤەکولینێ دایە لدڤ بەندێ ٤٠٦ ژ یاسایێن سزادانێ.

دوماهی ئامارا كورونایێ ل سه‌ر ئاستێ جیهانێ

09/07/2020 10:43

ئه‌ڤرۆ نیوز:

لگۆری دوماهی ئامارێن جیهانی ل سه‌ر ژماره‌یا توشبوویێن ڤایرۆسێ كورونایێ گه‌هشته‌ 12 ملیۆن و 170 هزارو 572 كه‌س، ژ ئه‌ڤێ ژماره‌یێ ژی 7 ملیۆن و 69 هزار و 288 توشبویی ساخ بووینه‌ و 552 هزار و 112 توشبوویێن دی ژی گیانێ خوه‌ ژ ده‌ست داینه‌.

ل سه‌ر ئاستێ جیهانێ، ئه‌مریكا پله‌یا ئێكێ دێت كۆ سێ ملیۆن و 158 هزار و 932 توشبوویی هاتینه‌ توماركرن و ژ ئه‌ڤێ ژماره‌یێ ژی ملیۆنه‌ك و 392 هزار و 679 كه‌س ساخ بووینه‌ و 134 هزار و 862 كه‌سان ژی گیانێ خوه‌ ژ ده‌ست دایه‌.

توشبوویێن كورونایێ ل جیهانێ ژ 12 ملیۆنان نێزیك دبیت

08/07/2020 11:29

ئه‌ڤرۆ ینوز:

لگۆری دوماهی ئامارێن توشبوویێن ڤایرۆسێ كورونایێ ل جیهانێ گه‌هشته‌ 11 ملیۆن و 957 هزار و 477 كه‌سان.

لگری ئه‌وان ئامارێن هه‌تا ئه‌ڤی ده‌می كۆ ژماره‌یا توشبوویێن ڤایرۆسێ كورونایێ ل جیهانێ گه‌هشته‌ 11 ملیۆن و 957 هزار و 577 كه‌سان، ژ ئه‌ڤێ ژماره‌یێ ژی پێنج سه‌د و 46 هزار و 785 كه‌سان ژی گیانێ خوه‌ ژ ده‌ست دایه‌.

ل سه‌ر ئاستێ وه‌لاتێن جیهانی، ئه‌مریكا زۆرترین رێژا توشبوویێن ڤایرۆسێ كورونایێ تێدا هاتیه‌ توماركرن، گه‌هشتیه‌ سێ ملیۆن و 97 هزار و 84 كه‌سان و 133 هزار و 972 كه‌سان ژی گیانێ خوه‌ ژ ده‌ست دایه‌.

ڤایرۆسێ كورونایێ نه‌خوشیه‌كا كۆژه‌كه‌ و هه‌یڤا 12 یا سالا بوری ل باژێرێ ئوهان یێ چینێ سه‌رهلدا و نوكه‌ ل زێده‌تری 210 وه‌لاتێن جیهانێ به‌لاڤ بوویه‌.

سوپا سالارێ عیراقێ نووچێ ڤەگەراندنا پێشمەرگەی بۆ کەرکوکێ پشتراست كر

07/07/2020 20:04

ئەڤرۆ نیوز:

عەبدولئەمیر یارەللا، سوپاسالارێ عیراقێ دووپات ل هندێ كریە، کو ناڤەندا هەماهەنگیێ یا دناڤبەرا پێشمەرگە و سوپایێ عیراقێ دێ ئاسایش و سەقامگیریێ بۆ كەركووكێ ڤەگەرینیت.

د هەڤپەیڤینەکێ دا بۆ ئاژانسا نووچەیێن عێراق یارەللای گوتیە: سەردانا وی بۆ بارەگایێ پۆلیسێن فیدرالی ل پارێزگەها كەركووك یا سەركەفتی بوویە و جەخت ل هندێ كریە، ناڤەندا هەماهەنگیێ ل گەل هێزێن پێشمەرگێ کوردستانێ دێ سەقامگیریێ بۆ وێ پارێزگەهێ دەستەبەر کەت.

ئاشكرا كریە: د سەردانا خوە دا وی گوتۆبێژ دەربارەی پەیوەندیێن دناڤبەرا هێزێن فیدرالس و هێزێن پێشمەرگەی و چاوانیا كاركرنێ بۆ ئەنجامدانا گوهۆرینان، ژ پێخەمەت باشكرنا دۆخێ ئەمنی یێ كەركووكێ هاتیە كرن.

شاندێ وه‌زاره‌تا به‌ره‌ڤانیێ بۆ ئیمزاكرنا رێكه‌تنێ دێ سه‌ره‌دانا هه‌ولێرێ كه‌ت

06/07/2020 13:03

ئه‌ڤرۆ نیوز:

رێڤه‌به‌رێ راگه‌هاندنێ و هشیاریێ ل وه‌زاره‌تا پێشمه‌رگه‌یی یا حكومه‌تا هه‌رێما كوردستانێ راگه‌هاند: ل گه‌ل وه‌زاره‌تا به‌ره‌ڤانیا عیراقێ گه‌هشتینه‌ رێكه‌تنێ.

لیوا به‌كر فه‌قێ ئه‌حمه‌د رێڤه‌به‌رێ راگه‌هاندن و هشیاریێ ل وه‌زاره‌تا پێشمه‌رگه‌یی راگه‌هاند: هه‌فتیا بوری شاندێ پێشمه‌رگه‌ی و وه‌زاره‌تا به‌ره‌ڤانیا عیراقێ ل به‌غدا كۆم بوون و ل سه‌ر چه‌ند ئاریشه‌یه‌كان رێكه‌تن، بریاره‌ ژی هه‌فتیا بهێت شانده‌كێ عیراقێ بۆ ئیمزاكرنا دانوستاندنێن دوماهیێ ل سه‌ر ئه‌وێ رێكه‌تنێ سه‌ره‌دانا هه‌ولێرێ بكه‌ن.

ناڤبری ئه‌و چه‌نده‌ ژی راگه‌هاند رێكه‌تنا وه‌زاره‌تا پێشمه‌رگه‌ی و سوپایێ عیراقێ هه‌شت خالن، كۆ ئه‌و ژی هه‌ماهه‌نگیا هه‌والگری،بودجا پێشمه‌رگه‌ی و هه‌ڤبه‌شیكرن ل ئیداره‌كرنا ده‌ڤه‌رێن كوردستانی ده‌رڤه‌ی ئیدارا هه‌رێمێ، ریب ری بوونا داعشێ دانانا پلانا ئه‌منی یا درێژخایه‌ن و هه‌ماهه‌نگیا سه‌ربازی.

وه‌زاره‌تا به‌ره‌ڤانیا عیراقی ژی راگه‌هاند ل سه‌ر مه‌ترسیێن سه‌رهلدانا تیرۆرێ و دوسه‌یا ئه‌منی یا ده‌ڤه‌رێن كوردستانی یێن ده‌رڤه‌ی ئیدارا هه‌رێمێ و هێزێن پاسه‌وانێن هه‌رێمێ ل گه‌ل هه‌ولێرێ رێكه‌تن ب دامه‌زراندنا چار سه‌نته‌رێن هه‌ماهه‌نگیێ و كارێ هه‌ڤپشك ژ رویێ سه‌ربازی ڤه و ئه‌و چار سه‌نته‌ره‌ ژی دێ ل كه‌ركووكێ و نه‌ینه‌وا و دیاله‌ و مه‌خمورێ بن.

نيشاندان 1...272829...81 زێده‌تر

لاپه‌ر 28 ژ 81