ناڤه‌ندا چاڤدێریا مافێن مرۆڤی كو بنگه‌ها وێ ل له‌نده‌نێ یه‌ دوهی راگه‌هاند كو هێزێن سه‌ر ب ئیرانێ ل سووریێ ب تایبه‌تی ژی گرۆپێ چه‌كدارێن ئه‌فغانی كو چه‌ند سالن ل سووریێ شه‌ری دكه‌ن نها چه‌كێن گران ل نێزیكی ده‌ڤه‌رێن ل ژێر كۆنترۆلا هێزێن سووریا دیموكرات بجه دكه‌ن و ئه‌و یه‌ك ژی بۆ هێزێن سووریا دیموكرات مه‌ترسیه‌كا مه‌زنه‌.

ناڤه‌ندا چاڤدێریا مافێن مرۆڤی یا سووریێ‌ دوهی راگه‌هاند كو چه‌ند رۆژن هێزێن سه‌ر ب ئیرانێ ب تایبه‌تی ژی گرۆپێ فاتمیون كو هه‌موو چه‌كدارێن وێ خه‌لكێ ئه‌فغانستانێ نه‌ و چه‌ند سالن ل سووریێ شه‌رێ داعشێ دكه‌ن نها چه‌كێن گران ل نێزیكی ده‌ڤه‌رێن ل ژێر كۆنترۆلا هێزێن سووریا دیموكرات بجه دكه‌ن و ئه‌و یه‌ك ژی دشێت ببیته‌ مه‌ترسیه‌كا مه‌زن بۆ هێزێن سووریا دیموكرات، چونكو ده‌مه‌كه‌ رژێما سووریێ دڤێت ئاخا ل ژێر ده‌ستهه‌لاتا هێزێن سووریا دیموكرات ژێ وه‌ربگریت و دیاره‌ نها دڤێت ب پشته‌ڤانیا هێزێن سه‌ر ب ئیرانێ ده‌ست ب پیلانه‌كا نوو بكه‌ت.

هه‌مان ناڤه‌ندێ ئه‌و یه‌ك ژی دیار كریه‌ كو ل نێزیكی دێرازۆرێ و چه‌ندین ده‌ڤه‌رێن دی یێن ستراتیژی گرۆپێ فاتمیون چه‌كێن گران بجه كرینه‌ و ئه‌و یه‌ك ژی ب رازیبوونا له‌شكرێ سووریێ هاتیه‌ كرن، لێ هه‌تا نها دیار نینه‌ كا ئارمانجا سه‌ره‌كی یا وێ هێزێ ئه‌وه‌ كو شه‌رێ هێزێن سووریا دیموكرات بكه‌ن یان ژی ژ به‌ر داعشێ ل وان ده‌ڤه‌ران بجه بووینه‌ لێ هه‌ر چاوا بیت بجهبوونا وێ هێزێ كو سه‌ر ب ئیرانێ یه‌ د ره‌وشا نها دا د به‌رژه‌وه‌ندیا هێزێن سووریا دیموكرات دا نینه‌.

ناڤه‌ندا چاڤدێریا مافێن مرۆڤی یا سووریێ ئه‌و یه‌ك ژی دیار كریه‌ كو چه‌ندین بنگه‌هێن سه‌ربازی یێن ئه‌مریكا ژی ل وێ ده‌ڤه‌رێ هه‌نه‌ و هه‌روه‌سا ئه‌مریكا ژی گه‌له‌ك چه‌كێن گران ل وێ ده‌ڤه‌رێ و ده‌ڤه‌رێن دی یێن ستراتیژی بجه كرینه‌، ژ به‌ر هندێ ژی هه‌كه‌ ئه‌مریكا ئاسته‌نگیان ل هه‌مبه‌ر بزاڤێن نوو یێن هێزێن سه‌ر ب ئیرانێ دروست نه‌كه‌ت له‌شكرێ فاتمیون و هێزێن دی یێن سه‌ر ب ئیرانێ دشێن ئاریشێن نوو بۆ ئه‌مریكا و هه‌ڤپه‌یمانێن وێ ل سووریێ دروست بكه‌ن، ژ به‌ر هندێ ژی دڤێت چاڤه‌رێ بین دا بزانین كا دێ د پاشه‌رۆژێ دا هه‌لویستێ ئه‌مریكا چ بیت.

ئه‌و یه‌ك د ده‌مه‌كێ دایه‌ كو حه‌فتیا بۆری شانده‌ك بلند ژ به‌رپرسێن وه‌زاره‌تا ده‌رڤه‌ و به‌ره‌ڤانیێ یا ئه‌مریكا سه‌ره‌دانا رۆژئاڤایێ كوردستانێ كرن و ل گه‌ل به‌رپرسێن رێڤه‌به‌ریا خوه‌سه‌ر یا رۆژئاڤایێ كوردستانێ و هێزێن سووریا دیموكرات كۆمبوون و د كۆمبوونێ دا شاندێ ئه‌مریكی بۆ ره‌نگه‌كێ ئاشكرا بۆ هێزێن سووریا دیموكرات دیار كر كو ئه‌و رێ ناده‌ن توركیا و هێزێن رژێما سووریێ هێرشی ده‌ڤه‌رێن ل ژێر كۆنترۆلا وان بكه‌ن و هه‌روه‌سا ژ به‌ر شه‌رێ ل دژی داعشێ ژی ئه‌مریكا دێ به‌رده‌وام هاریكاریا هێزێن سووریا دیموكرات كه‌ت.

چاڤدێرێن سیاسی ژی دیار دكه‌ن كو مه‌ترسیا ئیرانێ ل سووریێ و عیراقێ ل سه‌ر به‌رژه‌وه‌ندیێن ئه‌مریكا رۆژ ب رۆژێ زێده‌تر لێ دهێت و هه‌كه‌ ئه‌مریكا ل عیراقێ و سووریێ ده‌ست ب هنده‌ك پێرابوونێن نوو ل دژی ئیرانێ و هێزێن سه‌ر ب وێ ڤه‌ نه‌كه‌ت دێ مه‌ترسیا ئیرانێ و هێزێن سه‌ر ب وێ ل سه‌ر ئه‌مریكا زێده‌تر لێ هێت و ژ به‌ر هندێ ژی دڤێت ئه‌مریكا رێ نه‌ده‌ت كو له‌شكرێ فاتمیون و هێزێن دی یێن سه‌ر ب ئیرانێ ل سووریێ ببنه‌ مه‌ترسی بۆ هه‌ڤپه‌یمانێن وێ.

ب، سه‌رجان مه‌حمود:

پارتا كۆماریا گه‌ل (جه‌هه‌پێ) راگه‌هاند كو ئه‌و وه‌سا دبینن پرسا كوردی ب شه‌ری و توندوتیژیێ و ب رێیێن سه‌ربازی چاره‌سه‌ر‌ نابیت و بۆ ڤێ چه‌ندێ خوه‌ ئاماده‌ دكه‌ن ب ره‌نگه‌كێ به‌رفره‌ه پرسا كوردی گه‌نگه‌شه‌ بكه‌ن و ل ژێر سیبه‌را په‌رله‌مانی و ب رێیێن سیاسی و ئاشتیانه‌ چاره‌سه‌ر بكه‌ن.

شانده‌كێ په‌رله‌مانتارێن توركیا یێن سه‌ر ب پارتا كۆماریا گه‌ل، ب سه‌رۆكاتیا وه‌لی ئاخبابا سه‌ره‌دانا باژێرێن باكورێ كوردستانێ كرن و ل گه‌ل وه‌لاتیان، كاسبكار، ته‌خ و چینێن جڤاكێ كوردی كۆمبوونێن جودا جودا ساز كرن و هه‌ری دووماهیێ ژی ل باژێرێ ئامه‌دێ بۆ ئاشكراكرنا ئه‌نجامێن كۆمبوونێن خوه‌ كۆنگره‌كا رۆژنامه‌ڤانی ساز كرن و تێدا وه‌لی ئاخبابا جێگرێ سه‌رۆكێ گشتی یێ پارتا كۆماریا گه‌ل راگه‌هاند كو د سه‌ره‌دانێن ل باژێرێن سێرت، چه‌ولیك، موش، به‌دلیس و ئامه‌دێ ده‌لیڤه‌كا باش دیتنه‌ كو ل گه‌ل وه‌لاتیان و ته‌خ و چینێن جڤاكی پرسێن هه‌ی گه‌نگه‌شه‌ بكه‌ن و گۆت: (خه‌لكێ ده‌ڤه‌رێ ب گشتی ژ ره‌وشا شه‌ری بێزار بووینه‌ و ئابووریا پرانیا خه‌لكێ گه‌له‌ك خراب بوویه‌ و رێژا بێكاریێ ژی گه‌له‌ك زێده‌ بوویه‌  ‌ و بۆ ڤێ چه‌ندێ پێدڤی ب چاره‌سه‌ریێن بله‌ز هه‌یه‌ و ئه‌م دخوازین هه‌موو پرسێن هه‌ی ب سیاسه‌ته‌كا زه‌لال و ب رێیا ئاشتیێ چاره‌سه‌ر‌ بكه‌ین).

هه‌روه‌سا سه‌زگین تانری كولو ئه‌ندامێ په‌رله‌مانێ توركیا ژی راگه‌هاند كو پرسا هه‌ری گرنگ یا توركیا پرسا كوردی یه‌‌ و دڤێت ئه‌ڤ پرسه‌ ب دیالۆگێ و ئاشتیێ بهێته‌ چاره‌سه‌ر كرن و گۆت: (ل توركیا ئه‌و یه‌ك هاتیه‌ سه‌لماندن‌ كو چ ده‌ستهه‌لاته‌ك ئانكۆ پارته‌كا سیاسی خوه‌ ژ چاره‌سه‌ر ‌كرنا پرسا كوردی دوور كربیت یان نه‌شیابیت‌ پرسا كوردی چاره‌سه‌ر‌ بكه‌ت ژناڤ چوویه‌ و ئه‌ڤرۆ ئه‌م به‌رێ خوه‌ بده‌ینێ ئاكپارتی ژی رۆژ ب رۆژێ به‌ر ب نه‌مانێ ڤه‌ دچیت، سه‌ده‌مێ وێ یا سه‌ره‌كی ژی پرسا كوردیه‌ و ده‌ستهه‌لاتا ئاكپارتیێ به‌رده‌وام خوا‌ست ب رێیێن سه‌ربازی و توندوتیژیێ نێزیكی پرسا كوردی ببیت و ژ به‌ر ڤێ یه‌كێ پارچه‌بوون و لاوازبوونا وان ده‌ستپێ كریه‌).

سه‌زگین تانری كولو هه‌روه‌سا راگه‌هاند ژی كو پارتا كۆماریا گه‌ل دخوازیت پرسا كوردی ب رێیێن سیاسی و ئاشتیێ و ب سیاسه‌ته‌كا زه‌لال چاره‌سه‌ر‌ بكه‌ت و گۆت: (مه‌ وه‌ك جه‌هه‌په‌ ب هزره‌كا سه‌رده‌م و ب سیاسه‌ته‌كا ب هێز به‌رێ خوه‌ دایه‌ چاره‌سه‌ر‌كرنا پرسا كوردی و ئه‌و هێز و شیان ل گه‌ل جه‌هه‌پێ دروست بوویه‌ و خه‌لكێ مه‌ ژی چاڤه‌رێی ئاشتیێ و چاره‌سه‌ریا پرسا كوردی یه‌، دڤێت ئێدی ئه‌م گه‌لێ كورد و گه‌لێن هه‌رێمێ ژ ده‌ست نه‌ده‌ین و مه‌ بۆ بجهكرنا ئاشتیه‌كا جڤاكی ئیرادا خوه‌ ده‌رخستیه‌ هۆلێ و دێ ب هه‌موو ره‌نگه‌كێ بۆ چاره‌سه‌ركرنا پرسا كوردی كار كه‌ین).

ل دۆر هه‌لویستێ پارتا كۆماریا گه‌ل هژماره‌ك ژ نڤیسه‌ر، رۆژنامه‌ڤان و چاڤدێرێن سیاسی یێن كورد ل باكورێ كوردستانێ دیار كرن كو د بنه‌مایێ خوه‌ دا پارتا كۆماری چو به‌رنامه‌ بۆ چاره‌سه‌ركرنا پرسا كوردی نینن، نها ئاكپارتیێ ل باكورێ كوردستانێ پێگه‌هێ خوه‌ یێ جه‌ماوه‌ری ژ ده‌ست دایه‌ و پارتا كۆماری ژی دڤێت جهێ ئاكپارتیێ بگریت و ده‌نگێ كوردان بۆ خوه‌ كۆم بكه‌ت، چونكو پارتا كۆماری هه‌تا نها ژی ل دژی هندێ یه‌ كو ل توركیا زمانێ كوردی ببیته‌ زمانێ فه‌رمی یێ په‌روه‌ردێ، پارته‌ك كو ل دژی زمانێ كوردی بیت بێگومان نه‌شێت پرسا كوردی ژی چاره‌سه‌ر بكه‌ت و هه‌موو بزاڤێن نها یێن جه‌هه‌پێ بۆ بده‌ستڤه‌ئینانا ده‌نگێن كوردانه‌.

زنار تۆڤی:

ژ ئه‌نجامێ شه‌ر و ئالۆزیێن د ناڤبه‌را له‌شكرێ توركی و گه‌ریلایێن په‌كه‌كێ دا ل سه‌ر ئاخا هه‌رێما كوردستانێ، هژماره‌كا گوندێن سنۆری یێن هاتینه‌ چۆلكرن و نوكه‌ ژی ئه‌و شه‌ر و ئالۆزی د به‌رده‌وامن و رۆژانه‌ ئه‌و گوندێن سنۆری ژ ئالیێ تۆپخانه‌ و فرۆكێن توركی ڤه‌ دهێنه‌ تۆپبارانكرن، سه‌رۆكێ لژنا پێشمه‌رگه‌ی ژی ل په‌رله‌مانێ كوردستانێ بۆ رۆژناما ئه‌ڤرۆ راگه‌هاند، هه‌ر جهه‌كێ له‌شكرێ توركی بچیتێ، دێ دارێن وێ ده‌ڤه‌رێ بریت و سوژیت، پاشی دێ ل گه‌ل كۆمپانیێن توركی و وان جاشێن ل گه‌ل له‌شكرێ توركی هاتین رێككه‌ڤن، كو هه‌ردو پێكڤه‌ وان داران دبرن و به‌ر ب وه‌لاتی توركیا دبه‌ن، ئه‌و وان داران بۆ ره‌ژیێ و كارگه‌هێن چێكرنا كاغه‌ز و كارتۆنان و پێدڤیێن دیتر بكار دئینن.

رێڤنك هرۆری ، ئه‌ندامێ په‌رله‌مانێ كوردستانێ ژ فراكسیۆنا پارتی دیموكراتی كوردستان، گۆت” ئه‌ڤه‌ ده‌مێ چه‌ندین سالانه‌ ململانه‌كا دژوار د ناڤبه‌را په‌كه‌كێ و له‌شكرێ توركیا دا ل ده‌ڤه‌رێن سنۆری یێن هه‌رێما كوردستانێ یا هه‌ی، دیسان ئه‌ڤه‌ چه‌ند ساله‌ توركیا ده‌ست ب پرۆسه‌كێ كریه‌ و ب به‌هانه‌یا چه‌كدارێن په‌كه‌كێ دڤێت ژیانێ ل ده‌ڤه‌رێن سنوری نه‌هێلیت، هه‌روه‌سا هه‌ر گاڤا له‌شكرێ توركی ده‌ڤه‌ره‌كێ تۆپباران دكه‌ت، یان ده‌مێ ده‌ڤه‌ره‌كێ ژ ئه‌نجامێ بۆمبه‌بارانا فرۆكان دسوژیت، یان ده‌مێ سه‌ربازگه‌هه‌كا نوو ل ده‌ڤه‌ره‌كێ دروست دكه‌ت، ئه‌و هه‌موو وان دارێن دكه‌ڤنه‌ درێیا وێ سه‌ربازگه‌هێ دا، ب شه‌فه‌ل و ئالیه‌تێن دیتر دبرن و وان داران به‌ر ب وه‌لاتێ توركیا دبه‌ن، ئه‌و وان داران بۆ ره‌ژیێ و دیسان بۆ سۆتنێ و كارگه‌هێن چێكرنا كاغه‌زان بكار دئینن”.

رێڤنگ هرۆری، سه‌رۆكێ لژنا پێشمه‌رگه‌ی ل په‌رله‌مانێ كوردستانێ گوت ژی” هه‌ر جهێ له‌شكرێ توركی بچیتێ، گه‌له‌ك زیانێ دگه‌هینیته‌ دارستانێن وێ ده‌ڤه‌رێ و هه‌ر تشتێ بكه‌ڤیته‌ د رێیا وان دا ژ ناڤ دبه‌ن و دسۆژن، د هه‌مان ده‌مدا، له‌شكرێ وان و كۆمپانیێن وان ل گه‌ل وان جاشێن دگه‌لدا دا رێككه‌فتینه‌، كو بۆ خوه‌ داروبارێ گوندێن سنوری یێن كوردستانێ ببرن و ڤی كارێ نه‌ مرۆڤایه‌تی ئه‌نجام بده‌ن، هه‌روه‌سا ئه‌و جاشێن ل گه‌ل له‌شكرێ توركی هاتین، هه‌ڤسوزێن وانه‌ و هه‌ر تشتێ ده‌وله‌تا توركیا دڤێت بۆ دكه‌ن، له‌وما نوكه‌ هه‌ر جهێ وان كونترۆلكری، ب ره‌نگه‌كێ درندانه‌ ژینگه‌ه و سرۆشتێ وی ده‌ڤه‌رێ ب ته‌مامی ژناڤبریه‌، ب تایبه‌تی ژی ل سنۆرێ ده‌ڤه‌رێن باتیفا و كانی ماسێ، د هه‌مان ده‌مدا، رۆژانه‌ تۆپباران و بۆمبه‌بارانا له‌شكرێ توركی بۆ سه‌ر گوندێن سنۆری د به‌رده‌وامن و ڤێ چه‌ندێ ترس و دودلی ل ده‌ف خه‌لكێ وان ده‌ڤه‌ران په‌یدا كریه‌، ژبه‌ر وان شه‌ر و ئالۆزیان ژی هه‌تا نوكه‌ هژماره‌كا گوندان هاتینه‌ چۆلكرن، هه‌روه‌سا توركیا د هه‌ر هێرشكه‌كا زه‌مینی و ئاسمانی دا، زیانێن گه‌له‌ك مه‌زن دگه‌هینیته‌ خه‌لكێ وان گوندان و ب سه‌دان دونه‌مێن دارستانێ و چه‌روانێ په‌زی و دیسان و ره‌ز و زه‌ڤیێن وه‌لاتیان دسوژیت و زیانێ دگه‌هینیتێ”.

ئه‌ڤرۆ:

هژماره‌كا زێده‌ ژ ره‌وشه‌نبیر و نڤیسه‌رێن تورك و كورد دیار كرن كو نها پرسا كوردی بوویه‌ پرسه‌كا هه‌ری مه‌زن بۆ توركیا و ژ به‌ر پرسا كوردی زیانێن گه‌له‌ك مه‌زن ژی گه‌هشتینه‌ توركیا، ژ به‌ر هندێ ژی دخواز ژ سه‌رۆك كۆمارێ توركیا كرن كو ده‌ست ب قۆناغه‌كا نوو بۆ چاره‌سه‌ركرنا پرسا كوردی بكه‌ت.

هژماره‌كا به‌رچاڤ ژ نڤسیه‌ر و ره‌وشه‌نبیرێن تورك و كورد د نامه‌كا ڤه‌كری دا داخواز ژ سه‌رۆك كۆمارێ توركیا ره‌جه‌ب ته‌یب ئه‌ردۆگانی كرن كو ده‌ست ب قۆناغه‌كا نوو بۆ چاره‌سه‌ركرنا پرسا كوردی بكه‌ت، چونكو هه‌تا پرسا كوردی ل توركیا نه‌هێنه‌ چاره‌سه‌ركرن دێ ئالۆزیێن نها به‌رده‌وام بن و ژ به‌ر پرسا كوردی هه‌تا نها زیانێن گه‌له‌ك مه‌زن گه‌هشتینه‌ توركیا و دڤێت ده‌ست ب قۆناغه‌كا نوو بهێته‌ كرن.

ل ئالیێ دی كه‌مال كلچدار ئوگلۆ سه‌رۆكێ گشتی یێ پارتا كۆماریا گه‌ل ژی دیار كر كو سه‌رۆك كۆمارێ توركیا و ده‌ستهه‌لاتا وی چو به‌رنامه‌ بۆ چاره‌سه‌ركرنا پرسا كوردی نینن و دڤێت پرسا كوردی ل په‌رله‌مانێ توركیا بهێته‌ چاره‌سه‌ركرن و ژ به‌ر هندێ ژی دڤێت به‌ری هه‌ر تشته‌كێ سیسته‌مێ توركیا ببیته‌ سیسته‌مێ په‌رله‌مانی و گۆت: (هه‌تا بریارێن توركیا و پاشه‌رۆژا مه‌ هه‌موویان د ده‌ستێ كه‌سه‌كێ دا بیت بێگومان دێ ره‌وش گه‌له‌ك خراب بیت، به‌ری نها ژی مه‌ گه‌له‌ك جاران دیار كریه‌ كو سیسته‌مێ سه‌رۆكاتیێ ل گه‌ل راستیا توركیا ناگونجیت و دڤێت سیسته‌مێ توركیا بهێته‌ گوهۆرین، ده‌م یێ هاتی گه‌لێ توركیا پێكڤه‌ بریاره‌كا گرنگ بده‌ن و ئه‌ردۆگانی ژ ده‌ستهه‌لاتێ دوور بكه‌ن و هه‌روه‌سا سیسته‌مێ توركیا ژی دڤێت جاره‌كا دی ببیته‌ سیسته‌مێ په‌رله‌مانی).

ژ ئالیێ خوه‌ ڤه‌ ئه‌حمه‌د داوود ئوگلۆ سه‌رۆك وه‌زیرێن به‌رێ یێ توركیا و سه‌رۆكێ پارتا پاشه‌رۆژێ ژی دوهی راگه‌هاند كو ئه‌و یێ رژد بوو قۆناغا چاره‌سه‌ریێ ل توركیا به‌ر ب پێشڤه‌ بچیت و گۆت: (ده‌مێ ئه‌ز بوومه‌ سه‌رۆك وه‌زیرێن توركیا وی ده‌می به‌رێز ئه‌ردۆگانی گۆته‌ من دڤێت قۆناغا ئاشتیێ یا به‌رده‌وام بیت و من ژی گۆته‌ وی كارێ من یێ سه‌ره‌كی دێ به‌رده‌وامیا قۆناغا ئاشتیێ بیت، لێ پاشی گه‌له‌ك تشت هاتنه‌ گوهۆرین و ئه‌ردۆگانی ژی قۆناغا ئاشتیێ ژبیر كر، دڤێت نها ئه‌ردۆگان به‌رسڤا گه‌لێ توركیا بده‌ت كا بۆچی قۆناغا ئاشتیێ هاته‌ راگرتن).

هه‌رچه‌نده‌ به‌ری نها رۆژناما یێنی شه‌فه‌ق یا سه‌ر ب ئاكپارتیێ دیار كربوو كو ئه‌ردۆگان و كه‌سێن نێزیكی وی ل سه‌ر ده‌ستپێكرنا قۆناغا ئاشتیێ كار دكه‌ن لێ هه‌تا نها تشته‌ك وه‌سا د رۆژه‌ڤا توركیا دا نینه‌ و چاڤدێرێن سیاسی یێن توركیا ژی دیار دكه‌ن كو هه‌كه‌ ئاكپارتی و ئه‌ردۆگان ل سه‌ر داخستنا هه‌ده‌پێ د رژد بن ئه‌و یه‌ك ژی رامانا هندێ دده‌ت كو قۆناغه‌كا دژوار ل پێشیا توركیا یه‌ و ده‌ستهه‌لاتێ نه‌ڤێت پرسا كوردی چاره‌سه‌ر بكه‌ت.

ده‌زگه‌هێن راگه‌هاندنا توركیا ژی دیار دكه‌ن كو ده‌مه‌كه‌ ئاكپارتی و پارتا بزاڤا نه‌ته‌وه‌په‌رست كار بۆ داخستنا هه‌ده‌پێ دكه‌ن، چونكو د چه‌ندین راپرسیێن كو به‌ری نها هاتینه‌ كرن دا دیار بوویه‌ كو ئاكپارتی و پارتا بزاڤا نه‌ته‌وه‌په‌رست نه‌شێن ڤێجارێ پرانیا ده‌نگان بده‌ستڤه‌ بینن و نها ئه‌و ل سه‌ر چه‌ندین به‌رنامێن نوو كار دكه‌ن و داخستنا هه‌ده‌پێ ژی ئێكه‌ ژ وان خالێن كو مه‌هه‌پێ دڤێت ب رێیا داخستنا هه‌ده‌پێ ده‌نگێن خوه‌ زێده‌ بكه‌ت.

ل ئالیێ دی دوهی میتحات سینجار هه‌ڤسه‌رۆكێ هه‌ده‌پێ ژی راگه‌هاند كو ب داخستنا هه‌ده‌پێ دێ ره‌وشا ناڤخوه‌یی یا توركیا ئالۆزتر لێ هێت و هه‌كه‌ به‌ری هه‌لبژارتنان بریارا داخستنا هه‌ده‌پێ ژی بهێته‌ دان، وان خوه‌ بۆ هه‌ر ئه‌گه‌ره‌كێ به‌رهه‌ڤ كرینه‌ و دێ پشكداریێ د هه‌لبژارتنێن داهاتی یێن توركیا دا كه‌ن.