ئەڤرۆ نیوز:
ئەڤرۆ سێشەمبی، پەرلەمانێ کوردستانێ ب دەنگێن ٧٠ پەرلەمانتاران قانوونا ماف و ئەرکێن نەخۆشی پەسەند کر.
ئەو قانوونە ژ ١٧ مادان پێکھاتیە و چەندین مافێن سەرەکی ددەتە نەخۆشی.
ئەندامەکێ لژنا ساخلەمیێ ل پەرلەمانێ کوردستانێ ژی دیار کریە: کو ئارمانجا وان د وێ قانوونێ دا ئەوە مافێن نەخۆشی ب رەنگەکێ قانوونی دابین بکەن، دیسان ئەو قانوونە دێ رژدیێ ل سەر پاراستنا مافێن نەخۆشی کەت، ھەروەسا دڤێت مافێن نۆژشداران و کارمەندێن ساخلەمیێ ژی ب باشترین شێوە بهێنە پاراستن.
ئه‌ڤرۆ نیوز:
كۆمپانیا مایكرۆسوفت یا ئه‌مریكی راگه‌هاند كۆمپانیا بایت دانس یا خودانێ ئه‌پلیكه‌یشنا تیك توك ره‌تكر پشكێن خوه ژ ئه‌پلیكه‌یشنا خوه بفرۆشیته مایكرۆسوفتێ.
كۆمپانیا مایكرۆسوفت یا ئه‌مریكی د به‌یاننامه‌یه‌كێ دا راگه‌هاند كۆ مافێ خودانیا ئه‌پلیكه‌یشنا تیك توك ل ئه‌مریكا ناهێته فرۆشتن بۆ كۆمپانیا مایكرۆسوفت.
دونالد تره‌مپ راگه‌هاند بوو هه‌كه ته‌ڤایا پشكێن خو نه فرۆشنه كۆمپانیا مایكرۆسوفت ئه‌ڤه دێ ته‌ڤایا چالاكیێن تیك توكێ ل ئه‌مریكا هێنه قه‌ده‌غه‌كرن، 15 ئه‌ڤێ هه‌یڤێ دوماهی ده‌مه بۆ ئه‌نجامدانا گرێبه‌ستا كرین و فرۆتنێ هاتیه ده‌ستنیشانكرن.
ئه‌ڤرۆ نیوز:
حه‌مید نائیف په‌یڤدارێ وه‌زاره‌تا چاندنا عیراقێ راگه‌هاند حوكمه‌ت ب ژڤانه هه‌فتیا بهێت 700 هزار ته‌نێن ده‌خل و دانی د زێده‌كرنه‌كا ئاشكرا دا بفرۆشیت، كێمترین نرخ 125 دۆلار دبیت بۆ هه‌ر ته‌نه‌كێ، زێده‌كرن دێ سه‌رنجا ده‌وله‌تێن كه‌نداڤێ عه‌ره‌بی و ئوردن و ده‌وله‌تێن باكوری ئه‌فریقا راكێشیت، ئه‌گه‌رێ زێده‌بوونا جه‌هی ژی ڤه‌دگه‌ریت كۆ ئاڤ ل سالا بووری زۆر بوو ئه‌ڤێ چه‌ندێ وه‌كر به‌رهه‌مێ ناڤخو باش بیت.
ناڤبری ئه‌و چه‌نده ژی دیاركر به‌رهه‌مێ جه‌هی ب ئاوایه‌كی زێده‌بوویه ب ئه‌گه‌ری بهایێ وی كۆ حوكمه‌ت دده‌ته جوتیاران كۆ 389 بۆ 414 دۆلاران بۆ هه‌ر ته‌نه‌كێ وه‌ردگریت پاشی وه‌ك ئالیك دفرۆشیته خودان پرۆژه‌یێن په‌له‌وه‌ران.
ئەڤرۆ نیوز:
ئەڤرۆ، 13/9/2020 رێڤەبەریا گشتی یا ساخلەمیا پارێزگەها دهۆکێ راگەهاند: 157 تووشبوویێن دی یێن ڤایرۆسێ کۆرۆنایێ ل دهۆکێ پشتی هەموو پشکنین بۆ هاتینەکرن، دیاربوو کو ب تەمامی چارەسەربووینە و ب سلامەتی ژ نەخۆشخانێ دەرکەڤتن و چوونە د ناڤ کەسوکارێن خوە دا.
هەروەسا گۆتیە: ب ڤێ چەندێ هژمارا چارەسەربوویان گەهشتە (2580) کەسان و نوکە (4836) نەخۆش ماینە ل نەخۆشخانێ.
ئەڤرۆ نیوز، عەلی حاجی :
بەرپرسێ راگەهاندنا ساخلەمیا زاخۆ بۆ ئەڤرۆ نیوز دیار کر: گەنجەکێ ٢٣ سالی ل شەڤا بوری دناڤ دوکانا برایێ خوە دا ل سەنتەرێ بازارێ زاخۆ خوە خەندقاند.
زێدەتر ئەمیر عەلی گۆت : ل دەمژمێر ١٢:٠٠ شەڤا بوری گەنجەکێ ٢٣ سالی ل باژێرێ زاخۆ دناڤ سەنتەری بازاری دا و ل دوکانا برایێ خوە دا ژ ئەگەرێ نەدیار ب حەبلەکێ خوە خەندقاندیە، پشتی هنگێ تەرمێ وی بۆ نۆشداریا داد ل نەخوشخانا زاخۆ هاتیە رەوانە کرن و د نوکە دا بۆ زانینا خوە کوشتنا وی گەنجی پولیسان پەرێن ڤەکولینێ ڤەکرینە.
بەری دو روژان ژی کچەکێ ژ ئەگەرەکێ نەدیار ل زاخۆ خوە خەندقاند بوو.
ئەڤرۆ نیوز، زنار تۆڤی:
پشتی مستەفا کازمی سەرۆک وەزیرێن عیراقێ سەرەدانا دهۆکێ و دەروازێ ئیبراهیم خەلیل ل زاخۆ دای، هەر ئەڤرۆ مەغرەب سەرەدانا گەلها نزارکێ دا و چاڤ ب چەندین کەسوکارێن قوربانیێن ئەنفالێ کەفت د وێ کەلهێ دا.
عەلی بەندی، چالاکڤانەکە د وارێ تاوانێن ئەنفالێ دا بۆ ئەڤرو نیوز دیار کر: ئەڤرۆ مەغرەب مستەفا کازمی سەرۆک وەزیرێن عیراقێ سەرەدانا کەلها نزارکێ دا، ل دەمێ ئەنفالێ ل سالا 1988 دەست پێکری، ئەو ل دەڤەرا بەهدینان بوو، لەوما دەمێ ئەڤرۆ وی سەرەدانا دهۆکێ کری، وی دڤیان ژ نێزیک ڤە ڤێ کەلهێ ببینیت و ل گەل وان دایکان روونیتە خوار ئەوێن ل وی دەمی کازمی نانێ وان خواری، وی چەندین کەسوکارێن قوربانیێن ئەنفالێ دیتن و ل گەل وان ئاخفت.
ناڤهاتی گۆت ژی: کازمی ب خوە ژی ئێک ژ پاشمایێن ئەنفالانە و یێ ل ناڤ ئەنفالێ دا ژیای و کازمی گەلەک بیرەوەری ل گەل وی خەلکێ و کەسوکارێن وان هەبووینە ئەوێن دناڤ کەلها نزارکێ دا حوکمەتا بەعسی گرتین و ئەشکەنجە داین، هەروەسا عەلی گۆت: ئەز ب خوە ل گەل کازمی ئاخفتم وی گوتە من، دەمێ ئەنفالێ دەست پێکری ئەز ل دەڤەرا بەهدینان بووم، هەروەسا کازمی گۆتیە وی، ئەو دێ هەموو بزاڤێن خوە ئێخیتە کار بۆ دانەنیاسینا ئەنفالێ ل سەر ئاستێ نێڤدەولەتی و ناڤەندێن بریاردانێ، دیسان دێ بزاڤێ کەت کو قوربانی و زیان ڤێکەفتیێن ئەنفالێ ژ ئالیێ مادی و مەعنەویڤە قەرەبۆ کەت.
ئه‌ڤرۆ نیوز:
پشتی گازندێن سه‌رۆكا په‌رله‌مانێ كوردستانێ، ده‌مێ كۆمبوونا په‌رله‌مانێ كوردستانێ هاته گوهارتن، و سكرتێرا په‌رله‌مانی ژی به‌حسا چاره‌كرنا ئه‌وێ ئاریشه‌یێ دكه‌ت.
مونا قاوه‌چی سكرتێرا په‌رله‌مانێ كوردستانێ راگه‌هاند بریاره هه‌فتیا بهێت ده‌سته‌یا سه‌رۆكاتیا په‌رله‌مانێ كوردستانێ میكانزمه‌كێ بۆ چاره‌كرنا ئاریشه‌یا به‌رهه‌ڤنه‌بوونا په‌رله‌مانتاران ل هولا كۆمبوونا دابنیت.
بریاره ئه‌ڤرۆ ده‌مژمێر 2 پشتی نیڤرۆ په‌رله‌مانێ كوردستانێ رینشتنا ژماره 4 یا ئاسایی یا خۆلا پائیزی یا سالا دوێ ژ خۆلا پێنجێ یا هه‌لبژارتنان برێڤه بچیت.
بۆ جارا ئێكێ یه كۆمبوونا په‌رله‌مانێ كوردستانێ دكه‌ڤته پشتی ده‌مژمێر 2 نیڤرۆ ئه‌ڤه ژی پشتی گازندا رێواز فایه‌ق سه‌رۆكا په‌رله‌مانێ كوردستانێ هات كۆ راگه‌هاند بوو، پشكه‌كا په‌رله‌مانتاران پێگیری ده‌مێ كۆمبوونێ نابن.
به‌رنامه‌یێ كارێ كۆمبوونا په‌رله‌مانێ كوردستانێ بۆ ئه‌ڤرۆ خاندنا دوێ بۆ پرۆژه‌یی یاسایا بستوڤه‌كرنا قه‌رمانبه‌رێن هه‌رێما كوردستانێ یه.
ئه‌ڤرۆ نیوز:
نابیت ل ده‌مێ رێكخستن یان گوهورینا گرێبه‌سته‌كا كرینا یه‌كه‌یێن ئاكنجیبوونێ پاره ژ بكران بهێنه وه‌رگرتن.
رێڤه‌به‌راتیا وه‌به‌رهێنانێ ل پارێزگه‌ها دهۆكێ د راگه‌هاندنه‌كێ دا به‌لاڤكریه و تێدا هاتیه، ئەڤرۆ ل رێکەفتی 9/9/2020هەوا ئاگەهدارکرنا خودانێن پڕۆژێن ئاکنجیبوونێ ل سەر وێ بڕیارا ژ لایێ حکومەتا هەرێما کوردستانێ بۆ بەرژەوەندیا گشتی یا وەلاتیان هاتیەدان کو (نابیت پارە بەرامبەر رێکخستن یان گهۆڕینا گریبەستا کڕینا یەکێن ئاکنجیبوونێ ژ بکڕان بهێتە وەرگرتن، ل سنوورێ قەزایێن سەر ب پارێزگەها دهۆکێ ڤە (دهۆک، سێمێل، زاخۆ، ئاکرێ، بەردەڕەش و ئامێدیێ) بدوماهی هات.
هه‌ر د ئه‌وێ راگه‌هاندنا رێڤه‌به‌ریا وه‌به‌رهێنانا دهۆكێ ئاماژه ب وێ چه‌ندێ هاتیه دان كۆ هه‌وا ئاگه‌هداركرنێ ب رێكا نڤیساره‌كا فه‌رمی و پوسته‌ره‌كێ فیلیكسی بۆ هه‌موو پرۆژێن ئاكنجیبوونێ هاتیه ئاراسته‌كرن.
رێڤه‌به‌راتیا وه‌به‌رهێنانێ ل پارێزگه‌ها دهۆكێ ئه‌و چه‌نده ژی د راگه‌هاندانا خوه دا دیاركریه هەر دەما پارە بەرامبەر رێکخستن یان گهۆڕینا گرێبەستێ ژ وەڵاتیان هاتە وەرگرتن، ل وی دەمی وەڵاتی دێ سکاڵایا خۆ پێشکێشی رێڤەبەریا گشتی یا وەبەرهێنانێ کەت یان ژی پەیوەندیێ ب ڤێ ژمارێن ٠٧٥١٤١٠٩٦٧٦
٠٧٥٠٨٧٧١٠٥٤ مه کەت.
ئه‌ڤرۆ نیوز:
لژنا بلندا ساخله‌می و سلامه‌تیێ ل عیراقێ بریار دا ته‌ڤایا خالێن توخیبی بۆ لهه‌ڤگوهارتنا بازرگانیێ ل ته‌ڤایا رۆژێن هه‌فتیێ دێ هێنه‌ڤه‌كرن، ده‌واما سازیێن حوكمه‌تێ ژی ب 50% فه‌رمانبه‌ران ده‌ست پێ كه‌ت، چالاكیێن وه‌رزشی بێ هانده‌ر دێ ده‌ست پێ كه‌ن.
لژنا بلندا ساخله‌میێ و سلامه‌تیێ ل عیراقێ كۆ ب سه‌رۆكاتیا سه‌رۆك وه‌زیرێ حوكمه‌تێ چه‌ند بریاره‌ك ده‌رخستن ژ وان، ته‌ڤایا خالێن توخیبی یێن عیراقی ل هه‌مو رۆژێن هه‌فته‌یێ دێ دڤه‌كری بن بۆ لهه‌ڤگوهارتنا بازرگانی و دابینكرنا پێدڤیێن رۆژانه، هه‌روه‌سا ده‌واما فه‌رمانگه‌هێن حوكمی ب رێژا 50% یا فه‌رمانبه‌ران ده‌ست پێ دكه‌ت، خارنگه‌هـ و هول و ناڤه‌ندێن گه‌شتیاری دێ هێنه‌ڤه‌كر، هه‌روه‌سا چالاكیێن وه‌رزشی و گه‌نجان دووباره ده‌ست پێ كه‌ن، به‌لێ بێ به‌رهه‌ڤبوونا هانده‌ران.
لژنا بلندا ساخله‌میێ و سلامه‌تیێ ل عیراقێ ئه‌و چه‌نده ژی دیاركر پیگیربوون ب رێكارێن ساخله‌مێ و خوپارێزیێ مه‌رجه بۆ به‌رده‌وامیا بریاران.
نيشاندان