ئەڤرۆ نیوز:
رێڤەبەریا گشتی یا ساخلەمیا پارێزگەها دهۆکێ راگەهاند: ئەڤرۆ 8/8/2020 ، (20) نەخۆشێن دی یێن ڤایرۆسێ کۆرۆنایێ ل دهۆکێ کو د نەخۆشخانێ دا بوون، پشتی هەموو پشکنین بۆ هاتینە کرن، دیاربوو کو ب تەمامی چارەسەربووینە و ب سلامەتی ژ نەخۆشخانێ هاتنە دەرخستن.
هەروەسا گۆتیە: ب ڤێ چەندێ هژمارا گشتی یا نەخۆشێن چارەسەربووین گەهشتنە 455 کەسان و نوکە 581 نەخۆش ماینە د نەخۆشخانێ دا.
ئەڤرۆ نیوز:
کۆچکا سپی یا ئەمریکا راگەهاند: سەرۆک وەزیرێن عیراقێ مستەفا کازمی دێ سەرەدانا ئەمریکا کەت و ژ ئالیێ دۆنالد ترەمپێ سەروکێ ئەمریکا ڤە دێ پێشوازی لێ هێتە کرن.
کۆچکا سپی د راگەهاندنەکێ دا ئاشکرا کریە: ل ٢٠ تەباخا ٢٠٢٠ مستەفا کازمی سەرۆک وەزیرێن عیراقێ، دێ سەرەدانا واشنتۆن کەت و ژ ئالیێ دۆنالد ترەمپێ سەرۆکێ ئەمریکا ڤە دێ پێشوازی لێ هێتە کرن، ئەڤ سەرەدانە دێ ب مەرەما گۆتۆبێژکرنا کۆرۆنایێ و دوسیێن ئێمناهیێ و وزێ و ئابووری بیت.
ئه‌ڤرۆ نیوز:
وه‌زیرێ ده‌رڤه‌یێ ئه‌مریكا راگه‌هاند دانوستاندنێن ئه‌تومی یێن دناڤبه‌را ئه‌مریكا و روسیا ده‌ربارێ توخیبداركرنا پرچه‌كرنێ پێشكه‌ڤتنێن به‌رچاڤ بخوڤه دیتینه، هیڤی خازین چین ژی پشكداریێ د ئه‌وان دانوستاندنان دا بكه‌ت.
مایك پومپیو وه‌زیرێ ده‌رڤه‌یێ ئه‌مریكا د كۆنگره‌یه‌كێ رۆژنامه‌ڤانی دا راگه‌هاند ده‌مێ چه‌ند هه‌یڤه‌كانه به‌رپرسێن ئه‌مریكا بزاڤێ دكه‌ن هه‌ر سێ وه‌لاتێن ئه‌مریكا و چین و روسیا كۆ خودانێ مه‌زنترین هێزا ئه‌تومی نه ل جیهانێ، ل سه‌ر مێزا دانوستاندنێ خرڤه ببن بۆ كێمكرنا مه‌ترسیێن ئه‌وی چه‌كی ل جیهانێ.
وه‌زیرێ ده‌رڤه‌ی ئه‌مریكا ئه‌و چه‌نده ژی راگه‌هاند دانوستاندنێن ئه‌تومی یێن دناڤبه‌را واشنتون و موسكویی به‌ره‌ڤ پێشڤه‌چوون ب خوڤه دیتینه، هیڤی خازین چین ژی بریارا پشكداركرنێ د ئه‌وان دانوستاندنان دا بده‌ت.
هه‌یڤا بووری دانوستاندنێن ئه‌تومیێن ئه‌مریكا و روسیا ده‌ربارێ درێژكرنا رێكه‌تنا سترات 3 ل ڤیه‌نا ده‌ستپێكریه كۆ ب مه‌به‌ستا توخیبداركرنێ بۆ خۆ پرچه‌كرنێ واشنتون و موسكویێ ئیمزا ل سه‌ر كر بوو.
ئەڤرۆ نیوز:
رێڤەبەریا گشتی یا ساخلەمیا پارێزگەها دھۆکێ راگەھاند: چ ئاریشێن ئۆکسجینێ ل نەخۆشخانێ نینن و ژبەر تەمەن و نەخۆشیا دژوار، وێ ژنێ وەغەر کریە.
رێڤەبەریا گشتی یا ساخلەمیا پارێزگەھا دھۆکێ ل سەر وەغەرکرنا وێ ژنا ئەڤرۆ، یا توشبوویا کۆرۆنایێ راگەھاند: نەخۆشا ناڤبری ل روژا ٢٨/٧/٢٠٢٠ ل نەخۆشخانا کاڤین ھاتبوو نڤاندن و ژبەرکو ژیێ وێ ٦٥ سالبوون و ئێشێن دومدرێژ ھەبوون و رەوشا وێ یا دژوار بوو، لەوما ھاتە رەوانەکرن بو نەخۆشخانا تایبەت یا چارەسەریا تووشبوویێن کۆرۆنایێ و ھەموو کارێن پێدڤی بۆ ھاتینە کرن.
دیسان گۆتیە: ل رۆژا دویێ رەوشا وێ ب مەترسی کەفت و ل سەر ئوکسجینێ ھاتە دانان و چ ئاریشێن نەبوونا ئوکسجینێ ل نەخۆشخانێ نینن، لێ ژ ئەنجامێ دژواربوونا حالەتێ وێ ل سەر ئامیرێن ھەناسەدانا دەستکرد ل نەخۆشخانێ ھاتە دانان و ژبەر خرابیا رەوشا وێ وەغەرکریە.
ئه‌ڤرۆ نیوز:
وه‌زیرێ په‌روه‌رده‌یا حوكمه‌تا هه‌رێما كوردستانێ راگه‌هاند سالا خاندنا 2020-2021 وه‌ك شێوه‌یێ سالا 2019-2020 ره‌هه‌نده‌ك تێدایه ئه‌وژی ره‌هه‌ندێ ساخله‌میێ یه و پێدڤی هه‌لسه‌نگاندنێن ساخله‌میێ نه.
د. ئالان حه‌مه سه‌عید وه‌زیرێ په‌روه‌دێ یێ حوكمه‌تا هه‌رێما كوردستانێ راگه‌هاند بۆ سالا خاندنا نوو وه‌زاره‌ت مژۆلی به‌رنامه‌یه‌كی یه كۆ پێشكێشی جڤاتا وه‌زیران بكه‌ت كۆ ئه‌و ژی تایبه‌ته ب چه‌وانیا ده‌ستپێكرنا سالا نوو یا خاندنێ، سالا خاندنا 2020-2021 هه‌ر وه‌ك سالا 2019-2020 ره‌هه‌نده‌ك تێدایه كۆ ئه‌و ژی ره‌هه‌نده‌كێ ساخله‌میێ یه و پێدڤی ب راوێژ و راوه‌رگرتن و فه‌رمان ده‌رخستنان دبیت ژلایێ جڤاتا وه‌زیرانڤه.
وه‌زیرێ په‌روه‌دێ یێ حوكمه‌تا هه‌رێما كوردستانێ ئه‌و چه‌نده ژی راگه‌هاند ل گه‌ل وه‌زاره‌تا خاندنا بلند پێكڤه به‌رنامه‌یه‌كی پێشكێشی جڤاتا وه‌زیران بكه‌ین ل سه‌ر چه‌وانیا ده‌ستپێكرنا سالا خاندنێ یا 2020-2021 بۆ دانوستاندنێ ل سه‌ر بكه‌ین.
ئه‌ڤرۆ نیوز:
عه‌ونی زیاب په‌یڤدارێ وه‌زاره‌تا ژێده‌رێن ئاڤێ یێن عیراقێ راگه‌هاند د ده‌مه‌كێ نێزیك دا دێ دانوستاندنێ ل گه‌ل توركیا ده‌ربارێ ئاڤێن دیجله و فوراتی ده‌ست پێ كه‌ن.
لگۆری داتایێن وه‌زاره‌تێ رێژه‌یا ئاڤێ ژ هه‌ردو رووبارێن دیجله و ورات ل چه‌ند سالێن بوری كێمتر بوویه، په‌یڤدارێ وه‌زاره‌تێ ژی ئاماژه ب وێ چه‌ندێ كر ئه‌گه‌رێ كێم بوونا رێژا ئاڤێ ل ئه‌ڤان هه‌ر دو رووباران ڤه‌دگه‌ریت بۆ كێمیا باران و سه‌قایی.
عه‌ونی زیاب په‌یڤدارێ وه‌زاره‌تا ژێده‌رێن ئاڤێ یێن عیراقێ ئه‌و چه‌ند ژی راگه‌هاند مسته‌فا كازمی سه‌رۆك وه‌زیرێ عیراقێ، مه‌هدی ره‌شید حه‌مدانی وه‌زیرێ ژێده‌رێن ئاڤێ راسپاردیه دانوستاندنان ل گه‌ل توركیا ده‌ربارێ پشكا ئاڤێ ژ هه‌ردو روبارێن دیجله و فورات ده‌ست پێ بكه‌ن، عیراقێ زۆر پێدڤی ب ئاڤێ هه‌یه و هه‌كه نه‌گه‌هشتنه رێكه‌تنێ دێ زیانه‌كا زۆر دیڤ خودا ئینیت، كۆ ل چه‌ند رۆژێن بهێت ب ریكا ڤیدیو كۆنفرانس دانوستاندنێ كه‌ن.
ئەڤرۆ نیوز:
وەزارەتا ساخلەمیا هەرێما کوردستانێ راگەهاند: 357 تووشبوویێن نوو یێن کۆرۆنایێ هاتینە تۆمار کرن و سەرجەمێ گشتی یێ تووشبوویان گەهشتە 15 هزار و 173 کەسان.
هەروەسا گۆتیە، د 24 دەمژمێرێن بوری دا دو هزار و 762 پشکنین بۆ دەستنیشانکرنا تووشبوویێن ڤایرۆسێ کۆرۆنایێ هاتینە کرن و هژمارا تووشبوویان ب ڤی رەنگی بوو، هەولێر: 218 کەس، سلێمانی: 16 کەس، دهۆک: 83 کەس، گەرمیان: 28 کەس، راپەرین: 12 کەس.
دیسان گۆتیە: 138 تووشبوویێن دی دی ژ وێ نەخۆشیێ باشبووینە و 12 تووشبوویان ژی وەغەر کریە.
هەتانوکە ل هەرێما کوردستانێ 15 هزار و 173 تووشبوویێن کۆرۆنایێ هاتینە تۆمار کرن، ژ وێ هژمارێ نەهـ هزار و 551 کەس باشبووینە و 586 تووشبوویان ژی وەغەر کریە.
ئه‌ڤرۆ نیوز:
رێڤه‌به‌راتیا ساخله‌میا دهۆكێ راگه‌هاند ئه‌ڤرۆ توشبوویه‌كا دی یا كورونایێ كۆ دژیێ 63 سالیێ دا ئاكنجیا قه‌زا زاخۆیه گیانێ خوه ژ ده‌ست دا، بڤێ ته‌ڤایا گیان ژ ده‌ست دانێ ل دهۆكێ گه‌هشته پێنج كه‌سان.
لگۆری راگه‌هاندنا ساخله‌میا دهۆكێ، توشبوویه‌كا ڤایرۆسێ كورونایێ كۆ دژیێ 63 سالیێ دا بوو ئاكنجیا قه‌زا زاخۆیه ده‌مێ هه‌فتیه‌كێ ره‌وشا وێ تێك چو بوو ل بن ئامیرێ هه‌ناسه‌دانا ده‌ستكرد ڤه بوو، ل نه‌خوشسخانه‌یا تایبه‌ت ب كورونایی ل پارێزگه‌ها دهۆكێ گیانێ خوه ژ ده‌ست دا.
لگۆری دوماهی ئامارا وه‌زاره‌تا ساخله‌میا حوكمه‌تا هه‌ریما كوردستانێ، ل پاریزگه‌ها دهۆك 475 توشبوویێن كورونایێ هاتینه توماركرن، 376 توشبوو ساخ بووینه و پێن كه‌سان ژی گیانێ خوه ژ ده‌ست دایه.
ئەڤرۆ نیوز:
جێگرێ پارێزگارێ دهۆکێ دەربارەی راگەهاندنا قەدەغەیا هاتنوچوونێ ل سنورێ پارێزگەها دهۆکێ دیار کر: قەدەغەیا هاتنوچوونێ ناهێتە راگەهاندن، لێ بریارا داخستنا چەند جهان هاتیەدان.
ماجد سەید سالح جێگرێ پارێزگارێ دهۆکێ د کۆنفرانسەکێ رۆژنامەڤانی دا راگەهاند: نوکە ئامارێن توشبوون و وەغەرکرنێ ب کۆرۆنایێ ل پاریزگەها دهۆکێ بەر ب زێدەبوونێ ڤە دچن، لدووڤ بریارا هژمارە ٤٨ یا ئەڤرۆ ل وەزارەتا نافخۆیا هەرێمێ دێ چەندین رێکار هێنە وەرگرتن.
هەروەسا گۆت ژی: لدووڤ وان رێکارێن ژ وەزارەتێ دەرکەفتین لژنا روو ب رووبوونا پارێزگەها دهۆکێ هەماهەنگی کریە و چەند بریارەک زێدەکرینە، ئەو ژی هەر کەسەکێ سەرەدانا خوارنگەهـ و مارکێتان بێ ماسک و دەستکێش بکەت دێ خودانێ وی جهی ب ملیۆن دیناران هێتە سزادان و جهی وی ژی بۆ دەمێ ١٠ رۆژان دێ هێتە داخستن، دیسان هەموو جهێن نۆشداری و سەنتەرێن جوانکاریێ و جهێن گەشتیاری و کافتریا و چایخانە دێ بۆ دەمێ ١٤ رۆژان هێنە داخستن و بریار دێ ١٢ شەڤ چنە د وارێ جێبەجێکرنێ دا.
نيشاندان