دیدار، هۆشه‌نگ تاجر:

چاڤدێره‌كێ سیاسی یێ كورد راگه‌هاند كو 11 سالن توركیا ب هه‌موو ره‌نگه‌كێ كار دكه‌ت دا نه‌هێلیت چو كیانێن كوردی ل سووریێ دروست ببن، نها ژی دڤێت ل دژی كوردان ل گه‌ل شامێ دانوستاندنان بكه‌ت لێ ئه‌مریكا ل دژی پیلانێن توركیا یه‌ و ئه‌مریكا دشێت رێگریێ ل گه‌له‌ك كاره‌ساتان بكه‌ت.

عه‌بدوللا حیجاب چاڤدێرێ سیاسی د دیداره‌كا تایبه‌ت دا بۆ ئه‌ڤرۆ دیار كر كو هه‌ر ژ رۆژا كو ئالۆزی ل سووریێ دروست بوون هه‌تا نها توركیا ب هه‌موو ره‌نگه‌كێ كار دكه‌ت دا نه‌هێلیت چو كیانێن كوردی ل سووریێ ئاڤا ببن، ژ به‌ر هندێ ژی توركیا ل ژێر ناڤێن جودا جودا كۆمێن چه‌كدار ل دژی كوردان ئاڤا كرن و خواست ب رێیا كۆمێن چه‌كدارێن توندره‌و نه‌هێلیت كورد ل سووریێ بگه‌هنه‌ مافێن خوه‌، بێگومان ئه‌و سیاسه‌تا توركیا زیانێن خوه‌ یێن گه‌له‌ك مه‌زن بۆ ئه‌مریكا هه‌بوون و گۆت: (یا كو توركیا دخواست نه‌شیا ل سووریێ بده‌ستڤه‌ بینیت و نها گه‌له‌ك ئاریشه‌ بۆ توركیا و ئه‌ردۆغانی دروست بووینه‌، ب تایبه‌تی ژی بابه‌تێ په‌نابه‌رێن سووری، چونكی ئه‌ردۆغانی بابه‌تێ په‌نابه‌ران بۆ به‌رژه‌وه‌ندیێن خوه‌ بكار ئینا و هه‌روه‌سا وه‌كو كارته‌كێ ژی ل دژی وه‌لاتێن ئێكه‌تیا ئۆرۆپا بكارئینا لێ نها ره‌وش هاتیه‌ گوهۆرین و بابه‌تێن په‌نابه‌رێن سووری ژی بوویه‌ ئاریشه‌كا گه‌له‌ك مه‌زن بۆ ئه‌ردۆغانی، ئه‌ردۆغان نها دڤێت ب رێیا دانوستاندنێن ل گه‌ل شامێ ڤی بابه‌تی ل گۆر به‌رژه‌وه‌ندیێن خوه‌ ئێكلا بكه‌ت).

چاڤدێرێ سیاسی ئه‌و یه‌ك ژی دیار كر كو په‌یوه‌ندیێن توركیا و رۆسیا ژی نها بۆ ئه‌مریكا بووینه‌ جهێ مه‌ترسیێ، به‌ری ده‌مه‌كێ به‌رپرسێن ئه‌مریكا سه‌باره‌ت ب هندێ هۆشداری ژی دانه‌ توركیا، ئانكۆ ب كورتی یا نها توركیا دڤێت ل سووریێ بكه‌ت دیسان د به‌رژه‌وه‌ندیا ئه‌مریكا دا نینه‌، ژ به‌ر هندێ ژی ئه‌مریكا هه‌ر زوو دژبه‌ریا خوه‌ ل هه‌مبه‌ر دانوستاندنێن د ناڤبه‌را توركیا و رژێما به‌شاری دا دیار كر، هه‌بوونا ئه‌مریكا ل سووریێ ب تایبه‌تی ژی ل رۆژئاڤایێ كوردستانێ دشێت ئاسته‌نگیان ل هه‌مبه‌ر پیلانێن توركیا دروست بكه‌ت.

ناڤهاتی ئه‌و یه‌ك ژی دیار كر كو توركیا دڤێت خوه‌ ژ بابه‌تێ په‌نابه‌رێن سووری قورتال بكه‌ت، لێ دڤێت وی بابه‌تی ل سه‌ر حسابێ كوردان ئێكلا بكه‌ت، ب سالانه‌ توركیا كار دكه‌ت كو په‌نابه‌رێن سووری ل رۆژئاڤایێ كوردستانێ بجه بكه‌ت و وه‌سا دیمۆگرافیا رۆژئاڤایێ كوردستانێ ب گوهۆریت، ئانكۆ یا ب سالانه‌ رژێما سووریێ نه‌شیا بكه‌ت نها توركیا دڤێت ل دژی كوردان بكه‌ت، پیلانه‌ك مه‌زن ل دژی رۆژئاڤایێ كوردستانێ هه‌یه‌ و گۆت: (هه‌كه‌ توركیا و سووریێ ل دژی كوردان رێككه‌فتنه‌كێ بكه‌ن ئه‌و یه‌ك دێ بیته‌ ئه‌گه‌رێ روودانا كاره‌ساتێن گه‌له‌ك مه‌زن، ره‌نگه‌ وه‌كو سالا ١٩٩١ یا هه‌رێما كوردستانێ بیت، لێ ئه‌مریكا هه‌ر زوو هه‌ست ب پیلانا توركیا كریه‌ و هه‌رچه‌نده‌ سیاسه‌تا ئه‌مریكا هه‌تا نها ل هه‌مبه‌ر رۆژئاڤایێ كوردستانێ گه‌له‌ك زه‌لال ژی نه‌بیت لێ ئه‌مریكا نها رێ ناده‌ت كو توركیا تشته‌كێ وه‌سا بكه‌ت، داخۆیانیا ئه‌مریكا كو دبێژیت ئه‌و ل دژی هندێ نه‌ نها توركیا و شام دانوستاندنان بكه‌ن ژی ڤێ‌ راستیێ‌ باش نیشا دده‌ت).

٣٣ پارت و ئالیێن سیاسی یێن رۆژئاڤایێ كوردستانێ داخواز ژ حوكمه‌تا سووریێ كرن كو چو رێككه‌فتنان ل گه‌ل توركیا نه‌كه‌ت، چونكی د ره‌وشا نها دا هه‌ر دانوستاندنه‌ك كو ل گه‌ل توركیا بهێته‌ كرن دێ بیته‌ ئه‌گه‌رێ ئالۆزیێن نوو و ئه‌و یه‌ك د به‌رژه‌وه‌ندیا سووریێ دا نینه‌.

٣٣ پارت و ئالیێن سیاسی یێن رۆژئاڤایێ كوردستانێ د داخۆیانیه‌كا هه‌ڤپشك دا دیار كرن كو نها ره‌وشا سووریێ گه‌له‌ك خرابه‌ و د ره‌وشه‌كا وه‌سا خراب دا كو پێشبینیا گه‌له‌ك گوهۆرینان ژی دهێته‌ كرن نابیت شام خوه‌ نێزیكی توركیا بكه‌ت، چونكی هه‌تا نها ژی قه‌یرانا سووریێ نه‌هاتیه‌ چاره‌سه‌ركرن و وه‌لاتی چاڤه‌ریێ گوهۆرینێن مه‌زن ل سووریێ دكه‌ن، د ده‌مه‌كێ وه‌سا دا هه‌كه‌ شامێ بڤێت ل گه‌ل توركیا ده‌ست ب دانوستاندنان بكه‌ت ئه‌و یه‌ك دێ ئه‌نجامێن خوه‌ یێن گه‌له‌ك خراب بۆ خه‌لكێ سووریێ هه‌بیت، چونكی ل وان ده‌ڤه‌رێن كو ل ژێر كۆنترۆلا توركیا دانه‌ خه‌لكی ب توندی نه‌رازیبوونا خوه‌ دیار كر و راگه‌هاندن كو ئه‌و ب چو ره‌نگه‌كێ قه‌بوول ناكه‌ن توركیا ل سه‌ر خوونا وان سیاسه‌تێ بكه‌ت.

د داخۆیانیێ دا ئه‌و یه‌ك ژی هاتیه‌ دیار كرن كو به‌ری هه‌ر تشته‌كێ دڤێت پرسا سووریێ د ناڤ سووریێ دا بهێته‌ چاره‌سه‌ركرن، دڤێت دستووری نها بهێته‌ گوهۆرین چونكی پێدڤیا سووریێ ب دستووره‌كێ‌ دیموكراتی هه‌یه‌، لێ هه‌كه‌ شامێ بڤێت ب جهێ چاره‌سه‌ركرنا قه‌یرانا نها ل گه‌ل توركیا دانوستاندنان بكه‌ت دێ گه‌لێ سووریێ ب توندی به‌رسڤا شامێ و ئه‌نقه‌ره‌ ده‌ن و دێ ئه‌و یه‌ك ژی بیته‌ ئه‌گه‌رێ ئالۆزیێن نوو ل سووریێ، چونكی هه‌ر دانوستاندنه‌ك د ناڤبه‌را شامێ و توركیا دا بهێته‌ كرن ژ بۆ خه‌لكێ سووریێ ب گشتی دێ یا خراب بیت و ژ به‌ر هندێ ژی باشتره‌ شام خوه‌ ژ كاره‌كێ وه‌سا دوور بكه‌ت.

ل ئالیێ دی دوهی مه‌ولوود چاڤوش ئوغلۆ وه‌زیرێ ده‌رڤه‌ یێ توركیا ژی راگه‌هاند كو سه‌رۆك كۆمارێ ئه‌ردۆغان ل گه‌ل به‌شار ئه‌سه‌دێ سه‌رۆكێ رژێما سووریێ چو هه‌ڤدیتنان ناكه‌ت و ئه‌و تشتێن كو ل هنده‌ك ده‌زگه‌هێن راگه‌هاندنێ ل دۆر وی بابه‌تی ژی به‌لاڤ بووینه‌ راست نینن و چو به‌رهه‌ڤی ژی بۆ هندێ نه‌هاتینه‌ كرن.

وه‌زیرێ ده‌رڤه‌ یێ توركیا ئه‌و یه‌ك ژی دیار كر كو دڤێت پرسا سووریێ ب رێیێن ئاشتیانه‌ بهێته‌ چاره‌سه‌ركرن و نها توركیا ل گه‌ل رۆسیا و ئیرانێ بۆ ڤێ یه‌كێ كار دكه‌ت، لێ ژ بۆ چاره‌سه‌ریا قه‌یرانا سووریێ دڤێت شام ژی هه‌لوه‌ستێ خوه‌ ل هه‌مبه‌ر هێزێن ئۆپۆزسیۆنێ بگوهۆریت، نابیت شام ئۆپۆزسیۆنا سووریێ وه‌كو هێزێن تیرۆرست ببینیت، دڤێت شام ل گه‌ل هێزێن ئۆپۆزسیۆنێ ده‌ست ب دانوستاندنان بكه‌ت و توركیا ژی به‌رهه‌ڤه‌ ژ بۆ چاره‌سه‌ریا قه‌یرانا نها ل سووریێ یا پێدڤی بكه‌ت.

ئه‌ڤرۆ:

پشتی كو هه‌ر دو ئالیێن حزبا دیموكرات یا رۆژهه‌لاتێ كوردستانێ ب فه‌رمی ئێكگرتنا خوه‌ راگه‌هاندن پارت و ئالیێن سیاسی یێن هه‌ر چار پارچێن كوردستانێ پیرۆزباهی ل حزبا دیموكرات كرن و هێڤیا سه‌ركه‌فتنێ بۆ خواستن.

پارتا سوسیالیست یا كوردستانێ ل باكور د داخۆیانیه‌كێ دا راگه‌هاند كو ئێكگرتنا هه‌ر دو ئالیێن حزبا دیموكرات بۆ خه‌باتا كوردان ل رۆژهه‌لاتێ كوردستانێ پێنگاڤه‌ك مه‌زنه‌ و هێڤی خواست كو هه‌موو پارت و ئالیێن سیاسی یێن رۆژهه‌لاتێ كوردستانێ بشێن د ده‌مه‌كێ نێزیك دا به‌ره‌یه‌كێ نه‌ته‌وه‌یی ل رۆژهه‌لاتێ كوردستانێ ئاڤا بكه‌ن.

پارتا ئازادی یا كوردستانێ ژی د داخۆیانیه‌كێ دا راگه‌هاند كو ئێكگرتنا هه‌ر دو ئالیێن حزبا دیموكرات بۆ خه‌باتا گه‌لێ كورد ل رۆژهه‌لاتێ كوردستانێ پێنگاڤه‌ك گرنگه‌ چونكی ئیران و ده‌ڤه‌را رۆژهه‌لاتا ناڤین به‌ر ب گوهۆرینێن نوو ڤه‌ دچن و گرنگه‌ كورد ل رۆژهه‌لاتێ كوردستانێ خوه‌ بۆ هه‌ر گوهۆرینه‌كێ به‌رهه‌ڤ بكه‌ن.

ل ئالیێ گه‌له‌ك كه‌سایه‌تیێن كورد یێن هه‌ر چار پارچێن كوردستانێ ژی ب رێیێن جودا جودا پیرۆزباهی ل هه‌ر دو ئالیێن حزبا دیموكرات یا كوردستانێ كرن كو شیان ئێكگرتنا خوه‌ راگه‌هینن، چونكی ب ئێكگرتنێ دێ كورد ل رۆژهه‌لاتێ كوردستانێ بهێز كه‌ڤن و نها پتر ژ هه‌ر ده‌مه‌كێ پێدڤیا كوردان ب ئێكگرتنێ هه‌یه‌.

هه‌ژی ئاماژه‌پێدانێ یه‌ كو به‌ری نها رۆسته‌م جیهانگیری ئه‌ندامێ سه‌ركردایه‌تیا حزبا دیموكرات یا كوردستان- ئیران د دیداره‌كا تایبه‌ت دا بۆ رۆژناما ئه‌ڤرۆ دیار كربوو كو وان و حزبا دیموكرات رێككه‌فتن كرینه‌ دێ وه‌كو حزبا دیموكرات یا كوردستان- ئیران پێكڤه‌ كار كه‌ن و دێ وه‌كو ئێك حزب خوه‌ بۆ قۆناغه‌كا نوو ل رۆژهه‌لاتێ كوردستانێ به‌رهه‌ڤ كه‌ن و د ناڤ شه‌ش مه‌هان هه‌تا ساله‌كێ ژی دێ كۆنگرێ ئێكگرتنێ هێته‌ سازكرن و هه‌تا وی ده‌می مسته‌فا هیجری وه‌كو سكرتێرێ گشتی و خالد عه‌زیزی ژی وه‌كو په‌یڤدار دێ حزبێ برێڤه‌ به‌ن.

جیهانگیری ئه‌و یه‌ك ژی دیار كربوو كو پشتی كۆنگرێ ئێكگرتنێ ئه‌و بزاڤا هندێ دكه‌ن كو هه‌تا دو سالێن دی كۆنگرێ ئاسایی یێ حزبا دیموكرات یا كوردستان- ئیران بهێته‌ سازكرن و د كۆنگرێ دا دێ گه‌له‌ك گوهۆرین روو ده‌ن و دێ سه‌ركردایه‌تیا نوو ژی بۆ حزبێ هێته‌ هه‌لبژارتن.

هه‌ژی ئاماژه‌پێدانێ یه‌ كو به‌ری چه‌ند سالان ژ به‌ر هنده‌ك ناكۆكیێن ناڤخوه‌یی هژماره‌ك ژ به‌رپرسێن حزبا دیموكرات یا كوردستان- ئیران ژ وێ حزبێ جودا بوون و حزبا دیموكرات ئاڤا كرن، لێ به‌ری سێ سالان جاره‌كا دی ده‌ست ب دانوستاندنان هاته‌ كرن دا كو جاره‌كا دی ببنه‌ ئێك حزب و به‌ری دو رۆژان ژی د كۆمبوونه‌كا فه‌رمی دا هه‌ر دو ئالیێن حزبا دیموكرات راگه‌هاندن كو وان بریار داینه‌ ببنه‌ ئێك حزب و دێ ل ژێر ناڤێ حزبا دیموكرات یا كوردستان- ئیران پێكڤه‌ كار كه‌ن.

هه‌ولێر، سولین سلێمان

ئه‌میندارێ گشتیێ وه‌زاره‌تا پێشمه‌رگه‌ی د دیداره‌كێدا بۆ رۆژناما «ئه‌ڤرۆ» راگه‌هاند وان داخواز كریه‌ ئه‌و ده‌ڤه‌رێن كێماسیێن  ئه‌منی لێ هه‌بن ب هێزا پێشمه‌رگه‌ی و هێزێن ئیراقێ بهێنه‌ پركرن، ژ به‌ر كو ئیراقێ شیانێن پركرنا وان كێماسیان نینن.

جه‌بار یاوه‌ر، ئه‌میندارێ گشتیێ وه‌زاره‌تا پێشمه‌رگه‌ی گوت”پێشمه‌رگه‌ هێزه‌كا مه‌زن و فیداكاره‌ وكارێن مه‌زن ئه‌نجام داینه‌ و ل پاشه‌رۆژێ ژی دێ به‌رده‌وام بیت، لێ د نوكه‌ دا ل هنده‌ك ده‌ڤه‌ران ڤالاهیێن ئه‌منی ل ئیراقێ په‌یدا بووینه‌ و ل سنوورێ د ناڤبه‌را له‌شكرێ ئیراقێ و هێزێن پێشمه‌رگه‌ی دا ب درێژاهیا 550 كیلومیتران ئۆپه‌راسیۆن تێدا دهێنه‌ ئه‌نجامدان و هه‌كه‌ هه‌ر حاله‌ته‌كێ نه‌خازرای په‌یدابوو له‌شكرێ ئیراقێ وان ده‌ڤه‌ران بجه ناهێلیت و هیچ ئاریشه‌ ژی ژ بۆ هێزێن پێشمه‌رگه‌ی و كوردستانێ دروست نابن”.

ده‌رباره‌ێ پرسا پله‌ بلندكرنا پێشمه‌رگه‌ی، ئاماژه‌ كر” ل دووڤ پێزانینێن من ئه‌و چه‌ند ئه‌فسه‌رێن كو سه‌ر ب هێزێن 80,70 و هێزێن زێره‌ڤانی و به‌رگری و فریاكه‌وتنێ لیست و ناڤ و پێزانین دره‌نگ یێن گه‌هشتینه‌ جڤاتا وه‌زیران و به‌ری وان ژی لیستا ئه‌فسه‌رێن وه‌زاره‌تا پێشمه‌رگه‌ی هاتبوو هنارتن لێ دیسا ڤه‌گه‌ریا”.

خویاكر” ئاریشا لیوایێن هه‌ڤپشك تنێ بودجه‌ و موچێ وانه‌، هیچ گۆژمه‌كێ پاره‌ی ژ بودجێ سالا 2021 بۆ نه‌هاتیه‌ ته‌رخانكرن ، داخواز هاتیه‌ كرن كو ل سالا2022 ل دۆر ئه‌و هه‌ماهه‌نگیا        د ناڤبه‌را هه‌رێمێ و به‌غدا هه‌ی ئه‌ڤ ساله‌ بودجه‌ بۆ وان بهێته‌ دابین كرن ، لێ ژ به‌ر ئه‌و ره‌شا نوكه‌ ل ئیراقێ هه‌ی هێشتا حوكمه‌ت نه‌هاتیه‌ پێكئینان و ره‌وشا ئالۆزه‌ و پێدڤیه‌ جارێ كورد تنێ ژ دوور ته‌ماشه‌ڤان بن و ده‌ستپێشخه‌ریا سه‌رۆكاتیا هه‌رێما كوردستانێ كاره‌كێ گه‌له‌ك باشه‌، ب بۆچونا من ئه‌ڤ ئالۆزیێن ئیراقێ دێ ب دوماهی هێن و هێچ روودانێن مه‌ترسێ دروست نابن”.

ئه‌ڤرۆ:

پارتی كار دكه‌ت ژ پێخه‌مه‌ت  پێشكه‌فتنا جڤاكی و ڤه‌ژاندنا ئابووری و په‌یداكرنا باشترین ژیان بۆ وه‌لاتیان، به‌رده‌وام ل گه‌ل حوكمه‌تا هه‌رێما كوردستانێ و حوكمه‌تا ئیراقێ د كار و خه‌باتێدایه‌ بۆ كوردستانه‌كا ب هێز و ژیانه‌كا باشتر

ب هه‌لكه‌فتا 76 سالیا دامه‌زراندنا پاراتی دیموكراتی كوردستان، مه‌كته‌با سیاسی یا پارتی به‌یاننامه‌ك به‌لاڤكر و ئه‌ڤه‌ ژی ده‌قێ وێ یه‌. .

وه‌لاتیێن ئه‌زیز یێن كوردستانی، مالباتێن سه‌ربلندێن شه‌هیدان و پێشمه‌رگێن قه‌هره‌مانێن كوردستانێ، كادر و ئه‌ندام و دۆست و هه‌وادار و قه‌در گرانێ نپارتی دیموكراتی كوردستان، ئه‌ڤرۆ 16 ئابه‌، رۆژا مه‌زن و پرشنگدار و به‌رهه‌مدارا گه‌لێ مه‌یه‌، كو تێدا پارتی دیموكراتی كوردستان هاتیه‌ دامه‌زراندن و ل هه‌مان رۆژ سه‌رۆك مه‌سعود بارزانی ژدایكبووی، ل ده‌ستپێكی ب دله‌كێ پر هیڤی، هیڤی به‌ر ب پاشه‌رۆژه‌كا گه‌شتر، پیرۆزباهیێ ل رۆلێن گه‌لی، سه‌رۆك بارزانی، نیشتمانپه‌روه‌ر و ئازیدیخوازان دكه‌ین. ل 16 ئابا سالا 1946، دناڤ تاریا زولمێ و رۆژێن پر ژ سته‌مێ وی ده‌می و د وه‌رچه‌رخانه‌كا دیرۆكیدا، پارتی دیموكراتی كوردستان هاته‌ دامه‌زراندن و سه‌ركێشیا خه‌باته‌كا نه‌ راوه‌ستیای ژ پێخه‌مه‌ت ئازادیا گه‌ل و ئاخ و نیشتمانی ل ستوویێ خوه‌ڤه‌ گرت و ژ هینگێ و هه‌تا نوكه‌، ئانكو 76 ساله‌، د سه‌نگه‌رێ به‌راهیێ یێ قوربانیدانێدایه‌ و بوویه‌ ناسناما كوردایه‌تیێ و قۆناغ قۆناغ، ب گۆره‌ی ره‌وش و ده‌لیڤان ده‌ستكه‌فتێن فره‌لایه‌نی بۆ گه‌لێ كوردستانێ بده‌ستڤه‌ئیناینه‌، كو ئه‌ڤرۆ ب شانازیڤه‌ بیرئانینا وان دكه‌ین، ژوان: چاره‌سه‌ركرنا گرێیا سایكۆلۆژیا بن ده‌ستیێ و دروستكرنا هیڤیه‌كێ بۆ رۆلێن گه‌لی، هه‌لكرنا شۆره‌شا مه‌زن یا ئیلۆنێ و قوربانیێن وێ و رێككه‌فتنا 11 ئادارێ، چوكدادان ب پیلانا جه‌زائیرێ و شكاندنا نسكۆ و هه‌لكرنا شۆره‌شا گۆلانا نیشتمانی، دارێشتنا پلان و نه‌خشه‌یا حه‌كیمانه‌ یا سه‌رهلدانا ئادارا سالا 1991 و رێبه‌ریكرنا به‌ره‌یێ كوردستانی ژ ئالیێ سه‌رۆك مه‌سعود بارزانی ڤه‌ و پاشی خودانبوونا ئێكه‌مین مانیفێستا هه‌لبژارتنێن دیموكراسی یێن گه‌لی، كو سه‌رۆك مه‌سعود بارزانی ل په‌یڤا خوه‌ یا دیرۆكی ل رۆژا 22 ئادارا سالا 1991 ل باژێرێ كۆیه‌ پێشكێش كری، شكاندنا له‌شكرێ رژێما به‌عس ل پشتی كۆچا ملیوونی، پشكداریكرن ل دامه‌زراندنا ئه‌زموونا ئێكه‌مین په‌رله‌مان و حوكمه‌تا هه‌رێما كوردستانێ و سه‌رپێخستنا ده‌زگه‌هێن دی یێن كوردستانێ و بریارا فیدرالیه‌تێ، پشكداریا كارا د پرۆسا ژناڤبرنا رژێما به‌عس و پرۆسا ئاڤه‌دانكرنا ئیراقا نوو و نڤیسینا دستوورێ ئیراقێ، روو ب روو بوونا رێكخراوا تیرۆرستی یا داعشێ و تاجا ده‌ستكه‌فتان ریفراندۆما سه‌ربخوه‌یا كوردستانێ بوو، كو هه‌تا هه‌تایێ جهێ شانازیا نیشتمانپه‌روه‌رێن كوردستانێ یه‌ و وه‌كو ستێر ل ئه‌سمانێ كوردستانێ دمینیت.

جه‌ماوه‌رێ ئه‌زیز یێ كوردستانێ، پارتی دیموكراتی كوردستان، ب مفا وه‌رگرتن ژ جیهانبینیا (مسته‌فا بارزانی) رێبه‌رێ نه‌ته‌وی و دامه‌زرێنه‌رێ پارتی، هه‌ر ژ رۆژا گه‌ش یا دامه‌زراندنا وێ وهه‌تا نوكه‌ خه‌باتێ دكه‌ت ژ پێخه‌مه‌ت ئاشتی، ئازادی، دیموكراسی، پێكڤه‌ژیانا ئایینی و نه‌ته‌وی و سیاسی، هه‌روه‌سا كار دكه‌ت ژ پێخه‌مه‌ت  پێشكه‌فتنا جڤاكی و ڤه‌ژاندنا ئابووری و گه‌شه‌كرنا كولتووری و په‌یداكرنا باشترین ژیان بۆ وه‌لاتیان، ژ پێخه‌مه‌ت وێ ئارمانجێ ژی به‌رده‌وام ل گه‌ل حوكمه‌تا هه‌رێما كوردستانێ و حوكمه‌تا فیدرالی یا ئیراقێ د كار و خه‌باتێدایه‌ بۆ كوردستانه‌كا ب هێز و ژیانه‌كا باشتر.

وه‌لاتیێن خوه‌شتڤی .. كادر و ئه‌ندام و دۆست و هه‌وادارێن هێژا یێن پارتی دیموكراتی كوردستان د ده‌مه‌كیدا كو ڤێ بیرئانینا شكۆدار بلند و پیرۆز رادگرین، ده‌ڤه‌ر و ئیراق وكوردستان د قۆناغه‌كا هه‌ستیار و پر ئه‌ركدا ده‌رباز دبیت، گرفتێن سیاسی و ئابووری سه‌رهلدده‌ن، له‌وما پێدڤیه‌ ئه‌م هه‌موو به‌ر ب چاره‌سه‌ریێ گاڤا بهاڤێژین،، به‌رژه‌وه‌ندیێن بلند ببینین و ل په‌نجه‌را مه‌زن سه‌حكه‌ینه‌ ئه‌ركێن نوكه‌ و یێن به‌رده‌وام، پارتی دیموكراتی كوردستان وه‌كو هه‌رده‌م، روو ل ئاشتی، چاره‌سه‌ری، ئێكرێزیا ناڤخوه‌یی دایه‌ و ل گه‌ل به‌غدا ژی دستوورێ به‌رده‌وام یێ ئیراقێ و رێككه‌فتنێ و سازانێ ب بنه‌مایێ چاره‌سه‌ریێ دزانیت و ژ پێخه‌مه‌ت وێ چه‌ندێ ژی دا نا وه‌ستیت و هه‌موو بزاڤێن وێ یێن سیاسی و دبلۆماسی یێن خوه‌ دێ ئێخیته‌ كار و پێخه‌مه‌ت وێ چه‌ندێ خه‌باتێ دكه‌ت.

د ڤێ هه‌لكه‌فتا پیرۆز دا سلاڤان بۆ گیانێ شه‌هیدێن كوردستانێ دهنێرین، ئه‌و شه‌هیدێن سه‌ربلندێن ب خوینا خوه‌ ئالایێ كوردستانێ بلند هێلای، ب سه‌رێ بلند ڤه‌ ل به‌ژنا پر ئیفتیخارا پێشمه‌رگێن قه‌هره‌مانێن كوردستانێ دنێرین و سلاڤێن شانازیێ بۆ دهنێرین. ده‌لیڤه‌كا زێرینه‌ سوپاسیا دلسۆزی و ئه‌مه‌كداریا سه‌ركردایه‌تی و كادر و ئه‌ندام و دۆست و هه‌وادارێن پارتی دیموكراتی كوردستان بكه‌ین، كو ل دژواریێ پێشمه‌رگه‌ و ل ئاشتیێ چرا و ل ده‌مێ هه‌لبژارتنان دا ده‌نگێ مسۆگه‌رێ سه‌ركه‌فتنێ نه‌ و ئیرادێ بۆ نڤشان ڤه‌دگۆهێزن. سه‌ركه‌فتن بۆ گه‌لێ كوردستانێ، بۆ پارتی دیموكراتی كوردستان، كو ژ پێخه‌مه‌ت گه‌لێ كوردستانێ و ب ده‌ستڤه‌ئینانا هیڤی و خه‌ونێن دیرۆكی هاتیه‌ دامه‌زراندن. شكۆدار بیت 16 ئاب، رۆژا مه‌زن و پرشنگدار و به‌رهه‌مدارا گه‌لێ كوردستانێ.

ئه‌ڤرۆ:

پارتی دیموكراتی كوردستان پێشنیازه‌كێ بۆ ئه‌نجامدانا هه‌لبژارتنێن په‌رله‌مانێ كوردستانێ ب شێوازێ “رێژه‌یا تێكهه‌ل” پێشكێش دكه‌ت، ب گۆره‌ی وێ پێشنیازێ 50 كورسیێن په‌رله‌مانێ كوردستانێ ب لیستا گرتی و ئێك بازنه‌یی بهێنه‌ هه‌لبژارتن و 50 كورسیێن دی ژی ب ل شێوێ لیستا ڤه‌كری و فره‌بازنه‌یی بهێنه‌ هه‌لبژارتن.

هاوار محه‌مه‌د، به‌رپرسێ پشكا قانوونی ل ده‌زگه‌هێ هه‌لبژارتن یێ پارتی دیموكراتی كوردستان راگه‌هاند” پێشنیازا پارتی چاره‌سه‌ریه‌كا گونجایه‌ بۆ هه‌ردو خواستێن سیسته‌مێ هه‌لبژارتنێن فره‌بازنه‌یی و ئێك بازنه‌یی، ناڤه‌رۆكا پێشنیازێ پێك دهێت ژ دوو شێوازان، شێوازێ ئێكێ 50 كورسی كود بیته‌ 50% ژ كورسیێن په‌رله‌مانی ب شێوازێ ئێك بازنه‌ییێ نیشتمانی بیت، شێوازێ دوویێ فره‌بازنه‌یی بیت ل سه‌ر ئاستێ پارێزگه‌هان بهێته‌ به‌لاڤكرن كو 50% ژ كورسیان بخوه‌ڤه‌ دگریت”.

دیاركر ژی” دبیت شرۆڤێن جودا جودا بۆ وێ پێشنیازا پارتی بهێنه‌ كرن، دهێته‌ گوتن ئه‌و شێوازه‌ پێشتر نه‌هاتیه‌ بكارئینان، به‌لێ ئه‌و جۆره‌ سیسته‌مه‌ سیسته‌مێ رێژه‌یا تێكهه‌له‌ كو ب (M.M.P) یێ ناڤداره‌ و ل گه‌له‌ك وه‌لاتان هاتیه‌ په‌یره‌وكرن”.

سه‌باره‌ت پێكهاتان، به‌رپرسێ پشكا قانوونی ل ده‌زگه‌هێ هه‌لبژارتن یێ پارتی دیموكراتی كوردستان دبێژیت” پارتی به‌رده‌وام بۆچوونا وێ ئه‌وه‌ كو پێدڤیه‌ پێكهاته‌ ب خوه‌ بریارێ بده‌ن، داخوازیا وان نوكه‌ ئه‌وه‌ كو هه‌لبژارتن ئێك بازنه‌ییا نیشتمانی بیت و ل هه‌موو جهان بشێن ده‌نگی ب به‌ربژارێن خوه‌ بده‌ن، هه‌روه‌سا ب شێوازێ لیستا گرتی بیت، بۆ وێ چه‌ندێ خه‌لكێ دیار و هه‌ژی بهێته‌ هنارتن بۆ په‌رله‌مانی، ئه‌ڤه‌ ژی داخوازیا پتریا ئالیانه‌”.

ناڤبری زێده‌تر گوت” چاڤه‌رێینه‌ د كۆمبوونا داهاتی یا ئالیێن سیاسی ب سه‌رپه‌رشتیا سه‌رۆكێ هه‌رێما كوردستانێ و هنارتیا سكرتێرێ گشتیێ نه‌ته‌وێن ئێكگرتی ل ئیراقێ بریار ل ژڤان و شێوازێ هه‌لبژارتنێن په‌رله‌مانێ كوردستانێ بهێته‌ دان، دڤێت ئالیێن سیاسی تاكو وی ژڤانی كو 3/9/2022 بۆ وێ كۆمبوونێ هاتیه‌ دیاركرن، خوه‌ ئێكلا بكه‌ن”.

دیدار، هۆشه‌نگ تاجر:

ئه‌ندامه‌كێ مه‌كته‌با سیاسی یا پارتی دیموكراتی كوردستان/ سووریێ دیار دكه‌ت كو هه‌تا نها ئه‌مریكا و رۆسیا رازی نینن كو توركیا ده‌ست ب چو ئۆپه‌راسیۆنان ل رۆژئاڤایێ كوردستانێ بكه‌ت لێ ژ به‌ر هه‌لبژارتنێن سالا بهێت یێن توركیا ئه‌ردۆغان ب هه‌موو ره‌نگه‌كێ كار بۆ هندێ دكه‌ت دا ئه‌مریكا و رۆسیا رازی بكه‌ت.

مسته‌فا جومعه‌ ئه‌ندامێ مه‌كته‌با سیاسی یا پارتی دیموكراتی كوردستان/ سووریێ د دیداره‌كا تایبه‌ت دا بۆ ئه‌ڤرۆ دیار كر كو به‌ری نها چه‌ندین جاران ئه‌مریكا هۆشداری دایه‌ توركیا كو نابیت ده‌ست ب چو ئۆپه‌راسیۆنان ل رۆژئاڤایێ كوردستانێ بكه‌ت، چونكی ئه‌مریكا نه‌ڤێت هه‌ڤسه‌نگیێن نها یێن سیاسی ل سووریێ تێك بچیت و خالا دی ژ بۆ ئه‌مریكا نها باش نینه‌ كو كورد ل سووریێ لاواز بن، ژ به‌ر هندێ ژی ئه‌مریكا هه‌تا نها رازی نه‌بوویه‌ توركیا ده‌ست ب كاره‌كێ وه‌سا بكه‌ت و گۆت: (هه‌بوونا ئه‌مریكا ل رۆژئاڤایێ كوردستانێ گه‌له‌ك گرنگه‌، هه‌تا هێزێن ئه‌مریكا ل رۆژئاڤایێ كوردستانێ بن و پشته‌ڤانیێ ل كوردان بكه‌ن توركیا ژی نه‌شێت وه‌سا ب ساناهی ده‌ست ب ئۆپه‌راسیۆنه‌كا نوو بكه‌ت).

ناڤهاتی ئه‌و یه‌ك ژی دیار كر كو سه‌ره‌دانا ئه‌ردۆغانی یا بۆ رۆسیا ژی هه‌تا نها چو ده‌ستكه‌فته‌كا خوه‌ یا مه‌زن نه‌بوویه‌، چونكی د به‌رژه‌وه‌ندیا رۆسیا دا نینه‌ كو توركیا ده‌ست ب ئۆپه‌راسیۆنه‌كا نوو ل رۆژئاڤایێ كوردستانێ بكه‌ت، لێ دڤێت ژبیر نه‌كه‌ین كو ژ به‌ر شه‌رێ نها یێ د ناڤبه‌را رۆسیا و ئۆكرانیایێ دا رۆسیا ژی ته‌نگاڤه‌، توركیا ژی ب هه‌موو ره‌نگه‌كێ كار دكه‌ت دا بشێت مفای ژ ره‌وشا نها یا ئالۆز وه‌ربگریت، لێ ئه‌و یه‌ك رامانا هندێ ناده‌ت كو دێ رۆسیا هه‌موو داخوازیێن توركیا ژی قه‌بوول كه‌ت و گۆت: (هه‌كه‌ تشته‌ك ژی بهێته‌ كرن ره‌نگه‌ د چه‌ند مه‌هێن بهێت دا روو بده‌ت، هه‌كه‌ رۆسیا هنده‌ك داخوازیێن توركیا ژی قه‌بوول بكه‌ت دێ ئه‌و یه‌ك یا سنۆردار بیت، ره‌نگه‌ رێ ب توركیا بهێته‌ دان كو ل شه‌هبا و منبجێ تشته‌كێ بكه‌ت لێ‌ ژ بۆ رۆژهه‌لاتێ‌ فراتێ‌ ب چو ره‌نگه‌كێ رێ ب توركیا ناهێته‌ دان، نه‌ رۆسیا و نه‌ ژی ئه‌مریكا رازی نابن، چونكی ئه‌و یه‌ك دێ بیته‌ ئه‌گه‌رێ ئالۆزیێن گه‌له‌ك مه‌زن و ئه‌و یه‌ك د به‌رژه‌وه‌ندیا رۆسیا و ئه‌مریكا دا نینه‌).

ئه‌ندامێ مه‌كته‌با سیاسی یا پارتی دیموكراتی كوردستان/ سووریێ د به‌رده‌وامیا ئاخڤتنا خوه‌ دا ئه‌و یه‌ك ژی دیار كر كو سالا بهێت دێ ل توركیا هه‌لبژارتن هێنه‌ كرن و هه‌موو ئاماژێن نها ژی نیشا دده‌ن كو ره‌وشا ئه‌ردۆغانی باش نینه‌، نها پێگه‌هێ ئه‌ردۆغانی ل توركیا گه‌له‌ك لاوازه‌، ئه‌ردۆغان ل سه‌ر هنده‌ك كارتێن نوو كار دكه‌ت دا بشێت كارتێكرنێ ل رایا گشتی یا توركیا بكه‌ت، ئه‌ردۆغانی دڤێت پشته‌ڤانیا خه‌لكی بده‌ستڤه‌ بینیت و ژ به‌ر هندێ ژی نها گه‌له‌ك به‌حسێ ئۆپه‌راسیۆنه‌كێ ل رۆژئاڤایێ كوردستانێ دهێته‌ كرن و گۆت: (رژدبوونا ئه‌ردۆغانی یا بۆ ده‌ستپێكرنا ئۆپه‌راسیۆنه‌كا نوو ل رۆژئاڤایێ كوردستانێ پتر ژ بۆ هندێ یه‌ دا ئه‌ردۆغان بشێت د هه‌لبژارتنێن سالا بهێت یێن توركیا دا سه‌ركه‌ڤیت، چونكی نها وه‌كو به‌رێ خه‌لك پشته‌ڤانیێ ل ئه‌ردۆغانی و پارتیا وی ناكه‌ن).

مسته‌فا جومعه‌ ئه‌و یه‌ك ژی دیار كر كو ئه‌و چاڤه‌رێی هنده‌ك گوهۆڕینان ل رۆژهه‌لاتا ناڤین و ب تایبه‌تی ژی ل سووریێ دكه‌ت، ره‌نگه‌ د مه‌هێن پێشیا مه‌ دا گه‌له‌ك گوهۆڕین ل ده‌ڤه‌رێ روو بده‌ن، توركیا ژی هه‌ست ب هندێ یا كری و دڤێت خوه‌ بۆ هه‌ر گوهۆڕینه‌كێ به‌رهه‌ڤ بكه‌ت و د هه‌مان ده‌می دا توركیا دڤێت وه‌كو هێزه‌كا كاریگه‌ری ل ده‌ڤه‌رێ خوه‌دان گۆتن بیت و ب تایبه‌تی ژی دڤێت ل پاشه‌رۆژا سووریێ دا خوه‌دان رۆل بیت، ژ به‌ر هندێ ژی نها توركیا ب هه‌موو ره‌نگه‌كێ كار دكه‌ت دا ل پێگه‌هێ خوه‌ ل باكورێ سووریێ بهێز بكه‌ت و گۆت: (بێگومان ژ به‌ر ڤان هه‌موو ئه‌گه‌ران ژی توركیا به‌رده‌وام به‌حسێ ده‌ستپێكرنا ئۆپه‌راسیۆنه‌كا نوو ل باكورێ سووریێ دكه‌ت، نها به‌رهه‌ڤیێن باش ژی هاتینه‌ كرن).

ناڤهاتی د دووماهیا ئاخڤتنا خوه‌ دا ئه‌و یه‌ك دیار كر كو هه‌تا ئه‌مریكا و رۆسیا رازی نه‌بن بێگومان توركیا نه‌شێت ده‌ست ب چو ئۆپه‌راسیۆنێن نوو ل رۆژئاڤایێ كوردستانێ بكه‌ت، چونكی ئه‌مریكا به‌رژه‌وه‌ندیێن جودا ل سووریێ ب تایبه‌تی ژی ل رۆژئاڤایێ كوردستانێ هه‌نه‌، ئه‌مریكا نه‌ڤێت د ره‌وشا نها دا پێگه‌هێ كوردان ل سووریێ لاواز بیت، ژ به‌ر هندێ ژی هه‌تا نها ئه‌مریكا رازی نه‌بوویه‌ توركیا ده‌ست ب چو ئۆپه‌راسیۆنان بكه‌ت و بێگومان هه‌تا ئه‌مریكا رازی نه‌بیت توركیا نه‌شێت چ بكه‌ت و گۆت: (هنده‌ك ئێرشێن سنۆردار نها ب رێیا درۆنان ژ ئالیێ توركیا ڤه‌ دهێنه‌ كرن، رۆسیا و ئه‌مریكا ژی هه‌لوه‌سته‌ك توند نیشا نه‌داینه‌، دیاره‌ ئه‌و یه‌ك ژی پتر بۆ دلخوه‌شكرنا توركیا یه‌ و وان دڤێت ئۆپه‌راسیۆن و كریارێن توركیا وه‌سا سنۆردار بمینن).

هه‌ولێر، قائید میرۆ

چه‌ند رۆژه‌كه‌ لایه‌نگرێن موقته‌دا سه‌در ده‌ست ب خوه‌نیشادانان كریه‌ و ره‌وشا ئیراقێ به‌ر ب  ئالۆزیان دچیت په‌رله‌مانتاره‌كێ كورد ژی ل جڤاتا نوونه‌رێن ئیراقێ ئاماژه‌كر، هه‌موو بزاڤ دهێنه‌كرن بۆ دوباره‌ ئه‌نجامدانا هه‌لبژارتنان، به‌لێ هه‌كه‌ هه‌لبژارتن بهێنه‌ ئه‌نجامدان، دێ كاره‌سات ل ئیراقێ په‌یدا بن، ناڤبری ل دۆر رۆلێ كوردان ژی دبێژیت، كورد پشكه‌ك نینن ژ ئالۆزیێن نوكه‌ یێن ئیراقێ.

سیپان شێروانی، ئه‌ندامێ جڤاتا نوونه‌رێن ئیراقێ ژ فڕاكسیۆنا پارتی ل به‌غدا بۆ رۆژناما (ئه‌ڤرۆ) گۆت” خوه‌نیشادانێن نوكه‌ ل ئیراقێ دهێنه‌ ئه‌نجامدان تشته‌كێ چاڤه‌ڕێ كری بوویه‌، چونكه‌ ده‌مێ موقته‌دا سه‌در سه‌رۆكێ ره‌وتا سه‌دری خوه‌ ڤه‌كێشای ل پرۆسا سیاسی یا ئیراقێ، مه‌ پێشبینیا ڤێ چه‌ندێ دكر دێ ئالۆزی په‌یدابن و دێ گڤاشتنان كه‌ته‌ سه‌ر ده‌ستهه‌لاتدارێن ئیراقێ، هه‌كه‌ بهێت و محه‌مه‌د شیاع سودانی ژی وه‌ك به‌ربژارێ پۆستێ سه‌رۆك وه‌زیران بهێته‌ ڤه‌كێشان ژی دێ خوه‌نیشادان و ئالۆزیێن ئیراقێ هه‌ر به‌رده‌وام بن، له‌وڕا ژی پێشبینی هه‌موو ئه‌ون دێ خوه‌نیشادانێن لایه‌نگرێن موقته‌دا سه‌در به‌رده‌وام بن هه‌تا گڤاشتن دهێنه‌ كرن بۆ دووباره‌ ئه‌نجامدانا هه‌لبژارتنان ل ئیراقێ، هه‌كه‌ هات وهه‌لبژارتن جاره‌كادی بهێنه‌كرن ژی تشتێ وه‌سا ل جیهانێ نه‌بوویه‌ و ل گۆر دیتنا من هه‌كه‌ هه‌لبژارتن بهێنه‌ دوباره‌كرن دێ كاره‌سات په‌یدابن، خه‌لكه‌ك یێ به‌رهه‌ڤه‌ لسه‌ر ئێك (تویتا) موقته‌دا سه‌در گیانێ خوه‌ لسه‌ر ده‌ستێ خوه‌ دانیت، ئه‌ڤه‌ هه‌موو نیشانێن وێ چه‌ندێ نه‌ كو خه‌لكێ ئیراقێ یێ بێزاره‌ ژ ره‌وشا نوكه‌ یا ئیراق تێدا ده‌رباز دبیت، ره‌نگه‌ ژی سیسته‌مێ نوكه‌ یێ حوكمڕانیێ ل ئیراقێ نه‌مینیت”.

ل دۆر رێڤه‌چوونا كۆمبوونا جڤاتا نوونه‌رێن ئیراقێ، ڤی په‌رله‌مانتاری ئاشكراكر” هه‌تا نوكه‌ ژڤانێ ئه‌نجامدانا كۆمبوونا جڤاتا نوونه‌ران بۆ هه‌لبژارتنا سه‌رۆك كۆمارێ و سه‌رۆك وه‌زیران نه‌هاتیه‌ دیاركرن، ده‌مێ كۆمبوونێن جڤاتا نوونه‌ران ژی یێ دیار نینه‌ و ئه‌و پێزانینێن دهێنه‌ به‌لاڤكرن ل دۆر رۆژا كۆمبوون دێ تێدا هێته‌ ئه‌نجامدان چ راستی بۆ نینه‌”.

سیپان شێروانی گۆت ژی” ب دیتنا من ئه‌نجامدانا هه‌لبژارتنان نابیته‌ چاره‌سه‌ری بۆ ره‌وشا نوكه‌ یا ئیراقێ، چونكه‌ ئه‌ڤه‌ پێنج هه‌لبژارتن ل ئیراقێ هاتنه‌ ئه‌نجامدان وهه‌مان ئه‌نجام هه‌نه‌ و ره‌وش ناهێته‌ گوهۆڕین، ئیراقیان سه‌ربور دگه‌ل هه‌لبژارتنان هه‌نه‌ و یێن گه‌هشتینه‌ وێ باوه‌ریێ هه‌لبژارتن گوهۆڕینان په‌یدا ناكه‌ن بۆ نموونه‌ سالا ٢٠١٠ێ ئه‌یاد عه‌لاوی ده‌نگێ ئێكێ بده‌ستڤه‌ئینا، به‌لێ نوری مالیكی حوكمه‌ت پێكئینا، دیسان ل سالا ٢٠١٤ێ موقته‌دا سه‌در ئێكه‌م بۆ ل هه‌لبژارتنان به‌لێ حوكمه‌ت ژئالیێ هه‌ڤپه‌یمانیا ده‌وله‌تا قانوونێ هاته‌ پێكئینان، چه‌ند هه‌لبژارتن ل ئیراقێ بهێنه‌ ئه‌نجامدان، هه‌مان سیسته‌مێ حوكمڕانیا دهێته‌ به‌رهه‌م، كورد پشكه‌ك نینن ژ ئاریشێن نوكه‌ ل ئیراقێ په‌یدابووین، به‌ری نوكه‌ ژی شه‌ڕێ مه‌زهه‌بی ل ئیراقێ هه‌بوو و كورد پشكه‌ك نه‌بووینه‌ ژ ڤان هه‌ڤڕكیێن دناڤبه‌را ئیراقیان دا هه‌ین، به‌رۆڤاژی كورد زێده‌تر وه‌كو ته‌ماشه‌كه‌ر مایه‌ هه‌مبه‌ر وان ئالۆزیێن نوكه‌ دناڤبه‌را ئیراقیان دا هه‌ین، هه‌كه‌ كورد نه‌بنه‌ پشكه‌ك بۆ چاره‌سه‌ریێ، نابنه‌ لایه‌نگرێ هیچ مه‌زهه‌ب وئالیه‌كێ شیعی یان ژی د ناڤبه‌را شیعه‌ و سوننه‌ێن ئیراقێ دا”.