ئه‌ڤرۆ نيوز، نيوار محه‌مه‌د سه‌ليم:

سه‌رۆكا لژنا په‌روه‌رده‌ و خواندن و ئه‌وقاف و كاروبارێن ئاينى ل جڤاتا پارێزگه‌ها دهۆكێ راگه‌هاند كو ب ره‌نگه‌كێ گشتى ل پارێزگه‌ها دهۆكێ 23 قوتابخانێن سێ ده‌وامى يێن هه‌ين و پتريا وان ژى دكه‌ڤنه‌ قه‌زا شنگال.

جمبه‌د شوكرى، سه‌رۆكا لژنا په‌روه‌رده‌ و خواندن و ئه‌وقاف و كاروبارێن ئاينى ل جڤاتا پارێزگه‌ها دهۆكێ، بۆ ئه‌ڤرۆ نيوز دياركر كو ژ به‌ر قه‌يرانا دارايى قوتابخانه‌ وه‌كو پێدڤى ناهێنه‌ ئاڤاكرن و ئه‌ڤێ چه‌ندێ ژى كارتێكرن ب ره‌نگه‌كێ نه‌رێنى ل سه‌ر ده‌وامێن قوتابخانان كرينه.

زێده‌تر گۆت: “نها ل سنورێ پارێزگه‌ها دهۆكێ ژ سه‌رجه‌مێ هزار و 604 قوتابخانان، 23 قوتابخانێن سێ ده‌وامى هه‌نه‌ و 452 ژى دو ده‌وامى نه‌”.

جمبه‌د شوكرى ئاشكه‌را ژى كر كو هه‌شت قوتابخانێن سێ ده‌وامى ل سنورێ قه‌زا شنگالێ نه‌ و چار ژى ل قه‌زا سێمێلێ و چار ژى ل سنورێ په‌روه‌ردا رۆژهه‌لات و ل ئامێدى و ئاكرێ دو قوتابخانه‌ و ل په‌روه‌ردا زاخۆ و دهۆك رۆژئاڤا و به‌رده‌ره‌ش ژى قوتابخانه‌ك و گۆت: “خۆشبه‌ختانه‌ ل سنورێ په‌روه‌ردێ شێخان و تلكێف و زۆممار چو قوتابخانێن سێ ده‌وامى نينن”.

سه‌رۆكا لژنا په‌روه‌رده‌ و خواندن و ئه‌وقاف و كاروبارێن ئاينى ل جڤاتا پارێزگه‌ها دهۆكێ ئه‌ڤ قوتابخانێن سێ ده‌وامى كارتێكرنێ ل سه‌ر ده‌مژمێرێن ده‌وامێ دكه‌ن و به‌هرا وانان دكه‌ن و ل دووڤ پێدڤى مامۆستايان شيانێن گه‌هاندنا وانان وه‌كو يێن دو ده‌وامى و ئێك ده‌وامى نينن.

هه‌رچه‌نده‌ وه‌زاره‌تا په‌روه‌ردێ بڕيار دابوو كو نابيت قوتابخانێن سێ ده‌وامى ل هه‌رێما كوردستانێ بمينن، به‌لێ ژ به‌ر قه‌يرانا دارايى ئه‌ڤ بابه‌ته‌ به‌ر ب زێده‌بوونێ ڤه‌ دچيت و دا كو ئه‌ڤ كێشه‌ چاره‌ هه‌بيت د نها دا پارێزگه‌ها دهۆكێ ب كێمى پێدڤى ب 23 قوتابخانێن دى هه‌يه‌.

جمبه‌د شوكرى ئاشكه‌را ژى كر كو ل دووڤ ستانده‌ردێن جيهانى نابيت ژ 20 هه‌تا 25 قوتابيان د ئێك پۆل دابن، به‌لێ ل گه‌ل قوتابخانان هه‌تا 45 قوتابيان ژى يێن د ئێك پۆل دا هه‌ين.

 ئه‌ڤرۆ نيوز، نيوار محه‌مه‌د سه‌ليم:

ئه‌ندامه‌كێ جڤاتا پارێزگه‌ها دهۆكێ راگه‌هاند كو ل سه‌ر جاددا سێمێل بۆ زاخۆ ئۆڤه‌رپاسه‌ك دێ هێته‌ دانان و پێشبينى دهێته‌ كرن ل ده‌ستپێكا سالا نوو ده‌ست ب كارى بهێته‌ كرن.

ديندار عه‌بدى كۆچه‌ر، ئه‌ندامێ جڤاتا پارێزگه‌ها دهۆكێ، د داخۆيانيه‌كێ دا بۆ ئه‌ڤرۆ نيوز گۆت: “بڕياره‌ ل سه‌ر رێيا سێمێل بۆ زاخۆ ببيته‌ ئۆڤه‌ر پاسه‌ك بهێته دروستكرن”.

زێده‌تر گۆت: “پرۆژه‌ يێ وه‌زاره‌تا ئاڤه‌دانكرن و بنه‌جهكرنێ يه‌ و ژ لايێ حوكمه‌تا هه‌رێما كوردستانێ ڤه‌ پشته‌ڤانيا دارايى بۆ هاتيه‌ دابينكرن ب كۆژمێ پێنج مليار و 529 مليۆن ديناران”.

ئه‌ندامێ جڤاتا پارێزگه‌ها دهۆكێ ئاشكه‌را ژى كر كو نها پرۆژه‌ بۆ كارگێريا پارێزگه‌ها دهۆكێ هاتيه‌ ره‌وانه‌كرن و ده‌ست ب وه‌رگرتنا ته‌نده‌ران هاتيه‌ كرن و هاتيه‌ راگه‌هاندن و د سه‌رككێمكرنه‌كا ئاشكه‌را دا دێ بۆ كۆمپانيه‌كێ كه‌ڤيت كو ئه‌ڤ رێكارێن ئيدارى و قانوونى‌ ژى دبيت نێزيكى هه‌يڤه‌كێ ڤه‌كێشن.

ديندار عه‌بدى كۆچه‌ر نه‌ڤه‌شارت ژى كو ل دووڤ پێشبينيان ل ده‌ستپێكا سالا نوو دێ ده‌ست ب پرۆژه‌يى هێته‌ كرن و بڕياره‌ د ماوێ 500 رۆژان دا پرۆژه‌ ب دووماهى بهێت ژ مێژوويا ده‌ست بكاربوونێ.

ئه‌ڤرۆ نيوز، نيوار محه‌مه‌د سه‌ليم:

وه‌زاره‌تا كاره‌بێ بڕيار دايه‌ كاره‌با به‌رده‌وام ژ چه‌ند داموده‌زگه‌هه‌كان ببڕيت و ناڤێن وان ژى ئاشكه‌را دكه‌ت كو پێشتر ب ره‌نگه‌كێ به‌رده‌وام كاره‌ب بۆ دهاته‌ دابينكرن.

وه‌زاره‌تا كاره‌بێ د روونكرنه‌كێ دا راگه‌هاند: “ژ به‌ر به‌رژه‌وه‌نديا گشتى و به‌لاڤكرنا كاره‌بێ ب ره‌نگه‌كێ دادپه‌روه‌رانه‌ ل سه‌ر وه‌لاتيان، وه‌زاره‌تا كاره‌بێ ب فه‌رمانا وه‌زارى يا 341 ل رێكه‌فتى 28ى چريا دويێ 2019 بڕيارا بڕينا كاره‌با به‌رده‌وام ب تنێ بۆ (نه‌خۆشخانێن حكۆمى و پرۆژێن ئاڤێ و فرۆكخانه‌ و به‌نكێن ناڤه‌ندى يێن هه‌رێمێ و فه‌رمانگه‌هێن پاسپۆرت و كارتا نشتيمانى و چاكسازى و كۆمه‌لگه‌هێن خالێن سنورى) هه‌بيت”.

د فه‌رمانا وه‌زارى دا هاتيه‌ ژى كو هه‌ڤدژى ڤێ چه‌ندێ رێڤه‌به‌رێن گشتى يێ باژێران و رێڤه‌به‌ريا به‌لاڤكرنا كاره‌بێ دێ ژێ به‌رپرس بن ژ هه‌بوونا كاره‌با به‌رده‌وام بۆ ئه‌وان جهێن ژبلى يێن ناڤێن وان ل خوارێ هاتيه‌ دياركرن، “دڤێت ب زووترين ده‌م كاره‌با به‌رده‌وام ژ وان هه‌موو جهێن دى بهێته‌ بڕين”.